تقول لِى شنو وتقولى لِى منو (سيد أحمد الحردلو)....
-1- تقول لِى شنو وتقولى لِى منو ، -2- أنحنَا السَّاسْ ونَحنا الرَّاسْ ونحن الدّنيا جبناهَا وبَنيناها.. بِويت ..فى بِويتْ وأسْعل جدى ترهاقَا وخلى الفَاقة .. والقَاقا -3- تقول لِى شنو وتقول لِى منو ، -4- تَالا أبوى .. بعنخى لَزَمْ وتَالا اللُمْ..أَبوىْ أوْلبَابْ وأمى مهيرة بتْ عبودْ وأخويا المهدى ..سيد السيفْ والخلى النصارى تقيفْ هناك ..فى القيفْ ، -5- تقول لِى شنو وتقول لِى منو ، -6- ونحن الشينْ ونحن الزينْ ونحن العقبه والعتمور ونحن القِبله .. والقرعانْ ونحن الشانْ ونحن النانْ أتينا عشانْ نسوى الدّنيا للإنسانْ تقول لِى شنو وتقول لِى منو ، -8- ونحن الصّافى والوَافى ، ونحن الشّافى والكافِى ، ونحن الزادْ ونحن العِينه والزِيّنه ، ونحن – يمين – أهالينا أهلى سرورْ ووكَتين ينزل المستورْ تَرَانَه النور -9- تقول لِى شنو وتقول لِى منو ، -10- ونحن الجبنه واللبريقْ ونحن قداحنا سَاوات ضيقْ ونحن بيوتنا مفتوحاتْ مَسَاىْ .. وَصباحْ ونحن وشُوشنا مطروحاتْ مَسَاىْ وصباحْ ونحن السَمحه والقَمحه ونحن الطله .. واللمحه ، ونحن الصِيدْ ونحن العيدْ ، -11- تقولى لِى شنو وتقولى لِى منو ، -12- ونحن عُزَازْ ونحن حَرَازْ ونحن هَشَابْ ونحن قُمُوحْ ونحن تُمُورْ ونحن عُيُوشْ ونحن النيلْ وَكضَاب – يا زويل – منْ قالْ إنّك .. تانى لينا متيلْ ، تقولى لِى شنو وتقولى لِى منو ، -13- ونحن الحَجه والتوبه ، ونحن الهِجره .. والأوبه ، ونحن كُتَارْ ونحن كُبَارْ ، ونحن – يمين – جُمَال الشيلْ ونحن – يمين –نَضِمنا قليلْ ، -14- تقول لِى شنو وتقول لِى منو ، -15- ونحن مِحايه نحن طِرايه نحن فِدايه نحن سِمايه نحن حجاب ونحن اللوحْ ونحن شَرَافه فى الدنيا ونحن كِتاب عِلمْ مفتوحْ على كل البُلودات ..نُورْ ، ونحن – يمين – مَداين نورْ ، ووشنا نورْ ، -16- تقول لِى شنو وتقول لِى منو ، -17- ونحن الحِنه والجرتقْ ونحن الزفه والسيره ، ونحن ..أبشرى والشبال ، ونحن السَىْ ونحن الوَىْ ونحن الرقبه .. والتُمْ تُمْ ونحن اللَمْ .. يكون فى الدنيا ..متلنا ..لمْ -18- تقولى لِى شنو وتقول لِى منو ، -19- ونحن العَاجْ ونحن الصَاجْ ونحن البوشْ ونحن الحوشْ ونحن الناسْ وكتين الديارا ..يباس وإن درت العديل والزين تعال يا زول ، وإن كست الكعب والشين أرح .. يا زول -20- تقولى لى شنو وتقول لى منو ، -21- ونحن السورْ ونحن الحُورْ ، ونحن بناتنا محروساتْ ونحن وِلادنا ضُلالاتْ ونحن أُماتنا ياهِنْ ..ديلْ ، وجِيب ورينى زيىِّ منو ، وتقول لِى شنو وتقول لِى منو ، -22- ونحن فَزَعْ ونحن وجَعْ ونحن اليُمه ..واليَابَا ونحن أريتو بالتَابَه ، ونحن – يمين – إذا حَرّتْ ، نخلى الواطه ..رُقَابه ، -23- تقولى لِى شنو وتقولى لِى منو ، -24- ونحن زَغَاوه والعطرونْ ونحن الدُونَا ..مافيشُ دونُ ونحن وِلاد مَلك خِرتيتْ وسَابَ الجرْ وحجَر السِكه ، والتاكا ، وسيّدنا الفى الجبل ..دَاكَا ونحن – يمين – نضِمنا كُتُرْ وشيَتنا كُتُرْ وأسعَل ناس كَرن والطُورْ ، وأسعَل كَررى .. والعَتْمُورْ وأسعل – يا جنَاَ – الخرتُومْ ، وشوف كيفن زعلنا كُتُرْ ، وشوف كيفن فرحنا كُتُرْ ، أنحنا الـ للرجال خُوسَه ، ونحن –يمين – جِنَات موسى ، -25- تقولى لِى شنو وتقول لِى منو ، -26- ونحن الدوكه والضُلاله ، والدونكه ، ونحن الدانقه ، والراكوبه ، والواطه ، ونحن الفَكَه والشِبكَه ونحن الحجزه .. والعكَه ، ونحن الجُودْ ، ونحن أسودْ ، ونحن النَانْ ، حديثنا إذا أرِدتو رُطَانْ وحين دايرين ..نسوى بَيَانْ ، -27- تقول لِى شنو وتقول لِى منو ، -28- ونحن الخَلوهَ والدايره ، ونحن تَكيه العايره ، ونحن الضُّلْ ، ونحن الكُلْ ، ونحن سبيل غريب الليلْ ، ونحن صباح مسافر الليلْ ، ونحن فَنَاجرةَ الدّنيا ، ونحن حَبَابْ حديثنا حَبَابْ تعال شَرِف .. وشوفنى منو ، وتقولِى شنو ، وتقولِى منو ، -29- أقيف لِسَعْ وأقيف وأسمعْ ، ونحن صديرى منضوم ويلْ ونحن القَرمصيص ..بلحيلْ ، ونحن التوبْ ونحن الووبْ وناس حبوبْ وناس حَرّمْ ونحن إذا رأينا كبيرْ نقيف طولنا ..ونقولْ لُه ..حَبَابْ ونديه البُكَان ..ترحابْ ونحن. اليَانَا ديل .. يا زولْ وتسعلنى .. وتقول لِى منو وتقولِى شنو ، -30- أقيف لسعْ وأقيف .. وأسمعْ ونحن التَايَهْ والاندايَهْ والزِريعهْ والعيزومهْ واتفضلْ ، ونحن الرايَه مرفُوعه ونحن الكُلفَه مرفُوعه ونحن حلفتَ ... مدفوعه -31- تقول لِى شنو وتقول لِى منو ، -32- وأما عجيبْ وأما غريبْ ، وأقيف لسعْ وأقيف .. وأسمعْ ، -33- أنا الكَعَب البسوى الويلْ وأنا الزول السَمِحْ ..بلحيل ، وداير ..منَِّهُمْ .. يَاتُو ..، تقولى لِى شنو وتقول لِى منو ، ( سيد أحمد الحردلو

04-10-2012, 09:25 PM

سيف اليزل برعي البدوي

سيف اليزل برعي البدوي
تاريخ التسجيل: 04-30-2009
مجموع المشاركات: 18425

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: تقول لِى شنو وتقولى لِى منو (سيد أحمد الحردلو).... (Re: سيف اليزل برعي البدوي)
ونحن كمان لشاعر شبا الرآحل الأستاذ / عثمان أبوبكر تقولي شنو تقولي منو نحن الساس ونحن الرأس ونحن برانا دون الناس ونحن الهم ونحن الغم وتال الخال . وتال العم خالي وعمي ود حبوبه سيد السبحة والمصلاية واللالوبة سيد الحربة راجل الضربة يوم الحوبة ويوم الزنقة وقت الشنقه قام زي الأسد للموت وقصتو في الكتب مكتوبة تقول لي شنو وتقول لى منو ونحن عدال ونحن تقال ونحن جبال ونحن ولاد عزاز واصال ونحن الفال وسد المال ونحن القبلة للضيفان ونحن الواحة للضهبان ونحن المرقة للجيران ونحن الحلقة والليحان ونحن رواية الحيران ونحن الليلة نحن البكرة نحن الكان ونحن كمان صلاة الجمعة والاذان ونحن الطاب ونحن شليل ونحن النبلة والنشاب ونحن العرسة نحن السيجة نحن الميس ونحن السوط ونحن بطان تقول لي شنو وتقول لي منو ونحن الويل ونحن الهيل ونحن الخيل ونحن بنكسر الكليقة لي زاملة ضيوف الليل ونحن الاتبراوي يسيل يجيب ويشيل ونحن النور وأصلنا من زمان محضور وذكرنا في الكتب مذكور ونحن بنونة والكنداكة نحن القرشي جاد بالدم قريب يوم داكا ومننا ديك ومننا ديل وحات كسار قلم مكميل تقول لي شنو وتقول لي منو ونحن ملوك ونحن مكوك ونحن الجعلي والكباشي والفكي شيخ وود تكتوك ونحن الكية نحن الحية نحن صهيب وجد المية ونحن يمين ابو بشرية ونحن ضريح ونحن مزار ونحن بيان ونحن بنية ونحن ولاد رجال لاحقين ونحن نسل كبار صالحين يقيمو الدين وينجدو في الخلا المدروك ونحن وقت رجالنا يجوك بيملو العين يفوتو الوين ووين الوين قيام وسجود فعال وسلوك ونحن كلام كبارنا عديل ونحن نضم صغارنا عديل ونحن الشول وشوك الحوت وخشم الموس وست الجيل ونحن الدور ودابي الكر ونقع السم وساري الليل تقول لي شنو وتقول لي منو ونحن حريرة نحن ضريرة نحن جبيرة نحن دخيرة نحن دميرة نحن جزيرة نحن الساقية والسلوكة ونحن الدرقة نحن الطرقة نحن المرقة نحن الصدقة نحن التُرمة والقاورمة نحن الكسرة والمفروكه نحن الطاره والنقارة والدلوكة ونحن القاع ونحن الصاع وراهو الصاع ونحن الموية والشربوقة والنقاع ونحن الترة والقطاع ونحن ولادنا رُكازات ونحن بناتنا أحلي بنات ونحن اللُقمة فكة ريق ونحن يمين عشا البايتات ونحن البكري نحن الدُغري نحن الدُخري في الحوبات ونحن كرمنا ماهو كرم تقا وبوبار ونحن إن جانا ضيف الليل بيلقي أيدينا ممدودات ويلقي خيولنا مشدودات ويلقي قلوبنا مفتوحات ويلقي الصالة معروشة ويلقي الاوضه مفروشة ويلقي الكسرة مرشوشه ويلقي وشوشنا زين باشات ويلقي نفوسنا زي ماهن تملي علي الدوام سمحات تقول لي شنو تقول لي منو ونحن نفير ونحن جفير ونحن حفير ونحن الزير ونحن الكير ونحن النقعة نحن البقعة نحن البار ونحن البور ونحن البير ونحن دلو ونحن القربة للعطشان ونحن سقو ونحن رحاطة للعرسان ونحن حتو ونحن الحق ونحن الرق ونحن الصف ونحن الكف ونحن هلال ونحن خلال ونحن زمام ونحن الشف ونحن الدلكة والصندل ونحن الخمرة والمحريبة والحرجل ونحن الروبة والمنجل ونحن اللبقة والجدول ونحن السنطة والورتابة والشمامة والحنضل تقول لي شنو تقول لي منو ونحن سحاب ونحن تساب ونحن حراب ونحن خراب ونحن سراب ونحن المترة والمرتق ونحن السلبة والقادوس ونحن الونسة والفانُوس ونحن الشطة والبنضورة والفقوس ونحن ألتُرعه والحواشة والطورية والتربال ونحن الحربة والشوتال ونحن رجال ونحن طوال كضب من قال يطولنا مُحال دا نحنا الطالنا تب ماطال ونحن جنوب ونحن شمال ونحن تبلدي ونحن السدرة والسيال ونحن الشاف ونحن كليت ونحن الهمة نحن اللمة نحن النمة والدوبيت ونحن الغيط ونحن البيت ورأس الخيت ونحن الودعه والسوميت ونحن الزول بسوي الدايرو وابدا ما بيقول سويت ونحن المابنقول يا ريت تقول لي شنو وتقول لي منو ونحن القاش ونحن رشاش ونحن الزيفة نحن دعاش ونحن الغيم ونحن الوادي ونحن الصاقعة والعبادي ونحن الصيف ونحن خريف ونحن الحجرة نحن القيف ونحن جروف ونحن سيوف ونحن الطوف ونحن الشادي نحن الحادي نحن النوبة والطنبور ونحن كرومة نحن سرور ونحن الشورة وقت الحيرة وقت الزنقة نحن حضور ونحن بنلحق المأسور ونحن بنجبر المكسور تقول لي شنو وتقولي منو ونحن تقاية ونحن وقاية ونحن لداية نحن الراية والحاحاية ونحن الجمرة ونحن المرة ونحن الحرة يوم الزرة ونحن من المتالُن مافي ونحن افو ونحن عوافي ونحن وقت تقوم الحارة فينا الزول يموت وقافي وسيفو من الرقاب متعافي دماً صافي تقو لي شنو تقول لي منو ونحن نهد ونحن نقد ونحن نسد ونحن العد ونحن وتد ونحن فرح ونحن كرح ونحن الدُخلة والصبحية والليلية والحولية ونحن صباح ونحن صفاح ونحن فرح طهور وملم ونحن فراش بكا وميتم ونحن الصدقة نحن الحد ونحن الصوم ونحن العيد ونحن رهيد ونحن التُردة ونحن الفولة والباجور ونحن بخور ونحن الباجا والمحفور وحجر المك ونحن عقيق ودار الفور ومريل باي ونحن أم حر ونحن أم جر ونحن أم دم ونحن أم دوم ونحن أب ديس ونحن اللول ونحن الجول وبحر الجور تقول لي شنو تقول لي منو ونحن التار ونحن الزار ونحن الطار ونحن الشونة نحن المونة والطاحونة ونحن الوازا والجابودي والجراري والمُسدار ونحن الشدة والشوقار ونحن الصفقة نحن مناحة نحن رقيص ونحن مديح ونحن الريح ونحن الشيح ونحن بخور ونحن الكور ونحن كجور ونحن الكُشنة والبربور ونحن الكجرة والرُقابة والطيفور ونحن الفركة نحن الفردة والدمور ونحن الشملة والشُمارة والشقيانة والقُفطان ونحن الفروة والبطان ونحن نبيت ونحن الترة والدكاي ونحن ربيت ونحن المنقه والباباي ونحن الجادة والقُنديل ود لقاي ونحن طبق ونحن نبق ونحن الكتمة والسفاية والهبباي ونحن العكفة والمُخلاية والشبرية والشمشية والدوباي ونحن الغادي نحن الجاي ونحن الزول ونحن فلان ونحن هناي ونحن الأيد معاها الايد ونحن الساق بعيد وداي تقول لي شنو تقولي منو ونحن الدان ونحن الدين ونحن الغيث ونحن الغوث ونحن النجدة نحن العون ونحن العين ونحن الختو في التاريخ كلاما زين وفعلا زين وذكراً زين ونحن الكر ونحن الحر ونحن الشر ونحن اللين ونحن ولاد بيوت الطين ونحن بناة خلاوي الدين ونحن النقطة للعرسان ونحن الفاتحة للميتين وتقول لي أنا مين وتقول لي أنا وين وبقولك هاك وأقولك هاك وأزيدك تاني وألا كفاك تقول لي شنو وتقول لي منو

04-10-2012, 09:37 PM

سيف اليزل برعي البدوي

سيف اليزل برعي البدوي
تاريخ التسجيل: 04-30-2009
مجموع المشاركات: 18425

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: تقول لِى شنو وتقولى لِى منو (سيد أحمد الحردلو).... (Re: سيف اليزل برعي البدوي)
عشانك بكاك الريح عشانك فؤادي جريح عشانك أنا مقتول وبموت معاك مقتول عشانك يا حزن نبيل عشانك يا حلم جميل عشانك يا بلد يا نيل يا ليل يا سمح يا زين يا بلدي يا حبوب أبو جلابية وتوب سروال ومركوب وجبة وسديري وسيف سكين يا سمح يا زين يا وجه مليان غنا مليان عشق وحنين يا بنت يادوب نهيداتا قايمين شايلين تخا وفي رخا شايلين بنات وبنين يا سمح يا زين يا آهة يا نمة يا مدحة يا عمة يا واحة في الصحراء يا خصلة يا قمرة يا بشارة يا بكرة يا سمح يا زين يا غابة قمحية مشرورة فوق البلود زي الصباحية يا مزرعة باباي غضبة الهبباي يا نخلة مسقية من ريق دبيشية يا مقطعين دوباي نازلين على الدنيا أشواق وحنية ياسمح يا زين يا ليل ليل وليلية يا نيل ونيلية يا مرمي تحت الشمس للقيلة ضلية يا سحنة نوبية يا كلمة عربية يا وشمة زنجية ا بلدي يا حبوب أبو جلابية وتوب يا بلدي يا حبوب أبو جلابية وتوب سروال ومركوب جبة وسديري وسيف وسكين يا سمح يا زين SEED A7MED EL7ARDLO

04-11-2012, 05:47 PM

سيف اليزل برعي البدوي

سيف اليزل برعي البدوي
تاريخ التسجيل: 04-30-2009
مجموع المشاركات: 18425

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين

Re: تقول لِى شنو وتقولى لِى منو (سيد أحمد الحردلو).... (Re: سيف اليزل برعي البدوي)
http://www.youtube.com/watch?v=h7hSuhTtJpI&feature=related

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]