|
|
 حبيبتي
|
يا مدغدغة الحشا والفؤاد بطلتك
يا مفعمة و تريانة بحب أبوك
ودعا وحنان وريد من والدتك ..
يا هلة الشمس البتجهر عيون مليانة بيك
تسعى و تساسق عشان تفرِح دنيتك ..
يا حبيبتي يا توب غتاي
والحان غناي ..
و اسباب هناي
و يا ست هواي وست محاسن زانتك ..
يا أحلى صوت
هبش وتر قلب الحروف
خلاها تنبض تهتفك
وريني كيف اسكب عليك
كل البزيدك يسعدك ..
أحلب لبن عصفور صغير
أقطف نجوم تلمع
تلف فوق دنيتك
بس عشان أسمع ضجيج صدى ضحتك ..
أبوك قال: "ملكة" و بت ملوك
قلت: بل "ملكا" عدييييل
من كحلت عيني ظلال من رؤيتك
يا وردة .. تلمع فوق غصن
نديان ..يميل من بهجتك
يلعب يلامس في قلوب ينجذبوا
بس لمن يتاوقوا لبسمتك
وبي نظرتك ..
أنسى المواعيد والظروف
أرمي الدفاتر والحروف ..
أقعد قصادك .. أسعدك
أمسح سواد شعرك ..
أضاير خصلتك ..
ولمن تعتر ليك عينا في الأرض
بجري و بكفف دمعتك
أراجع الحصن الحصين
من شر حاسد هالتو هَلتِك
طاشت سهاموا و صابتك
لا تشوفي شر
لا تعرفي ضيق ..
لا يعرفك الأسى ..لا يقربك
تسعد سنينك ..
ويفرهد الحب في دريبك
يشوفك المولى ويبارك سكتك
دبي ..
3/1/ 2012
الساعة 11 مساءاً
|
|
  
|
|
|
|
|
|
|
 Re: حبيبتي (Re: داليا حافظ)
|
بعدين بكتبو
الثالث من كانون الثاني!
العام الثاني عشر بعد الألفين!!
بعدين الساعة حداشر بتعملي في قصيدة!
طيب العشا العملوا منو؟
_
ربنا يحفظها ليكم ويحفظكم ليها!
ويسعدكم دايما ياخ!!
| |
|
|
|
|
|
|
|
|
 Re: حبيبتي (Re: محمد عبد الماجد الصايم)
|
Quote: بعدين الساعة حداشر بتعملي في قصيدة!
طيب العشا العملوا منو؟ |
عشا شنو الساعة بعد حداشر ياود الصايم ؟
ُكر علي عرفت مشكلتك 
تسلم يارب وربنا يخلي ليك البنوتات الحلوات هن وأمهن ..ويخليك ليهن يارب ..
| |
|
|
|
|
|
|
| |
داليا حافظ
محمد عبد الماجد الصايم
haroon diyab
نادر النور آدم
نبيلة عبد المطلب
فيس بوك
تويتر
انستقرام
يوتيوب
بنتيريست