|
|
 رئيس الجمهورية يـدعو إلى بــناء مجتمع قرآني
|
افتتح رئيس الجمهورية المشير عمر البشير مجمع الملك القدوس الإسلامي بمنطقة المنارة بمحلية كرري بمساحة تسع لـ(2000) شخص وتكلفة بلغت (3) مليارات جنيه.
واعتبر الرئيس، المجمع الإسلامي إنجازاً كبيراً وعدّه توجهاً إسلامياً للأمة السودانية التي تشهد كل فجر جديد افتتاح مسجد جديد في شتى ربوع البلاد، ودعا أثناء مخاطبته المصلين أمس (الجمعة) إلى بناء مجتمع قرآني، وإحياء المساجد وإعمارها بحلقات الذكر والعلم، وإقامة المجتمع الإسلامي المتكامل المتراحم الذي يساعد بعضه بعضاً ويغيث الملهوفين والضعفاء والأرامل.
وأثنى البشير على رجل البر والإحسان الشيخ عبد العزيز مصطفى باعتباره أسهم إسهاما كبيرا في تشييد المسجد. وشهد افتتاح المجمع إقبالاً وتدافعاً كبيرين من المواطنين الذين أشادوا بالافتتاح الكبير للمجمع الإسلامي.
|
|
  
|
|
|
|
|
|
|
 Re: رئيس الجمهورية يـدعو إلى بــناء مجتمع قرآني (Re: وضاحة)
|
صلاح غريبة
سلام
طبعا انت ليس لك ناقة او جمل في هذا الموضوع اللهم الا بناقل خبر
لذا اي تعبير قطعا ليس مقصود به شخطك الكريم
فناقل الكفر ليس بكافر
ناهيك عن انك ناقل خبر جميل | Quote: التي تشهد كل فجر جديد افتتاح مسجد جديد في شتى ربوع البلاد، |
ايه الفائدة نفتتح مسجد جديد ولم نستفد منه تربويا بدليل الانحطاط الاخلاقي السوداني وتفشي المحسوبية والفساد
الاداري مما حدا بالرئيس ان يقر به ويكون هيئة لمحاربة الفساد
عليك الله مش كان اولى انا يكون هذا الافتتاح والمال لدعم مدرسه في تلك المنطقة والتي تعلم العلم الديني والدنيوي
يعني باختصار المدرسة ممكن تدرس دين وعلوم دنيوية ويمتحنوا منها طلبه ويتخرجوا يبقوا دكاترة ومهندسين او اي
تاهيل اكاديمي اما الجامع وياريت لو مستفيدين من دعوات العلماء والخطباء وجاهات فقط لاغير اللهم الا من بعض المخلصين
لدينهم تقبل الله اعمالهم على قلتهم اما الكبارات فحضورهم للمسجد نظام شوفوني انا هنا وهو تلقاه ضارب البلد وخاميها
دون مراعاة لحدود الله
بالله عليك البلد ناقصة جوامع في كل لفة وزاوية تلقى ليك كم جامع
لكن اولى دعم المدارس المنهارة والفاقدة للدعم
او المراكز العلاجية والتي حالها يغني عن سؤالها
الوجع راقد
لكن عشان نوري العالم انو نحن اسلاميين جد نعمل لينا مسجد قدام الهليتون في منطقة غير سكنية وعليك تقطع كبري ام درمان ويلاقيك
مسجد النيلين الكبير او تدخل الخرطوم والجامع الكبير على بعد مسافة قليلة منك
انا ماعارف سر الصرف البذخي على الجوامع دون المدارس والمستشفيات ده لزوم شنو
ودونك جامع ابو الرئيس شوفو كلف كم
| |
|
|
|
|
|
|
|
|
|
Re: رئيس الجمهورية يـدعو إلى بــناء مجتمع قرآني (Re: وضاحة)
|
حباب القرآن يا اللخو
لكن الزول قالوا كان صائم كان ما اكل ما يصلى
القرآن ده نقراهو ونحن جعانين كيف
لانه القرآن بقول:
فليعبدوا رب هذا البيت الذى اطعمهم من جوع وآمنهم من خوف..
يعنى دى شروط العبادة..
اها زولك ده لا اشبعنا من جوع لا آمنا من خوف
نتابعوا كيفن؟؟
غايتو لاعبين بالدين لعب لكن بلاقيكم،،،
| |
|
|
|
|
|
|
|
|
|
Re: رئيس الجمهورية يـدعو إلى بــناء مجتمع قرآني (Re: وضاحة)
|
صالح عام
هديمك يا وليد
مقدود
وصابحنا الفقر
و الجوع
صبح جلد البطن
مشدود
* *
شن بتسو
و اخيك
من شهر مرفود
قالو .. صالح عام
عشان قال
العُوج في العود
حمدّ يارب
اخير من قول
هديك البغلة
في الإبريق
كان ودوهو
بيت الأشباح
و كان دوقو
زول هلفوت
هديمك يا وليد
مقدود
و صابحنا الفقر
و الجوع
صبح باب التكل
مسدود
كمل حتي الملح
في البيت
وشن همّ
الملح في البيت
وكت ملح
الدموع موجود؟!
دحين يا وليد
هو ديل
موُ قالوا ناس
إنجاز ؟!!
وشن سّولنا
مما جونا
غير حرقو
الفضل بالجاز ؟
كّل شيتا
صعب في السوق
من الكبريتة
للطايوق
و كان جانا
البخت تموين
رطيل سكر
و صابونتين
نجيب من وين ؟
و اخوك مرفود
و عدمان الشهر
ملين ؟
أمس زازيت
اكوس الدين
مشيت لسمية
بت مامون
لقيت جابولها
تلفزيون
سمح بالحيل
تشوف الصورة
بى كم لون
وكت في نشرة
ألأخبار
ظهر مك البلد
يضحك
جضومو كبار
مزرر الكرش
بزرار
لا مهموم
لا مغموم
لا زعلان
و شيهو
يراري بالألوان..
وقّد في حشايا
تباق نار
طريت رفد
الوليد و الجوع
و سال
دمع الغبينة الحار
* *
اريتك يا ملك
فد يوم
يخلى الجوع
عينيك ما تنوم
أريتك يا ملك
فد يوم
تحس بي غصة المظلوم
دحين يا وليد
هو ديل ما لهم
و مال الدين
وكت قولهم
كلام الله
و فعالهم
ما فعال صالحين
كتير فيهم
عديل حقار
و بالقرآن
كمان تجار
و كضابين
أكان بنزين
عدم .. أو جاز
وتعبوُ الناس
و ضاقو خلاص
صفوف واقفين
يقولولك
إرادة الله
وكان عدم الرخيص
و الغالى
في التموين
يقولولك
ده . غضب الله
و كان الموية
صبحت طين
يقولولك
ده من امريكا
والعملا
حمونا الشب
ولاد الكـــــــــــلب
عشان الشعب
يحرن تب
يقبّل
من صراط الدين
دحين يا وليد
هو ديل
ما لهم
و مال الدين
أكان كنزو
الدهب و المال
بلايينهم
تسوى جبال
وعرباتهم تخطف
العين
و بناياتم قصور
في قصور
وحاة الله
و كتاب الله
أكان ادونا
طوب فد سور
كان سوينا
الف أويضة
لي مسكين
فترنا من الخطب
يا وليد
و من طيش العقيد
و عميد
و من قل القرش
في الايد
و من تعب الوقوف
في الصف
ومن غبن الرصع
بالكف
و من حفر الدروب
و اللف
و من خت الحلم
في الرف
كل يوماَ
نقيحنا يزيد
دحين يا وليد
هو كم دغشاَ
عشان نلقاهو
دافرنا
و تعبنا شديد؟
و كم حولا
صيامنا صبر
عشان يشرق
هلال العيد ؟!
اح ح يا وليد
لا حتى الخبيز
إنضاق
و لا هدما
كسانا جديد
و شوف المغسة
يا وليد
سموُ شقانا
صالح عام
و كل دمعاَ
نزل من عين
و كل جوعاَ
سكت بالدين
و كل زيناَ
محاهو الشين
ختو وقعيتو
في الإسلام
حرامهم يا وليدي
حلال
وا نحنا حلالنا
كلو حرام
يقلبو الدين
نصّل سكين
و ناسين
الحساب قدام
اخر زمن
يا وليد
نشوف كل البشاتن
لون
يفوت هولاكو
دوب نرتاح
ينط في الكرسي
نابليون
* *
اريتك يا أمير
حالي
جعيص في الكرسي
في الخرتوم
و ساويلك
الف والي
نبايعك للظلم و الجوع
نبايعك
وكل ضيم مشروع
نبايعك
و جيتنا جيش
و دروع
نبايعك و الحكم
مقلوع
نبايعك
و القسم مخدوع
نبايعك
من سجن عالى
أخر زمن يا وليد
حصيف العين
يلاقى و يشوف
زمان
ظلم السلف
بالسيف
و حسه السيف
كلاشينكوف
غير زمن
الهوان و الجوع
كمان طالع
زمان الخوف
ديل ما برتو
لى إنسان
كم ولداَ
وقع نشفان
وكم زهراَ
كِتل و اتحت
في رمضان
لا شهراَ حرام
إتصان
لا كفنا ستر صبيان
لا شاهد
قبر معروف
لا اماَ
برد نارها
سكت و إرتاح
نزيف الجوف
دحين يا وليد
أ كان حسع
ده ديش مصعب
و أكان بيرق
علي الكرار
منو الكفار ؟!!!
منو القاصدينو
بالتكبير
و بالتهليل
و ضرب النار؟!
* *
اخاف نحنا
و أكان نحنا
أخير نضحك
كتير سبب
الضحك بخته
شوف المغسة
يا وليدي
ديل ما حسه
ناس حُقار؟
ده ذى دق الطبول
للموت
وذي وقد البلد
بالنار
* *
إلا نشوف
أ كان ساهرين
معاك يا جوع
و أ كان ضيقنا
إتحفر في ضلوع
و أكان صابرين
علي الفجار
وحاة الله
و كتاب الله
وكت نغلي
و نكوس التار
لا سوراَ
بقيف في وش
و لا لهب الغبن
بترش
و لا صفاَ
يميل بالقش
كل ظالماَ
يقع و يندش
و سيل دمع البلد
ينقش
لا بحبس حلقنا
الخوف
و لا بترجع
اكان لعلع
كلاشينكوف
هديمك يا وليد
مقدود
و صابحنا الفقر
و الجوع
صبح جلد البطن
مشدود
شن بتسو
و أخيك
من شهر مرفود
قالو صالح عام
عشان قال
العوج في العود
* *
نان ما يقول
أريت يقول
عديل يا زول
هديك
البغلة في الابريق
ما هامينا
-صالح عام-
وديش مصعب
و لا الحجاج
و لا بكتل
قلبنا الجوع
و موت منقذنا
ولا الضاج
خلي الضيق
يزيد يا وليد
بكرة الضيق
يخلى الناس
تبقى عُصّار
علي الحقار
و تبقي حريق
* *
قريب يا وليد
صيامنا يتم
و يهل و يشرق
هلال العيد
نحس طعم الخبيز
و يتبدل هدمنا
جديد
| |
|
|
|
|
|
|
| |
صلاح غريبة
سيف النصر محي الدين
وضاحة
عادل خياري
نور الدين عثمان
صديق الموج
فيس بوك
تويتر
انستقرام
يوتيوب
بنتيريست