|
|
 حميد حسن سالم - أربعين الرحيل - السبت 28 أبريل - رابطة نوري بالخرطوم
|
بسم الله الرحمن الرحيم
رابطة منطقة نورى بالخرطوم
تعالو نحانن بعضنا نخل قلبو على التمام
لنخلد ذكرى شاعر الوطن وابن المنطقة
الراحل المقيم
محمد الحسن حسن سالم
"حميد"
ابرازاً للقيم الانسانية والوطنية التى كان يدعو لها الراحل الانسان
حميد
نتطلع الى مشاركتكم وحضوركم ذكرى اربعين الرحيل
_________________________
المكان : معرض الخرطوم الدولى - المسرح الشرقى
الزمان : السبت 28 ابريل 2012م
الساعة 30 - 7 --- 11 مساء
|
|
 
|
|
|
|
|
|
|
|
حميد حسن سالم - أربعين الرحيل - السبت 28 أبريل - رابطة نوري بالخرط (Re: Amira Osman)
|
نادوس
حميد حسن سالم .
(تعالي فأن الأيادي التي في كتفها صقر قتلننا ثم لم يحيينا قتلانا)
الحال وراك كيفن تسر باقيلك انتي بلاك في زين
ما تهشم ابريق الرضا خنست نسيمات السمح
والبسمه زي حبه قمح
لفحا وطفر طيرآ كتر
أورث غصافيري الضنى يبس غناها مع الفجر
هطل على الشجر الهموم وشاشات نهارات العنا
عانيت وراك جنس عنا
بوغ سهادي كرو النجوم
خطو المواويل ارتعش
حرس عصاتي بنات نعش
دومست فوق حجر البتول
هلوست بي صلب المسيح
دروش شردت من الضريح
شويمت بي ظلم الحسين
أومت على كم ميضنه
وما بين عيونك والمغول
ساهد بي قافله الحروف
وايقاع ظنابير الزمن
انصربع ايقاع الفصول
هبطت غمامه ورا الجبل
راحت من الليل الجروف
شهقت شعاب انساني خوف منك عليك على أي زول
وك نياق شوقا الضنا سرح عصا التسيار قبل
درب الحياه المرمول فنا
يا وقعة الواقفين هنال يا وقفه الواقعين هنا
يا آفة الوطن الجريح اشمعنى لا وصلك دنا
لا آفه الزمن المشيح قدرت رويحتي تيقنا
من جيتك المرقت بسيم الدهدهك روحت وين
يا زين مرقت مشيتي وين
غربل عليك ليل المدائن الكان زمانك حالا زين
ناشدتها وفتش نهارات القرى المتكيه فوق شعب الصبر
ساندتها علم بطانا الشيطنه
غنيت معاهم سودانا يا سودانا....
للمتهم والدنيا ليل والقمره بت فاتا القطر
وصف لهم حتة شليل
ردد حروفهم ردتها
وقف سحابي مع الدغش شهدتها
شهدت معايا على العذاب الهد أضلاع الغبش راعفتها
تكلت خدودا على بكاي لا قيت سجون جاهد بها
بي جيهة الجذب القديم دخلت مكندك بالشباب خنت التراب راودتها
فوق ها التراب واعدتها
لا انتي جيتي ولا هي آه روحت وين
يا وين مرقت مشيتي وين
كل البنات جو من المللى
هشت بكت شدت حكت وأزيارنا والمرحات خلي
يا انتي يا مرت العدل ماك في صعيدا تترجي
روحت وين قوليلنا بس من الغلبان تجي
لو فينا أطلعي مننا أو بره أدخلى ... أدخلى
غنيتك البارح براي انصلبتو التانيين غناي
والليل بتواتاك شعر دونو انعتاقك أو فناي
هيا يا مغنين الشعر..ضد ها الزمان وطبنجتو
شعر الشعر...شعر أيوه يلا علينا جاي
ونكر المغني كمنجتو
نادوس يا فجر القصائد اندلق
ما حك جلدك مثل ظفرك فأنطلق
انا شرحنا لك صدرك أو شرخنا فأنعتق
يا أنت يا كل الذين لأجل خاطرهم طهوت غداه عقم زهور كلم لتنفتق
غضبآ يؤرق موقديه كورته
رجمآ لكل من تنازل أو تخاذل
أو تشاعر أو تداعر
أو تهاون أو تخاون أو تعاون ضد فتحك أو أتاني ليسترق
تربت يداك...تبت يدا كل الذين تغامزوا
وتهامزو وتلامزو وتقززو وتلذذو
من فيه جرحك يا وطن
نادوس أه ... نادوس يا.........
أمسينا يا نادوس وأصبحنا بيك يا أم
يا سوسه ضد السوس قلبآ بلاك يضم
ليل الضياع مهووس يحلم هواك يؤم
بعض الحصاد الروس عالم نداهو بعم
ختيت هواك فانوس بقالي شلتو وحم
جيت المدن باخوس لاقيتو جالب السم
راشح هجير البوس وكل الوجود دم دم
كوركت يا نادوس أم الغبش يا أم
يا نخل يا أبنوس يا سامبا يا تم تم
يالبيك غناي محروس دخري الغلابه هلم
دهمني كم مجروس وعكمت تاني وقم
حمرت في السحب المكبرته
يا دخان يا ريحه يا ق و ا د ة للبحر المخنس والعساكر والملمس..ما تختشى
بيوضه يا ماخده الخريف ما طمبرت عربانا شي
مستني في الزمن النزيف القال بجي وفات بي وشي
رشت النهار بالصبر أبت المغارب تترشي
دقست سواقي المتعبين كايسالا فيها عقاب عشي
بيوضه آه أواه لو الكلمات حصى
قالت لي الله أقرب فرج
أواه لو الكلمات لهب نرجم به وش زمن القسا
قالت في اطن الليل وهج هدام أمان الناس نسي
دنقرت للأرض السربله بالسراب فرغت بي غلبي العوج
فقدت أيادي العصا شديت حزامات الجلد تالا ضرا الواطه
كوركت صد أرجع يا ولد
طوريه أبوك تراها دي عاند كواريك مشيت طوريه أبويا نراها ديك
لفحوها لمن قام يصلي خطاب بكارات الغمام مغرب صباح ليله دخلتو على البلد
حرق عرق الفي الكلام عطشان سقيت عرق الشديره من المطيره الفي كان حس
العساكر لا ورا قالت لي أجر شدره غنايا جريك ضرايا جريك ضرا قبل العساكر ما
تصل قبل الدرادر ما تبين وكانوا العساكر في وشي قت أقول وقع طينه الجداول
ما ها زي طينه جسارتك يا بلد والكل طين
يا نبوت دقه تفوت و لا حلم يموت
النندق نندق نندق ويفضل باقي لهيب الحق
حق الناس ينزل في الحلق
او ينعارض شوكه حوت
يا كهنوت اليجي كابروت
يا جبوت اليجي كابروت
يا كابروت يا كابروت يا كابروت
كابروت عشم وطن الغلابا الحال بلاك تب ما يسر
ما بان صباح أو عسعست قدامنا ليله تزيدنا ضر
أوتارنا يا آخر الغنا حردان عشياتا النغم
فرغت مجالسنا البلاك عنكب على أبوابنا السأم
أنزح كفانا كضب رياح وبكاء رعود وضحك برق
العشب مالي حشا الأراضي جواهو لمن العش حرق
الشعب حي بس كيفت تصد يملابك المليون عرق
كدبنا في الثرى في رجالك ما فينا زولآ ما عرق
ساوين عصا الأشواق مرق
عربان ونوبا نهاتي بيك والزنج تتمناك عتق
ورا يا وجع هيا يا طلق
صد لي ملامحك يا حراز ريح العوارض غربت
فرتق ضفايرك في الرذاذ جية العصافير قربت
لاقيتا في غابه مدينتي وسط شتيلة حبحبت
على عش صغارا الدوب حبت
ما وقف الليل ولا الهجير كم جفت ريقآ وورتبت
لاقت من العنت الكتير ملت الفيافي أحد أحد
فايده جناحى بلا أطير الموت ولا العيشه النكد
با نيل مدد
يا غيث مدد
ندى دمر نادوس ونشوغا
وخلى الناس الصبحت يوم من حيات الخور ملدوغه
خلى الصوت الكبتو الجوع يلقى براحو يضوع ويضوع
الصوت العالي يا صوت الناس التحت الواطى ما مسموع
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: عبدالمجيد الكونت)
|
ملامح شــعب
ــــــــــــــــــــــــــــ
حميــــد
_____
غُرْقَ أراضيهو الفسيحة
خُلْقُو ..
والطيبة أم معاني
شعبِ كان جيت للنصيحة
أصلُو ما المفروض يعاني
....
بالُو كالشمش الصريحة
وبي شعاعه الأحمراني
وأصفراني وأبيضاني
الأحتواني
وكان كياني
الأخضراني
ضرَّعت في اليوم مليحة
ودون هدد ..
غابت بُو تاني
....
يا التواريخك فصيحة
فكفكت عُقدة لساني
إلا ما وصلت قريحة
لي معانيك
لا أغاني
...
هامُو فوق نحر الضبيحة
يحني
شدّة ما هُو حاني
يا أب كرامات بي مديحه
وأمّة تتلقى التهاني
....
يمة والدِين النصيحة
ثمَّ حلماً ما ختاني
بنشدك بالفيك صريحة
تضحياتك والتفاني
..
في الزمن هل من شريحة
تحتمل حزن الأواني؟.؟
من برود أم شير وريحه
ياتو للحضن .. الكواني؟.؟
....
المدن ليش ترمي ليحه
وتدرع الزيف الموانئ؟.؟
دنيا في إيش صلبت مسيحه
وبشّرت بي جيتو تاني؟.؟
...
يا عرق يا أحلى ريحة
من نزيفو الأسمراني
طيّب الوردة الجريحة
وعاودت فوحانه تاني
..
شعب واحد كالنصيحة
والله واحد مالُو تاني
وأنا شاهد لي صبيحة
جايي في اليوم الفلاني
..
بي مطوراً هبّ ريحه
وعمت الكون في ثواني
بالسلام ناقعة و مريحه
وصاقعة ناحية كل جاني
...
يا بلد رحمة وفسيحة
كم نعزِّك صاح وأماني
ما مرق شوفك سريحة
دار تشل جسد الأماني
...
يا عرَق يا أسمى ريحة
من نزيفو الأسمراني
طيّب الوردة الجريحة
وفاوحت نسماته تاني.
....
غُرْقَ أراضيهو الفسيحة
خلقُو والطيبة أم معاني
شعبِ كان جيت للنصيحة
أصلُو ما المفروض يعاني.
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
من موقع رابطة نوري بالخرطوم
__________________
حميد : تفاصيل الرحيل الأليم
________________
منير عوض التريكي
___________
ذهول، وجل، خوف، عدم تصديق، حزن، ألم، صدمة، أمنيات كاذبة . تعبيرات عدة ارتسمت على وجوه الناس في مشرحة مستشفى أم درمان
الوجوم، الأعين تدور مرتبكة تبحث في غيرها عن نفي او تكذيب أو أي شئ غير الحقيقة.
بين الحين والآخر يتعالى نحيب حار يغالب صاحبه نفسه يسترجع بصمت مذهولاً التماسك الظاهر لناس تفضحه الدموع والاختلاجات
ساعات طويلة في المشرحة مكالمات عديدة ورسائل بالهاتف وجموع يستحيل تواطؤها على الكذب. كل ذلك لم يقنع الحضور أن حبيبهم حميد قد رحل.
إلا أن حمل الجثمان ملفوفاً بقماش أبيض حينها انفجر الكثيرون في بكاء مر . عم المكان احساس عميق باليتم الفكري.
صدق المحبون أخيراً أن محمد الحسن سالم حميد قد ارتحل رحل حميد الذي احتضن أحزان الغلابة واعطاهم النغم الجميل. امتص آلام الغبش ووهبهم رحيق الكلمات بنكهة النضال.
موكب مهيب : الفقد جلل الحزن عميق بالايمان قهر الناس الخبر الفاجع وبالاسترجاع استعادوا تماسكهم وبالاستغفار وطلب الرحمة للفقيد
فعلوا الأفضل في البنداري بالحاج يوسف ضجت المقابر، الأرض التي احتضنت الكثيرين في جوفها ملأ سطحها الكثيرون أيضاً
توافد الناس من كل بقاع السودان يودعون الراحل الفقد الجلل كل الطيف السوداني كان هناك الوسط واليمين واليسار
والانتماء حضور أهل الختمية كان كبيراً بيارق الختمية واعلام الاتحاديين وطلب الرحمة والتوسل بنبيه عليه وعلى آله أفضل الصلاة وأتم التسليم
الأستاذ صلاح سر الختم صلى ودعا وتحدث عن الفقيد وابتهل الناس خلفه يطلبون الرحمة لفقيدهم حاملاً تعازي والده السيد الميرغني شارك أحمد محمد عثمان الميرغني في مراسم الدفن.
عقب انتهاء المراسم تواصل الهتاف الثوري مرددا أشعار الراحل الهتاف الذي بدأ عقب مغادرة الجثمان للمستشفى صمت ثم تواصل عقب الدعاء.
واصلت التظاهرة العفوية سيرها من المقابر حتى تفرقت في أجساد المتظاهرين حملوها معهم وعبرهم إلى كل الغلابة الذين تغنى لهم حميد
تزرع الأمل في غد أفضل تجدد الرجاء الذي يطرد اليأس يرحل جسد حميد وتبقى ذكراه. رغم غيابه تقود اشعاره الناس نحو الأجمل. فعلت ذلك بعد دفنه ولن تتوقف (حرية سلام حرية)
في المشرحة والمقابر وبيت العزاء كان الناس يعزون أنفسهم كل يعزي من يقابله أقارب الفقيد وأهله وقع عليهم عبء تخفيف الحزن على أحبابه ومريديه.
طوال أربعة أيام وحتى الآن يتوافد الناس من مختلف اتجاهات الدنيا . لا يهم من يعرف من المهم احتضان القادمين ومساعدتهم على تخطي الخبر الصادم.
كثيرون لا يصدقون حتى يقرأون وجوه مستقبليه في السرادق ينفجرون في بكاء مرير. يسترجعون يستغفرون يصمتون ينتحبون ثانية يغالبون دموعهم
حم يا حمام لغناك حم
بين رشة الغيم استجم
مافي السموات الأخير
الواطة هي المشقوقة غم)
الحضور
ومن اللحظات الأولى توافد على المستشفى أهل الفقيد واصدقاؤه ومحبيه
من الوسط الفني والرياضي غطى الحزن وجوه ازهري محمد علي والقدال ومحمد جبارة ووصل السر عثمان الطيب منهاراً.
وكان هناك د. خالد المعز وجمال الوالي وطارق الأمين وطارق جويلي والشاعر وراق وخالد شقوري.
وفي المقابر الوالي الخضر وعثمان اليمني والصحفي فيصل محمد صالح الذي خانه تماسكه عندما رأى أصدقاء الفقيد .
والشاعر التجاني الحاج موسى وفي العزاء الفنان صديق أحمد وشابو وصلاح ادريس وشقيقه عادل ود. عوض الجاز والامام الصادق المهدي يقود وفد الأنصار وكثيرون غيرهم.
محمد الحسن سالم حميد
ولد في نوري بشمال السودان في 1956م عام استقلال السودان وتلقى بها تعليمه الأولي والأوسط والثانوي بعطبرة. عمل في الموانئ البحرية 78-1992م الخرطوم – بورتسودان
وتوفي عن 56 عاماً في ارتباط عميق بالوطن كأنه ولد بالاستقلال ومات حزناً على الانفصال حلم بوطن من غير حدود يسع الجميع وبي بيوت بي نور ودش وبي محبة تدخل إلى قلوب الكل
والأخيرة حققها بصدقه واخلاصه لمشروعه الابداعي وانحيازه للغبش الأمنية الأول والثانية لم تتحقق لأنها خارج ارادته.
لكنه مات وهو يسعى لتحقيقها ظل يناطي (البي غادي الشاق الوادي يبقى (تركتر) مو(مجروس) ويضيف مناشداً الجميع تعالوا بدل نبني ساتر نخيب ظن الصدام.
اعماله : له عدد من المجموعات الشعرية : مجموعة نورا والجابرية ست الدار ، حجر الدغش ، مصابيح السماء الثامن وطشيش وعن اذنك يا مصر
ودشنت زين ديوانه الأخير (أرضاً سلاح) أكتوبر 2011م.
سافرت أعماله في أشرطة الكاسيت وعبر الانترنت وقصاصات أوراق مع الأحباب إلى كل أركان الدنيا.
كلنا للأرض والأرض لنا
ولنا متسع حتى السماء
فإلاما ولما يغمر الأرض طوفان الدماء.
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
يا حميد .. عبدالمنعم محمد أحمد العوض قال ليك:
وصـلت سدرة منتـهاك.
ياناس نعزي مع منو
ونقول شنو
حامدنوا رب العالمين
عاد صح يباكو مع منو
يمكن يباكو مع فطين
قول نورة يبقى مع الحسين
يا زول اقولك شوفلك اكتر زول حزين
ياهو الوطن
ايوه الوطن
العاشو جواه الخزين
الدهدهك روحت وين؟
راجنك آآ عشم الغلابة المتعبين
راجنك آآ دخري الضهابة المتربين
الدهدهك روحت وين؟
عترلك الحجر آآآآآالبخيت؟
شوف عيني شفتك من زمان
في ها المكان
شوف العيان
متوشح انوار اليقين
عترلك الحجرآآآآآالبخيت
شوف عيني شفتك قمت بي فوق السحاب
ولوو... رهاب
رافع معاك ظلم السنين
الكان مبوق في الارض من قبل حين
شايل معاك ###### الارض نضفتها
وكمترت تشق كل زيف قام في الارض غربلتها
واشوفك اتوكل... لي وين؟
عتر لك الحجرآآآآآآالبخيت
شفتك كمان في ها المكان
واقف مع محمودنا راضي ومبتسم
تتحدوا لي ظلم المشانق يا الحنين
روحك بتفدي وطن نفيس
في البرزخ انت هناك عريس
لا صفقة مافيش لا رقيص
لا حني لا طنبور وكشف القرمصيص
مافيش تعب مافيش نصب
يبراك ملاك
وسراك براك
ليك ما تريد
كل ما تشاء وهل من مزيد
وحسن الجلالة عليك يميس
ميست....ميس !
آمين ...امين...آمين..امين
يا شيخي ود ختم الرجال
بلدنا.....جال
ياسيدي سيد العارفين
مقداد انا ...وجدك أمين
كل الجنايز... تندفن ؟
امرا... عجيب
مولانا ......صلي علي الحبيب
دايرنهن ينداوا بي ضرب الدبيب
امرق!
امرق واطلب الفضلة من هين الرسول
واكشح عليهن من ثرى الحسوات وقول
شاهت وجوه
بئس الوجوه
والشمس تشرق كل حين
وقبال كدي شفتك مع عيوشة راكبين القطر
زمن القطر!
يوم كنت سايقها للعلاج
والظلم ينهب في الارض يقطع فجاج
الدهدهك روحت وين؟
تاريك انت نزلت في نص الطريق
فاقد جنيات الفريق
شوف عيني شفتك يامطر عز الحريق
لاعبتهن
وهدهدتهن
يا الماك ضنين
عترلك الحجرآآآآآالبخيت
وخليتنا لي ظلم البشر
ولي كل شر
يا خي الله في
ايوه الله في
وكمان قوافيك المطرزة باليقين مابرضو في
وان شاء الله مايغشاك شر
سي.... ياوفي
ساعة مرقت اكيد عرفت منو اللي خان وطنك يا زين
باعوه يوم صلب المسيح
باعوه يوم ظلم الحسين
وانت المشويم بيهو لابسو عرق جبين
والله شفتك شوفة مرة مع الرضيي
نفسك رضيي
عين اليقين
وكدبنا في الكرو في رجاك
عاد ماشي مننا وين رجاك
وخليت وليداتك براك
كيف بي قفاك؟!
يااخوي وليداتك كتار وحملك تقيل
جيش من بطان
وحروم كتار لابسات طرق وناس من زمان
ناس حمتو ناس عيوشة ست الدار وعم عبدالرحيم
والسرة بت عوض الكريم
كترة رجال وكترة حريم
حملك تقيل وعلينا دين
وكل البلد عليها دين
الشورة كيفن شن نسوي مع الولد
الكت شايلو حمل بلد
وتمر الهبوب بقضى الغرد؟؟!
كرموش وصيص عفنون مرض
يا زينا انت رجعت وين؟
عتر لك الحجرآآآآآالبخيت
وانت التعتر لي حجارات الزمان
الفوقنا زي حيبي العوارض
وانت مادايما تعارض
والخوازيق ليها رافض
وعرضحالك للوطن
يا الماك مدغمس وماك مدهنس
وماك مدلس وماك مملس
خطو واضح ...وفكو عارض
لفيت بي وين واللا وين؟
ياالجيتنا في نفس الزمان
وادركت لي وتر المكان
وشفعك رهين
شفتك ...هوى
دايرين تشمولكن هوا ؟
يا الكتو متقاودين سوا !
نازلين علي قيف البحر
اوعك من البحر البحر
بحر التساب الجهجهك
اخد الحذر
شفتك نزلت على الغريق
ووطنك غريق
مالك غتس؟
بنقرت ما شا الله انت مرق عديل
شايل وطن ما فيهو ميل
زين يا عديل
وكل احرفك وكل القوافي القلتها
ما اتبلت آآآآزول ياجميل
مرقت تسوق المتعبين
مرقت تضاضي المترفين
الشقو صفنا فلقتين
في واحدي سموها الشمال
والتاني سموها الجنوب
وقااااعدين عتاوي المجرمين
لي سفنا
وانت وانا
بيناتنا دين
ما دينك انت علي كتير
نصبح حبايب لامتين
ونحن الحبايب من متين
وعلمتنا
الهودنا
والسودنا
وضوقتنا طعم الغنا
وكيفن تكون الدندنا
انعيك وانعي رويحتي والاجل الدنا
ابكيك لي مين واللا مين ؟
ومن غير خلاف
خليتنا للربا والتلاف
دينك علي.. تب ماب اخاف
من كل تجار السلاح
الدسو كورية الملاح
وخلونا بايتين القوا
ورافعين سلاح !!
دينك علي تب ماب اخاف انا منهن
بمسك على جمر القضية وافنهن
فنن فنن .....
لكن ده كلو بفضل مين ؟
بي الله بي سرالقوافي الفيها شين
وياانت ياودالحسن
انت الحسن
طبعك حسن
ياالفت يعرب والرطن في العالمين
ماشفت شي
الناس ترصرص في الصفوف
ماشفت شي
يا اخي الخريف محق خلا بيوضة
والزمن الصريف فات بي وشي
وواقفين علي طرف النهار المحتشي
وجات البشاير تنتفض
مسنودة بي سحر القوافي المنتشي
الرادي ذاع عبود رحل
عبود رحل؟
وتاني من نفس المكان
الرادي ذاع اب عاج رحل
بـــلا ...وانجـــلا
الحمد لله الرحل
يا شعب لامتين التردد والوجل
يا الماك ########
يا انت نمرة تلاتة هوي ارحل كمان
ارحل كما القبلك رحل
اقنع .....حار بيك الدليل
انجع ...عارفين البديل
الحق ...والدرب والعديل
اسمع ....وسمعك مو تقيل
الموت ...يحوم
اطلع ...وجنبنا الدموم
غادر...بتكفينا الهموم
الغم واحزان السنيــن
ارحل متل ما سوى زين
الدين ده ما لازمن اختو علي دين
والدين ده دين
دين الوطن والله دين
لازم انزلو من ضهر هم السنين
وبلا رتوش
ما مت انت ولا رياح صدك تموت
الزيك انت ولاب يموت
فايتبو فوت ....
ساريبو مسرانا الامين
يا اخينا انت مرقت وين؟
اظني شفتك مرة فوق جرف القدر
قالو الحجر هو الغدر
الغادر الله يخونو من خان مسلمين
كضب علينا بلا سبب كل ها الدنين
اسع نعزي مع منو
عاد صح يباكو مع منو
اخوك فطين
حميدنا يا البكيتنا بالدمع السخين
نبكيك مع وهج الزمان الانطفا
وتنوووم ........ قفا
ياالكنت تابع لي خفاف المصطفي
ووصلت سدرة منتهاك في الخالدين
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Abdlaziz Eisa)
|
سوقني معاك يا الحمام
ـــــــــــــــــــــــــــــــــــــــــــــــــــــــــــــــــــــــــــــــــــ
حميـــد
_____
سوقني معاك يا الحمام
... ...
سوقني
محل ما الحبيبة
قريبة
تراعي الغرام
غريبة الأشواق
حبيبه
يجيبه منام في منام
... ...
سوقني
محل ما المحنة
وأيادي تقطِّر سلام
سماحة الحياة فوق أهلنا
وبلادي تقرقر وئام
غلابي ...
وأمان مو الطيابي
ضكارى بصارى وكِرام
حبابه الحبان في بابه وتدخلوا عليَّ الحرام
فقارى ...
ولكن غنايا
غنايا بهذا الغمام
بهذا النيل كم تغايا وتراب النرميهو قام
إرادة القمرة البتقدر ، براها ،
تضوِّي الضلام
شعاع شمشاً ياما خدّر وإذا يبَّس لا يُلام
... ...
فيابا خرابة الحرابة
وخرابة فكر سوسي سام
خرابة الكل نفسو تأبى عقابه تلِم عمِّ سام
... ...
وِليد مخلوق للقرايي خزين مدخور للجِسام
تتمِّر نيتو التخايي إلاما مذهلل إلام ؟
... ...
درب
من دم ماب يودِّي
حرِب سُبّة حرب حرام
تشيل وتشيل مابِ تدِّي عُقب آخرتا انهزام
... ...
بطان الشيطان قديمِة
وبعد دا
منو العرشو دام
إذا الإنسان ما ليه قيمِة
علي إيش خلَّفُو سام وحام ؟
....
تعالوا
الدم ماهو موية ولاها ترايي المسام
خباري بحمِّر في أخويا
وطراوة الخوّة ابتسام
تعالوا
نحانن بعضنا
نخل قلبو على التُمام
نبِضنا يشهِّل أرضنا وأرضنا تجِم العضام
تعالوا
بدل نبني ساتر
نخيِّب ظن الصدام
نطيِّب للعازة خاطر نقوِّم لأطفاله سام
أخير
كرّاكةً بتفتح
حفير وتراقد الركام
أم الدبابة البتكشح شخير الموت الزؤام
...
تعال
لي غابتك يا خيره
تعال لها يا أسده الهمام
بدل دوشكا يغنّي طيره محل قنبلة عش نعام
بلد صمِّي
وشعب واحد
عصية على الإنقسام
أبية وبكراها واعد ، صبية ومشهاده تام
بساطه أحمدي
كم يشيلنا
وتشهِّلنا على الدوام
نَقِل ليلنا
تقوِّي حيلنا ودليلنا تمام التمام
نلقّم سقف المتاهة
نجم هدّاي في الضلام
ونطعِّم حرف النزاهة لإيلافك يا حمام
...
ديموقراطية وأمان
سوا .. سوا عالين مقام
مواريثنا المن زمان محصَّنة في أروع نظام
...
بريدك ،،
يا زول بريدك
بعشقك حتّى الهيام
أريحيتك عد تزيدك مهابة وليك القيام
عهدي معاك يا حمام
حِبيْبَ الرُسل الكرام
رسول الأمراء العظام ، عصامي على ما يرام
... ...
ماب تهدِل في خنادق
ولاب تقدِل فوق حطام
ولاب تنزل في فنادق ، وسطنا مراعيك قُدام
...
فيا ملدوغ من أديس
معوَّق في كوكادام
تعال عمِّر فينا ميس كفانا طشيش الكلام
كفانا قميرى و كراهة ،
شتات و قطيعي و خصام
ماسي هوايل وراها عمايل النخب الفصام
...
جناحيكَ جنوب شمال وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر شُراكة القَتَلة اللئام
متين بإسم الحق تكبِّر
و بالرحمة تصلِّي إمام
فلاحة العالم تعمِّر محبّة مودة ووئام
تقص الإيد التدمِّر
تشمِّر ساعد السلام
...
سوقني زمن كلٌُّو عافي
نتاجو عِلم خيرو عام
بري آيمة من المنافي وطن وافي على الدوام
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
والطالب : وقاص الصادق قال ليك:
قصيدة "وغاب انسان"
........
وغاب إنسان
بادلنا الوجع بالکلمه
أتحمل براهو الضلمه
هسه ترکلنا الأحزان
وغاب إنسان
....
عشقک زی عشق وطنی
قولک زي سماد للروح
وكت تفتح جیوب وهني
وكت تبدأ حواسي تنوح
هسه منو البداوينی
بعد فتحت شوارعی جروح
دا عشقک والوطن سیان
وغاب إنسان
....
ما أتخيلت یوم أرثیک
وإنتا الدیما حی فینا
مهما زادت أوجاعنا
بیوت شعرک تداوینا
غنیواتک علی الهامش
للأوجاع تنسینا
نورا وطیبه واخواتن
دوام بالکلمه تغنینا
وینک هسه بس لکن
راجینک تورینا
تفاصیل ما حدث لکن
ما لقینا البواسینا
کم أنا کنت بیک غنیان
وغاب إنسان
......
وما بننساک یا حمید...
وکیف ننساک یا حمید
وإنتا فتحت فی روحنا شوارع رید
وإنتا ربطا إحساسنا مع أشعارک
بأجمل قید
وإنتا الکل ما اقرأ قصیده من کلمک
أحسبو العید
وإنتا الکلو ما مر علی..نسیم
من نوري...دموع وإنتا تزيد
سکنت جواي...زي وطنا
سکن جواک...وعاش فی ورید
غنیت السلام بیناتنا
أودعت السلام فی قصید
وزعت السلام بیناتنا
ورحلت بعید
وأشعلت في قلیبی النار
ونار الشوق یاما ...... تقید
وفت بعید
وقلبت لا نسی لا خان
ودیمه للوطن صیان
وغاب إنسان
.......
وطنا الشایلو فی کتفک
وشایل همو بي کتمان
بکاک الآن بحر أدمع
دموعا ما انتکت شُطآن
صداک وصلني قبل الصوت
وصوتک خشه فی الوجدان
قصیدتک وإنتا تصدح بیها
حروفاً یبصرا العمیان
ملامحک زي ملامح نیل
ونیلنا من الدموع غرقان
بتبکیک نخله فی نوري
بتبکیک بقعة أمدرمان
وقیزان الرمل تبکیک
والأبنوس...وشدر البان
علیک الطیر یهاجر یوت
في الکرم الغزیر عشمان
قلیبی قلیبو فر منو
وحتی الطیر صبح حیران
وین فات الحمام ساقک
ضهبنا وراک...فقدنا حنان
وین بعدک تروح الکلمه
وإنتا صنعت لیها مکان
وما بننساک..مهما کان
وکیف ننساک یا حمید
وإنتا کتبت بي شعرک
حبک في القلیب عنوان
وکان ما شالک الشریان
نشیلک نحنا فی الشریان
وغاب إنسان
وغاب إنسان
وغاب إنسان
......
وقاص الصادق
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Mohamed Abdelgaleel)
|
قوم يا خال
محمد الحسن سالم (حميد)
قوم صحي نضال ... عمال البلد أم خير يا خالْ
صحي الكُدّاح .. الوين ترتاح .. والحال بطالْ
صحي التربال .. والأرض الطيبة الكم خاواها وضادا النالْ
اليوت شغال في نهارو وليل ... منهوك الحيل تحت الراسمالْ
آه الراسمال الياما قسى وعوّق رجّالْ
ما خّلا نساء .. وعرك الأطفالْ
لا مسلم قال .. ده آ خيي بلالْ
نصراني يحن في قبريالْ
لا يمين في يمين ... لا شمال في شمالْ
دولار وريال ... دوار يا خيالْ
تجويع وإذلالْ
خرّب واغتال كل الآمالْ
ما تخلي مجال دون إستغلالْ
السلب حلال .. النهب حلال .. والصلب حلالْ
هدِّم لذات المسهوكين من أجل الذات .. مكينيزم انتاجْ
ابراج العاجْ
هيصة المكياجْ
ديباج التّاجْ
السيخي الصاجْ
زي اعتى سياجْ
يتلقى افواج المسحوقين في الليل الدّاجْ
المسيوقين تحت الكرباجْ
اخوان اصرارك يا حّلاجْ
على انو الليل بِلْد الفجّاجْ
وضربة محتاج في نهاراً ساجْ
أبتر من سن سيف الَحجّاجْ
الله يا الزول الساقو عُزال
اطرى الإذلال يا دغري عديل بيصارع الويل حيّاً ما زالْ
بالصبر يشيل في الما بنشالْ
ما انيقّن وقال يا دنيا محال ينصلح الحالْ
بل عبّا وشال جواهو الفالْ
نازل وديان طالعبو جبالْ
أشواك ورمال غابات ووعر .. بين ريح ومطر .. عِرْق الشّلالْ
ومطّامِن بال .. ما لاوز قال يا ربي أصد من دربي الطّالْ
ما طال لا بد يشرق بكراهو الما بنطالْ
يشرق بالخير .. بالحب .. بالود .. يشرق لا بدّ يضوي الحَلاّلْ
إزي يا خال ... كيفنو الحال .. زين عال العالْ ؟؟؟
مع انو الحال ما راجي سؤالْ
ايجار البيت ... جيهة الأطفالْ
مشهاد اليوم عيشة الدوبالْ
أفراح العيد على روحو وبالْ
عكّر لي الفوق أداهو إذلالْ
والخوف ام زين ان صابا زلالْ
الله يا زول مشغول البالْ
في الدنيا يكون ما في استغلال
والشوق رايات ... الله يا زول ... الشوق رايات
والله على ناس كلها احساس ..
انو الجايات اجمل والفات ما فات والفأس
والارض البكرة الفكرة .. الراس
الختة اساس الليلة وبكرة .. اعظم ميراثْ
أجمل من ده واعظم بكثير ..
عالمنا يصير ما فيهو اجير..
لا ناس فوق لا طيطي راسْ
يبقى المقياس الشغل التام بي وفا واخلاصْ
الخاص للعام والعام للخاصْ
والشوق قدام .. الشوق قدام ...
والخوف ينداس تحت الاقدام ..
كابوس البؤس نلقالو خلاصْ
اصلاً يا خال ... شفقة راس مالْ
اما العمال انفاسا طوالْ
وان طابو نفوس .. ان طال البالْ
ضي الفانوس بيكفي جبالْ
حدك يا رصاص .. ما دارلو دواس ولا حتى كباس
عالم كالشوق وحق كل الناس
الا الكداس .. عاكاس .. عاكاس
شان دفتر شيك بسرق كراس
واحنا الوراث كلنا حراس
والجاي يدوس عزنا بنداس
اصلو السواي تب مو حداث
يا حب إنداح على كل قليب
إنزاح يا نواح .. دندن يا دليب
بأغلى أنغام .. ويا خطوي ارتاح على أحلى دريب
قدام قدام في امان وسلام
يا عالم كون بالود مسكون ... قوام قوام
قوماك يا خال .. حلاّل حلاّل .. باشواقنا نطوفْ
الدنيا نشوف اشجار الفال الدانية قطوفْ
شان يربى طفل لا غم لا خوفْ
وإن قالا بِغِمْ ما يلقى دبيس لا هملي وهم
وخاطر مكسوف ينعشى يبيت على صوت الأم
شان باشي تعم
من بيت لى بيت ... يا بكره يا ريت ... غنواتنا طُعم
والعالم خيط .. والقابض كان ذات مرة حلم
والرامي انسان ما انيقن شان الدنيا زمان قالتلو أبيت
ويا عالم كون بالود مسكون .. كون حُرمة بيت
رَتّاي وحنونْ
ويبقى الدناميت من أجل طريق يمشيبو دقيق أو قطرة زيت
للصابر فوق ما فكّ الريق .. يا سابق الصوت من تنزل موت يا ريت خبيت
فوق كتف الشوق لى حال مفتوق بي إبرة وخيت
وعلشان ده يكون .. قوم حييّ نضالْ
عمال البلد أم خير يا خالْ
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
شَرَف البنادق
__________
حميـــــد
____
خوفي
من تلحق رفيقك
يا بريق نجم
الحيارى
وإنت
لا نّور طريقك
لا شرق
فجر السهارى
...
...
من سَعَة
يا صحوة طلعك
غصَّة في حلق
الصحارى
حتى شال النمة
فرعك
دودى
زي وهج البشارة
قلنا
يا سعد المواسم
عودك المليان
جسارة
عودك الفجري
المصادم
بالبصيرات
والبصارى
مستحيل
يرضخ ..
يساوم ..
مهما كان الريح
حصارا
يفضل النخل
اليقاوم
في السقوط
نخل الفقارى
...
...
يا اندلاع
صوت الغفاري
في حلق دغش
الغلابى
لو خريفك
تاني يطرح
آهـِ
يا آخر سحابة
لما
يا شرف المواكب
يبقى
هم الناس
إمارة
تندحر
كل المناصب
ينكسر
كرسي الوزراة
...
...
كنتو وين
وين إنتو كنتو
كنتو ..
وين !؟
يا الفجأة بِنْتُو !؟
كنتو ..
وين ؟!
لمَّا الشوارع
ما ثبت قداما
مِرْتِق
نفضّت
صمت المسافة
مّدت
الشوق المضارع
للصباحات
التجرتق
كف شهيدا
البق مارق
من فَرقة الظلمة
فجرًا
تمَّ بي دموّ
الشرافة
وضمَّ حِضن الأرض
عاشق
...
...
كنتو وين ..!
وين انتو ..
كنتو ..؟!
...
...
لمَّا كان في سجنو
ثائر
بي جلافة السونكي
نومتو
ويصحى
بي أمر العساكر
قومتو
في الزنزانة
يمسح
بي بشاورة قلبِ
صابر
الجراحات البتنتح
هجمة الليل
والدرادر
من عصارة دمّو
يكتِب
أنبل الأشعار
لباكر
نمُّو يقفِل
غلبِ أمُّو
وتفتح السكّة
الحناجر
تقطع السجَّان
وسوطو
ويبقى فنانا
البساسق
...
...
كنتو ..
وين ..؟!
يا أهل الدِراية !
لما فضل الدين
عباية
تدلي
من كتف الغنايا
تنتصب
في الجو
طوابق
تنقلب
في التو
مغالق !
للبداهن
والبنافق
والبوافق
...
ولما كان
نفس العبايا
تنفَتِل بي قدرة
حبلاً
لي قصار
عُمر الكحايا
من جُنب تنسلا
سيفًا
عبّر السوَّاهو
سارق
شدة
الفقر الخرافي
حدة
الشغل اللي مافي
هدّة
الموت الإضافي
ومد لساناتن
سباليق
الخوازيق
الشواهق
...
...
كنتو وين ..؟!
لما البيوت
في الشمال
قامت خنادق
للكتابات البتنزل
فوق ضهاريهم
مطارق
لما طلاَّب الحقيقة
كانوا يختاروا
المشانق
ولما صوت الله
بموت في الجنوب
بين البنادق
...
...
آهِ يا وطني
المستَّف
في المطارات
القصيَّة
آه يا زمني
المنتَّف
في مدارات
القضيَّة
آهِ يا صمتي
المكتَّف
بالعبارات
النديَّة
آهي يا نبتي
الملطَّف
بالنهارات
الصديَّة
آهِ يا كفني
الملفلف
بي دواهي
بني أميَّة
آهِ من
رفع المصاحف
بالرماح الأجنبية
...
...
المعاطف
أجنبية
العواطف
أجنبية
الجلاليب
أجنبية
الدواليب
أجنبية
السراديب
أجنبية
السراير
أجنبية
المساير
أجنبية
صبة الكاس
أجنبية
ختة الرأس
أجنبية
رشة الدلكة
أجنبية
رعشة الفركة
أجنبية
طفية النور
أجُنبية
والخوازيق
عربية
عربية
عربية
فضِّي نارك
يا محارب
ولاَّ
هات البندقية
غنِّي عشقك
يا صبية
احنا قدامك
مدارق
غنِّي للوطن
المفارق
عشت
يا وطني المبرَّق
بالندى
ولون المشارق
يامحرّق
يا مجرِّب
عشتَ بي
شرف البنادق
ويسقط
العفن ال بتلب
فوقنا
من شُرف الفنادق
يسقط
يسقط
يسقط .
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
حق الغُني
ـــــــــــــــ
حميــــــد
_____
من حقّي أغني
لشعبي
ومن حق الشعب
عليّا
لا بإيدك تمنع
قلبي
ولا قلبي كمان
بإيديّا
علمني أغني
الطين
المخرطة والطورية
الناس الصابري
سنين
بالحال المال
دغرية
القابضة الجمرة
في إيده
والجمرة تلهلب
حيّة
لا قادرة الجمرة
تقيده
لا دايرة تولّع
هيَّة
...
يا قلبِ بلاش
نستعجل
في الدربِ
شوية
شوية
واصلين الماب
يتأجل
اليوم
الشمشو
قويّة
علمنا الشوق
نترجل
ونستحمل
وجع الجيّة
لا القش بيهاب
المنجل
لا الطِبو النار
الكيّة
...
يا صقر الآفة
يا ريح
لا تنفض
عش قمرية
من حقو يغني
صريح
ذرية وراء ذرية
...
ومن حقي
أغني العالم
إبداع
وعلم
حرية
إنساني
شعوب تنسالم
تتكالم بي حنيّة
على نخب الود
نتنادم
لا جنس
ولا لونية
لا عِرقِ لا آه
نتقادم
سكتنا
بياض النيّة
...
مش كلنا
جينا من آدم
مش آدم
أبو البشرية
السجن إذن يترايم
نبنيها
قلاع ثورية
عقبان الخير يترادم
والدنيا تمش
دغرية
مد كفك
يا بني آدم
حرية
سلام
حرية .
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
لو ألقى بندقية
_________
حميـــد
_____
لو ألقى بندقية معمَّرة وصقور
معاها كم حِديّة
بسكِّت الطيور !
بأصواتن الشجية تذكِّر الدرادر
دراردر الرزية
عنايا في البيادر غنايا للبنية
كأني خاذي .. سارق
تحرِّشُن عليَّا
تشيِّلُن بنادق ترسِّلُن إليّا
** **
أقول لهُن
دي غنوة لأحلى جارة ليّا
عشان بهية حلوة كما القمر عشية
كتبتها وبقيت
أغنِّي وحدي فيها
أختَّها وأجيها
أشيله فوق إيديّا
صحابي شافو ليها
فقاموا هاموا بيها
تناموا في عينيها معاها حاموا بيّا
** **
غنيوة ماب تبيت
شقاوته العليها
خطيوة بي وشيها ولا وراها جيَّة
** **
تخش في بيت لبيت
شوارع أي جيهة
حليوة في مشيها
نسيمة في البرية
أبت تخونّي ..
أبيت
أصن ولا عليها
تزِن ولا عليّا
مداخلي في المحاضر
مخارجي البريَّة
تشعوِّت القياصر
يتفُّوا في وشيَّا
يشنِّفوني
شاعر
يصنفونى حية !؟
يقبقبونى جملة !
يسبُّوا والِديَّا
يطفطفوا السجاير في كلِّ كلمة كيَّة
سجارة في السجارة
بسيطة هى .. هى
ما أنا الوليد .. شطارة .. مكوكن إيديا !
إشن تسو شرارة ؟!؟
في جارة ناره حيّة
بلا تزيد أواره تلهلب البنية
تدودِي ليل نهاره . تحرق الأسية !
وتطرق الحيارى !
في سكة القضيّة
تخضِّر الصحارى ومطورَه كم سخية !
...
وتجينى كبة حامى .. ..
تخلى خشمى دامى .. ..
حرامى
ود حرامى
و رباة شوارعية؟!؟
ويصد صدى العبارة عليَّا
، عيّة ، عيّة
دي ناره ولاَّ ... ؟
...
يلاَّ ...
بلاش أوانطجية .....
...
...
أسوِّي إيش يا أخيَّة
غريب دخلت حِلَّة وكلابه طبُّوا فيَّا
ولا حجارة
ولاَّ
عصاية بين إيديَّا
في حوشنا مافي إلاَّ
رماد .. وحُسْنِ نيَّة !؟!
وغنيوة مارقي للَّه .... دا كلُّ ما لديَّا ؟!
ولو ألقى بندقيَّة !!
حأطفِّش الحمائم
عشان قعَد تقوقي
وهديله حالي حالم
يتوِّر الدرادر
درادر المظالم
يذكِّرُن بشوقي لعالماً مسالم
قَبُلْ ندى البواكر تلفَّبُوا النسائم
وولاد بلد نذاكر
نحسبُّن هجائم
نجدِّع الدفاتر في كرِّقة بهائم ؟؟!
نخاف يقلِّبوها
يلاقوا طيفه حائم
بنيَّة غلبُّوها بكافة الهزائم
تلقِّي بال أبوها لجافَّة الشتائم
** ** **
بدل هُن اليساسقوا
بقيت أنا
البساسِق
حلالي حين يوافقوا
أفوت حلالي مارق
لو إنُّو عاد يصادقوا ؟؟!
أنا أولى من تصادق
قلوبن الصدية كأنتن الخنادق
*** ***
لو ألقى بندقيَّة حأكتِّل البنادق
إذا تخون قضيَّة
وشعاعاً أصلو شارق
عشان حشا البنيَّة يدفِّي
ما يدافِق
وبدل خطى أرزقية
يجي المطر يساسق
لكل مشرقيَّة خندق من الخنادق ؟
ــــــــــــــــــــــــــــــــ
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
خيول الباشبُوذق
ـــــــــــــــــــــــــــــــــــ
حميـــد
_____
قلت أندهِك ..
خُف من يشِط الريح نديهتي
على صناقير الشتات .
ويجهجهك .. عن جيهتي أبو التيْ تيْ
سنين
تبري السراب و يدهدهك .
يدخل عليك الليل براك
أب لمبة بينو يتوِّهك ..
أو تشدهك .. عنِّي .. المدن
فيها السحر والكُضُّبُن فيها العوارض
تنجهك ..
...
تنضب موانئ اللقيا ..
تنكبِت البحار بيناتنا .. صُن ..
أو تنسهك .
وين ساكنيها ..!
من الدرر واللولي والمرجان ؟
خلاص خلت الديار
من أسمي طائر ومن غصن ؟!
الطين مكفَّن بالملح
كمكام من الصدف .. المحار
ما بين حزن والتاني ينشكَّن حزن
وأنا يا فنار أشواقي
تحتي وفوقي نار ..
ما من قطن ..
ما من مواشي ومن صمغ
لامن عمار ...
وتجي السفن ..
سيسيق خطايا على الرصيف
محض إنتظار
رمض إصطبار
وِهْديب سخن ..
ما من إشارة ومن قطار
وتجي البشارة أو الخبار
شاخن قرى وباخن مدن
داخ الأديم ..
فتحت جراحو كركِّي
من كُتر النزيف ..
إنقنقتن فوق التراب كُبّة مواسم من هشيم
نونن ليالي الصيف خراب
أضرب عن المطر
الخريف
حردن سحاباتو الإفق
نفض السحابات من غلب طينا القديم
هاج غربة في الطين
الشدر ،
رفس النسيم
قطع الأتر همس العصافير الحنون
وبدت تشك كل الغصون متعففة ومتأففة
من طيرة
خانت جنسها
وباعت معزة نفسها
وبرت الصقور المترفة
شقيش تغور تنضنبه وشقيش ترك ؟!
ينجيني
من وحل السقوط
عشقاً سمابك ونزَّهك ؟ ..؟
؟؟؟ ... ؟؟؟ ... ؟؟؟ ...
با بت في أيام تنتهك حلم الغفاري
وتسفهك
شان إنحيازك
للغبش
حبِّك ضراعه الماب يغش
عشقك شعاعه الوين يخش
شايل بشارات الدغش لي أيِّ حتَّة بتشبهك ..
يا بت دي أيام من جفا
بردن كواني اللقيا من بعد الدفا
خنقت مواعيدي الحِشك حلق الوفا
يا أم المساهرين النهار
ميلك على التحت الكتار فوق خلَّه قِلَّة بتكرهك .
... ... ...
وبين مخرج الشوق من حشايا ومدخلك
كوركتلك ..
...
ما جاني رد
...
خبِّيت خطاي إستعجلك
قبّال خيول الباشبوذق
غلمانو ما تاخدك سبية وتستبيح لي منزلك
حاطوني عوّان بين خِنين
جاطوني بين ملِّة وصبر
في الآخر
أدّوني السكات
أغروني بي شاهد ملك
...
دايرني ألوج
...
وأنا ما نكرتك للعرب
بس ماب أسيبك للزنوج
والنوبة والبجا والحلب
وأنساكي لأولاد الصعيد
وأنا ما دفرتَ عليكي سام
أنا ما هبشتَ لي فيك عِرِق
أنا ما فلخ منّك حطب
أنا ما شلخ صور لا جريد وبهرت للأرضة المِرق
بس ما نفضتك للبعيد
ومكتوب لي من تاني وجديد
أبنيك وبي عصبي أرمُلك
بس ما دخلتَ عليكي وأصبح أرمَلك ؟!؟
البتّة
ما سوِّيت لي شي
بس قلتَّ لك ما أجملك
شعوتِّي فيّ ريح العشق
ساعة غلبني إستحملك
كوركتلك ..
يا أم السمُر
علِّي المتاريس الحُمُر قبل المطاميس توصلك ؟؟
كوركتلك ..
يا أم الخُدُر ..
تاني وهِلِك ؟؟
وين بندقيتك وين ؟؟
صرخ هيكل حمامة على سلك ..!
وإنشرَّ في وادي الزمن حلفي الحزن
شابك ضحك
دعت الصحارى على جروف فرحي البوار
غربة وغُبُن
صُرمة وحصار
ظلمة ودوار
يا قلبي حار .. وأبك .. أبِك
وين بندقيتك وين ؟
نخج هيكل حمامة على سلك ؟
أخفيكي ..
ولاَّ أوضحك
إنتي الموالفة على الفريق
لا ليل كلابو بتنبحك ..
لا كلمة زي رايش حريق تغلط عليكي ..
وتجرحك
ياولاَّ قبل أول شعاع
أطفالو تنسابق سراع حين تلمحك
تتموَّحِك ..
كفِّيك غصن تتمرجحك ..
تصعد إليك من راحة إيديك المورقة
ولي مسرحك
ويا صارَّة في صدرك
وفا
يا قبلة من ثغرك
كفى
تبراكي أريجات الزهور نسم الأناشيد ينفحك
تديكي أصواته الطيور
أسقط دموعي
وأرشِّحك
باسم العرق
قطر الندى
خلْق الصفق طول المدى
في الهمبريب الجايي حق..
غيمة ودعاشة
أو أرشحك فوق حيرتي رأي ويفرِّحك
يا شارحة صدر اليشرحك
... ... ...
بالطمي من فيض إشتهاي
أرقوق عناي
ماروق غناي
نبرو رجاي
حاحاي صحاي
أرقد عليَّا قفا وعليكي
أعبِّي سعن الصبرِ بيكي
أربِّي ليكي وأجيِّهِك
بالأربل .. الواسوق .. إيدي
أمشاط رؤايا .. أسرِّحك
بعرق شقايا أريِّحِك
فوق إنتي سمحة أسمِّحِك ..
برهق لقايا .. أريِّحك
تحتار عيون الموية فيك
يا ,, الله ,, إلاَّ يشبِّهك
شدر الحقيقة
الماحصل من تالا عارض
جهجك - -وإن دهدهك - على أوجهك !!
طير العشم
فيهو إستراح
يخفس قبُل جية الرياح
مرسالو يجري ينبهك
شتلك عن الشدر الكبار فيهو الصمغ
لا يشدهك
أخفيكي
ولاَّ أوضحك ؟
أخفيكي في لغة الوضوح
مابين حبيبين يوت سوى
بينات مسامات الوله وإنزيم شعيرات الهوى
في الفيكي
في سر المطر
بين لهفة الطين والروى
نية الرحيق طلق الشدر
ساعة خلاص شيلو إستوى
أدهشني
فيكي المحتوى
أجهشني كيف خاويتي
بين برد الصحاري وبين هجير الإستواء !
وكيفن أريجك كالرؤى قاج يتنقل عكس الهواء
؟؟ ؟؟ ؟؟
يا بت
عشان ريقة وطن
تنفكَّ
كم باتت قوى
ما ضاعت الآلام سدىً
وآمالنا ما شاله الهوا
لا بدَّ
يجمعنا الزمن ..
ما هو اللي فرَّقنا
وإذن :-
لابدَّ
وإن طال النوى
ترحل صهاديب المحن
ينبض على القلبين مكن طيَّب خلانا الإنمكن
تضحك عتاميرو البكن يخضر حشاها الإنشوى
ودي للرعية يعشِّبَن
تلد السعية
يجي اللبن
لي جملة أطفال الوطن..
صفَّر قمح
دندح دخن .
بدَّع صمغ .. فقَّع قطن .
ودَّن سفن .. جابن سفن
لا صرمة
لا بيتة قوى
ليل التجاريح وإنطوى
حسَّن قرى ورقصن مدن
أبنوس ونخلة .. سوا سوا
لا بندقية تقوم سِوى تحرِس ضهرنا من الغبن
أنا وإنتي لا خوف لا حزن
يملانا تاني ولاجوى
تلقيني ولاَّ ألقاك ...
دوا
تبتسمي
أفدِّر دمعتي
قدّام أحدِّر غنيتي
أطلع نشيد في رجعتي أنزل جديد لي دنيتي
قادِل .. مفتِّح صدري ليك
تندسِّي بين حنيَّتي
إنخبَّى فيكي ..
إنتي اللتي ؟؟!
وأقلد عينيك لآخر نفس
في مروة الريد الحرس في غربتي
كيفني ليك .؟. وإنتي العليك يوت ركَّتي ..
يا شوق خطايا وسكَّتي
أنده شديد وأوضحك
غابة حراز تحت الرزاز
ضلِّك ملاذ أهلي العزاز
قابض قّبِض سابع أرض عِرْقِك حقيقة ولا مجاز
... ... ...
مهما المحل ، مهما المطر
ظلمَ الرياح حمِّى الخطر
تنمقَّى فيكي وتنبحك ..
بتحتحت أغصانك جراح ..
لكن محال ....
أن تطرحك ؟؟
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
باسم السلام
ــــــــــــــــــــــ
حميـــــد
_______
باسم السلام نبدا
راحة غناوينا
على خاطرو تتمدا
ساحة حكاوينا
... ...
ونتغنى بالأطفال يا هم تقاوينا
من قاموا
قاموا رجال يات ريح تقاوينا
... ...
بنغني من عتّال داخل على المينا
يرفع بدل شوّال كفو ويحيينا
ماهو الونش شغّال صنعة أيادينا
... ...
يا دربنا الوصّال أصبحنا وأمسينا
بي روعة العمال زراع بوادينا
علماء ورجال أعمال وطنية تغنينا
عن محرقة رأسمال
وجندينا يحمينا
... ...
خل المراية قبال بنوت حوارينا
وكل البيكدح شال
في البيت رفع طينة
أصبحنا بالآمال
والجايي ينسينا ليل الجراح الطال
ظلمة مآسينا .. سبناها
شلنا الفأل شلنا السمح جينا
... ...
وبسم السلام نبدا ونختم حكاوينا
وطول الزمن تندى وتخضر غناوينا
| |
|
|
|
|
|
|
|
|
|
Re: حميد حسن سالم - أربعين الرحيل - السبت 28 أبريل - رابطة نوري بالخر (Re: Amira Osman)
|
وجع احشايا يومى يزيد
أسى العمال دموع الغيد
حليل حميد..حليل حميد
ونارا فى حشايا تقيد
تباكى الميناء سكة حديد
دموع كابى مابتفيد
أه يادنيا وجعى شديد
امانى الزول ده ماهو فريد
بلبل دوح وكيف غريد
عمرك بالتركتو مديد
تغوصها بحار وتقطع بيد
حليل الكان رسول الريد
يغنى للعيون والجيد
متقل قلبو بالتوحيد
هو لحنا جملو الترديد
محصن بالمبادى عنيد
قاسم امين تغنى نشيد
درت الموت بخيت وسعيد
اريت الامر كان بالأيد
***
وشوف كرعى الملانى شقوق
اشوفو يخب وشاقى السوق
كايس لى اويضتو عروق
وقالى الامر ما مطلوق
قالى الروح دى دايرى مروق
عجيب وغريب جنس مخلوق
جاء البندارى من لافوق
قدر حميد يموت مريوق
حزين وحشايا كيف محروق
فى حميد دعابه وذوق
ضمير الصاحى ما بيروق
فى ناسا عاملى دايرى حقوق
مرتب شهرى ما بيحوق
غضب وهتافا شق حلوق
هموم عمال اجر ممحوق
شعب جيعان شباب مسحوق
كلو ضمير وما كان بوق
لا بنساق ولابيسوق
شوق حميدنا للواسوق
وريحة الطين مع الماروق
يعاين فى قمح مدقوق
يتبن فى ملاحو يضوق
مرة يغيب ومرة يفوق
***
ومنو الليلى مابنشبع
اقول اندله تانى ارجع
فراقو يبكى للشفع
وشكن فى قليبى وجع
مجلبط فى الوغش يقرع
اغبش بى تحت يزرع
ضمير عمالنا فى المصنع
حلاتو اتجلى فى المجمع
وكل الامة ليها جمع
وفيهو اصالة المنبع
قلبو يحن وطرفو دمع
شيد عرشو واتربع
وبين الشعراء هو الاروع
اجمل قيمة لينا وضع
لا بيصد ولابيمنع
يعين اليتم الرضع
وكل ما سوا ليهو شفع
غصنوا رطيب ودابو اينع
دا حاجتو قليلى ما بيطمع
ولبنا من قدح كركع
***
اه الموت ملانى غلب
جوه مشاعرى شايلى سحب
اريتها دموعى مطره تصب
البندارى ريحو تهب
نحو الموت يشد ويخب
نارا فينى تانى تشب
متيم زولى كتلو الحب
فى اعماقنا شادلو نصب
من كلماتو اسكت كب
فى وجدانا روحو تدب
جميل الروح وصافى اللب
جاتو الدنيا قالها ثب
جريفك نورى منو يعب
وبينا وبينو مافى حجب
وفى حميد نسوى كتب
****
حلات حميدنا فى الونسه
وفيها الفارغى ما جلسا
شيوعى قضيتو فى عبس
فهل ننسى لعل وعسى
انا البطراه ما بنسا
بجيب من ناره قبسا
بكون للصبر ملتمسا
وكل افكارى ملتبسه
وفيهو الحزن منغمسا
حزنى عميق وكلى اسى
مركب عمرو دابو رسى
موتو صباح ودفنو مساء
فينا معانى كم غرسا
هدوما ضيقى مالبسا
عاشا مبادئو ما انتكسا
تهابو الزعماء والرؤساء
فى حميد بيكمن سر
تبدا برودى تانى تحر
اقولوا خلاص واشوفو مصر
بيجهد فى فعايل البر
قالى الليلى يومى ودر
عن احساسى قوم عبر
وقشقش لى دموع السر
تكركر روحو منو تفر
يبقى الزول نبينا خدر
ويبقى البيت سقوفو تخر
ليها الموييى سووا سعر
وحتى الشعر ما هو شعر
تشوف حيوان تحسبو نمر
تقرب منو يطلع هر
وكل الناس مصيرها شبر
**
وكت مستنى لى جيتو
بياض العمى زى نيتو
يواسى يعزى لى اخيتو
وبادى الحزن فى مشيتو
قتلو تمام قال غايتو
شيوعى وما هزم رايتو
يرتل وصافى فى قرايتو
تقول ياليتو ياليتو
هموم الشعب فى بيتو
نجاملو نعزى فى ميتو
سى حميدنا سى فوقو
ليها الجنى واشوقو
طير الجنة من فوقو
يلم ويلاقى معشوقو
مدد يدينا من ذوقو
وقالوا سفرك ابدى وطويل
يا رفاقه كفاى بيهديل
نغنى نبكى نقول حليل
وربى باقى على وكيل
لى شفاعتك راجى بالحيل
انشاء الله تشرب سلسبيل
بنبقى عشرة وما اظن نميل
والتركتو كتير ما قليل
| |
|
|
|
|
|
| |
Mohamed Abdelgaleel
صديق الموج
Abdlaziz Eisa
عائشة موسي السعيد
عمار محمد ادم
فيس بوك
تويتر
انستقرام
يوتيوب
بنتيريست