|
|
 *** ارجوا الله في الكريبة ***
|
سلام يا اهلنا واريتكم طيبين إن شاء الله
ارجوا الله في الكريبة
نرجا الله في الكريبة , مثلنا الشعبي البسيط في العبارة وعميق في معناه . من شبينا بنسمع بيه وكتير منا لم يري بأم عينه قرية الكريبة الحبيبة بي اهلها وحبانها .
لكن الظاهر البرجو الله في الكريبة زاد عددهم وظنيتو كمان ناس السودان كلهم بتوجهوا لي الكريبة , عشان كده بناغم اهلنا في الكريبة ’ يوسعوا الدارة ويكتروا عناقريبا . ويسولنا نشاء بي محريبا , تفك الريق ساعة الضيق.
من البنشوفوا وبنسمع بيه كل يوم من الوضع الحاصل في البلد , وبعد إختلاط الحابل بالنابل , وسقوط حزب كامل وتدحرجه للقاع بسبب شيخهم الكبير الكنا فاكرنو ركازة قبيلته وحزبه.
يرنو له شباب الإتحادي بعشم باكر وامل ناضر ,, دايرنو دليل المستقبل و الحاضر ..
دراج العطالى وفي الضلام منارة , لكنه للأسف الشديد خيب آمال كل الإتحاديين وشمت فيهم العزال , واولهم الحزب الإنتمى ليه بلا خجلة.
اول الشمات هم زات نفسهم ناس الحزب الركع ليهم بلا هيبة وبلا مراعاة لسمعة الحزب و لمنتمي الحزب من شيوخ ونساء وشباب دماهم تغلي
ينظرون للتغير ومشاركة حزبهم في تغيير الوضع الراهن , مش مشاركته لحزب اعلن التمرد والإنشقاق والحرب على ابناء بلده .
شرد وعذب ونهب اموال المواطن البسيط ,, والمغسة يا مولانا الميرغني إنت جيت في الوقت الضايع وفي لحظات فرفرة المذبوح وخراج الروح.
يعني إنضمامك لي المؤتمر اللآ وطني في الزمن العسير ده , سقطة ووصمة عار في جبين الإتحادي حا تظل تبراه إ لي ما شاء الله , غير كده ما منها ايتها فايدة .
والجماعة المرمطواسمعة البلد من 22 سنة , إنت جيتك دي محسوب معاهم وبقدر ذنوبهم الفي جلدهم ياها المتعلقة فيك اكتر منهم كمان .
يعني لو مشوا الليلة دي ’ إنت السويتها بقت خلاص وإندرعت في عبايتك وعباية الإتحادي المكلوم على القرار القصم ضهره وصغرهم في نظر كل الناس بي سبب تصرفك الغريب في الزمن العجيب !!!!
الوجعة إنضمامك ليهم بعدما إنكشفوا للبعيد والداني , لأنه غير إنه يسقط سمعة حزبك وإسمك ما منها فايدة ترجاها تـــب ...
غايتو يا اهلنا ده واحد من الفروع الكانت خدرا وعودها يانع وقوي و الدايرنها تثمر وتجي تعمر البلد , اها نشف في عز الخريف وخذل ناسوا وكل الأحزاب والغير منتمين لي أي حزب .
ورغم المغاييس دي كلها برضو الشعب ساااااااااكت وبعاين بي عيونو , ولا بختف أي حاجة !!!
ما معروفة المرحلة الجاية دي يحصل فيها شنو ؟ ممكن ببساطة هذا اللأ وطني يملص جلد الدبيب الكان لابسو ويدرعوا في عباية مولانا الوقع في الشرك السام بي إرادته .
عشان كده كلكم ارجو الله في الكريبة ...
متاوقة ..
ــــــــــــــــــــ
والله يا مولانا الميرغني لو كان قام ليك البشير من كرسيه بعدما خرب البلد. ما كان تقبل وتنضم ليهم وتضيع سمعة حزبك بالقرار الغير صائب ده , والما معروفة عواقبه شنو! عشان كدة إنت زاتك الكريبة محمداك محمداك
غايتو الله يستر على باقي الأحزاب , الزمن ده بقى مافي اي شيء مضمون , وبقينا ما قادرين نتحمل اي صدمة تاني
ارحمونا يا ناس
يمهل ولا يهمل
ودعتكم الله
|
|
 
|
|
|
|
اسماء الجنيد
فيس بوك
تويتر
انستقرام
يوتيوب
بنتيريست