|
|
 هيا حميد أقيف ,,,,,,,,, شعر أحمد إبن عوف / فرجينيا
|
ماطالما شِعرك فى حى
بلدك موشح بالغنا
نيلك بيهدر بى حروفك
مابتموت !
حميد وحات الأرض
والنيل العظيم
النخله والواسوق وشتلات المدين
وكل تربالى فى بالك
بفج فى العتمه لاقى الضو قبالتو
لقاك إنت براك تنسج فى وطن
بتلاقى فى خطوط التوازى
وترسم الأفق المحال
كلمات من الونسه الجميله
بلا تكلف...
وبلا وجيع..
ترحل من البلد الفجيعه
وتنزغِم !
حميد؟
هيا حميد أقيف
ياخى القضيه هى ما كدأ !
ياخى البلاد متوتره
ياخى المشاريع البديتا
منو البلاك بِتمها؟
لو إنت ماشى عشان غيابنا الطال
وحاتك نحن راجعين البلد
راجعين وحاتك تانى
للبلد القصايدك حِله حِله إتغنتا
وإنت البراك كنت البتعرف
إنو يوم الشمس حتشرق
بى صباحاً مستحيل
إنت الوحيد القلت باكر
لاعساكر
لامساخر
لاخناجر طاعنه فى قلب الوطن
حميد أقيف....
مويتك مقرّنه فى الجداول
راجياك من مشوارك تجى
صُرّة فطورك
وكِسرتك قاعدات قبالة الجدول
السرِج
الملوده
الورقه
والأقلام
وبطّان الحُمار
اسرع تعال من غيبه ابديه
وحصار للروح
وحاتك نوع غيابك دا
لا فى البال ولا كان فى الخيال مطروح
بس شن بنقول على فعل القدر
حميد...
حميد رحلت وفينا لازال القلب مجروح
نحن الكنا خليناك ورانا رفيق
بيستر حالنا وكت الضيق
وكل مانجيك بنلقاك لينا أخ وصديق
فيا حميد قدرنا بلاك نشيل الشيله
نمشى خطانا
نتحدى الزمن
نفديها هذى الأرض لو بالروح
هيا حميد أقيف..
حميد أقيف..
حميد
أقيف........
أحمد إبن عوف / فرجينيا
مارس 2012
[email protected]
|
|
 
|
|
|
|
|
| |
أيمن التوم حسن
معاوية عبيد الصائم
فيس بوك
تويتر
انستقرام
يوتيوب
بنتيريست