|
|
 ثم ماذا بعد هذا ؟؟؟؟!!!!!
|
يفترض نظام الانقاذ الغباء في الشعب السوداني ..
ويفترض الذكاء والدهاء المفرطين في نفسه ... ولا يدري اننا قد تشبعنا وحفظنا اساليبه الملتويه في الهاء الشعب عن قضاياه ..
مثلا الايام دي القنوات الفضائيه السودانيه كلها اثبتت انها لعبه واداة في يد النظام .. ياخي معقوله من الصباح للمساء يوماتي مافي كلام الا الرجالة والفراسه والمش عارف ايه بتاعت البشير والمجاهدين وانو الشعب يريد البشير في محاولة يائسه منهم لامتصاص الغضب الشعبي في الايام الماضيه نتيجة لتدهور الاوضاع الاقتصاديه والمعيشيه في البلد.. يا جماعه انتو قايلننا بالجد اغبياء وله ريالتنا سايله يعني ؟؟ البشير شنو البدورو الشعب !! وعفوية شنو الطلع بيها الشعب مؤيدا ليهو !! ياخي انا كنت في الشارع لحظة اعلان تحرير هجليج والله ماتم من احتفال لم يكن عفويا بل كان واضح جدا انو مخطط ليهو وحتي لدرجة انو كان في لحظة صفر للاحتفال يبداها منسوبو الامن والمؤتمر الوطني . عشان بعد داك الشعب يتفاعل عفويا مع الجوطه القدامو دي ..
قال الشعب يريد البشير قال !!!!!!!!!!!!!!!!!!!!!!!!
ياخي انا امس الساعه 9 مساء جيت بحري المحطه الوسطي بديت من موقف ليبيا ولي موقف الحاج يوسف مافي غير الامجادات ..( مواصلات تكتاك ) مافي ولا كريزايه وااااااااااااااااااااحده.. ناس الامجاد بتمنو في الناس مني .. مثلا للحاج يوسف بقولو المشوار بي 35 ج وما يكون عدد الركاب اكتر من تلاته .. اتخيلوا !!!!!!!!!!!!! ..
وله الاسعار .. دي كمان قصة غريبه عديل كده .. ياخي تقول لي الشعب يريد البشير ؟؟؟؟؟ ده ياتو شعب ده ؟؟ الشعب البشتري كيلو اللحمه باربعين جنيه وكيلو الطماطم بي 12 ج ودستة البرتكان بي 13 ج؟؟ وله الشعب البشتري رطل الزين بي 8 ج وكيلو العدس بي 12 ج؟؟ وله البشتري شوال السكر ال 10 كيلو بي 50 ج ؟؟
ياخي ما تختشوا ياخي .. وبطلو نفاق واستقلال للظروف .. فتعاطف الشعب مع قضية هجليج ليس حبا فيكم ولكن عاطفة تجاه البلد ليس الا ..
وبعدين هجليج دي وبترولا ده انتو ما ميتين بيهو براكم براكم نحن قاعدين تورونا شنو منو ؟؟ ياخي اسي حالنا ده حال ناس بلدم بتروليه وله كانت بتروليه ؟؟ ياخي قروش البترول دي قبل الانفصال كانت بتمشي وين ؟؟ ما شفناها انعكست علي التعليم واتخفضت الرسوم للطلاب .. ولا شفناها انعكست علي الصحه وانخفضت فاتوره العلاج للمواطن .. ولا شفناها انعكست علي قفة الملاح ... بل بالعكس اتت وبالا علي المواطن حيث لا يعقل ان يكون جالون البنزين في بلد مصدر للنفط بي 3 دولار .. ياخي ما تخافو ربكم !!!!!!!!!!!!
قال الشعب يريد البشير قال !!!!! .. ده الشعب الفيتنامي وله شنو ؟؟؟
ياخي انتو عارفين اسي لو في زول عندو خمسه شفع وامهم نهاية اليوم وهو راجع بيتو قرر يشتري ليهو شوية حاجات كده مثلا كيلو لحمة و كيلو طماطم وسلطه يعني ( جرجير وعجور وشطه وفلفليه ) ومثلا دستة برتكان و2 كيلو موز ومعاهم عيش .. كده بس خلي باقي الحاجات .. تفتكرو الزول ده بكون دفع كم ؟؟؟؟ تصدقوا انو الحاجات دي بي 80 جنيه ؟؟؟؟؟!!!!!!!!
ياخي اسي دي عيشه دي ؟؟؟ ياخي قرف يقرفكم ..
اخيرا .. هجليج دي وما يدور حولها الان وما دار حولها سابقا ما هو الا مشروع شخصي لعصابة الانقاذ حيث هي الضرع الوحيد الذي يدر الدولارات التي تضمن لهم استمرار ( البحبحه ) ورغد العيش ومن ثم الاستمرار في السلطه .. وبس ليس الا .....
بوشي
|
|
 
|
|
|
|
محمد حسن بوشى
فيس بوك
تويتر
انستقرام
يوتيوب
بنتيريست