|
|
 وصلت سدرة منتهاك//الشاعر عبد المنعم محمد أحمد العوض (الرياض)
|
قبل أن تندمل جراحات الحزن الدفين من وفاة الفنان العملاق محمد وردي في إحدى مستشفيات الخرطوم، طلعنا القدر برحيل الأستاذ محمد الحسن سالم (حميد) في طريق شريان الشمال، فلاشك أنه موت عملاق من عمالقة الشعر السوداني الحديث، صاحب مدرسة متفردة في العطاء والثبات على المبدأ، ارتبط اسمه بالنضال الجسور، وحب الوطن، ومناصرة الفقراء والغلابة، وعُرف بالانتماء إلى السودان وطناً لا يعرف الجهوية، والعرقية، والتشظي، كرس حياته لقضايا الناس والطبقة العاملة، فحوكم بالسجن والطرد، لأن الكلمة كانت تعني عنده سلاحاً ماضياً في وجهة كل سلطان جائر.
أخي منصور
رحيل حميد، رحيل لا نُعزي فيه ولكن فيه نُعزى، كما قال الشاعر عبد المنعم محمد أحمد العوض:
"يا ناس نعزي مع منو
ونقول شنو
حامدنو رب العالمين
اسع يباكو مع منو
عاد صح يباكو مع منو
يمكن يباكو مع فطين
قول نورة يبقى مع الحسين"
وإليك النص كاملاً
لمرثية الشاعر عبد المنعم محمد أحمد العوض (الرياض)
دكتور أحمد أبوشوك
وصلت سدرة منتهاك
يا ناس نعزي مع منو
ونقول شنو
حامدنو رب العالمين
اسع يباكو مع منو
عاد صح يباكو مع منو
يمكن يباكو مع فطين
قول نورة يبقى مع الحسين
يا زول اقولك شوفلك اكتر زول حزين
ياهو الوطن
ايوه الوطن
العاشو جواه الخزين
الدهدك روحت وين؟
راجنك آ عشم الغلابة المتعبين
راجنك آ دخري الضعابة المتربين
الدهدك روحت وين؟
عترلك الحجر آآآآآالبخيت؟
شوف عيني شفتك من زمان
في ها المكان
شوف العيان
متوشح انوار اليقين
عترلك الحجرآآآآآالبخيت
شوف عيني شفتك قمت بي فوق السحاب
ولو رهاب
رافع معاك ظلم السنين
الكان مبوق في الارض من قبل حين
شايل معاك ###### الارض نضفتها
وكمترت تشق كل زيف قام في الارض غربلتها
واشوفك اتوكل لوين؟
عتر لك الحجرآآآآآآالبخيت
شفتك كمان في ها المكان
واقف مع محمودنا راضي ومبتسم
تتحدوا لي ظلم المشانق يا الحنين
في البرزخ انت هناك عريس
ختيت كراعك يللا انسفن آآآالعريس
بالله زلزلن آآآالعريس
من جوه غوضن آآآالعريس
وياسيدي سيد العارفين
مقداد انا وجدك امين
كل الجنايز تندفن ؟
امرا عجيب
مولانا صلي على الحبيب
دايرنهن ينداووا بي ضرب الدبيب
امرق واخمش الفضلة من هين الرسول
واكشح عليهن من ثرى الحسوات وقول
شاهت وجوه
بئس الوحوه
والشمس تشرق كل حين
وقبل كدي شفتك مع عيوشة راكبين القطر
زمن القطر!
يوم كنت سايقها للعلاج
والظلم ينهب في الارض يقطع فجاج
الدهدك روحت وين؟
تاريك انت نزلت في نص الطريق
فاقد جنيات الفريق
شوف عيني شفتك يامطر عز الحريق
لاعبتهن
وهدهدتهن
يا الماك ضنين
عترلك الحجرآآآآآالبخيت
وخليتنا لي ظلم البشر
ولي كل شر
يا خي الله في
ايوه الله في
وكمان قوافيك المطرزة باليقين مابرضو في
وان شاء الله مايغشاك شر
سي ياوفي
ساعة مرقت اكيد عرفت منو اللي خان وطنك يا زين
باعوه يوم صلب المسيح
باعوه يوم ظلم الحسين
وانت المشويم بيهو لابسو عرق جبين
والله شفتك شوفة مرة مع الرضيي
نفسك رضيي
شوفة يقين
وكدبنا في الكرو في رجاك
عاد ماشي مننا وين رجاك
وخليت وليداتك براك
كيف بي قفاك؟
يااخوي وليداتك كتار وحملك تقيل
جيش من بطان
وحروم كتار لابسات طرق وناس من زمان
ناس حمتو ناس عيوشة ست الدار وعم عبدالرحيم
والسرة بت عوض الكريم
كترة رجال وكترة حريم
حملك تقيل وعلينا دين
وكل البلد عليها دين
الشورة كيفن شن نسوي مع الولد
الكت شايلو حمل بلد
وتمر الهبوب بقضي الغرد
يا زينا انت رجعت وين؟
عتر لك الحجرآآآآآالبخيت
وانت التعتر لي حجارات الزمان
الفوقن زي حيبي العوارض
وانت ما دايما تعارض
والخوازيق ليها رافض
وعرضحالك للوطن
يا الماك مدغمس
وماك مدلس
وماك مملس
خطو عارض
لفيت بي وين انت وين
ياالجيتنا في نفس الزمان
وادركت لي وتر المكان
وشفعك رهين
شفتك هوي
دايرين تشمولكن هوا؟
يا الكتو متقودين سوا
نازلين علي قيف البحر
اوعك من البحر البحر
بحر التساب الجهجهك
اخد الحذر
شفتك نزلت على الغريق
ووطنك غريق
مالك غتس ؟
بنقرت ما شا الله انت مرق عديل
شايل وطن ما فيهو ميل
زين يا عديل
وكل احرفك وكل القوافي القلتها
ما اتبلت آآآآزول ياجميل
مرقت تسوق المتعبين
مرقت تضاضي المترفين
الشقو صفنا فلقتين
في واحدي سموها الشمال
والتاني سموها الجنوب
وقااااعدين عتاوي المجرمين
لي سفنا
وانت وانا
بيناتنا دين
ما دينك انت علي كتير
نصبح حبايب لامتين
ونحن الحبايب من متين
وعلمتنا
الهودنا
والسودنا
وضوقتن طعم الغنا
وكيفن تكون الدندنا
انعيك وانعي رويحتي معاكا والاجل الدنا
ابكيكا لي مين واللا مين؟
وبدون خلاف
خليتنا للربا والتلاف
دينك علي... تب ماب اخاف
من كل تجار السلاح
الدسو كورية الملاح
وخلونا بايتين القوا
ورافعين سلاح
دينك علي.. تب ماب اخاف انا منهن
بمسك على جمر القضية وافنهن
فنن فنن
لكن ده كلو بي فضل مين ؟
بي الله بي سر القوافي الفيها شين
ياانت ياودالحسن
انت الحسن
وطبعك حسن
يا الفت يعرب والرطن في العالمين
ماشفت شي
الناس ترصرص في الصفوف
ماشفت شي
يا اخي الخريف محق خلا بيوضة
والزمن الصريف فات بي وشي
وواقفين علي طرف النهار المحتشي
وجات البشاير تنتفض
مسنودة بي سحر القوافي المنتشي
الرادي ذاع عبود رحل
عبود رحل؟
يا شعب لامتين التردد والوجل
ياالماك ########
يا انت نمرة تلاتة هوي ارحل كمان
ارحل كما القبلك رحل
ارحل متل ما سوى زين
الدين ده مالازمن اختو علي دين
والدين ده دين
دين الوطن والله دين
لازم ننزلو من ضهر هم السنين
وبلا رتوش
ما مت انت ولا رياح صدك تموت
الزيك انت ولاب يموت
فايتبو فوت
ساريبو مسرانا الامين
يا اخينا انت مرقت وين؟
اظني شفتك مرة فوق جرف القدر
قالو الحجر هو الغدر
الغادر الله يخونو من خان مسلمين
كضب علينا بلا سبب كل ها الدنين
يا ناس نعزي مع منو
عاد صح يباكو مع منو
اخوك فطين
حميدنا يا البكيتنا بي الدمع السخين
نبكيك مع وهج الزمان الانطفا
وتنوم قفا
ياالكنت تابع لي خفاف المصطفي
ووصلت سدرة منتهاك في الخالدين
الشاعر عبد المنعم محمد أحمد العوض (الرياض)
|
|
  
|
|
|
|
|
|
|
 Re: وصلت سدرة منتهاك//الشاعر عبد المنعم محمد أحمد العوض (الرياض) (Re: munswor almophtah)
|
حميد وعبد المنعم
او عبد المنعم وحميد
جمعتهما جريف نوري
ومن بعده جمعتهما صداقة طويلة من الخرطوم الى الرياض
وجمعهما عيش وملح وذكريات وطرائف واشعار
سمعنا بحميد من عبد المنعم ومدنا بأشعاره قبل ان يسمع به تملى شهرته الملا
شاركا معابقوة فى إنتفاضة ابريل ولهما ذكريات طريفة فى المظاهرات سمعناها منهما معا
نعرف كم ألم وحزن الباشمهندس عبد المنعم الكبير على فقد صديق عمره ولذلك جادت قريحته بهذه القصيدة الحزينة الصادقة المعبرة
البركة فيكم ياعبد المنعم وفى كل الشعب السوداني على هذه الفقد الجلل
والرحمة والمغفرة والجنة لشاعر السودان حميد
وحرية سلام حرية
| |
|
|
|
|
|
|
| |
munswor almophtah
عمار محمد ادم
معاوية محمد الحسن
فيس بوك
تويتر
انستقرام
يوتيوب
بنتيريست