|
|
 ألم يكن وردي يستحق جنازه رسميه..!!!
|
بقدر ما احزنني وصدمني رحيل الاستاذ محمد وردي، صدمتني الصوره السبهلليه
التي شيع بها خاصة من قبل الدوله واجهزتها.
كل الشعوب المتحضره تقيم لمثل من في مقام وردي جنازه رسميه يحضرها رئيس الدوله وقادة
البلاد السياسين والشخصيات العامه وغيرهم. ويتم اعداد طابور رسمي من القوات المسلحه
لتحية الفقيد بالصوره التي تقتضيها التقاليد. ثم يخرج الجميع في موكب
تشييع منظم ومنضبط لاكمال مراسم الدفن.
لا ادري ان كان هذا التقليد ( ممنوع) في دولة السودان ، أم انها الهرجله وعدم
المعرفه والغوغائيه التي تتسم بها دولة الانقاذ الاسلاميه.
الدوله القوميه ( إن كانت للسودانيين واحده) لها تقاليد راسخه في مثل هذه الحالات عندما تفقد احد
ابنائها المتميزين. يتم تحديد موعد رسمي للتشييع، وينكس العلم الي نصف الساريه فوق كل مؤسسات
الدوله الرسميه ( المؤسف ان بعض مؤسسات الانقاذ الرسميه لا ترفع علم الدوله
حتي، وبعض التي ترفعه تجده ممزقا ولا احد يهتم!) اعلانا للحداد.
لا حظت ان مثل هذا الاجراء تم تجاهله ايضا عند وفاة الراحل السيد احمد الميرغني ( رحمه الله)
وحيث أن الفقيد كان رئيسا سابقا للدوله كان العرف يقتضي ان تقام له جنازه رسميه. او...
ما قيمة الدوله التي لا تقيم جنازه رسميه لرئيسها إن مات...! ام تري ان الجنازه الرسميه
مربوطه فقط بالجلوس علي الكرسي...! يا لها من مفارقه!
لكن في دولة تضربها الفوضي و الغوغائيه من اقصاها الي اقصاها يتدافع الجميع بمافيهم
قيادتها بصوره عشوائيه الي المقابر ليختلط الحابل بالنابل. وإن عذرنا المواطنيين البسطاء
الذين جاؤوا للتعبير عن حزنهم، فكيف يمكن ان نعذر قادة الدوله.
اصابني الحزن ايضا للصوره التي غطي بها التلفزيون مراسم الدفن. كان مذيع التلفزيون
يجري مقابلات عشوائيه مع مختلف الناس وكأنه يقوم باستطلاع للراي.لقد كان ذلك أمرا يثير
الاشمئزاز خاصة و الجثمان لم يواري الثري بعد. اسفت لان بعض المسؤولين وبعض الفنانيين
بل بعض قادة الراي شاركوا في تلك المهزله.
هل نحن امة ميتة الشعور...! ام ان البعض يخطء في ابجديات السلوك!
أنظر مثلا كيف شيعت دولة فلسطين شاعرها الفحل محمود درويش بعد وفاته. وبالرغم من
ان اغلب دول العالم لا تعترف بالسلطه الفلسطينيه كدوله بعد، إلا انهم اثبتوا انهم
شعب متحضر يحترم ويقدر مساهمات ابنائه المتميزين ( تشييع درويش موجود علي النت لمن أراد ان يشاهده).
وعلي كل اثبتت التجارب المتكرره اننا شعب بلا دوله وان الدوله ليس لها تقاليد راسخه
و لا تعرف دورها. مفهوم الدوله في السودان حتي الان مختصر علي الشرطه التي تقمع المتظاهرين
وجهاز الامن الذي يعتقل الابرياء ويغلق الصحف..!
لك الله يا وردي... نام عند رب رحيم... طاردوك وسجنوك في حياتك لانك غنيت لهم... ثم حرموك حقوقك
الرسميه وانت ميت... حقوق كنت نلتها عن جداره في اي دوله محترمه !!!
لكن تأكد سنقيم لك الجنازه الرسميه وسننكس العلم حزنا عليك ... وإن طال الزمن...!
|
|
  
|
|
|
|
|
|
|
|
Re: ألم يكن وردي يستحق جنازه رسميه..!!! (Re: Asskouri)
|
Quote:
وعلي كل اثبتت التجارب المتكرره اننا شعب بلا دوله وان الدوله ليس لها تقاليد راسخه
و لا تعرف دورها. مفهوم الدوله في السودان حتي الان مختصر علي الشرطه التي تقمع المتظاهرين
وجهاز الامن الذي يعتقل الابرياء ويغلق الصحف..! |
2
تحياتى عسكورى
صدقت .. وأضيف أن الدولة واجبها رعاية هؤلاء المبدعين أحياء وتوفير العيش الكريم لهم
الأمثلة تتعدد والكارثة تتكرر .. إهمال حد الجحود، وقصور حد التخلف ..
الراحل وردى لكم سعدت عندما جاءت الأخبار أن أحد رجال الأعمال وفر له المنزل الذى يستحق
ولكم حزنت وصدمت قبل أشهر عندما جاءت الأخبار أن يته معروضاً للبيع لأنه لم يسدد القسط الأخير!
مثل وردى لماذا حالته الصحية معروفة لماذا لم توفر له العلاج والكشف الدورى كل ثلاث أشهر
فى مركز متخصص للكلى مثل مركز المنصورة بمصر دعك من أوربا وأمريكا .. وزيدان .. وهاشم ميرغنى
وتطول القائمة ...
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: نادر الفضلى)
|
شكرا نادرا لمرورك
في السودان كل من يتآمر بالليل ويقلب الحكومه
تصبح الدوله ومواطنيها وجميع ما فيها من بشر وموارد
ملك خاص له يفعل به ما يشاء، لا حرمه لشيء
فالاخرون الابرياء الذين لم يشاركوا في التآمر
مكانهم السجون وبيوت الاشباح او القتل والملاحقه
لكن ... الحقيقه الابديه الثابته هي
أن الشمس تشرق وإن طال الليل وامتد
تحايا
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: Asskouri)
|
عسكوري...أزيك.... فقدنا القدرة علي التعبير والكتابة في حضرة غياب وردي
-وردي أكبر من كل قشور الحركة الاسلامية وبقايا الانقاذ... مصيرهم مزبلة التاريخ
وسيظل وردي حاضراً وكبيرا ً وشامخاً... وردي هو السودان بكل تنوعه وبكل سماحته
قبل أن تتدفق نحوه جماعات الهوس والظلام والرجعية
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: حسن بركية)
|
الاخ بركيه
تحايا
احسن الله عزاؤنا وعزاء السودانين جميعا
الحركه الاسلاميه فكره فاشيه وتنظيم لقيط
غريب علي أرض السودان و علي شعبه واخلاقه
سيجتث من أرض السودان وان طال الزمن
وكما بشرنا الشهيد محمود محمد طه
سيقتلعون من أرض السودان اقتلاعا
اخر أمنياتي في هذه الفانيه ان احضر اجتثاثهم
الذي بدت بوارقه تلوح في الافق
لم تعد لي اي امنيه اخري في الحياه..!!
دمروا البلاد والعباد وشوهوا الدين ونهبوا المال العام
ولم يبق موقع في السودان إلا وادخلوا فيه الحزن واحالوه الي خراب
سيذهب هؤلاء اللصوص الي مذبلة التاريخ وسيبقي وردي شامخا
نعم يلفنا الحزن وتهدمنا الصدمه بصوره تفوق الوصف
لكن ربما يكون رحيله بشاره لنا بقرب الخلاص
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: Asskouri)
|
لقد ازداد حزني علي وردي
وعلى حالنا ...
هل نحن ناس مبشتنين ساي ياربي
لانو قطع شك الحاصل دة ما دولة..
مافي حاجة منظمة...
مافي تعامل بي مسئولية
مافي هيبة دولة..
مع العلم انو وردي كان هيبة الهيبة ذاتها
وقال لينا...... ارفع صوتك هيبة وجبرا..
معليش ياوردي لكن ...حبيناك من قلوبنا واخترناك ياحلو..
سنحتفي بك احتفاءا يلقيك بك في صبح الخلاص...وفي غروب شمس البؤس..
شكرا يا عسكوري
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: مريم الطيب)
|
الاخ الفاضل الرفيق علي عسكوري
التحية لك ولكم خالص تعازينا لكم جميعا شعوب وادي النيل وابناء كوش في الفقد الجلل تغمده الله بواسع رحمته وجزاه بقدر ما اعطى وقدم من فرح جذلى في قلوب الملايين وتعبير صادق عن الحب بكل ما تعنيه المفردة في كل قواميس اللغات وفي كل منحى مرتبطة بالمفردة حيث حب الانسان لاخيه الانسان وحب الجمال والطبيعة وايات الله في الارض في مقدمتهم النيل العظيم الذي انجبه ورعاه فاحبه حبا سرمديا وعشقه حتى الثمالة وان الالسنة لتعجز عن التعبير بل لا توجد الكلمات للتعبير عن رحيل المبدع الموهوب العبقري ابو الورود
و ان هذا العبث من قبل النظام كان متوقعا بالفعل ولقد عبرت عن هذا في بوست اخر فور سماعي لخبر الوفاة الصدمة قبل مراسم الدفن في الصباح الباكر الذي كان واضح وضوح الشمس بانه عملية مدبرة ومقصودة خوفا من العواقب لهم من جموع وردي وهذا ما هو متوقع منهم بالطبع عليه نحن نقول بصوت واضح على الجميع حمل السلاح لازالة هؤلاء الاوباش والا فلا داعي لاي كلام حيث ما عاد الكلام والملام يجدي نفعا بالمرة مع هؤلاء الاوغاد الذين لا ندري من هم ومن اي كوكب جاءوا؟ يا اخي ديل لوثوا كل شئ حتى النسمات على ضفاف النيل العظيم وفي كل ربوع السودان, دنسوا حتى الاموات, دمروا اية قيمة حتى؟ ولغوا في كل ساحة حتى في المقابر؟ يا اخي ديل دايرين مليار من سكان الارض يغنوا لهم بلاء وانجلى يوم زوالهم الذي اصبح حتما وفرض عين على كل فرد قادر بالطبع ولا شئ الا السلاح وقبر المناضل الثوري وردي كان يفترض علينا ان يكون اول الميادين لمنازلتهم انشاء الله يرجع بنا الحال الى مائة درجة تحت الصفر وما يفضل انشاء الله الا شخصين يمثلان حواء وادم السوداناويين ويبدءان من جديد!
وقطعا لا يوجد اي بديل غير السلاح لردمهم جميعا اقطعون يا اخي ديل حفروا لنا القبور ونحن احياء فاصبحنا كالاموات فلا حراك ولا همس الا ضجيجهم فوق صدورنا وقيمنا ومبادئنا واصالتنا ومشاعرنا واحاسيسنا تدميرا وهم لوحدهم يشيدون في العمارات فوق جثث شعبهم وكان لم يحدث شئ بالمرة فهيا الى السلاح الى السلاح الى السلاح؟
شكرا لك ولنا عودة
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: مريم الطيب)
|
Quote: لقد ازداد حزني علي وردي
وعلى حالنا ...
هل نحن ناس مبشتنين ساي ياربي
لانو قطع شك الحاصل دة ما دولة..
مافي حاجة منظمة...
مافي تعامل بي مسئولية
مافي هيبة دولة..
مع العلم انو وردي كان هيبة الهيبة ذاتها
وقال لينا...... ارفع صوتك هيبة وجبرا..
معليش ياوردي لكن ...حبيناك من قلوبنا واخترناك ياحلو..
سنحتفي بك احتفاءا يلقيك بك في صبح الخلاص...وفي غروب شمس البؤس..
شكرا يا عسكوري |
العزيزه مريم
تحايا وخالص التعازي
عبر اكثر من عقدين حاول هؤلاء الاوباش تبهيم( من بهائم) السودانيين
لقد كتب الدكتور حيدر ابراهيم مقالا في هذا الاتجاه علي ما اذكر
حولوا كامل الشعب السوداني الي سخره تخدم مصالحهم يركبون علي ظهرها
يحطمون قيمها ويدمرون حياتها
يبيعون لهم آيات الله لاسكاتهم
ومرة يبيعون لهم العنصريه وغيرها
إستغلوا كل قيمه طيبه عند السودانيين لتطويل بقائهم في السلطه
حولوا الدوله بكاملها الي مسخ من اسياد وعبيد
دولتهم تقوم علي الفوضي والغوغائيه والهرجله
لا توجد دوله تثير سخرية العالم واستهزائه مثل دولتهم!
وضعوا دولتهم في مواجهة الشعب السوداني
وحتما سينتصر الشعب، لان الشعب اقوي من هياكل الدوله!
لقد ان لهذه الحكومه ان تذهب بكل السبل.. واصدقك القول ستذهب!
وسيبني الشعب السوداني الدوله التي تليق به وبقيمه
وسنعيد لكل المظلومين حقوقهم
وسنقيم الجنازه الرسميه للراحل وردي وسننكس العلم ونعلن الحداد
هذا حقه علينا
النضال مستمر
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: Asskouri)
|
Quote: من في مقام وردي جنازه رسميه يحضرها رئيس الدوله وقادة
البلاد السياسين والشخصيات العامه وغيرهم. ويتم اعداد طابور رسمي من القوات المسلحه
لتحية الفقيد بالصوره التي تقتضيها التقاليد. ثم يخرج الجميع في موكب
تشييع منظم ومنضبط لاكمال مراسم الدفن. |
ياااا عسكورى !
شكلو الدرب راح ليكم فى الموية .. البوست دا ممكن يكتبوا زول من الناس المعترفين
بالدولة فى عضمها ... كدولة
لكن انت هل معترف بشرعية الدولة ؟ ووجودها ؟وموؤسساتها ؟ ورئيسها ؟؟
يعنى انت بتفتكر انو فى اى نوع من التمجيد لوردى لو تم دفنه برئئيس الجمهورية واركان حربه
وموسيقاهم ؟ ويجوا كمان الشخصيات العامة والمهمه وينتظموا الصفوف وراء كومندانات الانقاذ ويقولوا عايوين
نشييع وردى ؟؟ طيب وانتو ووردى والجن الازرق الراكب المعارضه بتعارضوا شنو؟؟؟
قبل ما نمشى فى النقاش دا جاوب على حاجه واحده
هل انت عسكورى دا .. بتعتقد انو لهذه الدولة شرعية يجب ان تفعل على ضوئها كذا وكذا وكذا ؟
اذا طانت اجابتك لا ... بالنسبة لى ما عندها شرعيه
طيب كيف بتطالبها بفعل اعمال تتطلب شرعية للدولة ؟؟؟؟
ـــــــــــــــــــــــــــــــــــــــــ
يا ناس الحركة الشعبيه جنيتو كلو كلو !
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: دينا خالد)
|
تحياتي عسكوري...
والله حزنت غاية الحزن عندما شاهدت المجرم القاتل السارق عمر البشير يؤم الناس في صلاة الجنازة. واعرف بحكم علاقتي الطويلة بالمرحوم كيف مات وهو يمقتهم ولا يطيق رؤيتهم وهم الذين قتلونا ألف مرة في كل صبح ومسا بجهلهم واجرامهم التتار..
يا الله من هؤلاء الوحوش...
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: عبدالأله زمراوي)
|
Quote: والله حزنت غاية الحزن عندما شاهدت المجرم القاتل السارق عمر البشير يؤم الناس في صلاة الجنازة. واعرف بحكم علاقتي الطويلة بالمرحوم كيف مات وهو يمقتهم ولا يطيق رؤيتهم وهم الذين قتلونا ألف مرة في كل صبح ومسا بجهلهم واجرامهم التتار..
يا الله من هؤلاء الوحوش... |
الاستاذ الكبير عبد الاله زمراوي
احسن الله عزاء الجميع
الفقد كبير وجلل
لقد صدقت فمواقف الراحل من النظام معروفه وثابته
نسال الله له الرحمه والمفغره.
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: دينا خالد)
|
Quote: ياااا عسكورى !
شكلو الدرب راح ليكم فى الموية .. البوست دا ممكن يكتبوا زول من الناس المعترفين
بالدولة فى عضمها ... كدولة
لكن انت هل معترف بشرعية الدولة ؟ ووجودها ؟وموؤسساتها ؟ ورئيسها ؟؟
يعنى انت بتفتكر انو فى اى نوع من التمجيد لوردى لو تم دفنه برئئيس الجمهورية واركان حربه
وموسيقاهم ؟ ويجوا كمان الشخصيات العامة والمهمه وينتظموا الصفوف وراء كومندانات الانقاذ ويقولوا عايوين
نشييع وردى ؟؟ طيب وانتو ووردى والجن الازرق الراكب المعارضه بتعارضوا شنو؟؟؟
قبل ما نمشى فى النقاش دا جاوب على حاجه واحده
هل انت عسكورى دا .. بتعتقد انو لهذه الدولة شرعية يجب ان تفعل على ضوئها كذا وكذا وكذا ؟
اذا طانت اجابتك لا ... بالنسبة لى ما عندها شرعيه
طيب كيف بتطالبها بفعل اعمال تتطلب شرعية للدولة ؟؟؟؟ |
يا دينا خالد
ازيك
خلعتيني والله..!
تخشي علي لا سلام لا عزاء...!
السلام خليناهوا.. مالك ما بتعزيني في وردي...!
غايتو اتلومت معاي...!
| Quote: شكلو الدرب راح ليكم فى الموية .. |
ابدا و الله .. نحن ناس الحركه الشعبيه اكتر ناس عارفين الدرب
ولاننا عارفين الدرب ومتأكدين من صحته ...قاعدين نقاتل بثوره مسلحه...
الزول الـ (ماعارف الدرب)، ما بشاكل ويثور.. بكون لايص يشفتش ويسال
لكن نحن من 1983 عرفنا الدرب وسايرين فيه رغم التكاليف والتضحيات
وقناعاتنا لم تتزحزح قيد أنمله بأنه طريقنا سليم...!
Quote: البوست دا ممكن يكتبوا زول من الناس المعترفين
بالدولة فى عضمها ... كدولة
لكن انت هل معترف بشرعية الدولة ؟ ووجودها ؟وموؤسساتها ؟ ورئيسها ؟؟ |
طبعا الحركه الشعبيه في السابق وحاليا معترفه بالدوله السودانيه...
ببساطه يا دينا لو الحركه في السابق وحاليا ما معترفه بالدوله السودانيه
شكل النضال كان بختلف تماما...!
مثلا لو الحركه الشعبيه عند تأسيسها ما كانت معترفه بشرعية الدوله، كانت اول حاجه حا تعملها
هي الاعلان عن تأسيس دولتها( بصرف النظر عن موقف العالم الاخر) ومن ثم حشد الناس للدفاع عنها
ولكن لانها معترفه بالدوله رات في مشروعها عند اعلانها اعلان الثوره بهدف اصلاح الدوله
القائمه واصلاح مؤسساتها لتسع جميع مواطنيها وعندما وصل النضال نقطه محدده، خيرت ( بضم الخاء وتشديد الياء)
الحكومه السودانيه بين اعادة هيكلة الدوله لتسع الجميع او منح الجنوب حق تقرير المصير،
فاختارت الاخير، ولان الحكومه القائمه تتبني برنامجنا لا يسع حتي المسلمين
( دارفور وجبال النوبه والنيل الازرق وحتي كثيرين في الشمال النيلي)
اختار مواطني الجنوب الانفصال.. واليوم اي مجموعه في السودان لو ادوها حق تقرير المصير لاختارت الانفصال...
ودا هو حقيقة الكلام البنقول فيه انه الحكومه القائمه اليوم شغاله في تفتيت الدوله السودانيه
وشرزمتها عن طريق سوق الناس للقناعه والياس من امكانية اصلاح الدوله الموجوده..!
| Quote: لكن انت هل معترف بشرعية الدولة ؟ ووجودها ؟وموؤسساتها ؟ ورئيسها ؟؟ |
طبعا معترف بيها يا دينا... أنا ولدت في دوله اسمها السودان... وكبرت وحملت وثائقها الثبوتيه
.. علي المستوي الشخصي ليست لي مشكله مع ( السودان كدوله) ولكن تبقي مشكلتي قائمه مع الحكومه الحاليه
علي المستوي المحلي قضية اغراق أهلي وتهجيرهم بالقوه وعلي المستوي القومي كل مشاكل الحكم والحروب العبثيه
التي تشنها الحكومه علي المواطنيين في مواقع مختلفه من البلاد والمظالم العديده والفساد واحتكار الوظائف العامه
علي اساس حزبي الخ... واعتقد انك تعلمين الفرق بين الدوله والحكومه.
Quote: يعنى انت بتفتكر انو فى اى نوع من التمجيد لوردى لو تم دفنه برئئيس الجمهورية واركان حربه
وموسيقاهم ؟ ويجوا كمان الشخصيات العامة والمهمه وينتظموا الصفوف وراء كومندانات الانقاذ ويقولوا عايوين
نشييع وردى ؟؟ طيب وانتو ووردى والجن الازرق الراكب المعارضه بتعارضوا شنو؟؟؟ |
لا لن يكون هنالك اي تمجيد لوردي تحت هذا النظام وحتي وردي رحمه الله فيما اعتقد لن يرغب في ذلك
سيمجد الشعب السوداني وردي في ازمنه لا حقه ليس لدي ادني شك في هذا.
من ناحيه اخري لم يكن بإمكاننا او بإمكان اي شخص ان يطلب من وردي أن لايموت حتي نغير الحكومه
و نقيم له تشييع رسمي فالموت هو ارادة الله... وقد شاءت الاقدار أن يموت وردي وهذه الحكومه قائمه
مطالبتي لها بالتشييع الرسمي هو تذكير لها بحقوق مواطن متميز قدم لبلاده ومواطنيه الكثير
مما يؤهله لتشييع رسمي من قبل الدوله ( الدوله كجهاز) بصرف النظر عن طبيعة القائميين عليها
التشييع الرسمي امر لا يمكن لاي جهه غير اجهزة الدوله ان تقوم به لانه يرتبط بإجراءات يمكن فقط للحكومه
التوجيه بها.
يا دينا نحن معارضين للحكومه وليس للدوله، ما نقوم به هو اننا نحاول تغيير
الحكومه حتي ينفتح الطريق أمام القوي السياسيه السودانيه المختلفه وأمام السودانيين
لاعادة صياغة هياكل الدوله بالصوره التي تستوعب تنوعهم وتوفر لهم التعايش السلمي
وشكرا لمداخلتك الجيده...
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: Asskouri)
|
يا عسكورى مش كبرت اللفه شديد ؟؟
شنو الجاب سيرة الدولة (واظنك تقصد الوطن) مع سيرة
الحكومة ؟ انت عايز الدولة اى الوطن يعمل ليك اجراءات
جنازة؟ لما تقول رسمية انت طوالى بتقصد النظام ؟
ومافى فرق بين اجهزة الدولة وبين الحزب الحاكم
والكلام دا قالوا رئيس الدولة بعضمة لسانو !! قال والله
سياساتنا بتاعت التطهير والتمكين عملت ضرر كبير فى الخدمة
المدنية او الاجهزة الامنية؟
يعنى باعترافهم مافى دولة تسع الجميع ..
انت تجى تقول لا فى فرق ؟
ايهما اشرف لوردى ان كان يترك امر تشييعه لمحبيه واهله
واصدقاءه واهل اليسار الذين انتمى اليهم طوال حياته
ام يترك للدوله تعمل تشييع رسمى وهو من باب اولى تشييع
من ناس النظام !!!
ــــــــــــــــــــ
ما تكبر اللفه بالله وما تزمزغ لى بالانشاء
الحركة الشعبية ولا غيرووووكم!!!
| |
|
|
|
|
|
|
|
|
|
Re: ألم يكن وردي يستحق جنازه رسميه..!!! (Re: دينا خالد)
|
يا دينا
والله لا في لفه ولا يحزنون..
الحركه الشعبيه اصلا ما عندها لفه في نهجها
السكه واحده...!
انا هدفي من البوست - وطبعا انت عارفه - انه فقط نوري غوغاء الانقاذ هؤلاء
إنه نحن عارفين حقوق مبدعينا
يعني هل تتوقعي انه انا كنت مثلا متوقع الانقاذ تعمل جنازه رسميه لتشييع وردي!!
و الله ديل ما يشيعوا ( عنبلوك) خليك من هرم في قامة الاستاذ...!
لكن عايزين نوريهم انه دولتهم دوله متهالكه.. ما عندها قيم ..
بعيده عن احاسيس الشعب... حتي الحزن الطاغي مابقدروا يشاركوا الشعب السوداني
فيه... دوله منبته تماما... تمثل الناس القاعدين في كراسيها فقط
بعدين انقاذ شنو البي تعمل ليها تشييع رسمي لوردي...!
هو ذاته رحمه الله لو شاوروه ناس الانقاذ قبل ما يتوفي.. قالوا ليه عايزين نعمل ليك تشييع
في حالتك وفاتك.. اعتقد انه رده بقوليهم ما عايز وما تحوموا جنب جنازتي نهائي ...!
راجعي كلام اخونا عبد الاله الفوق دا...
بس عايزين نوري الجهاليل ديل انه وردي لوحده فقط اكبر من دولتهم... ومشروعه انجح من مشروعهم
ورسالته اخلد من الغوغائيه بتاعتهم ( هم اصلا ما عندهم رساله من اصله) غير الفوضي
والدغمسه ونهب المال العام ( معليش راجعي موضوع خالد التيجاني في الراكوبه)
وكله ما بحلهم... الشعب السوداني جايي .. جايي...
بس اسأل الله زي ما كتبت فوق .. احضر طهورتهم...
ما فاضل لي حاجه غيرها يا دينا
ويديك العافيه
والرحمه للاستاذ وردي... وتابينه وتشييعه الرسمي حق علينا وعلي كل
أهل السودان وهذه تذكره للبعيش مننا ويحضر الطهور...!
| |
|
|
|
|
|
|
| |
Asskouri
نادر الفضلى
حسن بركية
مريم الطيب
دينا خالد
ناصر المحسى
فيس بوك
تويتر
انستقرام
يوتيوب
بنتيريست