|
|
|
 Re: الكتـــــــابة تـــحت تــــأثيــــر الـــبنـــج..!! (Re: صباح احمد)
|
الايامات الفاتت دي كانت ايام صعبة علي كل الاصعدة
مشاكل وابتلاءات ومصائب غايتو الحمد لله
خليت الشغل في (الصحافة) _عشان اكون صادقة_ هم الخلوني قالوا شغلي بسيط ولرئيس التحرير وقفني من الشغل عشان كدة لازم اقابله
لكن راسي القوي دة قال لي تقابليه ليه وهو ماشايف شغلك في الجريدة ولا شنو؟!!
وبصراحة ما بعتبر نفسي كنت مقصرة وبالعكس كنت بشتغل اكتر من اتفاقي معاهم لكن الله غالب وحتي لو شغلي بسيط كان يسألوني عن السبب يمكن عندي مشكلة خاصة وانو لي معاهم اكتر من سنتين وهم اكتر ناس مفروض يقدروا ظروفي لانهم عارفينها واتفقوا معاي علي اساسها او ينتظروا لحدي نهاية الشهر لاني ماشفت زول بوقفوه من الشغل يوم 12 او 13 في الشهر وشغله لحدي يوم 4 او 5 من نفس الشهر موجود ويشهد له..ثم ان اتفاقهم معاي اربعة مواد في الشهر دون الاتفاق علي يوم محدد للتسليم يعني ممكن اسلمهم آخر الشهر لكني لم افعل ذلك ولا مرة فقد كنت احاول متابعة الاحداث واللحاق بها رغم ظروفي الصعبة ..لكن دة ماوقته هسة يمكن ارجع للموضوع بالتفصيل لكن حبيت اقول لـ(...) انو فلان وعلان ديل قالوا ليك اسباب ماصحيحة وان السبب هو (كسلي) او علي الاقل هذا ما ابلغوني به.. وكان من الممكن مراجعة قرار الايقاف ..
المهم ما قابلت رئيس التحرير ومشكور الاستاذ عادل الباز عرض علي العمل في (الاحداث) ومنذ اليوم الثاني لتوقفي.. وشغالة معاهم لحدي الان..
| |
 
|
|
|
|
|
|
|
|
Re: الكتـــــــابة تـــحت تــــأثيــــر الـــبنـــج..!! (Re: صباح احمد)
|
Quote: ما بقدر اتكلم_قلعت ضرسي قبل دقائق_عشان كدة حاكتب واعذروني اذا فَلَت في الكتابة_لاني لحدي الان تحت تأثير البنج
_يعني البكتب هسة هو البنج ما انا_ |
كدي واحدة واحدة، هو يالله سودانيس اونلاين دي الناس بقت تتكلم فيها ونحن ما عارفين؟
ما هو الشغلة هنا كلها شخبطة في شخبطة، كلام شنو عاد؟
وتعالي تخدير شنو الانت بتتكلمو عنو دا، ضرس ولا شيتاً تاني؟
دا تخدير موضعي للعصب السنخي السفلي يعني " البكان " الجنبو طوالي ما بيكون مخدر
فاذا دايرة تفلتي يابت الناس فلتي ساكت
واذا فلتي قايتو الا طبيب الاسنان دا يكون اداك كباية عرقي.
قايتو انتي بتكوني عاوزا تقولي للناس انا قلعت ضرس، بس خانك التعبير.
هو ذاتو لو ما خانك الناس حترد تقول ليك شنو عاد، ربما ربنا يشفيك.
يشفيك ويشفي كل من عمل عملية خراجة، بواسير، تركيب طقم اسنان دهب ولا حتي فضة، والجنة والما جنة
وبتاع البنقو والسكران والطلق مرتو والقشو في دلالة سوق الجمعة والكان عيان السنة الفاتت والباع حمارتو
والفتح دكان.
أمين يا رب العالمين
.
.
.
ياخ خضرتينا معاك ذاتو.
| |
|
|
|
|
|
|
|
|
Re: الكتـــــــابة تـــحت تــــأثيــــر الـــبنـــج..!! (Re: rani)
|
الكتــــــابة تــحت تــأثيــر البنـــج
علي راس الحاجات المزعجاني هو مرض اخوي ياسر ففجأة وبدون سابق انذار ياسر جاته ذبحة صدرية واكتشف الاطباء انو عنده سكري وضغط ولا هو ولا نحن كنا عارفين دة ولا حتي بنتخيلوا
وليه خمسة يوم في العناية المكثفة لم يغادرها بس الدكاترة قالوا انو حالته مستقرة واتجاوز الخطر بس مفروض يكون تحت الملاحظة وبكرة ولا بعده باذن الله حيودوه العناية الوسيطة ونسال الله انو يقوموا لينا بالسلامة
برضو الحاجة المخيفة وضع البلد يعني مافي زول _حتى ناس الحكومة_ عارف بكرة البلد دي ماشة علي وين ولا حيحصل فيها شنو وهم شغالين رزق اليوم باليوم
برضو في حكاية الغلاء العجيب دة يعني كل ساعة تتفأجا انو سعر الحاجات في ذيادة تشتري الحاجة الصباح بسعر بعدين تلقاها بسعر تاني ويحلف ليك سيد الدكان انو البضاعة دي غلت مع انها قاعدة في الرف وما جابها من السوق
حكي لي سواق الامجاد الجيت معاه من المستشفي انو عربيته فجأة خسرت ووداها الميكانيكي فقال ليه جيب لي زيت وما عارفة حاجات كدة ما متذكراها هسة فمشي البنشر واشتري الزيت بعد شوية الميكانيكي قال ليه جيب زيت تاني فرجع لنفس المحل اتفاجأ انو صاحب المحل اداه الزيت بسعر زيادة من السعر الاول سأله عن السبب قال ليه الاسعار غلت قال ليه غلت في عشرة دقائق بس هسة انا جيت اشتريت منك..
قال لي اديتو ليك درس في الاخلاق والدين لحدي ما خجل واداني الزيت بنفس السعر الاول ..
قلت ليه وانا اضغط علي (القطنة) باسناني حتى لا تقع: (هو لو عندو دين كان نسي شكلك ودقس الدقسة دي)؟!!
اها نسيت اقول ليكم انو انا الايامات دي ضرسي قايم علي معذبني عذاب شديد لابنفع معاه حبوب مسكنة و لاقرنفل والله لوما ربك ستر قلت اجرب (الصعوط) سمعت قالوا ببردوا ..
عشان كدة فكرت جادة اني اقلعه والتفكير دة جاء متأخر ايام كتيرة لاني بصراحة بخاف من الحقن لكن قلت الم حقنة مؤقتة ولا وجع دائم ..
الصباح مشيت عيادة قريبة من البيت لقيت البت البتكتب الاسامي قاعدة قلت ليها الدكتور جاء قالت لي بجي بعد عشرة ونص قلت ليها قلع الضرس عندكم بكم؟
قالت لي المقابلة 30 والقلع 60 قلت ليها ليه اصلو المفروض انتو التدفعو لي مش انا
وطوالي مرقت منها
نصت نهار مشيت مستوصف ابراهيم شمس الدين في القادسية لقيت قلع الضرس ب40 الف الغريبة كلتوم بت الجيران قالت لي قبل ايام قليلة ودت اختها قلعت ضرسها مجان _عندها بطاقة تامين_ صاحبتها قالت لي قلع الضرس فيه ب15 الف
اها شلت ليك فكرة قلع الضرس دي خالص من راس اقصد مؤقتا ومليت الكباية موية بملح وهاك يا مضمضمة لكن ولا كاني سويت حاجة
الوجع في محله وكمان ماشي في ذيادة
بعد المغرب قلت لابد مما ليس منه بد اقلعه والله كريم
مشيت مستوصف جنبنا اسمه ميم لقيت المقابلة ب15 وقلع الضرس ب35 قلت للولد البكتب الاسامي يا اخوي ما دايرة اقابل دايرة اقلع طوالي قالل لي ما في طريقة يا اختي
دفعت حق المقابلة وقلت ارجع البيت اجيب حق القلع وامسك (تواد) و(احمد) للجيران واجي راجعة سجلني رقم 5 وبالفعل جيت راجعة
الدكتورة اسمها (هديل) ظريفة خلاص اتونست معاي قالت لي وشك ما غريب علي ساكنة وين ؟!!
قلت ليها سكنت جديد في بلدكم دي قالت لي طيب شغالة وين وريتها اني صحفية قالت لي عليك الله اكتبي عن الدكاترة الجزارين واكتبي عن ارتفاع اسعارهم وارتفاع اسعار قلع الضرس بالذات وقالت انو اسعارهم في (ميم)مقارنة باسعار اطباء اخرين تعد بسيطة جدا وكشفت لي انو انبوبة المخدر _ما متذكرة اسمها بالضبط _بتقلع لاكثر من اربعين نفر وبشتروها باقل من ستين جنيه ومع دة تلقي الدكتور يقول ليك بنقلع الضرس ب80 و70 جنيه ودة حرام
ملحوظة: لسة بكتب الجنيه الف ماقادرة اطلع من المشكلة دي يعني الجنيه عندي لسة الف جنيه فالرجاء الانتباه للحتة دي بعدين ماقاعدة اصحح الكتابة يعني مؤكد فيها اخطاء املائية ولغوية عشان ما ينطوا لي ناس اللغة العربية الفصحي ويدوني حصة في العربي كمان اختصرت ليكم ونستي مع الدكتورة عشان الزمن
الغريبة انها قلعت لي ضرس غير القلت ليها انو بوجعني وجيت اشتكي منو وقالت لي انت مابتقدري تعرفي ياتو الضرس الواجعك بالضبط لكن الضرس البتشتكي منو دة ما هو البسبب ليك الالم والبسببه ليك ياهو دة(طقتو بحديدة صغيرة) ومسوس شديد
وطلبت مني اجي اعمل نضافة لاضراس واحشي اضراس تانية فكرت جادة اقلع سنوني كلها واركب طقم بدل التعب دة لكن قالت لي الطقم بالشي الفلاني والسن الواحدة عندهم ب200 الف
يعني ممكن الواحد يبيع ليه سن سنين تقضي ليهو غرض(اوعي زول يسرق فكرتي دي)
تعبت شديد ويظهر انو البنج بدا يفك لانو ضرسي بوجعني اها ودعتكم الله وصباحات الله بخيرها لو ربنا مد في العمر بجيكم بكرة وبتم ليكم الموضوع _بس طبعا بكون واااااااعية _ ويمكن ما اواصل فيه واطلب من (سيد الحوش) يسحبوا ولو ربنا ما راد العفو والعافية وممكن تكتبوا انتوا برضكم بس ما تخربوا لي الموضوع..يعني الامر متوقف علي طريقة قرايتي ليه بكرةِ
| |
|
|
|
|
|
|
| |
صباح احمد
rani
فيس بوك
تويتر
انستقرام
يوتيوب
بنتيريست