|
|
|
 Re: إشـتـهـيـت الـحـلآق ... والله صـحـي ... (Re: معاوية المدير)
|
في فترة من فترات عمرنا
الحلآقين ضربتُم بوّرة العدو. أصبح سوق الحلآقة في حالة كساد بعد ان جلب
لنا الغرب موضة الخنفسة. خنفسنا الشعر، ولِبسنا الشارلستونات، وأصبح اجعص خُلآل يدخل في شعرنا
الشعر جب يبلعو. بقينا نسمع بوني أم، والبِي جيز، وتينا تشارلز، وبوب مارلي، والحلآقين زآتُم خنفسو بعد
قِنعوا من خيراً فيها. كنا في البحر الوآحد يغتس و يجي بآقي مع نفضة للشعر في الهواء علي طريقة نفضة
شامي كابور. قاصرنا الأدروبات في الشَعَر و الخُلالآت التي كانوا بارعين في صناعتها. الصينيين النجيضيين
إنتهزوا فُرصة الخنفسة، ودفسوا العالم بالخُلالآت مع إنهم شعرهم سبيبي. كنا باقيين في شعرنا عشرة. سبيبة
وآحدة ما بنخليها تنزل من راسنا، وكان الوآحد حنّ علي الحلآقين ورآح للحلآق واسالوا الشعر المتطاير، اليوم
التاني الجكس يجوك: يخسي عليك يا ود المدير، يعني حلقت مآلك ؟؟؟.
بعد زمن رجعنا من شرنقة الخنفسة إلي يرقة الحِلآقة تاني. إستيقظ الحلآقين من فترة البيات التي فُرضت عليهم
ليظهروا بمظهر جديد. اليافطة بدل دُكان حلآق، بقى مكتوب عليها صالون حلآقة. المكنة راس النِيّفة حلّت محلها
وآحدة بالكهربا معاها المطواة البسنوها بالجِلدة المعلقة في باب الصالون لزوم القطعيّة. ممكن تلقى صورة لفريق
الهلآل أو المريخ معلقة في الصالون. أو صورة لمصطفى النقر مع صورة لنجلآ فتحي
و عادل إمام. قطعة نضيّفة لتقيك من لسع الشعر، بخاخ كلونيا، بُودرة و فرشاة. الصالون نضيّف و الحلآق دايماً
بتكون عندو شِلّة بتاعت ونسة. الزبون تلقائياً بيكون دخل في الونسة التي غالباً ما تكون في مجال الكورة أو السياسة.
مسألة الحِلآقة أصبحت نوع من البرنامج الممتع، والحلآقين بقو يظبطوا حلآقة مُبالغة.
والله صحي...
| |
 
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
دآرت عجلة الزمن لتدخلنا إلي دآئرة الهموم. دخلنا مجال العمل، وبدينا مشوار البحث
عن شريكة الحياة الزآخر بالأحلآم الوردية التي تقودك بدورها للتفكير في الغربة لزوم
تصليح الوضع و كِدا. فترة الخطوبة
وضطدت علآقتنا بالحلآقين اكتر. الونسة مع الحلآقين فرآيحيّة، والوآحد فينا بيكون مطمئن
جداً للحلآق بعد يكون حلق عندو مرتين تلآتة، والحلآق عِرِف الإستايل بتاعو. صالونات
الحلآقة بقت زي الصالونات الأدبية. الوآحد فينا أصبح حتي لو ما دآير يحلق بيرافق
صاحبو للحلآق كي يمتع نفسو بالحوارات التي تتم في داخل صالون الحلآقة.
الغربة حلم كان يراودني تحقق لأعتلي سلم الطيارة و شعري في كامل هيئته لم ينقص سبيبة وآحدة.
إستمرّ التواصل مع الحلآقين في الغربة. صالونات الحلآقة في الغربة شبيهة بصالونات الحلآقة في بلدنا.
الحلآق في الغربة برضو عندو شِلّة أُنس سوا كان جاميكي أو زلمي وهم الجنسين البنتعامل معاهم.
سبق أن حلقت كم مرّة في صالون بتاع إيطالي، وأكاد أجزم إنو حكاية شلة الأُنس دي فكرتا نابعة من الحلآقين الإيطال.
الراجل عندو شِلّة بتاعت ونسة مبالغة...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
بعد الزواج حضرت زوجتي لِتمشي معي خُطى الغربة التي كُتبت علينا، وبعد
دآك الجراكيك الإتنين إنضموا للركب، والحكاية بقت فيها نِقة من ثلآثتهم، وانا بقيت
ما عارف القاها من العدو واللآ من الوفد المرافق له ؟؟؟!!!. علآمات التصحُر بدأت
تظهر في نُص الكانكوج حيث أصبح الشعر خفيييييف
جداً السبب الذي أفسد عليّ الونسة مع الحلآق حيث أصبح تركيزي كلو محصور
في منطقة التصحر. بكون مرآقب الحلآق مُراقبة لصيقة جداً طُول فترة الحلآقة،
وبمجرد ما يمشي علي المنطقة الصحراوية أنا طوالي الرجفة تمسكني،
واقولوا: لالالالالالاأأأآ، المحلة دي لا تعصر عليها شديد، بس خلي الشعر كلو يكون موزون عليها.
بعد فترة لقيت إنو الصِلة بيني و بين الحلآق إنقطعت، و الحكاية أصبحت
لا تتعدى وقفة خمسة دقايق قدآم المرآيا اقضي فيها علي الشِعيرآت الفضلن
لاصقات في جنبات الراس. كان ختيت الرحمن في قلبي وكشحت الشِعيرآت
من الموس في صينيّة وقعدت فوقِن، لومكم بي تب بحسِبِن.
والله صحي.
لله ما أعطى، و ما أخذ.
إنا لله و إنا إليه رآجعون...
.
.
.
ود المدير...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote:
لنا الغرب موضة الخنفسة. خنفسنا الشعر، ولِبسنا الشارلستونات، وأصبح اجعص خُلآل يدخل في شعرنا
الشعر جب يبلعو. بقينا نسمع بوني أم، والبِي جيز، وتينا تشارلز، وبوب مارلي، والحلآقين زآتُم خنفسو بعد
قِنعوا من خيراً فيها. كنا في البحر الوآحد يغتس و يجي بآقي مع نفضة للشعر في الهواء علي طريقة نفضة
شامي كابور. قاصرنا الأدروبات في الشَعَر و الخُلالآت التي كانوا بارعين في صناعتها. الصينيين النجيضيين
إنتهزوا فُرصة الخنفسة، ودفسوا العالم بالخُلالآت
|
العزيز/ معاوية
سلامات
كلامك الفوق ده خلاني افتش عليك بيناتنا ايام زمان ديك..
الحكي والنضم ياهو ذاتو..
يا زول انت فردة عديييل كدا..
لكن المداخلات البعدها فرقت بيننا
ياخوي عايشنا الزمن السمح داك سوا
بس التصحر ده انت انفردت بيهو براك..
ان شاء الله ينفعك والله
وما حاسدنك فيهو تب
الشعر لسة كامل العدد والقوام
بس في مفتشين حركة ولا شنو كدا بيظهروا مرة مرة بين شجر الغابة السوداء..
الحلاق فعلا نادي مصغر..
تجد في الحكاوي وأخبار البلد..
ولليوم ما لقيت لي حلاق ما ثرثار..
ويخيل لي انها من أدبيات ودعامات المهنة..
يا له من زمن جميل
مودتي
| |
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
ياخ ازيك ياخ
وحات الله كلامك عن الحلاق يخلى الزول يشيل دقنوسه ويمشى يحلق
طبعا بقيت احلق زى الولاد
يوم مشيت مع صديقة امريكية لعرض مسرحى
لاحظت انه العواجيز القدرنا كلهن حالقات شعرهن طبعا بمن فيهم اختكم فى الله
ياخ الحلاقة دى مريحة كيف ؟
وعليك الله ما تنسى حلاقة تحت الشجرة
فى البيت يوم الجمعة لجدك
تحياتى يا نبيل
| |
|
|
|
|
|
|
|
|
 Re: إشـتـهـيـت الـحـلآق ... والله صـحـي ... (Re: سلمى الشيخ سلامة)
|
ههههههههههههه
والله يا معاوية ضحكتني والبشوف مصيبة غيرو تهون عليهو مصيبتو
انا بشكي من الشيب الكتير وانت ما لاقي حتة تسيب فيها ذاتو  شفت المفارقات دي كيف ؟
شيبي زاد كتير جدا من آخر مرة اتلاقينا فيها وتقريبا شمل 98% من الشعر الظاهر للعيان خصوصا بعد الوعكة الاخيرة دي
وبقيت بمشي للحلاق اكتر من مرة في الشهر عشان الشعر ما يطول ولما يطول بتصنف طوالي في خانة اجدادنا القدماء
وفي النهاية اشتريت مكنة وحاليا بحلق لي ولدي ومرات المدام ههههه لقوا ليهم يتيم ملح ساي
غايتو الله غالب وكل زول ما عاجبو حالو .. لكن برضو نحمد الله قدر اخف من قدر
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote: برود العيد، والبرود بعد حلآقة العيد. يا حِليل الحلآق. فارقتو فُرآق الطريفي لجملو. كنا نمشي ننتظر
دورنا في الحلآق. نقعد فوق الكرسي قدآم المرآيا التي وُضعت لغيرنا من الناس الكُبار، و يبدأ الحلآق
يجعل مكنته التي تشبه فكين راس النِيّفة تعمل العجب في روسينا. الشعر ينزل فوق الرقبة مع العرق
والـوسـخ ويسبب لينا ضيّق، ويقرِصنا، إضافة لظعطات المكنة المتوآلية، وقرضات المقص الحآرة،
وهرشات الحلآق عندما يصيبنا النعاس والراس يقع فوق السدُر. الحلآقين كانوا دايماً يهرشونا وينهزرونا
عندما تنزل قملة، قملتين مع الشعر. الحلآق بعد يحلق للوآحد عادي بعدو بيقعِد التاني يجزو زي الماحصل |
الكلام ده نسميهو شنو ؟ مذكرات اصلع ! ولا رحلة العذاب والكتاب والصلع الهباب :)
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: العوض المسلمي)
|
اخي معاوية
عادة ثابتة اكتسبتها منذ دخولي كلية الشرطه وهي ان اذهب للحلاق جمعه واغيب جمعه ..
مازلت مواظبا علي هذا المشوار نصف الشهري الذي أدفع فيه للحلاق عشرين درهما
واسمع ضجيجا ولا اري طحنا .. والاحظ نظرات استغراب في عيون رواد صالون
الحلاقه ... ولا يقول لي اي واحد منهم (نعيما) .. ما تعرف ليه ياخي.
عمر علي حسن
| |
|
|
|
|
|
|
|
|
 Re: إشـتـهـيـت الـحـلآق ... والله صـحـي ... (Re: عمر علي حسن)
|
وصلني عبر الإيميل:
Quote: يا معاويه كيفك ياخ, البوست بتاع الحلاقه ذكرني ود عمي
لما الصلعه بدت و الشعر ماشي كل يوم في انحسار.
ود عمي قال عايز استشاره من زول عنده معرفه بالشعر و تساقطه,
و لقي انه مافي احسن من الحلاق. قام زولك مشي لي مصطفي الحلاق و سألو "
يا عم مصطفي الصلعه بدت و ما عارف اعمل شنو عشان اوقفها".
طبعاَ ود عمي متخيل انو حيلقي الرد الحيوقف تساقط الشعر, اتخيل رد
مصطفي الحلاق كان شنو, قال ليه " كتر من الصور"....
يعني مافي اي امل تاني و البقت بقت
..
سلام للمقداد و فطومه |
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote:
انا لله والله ياود المدير أنت ديناصور عديل كدة
بلاهي أنت من زمن الحلاق بيقعدوا ليهوا في الصف؟
علي قول قيقراوي كلو في المافي شنو أمشي أزرع
الشعر وأرجع تاني للحلاق والله صحي.
تحياتي ياخال |
يا ود الباهي تضحك بلآهن، يعجبك خلآهن.
يعني هسي مافي صف في الحلآق ؟؟؟
ما لقيت تستشهد بغير كلآم قيقراوي؟! يا زول أنا كان
قادر ازرع كان زرعت ملوخية. والله صحي.
خال يا كبير ! عليك الله هسّع بدلتك الدارعا دي ما بتسوي
لي تلآتا عراريق؟؟؟. قال خال، قال!!!
خُلآل السِدِر...
| |
|
|
|
|
|
|
|
|
 Re: إشـتـهـيـت الـحـلآق ... والله صـحـي ... (Re: معاوية المدير)
|
Quote: ياخوي عايشنا الزمن السمح داك سوا
بس التصحر ده انت انفردت بيهو براك..
ان شاء الله ينفعك والله
وما حاسدنك فيهو تب
الشعر لسة كامل العدد والقوام
بس في مفتشين حركة ولا شنو كدا بيظهروا مرة مرة بين شجر الغابة السوداء..
الحلاق فعلا نادي مصغر..
تجد في الحكاوي وأخبار البلد..
ولليوم ما لقيت لي حلاق ما ثرثار..
ويخيل لي انها من أدبيات ودعامات المهنة..
يا له من زمن جميل |
عبد العزيز يا فردة،
سلآمات.
إن شاء تصحري ينفعني. باقي الليام ديل طالع موضة، يا حاسدين.
يا عبد العزيز المفتشين اليملو لياقة قميصك يا بركة الجمعة الجامعة،
والكلمة السامعة.
عارف، عندي صاحبي قريباً لمنصور المفتاح، مشيت معاهو قبل عشرة
سنين عشان يأجر بيت. أها، المرا قالت لو، أديني الرخصة عشان نعمل
لك الإجرات. عاينت في الرخصة، شافت تاريخ الميلآد. قالت ليهو إنت
بتستحق تخفيض بتاع السينير.
وحاتك يا فردة الزول دا ليوم الليلة شعرو زي ما هو، لا صلعة، لا شيب!!!
قدر ما اشوفو بقولو، والله أنا مافي حاجة موجعاني يا عبد القادر غير شعرك
المالي راسك دا، وعدمان الشيب كمان...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote:
ياخ ازيك ياخ
وحات الله كلامك عن الحلاق يخلى الزول يشيل دقنوسه ويمشى يحلق
طبعا بقيت احلق زى الولاد
يوم مشيت مع صديقة امريكية لعرض مسرحى
لاحظت انه العواجيز القدرنا كلهن حالقات شعرهن طبعا بمن فيهم اختكم فى الله
ياخ الحلاقة دى مريحة كيف ؟
وعليك الله ما تنسى حلاقة تحت الشجرة
فى البيت يوم الجمعة لجدك
تحياتى يا نبيل |
والله مشتاقين يا بت الشيخ.
يعني يا سلمى بديتي محل إنتهينا نحن.
بقيت لمان أشوف دكان الحلآق اقولو:
جاي ترجع الماضي؟؟
خلآس الماضي ولَّ ورآح.
طبعاً أخوكِ في الحِلة كان عامل فيها حلآق. بحلق كويس
بس يدي تقيلة. عندي أخوي كان بيحلق عندي بس بيزهج
لمان أطوّل. يقوم يقول لي: ياخي كده كفاية، الباقي خليهو مرّة
تانية، ويقوم يمشي بنص حلآقة، أو رُبُع حلآقة، ومتي مايلقى
فرقة بيجيني اتمها ليهو.
عيك الله يا سلمى تعالي نكتب عن يوم الجمعة في القرية،
أو الحِلّة. في حاجات كتيرة جميلة كانت بتحصل في يوم
الجمعة تستاهل نكتب عنها...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote:
ياااااااااااااااا الله حسن الخاتمة :)
____________________
دي كرامات شيخنا محمد مصطفى :) |
نسأل الله ان يختم لنا بخاتمة السعادة أجمعين.
يا شيخ عماد يا اخي بتعدل مالك ؟؟؟
عقدتنا عديييل كدا.
والله صحي.
يا اخي أُخُد رآحتك بالكامل، نحن بساطنا أحمدي.
خليك من النملة الجسما قزازي دي، يا زول الضب اب كرعينن
خشنات وفيهن لصاق صلعة أخوك بقت تزحلقو زي الترتيب.
قلت لي شيخ محمد مصطفى بيّن فيني؟ 
إنت ما كان تخلي الصورة عشان يوريك الرش.
يا أخي عليك الله أنسى حكاية التعديل دي،
وخلينا نتونس بأريحية.
مودتي...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote: ههههههههههههه
والله يا معاوية ضحكتني والبشوف مصيبة غيرو تهون عليهو مصيبتو
انا بشكي من الشيب الكتير وانت ما لاقي حتة تشيب فيها ذاتو شفت المفارقات دي كيف ؟
شيبي زاد كتير جدا من آخر مرة اتلاقينا فيها وتقريبا شمل 98% من الشعر الظاهر للعيان خصوصا بعد الوعكة الاخيرة دي
وبقيت بمشي للحلاق اكتر من مرة في الشهر عشان الشعر ما يطول ولما يطول بتصنف طوالي في خانة اجدادنا القدماء
وفي النهاية اشتريت مكنة وحاليا بحلق لي ولدي ومرات المدام ههههه لقوا ليهم يتيم ملح ساي
غايتو الله غالب وكل زول ما عاجبو حالو .. لكن برضو نحمد الله قدر اخف من قدر |
سلآمات يا عبد الوهاب.
يا اخي ربنا يديك الصحة والعافية، واحلق صلعة عشان تبقى من أجدادنا المودرن.
وحات الله يا عبد الوهاب الشِعيرات الفضلن عندي مطروشات شيب. يعني طريقة
اقشر بيهن مافي. بعدين يا اخي الحلآق دا إسمو المُزيّن، والبعض يطلق عليه
مُصفف الشعر، إنت البوديك ليهو شنو؟؟؟ يعني المتزين لها شنو، وعليك الله في
داعي للتصفيف بعد دا؟؟؟ غايتو جِنِس مِحن!!! حكاية تشتري مكنة، دي مكنة
منّك ساكت، إنت بقت عليك حكاية الضبعة يا عبد الوهاب، يقطعو فيها وتقول،
إن شاء الله حِلِم. بعدين بمناسبة كلو زول ما عاجبو حالو دي، والله العظيم بكتب
ليك في المدآخلة دي وفطومة بنتي تسرح في شعرا وزهجانة منو قالت لي:
يا ابوي أريتني كان بقيت زيّك عشان إتفكّ من التسريح دا !!!.
بعدين بمناسبة قدر اخفّ من قدر دي، اليحكم بيناتنا العوض المسلمي. ما شاء
الله الزول دا لا شيب، لا صلعة. كدي قول ليهو، ايهما تفضل القرعة أم الشيب؟؟؟.
تحياتي...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: محمد عبد الماجد الصايم)
|
| Quote: إضافة لظعطات المكنة المتوآلية، |
قرصة المكنة يا خي دي كانت أكتر حاجة بتخوفني امشــي الحلاق
لما يصدر الأمـر من الوالد الله يرحمو( هاك امشــي اتزين )
و يكمل ( اتزين نمرة 2 أو كاري )
وانا بكون ما عارف الفرق بين الكاري ونمرة 2
و زعطة المكنة دي كانت بتزهجني و لغاية حسـي لما اتذكرها ارجف
و كمان كل زعطة من المكنة تقطعها في حشـاك ما يقوم الحلاق يشـكيك
ويقول اتجرسـت
يا خـوي ربنا ريحك من المزين
حكيم الزمن دا الأوامر بقت تجي من المرا
( سـوق اولادك ديل وامشـوا احلقوا )
ود المدير كيف حالك
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: عبدالله احيمر)
|
| Quote: الكلام ده نسميهو شنو ؟ مذكرات اصلع ! ولا رحلة العذاب والكتاب والصلع الهباب :) |
سلآمات يا العوض.
يا اخي العنوان التاني دا ظابط معاي صح، بس غيّر لي كلمة الكتاب
بكلمة (الإكتئاب) ينوبك ثواب.
صاحبي عبد القادر الطيّب القلتو للفردة عبد العزيز عيسى، أظنو قريباً
ليكم. من ناس الشيخ الطيّب، وإنتو أصلكم يا ناس الشيخ الطيّب والنيّة،
وما جاور المحلآت دِيّك، لا بتصلعو، لا بتشيبو. عيني باردة.
عليك الله الحقنا بالوصفة وبركاتكم قبل العدوى تمسك في الوِليدات.
لآبت بالوصفة برآك، واخوك وهبة قد أصبح راسه زي مزعة القطن؟؟؟
| |
|
|
|
|
|
|
|
|
 Re: إشـتـهـيـت الـحـلآق ... والله صـحـي ... (Re: معاوية المدير)
|
Quote: اخي معاوية
عادة ثابتة اكتسبتها منذ دخولي كلية الشرطه وهي ان اذهب للحلاق جمعه واغيب جمعه ..
مازلت مواظبا علي هذا المشوار نصف الشهري الذي أدفع فيه للحلاق عشرين درهما
واسمع ضجيجا ولا اري طحنا .. والاحظ نظرات استغراب في عيون رواد صالون
الحلاقه ... ولا يقول لي اي واحد منهم (نعيما) .. ما تعرف ليه ياخي.
عمر علي حسن |
سلآمات أخي عمر.
يا جنابو إنت الموضوع أصبح عندك عادة وليس حلآقة.
مسألتك دي حلها بسيط جداً. ما تزعل من روآد الصالون. الجماعة ديل بيتعاملوا
معاك حسب العادة، وليس حسب الحلآقة. المرّة الجاية لمان تمشي، بعد تحلق
إتلفت عليهم، وقوليهم: بالله رايكم شنو في حلآقتي دي؟؟؟ حايثنوا عليها ويقولوك،
نعيماً. قولهم، نعم الله عليكم، واتبن راسك وارقد قفا، لأنك سيعتريك إحساس بأنه
شعرك ما نقص ولآ صوفاية وآحدة .
جرّب الوصفة، وصدقني حا تدعيلي...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote: يا أخي عليك الله أنسى حكاية التعديل دي،
وخلينا نتونس بأريحية.
مودتي... |
تسلم يا حبوب
بصراحة لما شفتك فطيتني في الرد
قلتا: يمكن يكون التشبية جاب شوية هبوب شمالية شرقية
وإلا.. والله أخوك زول حق ونسات
والبوست عجبني بالحيل
________________________
بالمناسبة
الحمدلله أخوك راسو مليان شعر (بس عامل زي الفول بالجبنة)
وخوفاً على مشاعر الناس ما داير أجيب لي صورة
أخاف لو جبت ليك صورة قبل 4 شهور، يقوموا الجماعة يقولوا ده جيهيمان :)
تحياتي
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: عماد حسين)
|
Quote: هسي دا راس يمشو بيهو الحلاق!
أفرض مشيت الحلاق ..
ح تقول ليهو (شطّف راسي) مثلا؟ |
حبيبنا ود الصايم،
السلآم يغشى الطرابيش والقلآشين.
يأخي أنا في عطبرة كنت بمشي الحلآق بالعجلة، ولمان مشيت الخرتوم
بقيت امشي بالماصلآت. تقول لي أمشي براسي!!! يا اخي وحاتك أنا
مشي العقرب ما بعرفلو.
يا اخي أنا ترفُعاً ما داير امشي الحلآق. في حاجات تانية غير الشطيف
بيعملوها، سمعت بحاجة اسمها (وآكس)؟؟؟
الوآكس دا يا مان بظعطوك زي زعطة البنت الفوق دي. يا اخي أنا لمان
شرحو لي الطريقة بتاعت الوآكس دي، شعر صلعتي وقف صُوفة، صُوفة.
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote:
قرصة المكنة يا خي دي كانت أكتر حاجة بتخوفني امشــي الحلاق
لما يصدر الأمـر من الوالد الله يرحمو( هاك امشــي اتزين )
و يكمل ( اتزين نمرة 2 أو كاري )
وانا بكون ما عارف الفرق بين الكاري ونمرة 2
و زعطة المكنة دي كانت بتزهجني و لغاية حسـي لما اتذكرها ارجف
و كمان كل زعطة من المكنة تقطعها في حشـاك ما يقوم الحلاق يشـكيك
ويقول اتجرسـت
يا خـوي ربنا ريحك من المزين
حكيم الزمن دا الأوامر بقت تجي من المرا
( سـوق اولادك ديل وامشـوا احلقوا )
ود المدير كيف حالك |
أريت حالك زين يا عبد الله اخوي.
ياخي العذر ليك أطنان تنزلو ليك جُمال الشوق في حوشك.عزراً يملا
البُكان ويفضل، ويبقى لي شفيع عندك كان تقبلوا.
عفواً عبد الله، فقد توالت الأحداث عاصفة السبب الذي حال بيني والرد
الفوري، فلك العذر حتي ترضى.
كدي كان بقيت راجل يا ود إحيمر سوق الوِليدآت زيِنُن، وارجع بشعفتك
عشان توريك المكشن بلآ بصلة. نسوان الزمن دا!!! قهرتهن بالقاهر والنبي
الطاهر.
يا اخي ظعطة المكنة دي حاجة بايخة بياخة!!!، واسخف حاجة لمان تدقُس
والرويس يقع فوق السدُر، وريالتك تسيل وتقول كدي المكنة تظعطك وفت
تخفس. أها تعال شوف الحلآق، يفرج فيك السوق لحدو.
طبعاً زمان لمان ظهرت موضة الحلآقة بتاعت تخفيف الشعر من الجنبات
مع قطعية فقط، ظهرت معاها حكاية كشف الحلآقة من الأبهات. يعني الوآحد
لمان أبوهو يديهو طرآدة، ويمشي الحلآق لآزم بعد يحلق أبوهو يراجع الحلآقة
كان لقاها نفر اللت الجنون الخايسين يا قولُن، طوالي بيكت ليك أعد.
مودتي يا عبد الله،
واكرر عزري...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote:
بصراحة لما شفتك فطيتني في الرد
قلتا: يمكن يكون التشبية جاب شوية هبوب شمالية شرقية
وإلا.. والله أخوك زول حق ونسات
والبوست عجبني بالحيل
________________________
بالمناسبة
الحمدلله أخوك راسو مليان شعر (بس عامل زي الفول بالجبنة)
وخوفاً على مشاعر الناس ما داير أجيب لي صورة
أخاف لو جبت ليك صورة قبل 4 شهور، يقوموا الجماعة يقولوا ده جيهيمان :) |
سلآمات يا عمدة.
يا زول ما فطيتك. والله صحي.
بس أنا ما عارف إنت جبت مداخلتك قبل الناس كيف!!!
قلت يمكن عمدتنا دا خاتي طوبة هنا، وإشتغلت علي كدا.
أوّعك تجيب صورة قبل 4 شهور، فأنت مُستهدف. أسمع
نصيحتي. حاول تطلع الجبنة من الفول، إمورك بتتصلّح.
من دخل بوستات ود المدير، فهو آمن.
والله صحي.
.
.
تحياتي...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: ابوحراز)
|
Quote: عفواً عبد الله، فقد توالت الأحداث عاصفة السبب الذي حال بيني والرد
الفوري، فلك العذر حتي ترضى. |
ود المدير
كيف حالك
مالك ياخي , الأمر ابسـط من ذلك وانا راضي قبل و بدون ما تعتذر
و خلينا مع الناس الشــغالين فينا حلاق بي موس ميتة وبدون صابون
23 ســنة حلاقة عدوك
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote:
أول شيء نبدأ ليكم بـ { برود العيد }
إنت عارف بعد الحكاية حمام مرتين في السنة
كمان عندنا نحن جابت ليها لعب كووووووورة
كنا نلعب ونأتي المغرب لنشرب اللبن وننام
الجلابية واحدة أمك تقول ليك ياولد أملص الجلابية دي عشان نغسلها ليك للمدرسة
انت عارف في منتصف الليل تقوم تكورك
والله حدث معي ذلك أكثر من ثلاثة مرات
اخيرا اشتروا لينا فنيلة طويلة قالوا دي نوم بيها عشان تاني ماتزعج الناس نص الليل
ماقلتوا لينا بتكوركو مالكم
عندنا غنماية فيها قرن واحد
عارف دي بتمر بالليل على كل لعيبة المنتخب في الحلة
والله العظيم الغنماية دي يبدو لي عندها نقص فيتامين وللا املاح ماعارف
المهم بتلقاك عريان بتقوم تلحس ليك ظهرك !!!
عارف لشنو عشان طعم الملح الذي يخلفه عرق التمرين !!!
هسي انا هنا في الصيدلية البيطرية في السعودية شايفهم عاملين الملح مكعبات
سالت لشنو
قالوا عشان الغنم بتلحسو !!!
شوف شقاوة غنمنا بتلحس الملح وهو طازج
اها يوم البرود دا يوم السواد
والله تكون شايل هم من يوم التيسوعة
ونحن عندنا ديوان ماشاء الله
يوم العيد من الصباح الجدود والأعمام بيجتمعوا وبيشربو الشاي مع اللقيمات
ولسوء حظي فإنني أول من يتم وضعه في طشت غسيل العدة
وهو طشت متعدد الأغراض !!!
بالرغم من وجود أخ وأختين أكبر مني
وكلما اسأل الوالدة لماذا أنا الأول ؟؟ لاتجيبني وتردعني بكلمة واحدة صم خشمك الكبير دا
المهم اول ماتضعني في الطشت بقوم جاري على الديوان
والحمد لله لم تكن توجد ابواب بالحيشان
واذكر انها تجري خلفي وهي تردد عيب ياولد جدك { أبوها } بيشوفك عريان !!!
فأضحك عليها واقول : مايشوف لو عاوز يشوف
انا طالبو 60 شوفة
فوالدها لايلبس سروال نهائياً
قال يشوفك قال !!!! |
أضحك الله سِنّك يا ابو حراز.
يديك العافية.
تعرف أسخف حاجة في برود الطشت دا، لوح الصابون بتاع غسيل العِدة.
أوّل حاجة وكت يمشكوك بيهو يجيب لك فلآيت، وكُلُ مرّة يكوعك في لوحة
الكتف، والعجب لآمن رغوتو تدخُل في عيونك. تحلف تقول مسوينو بي
شطة.
بعد حصل التطور طبعاً بقينا نستعمل فنيك الأرنب.
يا ابو حراز يا أخي إنتو الغنماية أُم قرن دي فهمتوها غلت.
قطع شك قصدتها تعمل لكم مِسآج.
والله صحي..
أبو حراز يا أخي عليك الله تعفى
لي، باقي إتأخرت عليك بالحيل...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
ود المدير
ما رجعتنا لكن لي زمنا بعيد شديد
لي زمن ناس عمك (سليمان جمعة خيال)
وناس منعم الحلاق، الكان في الزقاق الجم فرن عمك (حسن الشوش)
يا سلالالالالالالالالالالالام يا زول... هيييي ايام.. خصوصا لمن يكون الحاج موديكم للحلاق، ويقول ليهو بالفم المليان (كد ليهم الدومي دي علي الزيرو) وعينك ما تشوف الا النور..عمك سليمان ما بي صدق .. شويتين وتلقي ايدا قوية مسكتك من فقرتك من ورا، وتنت ليك الرقبة لي قدام، وهاك يا (خش .. خش.. خش - ده طبعا صوت المكنة وهي شغالة قرف في الصوف) وطبعا مع كل صوفايي تقع في الواطة.. تقع دمعة دمعتين .. والواحد بعد ما كان شامي كابور.. يطلع من الحلاق (محمود المليجي) .. وتسمع من اطراف الشوارع.. ذلك الناداء البغيض الي القلب (اب صلعة يا خاين)..
اما برود الشتا .. وورق هدوم ( سلوي بوتيك) وبواقي ورق النعلات البجيك شايلاهو الهبوب صباحية العيد.. ده براهو بجيك ليهو بالمهلة..
نمستي ..
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote: ود المدير
ما رجعتنا لكن لي زمنا بعيد شديد
لي زمن ناس عمك (سليمان جمعة خيال)
وناس منعم الحلاق، الكان في الزقاق الجم فرن عمك (حسن الشوش)
يا سلالالالالالالالالالالالام يا زول... هيييي ايام.. خصوصا لمن يكون الحاج موديكم للحلاق، ويقول
ليهو بالفم المليان (كد ليهم الدومي دي علي الزيرو) وعينك ما تشوف الا النور..عمك سليمان ما بي صدق ..
شويتين وتلقي ايدا قوية مسكتك من فقرتك من ورا، وتنت ليك الرقبة لي قدام، وهاك يا (خش .. خش.. خش -
ده طبعا صوت المكنة وهي شغالة قرف في الصوف) وطبعا مع كل صوفايي تقع في الواطة.. تقع دمعة دمعتين ..
والواحد بعد ما كان شامي كابور.. يطلع من الحلاق (محمود المليجي) .. وتسمع من اطراف الشوارع.. ذلك الناداء البغيض الي القلب (اب صلعة يا خاين)..
اما برود الشتا .. وورق هدوم ( سلوي بوتيك) وبواقي ورق النعلات البجيك شايلاهو الهبوب صباحية العيد.. ده براهو بجيك ليهو بالمهلة..
نمستي .. |
جمال يا حبيب،
إنت وين يا زول؟؟؟
يا اخي محمد موسى الجنب أبو خليل كان ابرع حلآق. كنا نحلق عندو وبعد الحلآقة نمشي علي
عبد الله ود عمّك أبو خليل نسمع بوب مارلي والبي جيز، ونضرب الزبادي والباسطة.
زمن كنا صغار كل همنا في العيد إننا نمشي خيمة عمّك عبد العظيم فرح بتاع الألعاب ونضرب
داندُرمة من علوّب.
يا أخي عطبرة دي أجمل مدينة. خلنا النجيها بالمهلة.
تحياتي،
والعيد يتبارك عليك...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote: ود المدير الله يجازي محنك ياخ
والله ضحكت لمن دموعي نزلت ياخ رجعت بي
لي زمن جميل وحنين, لكن اخوك طلع تفتيحة
وكترت من الصور, هاك شوف الصورة دي بالله
والبقية برسلها ليك . |
أُستاذنا الشاعر المرهف هاشم.
قريت عنوان بوستيك الأخير. قلت اكيّد هاشم دا زعلآن مننا. دخلت البوست
لقيت القصيدة، وقبل التعليق مواعيد الشغل جات.
ليك وحشة يا رجل، رغم إنه كان المفروض نسأل عنّك لكن المشغوليات جابت
اللوم. لك العُتبى حتي ترضى.
لقيتك نجيض لكن. عليك امان الله أنا الصور جت ودرتهن، وتاني ما في زول
بيصدق إني كان عندي شِعيرات. شُفت الشقاوة دي كيفنها؟؟؟
بجيك بهناك إن شاء الله.
مودتي...
| |
|
|
|
|
|
|
|
|
|
Re: إشـتـهـيـت الـحـلآق ... والله صـحـي ... (Re: معاوية المدير)
|
Quote: الله يديك العافية ياود المدير
كل سنة انت وضيوفك فى كامل الصحة والعافية
ونهديكم صورة من الامس
وياسلام على برنامج التسوق يوم الوقفة |
عبد المنعم يا صديق،
أخبارك والأهل؟؟؟
الله يعافيك يا عبد المنعم، ومشكور علي الطلة الجميلة.
رحم الله الفنان خوجلي عثمان فقد زآحم العمالقة في
زمن كان من الصعب جداً علي الفنان أن يدخل مجال
الفن إن لم يكن يتمتع بإمكانيات عالية. مُش زي اليوم
حيث أصبح مجال الفن مفتوح لكل من هبّ ودبّ حتي
أصبح كخلية النحل حيث كثر فيه الطنين.
مودتي...
| |
|
|
|
|
|
|
| |
معاوية المدير
عماد حسين
عادل الباهي عبدالرازق
Abdlaziz Eisa
سلمى الشيخ سلامة
عبدالوهاب علي الحاج
العوض المسلمي
طارق جبريل
محمد عبد الماجد الصايم
ابوحراز
فيصل محمد خليل
جمال المنصوري
ibrahim fadlalla
هاشم أحمد خلف الله
عبد المنعم سيد احمد
فيس بوك
تويتر
انستقرام
يوتيوب
بنتيريست