|
|
 جابت..؟ ما جابت. تاج السر الملك
|
جابت؟ .... ما جابت تاج السر الملك.
إذا قدر لك حضور حفل غنائي موسيقي في أمريكا، فلا تتوقع أن يسألك أحد في النهار الذي يلي السهرة، عن مدي المتعة التي أصبتها، و لا عن مستوى الأداء الفني، لا الفرحة لا البهجة ولا الشوق المشيت ليهُ يهم، أقول لك، و الحق أقول لك، وطد عزمك يا بنى على الإجابة عن سؤال واحد وحيد، سيفاجئك به السائل شئت أم أبيت:
أها الحفلة جابت كم؟؟
فلا تعبسن ولا تتولى فليس في الأمر عبط، فهذه هي طبيعة الحياة في بلاد العم سام، أن تسأل عما بدا لك، وعما لم يبدُ. وهذا السؤال الإقتصادي العميق الغور عزيزي القارئ، مقرر، لا أحد يدري متى تقرر، ولكنه يأتي مباشرة بعد التربية الإسلامية، لا احد يدري ما الفائدة من سؤاله، ولا الفائدة الحادثة من الحصول على إجابة له، ولكنه جزء أساسي من لعنة (البلاك اون بلاك كرايم) و التي تكللت بانفصال جنوب البلاد، تمهيداً لتفصلها وتفصلنا في ذاتها و في ذواتنا نحن.
و الذي يدفعني إلى الكتابة في ذا الشأن، أن السؤال أصبح ظاهرة (مثلها مثل ظاهرة الأطباق الطائرة و كوش الأعراس التي تهبط من السماء) في بلد لايعلم الناس فيه مفاجأة الوجبة القادمة، الذي دفعني، أن السؤال الذي يأتي في بعض الأحيان مثل التقرير حين يفقد علامة استفهامه، كقولهم (قالوا ما جابت)، اصبح هاجساً ملحاً، يحمل مدلولات ومضامين تشي بعدم الموضوعية في أعلى حالات حتميتها التاريخية، و لأنني (بني كجة)، أفعل ما يفعل البني كجة، و أخاطر حتى لو ما فاطر، فقد اصبح همي الوحيد، و تسليتي المفضلة، عد الحضور في الحفلات و المناسبات ذات المردود الربحي أن أتخير مقعداً في الركن القصى، أعد الحضورفرداً فرداً، و اضرب الناتج في سعر التذكرة، ثم أتفرغ لسويعات في خضم و ذروة صراعي اليومي للبقاء في الكوكب الأمريكي المتسارع، لكي أجري بقية العملية الحسابية
(أها نخصم الفين دولار حق الصالة... تلتماية للساوند... غمتة للإسباني.. سبعين زول دخلو ملح...... )
كل ذلك وهمي أن أصل إلى نتيجة سالبة، فأنا بني كجة لا تطربني غير علامات الطرح بعد الضرب، ففي ميراثي القومي تقف (بيارة السوكي) شاهدا على حسادتي المتأصلة. وما أن أحصل على النتيجة المبتغاة، حتى أبدأ في اتصالاتي الهاتفية التي ينتطرها المئات في شوق ولهفة:
الو...حفلة امبارح؟؟ لا ما غطت، لا لا ما جابت.
أحس بأنفاس الراحة تهب من جهة الطرف الآخر، فأبتسم في جذل، فلا أعظم من أن تسعد الناس، حتى و لولم يكن الأمر إطعام الأطفال الجوعى في الصومال الشقيق. ثم أن روح الأسلاف تقمصني، فأقوم برفع تقرير معاكس إلى شخص يهمنى جداً أن أعكر صفو يومه:
ألو... معاك عزو..حفلة أمبارح؟ لا لا لامباااالغة.. زحمة زحمة يا رجل، الناس الرجعو أكتر من الجوه، ااااااي.. بكون الفنان مشى البيت شايل اقل شى ماية الف دولار.....
صمت:
التاج دقيقة... بطني دي مكركبة كده..جاني مغص بدق ليك بعدين.
يعقب ذلك صوت ارتطام جسم ثقيل بالأرض.
ثم إن الأمر تفاقم مؤخراً، و الوضع الإقتصادي يزداد تدهوراً في بلاد السام الهمام، فاتسعت رقعة عدم الموضوعية التي يباشر الفقر الإشراف عليها تطوعاً منه، وليس أشد بأساً من فقيرمثلي يركب (كامري)، فانضممت إلى حلقة من موائد حوار (الجابت كم) المسائية، تصدرها رجل ذو هامة يتدفق حماساً و ألقاً، يندفع كالسيل العرم حين الأمر يتعلق (بالجابت و الما جابت)، فلا تملك إلا أن تعجب به و بأخلاصه لقضيته، واولوية اولويات حياته، أعجبني حماسه ودرجة انفعاله، فصرت أرقبه يغالط دون ملل في أمر حفل قدر لي حضوره، كنت كلما أكدت بوصفي شاهد عيان أن (الحفلة جابت)، يستبد به غضب حقيقي، فيثور وهو يدق المائدة دقاً:
لاما جابت
جابت
ما جابت
ولا أخفي عليكم، أنني كنت أعيش لحظات سعادة نادرة، إقتربت من شعوري وأنا أهم بالإشتراك في مظاهرة لتغيير النظام (جابت ما جابت جابت ما جابت)، فعكفت على صب مزيد من الزيت على نار حنقه، وأنا ارقب تعبيرات وجهه الصارمة، وعروق عنقه المنشحطة، حتي خفت عليه من (الاستروك)، مضيت بعد ذلك في شأني وأنا في حيرة متعجبا في سري:
أفرض جابت ولا ما جابت، المشكلة شنو؟
و تحدثت في آونة أخرى مع صديقة عزيزة، فسألتني عن حفل معين لم تتمكن هي من حضوره، فأجبتها بصدق، أن الحفل كان جميلاً و طيباً و ممتعاً، فما كان منها إلا وأن أكرمتني بالتقرير الذي طال شوقي إليه:
لكن قالو ما جابت.
وقد اشتهر أحد المطربين عندنا في هذه الأصقاع، بحرصه على أمر (الجيبان)، فكان كلما صعد على خشية المسرح، ركز بصره على المدخل حيث تباع التذاكر، يعد القادمين فرداً فرداً، و عقله يعمل عمل حاسبة الكترونية تضرب في عشرين دون توقف، حتى إذا أدرك من المال ما يعتقده ربحاً، صاح ملء رئتيه:
أودعكم... أفارقكم.. لا لا لا لا أنا مابقدر....
وفي قصة مشابهة مقتبسة من تراث (الجيبان)، كان عزو يبيع الملابس الرياضية المضروبة في سوق تشاشة واشنطن، وكان لخوفه الشديد من شباب المباحث، قد اكترى برلوما سودانيا حديث عهد بالبلاد، فغني له معزوفة (ارح طلع ليك مصاريف على بال ما ينادوك للانترفيو..)، مضحياً به قرباناً يثرى من وراءه حتى جنى الجنا، وبعد أن يتم فرش اليضائع المزيفة، و تحديد أسعارها المغرية، يتظاهر عزو بأنه ذاهب استجابة لأمر طارئ:
الو..الو... حاتم انشا الله خير، حادث؟؟ أجيب معاي شنو.. قهوة بس؟...
ثم أنه لا يذهب إلى أي مكان أبعد من ركن يصف فيه سيارته، يراقب منه البرلوم وحركة البوليس في المكان متأهباً للهرب في حال حدوث الكشة، ومن عليه أيضاً يراقب حركة البيع و يعد في القمصان التي يبيعها البرلوم، وفي نهاية النهاريعود عزو للم شمل البضاعة، متمظهراً بحالة إنسانية نادرة (والله صاحبي ده الله ياخد بايدو.. حادث كبير)، و بينما تتسع عيون البرلوم بالحسرة، يفاجئه عزو بقوله ( بتكون بعت ليك زي تمنية من الهيلفيقر، و ستة من النايكي و اتنين اديداس...مش؟؟)، فيجيبه البرلوم بسذاجة و إعجاب وهو ذاهل (بتبالغ عرفت كيف)، غني عن القول أن الشرطة استخدمت البرلوم كطعم للإيقاع به، ولعله يسعد بإجازة مفتوحة في السودان هذه اللحظات، لافرق لديه (لو جابت ولا ما جابت).
و لبعض البني كجة غرام فضولي في معرفة أخبار (مين و بيعمل كم في السنة)، فقد كانت جارتنا تصر على ختام حديثها بالتبرع بمثل هذه المعلومة (إنت عارف وليد ده بعمل كم في السنة؟) ووليد ليس زوجها، وتسارع بالإجابة برغم تعبير الإمتعاض الذي قد لا يغيب عن ناظري النعام آدم رحمه الله، تعلمني غصباً عني، وتخلي سبيلي ونظرة أنتصار تكسو وجهها، فكأنما قد ألقت بحمل ثقيل عن كاهلها...
سيكس فيقرز يا التاج ... تصدق.؟؟
فأتحسس بدوري (فقري) تبعاً لذلك.
وآخرحدثني دون طلب مني ولا سؤال ولا فضول من ناحيتي (إنت عارف يا التاج أنا بعمل كم في السنة؟)، لم يجد مع إصراره على إعلامي تجاهل أو (روحان)، ومثلما تفعل (سرينا ويليمز) بكرة التنس، صفعني بالمعلومة قاذفاً إياها من بين فكيه (خمسين ألف... تصدق؟)، ثم اتكأ (جنباوياً) في مقعد سيارته وكله فخر، ومن بين عينيه يطل جهاز قياس الحسادة، فلم أملك غير تقريظه و الدعاء له بالزيادة، متعامياً عن رؤية الخمسين ألفاً وهي تلامس خط الفقر الأمريكي في سعادة ويسر.
و لمعرفة (الجيبان) في أمريكا طرق كثيرة ، من بينها أنا تكون محاسباً، تعد الضرائب للزبائن في نهاية السنة، فإن كان (خشمك حفيفاً) أذعت اسرار القوم المالية .. و الله طلعت لسكينة خمسة ألف ريتيرن، وقد يكون قصدك شريفاً، فأنت في نهاية الأمر تروج لمهاراتك، و إلى الجحيم بقسم ابقراط فذلك للأطباء فقط، وليس ذلك من كشف الحال في شئ
عدا ذلك فعليك بعد الكراسي.
|
|
  
|
|
|
|
|
|
|
|
Re: جابت..؟ ما جابت. تاج السر الملك (Re: Afraa Sanad)
|
والله يا عفراء البلد دي كان بتعملي فيها سكس فقرز ولا خسمين الف بعد ما يقوموا منك ناس الـــIRS و Verizon واخوانو ياها الخمسمية دي
يان رسلتيها يان اكلتي بيها الفافا بينز بتاع كلفورنيا 
عشان كدا الزول عاوز يستغل وجود المبدع خدر ويتعلم ليهو طلعة طلعتين يمسك بيها ناس بوسطن الناشفين ديل وبعدين نشوفا بيتجيب ولا ياها خمسميتنا زاتا:)
تعرف يا تاج كل ما اتخيل صحبك البطنو كركبت وجا داقي الجابرة بضحك زي المجنون..
طبعا لسة شغال في الاحمسة ,, انهار بتاعة ابداع متدفقة... عقبال التاني يا فنان..
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: حسين نوباتيا)
|
حسين نوباتيا الصديق العزيز
الشكر لحفل الكريسماس أن أتاح لنا الفرصة للقاءكم و الشكر لأخي العزيز أحمد عالم
الرجل الذي يفيض أريحية و رقياً لتعريفي بك (طلعنا نسايب في النهاية ) و بالمناسبة أهديك أغنية ... هو هاسينا.
يا زول مصداقا لكلامك أوباما بقى في مجابدة مع الخمسماية، ودي زااااتا يلم فيك بوليس يقسما تيكيتات على الكاونتي..شفت الشقاوة دي.
ألحق كمل (الأحمسة) الكتاب التاني على الأبواب، وسوف تكون بوسطن محطة أساسية، بس الصقطيبة تزح كده ولا كده.
تحياتي لك و لشباب بوسطن المثابر
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Tagelsir Elmelik)
|
جميله هذه الكتابه
تحكى عن واقع، بصورة أدبيه، لا ينقصها خيال الإبداع
فانا شخص يستمتع بهكذا كتابات كنوع من الشمار
لمعرفة احداث لم اكن جزء منها
و مجتمعات اسمع عنها ولا انتمى اليها
انه الفضول
فالمغتربون فى الخليج و المهاجرون فى الغرب من السودانيين
استحالت رجعتهم و فشوا فى الاندماج
لذلك لديهم تفاصيل تملا حياتهم كالتى كتبت عنها
بقدر ما لديهم من تعاملات مفرحه
بقدر ما لديهم من تفاصيل مزعجه
وحدهم الذين من على شاكلتك
هم الذين يستمتعون بالعيش وسط هؤلاء القوم
واصل
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: ناصر البطل)
|
| Quote: إنت عارف يا التاج أنا بعمل كم في السنة؟ |
لووووووووولز يا تاج كلام من عمق الواقع السؤال ده غايتو فى قعدتي البسيطة فى امريكا مر علي زي دشليون مره كده ههههه..... طبعا نحن في بوسطن حفلات عامة دي كانت نادرة شديد او شبه معدومة لكن الحفلة جابت كم كانت علي كشوف العرسان هههههه ما شاء الله ارقام فلكية شباب حلوين و مترابطين الله يديهم العافية.
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Sayed Bekab)
|
فنان يا ملك ومبدع دوماً
قلت لى الفنان بيحسب الجمهور, ياخ دى حفله اكيد ما بتكون جابت, حفله جمهورها بيتحسب
البعرفوا كن جابت ولا ما جابت برضو ما جابت
===
حولا.......تكرير الكلمه تعمل وجع حنك وبتتغير لمعنى ما كويس
جابت...ماجابت.....جابت.....ماجابت......جابت.... ماجابت.
وعاش كفاح البنى كجه
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Sayed Bekab)
|
سيد
سلام
ناس فرجينيا ناس نشيطين شديد و مترابطين مافي شك، بالرغم من الخلافات السياسية الحادة البتشوفا في النت دائما
ودي الحالة الاشرنا ليها في كون الناس بتتعامل بخلافات (ما قبل الجواز):، بنظام إغترابي مؤسس، مع عدم قدرتهم على نقل
الخلافات إلى ابنائهم و بناتهم ( الجيل التاني)، عمومافالخصوصية مبذولة في الثقافة السابقة بسبب من نوم الحوش و النفاجات
و اجهزة الأمن التي لا ترعى ذمة و لا تدعي خفرا.
لك سلامي ولو جيت فرجينيا ناغمنا.
تاج السر
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: ناصر البطل)
|
ناصر سلامات
Quote: فالمغتربون فى الخليج و المهاجرون فى الغرب من السودانيين
استحالت رجعتهم و فشوا فى الاندماج |
تعرف كلامك ده صحيح إلى حد كبير، بالذات في الغرب، ففكرة الهجرة و الإغتراب غير واضحة تماما
لأعداد زهولة من مهاجري الغرب (الحاسبين المسألة أغتراب)، وهي ليست كذلك في نظر مانجي اللجوء
أو أي شكل من اشكال فيزا الدخول، لذلك تجد حضور فعالياتنا مقصور على (ناسنا) فقط، و موسيقانا جمهورها محدد
بالمهاجرين (المغتربين) السودانيين، الأمل في الجيل الثاني بالرغم من المحاولات المستميتة من ذزيهم لأخراجهم
كنسخة من الأصل....
نصبر حبة كمان
تحياتي
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Mohammed Ahmed Saeed)
|
أخي محمد أحمد سعيد
نجيب الحسد من ضقلو هههه، أنا القدامك ده كرهتي في الدنيا الكامري
عربات التويوتا عموما بشوفا شينة خلاص هههه
| Quote: ( الكامرى دى ركوبها علامة من علامات الفشخرة فى انحاء اخرى من العالم) |
ده يكون السبب في انو سعادة أي زول من دول عالم ثالث خارج أمريكا، ما بتكتمل إلا بركوب الكامري
أول شي لمن يصل ببل شوقو للكامري، ولنا مقال (الأوكشن)، تناولنا فيه الموذوع اياه.
تحياتي
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: جعفر محي الدين)
|
ابو السرة تحياتى
دائما جميل و مبدع
و انا كلما اشوفك احيا من الضحك ..اضحك واضحك و اجيك راجع
مشتاقون و انتو متون تجوناو فرحانون و الليل طال علونا.. يلا اضحك
حكاية جابت ما جابت دى زكرتنى الفنان المبدع المرحوم محمد احمد عوض
كانت هناك فى استادالخرطوم مباراة نهائى الدورى بين الهلال و المريخ ايام العصور الذهبية
و طبعاالاستاد اتملا لى عينو و الناس البرة اكثر من الجوة ..سال احداللذين لم تتاح لهم حضور المباراة الاستاذ محمداحمد عوض اها المباراة كانت كيف فاجابه الاستاذ قائلا والله جنس { خش } ما شفت ذيو يعنى جابت جنس جيب ناس الشباك لى هسع بعدو فى القروش ..
منتظرنك بالكسرة و الملاح ..و العروس الما خمج ..و انت اقد اتلككل لما القطار يفوتك
مع تحياتى
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: مجاهد حسن طه)
|
يا مجاهد يا سعادتو
شاااايفك بتحلص حق الجيبان من اول فاصل ههه
الكسرة و الملاح ديل بقو إشاعة جابت ما جابت زاااااتا
وحكاية العروس دي بكرة بلاقيكم جنب الكاوني و من هناك على جامع الهجرة حار حار
تحياتي لك و الاسرة
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: جعفر محي الدين)
|
ابو السرة تحياتى
دائما جميل و مبدع
و انا كلما اشوفك احيا من الضحك ..اضحك واضحك و اجيك راجع
مشتاقون و انتو متون تجوناو فرحانون و الليل طال علونا.. يلا اضحك
حكاية جابت ما جابت دى زكرتنى الفنان المبدع المرحوم محمد احمد عوض
كانت هناك فى استادالخرطوم مباراة نهائى الدورى بين الهلال و المريخ ايام العصور الذهبية
و طبعاالاستاد اتملا لى عينو و الناس البرة اكثر من الجوة ..سال احداللذين لم تتاح لهم حضور المباراة الاستاذ محمداحمد عوض اها المباراة كانت كيف فاجابه الاستاذ قائلا والله جنس { خش } ما شفت ذيو يعنى جابت جنس جيب ناس الشباك لى هسع بعدو فى القروش ..
منتظرنك بالكسرة و الملاح ..و العروس الما خمج ..و انت اقد اتلككل لما القطار يفوتك
مع تحياتى
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: مجاهد حسن طه)
|
Quote: الحفلات بتجيب كان النفوس اتطايبت، لكن شفقة البني كجة بتقد المكنة باستمرار
إنتو التراديشن عندكم كيف في بنسلفانيا؟؟ الاشاعات وصلتنا قالو نفس الدقة
عندنا مصادر وكده
|
يا ملك انت عارف عندنا نوع خاص وحصرى كمان ...النوع دا..... سبعين زول دخلو ملح...... )
عشان كدا الاجابة معروفة ما جابت التكتح ... والا تجيب فى المدخل بلاك اميريكان عضلات تبش يقطع تذاكر الحفلة والله صحي ههههه.
| Quote: المريخابي بتاعك ده قولى أظهر |
المريخابى بتاعكم صار بتاعكم اكتر من بتاعنا..ههههه
يعنى متواجد محل الرئيس بنوم والطيارة بتقوم عملات حبوبة الله يرحمه .....اكتر من هنا عشان كدا بتاعكم .
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: د.محمد بابكر)
|
...نصوص تاج السر (محايثة) للجنون، مثل تصاويره التى هي الجنون عينه
أرهقتني هذه الظاهرة، ظاهرة أنك حين تكتب تصور بكتاباتك، وحين تصور تكتب بتصاويرك
هل هذا إمعانأ فى الالتباس، أم هروبآ من (سجن ) التأطير، أم هى محاولة لفتح (القاموس) على تعريفات جديدة
مفادها: أن الكاتب (الكاتب) مصور فى الأساس، والمصور (المصور) كاتب بطبعه وطبيعته...غير بعيد عن هذا، حينآ بعد
حين أجلى النظر هناك فى (سودان فور اول) وأتلصص عليك وانت (متورط) فى كتابات بازخة، وحينآ بعد حين،أتلصص على تصاوريك
المنثورة فى (اليوابس الاسفيرية) ،تدهشني العبارات بمقدار دهشتي(للإقتناصات)....! وفي كل حين تتواسع جغرافيا السؤال، هل الكاتب مصور بطبيعته
أم أن المصور كاتب بسجيته....؟
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: خالد خليل محمد بحر)
|
Quote: ..نصوص تاج السر (محايثة) للجنون، مثل تصاويره التى هي الجنون عينه
أرهقتني هذه الظاهرة، ظاهرة أنك حين تكتب تصور بكتاباتك، وحين تصور تكتب بتصاويرك
هل هذا إمعانأ فى الالتباس، أم هروبآ من (سجن ) التأطير، أم هى محاولة لفتح (القاموس) على تعريفات جديدة
مفادها: أن الكاتب (الكاتب) مصور فى الأساس، والمصور (المصور) كاتب بطبعه وطبيعته...غير بعيد عن هذا، حينآ بعد
حين أجلى النظر هناك فى (سودان فور اول) وأتلصص عليك وانت (متورط) فى كتابات بازخة، وحينآ بعد حين،أتلصص على تصاوريك
المنثورة فى (اليوابس الاسفيرية) ،تدهشني العبارات بمقدار دهشتي(للإقتناصات)....! وفي كل حين تتواسع جغرافيا السؤال، هل الكاتب مصور بطبيعته
أم أن المصور كاتب بسجيته....؟
|
يا ود بحر
لا أملك غير أن أحمل مداخلتك وساما
و أبلغك شكري وتقديري
تساؤلاتك عميقة الغور، وهي من نوع التساؤلات التي يصعب فك ارتباطها
و الكتابة تتقمص الانسان بكل أحوالها، و التصوير و الرسم وكل أنواع الفنون.
لك تحياتي
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: د.محمد بابكر)
|
يا دكتور محمد بابكر
فال الله ولا فالك، أقوم أمشي أدس اللوحة الكلاسيكية ولا كيف؟؟؟ هههههه
ولا أجهز بحث في حقيبة الفن؟؟؟ الشاعر ماقال ينوحن لى، قال ينيييييحن لى ههههه
و التنوحات هي شدر كلن بقوم في امدرمان جنب سكة الترماي....
كيفك ياخي و اشواقنا
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: جعفر محي الدين)
|
جعفر محي الدين الصديق
Quote: دائما تلامس عصب المتعة المهجور في دواخلنا
المهم اتنبأ أن تكون كتاباتك أحد أهم المصادر
لكتابة تاريخ الهجرات السودانية المعاصرة |
و الله من حسن ظنك، وأتمنى أن أقدر على عكس هذه الميلودراما
دون مساس بمشاعر أحد.
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Farahat Sayed)
|
يا خى ليك وحشة
والله الطرح جميل من زول اجمل ومتخصص فى البنى كجه ,وانا سيد وجعه وداير شورتك فى حفلاتنا لاهلنا فى اى حته داخل وخاج السودان فى الجماعه البجو مكان الحفل ويتمركزوا بره قدام مدخل الحفل واياديهم فى جيوبهم وقاشرين ومتريحين وفى واحدين وازنين كمان , الجماعه ديل من كترهم لو خشوا الحفله بعادلوا قصة ما جابت دى . فى انتظار فتوى منك
حاجه تانيه او اكتر نقارنها بى حالتنا , السنة الفاتت ناس السفارة الاثيوبية فى السودان عندهم احتفال وجابو اربعه فنانين مشهورين والفنان قمر ده جابوهو من كندا للحفل ده وقاموا نظموا ثلاث حفلات فى ايام متتاليه بنفس الفنانين الاربعه وقدموا لى دعوة للمشاركة فى الحفلة الاخيرة كصديق للسفارة وكانت التذكرة بى 15 جنية سابقا 15 الف جنية والله مسرح نادى الضباط كان مليان لامن مدفق ناس فى الحيط ناس واقفة وناس اتحبسوا داخل حلبة الراقص فمارسوا مهمة من يشغل هذا الموقع حتى نهاية الحفل , وكل الحفلات كانت بنفس الحضور ومافى زول واقف بره الحفلة والحفلات كلها جابت بدليل ابتسامات الرضا المرسومة على اوجه منظمى الحفل, ولما اقارن بحفلات الاستاذ محمد الامين المامكن تشوفو اصلا فى الشارع يا فى نادى الفنانين او المسرح وتذكرتو ب 10 ج والحفلة تكون زى المغامرة يا جابت يا خابت والناس الواقفة برة اكتر من الخشوا جوه والاستاذ محمد الامين دائما فى كامل ابداعه .
السنة المضت كنت فى بريطانيا بدعوة من الاحباب بمدينة برمنجهام فقط لحفلة واحدة ولكن بعد ذلك توالت الدعوات لغاية ما بقىت عدد الحفلات الاقمتها 10 حفلات رغم تقارب المناطق التى قامت بها الحفلات من بعضها البعض واطول مسافة بين حفل واخر تقريبا ساعتين ,اقارن هذا بمطرب اثيوبى اقام حفلة واحدة بس فى لندن وكل اهلنا الاحباش كانوا حضورا مذهلا ومافى زول كان واقف برة واكيد الحفلة جابت وما خابت
فى ليبيا شاركت معى الزميلة سمية حسن (المريضة فى القاهرة الان ونسال لها عاجل الشفاء) فى حفلات بالجاهيرية دعما للمدرسة السودانية ببنغازى وفى الاجتماع التفاكرى كان الاجماع التركيز على دعوة اخوتنا التشاديين لضمان نجاح الحفل لانهم بجوا وبخشوا طوالى وكمان بختو نقطة للفنانين (وقد كان) والكلام استفزانى مش عشان اخوتنا التشادين وانا بقدر امتدادنا معاهم الاثنى والتداخل فى مناحى كتيرة وشايف جابت ليها (زواج استثنائى) ولكن موقفى كان انو السودانين هم ناس الوجعه وهدف المشروع كفيل بانجاح الحفلات نسبة لكثافة عدد السودانين وظروف تعاملهم ووظائفهم المميزة اكتر من التشاديين
اخى التاج ده قليل من كثير , وانحنا بنعانى وكل الارتباطات خارج السودان والله ما بتغطى معانا لكن على الاقل انا اقبلها من باب التواصل مع جماهيرنا اين ما وجدت واقلاها نلقى الناس حضور يعنى ما معقول مثلا كل العدد ده من الجالية السودانية فى منطقة واشنطون وفرجينا وتلقى سعه الصالة المؤجرة 300 او 400 شخص وناس واقفة برة او الجو بارد او المطرة نازلة او الجية المتاخرة فى نهاية الحفل وتبقى التحانيس لتمديد الحفل والغالبا تنهى بدفع ايجار اضافى لاصحاب الصالة ودى بالذات قاعدة تحصل فى كل حتة بره السودان لامن اشتهرنا بانو السودانين باجروا الصالة مرتين للحفل الواحد
كيف الكلام ده افيدونا يا عيال مدنى
وتحياتى لحفل الجالية السودانية بمدينة العين بالامارات العربية لهذا الحضور المشرف يوم 13 يناير 2012
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Munir)
|
تاج حبيبي واخوي الصغير
الكبير الفهم
يا اخوي بقت في اي حتة ما بتجيب
العازفين وحق السكن والاعاشة
والصالة وبتاع الساوند وبتاع الحافلة
وتذاكر الطيران
وعادات السودانية البايخة عايزين يخشو ملح
تجيب كيف الحفلة ما بتجيب
وريني واحد في الفترة الأخيرة حفلتهم جابت
ما بتجيب
محبة ومودة
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: محمد سنى دفع الله)
|
أخوي الكبير السني ( الكتوف ما بتتلاحق مع قاماتكم)
زي ما قلت لعمر احساس، جيبان من الفن ده الا تستخدم اسلوب موسيقار الاجيال اطال الله عمره (وردي)
و تسمع ستين الف قصة عن لؤمك و مساختك و طمعك، المادة الفنية مهما تجتهد فيها ما بتقيم تقييم صحيح
و الفنان لو ما لقى التقدير المادي ما بمشي لقدام كضب ما تقولى الفن للفن و البتاع، خششان الملح ده مرات
بيحسسك بانو مجرد حضور الزول ده زااااااتو مفروض القنان يفرح بى، مجرد الحضور شرف للفنان، و سبب من اسباب تدني
الفنون في بلادنا، هو احجام كثير من الناس (ولا اقول كلهم فهناك في بلادنا من يدعم الفنانين بلا حدود)
نقول هو عدم الدعم المادي للفنان، و النهب المسلح للتراث الفني دون وازع، و التكسب المستمر منو، وده من اسباب عزوف
الناس عن دعم الفنانين في اعتقادي. بالنسبة ليكم ناس المسرح، فانتاجكم الفني يحتاج في إنتاجه لأمكانيات بلاشك
وزمن للتحضير وشيل وخت، وبعد ده يمكن يجيب و جايز ما يجيب
الشغلانة مشربكة.... وكتير من الأحيان... محبطة.
لك مودتي
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Munir)
|
يا منير سلام
Quote: والله يا ملك ماعارفين نقول شنو !.. تتحسس تفاصيل صغيرة وتخلق منها صور حياتية حقيقية مدهشة بمهارة فائقة !! ..
ننتظر مقالاتك بفارغ الصبر .. ما تطول الغيبة .. |
انشاء الله كلما نلقى فرقة بنجي، اليومين دي مشغول باصدار الكتاب التاني اجعى لينا بالتوفيق.
تحياتي
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: عمر احساس)
|
عمر احساس يا فنان
مشتاقين و الله يا بني كجة يا أصيل
إنت عارف أنا ح ابدا من قصة النقطة دي
مرة أخت من تشاد أيام حفل سراج العروبة، قالت لى انتو بتلبسو العمم الكبااااار دي و ممنجهين
تخشو تهزو و تنبسطو لكن بخلا يدكم ما بتخش الجيب تطلع حاجة للفنان، طبعا ما قدرت أشرح ليها طبيعتنا كشعب
لكن مرة في اخ سوداني مطرب يبدو انو الناس في لحظة هوشة كده رمو نقطة و الدولارات ملت الواطا و صاحبنا انبسط
أها لمن لماها بعدين طلعت عشرين دولار فكة هههههه
عموما الفن في السودان تاريخيا ما بتشاف على ضوء كونه عمل يجازى فاعله على فعله، يعني التشكيليين ديل قليل ما يبيعو أعمالهم
و الباقي هدايا وفرجة مجانية، و التمامة تربيت علو الضهر، و الفنان دايما ما بيحتاج الى وظيفة بالجنبة، و الغناء المسجل بتلحس عادي
من النت ومن مصادر تانية متعددة بدون ما الناس تشتريه من الفنان حتى يجازى على مجهوده الفني و يتكسب منه، وده ادى إلى ان الفنانين
اصبحو ما بتعبو فب التجديد، يشيلو من الغنا المراحيم الهوبلي، لأنو أصلا مافي ماركت، بالمناسبة انا احي فيك أنك من القلائل العندهم أعمال خاصة
الكلام كتير بواصل فيه انشا الله
تحياتي لك و للاسرة
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Farahat Sayed)
|
يا فرحات يا مريخابي .. في زول عاقل يجي يقول أنا مريخابي على الملأ؟؟؟
أرشكم؟؟؟؟
غايتو بالجنبة كده، حليفة بيل كلينتون دي قوليهم خلوها.
Quote: يسال منك الخير لكن يوم بتشرطنا بالضحك
|
لحقنا خروف خروفين قبال الشرط يحصل
تحياتنا ليك و للبنسلفانياب
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Tagelsir Elmelik)
|
Quote:
وقد اشتهر أحد المطربين عندنا في هذه الأصقاع، بحرصه على أمر (الجيبان)، فكان كلما صعد على خشية المسرح، ركز بصره على المدخل حيث تباع التذاكر، يعد القادمين فرداً فرداً، و عقله يعمل عمل حاسبة الكترونية تضرب في عشرين دون توقف، حتى إذا أدرك من المال ما يعتقده ربحاً، صاح ملء رئتيه:
أودعكم... أفارقكم.. لا لا لا لا أنا مابقدر....
|
شكيت محنك على الله يا تاج السر
لكن عليك الله والنبي والرسول والقطاعة كدي كان ما وريتني الفنان ده منو وسرك في بير يا الملك...
ده وعد..............
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: جمال الباقر)
|
جمال الباقر تحياتي
تحياتي و سلامي
سيف ده إلا يأكد لى أنو جهاز قياس الحسادة بتاعو عاملو (أوف) هههههه
نحنا يا زول بنعمل عمل الله و الباقي ضرائب
واحد مصري قال السودانيين مفلسين لأنهم لمن يمشو يستلمو الماهية بقولو ماشين (نصرف)
و نحنا بنقول ماشين (نقبض).
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Azhari Nurelhuda)
|
أبو الزهور
هههههههههه
Quote: شكيت محنك على الله يا تاج السر
لكن عليك الله والنبي والرسول والقطاعة كدي كان ما وريتني الفنان ده منو وسرك في بير يا الملك...
ده وعد..............
|
الواحد ما يألف أصلو؟؟
و الله الا تدفع ... تجيب.
تحياتي ليك و للأصدقاء يهناك؟
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Tagelsir Elmelik)
|
عمر إحساس :
Quote: الجية المتاخرة فى نهاية الحفل وتبقى التحانيس لتمديد الحفل
والغالبا تنهى بدفع ايجار اضافى لاصحاب الصالة ودى بالذات قاعدة تحصل فى كل حتة بره السودان
لامن اشتهرنا بانو السودانين باجروا الصالة مرتين للحفل الواحد |
يا لدقتك ايها الفنان الراقي الإحساس ، التي ضاهت دقة تاج الكج في فضح عمايل بني كجة
وسبر أغوار الحسد
إنتو قايلين بلدنا دي إتنكبت بالساهل ؟
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: أبو ساندرا)
|
الاخ تاج السر
شكرا على السرد الممتع في وصف اغوار الشعب السوداني الابي
والله الشعب ده يحير لا تجاوزه للمحيط بيغيره ولا تجاوزه للبحر الاحمر كذلك
اتذكرت في دول الخليج قبل سنوات ، تلقى مجموعة من الناس عندها بحماس وهمة منقطعة النظير هواية اطلاق اشاعة ( والله الايام دي موقفين تجديد اقامات وتأشيرات السودانيين ) واذا ربنا عتر لزول وقال ليهم ( والله يا جماعةامبارح دي جددت اقامتي ) طوالي بتلقا حالة الوجوم والزعل والدخول في مغالطة ( لالا بس بتكون معاملة قديمة قبل صدور القرار)!!
غايتو نحنا شعب تحفة
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: maia)
|
تاجنا
و الله تباري بني كجة ديل يجيبو ليك ( الصمرقع )
كان جابت يغالطوك
و كان ما جابت يغالطوك
......
نصيحة مجرب
ارفع سعر التزكرة و جيب سيكورتي مااانع
و الداير يجي بجي لي الاستماع و الاستمتاع في ليلتة تلك
و بتجيب
في ناس كويسة
بس جماعتك ما مدنهم طريقة
تحياتي
ياسعادتك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: حسن سنادة)
|
يا ود سحس
Quote: اتا البوست دا جاب و لا ما جاب، دي طبعاً حسابات تانية
طبعاً بوستيك دا يا خال زي دخول الحفله ملح، قروهو 2255 زول والردو 65 يعني انت تغني في اودع اودع اودع كيف وما عارف الجماعه خاشين ملح |
يا حاسدين غرامنا
تحياتي
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: نصرالدين صلاح)
|
يا نصر الدين
(الصمرقع) جه من مخلفات عبد العزيز، رطانة دناقلة لفحتها في اليوم داك؟؟
في الغدا تكون اكلتها وما حاسي
رفعان التزكرة بجرو البطانية وعلى الدنيا السلام
لكن و الله اشهد بانك داعم لكل الانشطة الفنية
ربنا يوفق الجميع انشا الله
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: maia)
|
سلام يا مايا
| Quote: اتذكرت في دول الخليج قبل سنوات ، تلقى مجموعة من الناس عندها بحماس وهمة منقطعة النظير هواية اطلاق اشاعة ( والله الايام دي موقفين تجديد اقامات وتأشيرات السودانيين ) واذا ربنا عتر لزول وقال ليهم ( والله يا جماعةامبارح دي جددت اقامتي ) طوالي بتلقا حالة الوجوم والزعل والدخول في مغالطة ( لالا بس بتكون معاملة قديمة قبل صدور القرار)!! |
هههههههه
دي الغتاتة اسمها، المضرة.
مافي شعب على ظهر البسيطة ما بيعاني من العلل الزي دي، لكن مشكلتنا انو نحنا عللنا ممزوجة بطيبة وعفوية
و عولاق سياسي مافي منو غير في نيجيريا. وهجرات و اشياء أخرى
تحياتي
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Tagelsir Elmelik)
|
الموجب ... نحن بنفكر في الترفيه والحفلات بى فكرة الموجب ...
تمشي عرس ولاّ طهور ... وتتعامل بنسق المجتمع العشائري المشاعي المستريف ... تتلقى كرم المضيف من طيبات ولهو ولعب ومباشرة وحت شديد ... وانت مارق تدعو ليهم بالعمار الدائم ... وتعصر الفيها النصيب في الكشف ... لو عزا برضو تتلقى الشواهي وتتقهوج زي العجب بعد تكشح ليهم الفاتحة ... في الـ Exit تعصر الفيها النصيب ...
أي سوداني عندو بند مجاملات في ميزانيتو ... لاكين ما عندو بند ترفيه ... رغم انو كل خميس هو حاتي اللعب في خيمة ولاّ صالة ...
فما تعمل حفلة تجارية بنسق مدني حديث وتتوقع انهم يغيّروا مفهوم الجية بتوقع كرم الضيافة والحت غير المدفوع ... تخت ليهم تربيزة في الـ Exit وتقول ليهم حبوبة بتاع الساوند نفساء ... حق لبن ساي تجيب جيب السنين ...
الزول لامن يعمل بزنس بيراعي الكلشر ... حسب نصيحة ست فول حاجّات في المينا البرّي ...
... المهم ....
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: تبارك شيخ الدين جبريل)
|
الله يجازيك و يجازي مرجعيتك ست الفول
Quote: فما تعمل حفلة تجارية بنسق مدني حديث وتتوقع انهم يغيّروا مفهوم الجية بتوقع كرم الضيافة والحت غير المدفوع ... تخت ليهم تربيزة في الـ Exit وتقول ليهم حبوبة بتاع الساوند نفساء ... حق لبن ساي تجيب جيب السنين ...
|
والله ما نصيح بحليفتا
ونقوليهم الفنان داير حق الكفيل؟؟؟
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Tagelsir Elmelik)
|
Quote: حبوبة بتاع الساوند نفساء ... حق لبن ساي تجيب جيب السنين ...
الزول لامن يعمل بزنس بيراعي الكلشر ... حسب نصيحة ست فول حاجّات في المينا البرّي ...
... المهم .... |
لووووووووولز ياتبارك خلاص خليهم يضيفوا على دعاية الحفل جملة توجد واحدة نفساء بس مايجوك شايلين المديدة عينيا
بوست ماشاء الله جايب حقو وزيادة لكن العادة دي ليست مقصورة على البني كجة بس ياخي هنا لو ركبت مع بتاع تاكسي ساكت ممكن يسالك من راتبك وبدل السكن وبتوفر كم ؟
تحياتي
زاتوووو
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: ALZOLZATOO)
|
يا زول يا زول
| Quote: لو ركبت مع بتاع تاكسي ساكت ممكن يسالك من راتبك وبدل السكن وبتوفر كم ؟ |
ههه ياخي انتو قالو زمن الجوابات داك، الصواميل لمن تفتح الجواب بمدو راسن يقرو معاك
مشيت اشتريت حلبة لزوم دفعية الحفلة الجاية و رطل غرنجال و كركار
تحياتنا
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Mohamed Moatasim)
|
محمد المعتصم الشوق بالميغابيكسيل
Quote: غايتو اخوي التاج ما عارف لو ( الغربه) جابت واللا ماجابت معاكم ؟
لكن هنا في السودان وحاتك ....انا شغال لي 18 سنه ( لاجابت حق مريسه تام زين ) ..... ولا بقيت مساعد او مستشار لرئيس الجمهوريه. |
طمنطاشر يا مفتري
كدي امشي جنب النقل الميكانيكي وأسال أعمامك (جدودك) البتلقاههم داقشين بهناك، في واحدين شغالين من التركية السابقة تقولي طمنطاشر؟؟
طمنطاشر دي قضوها سيجة بس و غلاط، التمباك السفوهو بس سلة غذاء عالم ..... تقولي طمنطاشر.
سلام شديد
الملك
| |
|
|
|
|
|
|
|
|
|
Re: جابت..؟ ما جابت. تاج السر الملك (Re: Tagelsir Elmelik)
|
سلامات يا تاج
ياخي واحدة من الحاجات المحيراني انو السودانيين ديل يطلعو ليك من السودان دا زهجانين منو زهج شديد وبعد سك ولهاث خلف اللجوء وغيرو ،
بعد شوية كده تلقي الجماعة جابو السودان ذاتو معاهم !
قلت لي السؤال الاول جابت والا ما جابت ؟
ياخي في سويسرا مرة مشيت لي سودانيين لقيتهم فاتحين القناة السودانية وبحضروا في فلم اجنبي مترجم !
غايتو المجتمع السوداني محتاج ناس كتابين زيك كدا كتار للتوثيق للحاجات دي اولا وللاشارة بطريقة ضمنية لتفردنا كناس في هذا العالم .
مودتي التي تعلمها .
| |
|
|
|
|
|
|
| |
Tagelsir Elmelik
فتحي الصديق
سيف النصر محي الدين
Asma Abdel Halim
Afraa Sanad
حسين نوباتيا
معتصم الجعيلي
Nagat Sid Ahmed Elshiekh
معتصم مصطفي الجبلابي
الفاتح ميرغني
محمد أبوالعزائم أبوالريش
ناصر البطل
Sayed Bekab
محمد زكريا
جعفر محي الدين
د.محمد بابكر
خالد خليل محمد بحر
Farahat Sayed
عمر احساس
Munir
محمد سنى دفع الله
Azhari Nurelhuda
جمال الباقر
أبو ساندرا
نصرالدين صلاح
علي جلاس
Rawia
تبارك شيخ الدين جبريل
Adil Hamza
ALZOLZATOO
Mohamed Moatasim
فيس بوك
تويتر
انستقرام
يوتيوب
بنتيريست