بقلم منى سلمان :إعلان المشاكل الاسرية - (يوجد استغراب ).

Quote: استغرب جدا في زول يغلبو حل مشاكلو الاسرية لدرجة انو يتصل بقناة فضائية او برنامج اذاعي ويعرض عليهم المشكلة عشان يساعدوهو في حلها .. اعتقد انو البعمل كدا الا يكون واحد من اتنين يا ما عندو صليح او صاحب أو كبير عائلة يستعين بيهو لو حار بيهو الدليل أو يكون قاصد يشوشر على الطرف التاني للمشكلة ويؤثر عليهو .. زي مرات تلقى واحدة تحكي على الهواء مباشرة ادق تفاصيل مشكلتها مع زوجها وكأنها تريد ان تقول أنا فلانة وزوجي هو فلان الفلاني الكعب العامل فيني السبعة وذمتها _ بالمناسبة انا ما عارفة لا السبعة ولا ذمتها هي شنو _ المهم بنلقى برضو ازواج بيعملو نفس الشي العجيب دا !! كيف يعني عايز زول لا بعرفك ولا بعرف ملابسات وتفاصيل مشكلتك ولا بعرف الطرف الاخر للمشكلة وبعد دا كلو يحلها ليك في ظرف دقيقتين على الهواء .. والله دي ياها التصرفات البتحير بوبي .. المشكلة كمان لو كان البرنامج لاحد شيوخ الفتاوي الطائرة الذين يختلط عليهم الامر بين العادة الموروثة والشريعة ولا يفرقون بين حق القوامة وحق الرجالة والعين الحمرا ودا بالضبط اعتقد انو الحصل في الايام الفاتت لما اتصل زوج سعودي زعلان من زوجته ومليان للسدادة وابليس قاعد يرقص بريك دانس في راسو .. الفالح قام اتصل على احد البرامج اياها واشتكى للشيخ من ان زوجتو ما بتسمع كلامو وراسا ناشف لانو طلب منها تقعد في البيت وما تشتغل عشان هو غني ومقتدر وبيقدر يكفيها حوجتها ويزيد لكن المرا المسلطة ابت قعاد البيت لانها سيدة اعمال وعندها محلات بوتيكات وكوفيرات وكمان عندها فروع في مدن اخرى .. المهم الولية ضربت لي زوجها وقالت ليهو انها في المطار ومسافرة الرياض عشان تشرف على محلاتها الهناك .. زولك ما كضب خبر قفل منها السماعة وضرب للشيخ في البرنامج ... اهااا قول كدي يا مولانا افتى ليهو بأن زوجتو دي ما اهل للثقة وتصرفاتها تدعو للشك .. الشغالة ليها شنو وزوجها عني ومرتاح؟؟ عشان كدا افتى ليهو بضرورة تطليقها فورا فما كان من صاحبنا الا ان رمى يمين الطلاق على زوجته على العواء مباشرة .. طلقة جوية صاروخية نافذة والشهود عدد كل المستمعين المتابعين للبرنامج .. عاد عليكم الله جنس دا يقولوا فيهو شنو ؟ زول يفتي بدون ما يرجع للطرفين ويسمع ليهم الاتنين ! زول يشكك في اخلاق زوجة ويشين لسمعتها وهو لا يعرفها ولم يستوثق من كلام الزوج الذي ربما كان متحامل ومزودها حبتين بدفرة من ابليس خراب العامرة ! الزوجة حتى لو كانت ناشز مش في خطوات لاصلاحها تبدأ بالعظة والهجران ثم الضرب ولو دا كلو ما نفع يجيبو حكم من اهلها وحكم من اهلو ولو غلبهم الاصلاح يحكموا بتفريق الزوجين .. لكن جنس الفتاوي دي الله يعينا عليها .. باقي لي شيخنا دا موجوع من زوجتو شديد وواقع في نفس مشكلة صاحبنا عشان كدا قال احسن ادق المربوطة عشان اقرع حقتي الجافلة

Quote: ملاسى قال ليك اطلع لى مداعى ..(وش ضاحك)

فدوية الكوزة مشتاقيين

فدوية

لسانك متبرى منك

هو ملاسي دا مش كوز برضوا المفروض توقفى معه