وشتمته سراً بالجلف والمتعن(.........) وحمدت الله على كل شئ
عند طرف الدهليز لمحت براد مياه ..اسرعت نحوه فمدت لي ذاكرتي بصورة تلك المرأة الحامل في احد المولات كانت قد دنت برأسها لتشرب من البراد فاذا بها تفرغ ما في جوفها في البراد ومن يومها اقسمت انا لا اقرب كل المبردات العامة..
وجدت تلك الفترينة النصابه وهي تعرض من خلف الزجاج كل ما هو مثلج ..تذكرت اني قد تركت حقيبتي في السيارة والفترينة لا تتعامل الا بالكاش
سيطر علي العطش اكثر عندما رأيت ذاك العبيط وهو يحمل في يده زجاجة عصير اظنه بااااردا لسيسيليا المحظوظة وهو يقول
i am sure you did great honey
صرفت عيني عن زجاجة العصير واستعذت من الرجيم الذي كان يلح علي ان اخطف زجاجة العصير واقوم جارية
06-18-2011, 05:33 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
لم يكلف نفسه هذا الجلف حتى بالسؤال او التشجيع ...حمدت الله للمرة المليار
رأيت ابو العيال في مقعدي حاملاُ في يده اليمنى خارج السيارة زجاجة اقتربت اكثر
يا الله يالله زجاجة عصير
وانا لتوي قد وصفته بالجلف
وجدت نفس اردد قول الشاعر
ألقيت في سمع الحبيب كليمة .....جرحت عواطفه فما أقساني قطع الحديث وراح يمسح جفنه ..... فوددت لو أجزى بقطع لساني ومضى ولي قلب على آثاره .... ويدان بالأذيال عالقتان فطفقت من ألمي أكفكف أدمعي ... ورجعت من ندمي أعض بناني وأقول واخجلي إذا لاقيته .... فبأي وجه عابس يلقاني حتى ظفرت به فمد يمينه .... ورنا إلي برقة وحنان
بصراحة لم يمدها لي( زجاجة العصير) لم يمدها برقة وحنان لكن فلنقل ذلك فهذه مبادرة لا تاتي الا كل اربع عقود ونيف
اتسعت ابتسامتي اكثر عصير التفاح الذي اعشقه الغريبه انه كان في زجاجة مياه معدنية لكن لا يهم المهم انه ابو عيالي يهتم لأمري ..
توقف ابتسامتي عن التمدد وتحولت لذهول عندما قالها ابوعيالي
هاك .. هاك ده بول احمد ارميهو في الزباله ديك
06-18-2011, 05:47 AM
الطيب رحمه قريمان الطيب رحمه قريمان
تاريخ التسجيل: 03-21-2008
مجموع المشاركات: 12377
Quote: ُحيي أبو العيال الخلاكي تطلعي الكلام دا كلو!!
شكرا ياخ على المتعة دي في صباح يوم سبت مُغبّر!!
اهلين بالزعيم
الكلام ده على طرف لسان 99% من الزوجات السودانبات
بس مقطعينه وقاعدات
احكي ليك النكتة دي
واحد خاطب جديد كل خميس بيعزم خطيبته وطول ما هم قاعدين ما بيتكلم معاها بس بيطقطق ليها اصابع يدينها العشرة ومن سكات يدفع الحساب ويتخارجوا مر على الحال ده شهرين الخطيبة زهجت يوم جات قبل المواعيد طقطقت اصابعيناالعشرة .. صاحبك جاء لقاهم العشرة مطقطقات اداها كف قال ليها يا خاينة بتعرفي غيري منو ؟
منوّر البوست
06-18-2011, 07:10 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
هههههههه دي يا عرفة قصة كباية اللبن المتعفنة ما بتخارج معاها براها دي عايزة ليها خيال كارب ينسج نظرية متكاملة على شاكلة ان راجل سيسيليا مدمن و عاطل و بعتمد عليها تصرف عليه وعلى عياله فنجاحها المهني مهم بالنسبة ليه او الاحسن منها انو بخونها و بعرف عليها نسوان الدنيا و العالمين و المحنة الزائدة دي محاولة منو للتكفير و عقدة ذنب بحسو تجاهها او اقول ليك حاجة من الآخر كدا هو ما زوجها اصلا مجرد صديق
06-18-2011, 07:17 AM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: يا بو السيوف شغل ليها غنية الفنان قرقوري وأرفع الصوت للآخر
يا ابو الشوش "حرًم" ده ما أنا رغم أنو ما مستبعد يكون سلوكي تيبكال للزول ده القصة دي حصلت لناس تانيين ياخ. التحية لود البشرى و هو ينسف القصة نسفا هندسيا
06-18-2011, 07:22 AM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
Quote: عمركم ياخوانا شفتو ليكم زول تقول ليهو صباح الخير يقول ليك مرحب !!!
يا عرفة إنتي ما عارفة حاجة ساكت! تقول لائحة حلف الأزواج "الإجابة النموذجية على "صباح الخير" من أم العيال = خير!!.. الخير يجي من وين!؟.. إذا إنتي ما عملتي الكذا وكذا وكذا (لستة طويلة من الطلبات التعجيزية، الغرض الأساسي منها وضع الزوجة في وضع المقصر) لأنو أساساً صباح خيرها دي ما لخير إنما مقدمة لطلبات كتيرة وبكدا تكون إنتا قمعت الحركات المطلبية دي في مهدها." يعني أخونا الحنين دا بإجابتو (المحايدة) دي كسر ليك اللائحة المقدسة لحلف الأزواج! (دي حيحاسبو عليها الحلف لاحقاً حساب عسير)
شايفك نزلتي النشيد الوطني لحلف الأزواج
06-19-2011, 06:36 AM
Ashraf el-Halabi Ashraf el-Halabi
تاريخ التسجيل: 10-08-2006
مجموع المشاركات: 5508
صديقي يا عرفة له قريبة متزوجها أمريكي (عايشين في أمركيا دي) يوم وود عمها في زيارتهم ضمن الونسة حكت عن يوم عملها الطويل وشكت من ألم في أكـتافـها بسب الشغل الكتير الخواجة مش ينتظر ود عمها يمشي؟ لا.. المطرطش لازم يطلع ليها الفلايت دي في حضرة ود عمها! ود عمها قالوا لليلة تاني ما عتب بيت الخواجة (العبيط) دا
06-19-2011, 06:41 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
Quote: هههههههه دي يا عرفة قصة كباية اللبن المتعفنة ما بتخارج معاها براها دي عايزة ليها خيال كارب ينسج نظرية متكاملة على شاكلة ان راجل سيسيليا مدمن و عاطل و بعتمد عليها تصرف عليه وعلى عياله فنجاحها المهني مهم بالنسبة ليه او الاحسن منها انو بخونها و بعرف عليها نسوان الدنيا و العالمين و المحنة الزائدة دي محاولة منو للتكفير و عقدة ذنب بحسو تجاهها او اقول ليك حاجة من الآخر كدا هو ما زوجها اصلا مجرد صديق
...او عبيط وخيبان وما حٍمٍش كلها اسقاطات يا ود البشرى اسقاطات عشان نثبت لي نفسنا اننا الصح ونستمر في جلد ذاتنا وجلد احبابنا وفرض اجواء جافة
قوقل اغنيةللفنان Billy Ocean
"When the going gets tough, the tough get going"
شوف الفرق بين الاغنية دي واغنية "تور عفين وشين اني"
تسلم على المرور يا ود البشرى
طالما انك اتحسست معناها قميص عامر ده ما بيلزمك ارميهو حتلقى حياتك اندى واجمل
06-19-2011, 03:09 PM
nada ali nada ali
تاريخ التسجيل: 10-01-2003
مجموع المشاركات: 5258
عرفة ازيك سرد جميل بس طريقتك الدخلتي بيها بتجيب هواء لصاحبنا ابو السيوف دل خاصة من الناس المابيعرفوه او يعض المغرضين والكلام دا رغم انه بينطبق على 99٪ من الرجال السودانيين لكن دكتورنا حاشا عليه والله لو سيف كان فعلا بطل القصة دي كان بعد الكتابة دي ضبحك هو انت قايلة النسوان مقطعاتنو في مصارينن من هين.
شفني يا عرفة انا اكتر حاجة بنعجبني في الخواجات ديل الحوار الحميم بين الازواج العجايز انحنا ناسنا لما بكبروا ما عارفة العلاقة بين الازواج بيتبقى عدائية كدا لييه مرة واحد جارنا رقدوه في المستشفى وحالته كانت صعبة جدا لما فتح لقى مرتو قاعدة قام قال لي اولاده لو امكم دي ما مشت من هنا انا ما حا أعمل العملية كرهتني كلما يجي زول يسألني تلفح الكلام وتقعد تشرح ليه تقول العيانة هي كرهتني في المرض ذاتو.
06-19-2011, 10:33 PM
Rawia Rawia
تاريخ التسجيل: 11-23-2002
مجموع المشاركات: 8396
حمدلله على السلامة زعلت عشان ماعرفت الاقيكم دا إيميلي رسلي لي تلفونك هناك وإيميلك [email protected]
___________ مرة في مطار من المطارات لاقوني عبطا أتنين وقفت أتفرجت فيهم وممكن تتخيلي منظري أول ما ظهر الزوج العائد من السفر في أول الصالة قامت الزوجة وقفت وعملت حركات متناغمة بايدينها فيهم نطة لي فوق وكانت بتغني في اغنية فولك الراجل رمى الشنطة وبدا يعمل معاها نفس الحركات ويغنوا الاتنين والحركات زي ماقلت فيهن نقزة لافوق كدا بيعرفوها براهم المهم سبعة دقايق والزوجة كل الفرح في عيونها وهي تتنطط وتعمل في حركاتها المتناغمة معاهو حتى بدو الاحضان والحب والسلام والتحية أهم شي أنا أتأكدت إنهم متزوجين (شفت الدبلة في أيدو الشمال وخاتم زواج عندها)
06-21-2011, 01:08 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
Quote: مرة في مطار من المطارات لاقوني عبطا أتنين وقفت أتفرجت فيهم وممكن تتخيلي منظري أول ما ظهر الزوج العائد من السفر في أول الصالة قامت الزوجة وقفت وعملت حركات متناغمة بايدينها فيهم نطة لي فوق وكانت بتغني في اغنية فولك الراجل رمى الشنطة وبدا يعمل معاها نفس الحركات ويغنوا الاتنين والحركات زي ماقلت فيهن نقزة لافوق كدا بيعرفوها براهم المهم سبعة دقايق والزوجة كل الفرح في عيونها وهي تتنطط وتعمل في حركاتها المتناغمة معاهو حتى بدو الاحضان والحب والسلام والتحية أهم شي أنا أتأكدت إنهم متزوجين (شفت الدبلة في أيدو الشمال وخاتم زواج عندها)
راوية العزيزة
مشتاقين والله
عارفة ! اهم حاجة انك اتأكدتي من انهم متزوجين عشان ما يجو ناس ود البشرى ويقولوا ليك " ها بيكونوا اصحاب ساي"
الغريبة ليه الازواج ما يكونو اصحاب!
باقي ليك يا راوية ح يجي اليوم نشوف فيهو المنظر دة في شوارع السودان بالجلابية والتوب ؟
راجعي الايميل
06-20-2011, 05:13 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
Quote: [بالمناسبة العنوان استوحيته من بوست القدير محمد جمال الدين
انا وسيلفيا الهولندية .....
خالص احترامي له
وتقديري واحترامي لك يا ندى
من الأشياء الطريفة فى البوست (ده بالاضافة لروعة القصة)، ان عنوانه مستوحى من بوست الأخ العزيز محمد جمال. قبل عدة سنوات كتب الأخ أبو ذر (المطر) بوست جميل خاطب فيه الأخ جورج بنيوتى، عنوانه "جورج دى كفك ولا غيمة" و طبعا تداخلت فى البوست مجموعة من أصحاب و صاحبات الأقلام الموسيقية. و بعد فترة كتب الأخ أساسى بوست طريف عنونه ب "دكين دى كفك ولا حيطة"، و طبعا ممكن تتخيلى محتوى الكتابة التى "هطلت" فى بوست أساسى و دكين.
المهم ان قصتك و ان كانت خيالية، الا انها تعكس وجها اخر لتغريبة "بنى/ات كجة" ( الحقوق محفوظة لتاج السر الملك و تاء التأنيث من عندى)، تعكس معاناة نساء كثيرات (رغم اننا لن نستطيع التعميم بالطبع. فمثلا قبل حوالى الاسبوعين ذهبنا لزيارة أسرة سودانية جميلة، حفظهم الله جميعا، حيث نقيم، فوجدنا الأم و الأب و أبنائهم و قد عادوا لتوهم/ن من حفل تخرج الأم من الجامعة، و كانت ترتدى روب التخرج و تحمل أزهارا فى يدها، و كانت كل الأسرة، بما فيها الزوج، فخورة بمثابرتها.
حين أكون مشغولة، أو لدىّ التزام، و لا تكون ابنتنا الصغيرة فى المدرسة فان زوجى (له التقدير)، يهتم بتنظيم برامج لها و يخرج معها أو يأخذها الى الاستوديو لتلعب و ترسم بينما هو يعمل. و أحيانا أسافر و تكون ابنتنا معه. أذكر ان أبى أطال الله فى عمره هو و أمى كان أيام الامتحانات المهمة (مثل امتحانات الشهادة و التخرج من الجامعة) يأتى لنا بسندوتشات الافطار و معها زجاحات (فيها مشروبات بالجد :) ) عشان ما نقطع المذاكرة و نقعد فى صينية الفطور.
و حقيقى أتمنى أن أقرأ لك أكثر، فالصوت النسائى مهم فى أدب المهاجر (بفتح الميم و الهاء).
و احترامى و تقديرى لك (و لمحمد جمال).
ندى
06-20-2011, 05:05 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
مبدعه ياعرفه تسلمي كتيير ويسلم قلمك نص مدهش . وقواي لي بطلتك دي لما جبتي معاهو شفع ماقدرتي تفهميو ولسه متوسمه خير ... كويس المسك الشفع ومعاها تذمر في واحدين برفضو الفكره من الاساس
تضامني الشدييييد مع البطله .
06-20-2011, 06:42 AM
khaleel khaleel
تاريخ التسجيل: 02-16-2002
مجموع المشاركات: 30134
عندى صحبتى سودانية عرست اجنبى سألتها مش اخير ليك السودانى البيفهم عاداتك و تقاليدك قالت لى التقاليد و العادات ممكن كل واحد فينا يقرأ و يثقف نفسو عن عادات و تقاليد الطرف التانى لكن التعبير المباشر و الاحساس بمشاعرى و ان احس انى حاجة مهمة ما بتتقرى ....و لا دايره ليها تذكير
قعدت افكر فى كلامها ده و اتنهدت تنهيده طويلة و سرحت فى كمية حاجات كاتماها حواء السودانية دايره ليها موقع منفصل مش بوست منفصل ...
تحياتى يا عروووف و شكرا للسرد البديع
06-20-2011, 11:38 AM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5256
سرد شيق يا أستاذة عرفة...ساخر.... ولا يضيره أن فيه ترميز قاسي يدين طرف واحد في معادلة لا تقوم في الواقع إلا بين طرفين ... (تلك مجرد نظرة قيمية مني تأتي على عجل). شكرآ
محمد جمال
06-20-2011, 01:04 PM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5256
البوست من صفحتين. في الصفحة الثانية عند نهايتها تقريبآ محاولة جريئة مني لتعريف الكائن المسمى "حب". ولا أدري إن كانت محاولة موفقة أم لا؟. لكن أظنني أجتهدت!.
ودا كلو عشان نقدر "ربما" نعمل مقارنة بين الطرفين في المعادلة "رجل سوداني وإمرأة سودانية" و "رجل سوداني وإمرأة أجنبية والعكس" و "آخر أجنبي وأخرى أجنبية" . أعني مقارنة في فضاء "الرومانسية". شفتي كيف!.
وبمثل ما تدين تدان : )... يعني أنا إحتمال ناوي على شر : )
تحياتي،
محمد جمال
06-20-2011, 01:27 PM
امير طمبل امير طمبل
تاريخ التسجيل: 10-22-2010
مجموع المشاركات: 1722
العزيزة عرفة تحية من القلب سرد جميل ...وكتابة ناااعمة و طاعمة و بوست بيشد الزول احسست و انا اقرا قصتك و كانني كنت معاك هناك يديك العافية يا زولة يا رائعة ..قصة مختلفة عن موضوعك ده من فترة كم سنة كده كانت عندنا في الدوحة موجة تفنيشات قال ليك الراجل عاد الي منزله وشو يلعن قفاه ... لقي ليك المرة محننة و راقدة في سريرها عاينت للرجل لقت ليك كل الحزن الفي الدنيا دي في وشو قالت ليه سجمي يا راجل مالك؟رد ليها قال ليها ابوي اتوفي "" المرة بابتسامة خفيفة قالت ليهو بركة انا افتكرت فنشوك مع تحياتي
06-20-2011, 04:01 PM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
شفني يا عرفة انا اكتر حاجة بنعجبني في الخواجات ديل الحوار الحميم بين الازواج العجايز انحنا ناسنا لما بكبروا ما عارفة العلاقة بين الازواج بيتبقى عدائية كدا لييه
العزيزة سناء الصباغ
سلام مربع لأجدع ناس
صحيح كلامك
نسبة كبيرة من الازواج كبار السن حبال الود الواصلة بيناتم بتجف وتتقطع يا تلقيهم في مناقرة طوالي يا مقاطعة
العلاقة بتبقى علاقة مصلحة فقط قعادم مع بعض لا مفر منه والغريبة يقعدوا يدعو على بعضهم
همهمات تحت تحت تلقى الزوجة بتنقنق :-
بالله انا عيانة بالملاريا وراسي لافي ما صدقت نمت يقوم يصحيني عديم الذمة ده شان اسوي ليهو كباية شاي ؟
انشاء الله يشرب السم اليهريهو انشاء آخر كباية شان ارتاح منه .... الخ
وبالناحية التانية تلقي عمك ينقنق
المرأة دي بلا المرض والشكية ما عندها شي الله يخربها اخير ليها تموت وتريحني اشوف لي واحدة صغيرونة
تمارضني مش تمرضني ....
نماذج كتيرة يا سناء جفاف وترسبات على مدى سنوات
نسأل الله السلامة
06-20-2011, 05:25 PM
Hololy Hololy
تاريخ التسجيل: 08-30-2006
مجموع المشاركات: 1266
نسوان على نسوان كاتمين على قلبنا حكمة وقالوها زمان دول فقر دول عكننة لازم اقوم بليل اخنقها واخلص بقى دى موريانى الويل ما كفاية ظلم و شقى
دا حلمنا طول عمرنا ياخدهم ربنا ربنا ربناااا قبل اناما اخطبها واكتب دا كلامى كان مسموع دلوقتى الحال اتشقلب كسرالى 6 ضلوع ياااااااارب تاكل اكلة باخخ فيها ثعبان او حتى حتة لحمة مليانة سم فران
دا حلمنا طول عمرنا ياخدهم ربنا ربنا ربنااا اول ما شافتها عنيا جسمها كان غصن البان عدت سنتين وشوية كرشها مترين قدام دى بتفطر لحمة وفتة عرضها بقى 6 فى 6 جنبها مش عارف انااام
Quote: يا صبري طه يعني هي بطلة القصة دي "اللي هي ما انا بالتأكيد" يعني المطلوب منها تزبط ليهم حلة نعيمية في قاعة الامتحان وتجيبها للعيال وابوهم في العربية؟ ولا هو يقوم يتسند يسوق العربية يشوف اقرب مطعم مع العلم ان في هذه البلدان اي مطعم فيهو حمام (REST AREA) ولا هو هجوم على المسكينة ديك والسلام غايتو جنس غايتو
طيّب مش بقولوا المرأة عاطفية ؟! مع إنو بالنسبة لي أنا لا عاطفية ولا بطّيخ بس بتعرف تمثّل كويّس ... خاصة لمّا تكون عايزة ليها حاجة !!!
وبافتراض إنو بطلة القصة عاطفية .. مش مفروض تسأل زوجها بلهفة عن حالو وحال العيال ... في هذه المدّة الطويلة التي لم تراهم فيها ...
ثمّ من البديهي إنو زوجها لو مشى ليهو لي مطعم ما كان نساها فالحتة هنا ما حتة اهتمام وتقدير ... لكنها حتة بتاعة عُرف ساكت كدة يا عرفة ... وبما إنو ما مشى المطعم معناها هو جعان والأطفال جعانين ... وأمهم بعد زنقة الامتحان عايزة تشرب وتأكل قبل فلذات أكبادها ...
بصراحة زعلت من بطلة قصّتك وموقفها البايخ .. وشكلها ما قاعدة تشاهد أفلام هندية ... وقت الخائن يفك ليهو طلقة في البطل وحبيبتو تجي جارية وتمسك حبيبها وتخلّي الطلقة تقع فيها هي ...
ـــــــــــ السودانيات = رومانسية نهي هي (بالهندي)
Quote: رغم اننا لن نستطيع التعميم بالطبع. فمثلا قبل حوالى الاسبوعين ذهبنا لزيارة أسرة سودانية جميلة، حفظهم الله جميعا، حيث نقيم، فوجدنا الأم و الأب و أبنائهم و قد عادوا لتوهم/ن من حفل تخرج الأم من الجامعة، و كانت ترتدى روب التخرج و تحمل أزهارا فى يدها، و كانت كل الأسرة، بما فيها الزوج، فخورة بمثابرتها.
Quote: حين أكون مشغولة، أو لدىّ التزام، و لا تكون ابنتنا الصغيرة فى المدرسة فان زوجى (له التقدير)، يهتم بتنظيم برامج لها و يخرج معها أو يأخذها الى الاستوديو لتلعب و ترسم بينما هو يعمل. و أحيانا أسافر و تكون ابنتنا معه .
Quote: أذكر ان أبى أطال الله فى عمره هو و أمى كان أيام الامتحانات المهمة (مثل امتحانات الشهادة و التخرج من الجامعة) يأتى لنا بسندوتشات الافطار و معها زجاحات (فيها مشروبات بالجد :) ) عشان ما نقطع المذاكرة و نقعد فى صينية الفطور.
العزيزة ندى
ها انتي تشيرين الى النصف الممتلئ من الكوب وابصم معاكي بالعشرة انه عندنا نماذج من آدم العطوف البشوش المتعاون الأيحابي المرن لكن نادر وجوده في مجتمعنا والسعيدة هي من تشارك شخص بهذه المواصفات..
عليكم الله شوفو صبري طه ده.....هي طالعه من الامتحان ...الاول كدي يسألها جاء ساهل جا صعب؟جاوبتي كويس؟ وبعدين بجي دورها هي في السؤال ...... الحبيبه عرفه سرد جميل وموضوع رائع يستحق النقاش.... ناديه عابد قالت: لو سؤلت عن عرش المرأة لقلت قلب رجل محب ولو سؤلت عن عرش الرجل لقلت...عمله!!!!!!!
06-21-2011, 10:48 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
Quote: الحبيبه عرفه سرد جميل وموضوع رائع يستحق النقاش.... ناديه عابد قالت: لو سؤلت عن عرش المرأة لقلت قلب رجل محب ولو سؤلت عن عرش الرجل لقلت...عمله!!!!!!!
العزيزة منال
سلامي لك من القلب
صحيح يا منال القلب المُحب والريق الحلو حتى اذا اتوجدوا بيكونوا مخفيين بطبقة عازلة صعب خروجا عن نطاق الدواخل وتبقى حواء طوالي في حالة تسول
واستجداء عواطف او ريق حلو عبثاً.....
تعرفي يا منال في مره من المرارير في واحدة بنية صغيرونة متزوجة جديد زوجها اكبر منها بحوالي ربع قرن اهديتها بمناسبة زواجها توب هي اسمته (ربط) وهي حرة في تسمية توبها كما تشاء...
.... المهم لفحت التوب فرحانة و جري على العريس :
يا ......... (اسم العريس) عاين التوب دة جابتو لي عرفة هدية ...توب ربط وبدأت الغلبانة تلفه حولها بحماس وانفعال عارفة قال ليها شنو !!
يربط حلقك امشي طيري جيبي لي موية
انا طبعاً قلت دي حتماً حتطلب الطلاق وتمشي اهلها وشلت هم ...بس وحاتك الموضوع مر بسلام والعروس طبقت توب الربط ومعاها باقي فرحة مُعلْقة ...
يا منال اذا دي عروس لسة ... ربط ليها حلقها بدون سبب بعد 20 سنة ح يحصل شنو؟؟
سعيدة بمرورك يا منال
06-23-2011, 03:32 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
سلام من الله يغشاك اينما حللت وعافية تسكن دواخلك الطيبه
Quote: قال ليك الراجل عاد الي منزله وشو يلعن قفاه ... لقي ليك المرة محننة و راقدة في سريرها عاينت للرجل لقت ليك كل الحزن الفي الدنيا دي في وشو قالت ليه سجمي يا راجل مالك؟رد ليها قال ليها ابوي اتوفي "" المرة بابتسامة خفيفة قالت ليهو بركة انا افتكرت فنشوك مع تحياتي
برضو في مدير مالي مغترب في جده مرتبه متواضع جداً... اتصل على زوجته في السودان قال ليها:-
عندي ليك خبر ح يفرحك ... وقبل ما يتم كلامه
سألته بحماس وفرح غريب (خييييييييييير ؟ عاد يا الله بس لله تكون اختلست )
"هو كان داير يقول ليها انا دخلت صندوق ووافقو يدوني الصرفة التالتة !!"
اشكرك على طلتك اللطيفة
06-21-2011, 11:11 PM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
هسي يا خليل لوفرضنا انك داخل بيتك بعد يوم عمل حافل وزهجان من زحمة المرور في الشارع والحر واول ما فتحت الباب لقيت ام العيال شايلة ليها دلوكة وبي صوت غير محترف ومنشذ بقت تلعلع ليك باغنية :-
يا خليل يا خليل خليلك وين ما بنوم الليل الليل الليل علي طويل اناااا
وبعدها طوالي فتحت على اغنية :-
آآآي بركة الجيت بركة الجييت آآآي سمح انت وبسكويت
رد فعلك ح يكون شنو ؟؟
اكيد حيكون رد فعل طبيعي :-
الولّية دي جنت وحان وقت تسريحها وقطاف غيرها
لكن لو قابلتك مبتسمة وبدون تكلف وحسيت بفرحتها لرجعتك اكيد حتشعر بسكينة (من سكون) واطمئنان..
خير الامور اوسطها يعني هو يا يغني ليها يايتجاهلها؟
مشكور على الطلة
06-21-2011, 11:50 PM
mohmed khalail mohmed khalail
تاريخ التسجيل: 06-14-2007
مجموع المشاركات: 4509
في مرة من المرات كنّا نتسوق في اسواق Khol's انا والمدام وابننا الصغير ولاننا لسه في (اربعة سنين عاشهم الحب) فمرات بنتعاور عوارة لا تتعدى تشابك اليدين اثناء السير.في ذلك المساء تلقينا اتصال من احدى صديقات زوجتي وبعد الغرض من الاتصال قالت ليهابالمناسبة شفتكم قبيل في Khol's لكن النصيحة لي الله لما شفت يديكم متشابكه زوغت منكم.
06-22-2011, 00:31 AM
خدر خدر
تاريخ التسجيل: 02-07-2005
مجموع المشاركات: 13188
Quote: عندى صحبتى سودانية عرست اجنبى سألتها مش اخير ليك السودانى البيفهم عاداتك و تقاليدك قالت لى التقاليد و العادات ممكن كل واحد فينا يقرأ و يثقف نفسو عن عادات و تقاليد الطرف التانى لكن التعبير المباشر و الاحساس بمشاعرى و ان احس انى حاجة مهمة ما بتتقرى ....و لا دايره ليها تذكير
قعدت افكر فى كلامها ده و اتنهدت تنهيده طويلة و سرحت فى كمية حاجات كاتماها حواء السودانية دايره ليها موقع منفصل مش بوست منفصل ...
تحياتى يا عروووف و شكرا للسرد البديع
نفس الحكاية يا منار
واحدة معرفة اتزوجت فرنسي بعد ما قضت في فرنسا حوالي سبع سنوات... لما سألوها ليه عملت كدة؟ وهي جميلة الف سوداني يتمناها؟
قالت انه ابوها كان ســــــــــــــوداني!! وانها ماناسية انه كان رابط امها في ساقية.. وبعد دة معاملته كانت جافة.. وكل ما تقول حرف كان
بيسخر منها... واول ما اشترى عربية قال ما تقعد معاهو قدام يقعد الولد البكر ...
وبدأت تسهب بعد داك وتقارن معاملة الفرنسي ليها ومعاملة ابوها لأمها
الفرنسي بعد الوجبه بلملم الصحون ويغسلها مرات
ابوها لو الملح زايد كان بيقلب ليها الصينية
الفرنسي لو مرضت كان بيسهر عليها زي الطفلة
ابوها كان بيرسلها بيت اهلها ا
لفرنسي هو السبّاق للاحتفال باعيادهم الخاصة
ابوها بعد صلاة العيد يجي داخل يقول ليها عازم ناس في الفطور يجهز خلال دقايق والا واطاتك اصبحت
الفرنسي اختارها هي عشان طريقة تفكيرها وثقافتها
ابوها اختاروهو ليها الأهل عشان خداااااااامة
الفرنسي بيحس بيها وبي تعبها
ابوها كان بيجر في جلدها الشوك باعتبارها ما بتحس..
وغيرها وغيرها الواحدة ترتبط ليها لي زول هو سام وهي حام هو لا ديني وهي مسلمة هو من قارة وهي من قارة اخرى لا للغة مشتركة لا تاريخ مشترك بس كل الدايراهو ريق حلو ومعاملة طيبة
نورتيني يا نوارة
06-23-2011, 02:46 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
لاحووووووووووووو بوست طاعم زي ده ونحن ما جايبين خبر هادي قعده ده الفرح زاتوووو نشوف آخرتا احلام جاية الخميس القادم بعد ستة شهور ومعاها محمد سامي الدين السهروردي نستعد ليها ونستفيد منكم في طريقة استقبالة يا عرفة ما فتحتي لينا باب ما بنسدا!!!!
06-23-2011, 09:28 AM
محمد جمال الدين محمد جمال الدين
تاريخ التسجيل: 10-28-2007
مجموع المشاركات: 5256
Quote: غمغم بعدها في تذمر ( ما لقيتي تمتحني الا في يوم اجازتي ؟
عرفة لك الاعجاب بما كتبتي ,,,,,, هـذا البوســت المراية التي نرى فيه أنفســنا فكلنا ذلك الرجـل ( حتى سـيف معانا يا سـناء الصباغ ) بس خففي علينا وما تســميها جلافة , بوســتك دا ح امرر للمدام ( كاثبات أنو أنا ما براي )
عارفة يا عـرفة العجـب لو كان الامتحان في يـوم عمل ( احتمال كان يحميها تمتحن ) و هـاك يانقــة ( امتحان شــنو ؟ و الأولاد ديل ح يمسـكم منو ؟ ما لقيتي ألأ اليوم دا ؟ ) يعني في كل الأحوال شــبكة, ويكة عجيبة
وبرضــو انتو كتر خيركم ما بتقصــروا وخاصة في حكاية الأولويات
06-26-2011, 12:55 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
تحياتي استاذة عرفة سرد جميل وساخر وموغل في سبر اغوار الرجل السوداني الذي لا يعرف كيف يعبر عن حبه حيث انه لا يفهم من الحب سوي قشوره فقط
............ بالجد مسكينة المرأة السودانية
مرة شفت لي منظر عجيب في اسواق عكاظ السوداني شايل مخمخم كمية من الاكياس وطالع من السوق عرقان وشفعو وراه يتجارو والمدام ماشة تتبختر وصلو العربية نزل الاكياس في الارض فتح ليها الباب قعدت الزوجة ركب الشفع يقابض ده ويركب في دا ... اها طوالي مشا بهناك ركب العربية وفرتق وحاتك اكياسو الكتيرة ديك كلها خلاها في حتتا وفرتق ...
انا لاحظت ليه صفق الباب وطنطن ودخل محفظتو بعد مافتحها مرتين كدا وركب العربية وفرتق
ياربي ده من شنو ؟؟؟
بابكر زيكو
06-28-2011, 01:04 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
Quote: في مرة من المرات كنّا نتسوق في اسواق Khol's انا والمدام وابننا الصغير ولاننا لسه في (اربعة سنين عاشهم الحب) فمرات بنتعاور عوارة لا تتعدى تشابك اليدين اثناء السير.في ذلك المساء تلقينا اتصال من احدى صديقات زوجتي وبعد الغرض من الاتصال قالت ليهابالمناسبة شفتكم قبيل في Khol's لكن النصيحة لي الله لما شفت يديكم متشابكه زوغت منكم.
خليل باشا
آآآزووووول khol's ده فيهو ميوزيك بيشغلوها في الباك قراوند مختلفة عن كل المحلات تخلي الواحد زي ما بيقولوا ناس قريش "يرقص طرباً" مش بس يتعاور
تسلم على الطلة وتحياتي للمدام وابنكم الذي لم يعد صغيراً
07-01-2011, 09:56 PM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
Quote: احلام جاية الخميس القادم بعد ستة شهور ومعاها محمد سامي الدين السهروردي نستعد ليها ونستفيد منكم في طريقة استقبالة يا عرفة ما فتحتي لينا باب ما بنسدا!!!!
يا الله يا استاذنا القدير
يوم الخميس جاء ومشى وانا في دوامة الحياة هذه
آسفة جداً على التأخير .. ظرف مرض الوالدة حال دون متابعتي للبوست
المهم نقول حمد الله على سلامة احلام وسامي
وعلى ثقة انه شخص مثلك منبع للخير والطمأنينة وبجمال روحك ما محتاج وصايا
شوف الزول الرومانسي ادناه وقيس على كدة
باقات من الورود لك ولعائلتك الصغيرة
07-03-2011, 05:45 AM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 10986
يا سلاااااااااااام يا عرفة ,, سرد شيق وممتع السهل الممتنع ,,,,,,,,, ما شاء الله وتبارك الله عبرتي عما يجيش بخواطر الآف السودانيات لكن زي ما قالت ليك الحبيبة منار كاتمين وممكونيين وصابرين و الله يكون في العون
متاوقة
نصيحة في بعض الرجال السودانيين بتنطبق عليهم قصتك دي يا عرفة يا ختي بكونوا كمان صااااااااااااابرين وموكلين امرهم لي الله وكمان حق حواء امانة مو قاسي وعسير لوولز
تسلمي يا حبيبة وواصلي لينا في الإبداع ده بالله سلامي لك واسرتك الكريمة
10-01-2011, 08:10 AM
نجوان نجوان
تاريخ التسجيل: 04-01-2006
مجموع المشاركات: 2641
عرفة (صباح الخير) فقد أسعدتى صباحى و(مرحب) بمزيد من هذا الإبداع جمعتى بين سلاسة الكتابة والتعبير وبراعةالتصوير بالكلمات لعدسة مصورة ومخرجة فنانة تعكس بالتفاصيل الصغيرة الرسالة التى تريد، مطعمة بروح الدعابة Sense of humer
فنثرت الفرح معبأ فى كلمات هى كعصير تفاح بارد (لا لبس فيه) ترتشفينه فينزل ترطيباً وسلاماً لريق روح ناشفة من جراء جفاف زحمة إمتحانات وإحباطات حياتية يومية.
أكيد سأكون حريصاً لقراءة روائع أخرى لكى
10-01-2011, 06:59 PM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
Quote: عرفة لك الاعجاب بما كتبتي ,,,,,, هـذا البوســت المراية التي نرى فيه أنفســنا فكلنا ذلك الرجـل ( حتى سـيف معانا يا سـناء الصباغ ) بس خففي علينا وما تســميها جلافة , بوســتك دا ح امرر للمدام ( كاثبات أنو أنا ما براي )
الاخ عبدالله تحياتي
المشكلة يا عبد الله هي اساس التربية..مجتمعاتنا بتدعم الذكر وتضعه في مكانة اعلى بدرجات من البنت والأمثلة كثييرة عندنا الولد بيبدأو النفخ في اوداجه منذ بداية خروجه للدنيا.. عند ولادة الذكر بكون الفخر والفرح واضح في عيون الاب
والام والاهل ..ولو المولود انثى بيكون في خزى ضمني قد يكون غير ملموس وقد تستشعره من شكل التبريكات والتهاني ... وبعد داك في ترتيب من اولى بالحرية والقيادة وغيره وغيرة وببدأ يتنامى عندالذكر الاحساس بأنه الأعلى مكانة
وينصب لنفسه مكاناً تأديبياً للمرأة ايّاً كانت صلة قرابته اخت او زوجة واحيانا أم وتأبى عليه نفسه الزاهيه بقول الكلام الطري الذي قد يقلل من شموخه وكبرياءه وبالتالي بيكون عاجز عن التعبير الايجابي المباشر وهنا تكمن سر جلافته
طبعن في استثناءات ...
الواحد لخطيبته تلقاهو شاعر رومانسي مُرهف تفسيري لذلك قد يكون لأنه لسه ما عنده قوامة عليها كأن يصرف عليها مثلاً او قد يكون لأسباب اخرى
تقديري لمرورك واعتذر عن التأخير في الرد
10-01-2011, 07:12 PM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
مرة شفت لي منظر عجيب في اسواق عكاظ السوداني شايل مخمخم كمية من الاكياس وطالع من السوق عرقان وشفعو وراه يتجارو والمدام ماشة تتبختر وصلو العربية نزل الاكياس في الارض فتح ليها الباب قعدت الزوجة ركب الشفع يقابض ده ويركب في دا ... اها طوالي مشا بهناك ركب العربية وفرتق وحاتك اكياسو الكتيرة ديك كلها خلاها في حتتا وفرتق ...
انا لاحظت ليه صفق الباب وطنطن ودخل محفظتو بعد مافتحها مرتين كدا وركب العربية وفرتق
سلام الله عليك يابابكر
قلت ..والمدام ماشة تتبختر ..فتح ليها باب العربية وقعدت!!!!!
سؤال بيطرح نفسه... فتح ليها الباب بطريقة الخواجات ديك ولا مشى من مقعده هو فك التأمين عشان بابها ينفتح ؟؟
خلى الاكياس ديك كلها !! عجبني ليهو المطرطش على قول احمد يوسف ابو حريرة loool
10-02-2011, 02:06 AM
رشا احمد رشا احمد
تاريخ التسجيل: 09-18-2010
مجموع المشاركات: 694
صباح الخيرات على قلبك وعلى زمزم روحٍٍ سالت من قلمك
في قصة السلام والتحايا يقول الرسول صلى الله عليه و سلم : (لا تدخلون الجنة حتى تؤمنوا، ولن تؤمنوا حتى تحابوا. ألا أخبركم بشيء إذا فعلتموه تحاببتم؟ أفشوا السلام بينكم).
"مرحب" في أصلها تحية لكن الواضح انها كانت خالية نبضٍ و روح .. و السلام دا منزلة من منازل الحب و بالتالي الاستقرار الصحي و المعافى.....
أستمتعت بالقصة حقيقة وقرأتها على عجالة ومن ثمَّ على مهل، و حقيقي آثرت تتبع جميع المداخلات إمعاناُ في الاستفادة و الترويح في آنٍ معاً .. الرسالة واضحة و العبرة لـ كليهما وإن كانت تبدو غير ذلك ..
---------------- إ ن ح ر ا ف :
"غدا حين تكبرين.. ينحني ظهرك قليلا.. تجاعيد عينيك واضحة كأوشام دهرية.. البياض مطل من ليل شعرك.. العشب بين مفاصل ذكرياتك.. النمش في سفوح ظهرك على مهل تنهضين من سرير الوقت متكورة مثل نون الحنان".
" غدا حين تكبرين.. سوف أحبك أكثر.. لن أفتقد رماح قامتك.. صحبتك نخلة مثمرة.. سوف أحب الشقوق في باطن قدميك.. وحماقاتك المستجدة بعد الاربعين.. أمسك كفك على كورنيش المنارة.. كمن يمسك موجة من مشيب البحر".
--------------------
"كل يشيخ الا الماء وانت كما انت.. جميلة في الستين في السبعين في عمر يطول.. وروح لا تعرف الذبول.. جسمك قليل عليك..أنوثتك ليست شكلا ولا فستان سهرة.. أنوثتك قلب يفيض وضحكة تجري من تحتها الانهار.."
بالله شوفتي الحب دا كيف يا عرفه؟! ... اللهم أوعدنا ... قولوا آمين
*زاهي وهبي من ديوانه (راقصيني قليـلاً)[أحد قامات الشعر العربي المفضلين لديَّ ولدى كثير من النساء] ..... يعجبني زاهي وهبي جداً، لأنه: مؤمن بـ أنوثة الحياة ..
تقبلي مروري
10-02-2011, 09:29 AM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
ست الناس الحنيّنة بت الجنيد فعلاً باطلالتك المجد جاء
Quote: نصيحة في بعض الرجال السودانيين بتنطبق عليهم قصتك دي يا عرفة يا ختي بكونوا كمان صااااااااااااابرين وموكلين امرهم لي الله وكمان حق حواء امانة مو قاسي وعسير لوولز
انا غايتو العّينة دي لسه ما سمعت بيها المرأة (الاغلبية )بطبعها بتحب الطبطة والتربيت على الكتف والرجل بحب الكبكبة والتمجيد ..............
بمناسبة زيارتك للبوست اصلك ما بتطلعي فاضية دي هدية ليك كنت محتفظة بيها في الايميل من ضمن الرسائل المفضلة لدي بقلم طبيبة في احد المستشفيات
Quote: ذات صباح مشحون بالعمل في غرفة الطوارئ بالمستشفى وفي حوالي الساعة الثامنة والنصف دخل عليَّ عجوز يناهز الثمانين من العمر لإزالة بعض الغرز من إبهامه، وذكرأنه في عجلة من أمره لأن لديه موعد في التاسعة . طلبت منه أن يجلس على الكرسي المخصص لإجراء الغيارات على الجروح ًوتحدثت قليلا ً وأنا أزيل الغرز وأهتم بجرحه سألته عن طبيعة موعده ولما هو في عجلة من أمره، أجاب: كل صباح أذهب لدار الرعاية لتناول الإفطار مع زوجتي فسألته عن سبب دخول زوجته لدار الرعاية؟ فأجابني بأنها هناك منذ فترة لأنها مصابة بمرض الزهايمر (ضعف الذاكرة) بينما كنا نتحدث انتهيت من التغيير على جرحه وسألته: وهل ستقلق زوجتك لو تأخرت عن الميعاد قليلا؟ فأجاب: إنها لم تعد تعرف من أنا، إنها لا تستطيع التعرّف علي منذ خمس سنوات مضت قلت مندهشاً: ولا زلت تذهب لتناول الإفطار معها كل صباح على الرغم من أنهالا تعرف من أنت؟!!! ابتسم الرجل وهو يضغط على يدي وقال: هي لا تعرف من أنا، ولكنني أعرف من هي .. ..
اضطررت لإخفاء دموعي حتى رحيله وقلت لنفسي ' هذا هو نوع الحب الذي أريده فى حياتي ' نحن جميعا ً نريد هذا الحب في حياتنا نعم نحن نريد هذا الحب الطاهر في حياتنا نريد أن يحبنا من حولنا هكذا.. حب بلا مقابل حب بدون حتى كلمة شكر حب بلا حدود نعم إنه يعرف جيدا ًمن هي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عرفة محمد سعيد
الطيب رحمه قريمان
SILVER MOON
Ashraf el-Halabi
كمال الشادي
محمد عبد الماجد الصايم
محمد البشرى الخضر
سيف النصر محي الدين
توما
رشا احمد
مهيرة
Hatim Gubara
Ahmed Yousif Abu Harira
طارق جبريل
nada ali
حيدر حسن ميرغني
سناء الصباغ
Rawia
نجلاء قرافي
khaleel
زهير الزناتي
محمد جمال الدين
امير طمبل
Hololy
حذيفه ابراهيم الكباشي
خدر
قيقراوي
محمد سنى دفع الله
اسماء الجنيد
نجوان
فيس بوك
تويتر
انستقرام
يوتيوب
بنتيريست