|
|
|
 Re: نحن جينا اغنية جديدة للاستاذ طارق الامين (Re: محمد الكامل عبد الحليم)
|
نحن عشاق الاغاني ويلا يارشا يا كحيل
ونحن مداح الخلاوي البضوي الدنيا ليل
جينا يامدينة
الليله شن حاصل علينا ..!!
التحية للابداع واهله ..
خطوة خضراء للامام ان شاء الله ..
______________________________________________________
ليتهم يعلمون ان عمر اللحظـه في بعـدك يا خـرطـوم سنين طـوال
د شهـاب الفاتح ـ كوالالمبـور
| |
  
|
|
|
|
|
|
|
 Re: نحن جينا اغنية جديدة للاستاذ طارق الامين (Re: هيثم طه)
|
الله يخلى طارق الأمين للسودان !
وبعدين يا هيثم يا اخى فى جدية اكتر من كدى؟!!
غايتو بعد دا الأ يمشى ميدان ابوجنزير ويبقى ليكم البوعزيزى عدييييل !
!!!!!!!!!!!!!!!!!!!!!!!!!!!!!
أقول ليكم حاجة ؟
غايتو الثورة انطلقت !
ست البنات.
| |
|
|
|
|
|
|
|
|
|
Re: نحن جينا اغنية جديدة للاستاذ طارق الامين (Re: ست البنات)
|
هم اتغابوا وما عرفونا
ونحنا الخيرنا البانى كتوفون
ومن ضراعتنا يحشوا فى جوفون
ومن بترولنا بيملوا جيوبون
طوبة فى وطوبة
بنوها بيوتون
ومن عيدان راكوبنا وقودون
ما هماهم
ليلنا الطول
ولا هزاهم شافع ببكى
حش حشاهو الجوع فى الليل
لا هماهم شيخ انضييم
لا أم ثكلى دموعا الجفن
لا بيعنيهم زول مكفوف
وقالوا الناس احسن ما تشوف
ما تتكلم وتلبد خوف
الحشرات ماب تحتاج تاكل
حبة ارضة ونملايتين
تكفيكيفم عام
والا احسنلكم ابقوا نعام
ادفنوا روسيكم
وابقوا نيام
والا كلاب الامن تجيكم
مرة نباح
وبيوت اشباح
ست البنات.
| |
|
|
|
|
|
|
|
|
|
Re: نحن جينا اغنية جديدة للاستاذ طارق الامين (Re: ست البنات)
|
| Quote: وبعدين يا هيثم يا اخى فى جدية اكتر من كدى؟!! |
ست البنات سلامات و شكرا للتعليق
يا ستهم اكيد انا ما قاصد "الجدية " بالطريقة الانتي قلتيها
وعليك الله طارق لو ما جادي بعمل الشغل السمح دا - تعليقي كان علي الكوميديا داخل الفيديو
عموما الشغل القائم بيهو طارق في السودان -في ظني -شغل بتاع عشرة وزارات ثقافة في البلد !
لكن قصدي كان انو ما دام دا شغل فني كان من الافضل الالتزام بمعايير العمل الفني و في النهاية اختيار وسيلة معينة لتوصيل
رسالة معينة من الطبيعي التجويد مطلوب - و يخيل لي الشغل دا (unfinished ) وفي شغل في نص الفيديو مضلم و كدة --
و بالتأكيد طارق ما محتاج اي نصائح مني ولا من حقي زاتو !
وبصراحة تعليقي الكان ما جادي 
تحياتي لك واعتذاري لطارق الفنان
ولصاحب البوست 
| |
|
|
|
|
|
|
|
|
|
Re: نحن جينا اغنية جديدة للاستاذ طارق الامين (Re: هيثم طه)
|
هيثم يا اخوى سلام,
عليك الله ما تبقى حساس شديد كدى !
انا ذاتى بهظر والله ,
لكن الضلام الفى الفيديو دا باقيلى مقصودبو الضلام النحنا فيهو والوهدة الفيها الوطن دى.
مانى افلح منك ! لكن يبقالى نضمى يمكن يكون صح.
وشكرا على المداخلة.
والله يصبح صباح الوطن.
ست البنات.
| |
|
|
|
|
|
|
|
|
|
Re: نحن جينا اغنية جديدة للاستاذ طارق الامين (Re: MOHAMMED ELSHEIKH)
|
ومع ذلك
عبد الله علي إبراهيم
نحن الشعب السوداني المهذب والمثقف والعزيز، نحن جينا
وددت لنعاة السودان أن يتنسموا عبير نبأه الطيب «الفاح من رياه». فقد ألجمتني الدهشة لكتاب كثيرين في المهاجر سقموا الوطن و»قنعوا» من خير فيه طالما حكمته الإنقاذ. وترخصوا وقبلوا أن تنتقص أطرافه بقوة أجنبية في كتابات نافدة الصبر يائسة يتبارى الكاتبون بحثاً لها عن عنوان طريف ونبأ خاسر. وبطل عندهم الوطن من فرط ما ذهبت الإنقاذ برجاحتهم وحلت عقدة رباطة جأشهم.
من ضفة الوطن الأخرى المُنتظر يأتينا النسام.
بثت الأسافير قبل أيام أغنية جديدة في حب الوطن لطارق الأمين. وقد وصف طارق أغنيته بنفسه. فهي مثل الأم التي «تمسح من حناجرنا العويل» أو بعض تلك الأنامل التي «ترسم صورة الوطن الجميل». لقد رثى لنا للمرارات تحتوينا وتسهدنا «الغنيوات الحزينة». وجعل من هذه المرثية لازمة في الأغنية بغير تهافت. فالأغنية مشرقة بالسودان كشمسه في كبد السماء. فالبلد محروسة:
نحن ما الشعب السوداني
المهذب، المثقف، العزيز
جينا يا مدينة
ولن يصيبنا إلا ما كتب الله لنا. فإن جار الزمان تجرعنا غصصه بالأغنية والتهاليل:
نحن من تلك المعاني الراكزة من شعر الخليل
جينا يا مدينة
ونحن: عشاق الأغاني يلا يا رشا يا كحيل
جينا يا مدينة
نحن مداح الخلاوي البضوو الدنيا ليل
جينا يا مدينة
والحرب بـ «الحقيية» والأمل مما أبدع في تصويره المرحوم زين العابدين الهندي في أوبريته العظيم عن الوطن. فقد خصّ، من غير سابقة، أغنية الحقيبة و»صعاليكها»، بمقطع مؤثر لولههم بالسودان يتفصد له الفؤاد وتندى العين. وهذا سلاح المستضعف ينهض به من رماد هزائمه.
ومن نسّام الوطن أيضاً خبر تكوين جماعة «عمل» الثقافية بالخرطوم. ودشنت حضورها بمحاضرة قيمة من البروفسير منتصر الطيب ثم أقامت معرضاً تشكيلياً. ولكن مناسبتها الفاقعة هي معرضها «مفروش» لبيع الكتاب المستعمل وتبادله في يوم 28 مايو الماضي. تداعى له أصحاب مفروشات الكتب من أنحاء الولاية. وجاء العشرات يحملون كتبهم يبادلونها الآخرين. وانعقد السوق بمقهى الأتينية في السوق الأفرنجي. وحفته الموسيقى. وشهد الحضور عرض برجوكتور عن أعمال الفنان عمر خيري من إعداد علياء سرالختم. وأعجبتني خاطرات رندا محجوب حول معرض الكتاب. قالت لم يكن «مفروش» عن الكتاب مهما قلنا عن جوعنا له في اقتصادنا الفالت. كان بالأحرى شغفاً بالزمالة. كان احتفاءً غامضاً، كما قالت، غلب على وجوه المنظمين. كانت الكتب مفروشة على أرفف ابتساماتنا ( كلام نادر وهو كلام المستقبل). لا فرق بين كتاب وصديق ولا بين صديق وكتاب. وهذا سحر الزمالة عاد بي نحو ثلثي قرن حين رأينا «مدينة ابادماك الثقافية» تخرج سلسة من بين أيدينا وثنايا الجمهور في أرض حديقة المقرن كما لم نتصور ونحن نعد لها العدة.
هذه هي السعادة بالعودة من الغيهب. فتفتح عيونك المصادرة على رفيق في الدرب وخطر جديد. وفهمت عن كثب قول مامون التلب:» سلام يا براق ياخي، والناس فرحت وأنا فرحت فرح شديد؛ لي زمن ما فرحت كده.»
طلب عبد الله محمد الطيب «أبو سفة»، وهو من القائمين بأمر «عمل»، أن يقول الناس للفنان أحسنت متى أحسن. وقال إن البحتري طلب ذلك: قولوا أحسنت. لماذا لا تقولون أحسنت. فو الله لقد أحسنت. وأقول لطارق وأبوسفة ورندا وعلياء والتلب وأنس: «فوالله لقد أحسنتم» ومسحتم عن حناجرنا العويل. نحن جينا. يا مدينة.
http://www.alahdath.sd/details.php?articleid=20722
| |
|
|
|
|
|
|
| |
بكرى ابوبكر
الفاضل يسن عثمان
nazar hussien
شهاب الفاتح عثمان
Hussein Mallasi
صديق عبد الجبار
هيثم طه
ست البنات
امير بشير حمد
MOHAMMED ELSHEIKH
محمد صباحى
معتصم مصطفي الجبلابي
أسامة البلال
فيس بوك
تويتر
انستقرام
يوتيوب
بنتيريست