|
كتب الكاتب الفاتح جبرا المتوفرة بمعرض الدوحة
|
|
 Re: امـتحانات ربــنـا (Re: مُحَمَّدٍ عِوَضٌ احْمَدُ)
|
الغريبة 98% من الشعب يجتاز كل الامتحانات ببراعة يحسد عليها
عندنا صبر وايمان عجيب..صابرين..صابرين..صابرين
من يسقط فى الامتحان دائمًاًهم من نضعهم فى المقدمة
من نتوقع انهم اكثر صبراً وعزيمة
ملحوظة..
.
انا لا اتحدث عن الحكومة هنا
و
لا عن وجهاء المعارضة
| |
 
|
|
|
|
|
|
|
 Re: امـتحانات ربــنـا (Re: مُحَمَّدٍ عِوَضٌ احْمَدُ)
|
كـ فرد من الشعب الممتحن والمتمحن
احلى امتحان بالنسبة لى اخوكم بعد الساعة السابعة مساء
فى وسط ميدان جاكسون فى الخرطوم..فى محاولات جادة للحصول بنجاح
على مقعد فى اى حافلة عشان اوصل بيتنا..الحمدلله ما قاعد اتعب
كتير ساعة بس كده وبركب..وقبلها بكون حايم بى مزاج..بعاين
فى الوشوش السمحة دى..تصدقو..بعد مرات بحرد عديل
بقول لو ديل ماركبو انا البركبنى شنو؟
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
Quote: كـ فرد من الشعب الممتحن والمتمحن
احلى امتحان بالنسبة لى اخوكم بعد الساعة السابعة مساء
فى وسط ميدان جاكسون فى الخرطوم..فى محاولات جادة للحصول بنجاح
على مقعد فى اى حافلة عشان اوصل بيتنا..الحمدلله ما قاعد اتعب
كتير ساعة بس كده وبركب..وقبلها بكون حايم بى مزاج..بعاين
فى الوشوش السمحة دى..تصدقو..بعد مرات بحرد عديل
بقول لو ديل ماركبو انا البركبنى شنو؟ |
ياخ دا هسع ما كلو سياسة
ات بتلعب علينا ولا شنو ؟
| |
|
|
|
|
|
|
|
|
Re: امـتحانات ربــنـا (Re: الطيب شيقوق)
|
Quote: ياخ دا هسع ما كلو سياسة
ات بتلعب علينا ولا شنو ؟ |
حبابك يا الطيب
السياسه سمحة ياخ..بس نلقا ليها وكت وين؟..وياتو حزب الفيهو
فرقة لى وجوه واعضاء جدد..؟
| |
|
|
|
|
|
|
|
|
 Re: امـتحانات ربــنـا (Re: مُحَمَّدٍ عِوَضٌ احْمَدُ)
|
طيب يا اخوانا نواصل ..
اكتر حاجة بحبها زى ما قلت ليكم الزحمة..ما تفتكرو انى نشال - لاسمح الله - مع انها مهنة محترمة واى خريج من جامعات السودان عليه ان يتوقع ممارسة اى مهنة لاحقاً..
يلا شوفتو موقف الصحافة بالذات..ما بوريكم زلط..ولا الـ...-عشان ما تعرفو كل حاجة - اها دا بالذات عندى زولة عزيزة شديد
عليا ..بنركب سوا..الحافلة يعنى..واحنا ماشين بقول يااااارب الموقف يكون مستف للطيش..
انا بركز على يوم الخميس بالذات..ايوه..والله بكون فيهو جنس دفسى لما تحتار..!
المهم بتكون فرصة نتاخر شوية..نمشى ونجى كل مرة..لما تحس
بالتعب بطلع الجريدة وافرشها ليها عشان تقعد فى الرصيف..واقيف اعاين
ليها من قريب ...وبعيد..دى اللحظة الوحيدة الممكن يكون فيها
محتفظ بى نظرى فى اتجاه واحد..فى ميدان جاكسون..
غير كده ممكن اكون مسهى وعيونى الاتنين طايرات..
نهايتو
البت بقت تلاحظ انى مستمتع خالص..
بقصة أزمة المواصلات دى..وبراها كده بقدرة
قادر اصبحت تنافس مريم الشجاعة فى المبادرة وسرعة التصرف
فى باب الحافلة تركب براها..وتحجز ليا كمان ..
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
طبعاً لما ارجع البيت..برضو ما بقدر اطلع من مشاهد موقف جاكسون..لاشعورياً..بلقا روحى..
بكورك براى..كيلو الموز بى الف ونص..طبق العنب بى الف..اشترى الشماعة قبل هدومك تطير..
لله يا محسنين..
كل نفايات الخرطوم المنتهية الصلاحية يتم بيعها فى المكان..الشعيرية..والمكرونة..
وشكولاتة وا######## مختلفة..عينى عينك..
اكتر حاجة
بتزعلنى العنب والتفاح..افتكر انو لو عملوهم عرقى بكون احسن..على الاقل بتضمن انو الصنف
مخمر من يومو..
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
تصدق يا عوض بوستك كلو سياسة ومضحك جدا ..ركز على هستيريا ما بعد العودة وصدى الباعة المتجولين وخرخرة الحافلات التي تئن في شوارع مرهقة تلك الوجوه المتفسخة بفعل الكريمات الرخيصة ..أحسبهم يحدوهم كثير من الأمل رغم صبرهم وهدوءهم فهؤلاء ملح الأرض ونقش الزمان عليهم نقوشاً متفاوتة ..لكن ما يزعلني أنهم جميعاً خارج التغطية وخارج مظلة النظام ..فلا يعرفون للعيش الرغد طريقا ً لا أنصفوا فعاشوا عيش الكرماء ولا حتى وجدوا من متع الحياة الفانية ما يسد الرمق
التفاح يمكن تخميره للأغنياء وعلى الفقراء الاكتفاء بالفتريتة أو ما استهل من بلح أو شيء من سمسم فكله يصلح ويصلح ما بقى من رأس ههههههه
| |
|
|
|
|
|
|
|
|
|
Re: امـتحانات ربــنـا (Re: عبدالرحمن الحلاوي)
|
Quote: تصدق يا عوض بوستك كلو سياسة ومضحك جدا ..ركز على هستيريا ما بعد العودة وصدى الباعة المتجولين وخرخرة الحافلات التي تئن في شوارع مرهقة تلك الوجوه المتفسخة بفعل الكريمات الرخيصة ..أحسبهم يحدوهم كثير من الأمل رغم صبرهم وهدوءهم فهؤلاء ملح الأرض ونقش الزمان عليهم نقوشاً متفاوتة ..لكن ما يزعلني أنهم جميعاً خارج التغطية وخارج مظلة النظام ..فلا يعرفون للعيش الرغد طريقا ً لا أنصفوا فعاشوا عيش الكرماء ولا حتى وجدوا من متع الحياة الفانية ما يسد الرمق
التفاح يمكن تخميره للأغنياء وعلى الفقراء الاكتفاء بالفتريتة أو ما استهل من بلح أو شيء من سمسم فكله يصلح ويصلح ما بقى من رأس ههههههه |
حبابك اخونا عبدالرحمن
هستريامابعد العودة تعبير حلو..
ميدان جاكسون ده المناظر الفيهو بتخلينى محتار مرة واحدة..بتذكر كل التفاصيل....الأجساد الجميلة..الممتلئة..والرشيقة..العبارات المكتوبة..
على مؤخرة الحافلات....بتذكرها..حتة حتة..عندى ذاكرة حادة ومزعجة.وعيون
ريادة خلاص..وبتموت فى البلوم
..
..
النظام ده ياهو الحكومة؟
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
النظام يقصد به السيستم كما يحلو لأهل المنافي في أمريكا ..لكن بفهمنا الداني نقصد به ( دعزني أعيش ) فهؤلاء صنف من الناس لو ادركهم الجاحظ لألف رسالة في التحوير وحسن التدبير .. ولكن في زماننا هذا يصعب توثيق كل هذا الكم من الكوميديا السوداء ..ولكن يبقى مخزونا في الذاكرة البصرية نجتره حين نخلد إلى مضاجعنا فيلازمنا تلازم الظل للشجر أو الذيل للبقر .
| |
|
|
|
|
|
|
|
|
|
Re: امـتحانات ربــنـا (Re: عبدالرحمن الحلاوي)
|
Quote: النظام يقصد به السيستم كما يحلو لأهل المنافي في أمريكا ..لكن بفهمنا الداني نقصد به ( دعزني أعيش ) فهؤلاء صنف من الناس لو ادركهم الجاحظ لألف رسالة في التحوير وحسن التدبير .. ولكن في زماننا هذا يصعب توثيق كل هذا الكم من الكوميديا السوداء ..ولكن يبقى مخزونا في الذاكرة البصرية نجتره حين نخلد إلى مضاجعنا فيلازمنا تلازم الظل للشجر أو الذيل للبقر
|
والله ناس السيستم ديل لو بجو مارين على جاكسون لتذكرو قول نصربن سيار..
لـ بنى أمية..
أرى تحت الرماد وميض نار
وتوشك أن يكون لها ضِرَامُ!
فإن النار بالعودين تذكى
وإن الحرب مبدؤها كلامُ
فقلت من التعجب ليت شعري:
أأيقاظ أمية أم نيامُ؟!
..
بصراحة الناس خلاص..ملت شديد..التعب والزحمة حلوين ايوه,واحنا صابرين على
حاجات كتير..بس كمان ياريت ينتبهو..للحاصل شوية
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
Quote: بصراحة الناس خلاص..ملت شديد..التعب والزحمة حلوين ايوه,واحنا صابرين على
حاجات كتير..بس كمان ياريت ينتبهو..للحاصل شوية |
سلام يا شيخنا
نحن مش قلنا سياسة مافي ينتبهوا ديل منو؟
ذكرتني صاحبي الله يطراهو بالخير كنا في الجامعة بنذاكر سوا هو تخصص قانون وأنا إدارة أعمال
فاتفقنا ما نتحدث في السياسة نهائياً لأنها بتجيب وجع القلب
لكن كنا كل ما نفتح موضوع ينتهي عند باب السياسة
فكل الطرق يا صديقي تؤدي إلى روما!
ولا بد مما ليس منه بد!
عموما حاول ما تغشى روما في طرقك وجهجه أبوابا
وأهم حاجة تحكي لينا عن (الروائح) في موقف جاكسون
فللريحة ارتباط عجيب بمدى مقدرة الناس على الصبر والتحمل
| |
|
|
|
|
|
|
|
|
|
Re: امـتحانات ربــنـا (Re: Elawad Eltayeb)
|
Quote: ينتبهوا ديل منو؟
ذكرتني صاحبي الله يطراهو بالخير كنا في الجامعة بنذاكر سوا هو تخصص قانون وأنا إدارة أعمال
فاتفقنا ما نتحدث في السياسة نهائياً لأنها بتجيب وجع القلب
لكن كنا كل ما نفتح موضوع ينتهي عند باب السياسة
فكل الطرق يا صديقي تؤدي إلى روما!
ولا بد مما ليس منه بد!
عموما حاول ما تغشى روما في طرقك وجهجه أبوابا
وأهم حاجة تحكي لينا عن (الروائح) في موقف جاكسون
فللريحة ارتباط عجيب بمدى مقدرة الناس على الصبر والتحمل |
Elawad
حبابك الف,
السياسةع قولك تمرق منها بالشباك تجيك بالباب..اى موصيبة
عندنا مرتبطة بمن يمارسون التجريب السياسى علينا منذ عشرات السنين..لا بارك الله في الاحياء منهم
ورحم الأموات..
الريحة فى جاكسون حكايتا براها..فى حتات كده لو عفتصها ألا تملص
نعلاتك فى خشم الباب..
غايتو انتو لو بتجو الموقف ركزو فى وشوش البنات السمحات
ياهن البخلن المكان معطر..ورايق..والوقفة فوق الكرعين الاتنين..@
شكراً حواء السودان..!!
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
الليلة خميس
وحياتكم يدوب جيت داخل البيت..
وكـ العادة المكان ملان..بى البشر..وجود لرجال شرطة الاحتياطى المركزى بشكل واضح..وفيهم ضباط
برتب عالية ..عميد..ونقيب..وكم ملازم..واقفين مع سوا مع ناس المرور..واصلو ما بيخلو
حافلة تطلع فاضية من الموقف ..لازم تشحن على اى خط..البعض يتحدث
عن انو الحكومة خايفة من المظاهرات..و واحد تانى يقول ازمة المواصلات
ليك دى مؤشرات لـ البحصل قدام..وانو فى انفجار قريب
ولو نزل الى الشارع ستين لواء شرطة.
ينط واحد يقول
- طيب مش ممكن يجونا ناس أنخس وانجس من ديل..؟
عمك كبير..يرد
- ياولدى بس هم يمشو ان شاء الله تانى.. يجى.. يحكمنا ود ابليس ذاتو
انا غايتو صابر..ما عليا.. فى البنا ولافى البناول الطوب ..امتع فى نظرى بس..عينى باردة عليكن يا السمحات..جحيم
البلد يمكن احتماله فقط لما تكونو قريبين..معانا فى الزحمة..وفى نص الازمة..
يلا.... جاكسون تجربة حية..ممتعة..العندو عربية يجرب مرة واحدة
ينزل تحت..تحت خالص..ويجى يلمس معانا..ضحكة
طفل..نرفزة كمسارى..ثرثرة عجايز..حكاوى مظالم..تنهدات خافتة.. و وحوحة كاملة الدسم
ومجنونة تغنى..لـ عثمان حسين..بصوت لين وجميل..
وابتسامتك لما تأسر قلبى
تحكى عن المحال..
تحكى.. عن شوقك إليّ
وتحكي عن بعد الوصال
من قلبي من أجل المحبة وهبت ليك شعر الغزل
مع إنو قدامي الطريق انا عارفو يا السمحة
انقفل..
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
مرحبا بالعودة للمنبر محمد
ومتابعة
Quote: انا غايتو صابر..ما عليا.. فى البنا ولافى البناول الطوب ..امتع فى نظرى بس..عينى باردة عليكن يا السمحات..جحيم
البلد يمكن احتماله فقط لما تكونو قريبين..معانا فى الزحمة..وفى نص الازمة..
يلا.... جاكسون تجربة حية..ممتعة..العندو عربية يجرب مرة واحدة
ينزل تحت..تحت خالص..ويجى يلمس معانا..ضحكة
طفل..نرفزة كمسارى..ثرثرة عجايز..حكاوى مظالم..تنهدات خافتة. |
كتابة مجنونة
التصالح مع النفس يجعلك فى سعادة دائمة وتعيش كل لحظة فى العمر.
| |
|
|
|
|
|
|
|
|
|
Re: امـتحانات ربــنـا (Re: ombadda)
|
الاخ محمد
السلام عليكم ورحمة الله وبركاته
كدي خليك من امتحانات ربنا..
خلينا في امتحانات اسمك ده.
مشكلو ليه ,, امتحان غلبني اجاوب عليهو.
| |
|
|
|
|
|
|
|
|
|
Re: امـتحانات ربــنـا (Re: عبدالعزيز الفاضلابى)
|
Quote: الاخ محمد
السلام عليكم ورحمة الله وبركاته
كدي خليك من امتحانات ربنا..
خلينا في امتحانات اسمك ده.
مشكلو ليه ,, امتحان غلبني اجاوب عليهو |
وعليكم السلام يا بن العم
تصدق فلهمة منى ساكت..!!
قلت لى المهندس بكرى ابوبكر كم مرة.. ياخ شيل التشكيل الغلط ده .وخلينى سادة...عامل نايم لحدى هسه
طبعاً الرد بخصوص الاسم برضو امتحان..وانتا الزول الستمية الجاوبت عليهو فى المنبر
تحياتى
| |
|
|
|
|
|
|
|
|
 Re: امـتحانات ربــنـا (Re: ombadda)
|
Quote: مرحبا بالعودة للمنبر محمد
ومتابعة
كتابة مجنونة
التصالح مع النفس يجعلك فى سعادة دائمة وتعيش كل لحظة فى العمر. |
ombadda
مساء الانوار..وتشكر على الترحيب
اهو جينا وقلنا نجدع لينا حاجة من جاكسون فى المنبر
ونحاول نفضـض شوية قبل ما نحنس النوم عشان يجى.
ياربى هسه انا متصالح معاها ولا مخاصمها؟
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
الليلة اول خميس..بعد العودة من العيد مع الرجال الفى البلد..كل سنة وانتو طيبين..
جينا راجعين لى جنة ونار الخرطوم..الخرطوم لما تدخلها يقع فى نفسك شئ
من الحسرة..ماعارف ياتو فريضة لئيمة خلتنا نستقر فيها..ابوى الله يديهو
العافية بقول انو اتخارج من بلدو وعمرو 14 سنة عشان يشوف..
مستقبل افضل..انا هسه قربتا اعدى التلاتين سنة وماشفتا الحاج يوسف
لحدى هسه..!! ا
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
الحيرة هى أول ما يستنشقه العائدون الى خازوق الخرطوم من القرى البعيدة
لما انزل فى موقف شندى بتلفت زى الاطرش..وكأنو اول مرة اجى داخل عليها..-الخرطوم يعنى- عشان افكاركم ما تمشى بعيد-
بحرى طبعاً..حلاتا..أى وش فيها يعجب ويخليك فى دقيقة واحدة فى بسط شديد خلاص..وتحت ..تحت..تقول
الله ليا انا ياخ..إرتياح ودهشة صاح..الله يخليكم يا ناس بحرى..اجمل بشر على الإطلاق..وعليا بالطلاق..كمان..
| |
|
|
|
|
|
|
|
|
|
Re: امـتحانات ربــنـا (Re: سيف النصر محي الدين)
|
سيف النصر
حبابك آلاف
غايتو عمرى ما حلمت انى اسوق..طوالى راكب..
معاك بس فى الاولى..العرس
مع انو مشكلتى انو بفكر فى اخت زميلتى- من يوم جاتها زيارة فى الشغل - وهى بتفكر فينى..
دى حلها كيف؟
Quote:
يا محمد عوض
حلك عندي تب
تعرس و تشتري عربية. |
| |
|
|
|
|
|
|
|
|
|
Re: امـتحانات ربــنـا (Re: شرف الدين آدم إسماعيل)
|
تسلم كتير يا شرف الدين على المرور
وشخصياً لا احب ان اتعاطى السياسه. ولم اجد اى حزب الى اللحظة يمكنه الاستفادة
من مواهبى المتواضعة ونظراتى الطويلة الثاقبة !
| Quote: لا مهرب من السياسة الا الي السياسة |
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
..الناس كانت زى النمل..من اول جاكسون الى جامعة السودان..زحمة رهيبة..وبعد ده كلو فى عالم كده ولا يهمها..شغالة مسك من الايادى. ولمسات خفية ولذيذة..وكلنا عاملين ما شايفين..احنا عاوزين نركب وبس.. اقول ليكم حاجة انا ذاتى كنت ماسك..وجات
شحادة صغيرونة ..مسكت ايدى برضو..وقالت ليا ربنا يخلى ليك حبيبتك دى كرامة لله..اديتا .. وبى زيادة كمان اصلو عجبتنى شديد كلمة حبيبتك دى
الزولة دى مباريها من كم سنة وماعارفين شنو البينا..الى ان اكتشفت كل شئ هذه المتسولة اللطيفة..! تانى جا عمك كبير ..
- يا ولدى عاوز الف واحد بس..لحدى هسه انا على شاى الصباح..
أديتو ..برضو..مع انو المفروض انا برضو أشحد..!
المهم زولتى فكيتا وركبتها بطريقة سهلة بما انها ساكنة قريب للخرطوم..اما اخوكم من ناس الاطراف..البعيدة..,,والله نفسى بس يوم اركب بى ارتياح..نفسى انقطع لحدى ما لقيت فرقة وجيت راكب فوق رأس حافلة من الموقف..ايوه يمين راكب مسطح معاى مجموعة شباب لابوليس سألنا ولا مرور وقف الحافلة..زول واحد كده غايتو صورنا..ماعارفو شنو بالضبط..ولا من ياتو داهية..وربكم يستر بكرة ما اظهر فى الصفحة الاولى لأحدى
صحف الخرطوم.
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
كل البتمناهو يوم يجى مسئول ويجى يشوف الحاصل شنو ..فى موقف ناس كركر المواسير ديل..مرة واحدة بس
واحد يحس بى الجمهور اليومى بعانى عشان يوصل لى بيتو أو لى محل شغلو..الجمهور الشغال يسب ويعلن في الحال الذى يمضى من سئ الى اسواء..
معقول يا اخوانا الزول يكون حلمو وعشمو بس يركب ويرجع بيتهم..وما يلقى حمارة ساكت تشيلو..الا بعد مجابدة ومكابسة..؟ ماعاوزين منكم
حاجة كتيرة يا حكومة..ركبونا بس..دى برضو عاوزة ليها مؤتمرات..؟ باختصار الوضع هش جداً..وعليكم الانتباه..والعمل.. بدلاً عن التصريحات
عن ان الربيع ليس من ضمن فصول المناخ فى السودان....
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
انا عارف طبعاً انى شغال آذان فى مالطا..ايوه لانو مافى زول كبير كده ممكن يجى يقرا معانا هنا..ويحس ان شاء الله بى كلمة واحدة
من الشئ الكل يوم بتقال هنا اوهناك. ما الناس البتكتب فى الانترنت ديل جت عليهم مرطبين وما عندهم هم..ولا علاقة بى الواقع على الارض..
الاهم عندهم التقارير الكاذبة عن هدوء الاحوال..ووفرة الطعام والشراب..وفرحة الشعب بالقائد..وبالمسيرة..طيب خليكم كده
اصلو زى ما بقولو اهلنا..
المكتولة ما بتسمع الصايحة
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
هسه يا جماعةانا امشى وين؟
قيل ان هذه العبارة قالها الكارتيرست الراحل صلاح حماد عندما كان جعلته الظروف
ينام فى مكان العمل..وببساطته المعهوده سأل نفسه السؤل الغريب..
اها الليلة ...
انا بايت..
وماعارف لى حتة اقبل عليها
| |
|
|
|
|
|
|
|
|
|
Re: امـتحانات ربــنـا (Re: مُحَمَّدٍ عِوَضٌ احْمَدُ)
|
طيب خليكم من حكاية امشى وين..
لو فجاة كده لاقيت زول فى مكان عام وعااااام جداً زى جاكسون مثلاً..
لقيتها متكية..على حائط استوديو منير الرماح الخشبى..زولة كده سمحة سماحة شديدة..حلوة زى الكستر
طوالى سألتها مع انى ما متعود ادخل شمال..
- الصقط الليلة شديد
- صمت..
- المواصلات ذاتها صعبة
-......
انتى ماشه وين يا بتى..؟ -حنك الأبوة ده سمح خلاص بعد مرات- باعتبار ان ثلاث ارباع شعبنا يعانون من اليتم بمختلف اشكاله..
- انا منتظرة زول..
(فى سرى ان شاء الله ما يجى ذاتو)
- وانا عاوز اركب المواصلات وماقادر والله
- بتقرى فى جامعة السودان..؟
- لا فى الخرطوم..كلية.... سنة تانية
..جميلة هى ومستحيلة ايضاً.
- كويس تخصص جيد ربنا يوفقك عاوزة تبقى شنو بعدين؟
- دبلوماسية..
- تمام والله..تنفعى يا بتى. واضح انك ح تصلحى للمهنة الرفيعة دى
- عاين آهو (ج) جا
ما شاء الله ود خالة مانع واسمر وسيم
-( ج ) ده محمد..
- تشرفنا والله..
- يلا يامحمد..ح امشى..
النصية ما قدرت ازيد ولا كلمة شكلى كده هرشتا من مستر جى ده
مع انو شكلو زول حبوب ...
- يلا فى امان الله...
غايتو كان نفسى فى رقم التلفون..اى حاجة ممكن تدل عليها بعدين..
ماعارف ليه ولى شنو..؟
عموماً فى ناس كده بتلقاهم ..لـ برهة من الزمن تعتقد انهم اصبحو مركز
الجاذبية..تفضل مشدود ليهم.. بلا اى اسباب واضحة..
..احبك يا جاكسون..
انت اعظم المواقف فى حياتى..
| |
|
|
|
|
|
|
| |
مُحَمَّدٍ عِوَضٌ احْمَدُ
الطيب شيقوق
عبدالرحمن الحلاوي
Elawad Eltayeb
ombadda
عبدالعزيز الفاضلابى
محمد البشرى الخضر
سيف النصر محي الدين
فيس بوك
تويتر
انستقرام
يوتيوب
بنتيريست