|
|
 الاخ من وين في السودان ؟
|
مدخل تعارف وكسر حاجز لونسة قد تمتد وقد تتوقف في لحظتها
الاخ من وين في السودان ؟
من القفيلة
القفيلة دي وين ؟
جنب ابقوتة
ابقوتة دي ذاتا وين ؟
في حيا ما بعرف ابقوتة ( الزول دا عولاق ولا شنو ؟ ) بقلبو
الجزيرة الجزيرة وقنع منو طب
مدني ؟
حليل ابوي
وات من وين يا اللخو ؟
امتداد ناصر
ايواااااا ( وقبل لغادي ) .... عولقا بالغبا
يسود بينهما صمت وكل منهما يسرح بما يهمه في انتظار مناداة اسمه
ماهر احمد ناصر
وجلس مكانه آخر
كيفنك آ زول
اهلا حبابك اقعد
اللخو من وين ؟
من قبوجة
وانعدل في جلسته وانفرجت اساريره ولقى زولو ... يا زول عندي عمتي في قبوجتكن دي ذاتا
ات من وين ؟
القفيلة القفيلة
يا زول ما وقعت لي في عبي ... يا زول خليها ساهي
ومن ديك وعيك
.
.
ومرات تلشغو ومرات تجيبو ملان
حدسني صديقي المتفلهم وقال لي انا جني وجن زول اقول لي من وين في السودان ؟
لاني ما بحب حركة التعارف المفاجأة دي وكدا
ولو في واحد سألني السؤال البايخ بقوم بفاجو بنفس السؤال زي حركة الشفع الصغار
وريني ات اول حاجة فلو قال لي مثلا انا من الحصاحيصا طوالي بقول ليهو انا من دنقلا
ولو قال لي ( دي ذكرتني دعاية البوهية ) انا من رهيد البردي طوالي بقول ليهو انا من بحري
.
.
حديسو طب ما عجبني لكن حب الناس مذاهب واصبح عندي عادة
|
|
 
|
|
|
|
|
|
|
 Re: الاخ من وين في السودان ؟ (Re: عبدالله ود البوش)
|
ناس البنادر يتحفظون
ولكن ناس اخوك انا سعلتك ليهو كدا
اوريك قصة حياتو لي جنا الجنا
نحن ناس الحلول ايها المزارع بنحب الطيور ونغرد معها
بنحب الونسة ونحب الرد بكسر الراء
لكن مرات طيبتنا دي غتست حجر ناس كتار مننا
وبرضو ما بنخليها
ومن هذا الجحر نتلدغ وتاني نتلدغ وبرضو نمد في السكة ماشين
ودي ميزتنا
| |
|
|
|
|
|
|
|
|
|
Re: الاخ من وين في السودان ؟ (Re: عبدالله ود البوش)
|
كيفك بابا
والله اشتقنا للونسه معاك
فكرتنى بغنيه انتو من وين ونحنا من وين
:)))))
فعلا دا دايما المدخل المتبع
ممكن بعدى
وبتسوى شنو
لو طالب وين
ولو شغال وين
والمجال شنو
وساكن وين
غايتو اكتر شى فى اماكن انتظار الزوار فى العيادات بتكون الونسه دى
مرات لصراحه بضيع الزمن كويس ومرات بتجيب الضغط
| |
|
|
|
|
|
|
|
|
|
Re: الاخ من وين في السودان ؟ (Re: رانيه محمد الشيخ)
|
Quote: فكرتنى بغنيه انتو من وين ونحنا من وين
|
رانية
سلام وشوق
طبعا شباب اليوم ما فاضين لجنس نضمينا دا
الزمن اسرع
ديل نحنا
اتنين في حافلة المواصلات
الاول الساعة كم ؟
التاني الساعة ؟
الاول آي عليك الله الساعة كم
الساعة حداشر
الساعة حداشر ؟
آي والله الساعة حداشر بالظبط كمان
والله اسع قاليها الساعة عشرة
.
.
وديل اتو
-------------
الساعة كم ؟
حداشر
شكرا
------------
ونس
شكرا رانية لمن تصلي البيت سوي لي رنة
| |
|
|
|
|
|
|
|
|
|
Re: الاخ من وين في السودان ؟ (Re: عبدالله ود البوش)
|
ارفع قلمك من امتداد ناصر يا ود البوش
سنة الفين وواحد انا وود عمتي مشينا الحج طبعا افتراش وكدا , اها مفترشين في امان الله تحت الكبري جا سوداني لقانا تاكلين فرش مصلايته وتكل معانا , حق الله بق الله , اليوم الاول كان انتو من وين انحنا من وين طلعنا من امتداد ناصر وطلع من صقع منسي زي ما بيقول دكين في اطراف النشيشيبة ,طبعا اتجاوزنا المرحلة دي طوالي وهو زاتو اتجاوزها لكن مافي مفر بقينا رفقة وبقي ود حجتنا لازم نلقي موضوع يجمعنا , اها في خضم تجلياته - النصيحة زول نضام نضمي كتير - قعد يحكي لينا عن تجربته الاغترابية في دولة تانية هو اصلا ما مقيم في السعودية جا عمرة وتكل لحدي الحج , اها في خضم تجلياته دي مسك ليك رئيس الجالية بتاعة الدولة المقيم فيها دي وبستف ابو حلته , ولعن سلسفيل ابو اهله , بحكم انه كان مرشح لرئاسة الجالية كما قال وداك فاز بالجالية باللف والدوران او نحو ذلك , المهم - ما زي حقت تبارك - زوله بتاع الجالية اللعن سلسفيله دا طلع ود عمتي واخو الزول المعاي طبعا ما جبنا ليهو سيرة يومها واتونسنا ونستنا عادي كنا بناكل مع بعض ونصلي مع بعض وحاجاتنا مع بعض , - تخريمة سريعة كدا - تانية يوم اذن الصبح وانحنا مشينا اتوضينا بمشقة من كترة الصفوف وما لحقنا مسجد نمرة كان في جماعة كبيرة بتصلي في الصبح برة كدا كنا انا وهو قمنا دخلنا معاهم الركعة الاولي والركعة التانية اها الناس ديل قاعدين للتشهد كدا بعد شوية نسمع ليك رط ... رط... رط رط ط ط ط بي يدينهم علي افخاذهم انا طبعا راصي شطب قلت الناس ديل ما جادين ولا شنو !! صحبي داك في نص الصلاة قبل ما يسلموا قام علي حيلوا وقال لي يازول اتخارجاك من الناس ديل ولقطنا سفنجاتنا ومشينا قبل ما نبعد منهم شوية شبكني الوهم ديل شيعة خلي بالك والوقت داك قربت اقوم جاري لانه سمعهم كلمة وهم قلت الشيعة ديل يجاهدوا فينا اسع ويطلع مننا امامهما لغايب يا زول شتتنا سريع - انتهت التخريمة - علي العموم تمينا حجنا وفي الوداع قلت ليهو بالمناسبة الزول دا اخو صحبك بتاع الجالية واللهو ود عمتي انا , صاحبنا نطط عيونه قنننننن وقال مع ابتسامة ملانة بخجل الدنيا كله ... بالله . طبعا حاول يلطفها شوية انه اصلا هم اصحاب وبيدخلوا بيوت بعض وزوجاتهم مع بعض طوالي بس دي خلافات في وجهات النظر وكدا انحنا ما عندنا قضية والنصيحة قلبنا ميت زاتو ما كترنا معاهو وكل زول اتطلب الله .
خلاصة الكلام بتاع ناس امتداد ناصر البمثلهم انا في بوستك دا انه مرات العرفة زاتا ما حبابها وبتدخل الزول في تكاليف وحتات ضيقة وكدا
ولا شنو
| |
|
|
|
|
|
|
|
 Re: الاخ من وين في السودان ؟ (Re: اساسي)
|
يا أساسي اخوي سلام عليك
يا اخوي كلامك دا قولو لزول ما بقرا بوستات عمر الفاروق
خاصة في ذات الكاشطب ما خلى ليك مدينة تنقلب عليها كلو كلو
قال امتداد ناصر قال ... اخخخخخخ من الامتداد كتلت فيهو كتلة لكن العروب اصلن في اللاخر كدي
ولبعدين في ذمتك شفت ليك زول من امتداد نصر يفترش الوطا افتراشا ؟
وكمان قصتك حقت الزول الشبع سف وقرش (كسر الراء بالله ) في ود عمتك واخو ود عمتك المعاك
وقلت سكتوا منو ساهي كيف يعني الواحد انبذو ليهو ميتين اهلو كلهن واقول حج يا حاج
القاري الحصيف بقول الزول المعتمر وزايغ هو الراوي نفسو والحكاية فيها كداي من كداي
وامكن فيها لبع عديل قال سكتنا منو عشان نحن مسقفين http://www.sudaneseonline.com/db/attention/010_Smile.gif
عليك الله مش كدي يا عزيزي القاري
.
.
عندنا بت من حلتنا بتقرا في الجامعة جات معاها ضيفة قالت من بنات الخرتوم
شفع الفريق كلهن رسلوهن اكوسو جنا الجداد لبت الخرتوم
نجضوا جنا الجداد في الهبلا وادوا الشفع حتيتة حتيتة والباقي دخلوا للضيفة
الشافع الدخل جنا الجداد لبت الخرتوم جا مارق خات يدو في قدومو من الضحك
وقال انا عرفت ليكن البت دي من وين ؟
اها قالوا ليهو من وين
قال دي من ود اغيبش ولي ورا وكان ما اخاف الكضب اقول من هببنا
عرفتا كيفن يا الشويطن
عشان قالت انا ما باكل المحير
| |
|
|
|
|
|
|
|
|
|
Re: الاخ من وين في السودان ؟ (Re: رانيه محمد الشيخ)
|
أنا من أم درمان.
من وين فى أم درمان؟
بالله أنا برضو من أم درمان..
خلاص بعد ده لازم تلقاه بعرف زول بعرفك أو قريتو سوى أو شافك بتلعب فى فريق هو بشجعو أو حصل موقف لماكم مع بعض ده إذا ماطلع هو ذاتو قريبك.
نحن بنسميها باب المعرفة..يقول ليك فلان فتح باب المعرفة مع فلان.
الشغلانية يا عبدالله يا أخوى بتحتاج شوية ذكاء إجتماعى مع دبلوماسية.بأن تختار الشخصية التى تريد أن تفتح معها باب المعرفة زما مع اى زول.
أنا بحب ألأجتماعيات وبحب أعرف الناس لكن عنى زوجة الله يديها العافية كان قعدت مع جن لازم تعرفو...مرة حصل لى موقف فى مطار القاهرة جميل.
خليت زوجتى وقلت ليها أنا ماشى أشترى لى حاجة من السوق الحر..وأنا راجع من بعيد شايفة ليك بتتونس مع واحدة سودانية جاية من القاهرة للخرظوم وفى سنها... أول ما وصلتهم عايزة تعرفنى بيها..ضحكت وضحكت المرة قلت ليها بعرفه وهى ذاته ضحكت قالت ليها ده زوجك أنا بعرفو ولما طلعنا من مطار الخرطوم وصلناها معنا فى طريقنا لبيتهم فى العرضة.
بوستاتك حلوة يا ودالبوش لك التحية.
| |
|
|
|
|
|
|
|
|
|
Re: الاخ من وين في السودان ؟ (Re: حمزاوي)
|
Quote: قلت لي يا اللخو من القفيلة
ايوااااااااااااااا
تعرف اسماعيل عباس |
يا خالي حمزاوي سلام واحترام
الحلول اطورت يا خال اقوم واحد من ناس القفيلة ديل اعمل سيرش لي حلتن دي
واقرا الكلام دا افتح فيك بلاغ الكتروني ( انا زولن ما بتجيني عوجة ) الا تقول دي ما ايقونتي
.
.
عاين جاي
سؤال جاد صديق الموج من وين عامل فيها مسقف ومولود جنب السوق الشعبي
في زول قال من الشدرات التحت صحي ؟
| |
|
|
|
|
|
|
|
|
|
Re: الاخ من وين في السودان ؟ (Re: ismeil abbas)
|
اسماعيل عباس
شات الكورة جاب الكاس يا عيني انا
مننا وفينا زول حلول حتى كان سكنت بطن اللذاعة وقلت هنا ام ادرمان
.
.
عاين جاي
زوجتك دا بتجيب ليك الكدة في ونسة المطارات دي مش تحذرا وبس تقعد جنبها
لحدي ما تدخل الصالة وأئ واحدة تتونس معاها حاحيها منها
المطارات دي ختيرة خلاس واولادك سفرن كتير ربنا احفظن واغتي عليهن
.
.
شكرا يا معجب
| |
|
|
|
|
|
|
|
|
|
Re: الاخ من وين في السودان ؟ (Re: موسي الراجل)
|
موسى الرجل ( اخير كدي شوية )
سلام عليك وبركة الجيت
يا زول هوي اتو ناس الصعيد ديل الواحد كان دخلو السجن في جنس المسعالة دي
ادخل علي ناس السجن وامسكن ليك واحد واحد ات من وين ات وين وقبل دخوله السجن
اقول للعسكري السايقي قلت لي ات من وين في الجماعة
لكن حكاية جنسك شنو دي بقت في المعاينات للوظائف
حمالتك علي تقول كاهلي ولا بني كربو كان شغال ارفدوك الضحى اللعلا
لكن انا قصدت من المسعالة دي في خارج حدود الوطن في ناس حنان وبحبو الليم
وبطيبة كدي بسعالوا كان القى ليهو رفيقا من الرد اوانسو واساليهو
لكن الناس بدت تتغير يا موسى اخوي زي ما قلت ليك محدسي الاسبق جعفر نميري
ات يا موسى عليك الله في ذمتك دي كان لاقاك زول ولوف كدا ما بتقول ليهو
اللخو من وين في السودان.
والله انا مرة زعلني واحد اتونسنا سمح ووريتو انا من وين وسردت له كل قصة حياتي
من دخول العرب السودان عن طريق باب المندب وحتى يوم سيرتي بلوري اللمين
وهو قال لي انا من ود نوباوي وشيل ودق وشيل دق لقيتو بعرف زول انا بعرفو
تصدق طلع من وين
طلع من حلة جنبنا .... من يوما ابيت جيهتو كلو كلو
| |
|
|
|
|
|
|
|
|
|
Re: الاخ من وين في السودان ؟ (Re: عبدالله ود البوش)
|
سلام شيخ عبدالله
عام 1979 وفى المانيا (الغربية حينذاك) كنا مجموعة سودانيين نتلاقا فى المينزا (كفتيريا الجامعة)، وكل ما يجى سودانى جديد يسألوه من وين الاخ فى السودان، وبعد شوية تلقى زول
عرف اهله او صديق مشترك او حتى قرابة.. وفى كان المانى صديق مرة سال، إنتو السفارة الالمانية ما تدى تاشيرة إلا لناس حلتكم؟
| |
|
|
|
|
|
|
|
|
|
Re: الاخ من وين في السودان ؟ (Re: Abureesh)
|
| Quote: : الاخ من وين في السودان ؟ |
يا الاخو السؤال دة سمح بالحيل وما بسالو اي زول ..
الا يكون زولا اصيل وود بلد ..( ود بلد دي كل زول يفهمها براهو ..)
سؤال جميل ..
| |
|
|
|
|
|
|
|
|
|
Re: الاخ من وين في السودان ؟ (Re: احمد محمد احمد عتيق)
|
مشاركة لطيفة من على الايميل من اخونا عبدالمطلب زول الدوحة
والدوحة قرية جميلة تقع جنوب الجزيرة وجمال اهلها يزيدها رونقا وجمالا
دي المشاركة
| Quote: قال ليك في واحد من تمبول جاء الحج وتعرض لنفس السؤال من واحد قابله في الحرم وقال ليهو ( من أين أنت؟ فأجاب :أنا من تمبول ، فقال السائل وأين تمبول؟ فقال زول تمبول (تطير عيشتك ، إت خِلِقْ وين الما بتعرف تمبول؟ وأنت من وين؟ فقال السائل أنا من الكويت فرد عليهو :على الطلاق كويتك دي برا هسة ما سمعت بيها. |
| |
|
|
|
|
|
|
|
|
|
Re: الاخ من وين في السودان ؟ (Re: عبدالله ود البوش)
|
اولا بوست جميل مثلك يا اخ عبد الله ,,
وذي ما قال الاخ محمد احمد عتيق السؤال ده ما بيسالو زول إلا يكون زول اصيل وود بلد ,, ومعرفة الناس كنوز يا اخ عبد الله مع احترامي لكل الذين ابدو اراء غير ذلك فهناك معارف قد تحدث بهذه الطريقة و تمتد لسنين عديدة , وانا شخصيا اؤيد هذا السؤال وهناك آيات كثيرة تحض على المعرفة وتبادلها بين المسلمين وهي معروفه للجميع ,, أما من ناحية اجتماعية فالتعارف شي جميل بين الناس وبعد ان تعرف الإنسان يمكنك ان تقرر هل هذا الشخص مناسب لكي تبني معه علاقة او صداقة او معرفة أم لا وفي الناهية لك الخيار في ذلك ،
لذا انا ارى انو المعرفة من من باب سياق ( الأخ من وين ) مافيها اي مشكلة ومن ناحيتي انا حباب اي زول عايز يعرفني وباي طريقه تعجبو ,, وانا من العيلفون بشرق النيل والمابعرفها يسالني علشان اوريهو العيلفون دي وين ،،
لك التحية اوخونا عبد الله على هذا البوست الجميل ولكن ذي ما قال جدنا ود الرضي :
الاهلية كملت يا حبيب راحت ،،، ويا حليل شمس المحنة الغربت طاحت
تحياتي : ياسر العيلفون
| |
|
|
|
|
|
|
|
|
|
Re: الاخ من وين في السودان ؟ (Re: ياسر السر)
|
Quote: فالتعارف شي جميل بين الناس وبعد ان تعرف الإنسان
يمكنك ان تقرر هل هذا الشخص مناسب لكي تبني معه علاقة او صداقة او معرفة
أم لا وفي الناهية لك الخيار في ذلك ،
|
الفنان الرائع ياسر العيلفون
سلام واحترام
بالتأكيد كل زول ليهو طريقتو في اختيار كيفية التعارف
وقد يختلف معك آخر في كلامك الفوق دا واقوليك هدم العلاقات الانسانية ليس سهلا مثل بنائها
عشان كدا بعض الناس يتحفظون قبل ان ينقنقون
شكرا يا فنان
| |
|
|
|
|
|
|
|
|
|
Re: الاخ من وين في السودان ؟ (Re: Abureesh)
|
الاخ Abureesh
سلام وتحية واحترام
يا اخوي ات من ود ابريش ولا اسم على اسم ساهي
.
.
مرة يا محمد عثمان في سعودي قال لي ياخي انا في شئ محيرني في السودانيين ديل
الواحد الاقي التاني اسألوا من واحد اسمو محمد احمد علي
اقوليهو آي بعرفو فانا محتار في الحكاية دي اسم كدا بس
محمد احمد علي
جعفر محمد عبدالرازق
حسن التوم محمد كمال
طبعا شرحت ليهو كيف يتم التعارف وليس بالاسماء فقط
وكل الامر يتركز على حسن نيتنا في التعامل
ياخي انا مرة مشيت مكتب العقار عشان اصلحوا لي السباكة صاحب المكتب وصف لي بيت
الفني بتاع السباكة وهو هندي الجنسية وقال لي اسمو محمد سليم
مشيت البيت كو كو وبعد تعب شديد طلع واحد قلت ليهو داير محمد سليم
فرد علي مافي واحد هنا اسمو محمد سليم
رجعت المكتب وجاء معاي صاحب المكتب
كو كو جاهو نفس الهندي القبيل وقال ليهو تمش تصلح السباكة
وفي الطريق قلت ليهو يا صديق قبيل لشنو قلت انا ما محمد سليم
قال لي ات مافي كلام محمد سليم ات كلام سليم بس
وبعد ان اطمئن الي شرح له كيف انهم يخافون من ائ زول يدخل عليهم دون سابق معرفة
ياخي نحن نمسك الزول من يدو وفووووووو ندخلوا في بطن بيت الزول البسعل منو
حتى كان داير اكتلو عديل لاننا دائما تخت الخير والبسعل من التاني داير خيرو
ديل نحن كدي
| |
|
|
|
|
|
|
|
|
|
Re: الاخ من وين في السودان ؟ (Re: Safia Mohamed)
|
سلام عبد الله
هذا الاسلوب من التعارف يتعامل به معظم شعوب العالم
اذا كان التعامل او التعارف بين افراد من مجتمعات مختلفة او مجتمع واحد
واتذكر كما قد يؤيدني الخ محمد زكريا عند دراستنا للغة النرويجية
يبدأ درس التعارف والذي تتعلم منه نطق الاسماء والدول والكيفية التي تتعامل
معها الحروف الصوتية والساكنة
المهم
ايضا يدخل هنا الاكسن او اللهجة
واللهجة ترتبط بالمناطق
حتي نحن نميز
الذي ينطق الانجليزية . هل هو بيرطاني ام امريكي او الماني
او افريقي
كما اهل امريكا يميزيون اهل الولايات . ناس الشرق والغرب
وايضا هنا في النرويج
تعرف اهل اوسلو من لهجتهم
واهل بيرغن واهل ترمسو
ونحنا ناس اوسلو
...
ومقولة .. السودان ضيق
تجد كل منا يعرف شخص يعرفك
وشكرا لصاحب البوست والمتداخليين
| |
|
|
|
|
|
|
|
|
|
Re: الاخ من وين في السودان ؟ (Re: عبد العظيم احمد)
|
الاستاذ عبدالعظيم احمد
سلام وتحية
Quote: هذا الاسلوب من التعارف يتعامل به معظم شعوب العالم
اذا كان التعامل او التعارف بين افراد من مجتمعات مختلفة او مجتمع واحد
واتذكر كما قد يؤيدني الخ محمد زكريا عند دراستنا للغة النرويجية
يبدأ درس التعارف والذي تتعلم منه نطق الاسماء والدول والكيفية التي تتعامل
معها الحروف الصوتية والساكنة
|
اشكرك على هذه الاضافة النوعية من زاوية اخرى
وبالفعل الانسان اينما حل اخو الانسان بغض النظر عن كل الموروثات والعادات والتقاليد
ويبدو ذلك واضحا في التعارف والتقارب والالفة والمحبة بين بني البشر اجمعين
شكرا جزيلا اخي عبدالعظيم
| |
|
|
|
|
|
|
|
|
|
Re: الاخ من وين في السودان ؟ (Re: د.محمد حسن)
|
Quote: عاين جاي
سؤال جاد صديق الموج من وين عامل فيها مسقف ومولود جنب السوق الشعبي
في زول قال من الشدرات التحت صحي ؟ |
غايتو انا سمعت شمار انه من لمان طرة
ولكن كدي خليني اسأل رقية اخت خادم الله الشغالة مدرسة في المحيريبا الجنب القلقالة
| |
|
|
|
|
|
|
|
|
|
Re: الاخ من وين في السودان ؟ (Re: حمزاوي)
|
ود البوش وضيوفه
سلام وتحية
اخوك طبعا من الصعيد وزى ما قت فوق ناس الصعيد مبااااالغة فى الحاجات دى
تعرف انا بلفى نفسى دايما المبادر بالسؤال ده وفى اى مكان
واحيانا تلقى الطرف التانى ما عندو رغبة يتكلم بس برضو تلقى نفسك عاصر على الراجل لامن زيتو يطلع ويقول الروب
نعمل شنو الشغلة مى طبيعة ولا امكن جينات
على العموم السؤال حلو جدا ولما تلاقى ليك واحد عشان تفتح معاهو موضوع زى ده زى اللى لقيت ليك حاجة حللللللوة كايس ليها من زمان
| |
|
|
|
|
|
|
|
|
|
Re: الاخ من وين في السودان ؟ (Re: خالد المحرب)
|
ود البوش
شكرا على هذا البوست
تعرف انا دائما بتضايق لمن واحد يقول انت من وين اقول ليهو انا محسي
طوالي بسالني لي من ياتو حتة
وبسرعة اقول المحس دا مجموعة قرى مشرورة على النيل مافي زول بسكن بعيد من النيل الا يكون عربي
ولمن اتغاظ بسألو واقول طيب من من وين
القاهو يرد بكل ما اتوني من مدنية نظام منواليد العاصمة ويقول انا من امدرمان
وازعل شديد واقول يعني من وين اصاصن .. يقول والله من امدرمان.. تاني ما بزيد في السؤال
وهاكم اقرأوا اساس العاصمة المثلثة
المحس أول سكان العاصمة:
أول مستوطنة في العاصمة الحديثة أنشئت بجزيرة توتي عام 1840 م ،و في الوقت الذي كانت فيه توتي مأهولة بالسكان لم يكن هناك أي وجود للمدن الثلاثة الحالية ( الخرطوم و بحري و أمدرمان ) بل كانت غابات و فيافي و لهذا السبب نسبت الخرطوم لتوتي و عرفت بها فكان يقال لها ( خرطوم توتي ).
إن قبيلة المحس كانت من أول القبائل العربية التي إهتمت بالعلم و التفقه في الدين و ذلك عقب دخول العرب السودان.
و قد نبغ عدد كبير من علماء الدين من هذه القبيلة و في هجرتهم إلى أواسط السودان ( مابين الخرطوم و سنار ) عمل هؤلاء العلماء على فتح الخلاوي و نشر العلم و ذلك في عهد الفونج ( السلطنة الزرقاء ) أو ( مملكة سنار ) و قد سكن بعضهم على النيل الأزرق في توتي و العيلفون و الكاملين و غيرها.
إشتهر من بين هؤلاء المحس عدد من رجال الدين منهم :
الشيخ أرباب العقائد
الشيخ خوجلي أبو الجاز
الشبخ حمد ود أم مريوم
الفكي ( مدني ) إبن الفكي ( أحمد عجيمي )
الشيخ الأمين الضرير بن محمد
| |
|
|
|
|
|
|
|
|
|
Re: الاخ من وين في السودان ؟ (Re: عمر مصطفى مضوي)
|
الاستاذ عمر مصطفى مضوي
سلام واحترام
كويس اني قريت مداخلتك قبل ما تمسحها
رغم اني لا اكاد اذكر تفاصيلها كاملة ولكن قطع شك لا يوجد فيها ما يستوجب المسح
ولكن على ما اعتقد بانك زعلت من عدم الرد عليك
اولا بالتبادي معاك حق الزعل ومن حقك الاعتذار لك رغم انه غير مقصود
علما باني بهتم جدا بضيوفي محاولا الرد عليهم وبالترتيب
ولكن طرأ طاري وخلاني رديت على احد الضيوف دون ترتيب على امل المتابعة لاحقا
ارجو المعذرة اخي عمر مصطفى مضوي والمسامح كريم
| |
|
|
|
|
|
|
|
|
|
Re: الاخ من وين في السودان ؟ (Re: Safia Mohamed)
|
أختنا صفية سلام وتحية
شكرا جزيلا على الاطراء وبكم تحلو الونسة ومعكم
Quote: بس أنا من الناس المتحفظين
جني وجن التعدي على الحصوصية
|
ومن حقك طبعا وزي ما تكلم الاخوة والاخوات كل انسان له طريقته الخاصة في التعامل
واكيد عندك طريقتك الخاصة لحماية خصوصيتك
.
.
شكرا جزيلا اختي صفية
| |
|
|
|
|
|
|
|
|
|
Re: الاخ من وين في السودان ؟ (Re: Abureesh)
|
Quote: ام درمان سكنت بها قبيلة الجموعيه في وسطها وشمالها وجنوبها قبل ألف عام وهي من احدي الفروع الكبري لقبيلة الجعليين
الامام المهدي ذاتو لما جاء طفل مع ابوه صانع المراكب الماهر نزل في ارض الجموعيه في ام درمان
استقبلوه خير استقبال وتعلم القرآن علي يد اهل ام درمان في أم مرحي ( الشيخ الطيب ود البشير ) واستاذه درس الفقه بمكه ومصر وغيرها
يعني المهدي لما جاء ما لقاها خلا .. لقي فيها التمدن والعلم والدين ... فنهل من معين علمائها الذي لا ينضب
وكما قيل .. شمال ام درمان اهل كتاب وجنوب ام درمان اهل ركاب .. وللعلم المك المحينه مك الجموعية هو اول من حارب الاتراك قبل المهديه حتي قتل
طيب نطلع من الحته دي لحته اوسع وأقدم ...
وجدت آثار في منطقة خور ابو عنجة تؤرخ للعصر الحجري
وجدت آثار في النوفلاب ترجع ل 400 عام قبل الميلاد وهي تؤرخ لعصر مملكة مروي
وجدت آثار في السروراب تؤرخ لنفس الفترة السابقه
وجدت آثار في الشهيناب كذلك تؤرخ لهذه الحقبه
للعلم الاثار دي كانت أثار حضاره كبيره ووممالك حضرية مستقره
ام درمان مدينة استراتيجية بحكم الموقع والجغرافيا ولقربها من النيل وتلاقي النيلين والمدن الكبري المكونه للخرطوم
يحج اليها الناس منذ اقدم العصور ولا زالوا حتي الان ... هي بوتقة جمعت كل اعراق واجناس السودان حتي تكاد تحسبها السودان مضغوط في كبسولة
ولكم الشكر الجزيل |
أولاً فلنحفظ للناس حقوقها...الكلام الفوق ده للأخ/نوفل عبدالرحيم حسن عضو المنبر..من بوست ألأخ/محمد قسم الله محمد(أغنية الحقيبة ليست عبقرية أم درمان))
ألأخ/زمراوى الويلى...لك التحية..
Quote: وبسرعة اقول المحس دا مجموعة قرى مشرورة على النيل مافي زول بسكن بعيد من النيل الا يكون عربي
ولمن اتغاظ بسألو واقول طيب من من وين
القاهو يرد بكل ما اتوني من مدنية نظام منواليد العاصمة ويقول انا من امدرمان
وازعل شديد واقول يعني من وين اصاصن .. يقول والله من امدرمان.. تاني ما بزيد في السؤال
وهاكم اقرأوا اساس العاصمة المثلثة
المحس أول سكان العاصمة:
|
ليه تزعل إذا كان أصلاً مولود بأمد رمان؟؟وبعدين المحس سكنوا الخرطوم لم يسكنوا أم درمان.....غرب النيل لأمدرمان من حجر العسل إلى جبل أولياء .
تحياتى ..مع خالص تقديرى وإحترامى لكل المتداخلين وصاحب البوست العايز يجيب لينا الجلا.
| |
|
|
|
|
|
|
|
|
|
Re: الاخ من وين في السودان ؟ (Re: ismeil abbas)
|
| Quote: أولاً فلنحفظ للناس حقوقها...الكلام الفوق ده للأخ/نوفل عبدالرحيم حسن عضو المنبر..من بوست ألأخ/محمد قسم الله محمد(أغنية الحقيبة ليست عبقرية أم درمان)) |
شكرا يا اخي اسماعيل عباس
المعلومة من تخش على عمنا قوقل والمنتديات بكون ملك مشاع واسع الكلام الفوق دا وداني ليهو عمنا قوقل لمنتديات الشقلة
ولمن شفت الزول اللي نزل البوست دا لقيتو اصغر مني بكتير قلت ننزلوا للفائدة
| |
|
|
|
|
|
|
| |
عبدالله ود البوش
محمد زكريا
اساسي
ismeil abbas
Abureesh
ياسر السر
عبد العظيم احمد
د.محمد حسن
Zomrawi Alweli
فيصل محمد خليل
فيس بوك
تويتر
انستقرام
يوتيوب
بنتيريست