|
|
|
 Re: قصيدة البلل وقد زرتها مع الاخ صلاح قوش قبل يومين (Re: عمار محمد ادم)
|
بنى شايق مددنا الصبر دهرا *** وبدر تجمل بلغ التمام
خيول من لدن كورتى تنادت *** عليها فوارس شم عظام
عليها (حنك) جدى ينادى *** ملوك النيل شانهمو الصدام
بنى شايق لرد الظلم جاؤا *** فكيف كرائم الخلق يضاموا
سنصلى من يعادينا لهيبا *** ونسقيهموا الموت الزؤام
سنجعل كيدهم يرتد ضعفا *** ومنا مصائب تأتى جسام
وقد كادوا وبالغوا فى العداء*** ويرمونا فتخطئنا السهام
وتلك كرامة ديست بنعل *** وهذا الشيخ يغضب والغلام
سنزحف من لدن نورى وامرى***ونجعل كيدهم يغدواحطام
وحاربنا شراذم من بقايا*** صقور الجو يجرحها الحمام
وهاج البركل الجبل المقدس***اجاب عشيرتى هبوا وقاموا
الا ليت ابنعوف فصيح يروى *** حكاية امة الحكم الحسام
فانا حيثما كنا اسود *** طلائع عزة قوم كرام
الا فاعلموا يابنى هذا وذاكا*** دواء من مشافينا سقام
جعلت الحزن فى قلبى عميقا*** وضعت الثأر فى صدرى وسام
سنضرب ضربة من غير رفق *** الاقولوا على الرفق السلام
وفاض النيل وانتفض النخيل *** وعزرائيل حلق والحمام
ونادى فى القرير عكود قومى*** وقالت امتى هذا حرام
فان الشيخ فينا مثل ليث *** يتيه الطفل ما بلغ الفطام
فويل ثم ويل للأعادى *** وميض النار نشعله ضرام
خيول عزائم دكت حصون *** بلا سرج وقد شد اللجام
مؤامرة تحاك فى كل يوم *** بأقزام واقوام لئام
هنا الشايقة الهول الكبير*** هنا الامجاد والشعب الهمام
حبال الصبر مدت من حديد***ركائز عزة فينا تقام
عمار محمد ادم
| |
  
|
|
|
|
|
|
|
|
Re: قصيدة البلل وقد زرتها مع الاخ صلاح قوش قبل يومين (Re: أبو الحسين)
|
ياعلى ود كنيش قولولنا شقيش قبل
الروح استجاب ورب العباد تقبل
عايش فى القلوب انسان عظيم ومبجل
ابكيك ود كنيش متل ابنعوف والبركل
***
ابكيك ود كنيش وتبكى البلد من جم
ابكيك ود كنيش مليان دموع وألم
ابكيك ود كنيش واذرف دموع الدم
وتبكيك ود كنيش عربان فصاح وعجم
***
ياراعى الضعيف وكت اللطيف اللين
اقدار الرجال وقدرك كبير مو هين
بذكرو ود كنيش وليهن حروفى يزين
راجل وفى الرجال بدر التمام البين
***
نورى اتوشحت توب السواد كيف باتت
العمدة انتقل قوقت قمارى وناحت
اندل السبيط تمرة ودباسة اتباكت
عمدة نورى مات اه المكارم ماتت
***
من بعدك رجال قادرين يسدو الفرقة
فيهم سيف نصر وفيهم كنانة ودرقة
يكرموا للضيوف مدوا اللحم والطرقة
كيف اقدر اعد تعب القلم والورقة
***
كيف ماتبكى نورى فارق ديارها العمدة
ياراجل البلد الكان عليك معتمدة
يوم جاها الخبر ما ضاقوا ناسها الغمدة
اتفجعت جموع بالحيل عليك مستندة
***
ابكيك ود كنيش عمرا مديد قدتم
نورى اتيتمت وظلل ديارها الغم
تبكيك يا كنيش زايد حشاها ورم
عديت يا كنيش وعدادها ناقص كم
***
تبكيك ودكنيش نورى ويصيح الصايح
والنا س بين كئيب مفجوع حزين او نايح
مات العمدة حكمة يديك حنان ونصايح
والحال فى الفراش قران كريم ومدايح
***
ابكيك ودكنيش وانا ما بكيتو برايا
تبكيك الرجال وتبكى الطبيعة معايا
تبكيك السحب بالدمعة كيف بكايا
ويتنخج النخيل عارف مقامو ولاية
***
ابكن يا الحريم وقوللو ووب واحى
راجل ود كنيش ان يبقى ميت وحى
ابكن بالدموع والباقى خلو على
ابكى انا بالدموم راجلا نجيض مو نى
***
يطراك يا كنيش رصاص يلعلع فوق
ويطراك ياكنيش تمرا شبع ماروق
وتطراك الكنيسة قوز هندى حى السوق
عشقان فى القرير ما اظنى تانى اروق
***
يبكيك المقل وعزى الاراك السر
بى كرمك يمين حتى الاعادى تقر
هاريهم وجع لامن يقطفوا المر
العمدة العظيم راجل الفضل والبر
***
العمر المديد مليان مواقف وعزة
الراجل الصميم وكتين تحر ما فز
يعجب فى الطرب بيهن بنادق هزا
ياالعمدة الضكر فى قلبى ليك معزة
***
شفت النيل بكى واندافعت امواجو
مات ندك كنيش ملكا مرصع تاجو
يوم وقع الخبر ناس نورى هاجو وماجو
ياسيف الدهب والفضة زانت عاجو
***
ابكى انا ودكنيش ما اظن دموعى يجفن
راقد ود كنيش والناس تنوح وتكفن
يقلدوا فى بعض وحال البلد بيحنن
مات الكان زمان يدى الامل ويطمن
***
اندفن الجسم والروح هناك فى نورى
تسكنى فى الطيور وبين السواقى تدورى
حلقى فى القرير لابد ديارنا تزورى
الله يا الحنين مفعم فى صوت البورى
***
العمدةالرحل ماحاشاه يرحل ضمه
كيف يرحل جبل ممتد وعالى القمة
اه رحل التلب انسانى عالى الهمة
القاك فى بداية سورة تبارك وعم
***
ياالعمدة السلام الروح ترد وتشوف
ياالعمدة الجنب الما بيردك خوف
القلم البكى ينزف شجون وحروف
الجسد انستر والروح تحوم وتطوف
***
فى نورى الحزن باجور جريف وجبل
فى الحقاب كنيش حلوف ونورى بلل
ما خلا الحزن تنفاسى ولا مقل
قد كان الكنيش فى زمنو اقوى بطل
***
الطمبور بكى ورددبكاه نغم
وانكتم الدليب جاثم بصدرو الغم
الغناء والمديح يازول بلاكا عدم
بتكفى الضيوف وطفلك يقول حرم
***
انا بالحيل حزين قصرت فيهو كلامى
اسكب بالشعر دمعا غزيرا هامى
انكسر السهم راقدات كتيرة سهامى
وباقىلى الشعر قد كان منو الهامى
***
الراجل الرقد عمدة بلدنا وسيدنا
يبقالنا الهرم القلنا فيهو قصيدنا
رمضان انصرم يوم عيدنا ماك يوم عيدنا
لو نعلن حداد ما اظنو تانى يفيدنا
***
العمده الرحل للحكمة تاجها وراسها
والقيم الزمان من يومو ياهو اساسها
القيم البقت ماناسو هم حراسها
صامدين فى القرير ومساوى حتى الباسا
***
يا حليل الرجال من فوق عواتى الخيل
ويا حليل الزمان الكنا راسو قبيل
ياحليل الدليب دقوه نص الليل
طمبورنا بيرن غيب عقولنا عديل
***
ود سورج حزين يذرف دموع كالسيل
حزنان سمعريت ويبكى ويئن بالليل
والشيخ ود بشير حزنان عليك بالحيل
موجوع ود ضكير وربك عليهو وكيل
***
العمده الوجع قلب الصغير وكبير
تتقاطر دموع والصدر نقاع زير
باكيت الدباس القمرى باكى الطير
مكتول بالحنين عاد ما بلادى قرير
***
فى كورتى الرجال مليون والف جدع
الخطب الجلل ستف حشاها وجع
دا الغيث الهطل فى كل بلادنا نفع
العمده الرحل ياريتو تانى رجع
***
الموت ما مصير كل زول وليهو اجل
للناس والبلد والدنيا ليها شغل
انتصب القدر واصابو فى مقتل
الروح انسرب كل المراقى وصل
***
قاصدت الديوم والبركة فى وراقها
لى نورى الكنيش اتا تفسى كيف مشتاقه
يا اهل الحضارة وبعانخى يا ترهاقا
الناس كيف حنان ومشاعرهم دفاقة
***
جاياك القرير دى حزينة ناح طمبورها
فى ذكراك دوام وبلدنا بيك فخوره
فى اسلى الفراش وعزوا الاهل فى موره
ومن فرط الحزن هجرت حروفى سطورها
***
باق ودكنيش مليان جلال ومهابة
اظهر ودكنيش وخلى الخلق تتشابى
الناس الحنان وحفايا جات يا يابا
فى نورى بتبكى للشعر والربابه
***
اهرامات جدودنا ايامنا لفى ودورى
تاريخ ودكنيش سجلت فيه حضورى
يا العمده العظيم شكرك على ضرورى
شرفت البلدللشايقى والمنصورى
آسف يالرجال انا ما قدر عزيت
ويوم جانى الخبر زلزل كيانى بكيت
يا قمرا طلع لبلدنا كم ضويت
كيفن اختفيت بى سرعة واتواريت
***
ارحمو يا كريم واجعل مقامو عظيم
اكرموا ود كنيش ماانت بيهو عليم
يغفر للذنوب رحمان غفور ورحيم
ضاعف للاجر جنات وفيها مقيم
عمار(محمد ادم o
| |
|
|
|
|
|
|
|
|
|
Re: قصيدة البلل وقد زرتها مع الاخ صلاح قوش قبل يومين (Re: معاوية عوض الكريم)
|
ياخ بلل لا تخلو من الصنعه ولكن فيها موسيقى وعاطفه وفيها تواتر وفيها
مشاعر وإيقاع وكذلك مرثية كنيش لكن كلام عمر إبن كلثوم خرب الشغلانه ما
مفروض يتوسط بلل وكنيش دع ذلك لعمر إبن كلثوم وبعدين يا عمار بتحمو فى
الكوع لى منو يا عمار راقدينلكم فوق راى واللا الحكايه شنو وقبل القصيده
كنا متوقعين تحليل عن مزكرة الحركه الإسلاميه التصحيحيه
منصور
| |
|
|
|
|
|
|
| |
عمار محمد ادم
أبو الحسين
معاوية عوض الكريم
munswor almophtah
عثمان محمد كرار
الشفيع وراق عبد الرحمن
فيس بوك
تويتر
انستقرام
يوتيوب
بنتيريست