|
|
 الاجتماع العام لقيام الجالية السودانية بكالقرى السبت 21 ابريل
|
<>
<>
وصلتنى دعوة كريمة من الاخ نبيل حسين احد اعضاء اللجنة التمهيدية المؤقتة المناط بها
التجهيز لقيام جالية سودانية فى مدينة كالقرى ..
بالرغم ان فكرة قيام جالية سودانية فى كالقرى ليست جديدة الا ان المحاولة هذه المرة
يبدو عليها الجدية والاصرار والصبر من جانب اعضاء اللجنة التمهيدية...يكفى انهم يعملون
باخلاص لشهور طويلة تم فيها عقد اكثر من 15 اجتماع تحضيرى وتمهيدى .....
بالرغم من اننى لم اشارك فى اى من هذه الاجتماعات ولم يكن لى اى دور فى النجاح الكبير
التى حققته اللجنة التمهيدية الا اننى اشعر بالفخر لما تم تحقيقه .....
اتمنى من جميع السودانيين فى المدينة الحرص على الحضور والمشاركة فى قيام صرح
اجتماعى عملاق نفتخر به لسنوات طويلة قادمة
|
|
  
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: عبد المنعم موسى)
|
Quote: بالرغم ان فكرة قيام جالية سودانية فى كالقرى ليست جديدة الا ان المحاولة هذه المرة
يبدو عليها الجدية والاصرار والصبر من جانب اعضاء اللجنة التمهيدية...يكفى انهم يعملون
باخلاص لشهور طويلة تم فيها عقد اكثر من 15 اجتماع تحضيرى وتمهيدى ..... |
العزيز النصري تحياتي
الفكرة ليست جديدة بالفعل
المحاوله هذه المرة تستمد جديتها و اصرارها و صبرها من المحاولات السابقة
و التحية لكل من دق الصخر قبلنا ... فهم الشموع التي أضاءت لنا الطريق
النصري دايماً عليك مبادر
و نشوفك مرشح و رمزك الغزالة
خفه و رشاقة و انعدالــــــة
لك الـــــــود
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: Hamid Elsawi)
|
النصري..حبابك يا صديقي
كتر خيرك على نشر الإعلان..و نتمنى من اهلنا جميعا الحضور لهذه الجمعية..و مؤكد هي بهم و لهم..!!
و طالما يا حبيب نشرت الإعلان..حقو تضيفو في (الرزمي) لأنو بعدين حكاية من تطوع في عمل خير.. اكيد ح تديك نقاط اضافية..!
اهو حامد و شخصي ممكن نشهد انك عملت فولنتير و كده..!
و يا اهلنا في كالقري..رغم الظروف و الضغوط.. نمتنى انو نشوف عدد كبير في الجمعية العمومية..!
الإجتماعات يا النصري ، رغم طولها و كترتها و كترت النقة فيها.. لكنها كانت تجربة مميزة في خاطر كل عضو من اعضاء اللجنة التمهيدية..و الناس اتعلمت منها حاجات كتيرة و مفيدة..و في هذا مكسب كبير للغاية..!
و لي قدام..
كبر
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: Kabar)
|
سلام يا دكتور
والله جاتنى ملقمة ..لى فترة طويلة بفتش لناس يلعبو معاى فولى بول
وكرة قدم ومالاقى ...دلوقت الواحد ممكن يدردق ليهم كم زول باسم الجالية عشان يجو
يتريضو ويجرو دمهم ....
انت زاتك يا دكتور جهز الكدارة ....دافورى وسداسيات للطيش
اوعدك بنهاية الصيف يكون عندك لياقة بتاعت صبى عمره 18 سنة
____
تلفونى اتغير بالمناسبة
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: النصرى أمين)
|
سلام يا حامد
والله انا متفائل تفويل ..ما عارف ليه ..لكن شاعر انو المرة
ما حتدق فى العراضة وتطلع اوت ......
انا نازل الانتخابات من حسى لمنصب السكرتير الرياضى وشئون الشباب والاطفال
رمز الانتخابى الغزالة...
برنامجنا الانتخابى
اى دار مستقبلية للجالية لا بد ان تشمل صالة صغيرة للجمنازيوم بها على الاقل
تريدميل (يفضل غرفتين واحدة للنساء والثانية للرجال
الاستفادة القصوى من فصل الصيف والقيام بدورات رياضية لكل الاعمار تحت 10 اعوام
تحت 15 عام ,تحت 18 عام ودورة للشباب بين 18 و 35 ودورة للعواجيز.....
الحصول على رعاية مادية ومعنوية من الشركات التى يملكها السودانين لتغطية
تكلفة المعدات والايجارات مقابل الدعاية لاعمالهم
تكوين منتخب لكرة القدم ومنازلة منتخب مدينة ادمنتون
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: النصرى أمين)
|
سلام كبر
لمن نبيل قال لى اكتر من 17 اجتماع اتعملت تحضير للاجتماع السبت ..امنت عديل والله...
لاننا نحن السودانيين بطبعنا بنحب الكلفتة ... ابوسريع ...دفن الليل ابوكراع برة ....
لو دايرين نعمل جالية ...اجتماع اجتماعين بتكون جاهزة واقفة لمبة...
المرة دى النار كانت هادئة عشان كده الطبيخ حيطلع مظبوط......
حاجة واحدة مخوفانى .......لو دخلت السياسة فى النص ....
غير كدة احتمال قيام تنظيم متفرد كبير جدا جدا .....
---------
انتخبو مرشحكم النصرى امين رمز الغزالة كسرتير رياضى
vote Elnasri vote for your health
Elnasri means fitness
--
لو فى اى زول عنده دعاية انتخابىيه رسلها على الايميل
سسث[email protected]
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: طلعت الطيب)
|
سلام يا طلعت
والله حنفقدك شديد الايام الجاية دى...
انا طبعا بعد سافرت انت وجمال ابايزيد انعزلت شوية والبلد
بقت لى مختلفة ...لكن ان شاء الله ومن بكرة حارجع زول اجتماعى من جديد...
غايتو لو الامور ظبطت انا بتوقع الجالية الجديدة تغير خارطة العمل الاجتماعى
وسط ال community
ان شاء الله تكون انت والعيال بخير وصحة وعافية .....
حاضرب ليك اديك تلفونى الجديد (نتمنى ما تكون مواعيدى مواعيد عرقوب)
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: النصرى أمين)
|
سلام الرزوقى
اظن انها كلها كانت اجتماعات تمهيدية تحضيرا للاجتماع العام..
غالبا الفكرة بدات من شخص او شخصين...بداو يناقشوها مع بعض الناس
وشوية شوية الموضوع كبر وبدات تظهر معالمه...بعد ان نجض تماما واكتملت
التحضيرات تمت دعوة الجميع لمناقشة الموضوع وولادة الكيان تحت رعاية
وموافقة كل اعضاء الجالية,,,,,,
لو البداية كانت جمعية عمومية تعقبها 17 اجتماع لفشل المشروع قبل ان يولد,,,,
اهم حاجة يا عبدالمنعم الناس تجى وتشارك وتبارك....
غايتو انا اول مرة اكون متفاءل كده من سنين طويلة (على الاقل12 سنة)
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: النصرى أمين)
|
حباب الأصدقاء حامد عبد الله و منعم الرزوقي..و جيمع اهلنا في مدينة كالقري..
و نشكر الأخوين النصري و منصور في حكاية الإعلان..
و اللجنة التمهيدية تقدم صوت شكر خاص لإدارة سودانيز اونلاين..لوضعها الإعلان في صدر المنتدى..و لقد تفاعل معه الكثيرون و الكثيرات (طبعا معظم السودانيين و السودانيات بيصبحوا و بيمسوا بالمرور بالمنبر و اصبح حاجة كده زي شاي العصرية مافي مفر منو..و الإ تتم باقي الليل مصدع)..!
و نتمنى ان يوفق الجميع في تأسيس كيان راسخ يهتم بامورهم و شئونهم..
و دمتم جميعا..
كبر
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: عبد العظيم كودي)
|
Quote: غايتو انا من حسى حاجز وظيفة السكرتير الرياضى او مسئول الشباب والرياضة
وحاجى الاجتماع اوزع منشورات تدعو لانتخابى لذلك المنصب الفعال ... |
الاكرم النصري وضيوفك الاعزاء لكم التحايا
بعد ترشيحك عيني كوتش عليك الله عشان
استعيد مجدي مع فريق سانتكاثرينز لما شلنا كاس
الدوره 2005 بعشرة انتصارات وتعادل واحد..
انا قدمت معاش اختياري وبعمل في الاجراءات
وسوف احضر مباشرة بعد ما اخلص وغالبا
اجي البرتا منكم ولي ماكموري محل ما نلقى
شغل مجزي حا استقر وبعدها نجيب الاولاد باذن الله..
تحياتي لكل السودانيين وخاصة للعيال وامهم
ولكم مودتي
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: عزالدين محمد عثمان)
|
الافاضل امين ,,عبدالعظيم..معاوية ...عزالدين
شكرا جزيلا لمروركم الكريم لكن للاسف الاجتماع استمر لاكثر من 7 ساعات
استطاع فيه وبصعوبة شديدة اجازة الدستور لكن للاسف فشل فى اختيار مكتب
تنفيذى جديد .....
وبعدم اختيار المكتب ينهار كل شئ .....
قلبى مع كل اعضاء اللجنة التمهيدية فقد رايت الحزن فى عيونهم وهم يشاهدون
مجهودهم الجبار يروح فى شيطان التفاصيل الصغيرة التى لاتهم كثيرا....
اقتنعت اليوم اننا كشعب مستحيل نتفق ...واننا فقط نتفق على الاختلاف...
يوم حزين حقا .....
ماعارفكم يا حامد وكبر ومحمد ونعمات و بثينة وبارودى ونبيل و عيسى وسانتو
وعدار وسيل ونبيل ماعارف اذا حيجيكم نوم الليلة ولا لا ....
لانى انا ما قادر انسى كمية الاحباط العشتها والاجتماع ينفض قبل ان يصل لبر الامان ...
ما عارف يجيكم نوم كيف !!!
قالت لى زوجة احد اعضاء اللجنة التنفيذية ان زوجها اضطر فى كثير من الاحيان ان
ياخد اجازة من الشغل حتى يستطيع ان يشارك فى الاجتماعات التمهيدية ...اضافت الزمن
ده احق بيهو بيتو واولاده .....
يوم حزين ......
-------
ساقوم بشطب كل الصور والفيديوهات .......
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: النصرى أمين)
|
| Quote: ماعارفكم يا حامد وكبر ومحمد ونعمات و بثينة وبارودى ونبيل و عيسى وسانتو وعدار وسيل ونبيل ماعارف اذا حيجيكم نوم الليلة ولا لا .... لانى انا ما قادر انسى كمية الاحباط العشتها والاجتماع ينفض قبل ان يصل لبر الامان ... ما عارف يجيكم نوم كيف !!! |
العزيز النصري الهدف نبيل وانشاء الله سوف تنجح المحاولة بالرغم من المصاعب والعقبات فجميع من زكرت هم من انقي من التقيتهم ودائما هم السباقون لتجميع السودانيون فى كالقري ودائما هم حمالون لهموم السودانيون فلهم عبر بوستك الانيق كل الود والاحترام ولا تياس صديقي فماذال هنالك امل في كيان يجمع السودانيون ...
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: النصرى أمين)
|
حضرت الي الاجتماع وكلي أسف علي التأخير لظروف خاصة..!
وجدت الأعضاء كما قال النصري غارقون حتي النخاع في شيطان التفاصيل وخلافات حول مسائل لا تثمن ولا تغني من جوع..!
عجز الاخوة في المنصة -رغم جهدهم واجتهادهم- من ضبط الجلسة وكسب الوقت لانجاز ما يمكن انجازه..!!
حتي قال الصديق kabar الذي كان يترأس الجلسة : ان من اصعب الاشياء جمع كلمة السودانيين وتوحيد صفهم في العمل العام..!!
وتجربة اليوم اكدت تلك المقولة و رسخت من تلك القناعة..!!
تأسفت علي حالنا وواقعنا الاليم وانسحبت من الاجتماع بهدوء..!
....
- الصور لازم يتم تحميلها لانها حازت علي اغلبية ساحقة 99.9 % من الاصوات في عملية الاستفتاء التي لم تنجو منها حتي الكاميرة المسكينة ..!!!!! D:
D:
D:
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: hamid abdalah)
|
يا كودى ..الاحباط الدخل فى اعضاء اللجنة التمهيدية تانى الله يعلم يطلع بسهولة...
هم جو الاجتماع بمفهموم انه دورهم انتهى ودايرين دماء جديدة تكمل المسيرة...
حصل لى انا نفس الشئ قبل 12 سنة...بالرغم من انو المجهود البزلته وقتها لايساوى
واحد فى المائة من مجهودهم الا اننى شعرت اننى burnt out and i couldn't take it anymore
النتيجة تركت العمل العام بنية لارجوع اطلاقا .....
بالرغم من كلمات المواساة (لاحظ مواساة) الحاولت اوصلها ليهم لكن شعرت انو ال damage
اكبر من كلمات مواساة نرميها هنا وهناك .....
والله حاجة محبطة لدرجة لا تتصورها ...النوم غلبنى ....لاحظ اخر مداخلة لى كانت حوالى واحدة صباحا
حسى دلوقت الساعة ستة ......
اظن الحل الوحيد انو الناس ترجع لل basics وللفكرة الاساسية وهى دار تجمع الناس فى المسرات
والملمات ...
دار لها اعضائها من دافى استحقاقات الايجار....
مافى كلام كتير....
دستور من صفحة واحدة فقط تتم اجازته عبر الايميل,,,
من داخل الدار يمكن للناس ان تجتمع وتتغالط وتشبع غلاط والمشتهى غلاط يمكن عمل
delivery للبيت حتى نناكد تماما انو قضى حاجته منه....
هذا فى نظرى الحل الوحيد للخروج من الازمة الحاصلة
الرجوع لل basics
الناس تمد رجلها قدر لحفاها .....
تكوين جالية تضمن كل الناس ضرب من المستحيل...
تاجير دار عمل ممكن وغير معقد .....
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: النصرى أمين)
|
سلام حامد
منذ لحظة وصولى شعرت بان الحساسية عالية شوية والناس متفرقة لا يجمعهم سوى المكان..
حسب التزامى امام الجميع باننى ساقوم بتسليم كل مواد التصوير للجنة التنفيذية المنتخبة
حتى تحتفظ بها فى ارشيف الجالية كحدث تاريخى ترجع له الاجيال القادمة......
لم تتكون لجنة تنفيذية لذا لا اجد امامى اى خيار سوى Destroy كل المواد حتى ما يجينى زول
ناطى يغالطنى ....الناس دى اتغاطت فى كل شئ ....ديل حتى اتغالغطو فى الغلاط نفسه....
مستحيل اخش فى حتة بتاعت صورى وصورك وحتوديها وين وغيرها من الاسئلة بتاعت التحقيق مع الجناة...
امسحها واريح بالى .....
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: Kabar)
|
النصري..حبابك يا صديقي
و حباب الأصدقاء هنا جميعا.. من المتابعين من داخل المنبر أو من القراء و القارئات من خارج المنبر..
و كتر خيركم على التعاطف النبيل..و المسألة ابسط مما نتصور..
(وجهة نظر شخصية و ليست بالضرورة تعبر عن اللجنة التمهيدية)
أول بالتبادي:
التحية لكل اهلنا في مدينة كالقري رجالا و نساءا و نشكرهم على الحضور و الذي فهمت منه بصورة شخصية حرص الغالبية على وجود كيان ( نسميهو جالية أو رابطة أو مركز مش مهم و لكن المهم أن يكون هذا الجسم ليخدم الناس بصورة مرتبة و يجعلهم يحسون بان لهم سند في هذه البلد)..
في اعتقادي لازال هناك نصف مملوء من الكوب يحتاج وضعه في الإعتبار.. يعني شوية تفاؤل وجودها مهم للغاية..و لقد انجزنا ، كسودانيين و سودانيات في مدينة كالقري ، الجزء الكبير للغاية..و هو اجازة الدستورأو اللائحة..و هي مسالة مهمة لتنظيم العمل و ترتيب الأمور و لم يتبقى الإ جزء بسيط للغاية و نرجو انجازه..و في اعتقادي النقاش كان طيب و مثمر للغاية..و لقد وصلنا الى نقطة مهمة جدا و هي اجازة الدستور/اللائحة..
كبر
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: Kabar)
|
ثاني التبادي:
لماذا الحرص على اجازة الدستور في هذه المرحلة؟
في اعتقادي ثلاثة هناك ثلاثة اسباب لذلك:
السبب الأول:
اللجنة التمهيدية كان يمكن جدا أن تكتفي بمسألة تقديم مقترح الدستور/ اللائحة و تشرع مباشرة في مساعدة الجمعية العمومية في تكوين لجنة انتخابات و انتخاب مكتب تنفيذي و يترك لذلك المكتب متابعة اجازة الدستور أو اللائحة في اجتماع جمعية عمومية اخر. و لكن هذه الخطوة عانت منها اللجنة التنفيذية في الجالية السابقة لأنها كانت منتخبة من جمعية عمومية و لم تستطع التوافق على صياغة لائحة لتقديمها للجمعية العمومية و فشلت حتى في قيام جمعية عمومية ثانية ( كنت عضو في تلك اللجنة و اتحمل مسئولية الأخطاء فيها مثلي و مثل بقية اللجنة) ..و كان الإتجاه هو الإستفادة من الأخطاء الماضية و تلافيها في وقت مبكر..
السب الثاني..اجازة الدستور/ اللائحة في هذه المرحلة مهمة حتى لا يفتح الباب مستقبلا لإثارة جدل حول شرعية لجنة منتخبة من غير اساس أو من غير دستور..
السب الثالث ..عدم وجود دستور أو لائحة مجازة يقود الى صعوبة تسجيل الكيان المزمع انشاؤه..لأن سلطات التسجيل تطلب نسخة من دستور/لائحة و قائمة باسماء العضوية و قائمة باسماء اللجنة التنفيذية و عناوينهم (حتى تحدد مسئولية الكيان كشخصية اعتبارية..و ده النظام هنا)..لذلك كانت فكرة البدء بالخطوة الأصعب و هي اجازة الدستور المقترح بواسطة جمعية عمومية و انتخاب لجنة تنفيذية بناءا على ذلك..فكانت هذه الجمعية و التي ارى انها توفقت في النهاية في اجازة دستور/لائحة و خلق ارضية ثابتة و صلبة تساعد القادمين في اللجنة التنفيذية في تسليك الأمور و ادارة الكيان..
بالتالي ، من وجهة نظري الشخصية ، تبقت خطوة بسيطة للغاية..و هي عقد جمعية عمومية اخرى لإنتخاب مكتب تنفيذي..و الذي ستكون مهامه سهلة للغاية و هي ان اول خطوة هي التسجيل .. لأن شروط التسجيل تحققت (دستور/لائحة + قائمة عضوية + قائمة مكتب تنفيذي)..!
بالرغم من أن الناس عبرت عن دواخلها بكل صراحة (شخصيا لا اعتبر ان هناك خشونة فاحشة حتى تنسف الفكرة/المشروع)..ولكن الجانب المهم في وجهة نظري هو أن الغالبية لديها حرص مؤكد على قيام الكيان و الدليل الحضور الكبير و التفاعل ..لذلك أقول يجب أن ننظر جميعا لهذه النقطة الإيجابية..و نرجو من الناس الحرص (بنفس الحرص على الحضور لإجتماع الجمعية الأول) على حضور اجتماع اختيار المكتب التنفيذي..و الذي نرجو أن يكون في وقت قريب ..و شخصيا اثق تماما في قدرة اهالي كالقري على انجاز تلك الخطوة الصغنونة..
كبر
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: Kabar)
|
تالت التبــادي:
انطباعات عن الإجتماع:
انطباع اول:
لا ادافع عن اداء المنصة..و فعلا بدأ للبعض ان المسألة اصبحت سائبة..و لكن هذه هي الديموقراطية..بالرغم من اننا نأخذ منها جانب بسيط للغاية..و قد يكون سطحي عديل و جانب ان نسمح للناس تعبر عن دواخلها بصراحة..و من خلال مصاقرتي و تأملاتي لحال الشعب السوداني في أي مكان وجد.. فهمت حاجة مهمة انو نحن شعب الواحد فينا دايما عندو احساس بالظلم (ياخي انا في بيتنا قاعد احس بالظلم ، تحديدا اني اقلية مهمشة مع الحيكومة و البنيات..!) ..عشان كده لمن يلقى ليهو فرقة بياخد براحو في التعبير عن ذاتو..و اعتقد أن تجربة هذا الإجتماع ادت الناس فرصة تفضفض براحة كبيرة..و جيد انو الحاجات الكان بنقولها في ونساتنا الخاصة.. لقينا لينا فرصة و قلناها على الملأ..و الناس واجهت بعض بوضوح..و حقيقة نقولها لأهلنا في كالقري : مشوار اللجنة التمهيدية مر بنفس المسار..و تبادلنا اتهامات قاسية للغاية (الجيد أن الجمعية العمومية لم تتعرض لواحد في المئة من شكل الإتهامات التي دارت في اجتماعات اللجنة التمهيدية)..و اشهرنا اكثر من مرة سلاح الإنسحاب..و حاولنا اكثر من مرة فرض حاجات بعينها على بعضنا البعض..و لكن في كل مرة بنقول لأنفسنا: اهلنا هناك القدمونا ديل حارسننا نمرق بحاجة نجيضة..فكانت فكرة التفاوض بهدوء و الحرص على خلق التوافق..و اعتقد اللجنة التمهيدية نجحت الى حد كبير في ذلك..و اثق في جميع عضويتها انهم سوف يواصلون بنفس النهج حتى الوصول الى بر الأمان..
كبر
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: Kabar)
|
انطباع ثاني..
في اللحظات الأخيرة و بعد انتهاء الإجتماع ..لا ادري السبب ، و لكن عدد كبير من الأخوات و الإخوة الحضور..كل واحد يعتذر لي بصورة شخصية (و اعتقد بقية اعضاء اللجنة التمهيدية وصلهم نفس الإعتذار) عما دار في الإجتماع..و اقدر شعور كل من اعتذر أو اعتذرت..و لكن هذه هي ضريبة العمل العام..و الحمد لله بالرغم من صعوبة ادارة مثل هذا الإجتماع لم اتعرض لما يسئيني مطلقا.. بل بالعكس كنت فرحا للغاية انو ادينا الناس فرصة في التعبير بوضوح.. و اعتذر لهم جميعا في عدم التوفق في اكمال المهمة في هذا الإجتماع تحديدا..و ما اريد أن اقوله لجميع اهلنا.. بنفس القدر من الإحترام ابادلكم احتراما..و بنفس القدر في الثقة في شخصي الضعيف اثق فيكم جميعا رجالا و نساءا بأنكم سوف تؤسسون كيانكم..و اكيد ح يجي اليوم الذي يكون فيها هذا الإجتماع مجرد ذكريات..و صدقوني لن اشعر بالندم ..قد اشعر بقليل من الحزن على عدم القدرة في توفير تعب الناس و اكمال الأمر في اجتماع واحد..و اكيد سأشعر بالفخرلتجاوبكم و تفاعلكم ..نحن كده يا اهلنا.. نزعل..نتغالــــط .. نفتو للأخر..لكن في النهاية عارفين انو في جوانا هناك جذوة طيبة كبيرة..و هذه ضمانة كبيرة خلاص للتسامح..
و بنفس الحب و الثقة التي واجهنا به اخواتي و اخواني في اجتماع الجمعية العمومية.. اقول لهم سنعمل مع بعض حتى نصل بر الأمان و هو ليس ببعيد (مشاف عين)..!
كبر
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: عزالدين محمد عثمان)
|
سلام كبر
اظن المشكلة ما اجرائية وبس...ما دستور يجاز ولجنة تنفيذية تنتخب...
المشكلة فى رائ اكبر من كده بكتير.....
المشكلة فى الناس نفسهم....
اول مرة فى حياتى احضر اجتماع اكاد ارى الريبة والشك تمشى على رجلين....
اول مرة اتنفس سوء الظن فى هواء القاعة ......
الناس ديل يا كبر ما فى شئ بجمعهم مع بعض ...وحتى لو تم الجمع بصورة قانونية
وانتخابية ..الجسم الجديد حيعيش على life support machines ...
حيكون مكان للخصومات والعداوات.....
انا شخصيا ما بعتبر نفسى quitter ..وما بستسلم بالساهل لكن فى نفس الوقت
لازم الزول يكون منطقى وعقلانى ......الناس الجات الاجتماع دى معظمها طلعت
بنتيجة سلبية جدا (ده اذا ماوصلت مرحلة الغضب الجامح )..الناس دى محتاجة
لمعجزة عشان ترفع ليها روحها المعنوية......انا شخصيا جيت الاجتماع ومعنوياتى فى السما
طلعت محبط ومدبرس وصلت مرحلة غلبنى النوم ......
قلت لروحى احتمال مشاهدة الفيديوهات تغير الوضع الى الافضل ...بالعكس ..بعد مشاهدتها
اقتنعت تماما ان ال damage beyond repair و هنا ما بقصد الدمار بسبب الاجتماع لكن بقصد
الدمار الوصلنا ليهو كامة واحدة...النسيج الاجتماعى كاخوة نعيش فى بيت واحد ...الالفة
والمودة بين ابناء البيت الواحد ,,,,,بالرغم من الحاجة دى ما بتشمل الجميع لكن نسبة
محترمة تحمل المشاعر دى ومن الصعب جدا تفاديها وتجاهل والاستهوان بيها ,,,,,
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: عزالدين محمد عثمان)
|
تحياتي لجميع الاخوات والاخوة
اقول حسب تجربتي البسيطة ان ما حصل في اجتماع الجالية السودانية في مدينة كالقري
الكندية يوم 21/4/2012 والذي انتهى باجازة الدستور كان شئ طبيعي جدا.بالنسبة لي ستكون
المسألة غير طبيعية اذا انجز كل شئ في اجتماع واحد.ومن هذا المنطلق.
اتوجه بالشكر الى اللجنة التمهيدية لان ما قامة به عمل عظيم من خلاله قطعنا نصف المسافة.
كمالابد من شكر الجالية لان حضورهاواجازة الدستور عمل كبير,وبذلك نكون قد قطعنا ثلاثة ارباع
المسافة.
لذلك اقول للاخ النصري احتفظ بالصور للتوثيق وللجنة التمهيدية الدعوة لاجنماع سريع لاكمال
الربع الاخير وهو انتخاب اللجنة التنفيذية ومجلس الامناء.
| |
|
|
|
|
|
|
|
|
|
Re: الاجتماع العام لقيام الجالية السودانية بكالقرى السبت 21 ابريل (Re: عزالدين محمد عثمان)
|
تحياتي لجميع الاخوات والاخوة
اقول حسب تجربتي البسيطة ان ما حصل في اجتماع الجالية السودانية في مدينة كالقري
الكندية يوم 21/4/2012 والذي انتهى باجازة الدستور كان شئ طبيعي جدا.بالنسبة لي ستكون
المسألة غير طبيعية اذا انجز كل شئ في اجتماع واحد.ومن هذا المنطلق.
اتوجه بالشكر الى اللجنة التمهيدية لان ما قامة به عمل عظيم من خلاله قطعنا نصف المسافة.
كمالابد من شكر الجالية لان حضورهاواجازة الدستور عمل كبير,وبذلك نكون قد قطعنا ثلاثة ارباع
المسافة.
لذلك اقول للاخ النصري احتفظ بالصور للتوثيق وللجنة التمهيدية الدعوة لاجنماع سريع لاكمال
الربع الاخير وهو انتخاب اللجنة التنفيذية ومجلس الامناء.
| |
|
|
|
|
|
|
| |
munswor almophtah
عبد المنعم موسى
Hamid Elsawi
Kabar
طلعت الطيب
hamid abdalah
عبدالمنعم الرزوقي
Amin Mahmoud Zorba
معاوية المدير
عزالدين محمد عثمان
فيس بوك
تويتر
انستقرام
يوتيوب
بنتيريست