# شوشو من مواليد العاصمة القومية الخرطوم القديمة لكين بعد موت الكبار رحلوا للأطراف الراقية في جنوب الخرطوم المهم هي صحفية في جريدة سيارة بحاضرتناوكمان تعمل مراسل ياخي مافي داعي للتفصيل لانو هي شرسه شوية وأخوك حساس ممكن يبكي بحرقة شديدة المهم كنت زميلة معنا في الجامعة وبعدها جاءت جريدة (الرأي الاخر) لكي تتعلم مهارات المهنة من الاستاذة أمال عباس وهي الام الحقيقة لمجموعة كبيرة من الصحفيات الشابات شوشوهي خريجة جامعة أمدرمان الاسلامية لكين مسلمة معتدلة لا حجاب بس خمار وخمار فنان كدا اللي كان مجنن أخوك و الصوت نبرتو الحنونة يفكك من حبل المشنقة وكمان أوديك في ستين ألف داهية هي طويلة بس سيف من سيوف المهدية قوام وجسد تتمناهو كل بنات حوا العيون والله لو ما أنت ماراجل ومكمل الرجالة العيون دي ما بتقدر تسلط عليها عيونك هي ما الانوثة كلها أنجمعت فيها مهما قلت وصفتهابنكون ظلمتها وكمان عميان عديل كدا بالرغم من أنها في نهايات العقد التالت من عمرها لكين تنافس جيل الفيسبوك بجدارة جاءت في الجريدة وكان أخوكم برضو متدرب جربان بس لبيس واللوك حقو عصري جدا قام عمل فيهارقيق ورومانسي وقدر يحقق نوع من التواصل الموضوعي يعني صراحة وحوار وكمان مثقفاتي ومتابع وكادر تنظيمي لحزب معارض بالاضافة الي أنو قادر يوفر وجبة الفطور مع قزازة ببسيسي وقصة تذاكر سينماالقاعة أو قصر الشباب والاطفال يعني دا البرنامج الترفيهي مع جلسة أيسكريم كل خميس وأتنين في العمارات وأخر تلفونات للخليج رسلوابالله كريم دينا ومرة دوف ومرة عطر أسمو السم بالانجليزي ومرة عطر أسمو أنا كاريينا ودي غير مساحيق الميك أب ودرجات الالوان بتاعتو تكون قريبة من بشرة الاستاذة شوشو دا غير العبايات من سيدة الحجاب وشنط اليد من الديرة في دبي أو مدنية الغورير وفي دكان بتاع جيبات أسمو أستيلي في لندن وغير هدايا ناس أمريكا من كريمات الشعر والاصباغ الجديدة وناس الشرق الادني كانو متخصصين أكسسوارات خصوصا الود عماد عايش في (بناكوك ) رسل مجموعة من الاطقوم رهيبه أخوكم ملك قلب الاستاذة شوشو مع أنها متوسطة جمال وبعد المعينات بقت رهيبه (ترهبك عديل كدا ) أمتدت العلاقة لسنتين وأخوكم قاشر بالبت في المناسبات والمؤتمرات الصحفية وكمان حفلات وأعرس العايلة والعلاقة سمن علي عسل وهي ما العسل ذاتو وبس كالعادة الحظ التعيس بدأ معي في يوم كدا جاتني قروش من أخواني المغتربين كانوا عايزين أبنو صالون جديد في البيت ومع الماهية وكان عندي زي تلات تياب وأربع فتايل ريحة مع طقم قميص نوم نسائي اللون كان بنفسجي و شنطة فنانة كبيرة بتاعت شيله أسمها دالسي ظنيت أنو العرس دا بقي أقرب من حكة نخرتي لي و قمت بدون مقدمات قلت (:ياشوشو بالله تعالي نتوج حبنا بالعرس عديل كدا بدل المطاولات دي مواعيد ونمشي ونجي تكوني معي في البيت العمر كلوا وخلاص نبدأ حياتنا) عملت فيها مافهمت كلامي تاني شرحت الامر بكل صبر وكمان معه حديث للرسول (ص) خير البر عاجله وأختنا كأنها الكلام ما بعنيها وبعد شوية دقايق من الصمت الغريب كدا والحزن العجيب الذي أصاب أخوكم أبو الزهراء في مقتل بعدها قالت شوشو وهي تعبر عن ذاتا الطموحة جدا( أنت والله ما فيك عيب غير عطالتك المقنعة دي....! صحفي دي في السودان يعني معليش ما تزعل أنا ذاتي معك (الفقر بعينو) حسي نحن كان محتاجين لدواء نزعج كل المغتربين في العالم ياخي خليلك واقعي بعدين أنا كان عايزة أتاأتزوج ياخي البلد دي ما فيها ناس عندهم تخصصات كويسه ودخلهم كمان محترم زي الدبلوماسيين والاطباء والقضاة دي غير رجال الاعمال المكسريين في شوشو بالله خلي الهزر البايخ دي وقوم نمشي نشرب لينا عصير عرس شنو في الصيف الحار دي وكمان أخرتا عرسة شحاتفه بالله أحلام اليقظة دي مرض نفسي كدا أصحي لي مالك الليلة أنت لسة باقي أمس معك ياخي نحن كدا أحلي أتنين خلينا كدا ) أخوكم وجم ومات عديل بس الكلام دا كان في سنة ألف وتعسمائة وسبعة وتسعون أي قبل 15 سنة كدا ولسه الاستاذة شوشو منتظرة (فارس الاوهام) بعدها سافرت للعمل خارج السودان في الفين ورجعت عدة مرات في كل أجازة كنت حريص أعرف منو اللي فاز بقلب الاستاذة شوشو لكين الاخت شوشو لازالت قابع في دهاليز الصحافة السودانية من خبر لمؤتمر صحفي ومن جريدة قفلت لجريدة جديدة بس لسه محتفظ بنوع من الاناقة والحضور الفريد يا أرض أحفظي ما عليك ولسه هي ع########ي بس كرامتي اللي أنجرحت زمان علاجا كيف ....!!!!!!!!!!!!!!! والله يا ياناس أنا مصدوم فيها ما قادر أتعامل معهامن الكلام القديم دا وهي أنهزمت في كل ما كانت بتتطلع ليهو
منو فينا الشجاع اللي بيقدر يقول للتاني (تعال ندواي جروحنا ونرجع الماضي بالجد ما قادرين نعمل حاجة) *حني يا شوشو حني برضو مسامحك بس كيف تحني....!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
زهير عثمان حمد
فيس بوك
تويتر
انستقرام
يوتيوب
بنتيريست