|
|
 الشاعر/شرحبيل فى قصيدته (زول قوس قزح)-لروح المفكر/الخاتم عدلان
|
زول قوس قزح
الى روح المفكر والجميل انسان
الى الخاتم عدلان
روًح امش
بى عافية تصبح وتندهش
تملأ العصافير ضحكتك
وبتبقى غيمات لى بلوداتنا
وعرش
همًاك شنــــــو؟
يازول مع النيلين رفيق
عبينا روحك بالاسف
عبيتنا بالحلم الرقيق
هذى العقول وقفت صداك
وانت البتضحك كالصديق
انبت رويناك بالعرق
سد الرمق
الروح معاك واسعة وتضيق
تارينا شفناك فى السجع
شايل همومنا ومنجدع
فى همبريب الاندهاش
الناس صفوف وبتسألك
ممكن سؤال...؟
مالمنفى ؟ وما الوطن..؟
ماالامانى ؟ وماالحزن؟
كيفن تسافر قبلما
نديك خاطرنا وسماح
كيفن تقاسى الليل وحيد
وفكرك منور كالصباح
غيبت روحك ياجميل
ساكت على النضم المباح
نقًع كلامنا وردنا
خلينا معانا وضدنا
املأنا لونين ضد بعض
مافارقه ابدا عندنا
يشرق يضوى النور سمح
وانت السمح
طوًل خطاويك يامرح
خشً العقول
سلم على السمحات وسافر من جديد
ودًع كنارك فى الصعيد
وصى المدى
يطمر قفاك بالامنيه
بحرك صفاك
نشتاق نغنيك اغنيه
فى الروح مداك
جواى زاد
من سلسبيل الاحجية
وكان يامكان
زول قوس قزح بفكرتك
ويادا الزمان
الليله عيدك وزكرتك
خلاص افرح لبسنا الفكره بيك خاتم
فياخاتم ثقافة الاستنارة براك
وياساقى العقول بحرك
ويامدى الحداثة مداك
(اشهدوا منى وانشرواعنى)
هذا القول الواضح قولك
ويااحساسك
كنت بتدى الفكرة فصولك
وشن ادولك......؟؟؟
غير مانمت فى عمق التربة
وانت اساسا
عشت حياتك منفى وغربة
ماك مستنى ولاك حاريهم
.............................
ماتغش نفسك انك مت
قوم بالروح خليها الجتة
مابنصدق انك شلت حلمنا وفت
بدرى عليك ياداب فتقت
بى مشروع النهضة الشاملة
فى ارجاء قاراتنا السته
ووتقول مت....؟
ابدا لا لا
انت ورثت منام العافيه
وحظنا نحن ورثناك انت
بعد غيابك صعب الحاله
خلى منام القبر تعالا
الافكار طشت من بعدك
بقت الرفقه اخيرا عاله
وينك انت....؟
من الجدل الاصبح شخصى
(ماالموضوعى) مهمش ومقصى
بين (بكار) و (الباقر ) و (هاله)
وتقول مت....؟
ابدا لا لا
خلى منام القبر تعالا
............................
وعرفنا انك مستنير
ربان حداثة
وضد قوانين النخاسة
زول مقرح فى الدياجر
المعتمة بالوراثه
زول حقيقه
للعقول بدا وخلاصا
طيب سؤال...؟
مين البنور بالحجج
هذا الظلام المنتشى..؟
مين البقول للفيل فى عينيو
ياحرامى ومرتشى..؟
انت الموصينا النضال
وانت الدليل والنور
فى ساحات المشى
وعرفنا منك................
انو السيوف مابتحمى جامع
ولا الطبنجه بتبنى دار
ولا القنابل فى المدن
تفرز حليبا للصغار
بس طيف مبشر بالدمار
علمتنا واكدت بالقول والفعل
الحرية للاخر
قبال تكون لينا
ركب الزمان لو فات
مااظن بعود لينا
لابد نواكب الموج
نسرع خطاوينا
.........................
زول قوس قزح
واعى وبتحلم بالتصالح والتسامح والوئام
واعى وبتعلم مين بتاجر بالكلام
زول قوس قزح
ضد الشرايع البتنده بالحرام
زول قوس قزح
وبتدعو بالناس المسره
وعلى الارض السلام
وعلى العموم ..............
ماعاش رئيسا للابد
تحيا البلد
مالنيل حبيب الكل
شامخ كما فكرك
رافض المهان والذل
طول عمرو دافق الخير
ضد الجفاف والسل
مدى الصغار احساس
بالياسمين والفل
ماشين على دربك
فكرك ركيزه وضل
ركيزه وضل .....
ركيزه وضل .....
Sharaha
مارس 2011
الخرطوم-الديم
|
|
 
|
|
|
|
فيس بوك
تويتر
انستقرام
يوتيوب
بنتيريست