|
|
 ترْكين
|
بنشُد تأصيل الغذاءات النوبِية، ومُهْتم جِدًا بالفِلْكُلور بِتاعو، ده غير إنو التركين الحاجة الوحيدة الما بتْشارِكْني فوقا "بِت إبراهيم" الله ده ما كريم ياخ، مرات بسوو حاجات كدي، الغَشيم يِقول ساها الله ساي، عِلا وراها حِكمة بليغة .. أنا أخوك إتْ، إنتو عارفين أسوأ حاجة في ها التركين شنو؟ أسوأ حاجة إنو الواحِد لابُد يِصل لحظة يشبع فيها! وده هاجسي لامِن أدْني مِن طَلِسْ التركين، بكون عارِف إني حأشبع، لِذا أُطيل جلوسي، وأتبع عادتي وطقوسي، فألْتهِم الأولى وأَسْتَودِعُها فاهي، وأُقلِبُها ذات اليمين وذات الشِمال، برَوِية وإحْسان وصمتٍ وإتْزان، وأجول بِطُعْمتي في عرائِرُ فمي وأهْضامه، وأتجنبُ لها الإنْزِلاق، والإنْفِتاق، وأحرِص أن يكون حدِها اللاةِ أو أثناءُها، ولما إسْتَيْئَسُ مِن سُلافةٍ فيها، أمرِرُها للمرئ ، ثُم أمِد أصابِعي مُتَوثِبًا لِطُعْمةٍ أُخرى، قد إصْطفاها بصري مِن بُعْدٍ، فأبدأ بِقطْعِ ما خُبِز، وأحرِصُ أن أتمكَن مِن أن تُطيق أن تُلف مرتَين، ثُم أُزمْزِم إدام الصحن (التركين) ما إسْتطعت، فإنه هو المعني والغايةِ والمُرام، فأغرِف بِلُفافتي التي لفَفْتُها التركين غرف مَن يتسحر غَير مُتَيقِن مِن إفْطارِهِ بِغدٍ، ثُم أوْدِعُها في في، وقد جحظت عَيْناي وخاف أدْناي ، وإرتجف مني الفكُ وشهق الشقُ، وإهْتزت نواجِزي، ونهضت عواجِزي، وإرتفع المِنْكب وزاد الصدر وبانت الأسنان والقواطِع، فإذا أصبحت اللُفافةِ بِتُهامةِ فمي، أطَبقتُ عَلَيها إطْباقِ المطرقةِ على السِنْدان، ولا أغِبُ في تتابُع الطُعومات، بل أتبع الطُعْمةِ الطُعْمة، بعزمٍ وإصرارٍ وبُخْلٍ وإقْتار، وأُضَيِق طريق مَن هو جلس بِيساري ما إسْتطعت، وأشْغِل بِمِرْفقي مَن جلس بِيميني، فأُغالِبهُ في موضِع كُلاه، وأُزاحِمُ بِكاهلي عُلاه، فإذا بلغت حد الشبع أو أدناه، لحستُ بعذبتي أنامِلي، وأقوم أمِش بيتنا
|
|
 
|
|
|
|
|
|
|
|
Re: ترْكين (Re: ايهاب)
|
محمد النيل الفاض وإمْتلا
كيف حالك؟ علك طَيِب
إنت عارِف لامِن كُنا في السودان ومِن شِده ما المحس عِدْمت الصيد والصَياد أكان بنرسِل لِلمحس تركين مِن مُسْتوْطناتِنا التي في الكلاكلات.. السِعر مِن زماااان فوق في السما، ده طعام متعوب فيهو مِن ناحِية الفِكرة والإعْداد وكِده.. مره مِن المرات أهلي في الخُرْطوم تقاعسو عن إرسال التركين ولامِن الحُقن إتْملن والدابي جاتو فضِحْتو، المعنى لامِن إتْضايقت تاااب أنا أخوك وبقيت كُلي جوع، إتصلت بأُمي وقُلت ليها: [لو ما رسلتو التركين ماني صايِم ها السنة!]
| |
|
|
|
|
|
|
|
|
|
Re: ترْكين (Re: عزام حسن فرح)
|
إبن العم عزام
بعد التحية والسلام علكم بخير وأفراد الأسرة الكرام
وعودا حميدا
سأتابع هذا البوست التركينجي ثم أدلو فيه بصحن ماكن ( وليس بدلوي )
تنويه : في بوست سابق قلتُ أن التركينج هو الإسم الصحيح، وتنطق الجيم في مؤخرة الكلمة كما تنطق الجيم في مؤخرة كلمة ( بنج ) ، والغريب أن التركينج والبنج يشتركان في خاصية ( التنميل والخَدَر ) ..
واصل
دمتم
| |
|
|
|
|
|
|
|
|
Re: ترْكين (Re: ابو جهينة)
|
الرَيِس/ أبو جُهَيْنة
مسكاقمي ياخ.. والله مُشْتاقين
| Quote: والغريب أن التركينج والبنج يشتركان في خاصية ( التنميل والخَدَر ) |
ده بِيحصل (التنميل/الخَدَر) لأنو الناس ما بِتتبع الطُقوس.. يعني المفروض يِكون مع طلِس التركينْج صحن بلح يُنافِس صحني الشطة والبصل.. وبعد غسل اليَدَين بِقِشر الليمون ترجى بِالصلاة على النبي، الشاي الأحمر وتمْتنِع تمامًا عن تِقِرْطِع الماء الزُلال أثناء وبعد الأكل لِمُدة لا تقِل عن ساعة زمان، طبعًا ده ما بِسمح تقرطِع الماء الما زُلال وكِده، معيش يا رَيِس أنا قُلت فُرصة أشرح الطُقس لِغير آكِليه
إحْتِراماتي،،،
| |
|
|
|
|
|
|
|
|
|
Re: ترْكين (Re: عزام حسن فرح)
|
وينك يا باشمهندس مصطفي عبد الجليل
عزام أخوي
الباشمهندس دا من أهالي حلفا دغيم
والآن سارح في براري كندا مع عياله
لكين ... صدقني
لو فيها عزيمة تركينج ( كما كتبها الاخ جهينة )
يجيك طائر قاطع الاطلسي والابيض المتوسط والاحمر القاني ولدي سواحل الخليج
يلا ... منتظرين العزيمة
وما تنسي الجرجير
| |
|
|
|
|
|
|
|
|
|
Re: ترْكين (Re: حسن طه محمد)
|
مَولانا/ حسن طه
كيف حالك؟ علك طَيِب
| Quote: يلا ... منتظرين العزيمة |
إنت يا خوي تنْتهِج وصِيتي الوصيتا فوق لايهاب والهددت بيها أنا أُمي
ــــــــــــــ
جِرْجير!
جِرجير مع التركين!
شُفت يا محمد النيل نوع مَولانا ده هو البيرفع سعر التركين..
| |
|
|
|
|
|
|
|
|
|
Re: ترْكين (Re: عزام حسن فرح)
|
الاخ عزام مسكاقمى وحمد الله على السلامه
الحمد لله امبارح فطرت تركين وبنفس وصفك ولو لا كده كنت خليت الشغل وجرى للبيت والتركين بعد كتابتك
وهل تصدق انو الاولاد ربنا يحفظهم ويديهم الصحه اتغدو بالباقى
| |
|
|
|
|
|
|
|
|
|
Re: ترْكين (Re: بدر الدين الأمير)
|
عزام فرح
الف مرحب بالعودة
يا اخ والله العظيم وانا باقرا في مداخلاتك الاولى لعابي سال وشفت صحن التركين المملح بالشطوط والليمون والبصل بين
سطورك - تعبتنى يا رجل
وقفت من التركين منذ فترة طويلة لانو التركين برفع الضغط رغم صحبك ضغط عال العال والحمد الله- لكن الخوف من القادم
منعنى من التركين
يا عزام اعمل فينا خير وكدة شوف لينا لو تركين بدون ملح او تركين ما برفع الضغط عشان نرّجع ممارسة الطقوس التركينية
في البيت
لك تحياتي
| |
|
|
|
|
|
|
|
|
|
Re: ترْكين (Re: عماد حسين)
|
| Quote: لالعودة النازى النوبى عزام فرح |
صديقي بدر الدين الامير
يا زول ها
عزام دا عايزين رجعته بدون تركينج فما بالك مع التركينج
وبالنيابة عنو انت معزوم عزيمة تركينج عندو
خليك رهن الاشارة عندما يتحدد الموعد
عزام
الجرجير الاخضر الحار داك .. علي انا
وبعدين في ناس مستعدين يشترو التكينج بالدولار .. مهما ارتفع سعرو
| |
|
|
|
|
|
|
|
|
|
Re: ترْكين (Re: عماد حسين)
|
Sheikh Eldin Ismail
مسْكاقمي.. هكر في
| Quote: وهل تصدق انو الاولاد ربنا يحفظهم ويديهم الصحه اتغدو بالباقى |
الله يحفظُمْ لينا، بس إنت غلطان، ياخ ربُنا قال: <... وَأَوْلادُكُمْ فِتْنَةٌ...> 28 الأنفال تقوم إنت تبذُل ليهم التركين كَدي يأتوا علَيهِ ولا يخشَون جائِعٌ ولِه! التركين ده بِيُعَدْ رِزِق راسو عديييل كَدي في ها البِلاد، وده بنطبِق فوقو عكس المثل المِصري البِقول:[ لو رزقك ضَيق، وسع الماعون] أها يا خوي التركين ده رزِق ضَيِق ضيق اللحد يا كافي البلا، وغير حلقي ده ما بَوسِعْلو شيتًا تاني.. ده تركين ياخ.. الزحمة أبدًا ما مطلوبة في هكذا وضع.. ياخ أنا أقنعت ليك أولادي الصِبيان إنو التركين ده قبل إتْمام المرحلة الثانَوِية بِسبب بهق عديييل كَدي، ولِلبنات بِسبب ليهِن تساقُط شعر الرأس وهشاشة العِظام.
شيخ الدين، إنت غلطان يا خوي
إحْتِراماتي،،،
| |
|
|
|
|
|
|
|
|
|
Re: ترْكين (Re: عزام حسن فرح)
|
قبال التركين، حمداً لله على السلامة
وليك وحشة
والبورد من وراك بقى (خلا)
--------------
افتقدتك
وفتحت بوست بي اسمك، اتلفح في نص دقيقة ومشى الخور
| |
|
|
|
|
|
|
|
|
|
Re: ترْكين (Re: الشفيع وراق عبد الرحمن)
|
تحياتى
الاولاد تربيه الخرطوم(الكلاكله) ولو كبرو شويه تانى ما حياكلو التركين
اعمل حسابك وخاصه انو المدام ما من عندنا خلى اولادك ياكلو التركين من هم صغار عشان ما يتمردو بعدين ويعماو حزب مع امهم وينسوك التركين
| |
|
|
|
|
|
|
|
|
|
Re: ترْكين (Re: Sheikh Eldin Ismail)
|
شيخ الدين أسماعيل؟؟؟ لك التحيايا أخي و ين الحي بيكم منذ الدراسة
بشندي لم نلتقي أخباركم و الأخوان طارق و قرشي ودكتور محمد الفاتح
صاحب البوست كل عام و انت بخير
| |
|
|
|
|
|
|
|
|
|
Re: ترْكين (Re: محمد عثمان محمد طه)
|
وينك يا ناصر يوسف
زولك بقى (عزام) بالصح
فعجل بالله عليك
تعال شيل حصتك من التركين
قبل الناس تتخاطفا
تركين / عفواً عزام
سلام
وكيف الحال
النشوف لينا دبارة بصل أبيض
| |
|
|
|
|
|
|
|
|
|
Re: ترْكين (Re: محمد جلال عبدالله)
|
Quote: وينك يا ناصر يوسف
زولك بقى (عزام) بالصح
فعجل بالله عليك
تعال شيل حصتك من التركين
قبل الناس تتخاطفا
تركين / عفواً عزام
سلام
وكيف الحال
النشوف لينا دبارة بصل أبيض
|
بـــــــله يا أخوي أيا صاحب الرصيد الذي كِمِل
عَزَّام منو الببقو عَّزااااااااام ده ؟؟ !!!!!!
عليك أمان الله قبال أيام رسلت ليه رسالة في جوالو وقلت ليه إنت معزوم معانا تركين كاااااااارب وارد حفير مشو
رد علي:
إنشاء الله يعمل ليك إسهال
ههههههههههههههههه
حرقتني .. قمت إتصلت عليه .. كررها لي تاني ..
ياخي عزام تركين مستر فرح ده
التركين عندو بيجي من أووووووووول أولوياتو
حامي حمي التركين ولا يعزم عليه أحد .. حتي بت إبراهيم ذات نفسها
لوووووووووووووول
عزام كيفنك ياخي .. مشتاقين
| |
|
|
|
|
|
|
|
|
|
Re: ترْكين (Re: ناصر يوسف)
|
محمد علي حسن
كيف حالك؟ علك طَيب
| Quote: يا عزام اعمل فينا خير وكدة شوف لينا لو تركين بدون ملح او تركين ما برفع الضغط عشان نرّجع ممارسة الطقوس التركينية |
بِالرغم إنو ما في الصالِح أكتِر "المُمارِسين" لكِن يبدو أن الأمر قد أصبح لك هاجِس.. شوف يا سيدي.. أصلو التركين بعد ما يِحِلوهو بِالموية بِتْكون سماكتو غير قابلة لِغرف القُراصة، علشان كَدي بِكثِفو -أي موية التركين- بالدقيق الماخِدْلو في الزيت نضْجه.. أها إتْ تكتِر الدقيق تااااب المُنجض في الزيت وتكشحو بعد نُجوضو فوق موية التركين البِتكون في الوكِت ده بتغلي.. يا زول قول بِسم الله كيف هان عليك تخلي هكذا مُمارسة!
| |
|
|
|
|
|
|
|
|
|
Re: ترْكين (Re: عزام حسن فرح)
|
عِماد حُسَين
كيف حالك؟ علك طَيِب
Quote: والله أمس بالليل.. استمتعنا بكرم احبابنا المحس/ آل رمرم وآل كبوش...
كنا معزومين "تركين" عند صاحبنا المحسي/ مجاهد رمرم في حي الجرادية/ الرياض
وبعد غياب وانقطاع... اجتمعنا واتونسنا حتى الواحدة ليلاً
أخونا مجاهد درج على هذه العادة (عزومة التركين) والغرض منها هو التواصل مع الاصدقاء والمعارف...
وما أحلاها من جلسة، فقد اتاح لنا لقاء أحباب انقطعنا عنهم وانقطعوا عنا مدة طويلة
شكراً لصديقنا مجاهد رمرم |
عِماد إنت "نوبي"؟
لو ماك نوبي، يِبقى "مجاهد رمرم" غلطان
كيف مجاهِد يِعْمِل كِده؟!
لو سمحت ممكِن ترسِل لي تلفونو
ليه رمرم يعمِل كِده أحييييي
يعني التواصُل مع الأصدِقاء والمعارِف ما بِنفع بِصينِية شاي مثلاً؟ بخروف ياخ؟
| |
|
|
|
|
|
|
|
|
|
Re: ترْكين (Re: عزام حسن فرح)
|
مَوْلانا/ حسن طه
كيف حالك؟ علك طَيِب
Quote: صديقي بدر الدين الامير
وبالنيابة عنو انت معزوم عزيمة تركينج عندو |
والله دي أغرب صداقة.. يعني إنت تصادِق بدرالدين الأمير وأنا أنال إثم ها الصداقة، سمِح عليك الله بالمره يعني، ما تعزم معاك إبْليس أهو يِمْكن نقدر نقْنِعو..
قال "بالنيابة" قال، هاك البوليس ده
| |
|
|
|
|
|
|
|
|
|
Re: ترْكين (Re: عزام حسن فرح)
|
الحسادة العليك شنو يا عزام
صحي أنا جعلي، بس حبوبتي "محسية" من الجوابرة
حتى أسأل صديقي اللدود د./ ابراهيم قناوي
عندكم بتسموهم "جبركي"
حبوبتنا دي بتضمن لينا حقنا في قسمة السلطة والـ ترْكين.
وللا إنتا من الجماعة بتاعين "فلان حقو عود مرا"
| |
|
|
|
|
|
|
|
|
 Re: ترْكين (Re: عماد حسين)
|
تحياتى اخى عزام ،،
وعودا حميدا... افتقدناك فى المنبر... ولما طال غيابك سالنا عنك ببوست ولكنه لم يرى النور طويلا ... ويبدو ان العودة هذه المره بنفس وشهية مفتوحة... مبتداها هذا التركين الذى اراه اظهر فيك صفة اخرى هى البخل التركينى ... عموما وجودك سيعيد اثراء البوست بجوانب اخرى مفيدة غير التى ادت الى غيابك ... فبالله ركز عليها ...
وتقبل تحياتى ،،،
| |
|
|
|
|
|
|
|
|
|
Re: ترْكين (Re: عزام حسن فرح)
|
بله محمد الفاضِل
كيف حالك؟ علك طَيِب
| Quote: النشوف لينا دبارة بصل أبيض |
التركين = عزام فرح
البصل الأبَيض = بله الفاضِل
<تِلْكَ إِذًا قِسْمَةٌ ضِيزَى> النجم 22
| |
|
|
|
|
|
|
|
|
|
Re: ترْكين (Re: عزام حسن فرح)
|
علي محمد الخير
كيف حالك؟ علك طَيِب
| Quote: مبتداها هذا التركين الذى اراه اظهر فيك صفة اخرى هى البخل التركينى |
ياخ ده ما بُخْل ده إسمو رِعاية وعِناية مِني -وآخرين- بِموروثاتنا الفِلْكلورِية وكِده.. معقول نبيح لِكُل السودان الفضل هكذا أكلة.. ياخ دي طريقة صُنعِها مُعنْعنة بِأُمهات وجِدات، حاجة إتْوارثناها مِن 5000 سنة معقول نبيحا كَدي لِلعِلاقات العامة.. معقول!
| |
|
|
|
|
|
|
|
|
|
Re: ترْكين (Re: عزام حسن فرح)
|
صديقي عزام
وينك وحمد الله علي السلامه
التركين طبعا اكتر اكله جماعية وبدون ناس لا تستاكل كما يقولون
شفت ليك زول بياكل تركين براهو؟
قبل سنتين كنت في الامارات اعطتني اختي تركين وارد نسابتها اسرة اخي عماد شريف خاطر
فاحضرته للرياض واستخدمنا نصفة وجلس في الفريزر حوالي العامين
لاحظ كان قبلها في تلاجة الاخت لستة شهور
فلو تكرمت علينا ما هي مدة صلاحية هذا الغذاء البديع
طبعا تركته طيلة تلك المده لان الاكلة تتطلب ناس معينين ولا اي عينه
حمد اللهعلي السلامه
| |
|
|
|
|
|
|
|
|
|
Re: ترْكين (Re: عزام حسن فرح)
|
Quote:
شوف يا خوي النصيحة حااار وطيها، عِلا لابُد منها، إتْ بِعودك ده يادوب بِحِق ليك مِن الغنايِم الجاوة وبِت تمودة والدكاي في المُناسبات الكبيرة وتكون بِرِفقة معلوم لدَينا.. يا زول أرضى بِالمقسوم ما تكون كَدي ياخ |
مادام القصة دي جابت ليها دكاي وشربوت، ما في عوجة تب
بس خلوهو "رقيبببببببببق"
واوعكم من حق الشايقية، داك بيخلي الجركانة تنطط في محلها
أنا أخوك إت
| |
|
|
|
|
|
|
|
|
|
Re: ترْكين (Re: عماد حسين)
|
عزام
ألحق أخوك طارق ميرغني .. تراهو من ناس التركين
وووالله انا قايل ود بحري دا ماسمع بحاجة اسمها تركين
وقلت طارق دا زول فن وعود ساي
لكن طلع مثقف ... بسمع تساؤلاتو عن مدة الصلاحية واضح ان ثقافته ناقصة .
يحتاج لتنوير
ودا يكون في عزيمة قوية من جانبكم يلئم فيه شمل التركنجية.
| |
|
|
|
|
|
|
|
|
|
Re: ترْكين (Re: حسن طه محمد)
|
طارِق ميرغني.. حبيبي إنت ياخ
والله مُشْتاقين.. ياخ والله سلامات.. كيف حالك؟ علك طَيِب يا صاحبي.. يا حِليلك
Quote: التركين طبعا اكتر اكله جماعية وبدون ناس لا تستاكل كما يقولون
شفت ليك زول بياكل تركين براهو؟ |
دي مقولة قالوها الشيوعِيين يا خوي وسارت بِها الرطانه.. الله لا كسبُمْ
ـــــــــــــــ
| Quote: فلو تكرمت علينا ما هي مدة صلاحية هذا الغذاء البديع |
يا زول "صلاحِية" شنو؟ حرم أنا عنْدي تركين مِن زمن أبوي الله يرحمو (توفي والِدي في أغسطُس 2005م).. أكان في باغا.. إتْحجر.. شرطت ليك الباغا مِن حدها لِحدها وإنْتزعت منا التركين المُتحجِر زي الترتيب.. ونقعتو في بِسْتله والله مرق أخير مِن الجديد وارد السنة.. غايتو التعتيق ده أكان ما سمِح ظنك الأقبِية التِحِت بِلاد الإنْجِليزا دي سووها لِشنو؟! ياخ في متحف السودان الطبيعي قُبال دور ولا دورين كَدي جابوهو في التِلِفِزْيون مسعول المتحف قال الطير المُحنط ده مِن زمن الإسْتِغلال وكِده والله تشوف الطيره عِلا تقولها إش مِن شِده ما مِفرهِده
إسمع.. عنْدك باقي مِن تركين نسابتك ده؟
| |
|
|
|
|
|
|
|
|
|
Re: ترْكين (Re: عزام حسن فرح)
|
عِماد حسين
كيف حالك؟ علك طَيِب
| Quote: واوعكم من حق الشايقية، داك بيخلي الجركانة تنطط في محلها |
يا خوي ده شرْبوت ولا كَـكـو
| |
|
|
|
|
|
|
|
|
|
Re: ترْكين (Re: عزام حسن فرح)
|
مَولانا/ حسن طه
كيف حالك؟ علك طَيِب
| Quote: وقلت طارق دا زول فن وعود ساي |
ومحمد وردي ده أكان مِدَنْقِدْلو بِلاد؟
| |
|
|
|
|
|
|
|
|
|
Re: ترْكين (Re: mohmed khalail)
|
| Quote: ونقعتو في بِسْتله والله مرق أخير مِن الجديد وارد السنة.. |
لا فض فوك اخي عزام
يالله كلم صديقي المستشار حسن طه وقول ليهو حانتظرو بالتركين في الحج الجاي باذن الله
| |
|
|
|
|
|
|
|
|
|
Re: ترْكين (Re: طارق ميرغني)
|
تركين ني ولا نضيج يا عزّام؟
اهم شيء كوم الناس البيدو طعم للتركين..
وصاج القراصة مدور جنب صحن التركين..
والبصل الببكي داك..
ياحليل زمن مرا ..وموجود بالذاكرة ..
قرية سالي 1984م..
الله يرحمكم ياخالة يامسكة طمبل ويااستاذ عبدالعزيز علي ..
| |
|
|
|
|
|
|
|
|
|
Re: ترْكين (Re: Mohammed Ibrahim Othman)
|
Mohammed Ibrahim Othman
كيف حالك؟ علك طَيِب
| Quote: اهم شيء كوم الناس البيدو طعم للتركين.. |
ايه حكاية "الزِحام" الإنْتو مُصِرين عليها دي!.. كوم ناس بِكون مفهوم في كُنكان.. وِست.. فته.. بوش.. لكِن "تركين" في ها الغُربة، عليك الله ما تهظِر ياخ
| |
|
|
|
|
|
|
|
|
|
Re: ترْكين (Re: Mohammed Ibrahim Othman)
|
| Quote: ياسيدي ما تقول ليّ اربعة صليب املاح او قاوت ،اي واحد يعزمني تركين ح اضرب طوالي .. |
الاخوة النوبيون
نحن اتربينا بالتركين
كنّا فى اقجة وجبتنا المفضلة هى التركين
لا شوفنا صلايب املاح ولا قاوت
لمن جينا الدويم اتحرمنا من التركين وبقيت اوزان خفيفة
غدا الجمعة واحد من أهلنا الدناقلة عازمنا تركين
| |
|
|
|
|
|
|
|
|
|
Re: ترْكين (Re: قلقو)
|
سلامات يا عزام غايتو عفيت ليك
حرقت روحنا وخليتنى زى المجنونة اضرب
فى التلفونات لترتيب فطور الجمعة
ياخ معقولة دى
| |
|
|
|
|
|
|
|
|
|
Re: ترْكين (Re: Siham Elmugammar)
|
Quote: وووالله انا قايل ود بحري دا ماسمع بحاجة اسمها تركين
وقلت طارق دا زول فن وعود ساي
|
صديقي المستشار حسن طه
ياخي نحن بنرقد ........
عرفت كلمة بنرقد دي .... لوما عرفتها اسال
عبد الاله زمراوي ولا عزام
| |
|
|
|
|
|
|
|
|
|
Re: ترْكين (Re: طارق ميرغني)
|
مسكاقمى عزام هكرفى
الملوحة \ التركين \ التركينج
هذه المادة تعطى الانسان طاقة وبها فتمينات وبروتينات مركزة
وتضبخ على طريقتين محلولة (نية)تسمى نية ولكنها تضبخ على نار هادية
ومضبوخة بتحمير البصل وهى اقرب للفسيخ فى هذه الحالة
| |
|
|
|
|
|
|
| |
عزام حسن فرح
محمد النيل
ايهاب
ابو جهينة
حسن طه محمد
Sheikh Eldin Ismail
بدر الدين الأمير
محمد على حسن
عماد حسين
الشفيع وراق عبد الرحمن
محمد عثمان محمد طه
بله محمد الفاضل
محمد جلال عبدالله
mohmed khalail
Mohammed Ibrahim Othman
صلاح الدين نزلاوى
قلقو
Siham Elmugammar
Shaker Hamid
فيس بوك
تويتر
انستقرام
يوتيوب
بنتيريست