|
|
 مشكلتك مشكلة يا عفاف
|
موضوع البوست بيرتكز على الفتاة السودانية و نشأتها و التضييق التي تتعرض له من المجتمع و تتبع كل تفاصيل حياتها منذ ميلادها و الى ان يتوفاها الله
و التضييق و المتابعة و كل التفاصيل المغلوطة التي تحيط بالفتاة التي تبدأ من الأسرة ..الوالد ,الوالدة الأخوان ,الحبوبة و الحبوبات
ديل حنفرد ليهم مداخلات خاصة - و تتعداها الى خارج نطاق الاسرة الى ما هو اوسع و هو مجتمع الحلة بما فيهم من اولاد الحلة؟, رجال الحلة
مرة الجيران, ولدالجيران, راجل الجيران , سيد الدكان ...الى آخر القائمة و تتعدى نطاق الحلة الى نطاق الاسرة الكبيرة .. الخيلان..الأعمام اولاد العم
اولاد الخالة و بعد داك مجتمع الجامعة و بعديه مجتمع العمل , مجتمع الزوج و البشمل الحموات , النسيبة , اصحاب الزوج و هلما جراء
العنوان مإخوذ من موضوع اتكتب في احدى الصحف السوداني قبل فترة احسبها خرتومية سنة فائتة.
|
|
 
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
انتي حامل بي ولد و للا بي بت؟
و الله يا حجة التومة ما عارفة
كدي قومي النشوف بطنك.. انتي حامل بي بت
عرفتي كيف؟
دايرالا عرفة ..بطنك مفروشة ..البت بتفرش البطن و بتسود اللون و الولد بكور البطن و بنور اللون
و انا اقول لوني ده مالو مسود؟
ما تخافي بعد تلدي لونك برجع
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
حتسموها منو؟
عفاف
لييه عفاف؟
ما عارفة ابوها قال امه قالت يسموها عفاف
و انتي الإسم عاجبك؟
ما عاجبني ..كنتا عايزة اسميها امنية
لا خلاص ما عندك طريقة وكت نسيبتك قالت يسموها عفاف يبقى سموها عفاف
عارفة .. عفاف و للا ما عفاف المهم الله يقومني بالسلامة..انا خوفي من الولادة
ما تخافي انا جايباهم عشرة ما شالله .. زمان لا إستيباليات لا دكاترة
و كان الواحدة حصلت ليها مشكلة و قالوا إلا بعملية كان بحصل ليكم شنو؟
تقعد تتألم لمن تموت ..اختي بت ابوي الله يرحما ماتت بالطريقة دي تتألم يوم كامل دايات الحلة كلهم واقفين فوقا لكن يسوا شنو فتح البطن ده ما بعرفوا لي
يا ساتر
احمدن الله على انك ما عشتن الزمن داك ..اسه بقيتن ترقدن للدكاترة وا قوة عيونكن
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
اشتريت لبسات عفاف و الحفاضات؟
اشتريتا
جهزتي خمرتك و حالك ؟ النفاس داير الخمرة و الكركار و المسوح باقي النفاس ما ساهل و الرجال ما بدوروا الزفارة
ما ساهل في شنو؟
دمك نازل اربعين يوم لازم تتمسحي و تتريحي عشان راجلك ما يعيفك
40 يوم؟ ده عذاب شنو ؟
انتي في الأربعين يوم و للا في راجلك؟
انا في نفسي والله ما عارفة اتحمل الحاجات دي كيف؟
كنتن قايلاتنوا شنو ؟ العرس ما ساهل ..تحملي و يرجاك النفاس و راجياك الرضاعة سنتين و راجيك الأصعب من ديل كلهن
ووب علي شنو تاني؟
التربية .. التربية اصعب من الحمل و النفاس و الرضاعة .. اوعك تعملي حركات بنات الزمن ده و ما ترضعي جناك ..الرضاعة بتخلي جناك
حنين عليك
ده كلو راجيني يا لطيف
نان الجنة دي تحت اقدامكن كيف؟ دايرات تخشنها ساكت كده؟ غايتو ما عندكن صبر زيينا.. اسه اي شي عندكن جاهز
غايتو زمنكن زمن العجايب ..نحن زمان النفاس اربعين يوم الراجل ما بشوف زوجته و لا بجي جنبها
اربعين يوم؟
اربعييين يوم.. ما سمعتي ود الرضي قال احرموني و لا تحرموني سنة الإسلام السلام؟
هو كان قاصد شنو؟
عشان زوجتو كانت واضعة و حموهوا ما يشوفا و لا حتى يسلم عليها
اربعيين يوم يشربونا المديدة و يمسحونا بالكركار و الخمرة و نرقد من السرير ما بنتحرك ..الواحدة بعد تقوم من النفاس قمر السبوع الداير.. سمينة و ناعمة و ممسحة.. حلاة الجيهة زمنا
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
قديتو لعفاف اضانا؟
لسه
راجية شنو؟ اخير قبل تكبر
عفاف ما قامن ليها سنينات؟
عفاف لسه ما بقت تقدر تقيف؟
عفاف لسه ما اتعلمت الحبو؟
عفاف لسه ما اتعلمت المشي؟
اشتريتو ليها المشاية؟
عفاف ما اتعلمت قعاد القصرية؟
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: هادي طوبتي
يلا احكي
وكل سنة وانت بخير |
و انتي بالصحة و السلامة يا حبيبة .. ربنا يحقق الأمنيات و يخلي ليك الاولاد و ابوهم
يلا تعالي شاركي و خلينا نشوف عفاف حتصل لي وين هههه
| |
|
|
|
|
|
|
|
|
|
Re: مشكلتك مشكلة يا عفاف (Re: سارة عيسى أحمد)
|
سناء..حبابك يا صديقة
كل سنة و انت طيبة..
اها..
اظرط مشكلة في لحظة ميلادها ، هي طريقة تهنئة ابوها.. بنوع من التهاني السايكوبيتك الحاقدة مثل قولهم (ان شاء الله تربى في عزك لغاية ما تكبر و تكفي ديون ابوها..!!)..
لاحظي وكت داك هي ما عندها القدرة حتى في تقرير مصيرها..!!
شفتي التنميط ده حاقد كيف؟..
مشكلة عقاف بالجد مشكلة..!
كبر
| |
|
|
|
|
|
|
|
|
Re: مشكلتك مشكلة يا عفاف (Re: Kabar)
|
Quote: سناء..حبابك يا صديقة
كل سنة و انت طيبة..
اها..
اظرط مشكلة في لحظة ميلادها ، هي طريقة تهنئة ابوها.. بنوع من التهاني السايكوبيتك الحاقدة مثل قولهم (ان شاء الله تربى في عزك لغاية ما تكبر و تكفي ديون ابوها..!!)..
لاحظي وكت داك هي ما عندها القدرة حتى في تقرير مصيرها..!!
شفتي التنميط ده حاقد كيف؟..
مشكلة عقاف بالجد مشكلة..!
كبر |
كبر مرحب بيك يا صديق و عيدك سعيد و امنياتك محققة
مشكلة عفاف بدت من قبل ما تتولد و قبل ما ابوها يتلقى فيها التهاني السايكوباتيك.. مشكلة عفاف بدت وهي لسه في بطن امها
قالوا البت بتبشتن امها في الحمل و بتسود اللون ..الله يكون في عونك يا عفاف
| |
|
|
|
|
|
|
|
|
|
Re: مشكلتك مشكلة يا عفاف (Re: AMNA MUKHTAR)
|
ها ك التهنئة دي
الله يجعلها من المستورات المتهم برئ حتى تثبت ادانته الا اذا كنت مرة سودانية انت
متهمة من المهد الى اللحد اصلو براءتك دا ما بتثبت ..
اي راجل محول نفسو لتست تيوب لعفاف وهي مذنبة الى ان تثبت براءتها
يوم القيامة..
واشقا عفاف
| |
|
|
|
|
|
|
|
|
|
Re: مشكلتك مشكلة يا عفاف (Re: ABUHUSSEIN)
|
سناء
تحياتي
هو في زول راضي بعفاف?
حتى لما يجو يباركوها ليك, بعدها طوالي يتمنوا ليك التعويض بولد, في المرة الجاية!
حتى هنا في امريكا, حيث تجدين النساء هن الاكثر كطبيبات و ممرضات و استاذات و غيره, اول حاجة لما يعرفوا انك جاتك بت يسالوك :اها حا تحاول تجيب ولد المرة الجاية?
Are you gonna try again for a boy?
انا اي محل امشى مع بناتي, النسوان اول من يبدين الدهشة: كلهن بنات?!!!! انتظر لما يبقن طاشريات و تشوف المشاكل!
All girls? wait till they become teenagers !!
| |
|
|
|
|
|
|
|
|
|
Re: مشكلتك مشكلة يا عفاف (Re: ABUHUSSEIN)
|
سنوية ونجاة وسارة وامنة
كل سنة وانتن طيبات
وكل امانيكن محققة
والله انك امراة دى مشكلة يحلها الشبكة
تبدا من النساء ذاتن
بس قولن يا لطيف
خلونا نوعى عشان نصل
| |
|
|
|
|
|
|
|
|
|
Re: مشكلتك مشكلة يا عفاف (Re: tayseer alnworani)
|
Quote:
قديتو لعفاف اضانا؟
لسه
راجية شنو؟ اخير قبل تكبر
عفاف ما قامن ليها سنينات؟
عفاف لسه ما بقت تقدر تقيف؟
عفاف لسه ما اتعلمت الحبو؟
عفاف لسه ما اتعلمت المشي؟
اشتريتو ليها المشاية؟
عفاف ما اتعلمت قعاد القصرية؟ |
عفاف ح تطهروها متين؟
ما تخلوها تلعب مع الاولاد؟
يا بت نزلى كرعينك واقعدى كويس؟
البت دى خلوها تلبس الطرحه بعد ده؟
ماشه وين يا عفاف؟ لا تانى مرقه ليك مافى ياعفاف؟
حب شنو كمان يا عفاف؟
كن الجامعه دى كده بنطلعك منها؟
اوعك؟ اخير ليكى واياكى وشوفى والله ووالله وقسماً بالله تانى الا تشوفى
اها حجزوكى لى ود عمك ياعفاف؟
كله منك يا ادم يعنى كان لازم تسمع كلام حواء وتطلعونا من الجنه زاتها
خليك راجل ياخ وامشى سلم نفسك للمحكمه الجنائيه وقول اااى اكلت التفاحه
======
سناء عبدالسيد والعيد وكده
ان شاء الله السنه الجايه كمان فى ماندرين
| |
|
|
|
|
|
|
|
|
|
Re: مشكلتك مشكلة يا عفاف (Re: محمد زكريا)
|
سناء ازيك
فعلا المرة زمان لما تطلع من النفاس بتكون عروس بس
سارة عيسى احمد (احمد دي لازم طبعا)
| Quote: ...فتره العقوبة لازم تأديها ومدتها من المهد إلي اللحد ... |
يا اخوانا انا ما فاهم حاجة الجريمة شنو لكن؟
| |
|
|
|
|
|
|
|
|
|
Re: مشكلتك مشكلة يا عفاف (Re: هيثم التوم)
|
Quote: بوست جميل في وقت حا اكون فيهو خارج الشبكه
بتاوق مره مره غايتو .. شكرا يا سنويه :) |
دلوش ما تغيبي كتير و عموماً حخلي ليك فوق لحدي ما ترجعي للشبكة تاني هههه..تسلمي يا حبيبة
Quote: القال ليها تعرس منو ؟ وكمان تولد ؟!
وفى السودان ..
غلطانة أم عفاف . |
و المصيبة الأكبر من ديل كلهن يا امونة انها حامل بي بت.. عليك الله ام عفاف ما خاتية؟؟
تسلمي يا امونة على المرور
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: ها ك التهنئة دي
الله يجعلها من المستورات المتهم برئ حتى تثبت ادانته الا اذا كنت مرة سودانية انت
متهمة من المهد الى اللحد اصلو براءتك دا ما بتثبت ..
اي راجل محول نفسو لتست تيوب لعفاف وهي مذنبة الى ان تثبت براءتها
يوم القيامة..
واشقا عفاف
|
شفتي يا نجو نوع المباركات بتاعت الله يجعلا من المستورات والله يعينك عليها- دي تعتبر مواساة على مصيبة اكتر منها تبريكات لمولودة
| Quote: برضو ما حا يخلوها في حالا يا أمونة كان قررت العزوف عن أي شئ ...الحكاية إنتقال بين السجون بس ...فتره العقوبة لازم تأديها ومدتها من المهد إلي اللحد ... |
على قولك يا سرو كان ما عرسوها كمان دي تهمة تانية و في الحالتين هي متهمة و لازم تقضي العقوبة
من المهد الى اللحد .. الله معاك يا عفاف
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: سنو و ضيوفها سلام و كل سنة و إنتو طيبين
متابعين |
كل سنة و انت طيب يا عادل و عيدكم سعيد انتا و سامية و الأولاد و ربنا يحقق الأمنيات ان شاءالله..
و خليك قريب
Quote: سناء
تحياتي
هو في زول راضي بعفاف?
حتى لما يجو يباركوها ليك, بعدها طوالي يتمنوا ليك التعويض بولد, في المرة الجاية!
حتى هنا في امريكا, حيث تجدين النساء هن الاكثر كطبيبات و ممرضات و استاذات و غيره, اول حاجة لما يعرفوا انك جاتك بت يسالوك :اها حا تحاول تجيب ولد المرة الجاية?
Are you gonna try again for a boy?
انا اي محل امشى مع بناتي, النسوان اول من يبدين الدهشة: كلهن بنات?!!!! انتظر لما يبقن طاشريات و تشوف المشاكل!
All girls? wait till they become teenagers |
!!
مرحبا بدر الدين
ربنا يخلي ليك بناتك و تشوفن في احسن المراكز
للأسف ديل كمان الخواجات الكنا قايلين فيهم نور ود ابو عاشة ..عندي جارتي بولندية عندها بت واحدة في طور المراهقة
لقيتا مرة متجهمةالوش قالت لي البت دي عذبتني و بقت تتأخر و انا بقيت اليوم كله بفتش عليها و اراقبا ياريت لو كانت
ولد ما كنتا حسأل فيها..!!!! و الولد زاتو يخلو يعمل العايزو لييه ؟كان الناس بمسكوا اولادم البنات ما كان بتجيهم عوجة
تسلم على المرور يا بدر الدين
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: salam
vary nice sana
thank you |
تسلمي يا غدوية و خليكي قريبة
Quote: سنوية ونجاة وسارة وامنة
كل سنة وانتن طيبات
وكل امانيكن محققة
والله انك امراة دى مشكلة يحلها الشبكة
تبدا من النساء ذاتن
بس قولن يا لطيف
خلونا نوعى عشان نصل |
و انتي طيبة يا تيسير ربنا يحقق الامنيات..فعلاً مشاكل النساء اساسها النساء ..لأنهم بسخرن نفسهن و بطوعوها بالطريقة
البترضي الرجل حتى لو على حساب نفسهن و صحتن و حياتن .. و نقول يا لطيف .. تسلمي يا سيرا على المرور
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
حليل زمنا زمن الجيهة و السماحة.. الواحدة فينا من تتم 5 سنوات يشلوخوهاو بعد تكبر شوية يدقوا ليها شلوفتا
و يقدوا ليها تخرتا للزمام ..عاد الما بتتشلخ و بتدق شلوفتا و تلبس الذمام ..زول بجيب خبرا مافي
شلوخ و دق شلوفة و قدقيد نخرة ؟ بركة الحاجات دي في زمنا بقت مافي
مالن الشوخ و دق الشلوفة ؟ اسه انا شينة؟
لا والله يا حجة التومة ..انتي سمحة و قيافة لكن الحاجات دي ما بعرف كنتوا بتستحملوها كيف؟
ما قلتا ليك انتن بنات خرقاوات ساي .. نحنا زمان لا بودرة لا احمر شلاليف ..نمسح وشنا بزيت السمسم ..والله فيهو لمعة مع الشلوخ
ما سمعتي عمك عبيد عبد الرحمن قال شنو في الشلوخ ؟
بين خدودن وبين انفصادن .. يجرى بحر السيف يروى صادن
شوف عيونه الاكباد حصادن .. والبطير ما طار من مصادن
لكن عمك العبادي جا خرب علينا بقولو
دون فصاده سواك الهك .. والابار ما لمسن شفاهك
بى فظاظه ما فاها فاهك .. فطره أدبك وطبع انتباهك
اها بعد العبادي قال كلامه ده مرة شلخت بتها و للا دقت ليها شلوفة مافي
هوي كدي قومي نادي عفاف بتك من الشارع ما تخليها تلعب مع الصبيان
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
الطيب شيقوق
( أحمد ) دي مهمه جداً خالص ...الجرائم معروفه ...طلعت آدم من الجنه ...مخلوقه من ضلع أعوج و-..و-..و-
المطرطش
لسه ما بقيت سيراميك إنت ?..واصلو ما تخلي يَحَتِلْ ..نشوف عفاف ولا ود المدير ..
| |
|
|
|
|
|
|
|
|
|
Re: مشكلتك مشكلة يا عفاف (Re: سارة عيسى أحمد)
|
يا سلام يا سناء خليت بوستاتي وجيت اتابعك حرف حرف
مالو ما الحاردلو قال :-
أصلو التوب سمح فوق المبرع ديسا
ستاتو القبيل فوقن شلوخ ود عيسى
سارة (احمد)
| Quote: ( أحمد ) دي مهمه جداً خالص ...الجرائم معروفه ...طلعت آدم من الجنه ...مخلوقه من ضلع أعوج و-..و-..و- |
نعم ولكن لا يؤآخذ إمرؤ بجريرة غيره إن كانت ثمة جريرة يا السارة .
| |
|
|
|
|
|
|
|
|
|
Re: مشكلتك مشكلة يا عفاف (Re: الطيب شيقوق)
|
يا الطيب ..
اتخيل لي سنوية فتحت البوست دا عشان تلقى لينا إجابة على سؤالك دة : جريرتها شنو عفاف دي ؟..ليه الناس ديل ظالمينها كدة ؟..
والمحزن الناس الظالمينها ديل فيهم بنات جنسها ..أمها ..حبوبتا ..خالاتها ..عماتها..
| |
|
|
|
|
|
|
|
|
|
Re: مشكلتك مشكلة يا عفاف (Re: سارة عيسى أحمد)
|
بت أحمد
| Quote: اتخيل لي سنوية فتحت البوست دا عشان تلقى لينا إجابة على سؤالك دة : جريرتها شنو عفاف دي ؟..ليه الناس ديل ظالمينها كدة ؟.. |
يا السارة اختي المجرى العادي لطبائع الاشياء يمكن تغيير مساره بالتوعية من خلال جميع الوسائط الاعلامية لصناعة مجرى آخر لها
| Quote: والمحزن الناس الظالمينها ديل فيهم بنات جنسها ..أمها ..حبوبتا ..خالاتها ..عماتها.. |
صحيح ولكن بمعايير وعيهن وثقافتهن يا السارة . ارجو الا نقس الاشياء بمعاييرنا نحن النخبويين
علينا ان نعمل جميعا كل في موقعة على ترسيخ مفاهيم تناهض هذه الظواهر السالبة
اطيب امنياتي
| |
|
|
|
|
|
|
|
|
 Re: مشكلتك مشكلة يا عفاف (Re: سارة عيسى أحمد)
|
Quote: المطرطش
لسه ما بقيت سيراميك إنت ? |
..
سيراميك ونص وخمسه!
| Quote: واصلو ما تخلي يَحَتِلْ ..نشوف عفاف ولا ود المدير .. |
ليك علي ما يَحَتِلْ
والله ده أهم بوست أقراهو في المنبر، شكراً سناء
ثُمَّن،
بوست جنا المَدير داك الليل هرجله ساكت ـ
كمومية وجوه خُدُرـ فِشان ما تزعل آمعاويه!
| |
|
|
|
|
|
|
|
|
|
Re: مشكلتك مشكلة يا عفاف (Re: محمد عبدالرحمن محمد)
|
Quote: عفاف ح تطهروها متين؟
ما تخلوها تلعب مع الاولاد؟
يا بت نزلى كرعينك واقعدى كويس؟
البت دى خلوها تلبس الطرحه بعد ده؟
ماشه وين يا عفاف؟ لا تانى مرقه ليك مافى ياعفاف؟
حب شنو كمان يا عفاف؟
كن الجامعه دى كده بنطلعك منها؟
اوعك؟ اخير ليكى واياكى وشوفى والله ووالله وقسماً بالله تانى الا تشوفى
اها حجزوكى لى ود عمك ياعفاف؟
كله منك يا ادم يعنى كان لازم تسمع كلام حواء وتطلعونا من الجنه زاتها
خليك راجل ياخ وامشى سلم نفسك للمحكمه الجنائيه وقول اااى اكلت التفاحه |
يا ود زكريا آدم انتقم حقه من حوا في الدنيا و حيفضل ينتقم منها كده لقيام الساعة شكله..ما كانت جنة دي البعذبونا عشانا عمرنا كله دي ههههه
عيدك مبارك انت و المدام و ايامكم سعيدة .. ما عايزين تزورونا تاني لشنو يا ناس بلدنا ما عجبتكم و للاشنو
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: سناء ازيك
فعلا المرة زمان لما تطلع من النفاس بتكون عروس بس
سارة عيسى احمد (احمد دي لازم طبعا)
Quote: ...فتره العقوبة لازم تأديها ومدتها من المهد إلي اللحد ...
يا اخوانا انا ما فاهم حاجة الجريمة شنو لكن؟ |
ود شيقوق إزيك و عيدك سعيد .. غايتو عليك حركات ما فهمتا الجريمة وين لي اسه ؟ كدي اكمل باقي النضم و اخت الحاجات كلها مع بعض
يمكن الرؤية تكتمل و للا كمان نادي سارة تجي تشرح ليك الجريمة وين و شنو
Quote: بوست قيّم، إتمنى ما يَحَتِلْ
-
ألفين سلام سناء |
ما دام سارة قالت ححتل يبقى ححتل
تسلم يا محمد و الفين سلام و تحية
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
تسلم يا ايمن و خليك متابع
Quote: أستاذة سناء ...
قدرك ان يقرأ لك كل حرف
وقدرهم أن يأتوا ليتلذذوا الروعة
وقدرنا أن نكون هنا بامتنان
وقدري وحدي أن آتي متأخراً لأتحمل عناء البوست
وأجلس القرفصاء خلف خلق كثير ...
ليعلو عالياً... |
هيثم التوم
عيدك مبارك و ايامك سعيدة
تسلم كتير على الإطراء و الكلمات الطيبة ..و ان شاالله نكون مفيدين و نستفيد من أرائكم و اطروحاتكم .. تقديري
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: يا سلام يا سناء خليت بوستاتي وجيت اتابعك حرف حرف
مالو ما الحاردلو قال :-
أصلو التوب سمح فوق المبرع ديسا
ستاتو القبيل فوقن شلوخ ود عيسى |
يا ود شيقوق نحنا نصلح و انتا تطمبج.. بأبياتك الجايبا لينا دي شكلكم حتحنوا للشلوخ و شكلو اهلنا حيمسكونا يشلخونا ههههه
ساعدنا بابيات للخدود السادة بالله
ما شوهوك بفصاده على الخدود الساده
طبيعى خلقة ربك ما دايرا اى زيادة
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
| Quote: ود شيقوق إزيك و عيدك سعيد .. غايتو عليك حركات ما فهمتا الجريمة وين لي اسه ؟ كدي اكمل باقي النضم و اخت الحاجات كلها مع بعض |
لا معليش ، يا بت عبد السيد ، في الاول كنت طاشي وما ناقش مرامي البوست لكن من الحلقة التالتة وقدام عرفت مشهادك طب .
| |
|
|
|
|
|
|
|
|
|
Re: مشكلتك مشكلة يا عفاف (Re: الطيب شيقوق)
|
| Quote: يا ود شيقوق نحنا نصلح و انتا تطمبج.. بأبياتك الجايبا لينا دي شكلكم حتحنوا للشلوخ و شكلو اهلنا حيمسكونا يشلخونا |
كان عارفك سادة ما بهبب لبوستيك دا ذاتو تضامنا مع ام عبد الله .
انا غايتو مع الحاجات البتناهضوا فيها دي كولها بالاشروط الاتية :
اولا : ان تكون الشلاخة او دق ال .... او الختان بعد ان تبلغ البنت سن الرشد وتطالب هي نفسها بإجرائها
ثانيا : عندما تتزوج البنت يمكنها ان تطالب أيضا بإجرائها بشرط موافقة الزوج (البالغ) على ذلك ايضا . يعني الرضا في الحالة الاولى من طرف واحد اما في الحالة الثانية برغبة الطرفين.
أي فعل من الافعال التي اشرتم اليها لم تتوفر فيه الشروط اعلاه يعتبر جريمة يعاقب عليها القانون . ولا شنو يا السارة بت احمد؟
| |
|
|
|
|
|
|
|
|
|
Re: مشكلتك مشكلة يا عفاف (Re: الطيب شيقوق)
|
| Quote: والمحزن الناس الظالمينها ديل فيهم بنات جنسها ..أمها ..حبوبتا ..خالاتها ..عماتها. |
الاخت سناء وضيوفك الكرام فى تحسن كبير طرأ على المجتمع الذى كان يمارس الاضطهاد على البنت على ما اسمع
يعنى قد تكون شبه انعدمت مألة الختان فى السودان الا القليل فى القرى وطبعا دى دايره توعيه شديده وانا ارى من يقوم بهذا العمل
سوف يناله الاجر والثواب من الله ويكون ساهم فى انقاذ هولاء المسكينات من تبعات هذه العاده التى تنصف بانها عمل اجرامى
فى راى الشخصى
مسالة اختيار الزوج بدون موافقة البنت على هذا الشريك ودا حاجات للاسف تعتبر ايضا من الظلم الكبير فى حق الفتاه
زوج طاعن فى السن او شاب غير مرغوب فيه من قبل الفتاه وتعيش حياتها فى جحيم مع الاثنين
النظره الدونيه للبنت انها كان فاس مابتكسر الراس وهذا المنطق غلط بالتاكيد
عفاف ربنا يكون فى عونها وهى التى تسود اللون واختير لها اسم غير راضيه عنه (امها )
وسوف تختن لان ام ابوها الحبوبه هى التى تقرر فى هذه الامور
لدى الكثير ما اعرفه فى مجتمعاتنا تدمع له العيون تجاه البنات
شكرا على الطرح الجميل ولكن فى راى لايصل الى المتضررين لانهم لابسمعوا ولا بشوفوا
جنس نضمك دا للاسف ...اذن ماهو الحل حتى تعم الفايد وينقذ ما يمكن انقاذه ؟؟؟
| |
|
|
|
|
|
|
|
|
|
Re: مشكلتك مشكلة يا عفاف (Re: خالد المحرب)
|
الطيب شيقوق ..صعبتها لكن ...موافق لكن بشروط ؟!...عموماً أو يخيل إلي إن التشوهات الخلقيه من شلوخ وخلافه يمكن التعايش معها ..لكن التشوهات البعملوها في نفس البت من هي صغيره دي المشكلة الحقيقيه ..
القهمه والقبقبه ..ويا بت اسكتي ما تعلي صوتك انتي بت ...ما تعترضي انتي قاهر ولا شنو ؟...بت الرجال ما بتتكلم كده ..
تطلع شخصيات ضعيفه غير قادره علي إتخاذ قرارات سليمه في المستقبل ..
| |
|
|
|
|
|
|
|
|
|
Re: مشكلتك مشكلة يا عفاف (Re: سارة عيسى أحمد)
|
الاخت السارة بت احمد
| Quote: الطيب شيقوق ..صعبتها لكن ...موافق لكن بشروط ؟!... |
هاتيها بالله فنحن في انتظارها ونأمل ان تكون بعيدة عن التعسف .
Quote: عموماً أو يخيل إلي إن التشوهات الخلقيه من شلوخ وخلافه يمكن التعايش معها ..لكن التشوهات البعملوها في نفس البت من هي صغيره دي المشكلة الحقيقيه ..
القهمه والقبقبه ..ويا بت اسكتي ما تعلي صوتك انتي بت ...ما تعترضي انتي قاهر ولا شنو ؟...بت الرجال ما بتتكلم كده ..
تطلع شخصيات ضعيفه غير قادره علي إتخاذ قرارات سليمه في المستقبل .. |
اذن ما إختلفنا ياخ
| |
|
|
|
|
|
|
|
|
|
Re: مشكلتك مشكلة يا عفاف (Re: الطيب شيقوق)
|
| Quote: كان عارفك سادة ما بهبب لبوستيك دا ذاتو تضامنا مع ام عبد الله . |
التحية ليك يا ود شيقوق و ل ام عبد الله
ابداً لا انظر للشلوخ على انها شيئ قبيح..شفناها في اماتنا و حبوباتنا و خالاتنا..و كانت ميزة جمالية في زمنم..و لو اني على حسب معلوماتي المتواضعة
عارفة انه الشلوخ ابتدعت اصلاً من اجل التمييز لأنه في الازمان البعيدة كان المصريين و الاتراك بسرقوا الأطفال من السودان لتسخيرم للخدمة و غيره
فكانت كل قبيلة بتحاول تميز اطفالا بشلوخ تكون ظاهرة في الوش عشان يعرفوا يميزوا اولادم ..فالشايقية يشلخوا بالعرض و غيرم بالطول و حتى القبايل الجنوبية
كانوا عندهم الشلوخ ..الديكنا ليهم طريقة و الشلك ليهم طريقة .. وكا ن لو في طفل من القبيلة اتسرق اهله يسافروا مصر و يبحثوا عليه و كان بلقوا اطفالم بسهولة ..الجعلي يمشي يفتش ولدو يقول للشايقية لقيت طفل منكم في الحتة الفلانية في مصر و هكذا ..و بعد داك شكلها الحاجات بمرور الزمن اخدت طابع الجمال
والله اعلم.. لكني برجع و بقول انها فيها من القسوة ما فيها و بتعرض حياة الأطفال للخطر .من تتنوس و غيره ده غير الإيزاء النفسي لطفلQuote: انا غايتو مع الحاجات البتناهضوا فيها دي كولها بالاشروط الاتية :
اولا : ان تكون الشلاخة او دق ال .... او الختان بعد ان تبلغ البنت سن الرشد وتطالب هي نفسها بإجرائها
ثانيا : عندما تتزوج البنت يمكنها ان تطالب أيضا بإجرائها بشرط موافقة الزوج (البالغ) على ذلك ايضا . يعني الرضا في الحالة الاولى من طرف واحد اما في الحالة الثانية برغبة الطرفين.
أي فعل من الافعال التي اشرتم اليها لم تتوفر فيه الشروط اعلاه يعتبر جريمة يعاقب عليها القانون . ولا شنو يا السارة بت احمد؟ |
والله يا ود شيقوق انا بعارض و بشدة كل الحاجات الفوق دي من شلوخ لختان لدق شلوفة و لكل شيئ يأذي المرأة نفسياً او جسدياً
| |
|
|
|
|
|
|
|
|
 Re: مشكلتك مشكلة يا عفاف (Re: سارة عيسى أحمد)
|
| Quote: يا محمد ...أنا والله من قلة علمي إفتكرتها غلطه مطبعيه ...ربي زدني علماً |
ساره سيراميك،
أطلبي العلم، ولو من بت الشمِش، في الصين
حتك، بي لغة العنكولابي ده، تعني: حته اَنتي؟
وبي لغتنا نحنا، المسغفاتيه وكدا: حتى أنت يا بروتس
ـ
سناء،
معليش علي الطرطشه،
لاكين برضو فيها أب للبوست
ولّلا مو أيضاً؟
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: يا بت يا عفاف راجعة من المدرسة بدري مالك؟
الأستاذة قالت لي ارجعي البيت يا حبوبة
قالت ليك ارجعي البيت لشنو ؟ انتي بتتلبدي كده مالك ؟ بتغتغتي في قميصك مالك؟ده شنو الفي قميصك ده؟ ووب علينا ده الكان ناقص
فطومة.... يا بت قشرونة
في شنو يا امي ؟
تعالي.. بتك بلغت.. امشي خليها تغير هدوما و اديها دلقانة و لا نصيبة و تعالي لي راجعة لي هنا دايرا اوصيك
سمح يمه..تعالي يا قشار ..ده شنو ده .. امشي الحمام.. ووب علي انا طيري ادخلي الحمام
غيرت هدوما؟
ايي يمه غيرت
شوفي اسمعي هنا ده ..بتك دي ما تغيب من عينك و لا ثانية.. درس العصر تاني مافي ..مراسيل للدكان و للجيران مافي ..دايرة تتناولي
حاجة من الجيران بالحيطة فهمتي؟ نعمات دي عندها 4 اولاد ..مراسيل للبت تاني مافي ..فاهمة الكلام ده و للا ما فاهمة؟ |
دي بداية البوست،
القبلو توطئه
ـ
حسب فهم المطرطش
سناء،
شكراً من هسع لااا بعد باكر والبَعَدو
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
عفاف مشت وين؟
ما مشت حنة مناهل بت زينب يمه؟
اللعبة دي ما خلصت قبيل يا بت
خلاص يا امي البيت ما في طرف الشارع ..بتكون بتخدم مع البنات
انتي وكت ما مشيتي سايبة بتك تمشي براها مالك؟
انا امشي بي وين يمه؟ شكلي قربتا.. والله خايفة شكلي حجيب بت تاني
قصدك بت تالتة
عادل عشمان في ولد
عادل براهو ما سمعتي امه تطاعن فيك بالكلام كيفن؟
ان شاالله اجيب ولد
لا حتجيبي بت ما شايفة شكلك عامل كيف ما تعشمي في الولد..عاد عادل ليهو حق الرجال كلهم بدوروا الولد البشيل الإسم ..يسوا بالبنات شنو؟
يا امي هو بكيفي؟
ما كيفك لكن ده حظك كده.. اصلن البنات المطرطشات بلدن البنات .. اقعدي الدي في البنات كده ..خلي عادل يمشي يعرس فوقك ..امه كلاما واااضح
ما تتخجي فوقي امشي نادي اخوك خلي يمشي يجيب عفاف
................................................
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: ساره سيراميك،
أطلبي العلم، ولو من بت الشمِش، في الصين
حتك، بي لغة العنكولابي ده، تعني: حته اَنتي؟
وبي لغتنا نحنا، المسغفاتيه وكدا: حتى أنت يا بروتس
ـ
سناء،
معليش علي الطرطشه،
لاكين برضو فيها أب للبوست
ولّلا مو أيضاً؟ |
محمد ود عبد الرحمن المسغفاتي.. انتا و العنكولابي فاكهة البوست ده ..تخش في اي وكت
باقي كلامك بترد عليهو سارة و انا بجيك برواقة للرد بس نشوف عفاف دي نهايتا وين
| |
|
|
|
|
|
|
|
|
|
Re: مشكلتك مشكلة يا عفاف (Re: محمد عبدالرحمن محمد)
|
المطرطش
Quote: زولن يقولك حتك دايرا يمشي وين من عوالم عفاف؟*
ـسي سي: ساره سيراميك |
حقو تحترموا الراي الاخر وان طالب بالفسيخ ياخ
بعدين اقول ليك
ما تشرح ليهم مفرداتي تاني الا بعد ترجع لي واديك القرين لايت
يلا اخليك تمشي مع الناس السادة وكدا !!!!!!!!
| |
|
|
|
|
|
|
|
|
|
Re: مشكلتك مشكلة يا عفاف (Re: الطيب شيقوق)
|
| Quote: يلا اخليك تمشي مع الناس السادة وكدا !!!!!!!! |
يالنقلوك من جنبنا
واناري
الجميل الساده وحشتنا
-
ود السافل ده دحين مو من زمن قِطِّيع الجضوم داك؟
-
إستمتع بالفسيخ
نحنا ناس جمبري فِرِشْ وسااااده
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: لا خلاص ما عندك طريقة وكت نسيبتك قالت يسموها عفاف يبقى سموها عفاف
|
I am sure when your kids (boys) get married you will do the same to there wife,s.
guess what ? all those grand moms use to be girls too.
hhhhhhhhhhhhhhhhhhhhhhh
happy Eid by the way
| |
|
|
|
|
|
|
|
|
|
Re: مشكلتك مشكلة يا عفاف (Re: محمد عبدالرحمن محمد)
|
| Quote: يلا اخليك تمشي مع الناس السادة وكدا !!!!!!!! |
بجيك يا ود شيقوق اكمل حديثي معاك و لحدي ما اجي اسمع كلمات عمنا ود البنا في الخدود السادة
ارجع بسلامي يا قمري الفريع
قول للسادة بعدك لي السم جريع
حظي سواده يشبه شعرك ده البريع
غيثنى ولو مناما بقربك سريع
الإمضاء
ذات الخدود السادة
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: I am sure when your kids (boys) get married you will do the same to there wife,s.
guess what ? all those grand moms use to be girls too.
hhhhhhhhhhhhhhhhhhhhhhh
happy Eid by the way |
ناس امريكا..انفضوا الغبار .. وين يا مان .. شوق شديد والله و العيد ينبارك عليكم
قلتا لي كل الحبوبات كانوا بنات ههههه ..انا حكون حبوبة مودرن لكن ما زي حبوبة عفاف
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
إتفضلي يا فطومة شوفي بتك جاية انصاص الليالي ماشة ليها مع واحد
يا امي....
اسكتي ..سجمي .. ده منو الحايمة معا بالليل ده؟ ده منو ؟
ده ما اسعد
اسعد شنو؟ اسكتي ما بتخجلي
الحفلة دي ما انتهت قبيييل .. انا قلتا بتكوني بتضايري مع البنات
تضاير مع البنات ؟ انتي خالاها من الاول تمشي لييه؟ بتك دي اخير تلميها عليك
الليلة ووا فضيحتنا فوق الحلة يا فطومة.. اضربا كسر ليها كرعينا البتتحاوم بيهم ديل
خالي والله انا..
اسكتي بس
وصلني والله عشان خوفتا ارجع براي
اطمي بلا يخمك ..كان دايرة تجيبي لينا الكلام ..طول عمرنا عايشين فوق الحلة دي بسمعتنا..امك دي ما كانت بتصل خشم الباب ده كان ما معاها اخوها و للا ابوها
وانتي اقعدي خلي بتك تتحاوم لمن تجيب لينا بكرة نصيبة الله لا كسبك انتي زاتك..بتك دي اقهريها الباب ده تاني ما تشوفو
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
هوي ناس البيت صباح الخير عليكم
اهلاً يا بلالة اتفضلي
دابكم بتشربوا في الشاي؟
دابنا شنو عاد .. الواضة ما دابا صبحانة.. اخت ليك جنزبيل في الشاي ؟
آي و ختي لي اربعة ملاعق سكر
اشربي يختي ينفعك
نشرب في زواج عفاف إن شالله
في حياتك يختي
إلا قولي لي .. امبارح دقيتو عفاف في شنو؟
دقيناها؟؟؟؟؟
اي انا ما سمعتا الكلام كله.. اها قلتا اكلمكم إتو ناس غاليين عندي .. و للا اقولك بري اخير ما اقول ليك .. ما بدور السواطة و عبد الباقي محذرني
من يوم شكلتي مع ناس حياة
الله يخليك للزي ده يا بلالة يختي احكي عايزة تقولي شنو
بري بري
خلاص علا كيفك
لا خلاص النكلمك يا شريفة يختي ترا ما بدور ادس منك شي.. اليوم داكا ..ود موسى سيد الدكان مشيت اشتري منو نص كيلو طحنية
اها و بعد داك
ااها قال لي شاف ليك عفاف في طرف الشارع مع اسعد ود عبد الوهاب يتوسوسوا سااااهي
بتقول النصيحة يا بلالة؟
اجي ؟ ود موسى مالو مات؟ ما هداك امشي اسألي.. خلاص يختي ودعتكم الله ماشة السوق اجيب لي خدرة
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
| Quote: ما بدور السواطة و عبد الباقي محذرني |
ازيك يا سناء
حقو نوع بلالة ده يصنفوهم مع العادات الضارة من شلوخ وختان ودق شلوفة وخرم الزمام وغيره ،
وتحاربوهو بي ذات الضراوة.
دي بالمناسبة كائنات اضر من العادات الضارة ذاتها
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
اسه يا فطومة البت دي كان عرستو ليها امير ود عشة مالو ؟ بدل طالعة فينا و نازلة جامعة و كلام فاضي
امير ود عشة شنو بس يا امي .. انا عايزاها تقرى و تكمل تعليما ..ما عايزاها تكون زيي
تكون زييك و انتي اسه مالك؟ و نحنا ما خليناك تقري؟؟
خليتوني اقرى لحدي اولى ثانوي بس .. اريت كان خليتوني اكمل قرايتي
يا بت انتي مطرطشة؟ اسه انتي مالك ؟ ما عرستي و استرتي و للا كنتي دايرة تبقي لينا زي نادية بت محمود ابت العرسان في سبيل الجري ورا القراية
هديك قاعدة بايرة لا عرس لا جنا ..حالك مالو يا الغبيانة؟
مالا نادية قرت و تمت جامعتا وشغالة و بمهيتا و عربيتا
والله انتي غبيانة.. العربية و للا الراجل يا بت؟؟؟؟؟؟؟؟؟؟؟؟؟
ترا المهية انتي ما ناقصك شي ..عادل بصرف عليك و ما بقصر فيك و عنده العربية.. و للا العربية إلا تسوقنها إنتن براكن حتى تبقى ليكم سمحة!!
غايتو حوامة بنات الزمن ده و لفهن بالعربات براهن ده مااا داخل لي راسي
عادل شنو يا امي .. ما هدا عرس فيني
ما يعرس كان عرس ..محللات ليهو اررربعة .. و كان انتي تشيلي و تلدي ليهو في البنات
و اسه العرسا ما هندي جابت ليهو بتين .. وينو الولد الجابتو ليهو؟
مخيرة بمشي بعرس فوقا البتجيب ليهو الولد
يقعد يعرس لمتين بتو خشت الجامعة
يعرس كان عرس .. كمان الراجل بقيف من العرس ؟ انا ابوي عرس امي و عمره 70 سنة و امي كان عمرها 14 سنة
| |
|
|
|
|
|
|
|
|
|
Re: مشكلتك مشكلة يا عفاف (Re: Hani Arabi Mohamed)
|
سلام
و عليكم السلام
ممكن نتعرف؟
.......
بتقري في ياتو كلية؟
علوم إدارية
شكلك برلومة مش كده؟
ايي
انا سينيرك في تانية و بقرى كمبيوتر .. كدي اول حاجةاسمك منو؟
عفاف
إسم جميل والله
تسلم
زييك كده
الله يخليك من ذوقك
لا والله ما بهظر دي حقيقة
إبتسامتك برضها حلوة.. على فكرة انا اسمي نزار
تشرفنا يا نزار
ساكنة وين يا عفاف؟
ساكنة الخرطوم
انا من امدرمان
ممكن نمشي نشرب بارد في الكفتريا؟
ممكن
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
البرلومة دي حلوة
حلوة لكن خفيييفة
بتعرفا؟
بعرفا شنو.. ربطتا معاها كمان
يا زول؟
لينا كم يوم ..حبكانات تقيلة و حاجات تانية حامياني..
و نحنا نقول نزار ده غاتس وين و داكي المحاضرات
إنتوا جادين؟ محاضرات شنو..تاني ما اظن بتشوفوني في محاضرات
و البرلومة المسكينة دي شكلها حتترفد من اول سميستر كان علمتها تدك من اسه.. هههههههه
هههههههههههه.. خلاص الزولة دي شكلها زهجت من الإنتظار ..اشوفكم آخر اليوم يا شباب
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: ازيك يا سناء
حقو نوع بلالة ده يصنفوهم مع العادات الضارة من شلوخ وختان ودق شلوفة وخرم الزمام وغيره ،
وتحاربوهو بي ذات الضراوة.
دي بالمناسبة كائنات اضر من العادات الضارة ذاتها |
بالتأكيد يا ابو حريرة نوعية بلالة دي من العادات الضارة جداً التي تجب محاربتها بالمقاطعة التامة ههههه
لكن اتخيل لي الزي بلالة ديل من العادات الماحتنتهي من مجتمعنا ..بالعكس الزيها ديل ماشين زايدين
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: جميل جداً هذا الموضوع.
:) وبانتظار مكتوب آخر عن معاناة آدم السوداني .... (التي لا تقل عن معاناة حواة؛ لكن ربما أتت بصورة مختلفة). |
كلام جميل يا هاني .. بتفق معاك انه آدم ممكن يكون عنده معاناة ..لكن ابداً ما حتساوي و لو جذء بسيط من معاناة حواء
على العموم تعالوا اطرحوا معاناتكم هنا و نحن لكم من المتابعات و بعد داك نقرر إذا كانت معاناتكم بتقل و للا بتزيد و ممكن نساعدكم برضو
في تخفيف معاناتكم ^_+
| |
|
|
|
|
|
|
|
|
|
Re: مشكلتك مشكلة يا عفاف (Re: محمد عبدالرحمن محمد)
|
الف مبروك تخرج عفاف
الله يبارك فيكن
اها عاد يا فطومة بعد ده شوفوا ليها واحد من ولاد عمها و لا من ولاد اخوانك عرسوهو ليها
والله بتي قالت ما عايزة تعرس اسه ..عايزة تشتغل و تشوف ليها وظيفة كويسة ..و انا بصراحة ما عايزاها تكون زيي
يختي الوظيفة ملحوقة خلي البت تعرس اول
اي والله يا فطومة كلام إخلاص صاح .. البت من تباري الوظيفة و تباري درب القراية الرجال ما بدوروها ..بقولوا كبيرة
صدقتي يا امونة انا امل بتي خليتا خلصت الثانوي و طوالي عرستا ليها..ما شاءالله عليها اسه عندها 6 اطفال
ما اصلو الجيهة و السماحة عندها سن معين للبنات
عشان كده يختي اخير شوفي ليها عريس
ايي والله
جبنتك مظبوطة يا فطومة و نجاح عفاف مبروك عقبال نجي نشرب شربات عرسا
في حياتكم إن شاالله تسلموا
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
عفاف إزيك
اهلاً كيفك يا عماد
تمام والله على وين؟
و الله ماشة اقدم لي لوظيفة في بنك
انتي كنتي قريتي شنو؟
قريت علوم إدارية بنوك و تأمينات
إلا بنك يعني؟
لا ما بالضرورة بس شغلانية كويسة و السلام
طيب انا صديقي مدير شركة و بشغلك لأنه ما برفض لي طلب ..بتكوني فاضية متين عشان نمشي ليه؟
ممكن الليلة انا بعد اقدم شهاداتي للبنك ما عندي حاجة تانية
الليلة انا مشغول خليها بكرة على الساعة 10 تعالي هنا في المحطة و نمشي ليه سوا
تمام
ده رقمي اديني فيه رنة عشان اسجل رقمكيلا لبكرة سلام
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
Quote: ولو كان ما أدتو وش ..يطلعه معقده وعندها نفسيات :))
مسكينه عفاف..
سنويه ازيك .. |
تمام يا سرورة انتي عاملة شنو؟
عندك حق والله يقولوا معقدة و للا يألفوا فيها كلام لا سما لا واطة.. مسكينة ساي هههه
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
الأستاذة سناء وضيوفها الكرام
بوست مهم ومفيد جدا..تسلمي
أها عفاف بعد تكبر شوية وتعرس ، ولا قدر الله بعد سنة او سنتين ما ولدت ، تعالي شوفي التحشر والأسئلة المحرجة من نوع : لسه ما بقيتو تلاتة ، وكان المدة طالت شوية تصل الجرأة ببعض الناس ويقولو لعفاف امشي انتي والراجل اكشفو عند دكتور ..الخ ...كل هذا التحشر والأسئلة وينسو قدرة الله وحكمته .
تحياتي ووافر احترامي
| |
|
|
|
|
|
|
|
|
|
Re: مشكلتك مشكلة يا عفاف (Re: محمد عبدالرحمن محمد)
|
الزملا و القراء الإعزاء مسائكم او صباحكم خير
بحمل عفاف ما حتنتهي المعاناة .. في إمكانية انها تولد ولد او بت او تيمان ولد و بت او ولديين او بتيين او يكون حمل كاذب ههه جايز موش؟
او تولد ولدة واحدة و تاني ما تولد .. و كل الخيارات الفوق قد تشكل ليها معاناة او تتسبب ليها في خلافات.. ممكن زوجها يكون داير بت
او نسيبتا تكون دايرة ولد او تكون دايرة تلاتة اطفال و زوجها ما عايز غير طفل واحد و نسيبتا دايراهم ستة و حمواتا عايزنهم اربعة.. ممكن
الإختلاف يكون حول تسمية المولود\ة .. ممكن يكون في تكاليف السماية ممكن يكون في اي شيئ
الخلاف موجود في العلاقات الإنسانية لا سيما في العلاقة الزوجية- و بهمني هنا جانب المرأة- و دي سنةالحياة .. لكن يبقى نحن علينا نشوف الطرق الممكن نحنا نحل بيها
او نبعد بيها عن الخلافات ما امكن .. و الخلافات للأسف وقعها بكون اقوى على المرأة او الفتاة او الأخت او الزوجة او الإبنة
خلافاتنا بتجي من وين؟ من تدخل الآخريين في تفاصيل حياتنا.. و بوصفنا سودانيين تلاقانا دايماً بندي الآخريين فرصة انهم يتدخلوا في تفاصيل
حياتنا الى حد اننا ممكن نجاملم على حساب حاجاتنا و نجاحنا و سعادتنا!!
و تدخل الآخريين ببدا في انه نتزوج منه و البنتزوجوا ده جنسه شنو و العرس يكون وين و الفنانة منو و الشيلة كم و التكاليف كم ..
السماية متين و اسم المولد شنو.. وكل زول براي
و نواصل
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
و زي ما قلتا ليكم في مقدمة البوست حبيت ان القي الضوء على بعض او قليل مما تتعرض له الفتاة السودانية من حصار او تضييق او تضليل او ظلم
او إضطهاد - من المجتمع السوداني ابتداءً من الأسرة او المجتمع الصغير و مروراً بالحلة و الجامعة و مجتمع العمل و اسرة الزوج..
طرحت الموضوع في شكل قصة او رواية حتى اخرج بكم من الجمود و الرتابة و الجفاف الذي قد يصاحب الطرح العادي.
تطرقت لعادات و ممارسات كانت بتمارس على الفتاة في زمن حبوباتنا, زي الشلوخ , دق الشلوفة, و رغم انه العادات دي اندثرت الحمد لله لكنني تعمدت
التحدث عنها لنبعث في نفوسنا الأمل في انه ممكن نتخلص من بقية العادات الضارة .. حتى انني ذكرت بعض الطرق التي ادت لقتل تلك العادات و هي الفن
والفن يا اصدقائي رسالة كبيرة و سامية خصوصاً عند توظيفه في خدمة المجتمع.. عندما قام شعراء الحقيبة و مغنيين الحقيبة برفض تلك العادات في اشعارهم
و غنائهم ..بدأت تلك العادات في الإندثار شيئاً فشيئا الى ان تلاشت.. وقد استشهدت ببعض من ابيات شعر من غناء الحقيبة..إذاً لا تجهلوا حقيقة الفن
لأني و الجميع يعرف إستخفاف البعض من المجتمع السوداني بالفن- و اعني الفن الهادف.
تطرقت الى الحديث عن عادة كانت تمارس في عهد حبوباتنا و لكنها ما زالت تمارس الى يومنا هذا للأسف و هي عادة الخفاض .. و لا ادري ما هو سر التمسك
بهذة العادة رغم انحسارها الى انها ما زالت تمارس .. و لا ادري سر إهتمام السودانيين بتلك المنطقة قبل و بعد الزواج .لكن اعتقد انه علينا
بالمواصلة في محاربة تلك العادة حتى نقضي عليها .. بقي ان اقول ان تلك العادة للأسف تمارسها امهات متعلمات من هذا الجيل - على بناتهن.
نواصل
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
مسائكم خير و نأسف على الإنقطاع
و نقيف شوية على معاناة البنت داخل الأسرة .. و قبل ان تولد .. هناك اعتقاد من البعض للأسف بأن الحمل بالبنت ( ببشتن المرة) بتسويد لون
المرأة في اثناء فترة الحمل و بترهل جسمها.. ده غير انه الكثيرين لا يحبوا ولادة الإناث و هذة عادة موروثة منذ الجاهلية رغم مرور اكثر من
1430 سنة على الجاهلية لكن للأسف هذا حال الكثيرين ..{ وإذا بشر احدهم بالأنثى ظل وجهه مسوداً و هو كظيم يتوارى من القوم من سوء ما بشر به
ايمسكه على هون ام يدسه في التراب ألا ساء مايحكمون }.. ديل ناس الله يجعلا من المستورات و الله يديك الولد في المرة الجاية..
و بعدها بتجي حتة إضطهاد المرأة (الأم) بأختيار اسم المولود الممكن ما يكون عاجبا .. يعني هي تحمل و هي تولد و تتألم و تجي النسيبة و للا الحماة
و للا الزوج نفسه و يختار الإسم للمولود|ة. في الحتة دي بعجبوني المصريين لمن يجوا في مستشفى الولادة و يسألوا عن اسم الطفل بقصد إستخراج شهادة الميلاد
بتوجهوا للسؤال عن الإسم من الأم و إذا حب الأب التدخل يردوا عليه بي انه هو الكانت بتصرخ و ببتألم من شوية انتا و للا مراتك؟هههه سؤال إستخفافي للأب المتسلط
و نقيف شوية في معاناة الفتاة لمن تشارف مرحلة البلوغ و حالة التوتر البيدخلوا فيها اهل الفتاة.
الشي المهم في هذة المرحلة تنوير الفتاة من الأم او الأخت الكبيرة بالحديث عن العادة الشهرية.. المعلومات انها حتجيكي كل شهر لمدة خمسة ايام
و انك لازم تعرفي الايام الحتجيكي فيها.. والتنوير يبدأ منذ ملاحظة علامات البلوغ عند الفتاة .. لكن البحصل شنو؟ اغلب الفتيات ما بكونوا عارفين
البحصل شنو و الحاجة الجاتم دي شنو.. و المفروض يتصرفوا كيف..شفنا كتير ايام المدرسة حالات الهلع البتصيب الفتيات البتجيهم العادة الشهرية في المدرسة
و لكم ان تتصورا حالة الفزع و الخجل البتحس بيها الفتاة من زميلاتاو من معلماتا في المدرسة .. حتى المعلمات في المدرسة اغلبهن غير حكيمات في التصرف
ود كله بسبب انه بعض الامهات بتحسسوا من الحديث لبناتم مع انه المفروض انه تكون في توعية بمجرد ظهور العلامات لتجنب الحرج و الخوف و القلق البصاحب للفتاة
في هذة المرحلة..حتى انه الفتيات بتحرجن من الذهاب للدكان لشراء الفوط الصحية..
و بعدها تجي مرحلة مراقبة الفتاة لأنها اصبحت بالغة و ممكن تأتي بمصيبة .. و التركيز بكون على البنت واما الأولاد فلا تركيز و لا خوف و لا متأخر مالك؟
هل لو كنا بنلم اولادنا علينا البنات بتجيهم حاجة؟بالتأكيد لا.
و بعدها التركيز بكون من ناس الحلة و الجيران .. ايضاً تركيز على انه فلانة كانت واقفة مع فلان و يا جماعة بتكم كانت واقفة مع فلان ايضا
دون تركيز على فلان .يعني (الشمشرة) كلها على الفتاة دون الولد
برضو وقفتا وقفة بسيطة على المضايقات البتتعرض ليها الفتاة في الجامعة و مرحلة ما بعد الجامعة و الإبتزاز القد يلحق بيها في مرحلة بحثها عن وظيفة
و المضايقات ممكن تتشكل و تتنوع بتنوع و تشكل اصحاب المواقف المعينة.
_ و ايضا حتة عدم إحترام الزوج لزوجته و دي في ونسة الأصحاب عادل و عبدالله.. ما اعتقد انه ممكن الخص الإضطهاد و العنف و الظلم البحيق بالمرأة او الفتاة
في هذا البوست .. لأنها كتيرة و كتيرة جداً و مريدة جداً .. بس الأمل في التغيير و التحضر و التثقف موجود ..
فيا ابو عفاف و يا ام عفاف و يا حبوبة عفاف و يا جيران عفاف و يا زميل عفاف خلونا نغير نظرتنا تجاه المرأة و خلونا نغير تعاملنامع المرأة..و يبقى الأمل في باكر .. و بكرة اكيد احلى.
| |
|
|
|
|
|
|
|
|
|
Re: مشكلتك مشكلة يا عفاف (Re: سناء عبد السيد)
|
الزميلات و الزملاء الأعزاء:
نجاة محمود
سارة عيسى احمد
داليا الكباشي دلوش
آمنةمختار
غادة مكي
تيسير النوراني
kabar
ابوحسين
بدرالدين احمد
محمد زكريا
الطيب شيقوق
محمد عبد الرحمن
تابر
هيثم التوم
خالد المحرب .. و حديثك عن إختيار الزوج او فرض الزوج على الفتاة حفرد ليه بوست خاص ..اشكرك على مداخلتك القيمة.. يمكن ما رديت على مداخلتك بطريقة مباشرة
لكن ادرجت ارائك المفيدة في مداخلاتي ..تسلم كتير.
جلال عبد الله
احمد يوسف ابوحريرة
هاني العربي
جعفر إسماعيل.. عجبتني مقولتك بتاعت ( كل هذا التحشر و الأسئلة و ينسوا قدرة الله و حكمته) فعلاً مفروض نترك التحشر في حياة اخوانا و اخواتنا و اولادنا
لأختيارم الشخصي و لقدرة ربنا. تسلم على المداخلة و المرور
اشكركم جميعاً على المداخلات القيمة و المرور و تسلموا
القراء الأعزاء : تسلموا على المتابعة .. و كل سنة و انتوا طيبين و عام جديد سعيد و مفيد .. الاقيكم في السنة الجديدة إن شاءالله لو الله مد في العمر بموضوع جديد.
تحياتي
| |
|
|
|
|
|
|
| |
سناء عبد السيد
سارة عيسى أحمد
Kabar
داليا الكباشى
AMNA MUKHTAR
ABUHUSSEIN
بدر الدين احمد موسى
غادة مكى محمد
محمد زكريا
الطيب شيقوق
محمد عبدالرحمن محمد
Aymen Tabir
هيثم التوم
خالد المحرب
Ahmed Yousif Abu Harira
Hani Arabi Mohamed
Gaafar Ismail
فيس بوك
تويتر
انستقرام
يوتيوب
بنتيريست