|
مسدار الثورة - قصيدة للشاعر (جني)
|
عبدالله الشيخ 18/يونيو/2012م
مدخل
قام القبيل علم التانين كيفن يقومو بحر الدميرة الليلة أقدر عومو بقدل فوق براحو وفي الشوارع نومو فراج الهموم المابجيب يوم لومو أمرق يا العديل نبراك بالدعوات محزم بالقديم وحنين حجا الأمات أمرق يالقبيل مدخورنا في النايبات يالكلس الأصم كلك شموخ وثبات ما هيلك ربيع رقصو وغناه ورودو هيلك خريفك غضبا بتدوي رعودو هيلك عيالك الديمة ليك بجودو من القرشي مدخورين لاهانو يوم لابحيدو
أقتباس
اذا الشعب يوما أراد الحياة فلابد أن يستجيب القدر ولابد لليل أن ينجلي ولابد للقيد أن ينكسر مشوار الثورة (أم عوف)
يا أم عوف مشوارك طول ...أنا كليت وقصيدك ملا
شذ لي أفقك أمرق يلا أنت المارد يوم تتجلا سوي عديلك ....ياود نيلك داك شليلك ....نجمك طلا ... الحس كوعك لملم قهرك ...فقرك وجوعك خلي حلمنا ...الفوق يدلا ... ديل بنوتك ما احلاهن في خرطومك قمر أتجلا شلعن عتم الليل باللمعة وكتمن جوعن مسحن دمعة ... وفي ود عينن بقت شمعة ...ما أحلاهن قمرا هلا .... شذ لي أفقك أمرق يلا ... مدينة وحلة ... جامعة ومسرح خلي الغبش أيامن تفرح في مليونك أمرح وأسرح أملا شوارعك ما تنشلا شمس أكتوبر تبقي دليلك ...محصن بيه حجاب أبريلك .... خيرك هيلك ... كتر أن قلا ... ديل شايلين الدين كتلوج ... فصل .....فسر بالمعوج ....كتر النضم البقي ممجوج ....بلف البلد اليود محلوج ....عدم العافية خلاص أنشلا .... ألحس كوعك .. والحرية تكون مشروعك كب ثوريتك ... ضوي جموعك أكرب ...جوعك ...أرض الخير والثورة ربوعك ...أنتل قيدك يمين يتحلا ... شذ لي أفقك أمرق يلا ياود بطن البلد الحرة ضرع البلد الهيلك درا فوقو العوق أتفن جرا شبع ناسو ..وليكم ترا وشال الباقي علي ماليزيا هناك صرا .. .شذ لي أفقك والحس كوعك ...هز لي رمحك حاش ما جلا .... أنت المارد يوم تتجلا .... شذ لي أفقك علي نشيد الوحدة بجوك مشتاقين ناس وليم أتوك نحنا مرقنا علي الفصلوك في نيران المحنة صلوك ألحس كوعك ...أمرق يومك صر قدومك ...سوي جنونك يعود مليونك ....سوي الوحدة المابتنحلا .... ياتور الله الفي برسيمو خلي بلدنا كفاك تقسيمو ..شيل ايدينك خلي جيسيمو ...يا تور الله كفاك تعسيمو ...كل الناس بتقولك ..كلا ... علي لاهايك أمرق يلا .... فتق وبتق يالنوار تيراب عزك بقي ثوار ... عبا شوارعك ...زنقة ودار ... هانت وبانت ...يا المشوار هانت وبانت يا المشوار
عبدالله الشيخ 28/6/2012م
|
|
|
|
|
|
|
|
Re: مسدار الثورة - قصيدة للشاعر (جني) (Re: محمد ادم الحسن)
|
من نصوص عبد الله الشيخ
الدروة اهداء الي شهداء حركة 28 رمضان المجيدة ...أنبل وأشجع الرجال الذين ضحوا بأرواحهم من أجل عيون الحرية ... عبدالله الشيخ ...ودمدني ..1998م
من شبا قام صلي وسجد وقت الشمس ذي قبلة في خد الصباح كان أبو تم العدد السرة جابت قهوتا القهوة ما الخمر المباح وأنا ذي ضل فوق الوطا رقد استراح قتلو يابا الحالة كيف قالي عيدا ماهو عيد وأصلو حالا ماهو حال قتلو يابا بدور سؤال غردون زمان فوقو الصلف ؟ أي الجنا يومو التقي وفي الراس وقف أي الجنا شلتو السيوف جيتولو صف ؟ بالحيل الجنا غردون زمان فوقو الصلف يومو التقا وفي الراس وقف شلنا السيوف جنالو صف الا راديلك سؤال الليلة شن جاب الكلام ؟ جاب الكلام كتر السكات شوق الصباح الولي فات جابو الجنا الفي دروة مات الدروة ياغول الرجال الدروة رضعت دم زلال الدروة رصاص الضلال يالدروة جوفك ماشبع طفا النجوم الفيك تشع كم من بطل فوقك صرع خلاهو كوما ذي ودع الدابو مارق مارضع والشال كراريسو وطلع والعيد خلاص جاهم طلع عيدا مضمخ بالدمع لا انسلا سيف لا زول جزع برضك تقول يا أبوي تقول شلنا السيوف جنالو صف شن سوي سيف لي زول خرع شن السيوف شن الدرع لو مابترجع للحقوق لو مابتسارع في الفزع والسيوف ياها السيوف الا الكفوف دايرة القطع يلاك قوم خلي النعاس طالبو حقا لايضع هز الرمح فوق الكتف والمولي خليهو الدرع أب دقنة زاع الحقد خليهو يحصد للزرع مر الزمن فوق الزمن والدروة تزع في الحزن والساقي طنبورا يرن أكرم يمين جالك ولد شايل هموم أهل الب سمو الصباح سمو السند شايل هموم أهل البلد خابرنو شبلا من أسد قلبو ماشايل حقد الاهو ساكي التار دقش واقف علي باب الشمس راجي المدد أبويا كمل للعدد .. السرة كشحت قهوتا تم العدد..تم العدد ياناس مدد...ياناس مدد (لهم الخلود في وجداننا وجنات النعيم ) عبدالله الشيخ 1998م L
| |
|
|
|
|
|
|
Re: مسدار الثورة - قصيدة للشاعر (جني) (Re: محمد ادم الحسن)
|
أم عوف من أشهر قصائده
سلسلة من القصايد تحكي عن رحلة نضال للشباب الثوري النقي ....أنبل الرجال الذين عرفتهم لهم مني كل التحية ووافر التقدير ولكم من أم عوف رمزية الواقع العربي المعاصر .................................. عبدالله الشيخ ...ودمدني ...1996م
بكتب ليكي يا أم عوف كل المقاطع والحروف البيني بينك الف حاجز يمكن أرجع يمكن أسقط بس أخونك ماهو جايز أنتي في جوايا خرطة رسمت تضاريسها الالوف من محيطك لي خليجك ديمة بحلم بيك أشوف أنو أنتي شايلة صوتك من صدايا وبس متين أفج غيومك ويبقي واقعك من غنايا ماشي في كل المداين راجي تتغير ظروف والمداين كلها نايمة في ظلام ضاميوه خوف يوم أشوفك ألقي طيفك أرجع أكتب في المقاطع ماني راجع لي عواصم وجبة دسمة ولي مداين عايزة نسمة و أنتي يا أم عوف حكاية كل عاشق بيك شغوف خلي خيمتك ذي شراع سوي من ايديك سيوف يمكن أنتي تبقي أنتي عالية ذي عزة جبالك الف فارس بهدي ليك دمو عربون لي نضالك ويرمي في المعوج نبالك نبقي نحنا الكلمة حية بسمة أترسمت عليك من جحيم جب الغياهب جاك صداي رجعو فيك تنتج الحرية جيلا جيل مناضل حبو ليك ....(تستمرالحكاية ) عبدالله الشيخ
| |
|
|
|
|
|
|
Re: مسدار الثورة - قصيدة للشاعر (جني) (Re: محمد ادم الحسن)
|
Quote: شذ لي أفقك أمرق يلا أنت المارد يوم تتجلا
سوي عديلك ....ياود نيلك داك شليلك ....نجمك طلا ... الحس كوعك لملم قهرك ...فقرك وجوعك خلي حلمنا ...الفوق يدلا ... ديل بنوتك ما احلاهن في خرطومك قمر أتجلا شلعن عتم الليل باللمعة وكتمن جوعن مسحن دمعة ... وفي ود عينن بقت شمعة ...ما أحلاهن قمرا هلا .... شذ لي أفقك أمرق يلا ... مدينة وحلة ... جامعة ومسرح خلي الغبش أيامن تفرح في مليونك أمرح وأسرح أملا شوارعك ما تنشلا شمس أكتوبر تبقي دليلك ...محصن بيه حجاب أبريلك .... خيرك هيلك ... كتر أن قلا |
| |
|
|
|
|
|
|
|