دا شنودا ؟ من الله خلقني ما اظن لاقاني اسوأ من الـ .. الـ آآ ( ما قادر اقول أغنية) المهم ما لاقاني أسوا من الشي دي كدي البقدر يسمعها للآخر اليورينا لو حصل لاقاهو اسوأ من كدا
05-30-2012, 00:01 AM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
ودا كلو كوم و حكاية كج دوم كج كج دوم دي كوم تاني منو الملحن ولا الموزع الخيالو واااااااااااسع قدر دا و دخل اللازمة دي في الخلفية يا ربي مخو قال ليه شنو في اللحظة ديك
05-30-2012, 07:20 AM
خالد عبد الله محمود
خالد عبد الله محمود
تاريخ التسجيل: 11-28-2004
مجموع المشاركات: 5393
سـلام يا محمد..وشكـرا.. ياخي لو مزعلك كدْ الدّوم دا، أهـو لقيت الأغنية (لو سمحت بالتسمية يعني) بدون دوم وبي خواجات كمان.. عموماً وخلال مشاهدتي القليلة للجزار وزي ما قال الأستاذ خالد فهو شاب يحاول تقديم شئ مختلف، فله على الأقل أجر الإجتهاد والمحاولة والتجريب.. على جنبة أخرى، غايتو أكتر ما كيفني في (العمل دا؛ عشان ما تزعل) حكاية: عادي ممكن أبيع دي :)..
05-30-2012, 09:33 AM
طارق جبريل
طارق جبريل
تاريخ التسجيل: 10-11-2005
مجموع المشاركات: 22555
سلام ود البشرى ... والله ما قادره اصبر على الزول دا اكثر من كدا .....عولاق يعولقوا انشاء الله المحيرني لو شفتو الجمهور الميت فيهو ...والمنظراتيه قال ايه ادخل حاجات جديدة ...يا شنات الجدة كان كدا .... سمعته كثيرا ولايف وخرجت اتقيأ باذني وما ازال عليلة تلك الامسية ... والمزعلني راي حودة كمان بانو زول غناي ..وكدا ...وعندو طريقتو براهو .... وكمان محمد الامين بتاع الجيتار قاليك ما كان حيفوز لو ما لونيته كانت مشابهه للجزار عشان كدا جمهور الجزار كان بصوت لمحمد الامين والاتنيين ########الحمدلله
مع تقديري
05-30-2012, 10:17 AM
محمد يوسف الزين
محمد يوسف الزين
تاريخ التسجيل: 02-08-2008
مجموع المشاركات: 1968
ياخي انا بستغرب ليك في الناس البقولو ما تحاربو اللونية الجديدة وفنان جديد ومجتهد الخ ياخي الاذواق دي ما سمعتو بيها! شخصياً اي فنان عجبني ولقيت زول نبزو لي ما بزعل!
بعدين دا فنان فدياس نجم الدين الاول معناها بيض بالجد :)
مزيكة ما اختلفنا بس ما يغني! لولاااااااو وبشتان
05-30-2012, 10:38 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: والله يا ابو حتحوت الزول دة فاقع لي مرارتي من زمن لو لامي فيهو كنت عضيتو في نص راسه قال مجدد الله يقدو ياخي
شكراً ود جبريل و الله عبرت عني تماماً، الزول دا انا لو شفت خلقتو في التلفزيون ساهي بطني لنهاية اليوم بتكونطامة خلي اسمع غناهو ويشهد الله يا جرجير تنظير اصلو ما غلطان عليك دا مرض شنو دا البتلقط لينا فيهو دا، قال مجدد قال ما فضلكم الا تقولو لينا دا عبد الحليم
الأعـزاء نعمات حمود ومحمد يوسف (معليش يا ود البشرى استلمت الموضوع).. كـلامك صاح يا محمد، الناس قالوا ما تحاربوا الناس البحاولوا يعملوا تغيير او تجديد، لكن ما قالوا أسمعوا ليهم كسر رقبة.. يعني المنظراتية ديل زي ما قالت نعمات سمعوا بي إختلاف الأذواق والآذان وبحترموا المسألة دي.. الشي الملاحظ إنو كل جديد بكون - في البداية على الأقل - محل نقد وهجوم وحرب، ربما تذكرون كيف كانت بعض الجرايد، خاصة جرايد التسلية أو غير السياسية مثل صوت الشارع ونبض الكاركتير الخ، كيف كانت تركز وأحياناً تخصص كامل العدد للسخرية من بل والشتم لمحود عبدالعـزيز والراحل العزيز نادر خضر في بداية ظهورهم أوائل أو أواسط التسعينات.. ولكن محمود اصبح بعد قليل فنان السودان الأول وكان يمكنه الإرتقاء أكتر والحفاظ على القمة زي ما بقولوا لولا بعض الأسباب الأخرى التي لا علاقة له بصوته وموهبته الخ.. واين تلك الجرايد بالمناسبة.. وفي نفس الوكت.ز فليس كل من حاول التجديد والتجريب سينجح ويأتي بما لم تستطعه الأوائل، لكن أعتقد أن ما يقوم به شباب مثل الجزار أفضل من فنانين (برضو بسموهم شباب مع إنهم بغنوا بعمر الجزار) لكنهم ما زالوا يعتاشون على التقليد وترديد أغاني السابقين والحقيبة بخمول وبلا ادنى محاولة (للإبداع) بل بلا خجلة.. وبرضو أفضل من شباب آخرين جرفتهم موجة السوق وغناء الأعراس بالأورغن ويصنف الكتير من غناهم في صف الغنا الهابط أو التـافه؛ على الأقل من حيث القيمة الفنية إن لم يكن من كل النواحي.. ولولا التجريب والتجديد لوقف الغناء السوداني في محطة كرومة وسرور، ولشال الكاشف واحمد المصطفى وعثمان حسين (طاراتهم) وساروا على طريق الأسلاف.. بل أن الأستاذ الراحل عثمان حسين، وهو أحد أعظم مجددي الغنا إن لم يكن أعظمهم في السودان؛ يحكي كيف أن اللجنة، ولعلها كانت تتكون من شخص واحد هو مدير الإذاعة، قد رفض أن يسجل له في البداية بسبب نوعية الغناء والكلمات والصوت والموسيقى المختلفات عما ألفه المدير والمستمعين.. عموماً حاجة اخيرة أنا لست من معجبي الجزار، ولكن من مشجعي كل مجتهد ليس فقط في الغناء، لكن حتى في السياسة مثلاً أو الفنون الأخرى.. ومن المؤمنين بالإفادة من الموجود حتى لو لم يكن بمستوى الجودة التي نرجوها ونتمناها.. يعني يا ود البشرى قصدي إذا خيرنا بين أن يغني الجزار بهذه الطريقة ولاّ يتجه ناحية قنبلة وحرامي القلوب فسنختار - كلنا - ان يغني التلفون (وعاااادي ممكن أبيع) بهذه الطريقة بلا أدنى تردد.. مع التحايا..
05-30-2012, 11:28 AM
محمد عمر الفكي
محمد عمر الفكي
تاريخ التسجيل: 10-15-2006
مجموع المشاركات: 7313
يا Isa سلامات..ما اختلفنا صدق؟! يمكن كلامي ما وصل كويس، وكويس انك فصلت بين الناس تحاربو وبين انك تقول رأيك الشخصي المبني على ذوقك السماعي فيهو. هل قولي مثلاً بأنو غناء الأوبرا الفن الراقي الأوروبي ما بقسم معاي وما بقدر اسمعو وكان سمعت مرات بضحك في نفس الوقت الببكو في الخواجات؟! هل قولي انو الاوبرا دا فن بيض ساكت ومعطة هل حينزل من مستواها! طبعن لأ! كونك تحاربو دي حاجة تانية خلاص دي عند الصحفيين امثال هيثم كابو أو الذكرتهم والحاربو محمود ونادر أو الناس الجوة المجتمع الفني أو زول عندو معاهو مشكلة لكن ما انا، انا قلت رأيي بس. ورأيي بكل صراحة انو الود دا مزيكاتي مبدع عديل، وانا لاقيتو شخصياً واستمعت لمقطوعات وايقاعات عاملها وبالجد عندو موهبة. وبنشجع والله كل مجتهد جاي بجديد محترم، مشكلتي بس معاهو في الغنا. ياخي غناهو البلولو فيهو اللحن دا ما نجح معاي كمستمع! يعني ما بسمع ليهو أغنية بارادتي واذا لقيت زي نقاشنا دا بقول رأيي. بس ما اكتر
________________ يا ود الصايم صاحبك فدياس بقى حاجة تانية انصحك بتقوية علاقاتك معاهو
05-30-2012, 02:16 PM
محمد عبدالرحمن محمد
محمد عبدالرحمن محمد
تاريخ التسجيل: 10-13-2010
مجموع المشاركات: 1556
شكرا جميلا يا شباب على المرور و التعليق و يا عيسى يا عزيزي طالما الفنان بيقدم عمل للجمهور فيبقى راي الجمهور فيدباك مهم للفنان اما بالنسبة للتجديد فهو زي ما قلت اجتهاد وحاجة كويسة لكن كمان حتى التجديد ليهو قواعدو و حدودو وفي حد ادنى متعارف عليه لما نقول (غناء) لما سمعت الـ (عمل) دا اول ما صدمني هو رداءة وسطحية الكلمات ثم طريقة الاداء فيها طلوع و خروج في حتات ما مناسبة و آهات بلا لاداع ثم الدم دم كج كج الفي الخلفية في الكليب التاني الحال افضل لكن يبقى اداؤه لسه فيه خلل ما , صوتو بصراحة كويس لكن ما قدرت اتذوقه وسط خرمجات اللحن و سوء الكلمات و الاداء المتكلف
كدي اسمع الشباب ديل يا عيسى و شوف التجديد بالطريقة الصاح
05-30-2012, 10:28 PM
Dalal Ezzaldin
Dalal Ezzaldin
تاريخ التسجيل: 06-19-2008
مجموع المشاركات: 1406
يا عابد الله يسامحك ياخ طبعا اليويتيوب ما شغال في المكتب اول ما جيت البيت جريت جري و رجعت سمعت الكليبين تاني ما في علاقة ياخ بين الشاب الفنان البغني فطومة و بين الجزار مالك عايز تجهجهني و عملت القوقلة القلتها ما ادتني شي بس طلعت منها بمزيد من وجع القلب اهديه لود الفكي ههههههههههههههه
يا خوانا والله دي حالة مبالغة ما معقولة ابدا يعني الدنيا دي كلها لازم تغني, ياخي دي اقسام من رب العالمين في البغني وفي البكتب وفي البلّيس مونة كل واحد يرضى بي نصيبو وخلاص
05-31-2012, 03:18 PM
حمد عبد الغفار عمر
حمد عبد الغفار عمر
تاريخ التسجيل: 06-06-2008
مجموع المشاركات: 7662
Quote: رأيي بكل صراحة انو الود دا مزيكاتي مبدع عديل، وانا لاقيتو شخصياً واستمعت لمقطوعات وايقاعات عاملها وبالجد عندو موهبة
شـكراً برضو وكويس إنك عملت من البيض شربات ومزيكا وإبداع وموهبة.. بالله يلا إيدك معانا أقنع صاحبك ود البشـرى دا.. :).. ويا باشمهندس محمد البشرى..
Quote: اول ما صدمني هو رداءة وسطحية الكلمات
في راي بالإضافة لمحاولات التجديد ومع وجود الموهبة زي ما قال الأخ محمد يوسف، لكن ما تنسى (شريحة) الشباب البخاطبهم الفنان، يعني بالنسبة ليهم دي كلمات عادية ومفهومة.. يعني تصور لو قال ليها: تلفونك بيك ما خبور!.. كانت على الأقل فتحت خشمها من الدهشة وقالت ليه: بالله إنت تاريك بتعرف ترطن!.. وزي ما قلت في مداخلة سابقة دي تعتبر كلمات راقية مقارنة مع ما نسمعو في حفلات الأعراس ونحوها.. بعدين آيي ياخي قلت أنا من أنصار الجديد والتجريب الخ.. لكن كمان زي ما بقول جارنا بتاع الدكان: ما تأصر أليْ بلحيل :) (فالعمل) بتاع فطومة فيهو محاولة جديدة للتوزيع، لكن المشكلة في اللحن نفسو، فهو monotonic و monotonous خالص خالص: عبارة عن تكرار ممل لجملة واحدة قصيرة وبسيطة، رغم طول الغنية أو القصيدة (تمانية دقايق ونص دون أن تتخللها فواصل موسيقية تذكر).. يعني ممكن آخد ليك تلاتة أبيات بطريقة عشوائية، وصادفتني دي: نبقى أشخااااااااااص في الهوامش نبقى أبطاااااااااال دون رواية نبقى أنواااااااااار حلوة زاهية الخ الخ (لاحظ زيادة الملل بتكرار كلمة نبقى هنا!).. يعني بصراحة بالنسبة ليه ما فيهو تجديد نهائي، فزي ما قلت اللحن أقل بكتير من ألحان ترباس الدائرية..والكلمات ما فيها جديد ويمكن مقارنتها ببعض أغاني عقد الجلاد مثل حاجة آمنة الخ.. ووالله أستحي أن أقول ليك قارنها بأشعار حميد او القدال التي لحنها وغناها مصطفى!.. شفت كيف؟ وشكرا ليك يا محمد تاني على فيديو البروفة الورانا موهبة الجزار في عزف البيانو.. وعلى فكرة الأخ محمد عبدالرحمن تساءل عن الملحن والشاعر.. لكن أعتقد أن الجزار يلحن لنفسه وللآخرين برضو زي ما شايفين.. تحية جديدة وإن عدتم عدنا..
05-31-2012, 11:01 PM
زهير عثمان حمد
زهير عثمان حمد
تاريخ التسجيل: 08-07-2006
مجموع المشاركات: 8273
ودالبشري تحياتي بالله ما تضحك وتعملنا مضحكه طبعا الصديق الموهوب جدا مجمد الجزار وهوالذي جاء بالجديد واللذيذ من مجنون الالحان محمد الجزار يا (جنكوز) صديقنا وعضو أساسي في الشله وجماعة الشراباتيه دا أسم الجماعة وخصوصا لما يكون ما عندو حفلات عداد المهم أغلب الافكار الابداعية كانت في ليالينا البهيج والعامرة بالخيال والجنون ولكن هذا الفنان مسكون بالعجيب والمثير وبعدين أغلب أشعارو التي يصدح بها هي من الابداع الجماعي في ساعات عوالم الغيب الكامل للعقل وأعلم سوف يأتي جيل من الشباب يتفهم هذه الاغنيات ويصدح بها في بلدنا والله الزول دادرس موسيقي ومثقف جدا وصاحب ذوق رفيع بس الاعمال منتشرة وسط الشباب وهي تعبر عنهم بقوة والله يا ود البشري الزول دا بداياتو كان كل شيء شدة من الملابس الي الالات الموسيقي لكين الان ليهو جمهور مقدر ومن أجمل الاغاني التي شراك في صنعها أبو الزهراء( حالتي وريتك ) وهو بالفعل ملحن وشاعر لغتو ما معقدة وبسيطة ومن أجمل أعمالو ( كنتي مناي يا أنتي ) وبرضو من عشاق البطيخ ما تكون ظالم دا ما جيلك يا والبشري
06-01-2012, 05:20 AM
محمد حيدر المشرف
محمد حيدر المشرف
تاريخ التسجيل: 06-20-2007
مجموع المشاركات: 20358
في ناس مصره جدا انها تقارن بين بدايات محمود و بدايات الجزار محمود دا ظاهره فنية براااااها غير قابلة للمقارنة و خصوصا مع نوعية الجزار و شوف الحلقة الجمعتهم سوا و غنو عدة اغاني من بينها اغنية عاش من شافك http://www.youtube.com/watch?v=I4RRl8IR7n4&feature=relmfu فرق الامكانيات واااااضح، والله ما فضل الا يجيبو ليهم (كنبة) عشان الضيف يرتاح. بينما كان و لا زال محمود فنان كل الناس، جاء الجزار ليكون فنان النخبة و الناس المتميزة، بي كون انها عاشو و شافو و كدا. وسط هذا المجتمع المخملي نمت العلاقة المشتركة فالكل وجد ضالته و انسجم و ذاب و انصهر. دي مجرد حالة نفسية و اجتماعية مؤقته جدا و ستندثر تماما زيها و زي سابقاتها.
_______________________________ يا اخوانا زول يمسك ابو الزهور (الواثق) دا !! ههه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة