سلام يا الحبان كلكم والبركة في الجميع في احزانا الغرقت الجرح لا جوة بطبعنا نحن السودانيين مجامليييين لامن بي هناك , وحنينيين لأبعد حد والحمد لله لكن بعد السفر والشتات كتر والغربة ليلها طوووول , بقى الواحد يتم كم ونيف سنة ما يلاقي اقرب الناس ليه كتير وكتير جدا ناس تسافر بعد كم وتاشر سنة تلقى الشفع الخلوهم زمان بقوا طواااااال ما شاء الله والبنوت الكانن بلعبن في طرف البيوت بي ضفاير بقن دقر العين يتضايرن من الكبار , الواحد فينا لامن ينخلع يقول الزمن ده جرى فررر كدة ولا الناس ديل كبروا مالهم ؟؟
اها النجيكم للنجيضة على قول ود الصائم , بعد الزمن يطول والسنوات تجري واحدة ورا التانية , ومشغوليات الغربة تهد الحيل والزمن يسرقنا كلنا , تبقى المواصلة الزمان يا حليلا راحت ونشفت مع الطملة في الخيران , وكبارنا كان حبوبات كان جدود ولا عمات ولا اعمام الخ يشيلوا ويسألوا , يا ناس فلان كيفنو ؟ اولاده وست بيته ؟ اها فلان ده يكون خالو ولا عمو لزم ليه كم وكم سنة ما سمع صوته ولا حتى في الأعياد وعجلة الحياة تلفح كف كف والموت سبيل الأولين والآخرين فجعتن يجيك تلفون يقولوا ليك قريبك فلان مات في شأن الله والرسول ويكون الله يرحمه سأل منك ومن جناك لامن ريقو نشف , ورسل ليك اطنان سلام . وقطع شك في صلواته بدعو ليك تقوم جري بعد تأخدلك بكية وجوعيرة ، تجتر بي حرقة الأيام الجميلة الكنت معاه فيها وسط الأهل , وترسل جري تجيب الرصيد من مافي ، حتى لو ما عندك تدين وتتصل في اليوم داك وتتكلم مع ناس الفراش كللهم حتى الجايين عابرين الطريق المتفن في الفراش كلو تنضم معاه يعزوك وتعزي , ميزانية كم ريال ولا كم دولار تروح في اللحظة دي في حين إنه ممكن اقل من المبلغ ده بكتير تنظم نفسك وتطلع ليك مبلغ بسيط لكل شهر 3 ولا 4 إتصالات كفاية جدا والله يا جماعة كلنا ولا اقول معظمنا متلومين في اهلنا وقرايبنا لوم شديد خلاس, الأهل ما هم افراد البيت بس! في باقي العائلة من الخيلان الخالات الأعمام والعمات والجيران برضو ليهم حق علينا ليه ما نفقد بعض حتى ولو مره في الشهر , في ناس يكونوا معاك في بلد الغربة وليك شهور ما لاقيتهم تسمع فجأة مات ابوه ولا اخوه ولا اي قريب ليه , تقعد تضاير وتفتش رقمو تتصل بيه المواصلة وصانا بيها الإسلام خاصة مواصلة الأرحام فيها اجر عظيم ولي المواصل راحة بال ما بعدها راحة لو شلنا التلفون واتصلنا بي قريبا لينا طولنا منه , تلفونا بفرحوا قطع شك وبريحوا جووة في حشاه كأنه شافك قدامه وراحته اجرها ليك , وإنت زاتك بتحس بالرضا,إن دعا ليك ساي بالصحة والعافية والخير ورد الغربة , دي براها بالدنيا كلها بصراحة يا جماعة ما بوجعني إلا فقدة بعض الناس لأهلها ومعارفها بعدما يسمعوا إنه فقدوا عزيز ليهم , يتصلوا يعزوا كأداء واجب ليس إلا!!! بالطبع الواجب مهم لكن في اولويات قبل ما يبقى واجب نخاف من اللوم فيه وبس..
متاوقة يلا تعالوا كلكم تحت النيمة دي ونمرق النصيحة ونصلح العوج
02-28-2012, 04:45 PM
اسماء الجنيد اسماء الجنيد
تاريخ التسجيل: 03-31-2010
مجموع المشاركات: 4731
اها وفي بعض الناس يكونوا من فد بيت , لكن كل واحد في بلد ويتعاقبوا في الإجازات ديل معظمهم تلقى الشافع ولدوه وبقى راجل وقرررب يعرس يكون لا شاف خيلانه ولا اعمامه ولا اولادهم نهااااااائي والله صحي
02-28-2012, 08:04 PM
Balla Musa Balla Musa
تاريخ التسجيل: 12-30-2004
مجموع المشاركات: 15238
سوما الحبيبة البركة في الطلة ليك وحشة .. والمنبر منور .. كلامك درر كالعادة.. المشكلة الحقيقية الزمن الذي أصبح يجرى زي غمضة العين و ماقادرين نلحق لا جوه لا بره! نسأل الله أن ينجلى البلا ويتلم شمل الأحباب المشتتين في الأصقاع .. مودتي لك ولاسرتك العزيزة ..
02-28-2012, 08:40 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
العزيزة سوما ولا نساوم في ابداعك تغتسي وتقلعي بي درة ثمينة الموضوع فعلاً يحتاج لوقفة في الغربة تقسو القلوب وقد لا ندرك معنى ذلك لكن دا الحاصل والبحصل والبتحصل ونحن داهجين في غمار الغربة بالذندي والرحيل ما كان بي الخاطر لما تغرب الشعب كلنا اخترنا دار الغربة من اجل أهلنا مقام اولا ثم دخلنا في في مسؤوليات جدد اسرة صغيرة داخل الكبيرة وزاد الهم همين دون الشعور بذلك وقلَّ في المقابل حق الاسرة الكبيرة وتناقص وليت كان ما قل مادياً فقط بل تعدى للأسف حتى الحنين حتى الغفدة بقينا نرخي فيها والهم اعلم كبير لكن ان نوازن برضو حق علينا وواجب بدافع تلك المحنة والدم والدم عمرو ماببقى ميا
الغربة نقص وميانص مهما كان تلقى الفات كتير ولا تشعر ربنا يجيب العواقب سليمة
Quote: كلامك درر كالعادة.. المشكلة الحقيقية الزمن الذي أصبح يجرى زي غمضة العين و ماقادرين نلحق لا جوه لا بره!
الزمن ما اتحمق يا اماني لكن الهموم كترت من صبحاً بدري وانت جاري لآن يصيح الديك وما بتلحق والله يجازي الكانوا السبب
02-28-2012, 08:47 PM
هند محمد هند محمد
تاريخ التسجيل: 05-30-2007
مجموع المشاركات: 4300
إليك هذه الهدية من شاعر العراق عبد الرزاق عبد الواحد وجدتها تعبر عن موضوع البوست واسمها حنين النوق:
مرحب حبابك دكتور بلة اسعدتني مداخلتك ومشاركتك الثرة ايما سعادة والله , القصيدة حنيــــنة والشاعر إحساسه باين في نبرات صوته لكن عليك الله لو قعدت وفكرت ليك كم زمن ما إتكلمت مع فلان القريب ليك وليك كم زمن ما شفت فلان !! الشوفة دي يمكن شوية صعبة مع الظروف الحالية . لكن المواصلة ولو عبر الأثير بي تلفون إميل مهمة شديييييييييييد الله يقدرنا والله ,,,, شكرا غزيرا يا دوك للطلة الحنينة
02-28-2012, 11:58 PM
اسماء الجنيد اسماء الجنيد
تاريخ التسجيل: 03-31-2010
مجموع المشاركات: 4731
Quote: سوما الحبيبة البركة في الطلة ليك وحشة .. والمنبر منور .. كلامك درر كالعادة.. المشكلة الحقيقية الزمن الذي أصبح يجرى زي غمضة العين و ماقادرين نلحق لا جوه لا بره! نسأل الله أن ينجلى البلا ويتلم شمل الأحباب المشتتين في الأصقاع .. مودتي لك ولاسرتك العزيزة .
اهلييين بالحبيبة الغالية أماني لعلك طيبة والعيال وابوهم ,, متابعة جهدك المقدر و همتك المعهودة من أجل الوطن واهله وترابه ربنا يقويك وينصر اهلنا الغلابة والله يا أماني صحيح المشغوليات كتيرة وما بتكمل واليوم بقى ممحوق مع الجري الشديد وبقينا ننسى اكتر الواجبات واهمها مواصلة الأرحام حتى ولو مرة مرة تعرفي يا أماني عندي حبوبة حنييينة آخر حبوباتنا العايشة الله يديها العافية خالة الوالد طوالي الله يرحمه وكانت بتعزو وبتريدو شدييييييد بعد موت الوالد الله يرحمه كل ما تجينا تبكي وتبكي ناس البيت كلهم , وكل ما امشي ازورها اشبع بكى , حنينة شديد كنت متواصلة معاها لما كنت في مسقط بسافر السودان كتير من ما جيت البلد البعيده دي ومع فارق الزمن طولت من سماع صوتها, وبقيت اسأل منها ناس البيت ومن صحتها وببلغوها سلامي وبقولوا لي طواااالي بتسأل منك قبل شهر تقريبا عندها بتها إتوفت الله يرحمها , هل تصدقى للحظة دي ما قادرة اتصل اعزيها ؟؟؟ غلبني كلو كلو قلت الله يلعن البعاد والشتات ويلعن إبليس الشاغلنا ولاهينا عن اهلنا باقية لي تقيلة اتصل عشان ابكي معاها وانا لي قريب سنتين ما سمعت صوتها ,, بكيت برااااااااااي شبعت بكى وكل مرة ببكي وبسكت , ربنا يرد غربتنا بس ويجمع شملنا بي اهلنا لكن برضو لازم نتواصل مع اهلنا البعاد وما نتلهي مع مشغوليات الحياة الرتيبة الما بتكمل
تسلمي يا أماني وكتر خيرك على الطلة يا حبيبة
02-29-2012, 00:24 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22556
Quote: العزيزة سوما ولا نساوم في ابداعك تغتسي وتقلعي بي درة ثمينة الموضوع فعلاً يحتاج لوقفة في الغربة تقسو القلوب وقد لا ندرك معنى ذلك لكن دا الحاصل والبحصل والبتحصل ونحن داهجين في غمار الغربة بالذندي والرحيل ما كان بي الخاطر لما تغرب الشعب كلنا اخترنا دار الغربة من اجل أهلنا مقام اولا ثم دخلنا في في مسؤوليات جدد اسرة صغيرة داخل الكبيرة وزاد الهم همين دون الشعور بذلك وقلَّ في المقابل حق الاسرة الكبيرة وتناقص وليت كان ما قل مادياً فقط بل تعدى للأسف حتى الحنين حتى الغفدة بقينا نرخي فيها والهم اعلم كبير لكن ان نوازن برضو حق علينا وواجب بدافع تلك المحنة والدم والدم عمرو ماببقى ميا
الغربة نقص وميانص مهما كان تلقى الفات كتير ولا تشعر ربنا يجيب العواقب سليمة
حبابك يا خالد وأريتك طيب إنت وكل الأهل كتر خيرك على المتاوقة الحنينة والكلام المارق من الجوف بي طيبة خاطر عاد إت منو البلحقك في النضمي الزين ,, دقر العين , ما تقول سوما سحرتني كمان لوولز والله يا خالد فعلا , لو قعدنا وفكرنا للزمن البجري زي لمح البرق ونحن نكون مدورين في ساقية ليلو طويل , تحس بي إنك مقصر في روحك قبال كل شيء ومقصر في الناس التانية وهم اقرب الأقربين ليك عشان كده الحياة زاتو بقى طعمها مسيخ والناس بقت جافية بالبعاد القسري وبي عدم التواصل المحنة ما بتجي بالبعد ولا بتعيش لما نسقيها من الحول لي الحول المحنة شريانها لازم يجري وسط عروقنا نسقيه بي دم الوريد ونعصرو علينا زي جنا الحشا الوليد تسلم يا خالد وإت زاتك النوع البتجهجهو الغربة ام بعاد ربنا يلم شملنا جميعا ويبيض النية ويعمر القلوب حنية ويقرب كل المسافات بين الأهل والأحبة شكرا ليك أردب محنة
03-02-2012, 12:09 PM
سجيمان سجيمان
تاريخ التسجيل: 10-03-2002
مجموع المشاركات: 14875
شاعرتنا المدهشة سوما تحياتي الصوادح. زمان كنا لمن نسمع الغربة حارة وحارة، " وهناك الهم بدل واحد يزيد همين". كنا بنفتكر إنو ده كلام غنا ساكت. لكن بالجد لقيناه أصدق توصيف. الغربة - كمنفى إجباري او إختياري - بتخصم كتير، زي ما قال الأخ خالد محجوب المنسي. فولتير عندما تم نفيه من فرنسا قال مقولته المشهورة" الرحيل هو ان تموت بعض الشيء ولكن إذا كان الإنسان سيرحل على أمل بدء حياة أفضل، فالرحيل هو ميلاد جديد".لكن يقيني لو ان فولتير أتيح له سحب مقولة من اقواله المأثورة لسحب هذه المقولة. ذلك أنه على الرغم من الوضع الجيد الذي عاشه في المنفى، فإنه كان يتنفس برئة فرنسا التي أحبها وباريس التي عشقها بكل اشيائها، شتائها القارص وصيفها الغائظ وحتى مجتمعها المتنافر! ربنا يرد غربة الجميع ويحفظ لنا ما تبقى من وجدان ومحنة!
محبتي
03-03-2012, 06:37 PM
نادر الفضلى نادر الفضلى
تاريخ التسجيل: 09-19-2006
مجموع المشاركات: 7022
كلماتك عبرت عن واقع نعيشه سواء مغتربين أو مقيمين بالسودان أحياناً أقول لمن حولى بالغربه عندما يأتى خبر وفاة عزيز لم نلتقيه لسنوات .. الحزن على الميت لفراقه، ونحن بغربتنا فارقنا أعزاء كثيرين، قد لا نلاقيهم مرة أخرى، فهو موت مؤجل إعلانه إلى حين أن يأتى خبر الوفاة الرسمى!
الشعب السودانى بتراحمه وترابطه الأسرى ليس شعب إغتراب وشتات نسأل الله أن ينصلح حال البلاد .. وأن يلم شمل العباد ومتين يالله تلمنا .. أو كما تغنى الفنان الذرى إبراهيم عوض!
03-04-2012, 06:09 PM
اسماء الجنيد اسماء الجنيد
تاريخ التسجيل: 03-31-2010
مجموع المشاركات: 4731
يديك الف عافية علي نقطة الضوء هذا ومساحة الصدق هنا
جيت اسلم والله
شكرا محنة
حبابك يا هندوية الحنونة ، بالحيل طلتك بتسرنا يعلم الله تسلمي من كل بلا ، يسلمك ربي ويديك قدر يرضيك إن شاء الله شكرا ليك إنتي يا حبيبة مااااارقة من الجوف
03-04-2012, 06:17 PM
اسماء الجنيد اسماء الجنيد
تاريخ التسجيل: 03-31-2010
مجموع المشاركات: 4731
ود ابوي جبريل حبابك يابا يا ضل السحابا ما فشان قلوبنا اتهرن يا الحنين بندور ننعشن من باقي ىالمحنة البتجينا من تالا الحنان البقوا فاضلين لينا وراجننا بي طيبتهم القبيل لازما ولا بد نرجع متل زمان وننعصر على الناس ونقلل الجفا الجايبلنا الكدر خسوسا لامن نسمع بي خبر زولا ختر وفات!! الله يجمع شملنا كلنا ويسعدنا بي القلوب العامرة حنية
03-05-2012, 01:32 AM
اسماء الجنيد اسماء الجنيد
تاريخ التسجيل: 03-31-2010
مجموع المشاركات: 4731
تعرفي يا سومة....نحن القاعدين عند اهلنا وخلينا الطشيش.... بقينا في ناس ما بنشوفهم علا من الحول للحول.....
الزول لحمك ودمك خبرو هافي عليكي....ان جا طاريهو تسعلي شن خبرو؟.... يقولو لك .....دا ما مات يا يابا ليهو اربعة سنوات....!!!!
الموت بدل الرماد والدميّس..... بقت عندو حنة يرسموها.....وبدل توب الدمورية للحد.... تيبان التوتل وبدل نقض الشعر والكوفات تسريحة(الحزن النبيل)... سمع اضاني مرا لاموها اتوخرت علي البكا ليه؟ قالت ما كانت محننة..وما بتجي البكا مبشتنة!!!!!!!؟؟؟؟؟ والله بقينا شالين هم لي موتنا..... نموت ويسلمونا الحيكومة تدفنا.....
الحال مو حال الغربة.... الحال حال المجتمع كلو ، البقت عليهو دي الطرطشة
هي يا عادل ود أبوي الصادق يا حليلك والله بالكتير ما شوية النبي فيك وفي ظمتك دي إت خليت الغربة أم هم مردوم ردم ؟؟ بااااااااااين عليك بقن ليك جضيمات من شراب اللبينات والله صحي قل هو الله أحد يا خوي ما تقول سوما سحرتني الجضيمات طبعا باينااااات من بوستاتك السمينة لوولز والله صحي كدي تعال بي جاي قت لي التساريح اللت البكاء بقى غسمها الحزن النبيل ؟؟؟ وآآ شريري يا يابا من المحنة البتدور تنعدم ضمة وتروح في شأن الله مع الراحوا خلونا للهم والكدر, شفت جنس المحن دي ياها البتجيب لينا الجفوة والجفا ، وبتجيب لينا قسوة القلوب وتقلتها يا حليل زمنا اخدر وتريان يا سي جي يا خوي , تريان محنة ورويان حنان النفوس متطايبة والقلوب على بعض نحن لازما ما نتلوم في اهلنا ضمة , لازما ولا بد نفقد القراب والبعاد , والله كتر التلفونات , بقن هبطرش على قول خالي اها شركات التلفونات ردمت الشرايح كيمان كميان , دحين اطروا اهلكم يا الحبان تبرا يا يابا إت وتستبرا , وليك طولة العمر يا سي جي الحنين , وناس الحيكومة شكيناهم على الله ختافين الجنائز ! يختفهم الصقر اليكشحهم في الخور
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
اسماء الجنيد
Balla Musa
Amani Al Ajab
خالد علي محجوب المنسي
هند محمد
طارق جبريل
سجيمان
الفاتح ميرغني
فيس بوك
تويتر
انستقرام
يوتيوب
بنتيريست