|
|
 مقال للأخ د.سجيمان :احذروا (الفيسبوك) إنّه زحلق أخاكم بن علي
|
سبق وأن ذكرت للسيد والي الخرطوم عندما لمّ الصحفيين وقال ليهم خافو الله.... في نفوسكم وفي الناس... قلت ليهو في مقال سابق انت ناسي الموبايلات؟... الموبايل
وسيلة إعلامية متكاملة ومتاحة... شايلها أي زول في جيبو... وحايم بها.... إلا شخصي الضعيف والذي قطع على نفسه مقاطعة هذه الآفة.. بعد أن سرقت مني قبل ستة شهور هي واللابتوب وقد فشل رجالات المباحث في العثور عليهما الى يومنا هذا.... وانا قنعت منهن... وعرفت إني فارقتهن فراق الطريفي لي جملو... وغيري كثيرين فارقوا جمالهم...والطريفي قد فارق موبايلو وفارق لابتوبو...الموبايل ختري... ختري..ختري... والنضم بقولو وانا مالي يدي من مضرة الخواجات... بقول الموبايل لانو قدر ما في شيء عندها خشم واضنين سوت ليها موبايل... وقعدت تنضم ووقت النضم يكمل تسمع غنا.. ولما تزهج من الغنا تشغل ليها فيديو وتقعد تتفرج ولو الفيديو عجبها ترسلو بالبلوتوث أو الآي آر... وتفرج باقي الجماعة.... يعني الموبايل يحل محلالتلفزيون والرادي والجريدة والاستديو... وممكن يكون أمحمد ود عوض الله ..مؤلف ومعد ومنتج ومخرج أي خبر دايرو ويكون الناشر.... وسيلة تانية وصعب السيطرة عليها .. هي الانترنت ... القيامة القامت في تونس... والقايمة حسي في مصر... اليمن.... لبنان... الجزائر حسي شايفها قاعدة تفرفر.... ونحن هنابدينا نقلد في الجماعة.... بن علي الطيرو من الدنيا وحبانا الانترنت والموبايل.... حسني مبارك الجهجهو وخلاهو يشرب ما يروى الانترنت والموبايل... موقع الفيسبوك في الانترنت...(من رحمة ربنا ان حوالي تمانين في المئة من الشعب السوداني ما عندهم خبر الفيسبوك وما بعرفوهو وما سمعو بيهو ...وممكن فيهم كمية كبيرة ما سمعو بالانترنت وما عندهم خبرو لي حسي... والسبب ارتفاع اسعار اجهزة الكمبيوتر بالاضافة الي عدم المعرفة باستعمالها..لكن مدام بقى الوصول اليه عن طريق الموبايل " الله قال بي قولو") الكديسة دي شوفتوها باكر تدخل النت وتقعد تنضم في السياسة وفي نضم كتير ما دايرنها تقول (نجاو) فيهو..واي زول يقول لها ما تدخلي نت، تقوم عليهو أمريكا وفرنسا وألمانيا والسوق الأوربية المشتركة وسوق ليبيا وسوق الناقة وكل السيقان بحجة حرية استعمال وسائل الاتصال.... هوووووي أنا بحدسكم ....الغيّر الحكم في تونس الانترنت وقليل اللدب الفيس بوك.... والصاط مصر حسي فوق تحت الفيسبوك ومعاهو نصيبة جديدة اسمها التويتر..ديل كلهن معاهن الموبايل....غايتو يا أيها الحكام العرب وغير العرب احذرو الفيسبوك إنه زحلق أخاكم بن علي...... قناة الجزيرة الله لا تاجرا... تنبح تنبح تنبح إن ما غتست حجر الزول البتنبح فيهو ما بتسكت..نبحت فوق بن علي ساكاهو في تونس من زقاق لي زقاق... ركبتو التونسية... نزلتو في مالطا... ركبتو تاني التونسية ونزلتو في الحجاز... وحسي تنبح دايره تسلموللانتربول...قناة فتانة، قوالة، الحبة ما تتبلا في خشُما ..وتمسك الشي تحُكها لمن تجيب الدم.. وتخنق الزول لو ما هنّق حُمار الخلا ما بتفكو(علماً بأن حُمار الخلا يهنّق مرة واحدة كل أربع سنوات)....وبعد مرات حُمار الخلا يهنّق وهي برضها خانقة الزول..... قفل الباب: أحاول منذ البدايات أن لا أكون شبيهاً بأي أحد.رفضت عبادة أي وثن. أحاول إحراق كل النصوص التي أرتديها فبعض القصائد قبرٌ وبعض اللغات كفن
د. عادل الصادق مكى
http://sudanmotion.com/index.php/news/3-sudan...-2011-01-31-21-06-33
|
|
 
|
|
|
|
Ridhaa
فيس بوك
تويتر
انستقرام
يوتيوب
بنتيريست