|
|
 نرجع لموضوعنا الأساسي: هل سيمر الربيع العربي على السودان؟
|
و الحقوق لأومو...
غض النظر عن من فاز و من خسر و كونه علي محمود ضعيف و حاج ماجد كاذب
ومنو غلب منو عشرة كم و منو طقطق منو وما ادراكا ما فيصل القاسم
السؤال الرئيسي الذي في تقديري فشلت الحلقة - و غيرها - في الإجابة عليه
هل السودان على اعتاب ربيع عربي ؟
إن كان "نعم" فلماذا؟
ما هي المظاهر و الدلالات التي تقود للإجابة بنعم؟
الاسباب متوفرة وكلنا عارفنها و نظريا مفروض نكون ربّعنا زمان واسي داخلين على الصيف
يبقى السؤال هل بدأت نسائم الربيع و اين وكيف هي
وإن كانت الإجابة بـ "لا" فـأيضا لماذا؟
|
|
  
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: ABUHUSSEIN)
|
هلا ياعمك
ونعم السودان سيمر به ربيع التغييرالذي يشهد المنطقة والعالم عموما
وعشان اجاوب باسهاب من الضروري اولا معرفة لماذا الربيع التغييري وماهي اسبابه بصورة عامة وبعدها ح اجي انزل الاسباب دي علي الحالة السودانية
الكركبات دي قامت علي انظمة القاسم المشترك بينها هو الاتي
1- الشمولية(سطوة الحزب الواحد)
2- قمع الحريات
3- الفساد
4- طولة فترة بقاء النظام في الحكم
5-تنامي الوعي بالحريات والحقوق في الجيل الشبابي
6-العطالة
7-تهميش الاقليات سوي كانت دينيا او اثنيا او جهويا
ولفة كده وح اجيك واعمل ليك اسقاط ماركيتر علي الحالة السودانية ونشوف
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: عبدالكريم الامين احمد)
|
سلام يا محمد
كما تم ذكره أعلاه كل الظروف الوضوعية للثورة موجودة
المفقود الجانب التنظيمي والقيادي البقوم بالتعبئة ورفع الصوت المجاهر بالثورة
التعبئة تعني التضحية والتضحية تعني التعرض للملاحقة والسجون وربما الموت
شيء تاني لقيام الثورة لا بد من وجود اتفاق تام بين كافة القوى التي تنشد التغيير
والحاجات دي بكل أسف ما موجودة أو في مرحلة تكوين بطئ
لو المفقودات دي اتوفرت بالتأكيد ستقوم الثورة
وسيأتي الربيع الطلق يختال ضاحكا من الحسن حتى يكاد أن يتكلما
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: جمال الباقر)
|
الذي يغفله المعارضون المتحمسون لقيام ثورة في السودان ان نظام الانقاذ ليس مثل بقية الانظمة التي انهارت في المنطقة او علي وشك , الانقاذ لم تكتفي بانها حكومة ادارية تدير السودان وتسيطر علي موارده وتتصرف شأنه مثل بقية الحكومات في المنطقة , الانقاذ انفردت بانها امتلكت ما اطلق عليه " مشروع حضاري " هذا المشروع فشل او نجح ليس محور الحوار الان الا انه قد قام بتفريخ جيل سوداني جديد رضي الاخرين ام ابوا جيل يدين للانقاذ بالولاء تربي في حضنها حينما لم يجد سوي حضنها لانه لم يكن هناك سوى الانقاذ ففي بدايات نشأ هذا الجيل كانت البلد خالية من المعارضة تماما ونجحت الانقاذ في خلق عداوة بين هذا الجيل والمعارضة بمثل معارضة الفنادق والعملاء ... الخ جيل تربي وهو يغني وينشد اهزوجاته في قدح المعارضة ورموزها , جيل رضع من ثدي ثقافتها وقيمها واخلاقها اتفق الناس حولها او اختلفو الا انه الجيل الذي نشأ متصالح جدا مع الانقاذ هذا الجيل اما يدين بالولاء الكامل للانقاذ او هو غير مكترث اصلا للامر ولا يفرق بين الانقاذ ومعارضتها يرى الجميع سواسية والامر في النهاية لا يهمه اي امر السياسة , وللمناسبة هو الجيل الذي يعول عليه في القيام بهذا التغير المنشود , ومن ناحية اخري خلقت الانقاذ طبقات طفيلية واسعة جدا مستفيدة من الوضع الكائن حينما استوعبتهم وخلقت الظروف المناسبة لضمان دخولهم في العجلة القائمة والدفاع عنها لان الدفاع عنها هو دفاع عن بقائهم .
لذا اعتقد ان الربيع العربي وان كانت اسباب قيامه في السودان كائنة الا ان الذين يقومون به خارج الخدمة حاليا
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: اساسي)
|
الذي يغفله أساسي أن الجيل ده حيكبر و حيكتشف اللعبة!!
ايه رأيكـ يا أساسي إنو الجيل ده هو الحيسقط الإنقاذ بالقاضية !!!
جيل أتربي على إنو المستقبل مشرق و خالي من الفاسدين و الخونة و العملاء بس لما حيكبر شوية و يجيهو شوية وعي حيكتشف إنو مافي خونة و عملاء و فاسدين إلا ناس الإنقاذ زاتهم و إنو كل ما وعدو به من خير كان مجرد أكاذيب و خداع ..
شوية بيطلع واحد يعترض و بعد شوية يبقو أتنين و بعد شوية الشارع يتملئ و هكذا تصنع الثورات ..
يا حبيب كلنا أتربينا في عهد الإنقاذ وينو خيرهم الوعدونا بيهو زمان داك ؟؟
| |
|
|
|
|
|
|
|
|
 Re: نرجع لموضوعنا الأساسي: هل سيمر الربيع العربي على السودان؟ (Re: اساسي)
|
ود البشرى يا لايوق..الجماعة ديل كلهم زايغين من موضوع الحلقة وانت مصر تعيد السؤال
انا عملت سيرفي في اجازتي الفاتت دي..عشان اعرف الناس دي صابرة ليه على الحاصل دا..
لا يتناطح وعلان على انو كل الاسباب والمقومات بتاعت الثورة الشعبية متوفرة في السودان
لكن في عوامل بتخلي الخيار دا غير مطروح حاليا..قول لي ليه..اولا..
الحكومة دي عملت حركتين في شكل وردتين : الحصل يوم وفاة الزعيم جون قرنق والحصل يوم دخلت
حركة العدل والمساواة الخرطوم.
يوم وفاة جون قرنق ما كان في اي قوات امن في الشوارع اليوم الاول ..عشان شنو؟ عشان الحكومة عارفة
انو الجنوبيين حيكون رد فعلهم عنيف وخصوصا انها ما طلعت اي معلومات عن الحادث وافسحت مجال للاشاعات
حصل شرخ كبير داخل الشماليين في الاثنين الاسود وشافوا الحد الممكن يصلوهوا الجنوبيين في خصومتهم
للشماليين( الاحداث والقتل البيحصل في الجنوب ايام حرب الجنوب كان كلو سماع اضان والناس ما عاشتوا
واقعيا..وليس من راء كمن سمع) يبقا الكراهية الكانت من الجنوبيين تجاة الشماليين(عندهم اسبابهم المنطقية)
بقت من الطرفين وبالتالي الحكومة ضمنت انفصال سلس لا بواكي عليه الا من قلة (انا من القلة دي)
جينا لقضية دارفور..معظم الناس في بداية الالفينات كانت واقفة قلبا وقالبا مع الثوار في دارفور لكن المصيبة
الاسمها سايبر دي نجحت تماما في انها تشوه الحركات دي لانها ورت الناس انو في ثوار من دارفور بيحملوا كل
الشماليين مسئولية الظلم الواقع عليهم من الحكومة..دا ما بينفي انو الشماليين حقيقة عنصريين..لكن دا ما
موضوعنا هسه لانو العنصرية دي في دم معظم البشر..بس الحكومات هي المفروض تكون مسئولة من ردع العنصريين
والتزامهم بسلوك حضاري تجاه الآخر..يعني الزولة البريطانية القعدت تنبز في الزنوج والهنود في المترو اتقدمت
لمحاكمة ومافي زول اتعرض ليها لانهم عارفين مافي زول فوق القانون..اها نحنا حكومتنا الرشيدة قررت تعمل بعبع من
الحركات الدارفورية ومن اهلنا في غرب السودان عموما ..الزاد الطين بلة انو الحركات دي اصولها اسلامية والناس
كارهين الكيزان..والمعارضة متمثلة في حزب الامة والاتحادي الديمقراطي..افعالهم تحير الما بيتحير
والشعب لسان حاله بيقول: حنطلع من حفرة نقع في دحديرة؟
عشان الشعب يتحرك لازم الحركات المسلحة في دارفور والناطقين بلسانها رسميا وشعبيا يحاولوا يمايزوا الصفوف
ما كل المدردم طماطم وما كل الشماليين جلابة..ومفروض الشماليين يعترفوا بانهم كانوا في يوم من الايام
فعليا مستعبدين غيرهم ولغاية الان في مجموعة في عقلها الباطن مختزنة ومتبنية التفكير دا فالمطلوب
منهم يحتفظوا بتفكيرهم دا جواهم وما يكون عندوا اي ناتج في ارض الواقع ..ولو مشوا لمعالج نفسي
بيكون عملوا خير لنفسهم..
المعارضة مفروض تعرف انوا البتعمل فيهو دا لعب على الحبلين والناس كاشفاهم .
الوضع الان محتاج كيان جديد من داخل الشباب ..يطرح افكار للتغيير يضم كل المظلومين في كل السودان (الفضل)
ما يجي زول يقول التهميش اكتر في الغرب ولا في الشرق..السودان دا كلو مهمش حتى عاصمته مهمشة..
لو حصلت ثقة بين المهمشين..بيليف مي الربيع العربي دا بيحصل باسرع مما نتصور.. وحتى
اشعار آخر الحكومة شغالة بنظرية فرق تسد وتراهم سايدننا ومبسوطين
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: اساسي)
|
| Quote: لذا اعتقد ان الربيع العربي وان كانت اسباب قيامه في السودان كائنة الا ان الذين يقومون به خارج الخدمة حاليا |
للأسف المشهد الحالي لا يبشر بأي ربيع .. ما أراه الآن هو مزيد من السقوط لهذا الوطن
لا أرى إلا العنصرية تتجذر كل يوم في جسد هذا الوطن ببطء ولكن باصرار كالمرض الخبيث
وإذا حدث أي تغيير فحتما سيكون للأسوء
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: جمال الباقر)
|
Quote: ما هي المظاهر و الدلالات التي تقود للإجابة بنعم؟
الاسباب متوفرة وكلنا عارفنها و نظريا مفروض نكون ربّعنا زمان واسي داخلين على الصيف
يبقى السؤال هل بدأت نسائم الربيع و اين وكيف هي |
الأخ محمد البشــرى
اقـول لك نعـم , نحن مقبلون على ربيع ســوداني خالص
و بما انك قـد ســألت عن المظاهـر فهي كالآتي :-
1 / ضـعف و وهـن عام أصاب النظام ( حكومة و حـزب )
و مظاهـره كثيرة
2 / تحـرك و مـد وســط جماهير الشــعب الســوداني ( النقطة دى فيها كثير من التفاصيل )
ويبدو ذلك جليا في
أ / تصاعـد حركة الشـباب ة تنظيم أنفســهم ( شـرارة , قرفنا ) , برغم محدودية حركتهم
2 / تجمـع مزارعي الجزيرة و مواجهة مخططات الحكومة .
3 / تزايـد مظاهرات طلاب الجامعات ( نيالا , كسـلا , القضارف , الخرطوم .........الخ )
4 / نجاح بعض الاعتصامات و الاضرابات الفئوية والجماهيرية و آخرها اعتصـام المناصـير
و ما سـوف يتركه من أثـر و ســط الناس تنظيمي
5 / التململ و صــل حتى اعضاء و جماهير المؤتمر الوطني ( مذكرة الـ 1000 ايا كان مصدرها
و صحتها من عدمه فهي مؤشــر على أن ازمة النظـام اعمـق مما يتصورون )
كل هـذه المظاهـر تدل على ان الشــعب السـوداني سـائر في طريق تنظيم عمل جماهيري ضاغط
وبشــدة على النظام , الأزمات تركت أثرها على الناس
.......................
........................ الخ
وعلى رأس كل ذلك عجـز الحكومة / المؤتمر عن رؤية آفاق الحـل بعـد هذا الزمن الطويل
3 / العمـل المســلح ( نختلف أو نتفق معـه ) فهـو من مظاهـر الربيـع السـوداني
1 / حرب جنوب كردفان و النيل الأزرق و
2 / حرب دارفـور التي لم لن تجـد طريقا للحـل من خلال اتفاق الدوحـة
3 / عـدم الوصول لحـل مع الجنوب في القضايا العالقة واحتمال انفجار صراع الحدود و الـ 5 مناطق
المتنازع حولها , مما يزيد من ضـعف الحكومة ( وإن كان ناس المؤتمر يظنون العكس
العمـل الجماهيري المتصاعـد و العســكري المســتمر ســيؤدي
الى ربيـعنا و خـريف مبشـــر
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: عبدالله احيمر)
|
| Quote: الانقاذ انفردت بانها امتلكت ما اطلق عليه " مشروع حضاري " هذا المشروع فشل او نجح ليس محور الحوار الان الا انه قد قام بتفريخ جيل سوداني جديد رضي الاخرين ام ابوا جيل يدين للانقاذ بالولاء تربي في حضنها حينما لم يجد سوي حضنها لانه لم يكن هناك سوى الانقاذ ففي بدايات نشأ هذا الجيل كانت البلد خالية من المعارضة تماما ونجحت الانقاذ في خلق عداوة بين هذا الجيل والمعارضة بمثل معارضة الفنادق والعملاء ... الخ جيل تربي وهو يغني وينشد اهزوجاته في قدح المعارضة ورموزها , جيل رضع من ثدي ثقافتها وقيمها واخلاقها اتفق الناس حولها او اختلفو الا انه الجيل الذي نشأ متصالح جدا مع الانقاذ هذا الجيل اما يدين بالولاء الكامل للانقاذ او هو غير مكترث اصلا للامر ولا يفرق بين الانقاذ ومعارضتها يرى الجميع سواسية والامر في النهاية لا يهمه اي امر السياسة , وللمناسبة هو الجيل الذي يعول عليه في القيام بهذا التغير المنشود , |
الأخ اسـاسي
الجيل الذي تتكلم عنـه هـو نفس الجيل الذي بدأ ينظم نفســو
في تنظيماته الخاصة بـه.
و شــباب الأحزاب التي عصت على المشـروع الحضاري وزيفـه
فانضمت و انتظمت في الأحزاب يســارا ويمينا
و اصبح هؤلاء يضغـطون على القيادات في الأحـزاب ( شـباب الاتحاديين ورفضهم المشـاركة ,
شـباب حزب الأمه و ضغطهم ايام الانتخابات و ايام تفاوض حزبهم مع الانقاذ ...........
........الخ )
هـذا الجيـل يكتســب وعيه من الحراك الاقليمي و العالمي ومن الداخـل
بصـورة اعمق واصـدق
بما يعايشـــه من فســاد و عطالة و تردي اقتصادي و ...........الخ
القادم أجمـل
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: عبدالله احيمر)
|
بعد مداخلة الاخ احيمر الطويلة اعلاه خلونا نقول الكلام الحار الناس قاعدة تتزاوغ منه وبتغفله في حساباتها كثيرا
بعد انفصال الجنوب وما رافقه من احداث , بعد تطور حرب دارفور وانتشار نغمة " جلابة " و " شماليين " " وعروبة " , بعد تكلتل " كاودا العرقي " وتمترس الحركات ذات الطابع العرقي خلف السلاح بعد كل هذه الاحداث والكثير من الاحداث المشابهة وجد الشمال العرقي نفسه محاصرا بين مطرقة تلك الحركات العرقية ونعراتها وما قد يودي به الي مصير السودان مستقبلا وما بين سندان الصبر علي الوضع الحالي والالتفاف خلف الحكومة لضمان عدم انفراط العقد في السودان لما يبشر به من مستقبل قاتم في حال انفراط حال البلاد , كانت الحكومة واعية جدا لهذا الامر لذا اجتهدت في الضرب علي وتر العرقية والقبلية التي تضمن لها مساندة شعبية كبيرة علي الاقل من العنصر الشمالي علي اطلاقه والشمالي هذه تشمل كل غير المنضوين تحت لواء تلك الحركات ذات الطابع العرقي , لذا ليس صبر الناس علي الحكومة لجمال اعينها وحسن ادائهاا وانما لانها المصد الاخير الذي يحتمي به السودان من انفراط العقد والذي يحول دونما وصول تلك الحركات ذات الطابع العرقي والعنصري الي مقاليد الحكم فتفعل ما قد ينبي به حالها وواقعها وطبيعتها
هذا التوتر الحادث والململة قد بدات تظهر في كثير من الاصوات والمنابر هذه المرة من الكتلة الشمالية مثل مثلث حمدي ومنبر السلام العادل والصحف الناطقة باسمه , لذا ما ان يزداد ضغط الحركات العرقية الا سيتولد تيارا مناؤا له شمالا لتحدث المواجهة في نهاية الامر وهي التي ستاتي بالسودان اسفل سافلين
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: رشا سالم)
|
| Quote: والكلام دا انا حسيتوا من كل معظم الناس في السودان.. |
سلامات يا رشا ..
ها يجو يقولو ليك دي حركات بتاعت كيزان وكلام حكومة عشان يخوفو الناس من الثوار وما عارف شنو كدا
أعتقد الثورة السودانية القادمة عندها شرطين أساسيين لو حصلو ما ها تقوم الثورة ..
1- أن تضع كل الحركات المسلحة السلاح جانبا
2- أن لا يقوم أي معارض خارج السودان بالدعاية للثورة والتبشير بها وتحديد مواعيد الخروج و..و..و..إلخ
خلونا نحن الهنا في السودان ديل بنعرف نطلع متين ونقعد متين إنتو بس نقطونا بسكاتكم
داير أفتح بوست اسميهو يوميات زول قاعد في السودان
الناس الطولت برا البلد فايت عليها كتير والله 
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: محمد عمر جبريل)
|
والله كلام رشا دا يستحق النظر إليه بجدية كبيرة جدا. فعلا الحكومة تسعى إلى تحويل المعركة إلى معركة عرقية و يعينها في ذلك الحمقى من الجانب الآخر و لو نجح هذا المخطط فلننتظر الكتاحة زي ما سماها د.بلة بدلا عن الربيع.
بالنسبة لكلام الأخ أساسي عن الجيل الربته الإنقاذ أعتقد إنه ما سليم بدرجة كاملة و إن كان له بعض الوجاهة. عن تجربة شخصية في بداية التسعينات في جامعة الخرطوم عندما استقبلت أول دفعة من خريجي الخدمة الإلزامية من طلاب الشهادة الثانوية... الكيزان كانوا معولين على الدفعة دي بصورة كبيرة على أساس إنه تمت ليها عملية غسل مخ في المعسكرات. طلاب الدفعة دي كانوا الأكثر عنفا ضد الكيزان عندما اندلع الصراع حول إلغاء السكن و الإعاشة بل قاموا بطرد الكيزان من الداخليات و الجامعة و كانوا ممنوعين من دخولهما لفترة إلى أن استعانوا بالأجهزة الحكومية و دخلوا تحت حراستها
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: محمد عمر جبريل)
|
| Quote: ها يجو يقولو ليك دي حركات بتاعت كيزان وكلام حكومة عشان يخوفو الناس من الثوار وما عارف شنو كدا |
انا زاتي بقول الكلام دا يا محمد عمر..الحكومة متربحة ومستفيدة من خلق واقع زي دا
والثوار او الناس البتتكلم بأسمهم بيوفروا للحكومة حيثيات جيدة .
| Quote: إنتو بس نقطونا بسكاتكم |
تلقاها عند الغافل..انت قايل السودان دا حقكم براكم ولا شنو؟ السودان دا لو جواك بنسبة مية في
المية اول ما تعدي الحدود بتاعتوا بتلقا النسبة دي اتعاظمت جواك وشبعت مسامك
وانت قايل السياسات الغلط دي ما معكوسة على السودانيين برا السودان؟
راجع كلامك دا يا ود جبريل..
.......
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: محمد عمر جبريل)
|
هلا بالشباب .. هلا والله ..
يخيّل لي السؤال خاطئ في تركيبه
الثورات ما بتقوم محاكاة او لمجرد ان الآخرين ثاروا
اكتوبر و ابريل حصلن لما توفرت عوامل معينة في توقيت مناسب مع ظروف مساعدة
طيب شنو الظروف الناقصة اسي
الجوع وحاصل , الغلاء فظيع, الفساد لا تنافس الانقاذ فيه إلاّ نفسها وصار شيئا عاديا
الظلم المحسوبية الـ ...إلخ إلخ
حنك اسلام و شريعة وما ادراك ما المشروع الحضاري و مسيرة قاصدة و هي لله راح زمان في رجلين المفاصلة وبقى ما بقسم
امريكا بدل تلم جدادها لمّت ملفات الاسلاميين و اخبارهم كلها وبقينا اكبر حليف ليها في حربها على الارهاب
إذن لماذا يستكين الشعب ؟ و راجي شنو ؟
من طرف اي زول تقابله يشتكي من سوء الحال و يسب و ينعّل الحكومة و الجبهجية
ويحكي ليك مليون قصة عن ظلم او محسوبية او سرقات عديل كدا عينك عينك
يعني نظريا الناس مهيئة للاحتجاج على الأقل
نعم هنا وهناك تحركات و مظاهرات و احتجاجات لكنها لا ترقى لمستوى التبشير بربيع
مع الوضع في الاعتبار شراسة السلطات في مواجهتها
هل هي ازمة قيادات ؟ ام هوالسؤال التاريخي : البديل!!
ام هي كما تفضل اساسي ورشا نتيجة لعب الكيزان و المعارضة المسلحة على وتر هامش / مركز ؟
امس علق القاسم على حديث الاستاذ علي محمود عن الثورة القادمة : في احلامك!! هل صدق ؟
وكيف الرد عليه؟
____________________________________
انتو بكري دا جنّ ولاّ يكون موّصى 
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: خالد عبد الله محمود)
|
بعد السلام
عارفين مشكلتنا في السودان بقت بين فئتين
الاتظلمو كتير
والاتظلمو كتير جداً
***
الاتظلموا كتير جداً بينظروا بعين الشك والاتهام والريبة للاتظلموا كتير ويدور في داخلهم التسأؤل( ليه اتظلمنا كتير جدا وهم اتظلموا كتير بس؟)
والاتظلموا كتير ينظرون بعين الخوف للاتظلموا كتير جدا خوفا من ردة فعلهم وان يحسبوا على الظالم
اها حتتأخر الثورة لحدي ما يكتشف الاتظلموا كتير جدا ان الاتظلموا كتير ما عندهم ذنب في اختيار درجة الظلم ويكتشف الاتظلموا كتير ان سكوتهم اكثر على ظلم الاتظلموا كتير جدا لن يكون في صالحهم
فهمتوا حاجة يا مظاليم
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: Nazik Eltayeb)
|
دخل هذا الاساسي بعد ان كتب في البحث كلمة اساسي كعادته دائما بحثا عن اي موضوع يخصه ... فاتى البحث ببوست صاحبه ود البشرى فدخل البوست وتحكر فيه وكتب فرمالته الدائمة ((انو مافي بديل والمعارضة مافي منها فايدة))
بل ذهب الى اكثر من ذلك بوصفه للجيل الذي يقوم بالثورة هو جيل متصالح مع الانقاذ ونسي تماما او تناسى ان محمد
عادل زميل البورد هو من هذا الجيل ومستعد لحرق نفسه امام البرلمان لايقاد شرارة الثورة ..... وحتى حينما فال له خالد عبدالله ان هذا الجيل سيكبر وسيكتشف سوء الانقاذ رد بقوله انا وانت كبرنا ولم نفعل شيء غير التسكع في المنتديات ..... ماذا تريد ايها الاساسي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: Nazik Eltayeb)
|
سلامات محمد البشرى و ضيوفه...
بتفق مع رشا و اساسيى تماما فى موضوع لعب الكيزان بموضوع الجهوية و العنصرية.لكن خلينى اعلق على كلامك ده:
Quote: الجوع وحاصل , الغلاء فظيع, الفساد لا تنافس الانقاذ فيه إلاّ نفسها وصار شيئا عاديا
الظلم المحسوبية الـ ...إلخ إلخ |
اللى ح اقوله الان ممكن يزعل منى اغلب الشعب السودانى ...لكن نعمل شنو؟؟دى الحقيقة.
الكيزان طلعوا البترول و نهبوا قروشه..دى الحقيقة اللى عارفنها انا و انت و اى زول عندو حبة مخ.
بالنهب ده بنوا بيوت و قصور و فتحوا شركات بترول و محلات اكل و صالونات تجميل و القروش اتصرفت فى السودان او خلينا نقول الخرطوم. دى ابسط طريقة تنعش بيها الاقتصاد(تصرف قروش فى السوق). ما فى زول بينكر ان العشر سنوات اللى قبل انفصال الجنوب كانت سنوات كويسه فى الاقتصاد السودانى. ح اسالك ..كم من اصحابك المهندسين رجعوا السودان و اشنتغلوا فى سوداتل و دال و البرجوب و هجليج و بترودار ؟؟كتار صح؟
الكيزان نهبوا بترول السودان لكن ده ما بيمنع انه اثره اظهر و لو بصورة بسيطة على الاقتصاد.
انا و انت و غيرنا عارفين حجم الدمار الحصل فى السودان..انهار التعليم و انهارت الصحة. تلوثت المياه الجوفية فى مناطق البترول بسبب سؤ ادراة الصينيين و عدم اهتمامهم بالبئة. تلوثت المياه الجوفية فى الخرطوم و غيرها من المدن بسبب الاهمال. اسامة بتاع السدود بيقرر يقطع غابة عشان يبنى مطار و ما فى زول بيقول ليه تلت التلاته كم...دى كلها مصايب ما ليها حل و لا ممكن تتصلح تانى عملوها الكيزان. لكن فى النهاية الشعب لسه ما جاع كفاية....او قروش البترول لسه فى السوق....لسه فى كيزان بتبنى فى قصور و ناس مستفيده حتى لو كانوا اصحاب مغالاق او عمال خرسانة.
قروش البترول كان ممكن تتصرف فى البنية التحتية..لكن ده ما حصل بسبب الفساد و المحسوبية. حاج ماجد سوار ما يكضب و يقول بنينا بيها السدود. السدود اتبنت بقروض... و الان بتسدد بقروش الدفع المقدم من الكهربا. (معليش ما موضوعنا)..لكن العاوزه اقوله انه لسه فى باقى حبة قروش من زمن البترول فى الاقتصاد السودانى. لكن الان و بعد ضياع الجنوب و بتروله السودان (حكومة و شعب) ح يتصدموا بانهيار مشروع الجزيرة (اللى باعوه خردة) و انهيار البحوث الزراعية و كل البنية التحتية اللى ممكن تكون اى مصدر دخل تانى (غير البترول للبلد)......
عندها ح يجوع الشعب السودانى بالجد. و عندها مممكن تحصل ثورة.
خلاصة اللى عاوزه اقوله...الشعب السودانى لسه ما جاع كويس...و كلها كم سنة (او شهر) و يحصل.
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: خالد عبد الله محمود)
|
طيب ناخد الموضوع باقل شكل من اشكال التبسيط
المفروض الحا يقوم بالثورة دى هو رجل الشارع البسيط الما محتفظ بى اى اشكل من اشكال الانتماء لا للنظام ولا للمعارضة
ومعاييرو لانتاج مواقفو من النظام معايير زاتية بحتة
وممكن فى الحالة السودانية فى الاساس بكون المعيار هو الوضع الاقتصادى وكل ما تدهور الوضع الاقتصادى تدهورت علاقته بالنظام وزاد حنقه عليه
ويوم امس انا كنت مركز على ملاحظة رد فعل رجل الشارع العادى دا على حلقة الاتجاه المعاكس ويمكن وصلت لى الى استنتاجات بتحدد الوضع الحالى
من طريقة التفاعل ممكن اقول على الاقل فى مجتمعى الشخصى انه رجل الشارع راغب فى التغيير حاليا وداعمه ولكن ماممتلك الحماسة لاحداثه بنفسه
ويمكن تكون من الاسباب المخلياه فى الموقف الرمادى دا حاليا هو حنقه على ضعف المعارضة وبهتان مواقفا اولا والتخوف المعقول من النتائج الماساوية للثوارت المجاورة فى المدى المنظور ثانيا
,وثالثا المعيار الزاتى الاقتصادى رغم انه بشير لى تدهور فظيع فى الاقتصاد الا انه لسا رجل الشارع بمتلك بعض الامكانية لاستيعاب اثر التدهور دا عليه بصورة مباشرة ومن المعقول ان نقول الامكانية دى يوم بعد يوم بتقل لحدى ما تتلاشى
ولما نصل نقطة التلاشى دى كل العوامل التانية بتفقد مقدرتا على تكبيل رجل الشارع العادى ومنعه من الانتفاض سواء كانت نظرته للبديل او خوفه من ما بعد الثورة
وحاليا انا شخصيا ممكن اجزم انه وصولنا للنقطة دى مسألة وقت ما اكتر حسب المعطيات الحالية
ودا بدينا اجابة واضحة للسؤال بنعم سيمر الربيع على السودان
*****************
وحكينا القصة دى ليه عشان نعرف قيمة الجنيه 
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: جمال الباقر)
|
| Quote: نرجع لموضوعنا الأساسي: هل سيمر الربيع العربي على السودان؟ |
الربيع العربي هو شنو اصلا
ليس سوى اعادة تدوير الاخوان المسلمين بدعم فضائية الجزيرة والمجتمع الدولي لذى تمثله الراسمالية المنهارة...بلا ربيع بلا بطيخ... والايام القادمة سترو الى اين ستئول احوال هذه الدول وليس العراق عنكم ببعيد 7 سنة من التغيير وليس معركة الجمل دائرة على حل شعرها هناك..
ونحن الاخوان المسلمين مدورين بينا من 1964 واهلكوا الحرث والنسل...
ربيع السودان فات وغنايه مات كان اتفاقية نيفاشا...
ربيع السودان كان اتفاقية نيفاشا الغزال الفوق في السلم ومشروع الجنوبيين الاذكياء السودان الجديد
وعملت النخبة السودانية وادمان الفشل من الحزب الحاكم ومعارضة السودان القديم في تضييع الربيع الانتخابي للسوادانيين وعددهم 14 مليون ناخب مسجل في الشمال..وانفصل الجنوب واعطونا 2 مليون صوت لاسقاط رمز السلطة الذى اضحى عبء على حزب المؤتمر نفسه الان
لقد ضيع قطاع الشمال امال السودانيين بتركه الانتخابات ومجاراته لحلف الاسد والضبعة والبعشوم وكله احزاب مركز وسودان قديم لها ماضي مشين وحاضر ومضطرب ومستقبل مجهول.. وتختلف اختلاف مقدار من الحزب الحاكم
لكن كان راجي ربيع انتظر عودة الجمهوريين للحكم في امريكا بعد الانتخابات القادمة ان شاء الله
وحتشوف ربيع عجيب جدا ما سبقه علينا احد من العالمين
بعدين تفكونا من قصة العرب ومايحدث في بلادهم بتين..ونحنةنرضع من هذا الثدي الميت من 1964
ما سمعتو بالتغيير الافريقي الاخلاقي الباهر والنظيف البشبهنا
في
تنزانيا وغانا والسنغال وكينيا وجنوب افريقيا
فككت هذه النظم الشمولية بشجاعة نفسها ذاتيا اطلقت الحريات والديموقراطية دون خوف وعبر الحلقة المفقودة في الربيع العربي (المصالحة والشفافية)...والديموقراطية تجب ما قبلها...والحديث ذو شجون
| |
|
|
|
|
|
|
|
|
 Re: نرجع لموضوعنا الأساسي: هل سيمر الربيع العربي على السودان؟ (Re: saadeldin abdelrahman)
|
يمكن أن تعود الى السودان و في مخيلتك الاسفيرية أن الثورة قاب قوسين أو ادني
و أنه بدفرة بسيطة منك مع الشباب سيقوم هذا الكومر العتيق و ينطلق،
و قد تكون مستعدا تماما للخروج الى الشارع لتجد نفسك معزولا و لا تعرف حتى أين هو الكومر!
و حين تدخل الى النت باحثا عن معلومة ، تجد أحدهم كاتبا بوست عريض طويل عن أن زوجة الرئيس ستطلق،
بالله دي أمة يرفعوا ليها علم!
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: saadeldin abdelrahman)
|
نصف قرنٍ خلت شنو؟
ياخ من الثورة المهدية و ما قبلها!
يحمد للامام أنه قام ضد محتل اجنبي و انجز ثورته بنجاح حتى اجلاه،
رغم ما شاب الثورة حينها أو بعد موت الامام ، من اخطاء و مظالم و قصور
الا أن العدو الاجنبي و عسفه نجح في توحيد الشعب خلف راية واحدة مرفوعة بصدقها و حقها و اساطيرها،
ثم قامت الثورات الوطنية ضد الانجليز و عبود و النميري، و في كلٍ لم يندم (بعض) السودانيين على ذهاب طاغية كما ندموا على ذهاب
ابان عيونا خضر!.. حيث ذهبت المؤسسية و الهيكلة الادارية و جاء الخمج الوطني تارة بإسم الديمقراطية و اخرى بإسم الاشتراكية
و غيرها تحت دثار الدين، فهل نحن حقا نستحق أن يُرفع لنا علم؟
هل حقا نحن وطنيون، ام مثلنا التاريخ كاذب؟!
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: saadeldin abdelrahman)
|
السودان حتما مقبل على تغيير كبير
ربيع سوداني
مفارقة عرقية عنيفة تعصف بما تبقي من السودان
والسبب انتهازية اسلاموي السودان وشعارهم انا او الطوفان | Quote: خلقت الانقاذ طبقات طفيلية واسعة جدا مستفيدة من الوضع الكائن حينما استوعبتهم وخلقت الظروف المناسبة لضمان دخولهم في العجلة القائمة والدفاع عنها لان الدفاع عنها هو دفاع عن بقائهم . |
الظروف المناسبة لنمو الطفيليات اصبحت غير مواتية مع كثرة الطفيليات وقلة الموارد لخلق البئة لمناسبة لنموها
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: محمد عبد الماجد الصايم)
|
Quote: خلاصة اللى عاوزه اقوله...الشعب السودانى لسه ما جاع كويس...و كلها كم سنة
(او شهر) و يحصل. |
الأخت سـمارت
مافي جـوع اكتر من الحاصل دا , هل تصدقي في بعض الكناتين
تجي تشــتري صلصة بي جنيه , سيد الدكان يفتح علبة الصلصة
و يديك معلقتين في كيس , الصلصة يا سمارت اصبحت تباع بالملعقة,
يا سـمارت الناس جاعت شــديد , ما قريتي عن الجمعية الشـغالة
بتجمع تبرعات عشــان يوفروا وجبة فطور لبعض طلبة المدارس ,
وآخرون الجمعية دي ما قدرة تصلهم لضيق ذات اليـد ,
ولا ما سـمعتي بالطالبة الجامعية التي تجمع باقي فطور زميلاتها
والأمثلة دي كتيرة وعـدد الناس الما لاقين حق الفطور و الغداء كتار جدا
وما يغرك مظاهر الترف في بعض المواقع ( كافوري , الرياض ........الخ )
امشـي الأحياء الشـعبية و شــوفي
يا سـمارت كل دا ما بخلي الناس تنجـز الربيع السـوداني
لأنـو في حلقات مفقـودة وفي بعض الحلقات الحكومة بتكســر فيها
لتأخير التغيير
ومن ضمن هـذه الحلقات زرع النزاعات بين شـعوب السـودان
ببذر القبلية و العنصـرية , افقـار الناس , الحكومة شـغالة بيديها
و كرعيها عشــان تزرع في الناس اليأس من التغيير باعلامها
و تضليلها للناس عن جوهر الصـراع , ود ما ح يسـتمر كتير
الناس كل ما يصبح صباح قاعد تمشي خطوة في اتجاه التغيير
و قد يلزمها خطوات كتيرة جـدا , وفي النهاية هنالك التغيير
شــكلوا شــنو ؟ ما حدش عارف
ح يتـم كيف ؟ ما حدش عارف
ح يتـم متى ؟ ما حدش عارف
قـد يكون في سـودان مفتت وقـد يكون في السـودان الباقي دا
فلا تيأسـوا ولا تحبطـوا
(عدل بواسطة عبدالله احيمر on 01-21-2012, 09:48 AM)
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: عبدالله احيمر)
|
| Quote: بعد مداخلة الاخ احيمر الطويلة اعلاه خلونا نقول الكلام الحار الناس قاعدة تتزاوغ منه وبتغفله في حساباتها كثيرا |
الأخ أســاســي
السـلام
المداخلة الطويلة كانت إجابة على الســؤال التاي لصاحب البوســـت
Quote:
هل السودان على اعتاب ربيع عربي ؟
إن كان "نعم" فلماذا؟
ما هي المظاهر و الدلالات التي تقود للإجابة بنعم؟
الاسباب متوفرة وكلنا عارفنها و نظريا مفروض نكون ربّعنا زمان واسي داخلين على الصيف
يبقى السؤال هل بدأت نسائم الربيع و اين وكيف هي
وإن كانت الإجابة بـ "لا" فـأيضا لماذا؟
|
وكلامك عن النعرات القبلية والجهـوية صاح ,
ولكن برضــو وعي الناس بالعواقب التي يمكن أن توصلنا اليه( هذه العنصرية )
وعلمهم بأن المؤتمر الوطني يقف خلف كل هـذه البلاوي و المآسـي و أنه من يؤجج نار الحرب
في بعض المناطق ليزيد ويعمق الشــعور بالعنصرية و يدفع لمزيد من حمل السـلاح , والوعي بهذه
المسـائل منتشــر في كل أطراف السـودان , لذلك التغلب على النعصريين و هزيمتهم ممكنه
ليس بالصبر على هذه المكاره فقـط و لكن بكشــف زيفها وضلالها
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: tmbis)
|
Quote: هل السودان على اعتاب ربيع عربي ؟
إن كان "نعم" فلماذا؟
ما هي المظاهر و الدلالات التي تقود للإجابة بنعم؟ |
وهل السودان عربى ؟... بشاشا
مش كلمك الفلسطينى ؟ تانى قمت لى جنك ؟
نعم فى ثورة .
لماذا ؟ لانو محتقن وليس بينه وبين الانفجار الا ان ينفجر
المظاهر والدلالات ::
انو ناس النظام قاموا يكوركو
مافى ثورة فى السودان !!!
نحن ماذى مصر ولا تونس ولا ليبيا ولا الخ
نحن ح نقود التغيير
فهمنا فهمنا
وهى ذات الاكلشيهات .. وابرز مظاهر الزنقة لكل الزعماء الذين سقطوا !
لكن مافى اجدع حاوى ممكن يقول انو الح يحصل فى السودان شنو بعد دقيقة
او ثانية واحده .. ناهيك عن بكرة ...
الفوضى ضاربه اطنابها فى اى مكان .. من الصعب وضع تصور موضوعى
الحكومة ذاتها ما عارفه الممكن يحصل شنو !!
وسنظل مفتوحين على كل السيناريوهات ..
من التغيير السلس وحتى الصوملة !
ـــــــــــــ
اساسى دا برااااحه ممكن يفتح لى حزب ..
ويدخلنى انا وامنة مختار وتيسير عووضة وامانى العجب !
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: محمد البشرى الخضر)
|
Quote:
ود البشرى يا لايوق..الجماعة ديل كلهم زايغين من موضوع الحلقة وانت مصر تعيد السؤال
انا عملت سيرفي في اجازتي الفاتت دي..عشان اعرف الناس دي صابرة ليه على الحاصل دا..
لا يتناطح وعلان على انو كل الاسباب والمقومات بتاعت الثورة الشعبية متوفرة في السودان
لكن في عوامل بتخلي الخيار دا غير مطروح حاليا..قول لي ليه..اولا..
الحكومة دي عملت حركتين في شكل وردتين : الحصل يوم وفاة الزعيم جون قرنق والحصل يوم دخلت
حركة العدل والمساواة الخرطوم.
يوم وفاة جون قرنق ما كان في اي قوات امن في الشوارع اليوم الاول ..عشان شنو؟ عشان الحكومة عارفة
انو الجنوبيين حيكون رد فعلهم عنيف وخصوصا انها ما طلعت اي معلومات عن الحادث وافسحت مجال للاشاعات
حصل شرخ كبير داخل الشماليين في الاثنين الاسود وشافوا الحد الممكن يصلوهوا الجنوبيين في خصومتهم
للشماليين( الاحداث والقتل البيحصل في الجنوب ايام حرب الجنوب كان كلو سماع اضان والناس ما عاشتوا
واقعيا..وليس من راء كمن سمع) يبقا الكراهية الكانت من الجنوبيين تجاة الشماليين(عندهم اسبابهم المنطقية)
بقت من الطرفين وبالتالي الحكومة ضمنت انفصال سلس لا بواكي عليه الا من قلة (انا من القلة دي)
جينا لقضية دارفور..معظم الناس في بداية الالفينات كانت واقفة قلبا وقالبا مع الثوار في دارفور لكن المصيبة
الاسمها سايبر دي نجحت تماما في انها تشوه الحركات دي لانها ورت الناس انو في ثوار من دارفور بيحملوا كل
الشماليين مسئولية الظلم الواقع عليهم من الحكومة..دا ما بينفي انو الشماليين حقيقة عنصريين..لكن دا ما
موضوعنا هسه لانو العنصرية دي في دم معظم البشر..بس الحكومات هي المفروض تكون مسئولة من ردع العنصريين
والتزامهم بسلوك حضاري تجاه الآخر..يعني الزولة البريطانية القعدت تنبز في الزنوج والهنود في المترو اتقدمت
لمحاكمة ومافي زول اتعرض ليها لانهم عارفين مافي زول فوق القانون..اها نحنا حكومتنا الرشيدة قررت تعمل بعبع من
الحركات الدارفورية ومن اهلنا في غرب السودان عموما ..الزاد الطين بلة انو الحركات دي اصولها اسلامية والناس
كارهين الكيزان..والمعارضة متمثلة في حزب الامة والاتحادي الديمقراطي..افعالهم تحير الما بيتحير
والشعب لسان حاله بيقول: حنطلع من حفرة نقع في دحديرة؟
عشان الشعب يتحرك لازم الحركات المسلحة في دارفور والناطقين بلسانها رسميا وشعبيا يحاولوا يمايزوا الصفوف
ما كل المدردم طماطم وما كل الشماليين جلابة..ومفروض الشماليين يعترفوا بانهم كانوا في يوم من الايام
فعليا مستعبدين غيرهم ولغاية الان في مجموعة في عقلها الباطن مختزنة ومتبنية التفكير دا فالمطلوب
منهم يحتفظوا بتفكيرهم دا جواهم وما يكون عندوا اي ناتج في ارض الواقع ..ولو مشوا لمعالج نفسي
بيكون عملوا خير لنفسهم..
المعارضة مفروض تعرف انوا البتعمل فيهو دا لعب على الحبلين والناس كاشفاهم .
الوضع الان محتاج كيان جديد من داخل الشباب ..يطرح افكار للتغيير يضم كل المظلومين في كل السودان (الفضل)
ما يجي زول يقول التهميش اكتر في الغرب ولا في الشرق..السودان دا كلو مهمش حتى عاصمته مهمشة..
لو حصلت ثقة بين المهمشين..بيليف مي الربيع العربي دا بيحصل باسرع مما نتصور.. وحتى
اشعار آخر الحكومة شغالة بنظرية فرق تسد وتراهم سايدننا ومبسوطين |
مية المية يا دكتورة
لن يقوم اي ربيع عربي في السودان لعدم وجود معارضة محترمة تطرح نفسها كبديل
وهذا هو شرط الزوال
| |
|
|
|
|
|
|
|
|
|
Re: نرجع لموضوعنا الأساسي: هل سيمر الربيع العربي على السودان؟ (Re: د.نجاة محمود)
|
الكثيرين كتبوا كلام في الصميم
وتحليل وقراءة خطيرة للوضع
مثلا أنا أتفق تماماً مع تحليل الدكتورة رشا سالم بكل تفاصيله
ولا أختلف مع آخرين عرضوا الحقيقة ونظرة للواقع من ذاوية مختلفة
الكثيرين هرموا وهم (ينتظرون) الثورة أن تهب - فمتى نكون نحن جزءا من هذه الثورة؟
الكثيرين يملكون (الرؤية) الصحيحة ويعرفون (الهدف) تماماً - فمتى نكون جزءا من عجلة التغيير؟
نعم نحن نحتاج إلى (برنامج عمل) يساهم فيه الجميع في الداخل والخارج ويتكاتفوا حوله
بالإضافة للكتابة والنشاط في الأنترنت وفي المواقع المختلفة للفصل في (المواقف)
واهم بداية لهذا البرنامج - وهو السلاح الوحيد الذي يوصلنا مباشرة للهدف - هو (الإعلام)
وهو سلاح سلمي وغير عنيف
وهو السلاح الوحيد الكفيل بتعرية النظام وكشف عورته أمام الجميع باقل مجهود وبحفظ للأرواح والممتلكات ويمكن من خلاله تحقيق (العصيان المدني)
هو السلاح الكفيل بتجميع كلمتنا وتوحيد (الرأي العام)
وهو السلاح الكفيل بأن يكون بوتقة لكل المعارضين
وهو السلاح الذي يمكن من خلاله لأطياف المعارضة التصالح مع المواطن ومع بعضها البعض وتوحيد كلمتها مباشرة على الهواء
وهو السلاح الذي يعضد ثقتنا في بعضنا البعض
ويساهم في شرح قضيتنا للعالم من أجل عزل النظام الحاكم وفضح ممارساته على الهواء مباشرة.
وهو سلاح يمكن من خلاله دعم المعتقلين السياسيين في سجون النظام
وتسليط الضوء على القضايا في مختلف بقاع الوطن
وتعرية وهم إنجازات الإنقاذ
والأهم من كل ذلك - انه سلاح يمكن لكل مواطن أن يساهم في رفعة بقرش أو كلمة أو بمجرد توجيه الريموت كنترول
إنه سلاح إنشاء قناة للتغيير
تسمح بطرح (الرأي الآخر) المغيب عن الوطن
تعالوا نتفاكر لإنشاء قناة تلفزيونية للتغيير
| |
|
|
|
|
|
|
|
|
 Re: نرجع لموضوعنا الأساسي: هل سيمر الربيع العربي على السودان؟ (Re: Elawad Eltayeb)
|
(*)
أبو حتوت في حالة كونه صاحب بوست مرفوع ..
(:
لولا أن القذافي قد هزم كل توقعاتي وخلا أيامي المعدودات قربت تبقى سنة
لأتيتك محللاً ومتوقعاً , لكن نعمل شنو , مجنون ليبيا كنكش لحدي الآخرة ..
(:
عموماً ..
الخيار بين المعارضة والحكومة كالخيار بين (الطاعون والسرطان)
ولا بد من طريق ثالث ..حتى لو كان (ملاريا) ..
وهذاالطريق الثالث بدأ في التشكل وكانت مذكرة شباب الإسلاميين الأخيرة
هي بداية هذا الطريق , وهو بالمناسبة ليس طريقاً موسوماً بآيدولوجيا
أو دين أو عرق , طريق ثالث سلكه بعض شباب الحركة الإسلامية وشباب ليبراليين
وبدأت حركتهم .. ولن تتوقف ولا علاقة لها بالمعارضة التقليدية التي أصبحت
تشارك في الحكومة ولا تشارك في الحكم ..
ولكنها جزء لا يتجزأ من هذا النظام .. بمشاركتها كديكور للنظام كحكومة
ولكنه لا يسمح لها بالمشاركة في الحكم ..
المسألة ليست مسألة موسم ربيع ..لابد من مروره بقدر ماهي مسألة تغيير أصبح حتمياً
وما مقتل خليل إبراهيم إلا إحدى التجهيزات التي أسهم بها النيتو لتنظيف الطريق
أمام ثورة سلمية وعصيان مدني واسعين سيعمان أرجاء البلاد (ساعة الصفر قربت)
وسيكون شباب الإسلاميين مشاركين قبل شباب السودان الآخرين , والإتفاق أن الديمقراطية
الحقيقية هي خيار الجميع , فليحكمنا الإسلاميون عبر صناديق الإقتراع ولكن دون أن يتعدوا
على الحريات الأساسية ..
و ليرتضي الإسلاميون حكم غير الإسلاميين دون تعدى على حرية التدين ..
هذا هو الطريق الثالث الذي بدأت مراحل تعبيده ولا يهم كم سيأخذ من الوقت حتى تتبلور ملامحه
وإن ظن الناس أن الربيع العربي قد تجاوز السودان .. سيستيقظ أهل السودان ذات صباح
فيجدوا شباباً من كل عرق ولون ودين من أهل السودان .. قد ملأووا الساحات وأحتلوا شوارع
المدن .. ولن يرجعوا حتى يسقط النظام و(توابعه) من أحزاب ديكورية ..
ودالبشرى أنا لي فترة متوقف عن البورد , وعدت فقط لمجاملتك يوم (رفعة بوستك)
وإنشاء الله يوم رفعة بوست حمودي ودالصايم ولا طلحة تنظير مايجي .. لأنه عندها تكون قد هانت الزلابية
حتى أكلها بنو تميم ..
والسلام ...
| |
|
|
|
|
|
|
| |
محمد البشرى الخضر
ABUHUSSEIN
عبدالكريم الامين احمد
حمد عبد الغفار عمر
omer osman
جمال الباقر
اساسي
خالد عبد الله محمود
رشا سالم
محمد عمر جبريل
طارق زروق
khaleel
Balla Musa
Elawad
Nazik Eltayeb
smart_ana2001
رغيم عثمان رغيم الحسن
adil amin
saadeldin abdelrahman
علاء الدين صلاح محمد
محمد عبد الماجد الصايم
tmbis
دينا خالد
فيس بوك
تويتر
انستقرام
يوتيوب
بنتيريست