|
|
|
 Re: الرحيل الفاجع لصاحب الكلمة الصادقة والشجاعة الاستاذ حميد (Re: عمر عبد الله فضل المولى)
|
عم عبد الرحيم
الاستاذ الشاعر حميد
فتّاح يا عليم
رزّاق يا كريم
صلى على عجل
همهم همهمة
حصّن للعباد .. وهوزز سبحتو
دنقر للتراب .. هم فوق هم هما
صنقع لى السما
وكان فى الجو فى غيم
وكم نجمات بُعاد
وكان الدنيى صيف
لا قالتلوا كيف
.. كيف أصبحت .. كيف
لا لمسة وداد
لا لمسة حنان
لا رمشة طِريف
من قلباً وفى
زى أيام زمان .. أيام الدِفِى
كانت ماها فِى .. كانت فى المراح
شدَّتلو الحمار .. تحلب الغنم لى شاى الصباح
والطير ما نضم .. ما رسـّل نغم
عم عبدالرحيم
إتوكـّل نزل .. فى المُشرَع لِقَى
زُملان الشقا
الجا من الجريف .. الجا من الجبل
علْ الناس بخير
صبّح هاظرُمْ .. نقْنقْ ناقَرُمْ
غاظوهو .. ونعَل
وعم عبدالرحيم ما بخَبِر زعل
كل الناس هنا ما بتخبِر زعل
تزعل فى شِنو .. وتزعل من منو..
كل الناس هِنا .. كل الناس صِحَابْ .. كل الناس أهَل
والماهُم قُرَاب .. قرّبـُمْ العمل
الطاق اليَطُقْ .. عشتْ .. آ .. أبوالزَمَل
بى الحال العليك .. بى الفال .. بى الأمل
عم عبدالرحيم ..
كُتْ فلاح فى يوم
فى إيدك تنوم .. على كيفك تقوم
لا دفتر حضور .. لا حصة فطور
تزرع بالقمر .. تقرع بى النجوم
لكن الزمن .. دوّار .. آ .. بِدُوم
عم عبدالرحيم ..
ماشى على الشغل
فى البال القديم .. من عار التُكل
تنشايح جِراح
.. كيف الغُسُل
الدِنيِى أم صلاح تبدا من التُكُل
من حِجـّة صباح .. فى حق المُلاح
فى الغُبُن الجديد .. فى القسط القديم
وبيناتِن عشم .. فى الفرج القريب
أمونة الصباح ..
قالتْلُو النـِّعال والطِرقى .. إنَهَرَنْ
ما قالتْلُو جِيب
.. شيلِن يا الحبيب غشّهِن النُقُلْتـِى والترزى القريب
بس يا ام الحسن ..
طقّهِن .. آ .. بِفيد .. طقّهِن .. آ .. بزيد
إنطقّن زمن
وإن طقّ الزمن .. لازمِك توب جديد بى أيـّاً تمَن
غصباً لى الظروف .. والحال الحَرَنْ
شان يا أم الرحوم .. ما تنكسفى يوم
لو جاراتن جَنْ .. مارقات لى صُفاح
أو بيريك نجاح
ده الواجب .. إذن
وأيه الدِنيِى غير .. لمّة ناس فى خير
أو ساعة حُزُن
عبد الرحيم يا حُر
ماكا حُر
يا ريت التمر .. ياريت لو يشيل كلِّ تَلاتْ .. أشـُرْ
ولاّ أيام زمان كانت ما تمُر
كان ماجاك هوان .. ما لاقاكى ضـُر
كان لا ضِيق يضيق
لا أنغرغَرْ صبر
ولا شابيت غريق .. ولا طلوَحْ فقُر
كان ماكان .. وكان أكيسى دُر
حيكومات تجى
وحيكومات تغور
بتحكم بى الحِجِى .. بى الدجل الكِجُور
مرّة العسكرى .. كسـّار الجِبُور
ويوم بإسم النبى .. تحكمك القبور
هِم يا الفنجرى .. يا الجرف الصبور
كل السقتو ما باقى على التِمور
وأرضك راقدِى بور
لا تيراب وصل .. لا بابور يدور
والماهية أُفْ
عيشة هاك .. وكُف
فى هذا الزمن .. تـُف يادنيا .. تـُف
يا العَبِد الشقى
ما أتعوّدْ شكى
لكن الكفاف فوقك .. منتكى
حالك ما بتسـُر
إِلِّى كمان فى ناس فايتاك بى الصبُر
ساكنين بى الإيجار .. لا طين .. لا تمُر
وواحدين بى الإيجار .. ما لاقين جُحُر
سِلعـتُمْ الضُراع .. والعرق اليخُر
عمال المدن
كلاّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
الفِطن الفُرُن
الشغلانتو نار
والجو كيف سُخُن
عيشُنْ كمّهو .. وديشُن هان قَدُر
وناساً حالا زين
مصنع .. مصنعين
طين فى طين .. ووين
ما مرابا مُر.. بارد همها
لا يعرق جبين .. ولا وشاً يصُر
عين والله .. عين
كلها كمها .. وهمها هان قدُر
فى الجنة أم نعيم .. فى الجنة أم قُصُر
يا عبد الرحيم إلِّىِ ورا القبُر
ويلكد فى النعال
فتاح يا عليم
وإن كان الفقر يا عبدالرحيم
أشبه بى الكُفُر
ونقرط لى الحمار
نقريط الحمار .. لاتنسى النِعال
الطِرقِى الخدار
اللِّبِس الجديد
تسريح السفر .. لى الماشى الصّعيد
ماشى الدّيش .. نَفَر
والبال إشتغَل
بى الأبى ما يعِيد .. الحول ما أشتغل
الغُبُن الشديد .. السابا ورحَل
الضيق .. المحَل
والفرج القريب
الجا .. وما وصَل
زى الحال ده يوم .. لا كان .. لا حصَل
والبال إشتعَل
السكة الحديد .. يا عمو القَطَر
يا عبدالرحيم قِدّامك قطر
...........
وسال الدم .. مطر
وطارت دمعتين .. وإنشايح وتر
يا طاحن الخبر
ما بين القضا .. ومَرْحاكة القدر
الشِّهدوا الدموم .. والدمع الهَدَر
إيدُمْ فى التُراب .. والعين فى القطر
عارفين الحصل
عارفين فى حذر
الخبر اليقين .. بوّخ .. وإنتشر
أطفال القرى .. وعمال الحضَر
أدوهو الطيور .. ودَّوا البحر
إنصاعت سحاب
وإنْدافَقْ مطر
عم عبد الرحيم .. فى الشارع عَصر
لى تالا اليسار
متفادى الكَجر .. دورية الكجر
جفّلت الحُمار .. وطلوَح زى حجر
وعم عبد الرحيم .. إتلافا القطر
فتاح يا عليم .. سال الدم مطر
جرتق لى التُراب
منشور بى كتاب
روشتّة .. وجواب
مفتاح أب قُراب .. أورنيقين سَهَر
جنب لِبدة حُمار
مقطوعين ضَهر
... عم عبد الرحيم ..يا كمِّين بشر
صحِّى الموت سلام
ما يغشاك شر ..
| |
 
|
|
|
|
|
|
|
|
Re: الرحيل الفاجع لصاحب الكلمة الصادقة والشجاعة الاستاذ حميد (Re: عمر عبد الله فضل المولى)
|
طيبة
كل ما تباعد بينا عوارض
كل ما هواك يا طيبة مكنِّى
تلد الغربة .. الكُربة الواحِد
بيكى أسمى الشوق .. وأكنـِّى
............
لمـّا أفوتك من دون خاطر
أو دون خاطر منى تفوتى
بلقى حبايب فى كل حِتـّة
وكل بيوت الفُقرا .. بيوتى
لا غيرت وراك الجِتـّة .. لا بدلت ملامح صوتى
لا غافلنى وهادن فنى .. غام لى المدن .. الما عِرفتنى
إبن الشوق الصبرو .. مصوبر
للأرياف الكم .. وفّتنى
وللأطفال الناشفة ضلوعا .. ونازفة بغنى
أطمن روعا .. وأهتـّى دموعا
ببسمة بكرة اللاّها تمنى .. ولا مصنوعة
.....................
أغنى لشعبى ومين يمنعنى
أغنى لقلبى .. إذا لوّعنى
مخيـّر دربى الما رجعنى
إذا طلعنى نخلة القرب .. أو الغربة الكدروبية
تنزل غنوتى بى قمرية
أو وقـّعنى فى بطن الجـُّبْ
بطلع يوسف بالأغنية
أغنى الناس الما بتسمعنى
المِنِّى بعيدة .. ومبعدة عنى
النادا نشيدا .. وكنت المعنى
الإيدى فى إيدا .. وإيدا بتبنى
فى دنيا جديدة اليوم .. راح تدنى
وأريت غنواتى فى ناس شغالة
تكون سُندالة .. وعود طورية
ضراع رجالة .. كتاب أطفالا
وجملة بالا .. الما مكرية
سدّة مالا .. وبقـّة فالا
فى ليلة الدخلة على أسمى قضية
.............
حبيبة قلبى يا سودانية
يا أسمى معانى فى زول بيعانى
ياود ضكران .. ويابتْ دغرية
وأنا إنْ سامعانى فضـّلت أغانى غُـبش .. فقرية
وروح غانيانى
حويتك منك يادافعانى براحة إيديا
ويا جابدانى ... برفق عليا
وما بتحيـّر بين الفوق .. وبين الناس التحتانية
إلاّ مغـيـّر .. ولاّ عقُوق .. ولاّ كفيف الإنسانية
ومنـِّك وين يا كاشفة عينيا
بنور الإلفة .. ضِيا الحنية
وحِلم العالم .. ناس تتسالم
والبنى آدم صافى النية
والأطفال الناشفة ضلوعا
يطمِّن روعا
وتبدى تغنى
غناوى البكرة .. الكم مسموعة
حسيس طنبارة .. مع نـُقارة
صفِقتاً حارة .. ودارة تغنى
فيا حلتنا عليكى تـُرابك ..
وإنتى شبابك زينة الجَنـِّى
أحلى عروس البلد اللّتنا
ولاّ الغُبُش الرّابّة تهنى
ولاّ هدير المدن التصحا ..
وتمحى ظلام الحاصل .. عنـّى
| |
|
|
|
|
|
|
|
|
|
Re: الرحيل الفاجع لصاحب الكلمة الصادقة والشجاعة الاستاذ حميد (Re: عمر عبد الله فضل المولى)
|
كلمات محمد الحسن سالم حميد
نورة والحلم المدردح
هي .. أقيفن .. نورة فيكن
نورة نقاحة الجروف ..
نورة حلابة اللبيني .. للصغيرين والضيوف
نورة ساعة الحر يولع .. تنقلب نسمة وتطوف
تدي للجيعان لقيمة
وتدي للعطشان جغيمة
والمخلي الحال مصنقر ..
في تقاة الليل تندقر .. تدي لي باكر بسيمة
تكسي للماشين عرايا وفوقا إنقطع هديما
ما عرفتن نورة إنتن .. قولن إنتن شن عرفتن
نورة بت الواطة أخيتي .. نورة اخت كل الغلابة
نورة حاحاية الشقاوة .. نورة هداية الضهابة
الاراضي الياما أدت .. نورة بقت من ترابا
وماشي في الأعماق سحابا
مشتهنها .. والله جابا
للجنوب طبلاً يهدهد .. لي مشاعر ناس تعابة
وللشمال طنبور يسكت .. دمعة الميتين كآبة
ما عرفتن نورة إنتن .. قولن إنتن شن عرفتن
نورة عايز تقرأ قالت
فوقا حيطة الدنيا مالت
ختت الكراس وشالت
منجلاً صالت به جالت
لامن إنجرحت به شالت
للتراب فوق إيدا كالت
ومرة يوم في الدونكا لدغت
جاء الفقير بالليل حواها
ويوم ملاها الهم قطايع .. جاء البصير بالنار كواها
ونورة ما قدرت تمانع .. تقنع الناس المعاها
ومرة شافت في رؤاها طيرة تاكل في جناها
حيطة تنمغى وتفلع .. في قفا الزول البناها
في جنينة سيدي سمعت .. تمرة تصقع للوراها
الأرض لابد ترجع للتعب فوقا ورعاها
شافت النيل موجو لاها
الخليقة بقت إلاها
الشمس طبقت ضحاها
نار عقاب إنساب مكسر .. فوق تكليات متاهة
وضو من الله .. رهاب مكتف في وتيد الليل معاها
بين حضر بلدا وخلاها
فسرت للناس رؤاها
وقالوا جنت ومو براها
ونورة زادت فوق شقاها
وصدت الأيام تخش
تبني لي عصفورة عش
في السواقي تشوف عزاها
لما شوقا يسوي .. وش
تسقي تزرع
تسعى تصنع
للنهار في الليل تخش
عرفت الشقا والشقاوة إلا ما عرفت تغش
شايلة طولة البال من الله .. ومن أراضينا الإثارة
وماشي تكدح طول نهارا
وترجى لما الليل يفلل .. تسرق ألمي عشان خدارا
عشان صغارا
ولما ترجع لي ديارا
تنزف أحلام الفقارى
من عويناتا الحيارى
لي غبار الحال تقش
فوقو للآمال ترش
نورة تقعد صاحي تحلم .. بي بيوت بي نور ودش
وبالمحبة تشق دروبا .. ولي قلوب الكل تخش
نورة تحلم بي وجود
ما مشت بينو القيود
أفضل أفضل بي كتير .. بي وطن من غير حدود
نورة تحلم بي عوالم
زي رؤى الأطفال حوالم
لا درادر .. لا عساكر .. لا مظاليم لا مظالم
نورة تحلم .. ولما تحلم نورة ترجف
ولما ترجف نورة تحلم ..
ولما ريح الواقع المر .. لي عشيش أحلاما ينسف
نورة تنزف
ولما تنزف بالا يهتف .. يوم حا تنصف يوم حاتنصف
وتبدأ تحلم .. ولما تحلم نورة ترجف
ولما ترجف نورة تحلم
صاحي تحلم.. وصاح بتحلم
صاح بتحلم
| |
|
|
|
|
|
|
|
|
|
Re: الرحيل الفاجع لصاحب الكلمة الصادقة والشجاعة الاستاذ حميد (Re: عمر عبد الله فضل المولى)
|
اعزيك اخي وصديقي محمد فول في هذا الرحيل الفاجع والاليم فليس هنالك امر من موت الفجاة فلو كان الراحل مريضا لوجدنا لانفسنا العزاء باستعدادنا لاستقبال الرحيل .. لقد كان الراحل ركن من اركان الوطن وعمود من اعمدته الركيزة التي لطالما استند عليها الشعب بعد ان ضاقت عليه الارض بما رحبت فوجدوا المتنفس والامل في هذا الانسان المرهف والهميم بالام واوجاع هذا الوطن الجريح ... فما اضيق الحياة على اهل السودان لولا فسحة يجدونها في امثال حميد ... هذا الصوت الجهوري والدواي الذي لطالما دوخ وقض مضاجع الطغاة والظلمة واستعصى عل التدجين كيف لا وقد كانت حساسيته عالية جدا ضد الظلم والتسلط والاستبداد... رحل صاحب الصوت الحنون الذي لطالما وجد فيه البسطاء طعم الكرامة والحرية فتذوقها فشبعوا حد التخمة عوضا عن ملذات الحياة فهزموا الجوع الكافر والفقر الكاسر والظلم الاشر فكان حميد طعاما وشرابا وهواء نقيا لكل الشرفاء والشريفات في ربوع الوطن الذي مزقه الطغاة والظلمة فشرودا اهله ومزقوا ارضه وافقروا اهله وامرضوهم ومزقوا نسيجهم الاجتماعي .... فكان حميد دائما ترياقا مضادا يرتق النسيج الاجتماعي ويخيط القومية النبيلة في ثوبها الاخضر .... سلام على حميد يوم ولد ويوم مات ويوم يبعث حيا ... اشهد الله ان حميد ادى رسالته الانسانية بجدارة ... ان القلب ليحزن والعين لتدمع وانا على فراقك لمحزنون ... انا لله وانا اليه راجعون
| |
|
|
|
|
|
|
| |
عمر عبد الله فضل المولى
فيس بوك
تويتر
انستقرام
يوتيوب
بنتيريست