|
|
 شهادتي على العصر من معسكر القطينة للدفاع الشعبي 1994م
|
السلام عليكم ورحمة الله وبركاته
المكان: معسكر عيسى بشارة للدفاع الشعبي بالقطينة
الزمان:الفترة من 15/7/1994 إلى تقريبا 5/9/1994
المناسبة: دورة أسامة بن زيد الرابعة لطلاب الجامعات - وكانت إجبارية بالتأكيد
الشاهد: ما شافش كل حاجة لكن قدر الشافو بقولو - العبد الفقير بالطبع ^_^
فاصل قصير ... فابكوا معنا ^___^
|
|
  
|
|
|
|
|
|
|
 Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
بالمناسبة التواريخ الفوق دي ضطبتها بالرجوع إلى تاريخ منافسة كاس العالم 1994
وكاس العالم ده عندنا معاهو قصة طويلة عريضة في الوكت داك
وسبب لينا مشاكل مع العساكر لأنو كتير من الناس اتأخروا لحدي ما حضروا نهائي الكاس يوم 17
وبالتالي عقاب التأخير كان مضاعف
ونحنا كتيبتنا كانت الكتيبة التالتة الوصلت بعد كاس العالم
عشان كده سموها كتيبة كاس العالم ^_^ والعساكر كانوا قاصدنها
فاصل قصير .. فابكوا معنا ^__^
بس قولوا إن شاء الله الكوتة الليلة تنستر معانا
| |
|
|
|
|
|
|
|
|
 Re: شهادتي على العصر من معسكر القطينة للدفاع الشعبي 1994م (Re: نصار)
|
الاخ محمد جلال
هذه التجربة من الاهمية لدرجة
أكتب عنها وستجدنا أن شاء الله
من المتداخلين ...
انا الدفعة التانية دفاع شعبي وطبعاً
غصبا عني ...
يحكي أن الدكتور عوض دكام جابو ليهو
طلب استدعاء للدفاع الشعبي ..
قال ليهم : أنا أمشي الدفاع الشعبي
أنا السوق الشعبي عندي فيهو رأي ...
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
كمدخل للموضوع سأشرح في نقاط قليلة الهدف أصلا من إقامة هذه المعسكرات
1- الهدف الأول في تقديري: إذلال الشعب السوداني بكافة قطاعاته وقتل أي روح ثورة أو مقاومة لديه وإذاقة الناس طعم الخوف والذل والذي كان يمارسه العساكر في هذه المعسكرات وبعض منسوبي منسقية الدفاع الشعبي أحيانا وسآتي لتفصيل ذلك كل في مكانه بإذن الله .. الكيزان أقاموا هذه المعسكرات واجبروا الطلاب ومنسوبي الخدمة المدنية على الدخول فيها وكانت دورة أسامة بن زيد 1،2،3،4، .. الخ .. للطلاب ودورة الفاروق واحد واتنين وتلاتة إلى آخره للموظفين، ومارس العسكر حقدهم الطبقي على الفئة المتعلمة والمثقفة وهم (الطلاب والموظفين ) في ظل الفصام النكد بين الميري وهو العسكري والملكي وهو المدني.
وسبحان الله كلمة ملكي للمدني هذه لم أفهمها إلا مؤخرا عندما شرحها لي أحد الإخوة وقال لي ملكي يعني أنت ملك نفسك مافي حد يتأمر عليك .. مع أنها عند العساكر نبزة لمن يقولوا للناس يا ملكية ولمن العسكري يجي ينبز أخوه بقول ليهو: إنت ملكي وللا شنو؟ وقلت سبحان ربي هل الذي يستحق النبز هو الذي ملك نفسه أم الذي نفسه مرهونة عند الرتبة الأكبر منه بغض النظر عن علمه أو ثقافته أو تقواه!!! وسأعود لموضوع حقد العسكر على الطلاب في ثنايا القصة بإذن الله.
2- الهدف الثاني: تجنيد أكبر عدد ممكن من الأفراد لتنظيم الكيزان وذلك عبر وسائل عديدة سآتي إليها في حينها، وعمل غسيل مخ لكافة المجندين يحيث أن الذي لا يتجند للتنظيم يكون متعاطفا أو على الأقل محايدا أو في النهاية يائسا من أي مقاومة للمشروع الحضاري الكيزاني ولا أسميه إسلامي بالتأكيد، وسأعود لذلك أيضا في حينه.
الهدف الثالث: أمني استخباراتي بحت!! وذلك بتصنيف الطلاب/ الموظفين من خلال جواسييس وعناصر الأمن والكيزان الموجودين وسط الطلاب، فهؤلاء كانوا ينتشرون بعناية وسط الطلاب وبطريقة مدروسة ويستطيعون أن يحللوا نفسيات الطلاب وتوجهاتهم وطريقة تفكيرهم .. حتى إذا فتحت الجامعة أبوابها يكونوا قد عرفوا أعدائهم من أصدقائهم ... مع العلم أن دروة أسامة بن زيد الرابعة التي دخلناها كانت أول دورة يتم إدخال الطلاب قبل بداية الجامعة وكانوا فيما مضى يقيمون الدورة في نهاية العام الدراسي الأول في الإجازة.
فاصل قصير ونواصل .. فابكوا معنا ^____^
ا
| |
|
|
|
|
|
|
|
|
 Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
يوم 19/9/1994 تحركت من منزلنا بالخرطوم بحري موليا وجهي تلقاء القطينة .. سمعنا أنه من الأفضل أن يذهب الواحد مصلع فقمت بحلاقة الصلعة من الليلة القبليها .. حلقتها فقط في الليلة القبليها لأنو برضو الصلعة لازم تكون جديدة وإلا يقولوا ليك: أعد .. ركبت مواصلات بحري إلى السوق العربي ومن السوق العربي إلى جوار ستاد الخرطوم كانت مواصلات القطينة .. كنت كعادة جميع المجندين أحمل شنطة الحديد وفيها الملابس ومالذ وطاب من الطحاني (جمع طحنية) والمربى (عكس الما مربى) والبسكويت البلدي المدور حلقات .. أصلو أنا حتالة وود أمو ^__^ .
ركبنا مواصلات القطينة والتي كانت مكتظة بالمجندين الطيور (هكذا يسميهم العسكر ) وفي رواية الضببة والملكية في رواية أخرى، وكان عينك ما تشوف إلا الصلع .. مضى البص السفنجة يتهادى في شارع كوستي (والله لي هسي ما عارف سموهو سفنجة لي شنو واللا العلاقة شنو بينو وبين السفنجة كان سفنجة الكراع وللا السفنجة المرتبة) المهم نزلنا في شارع كوستي قدام لافتة كبيرة مكتوب عليها: معسكر الشهيد عيسى بشارة للدفاع الشعبي بالقطينة .. والمعسكر ده بالذات كان يمثل مهوى أفئدة الكيزان وكان بمثابة ( قم المقدسة أو النجف الأشرف ) عندهم لأنو أول معسكر دفاع شعبي في ظل الإنقاذ .. بس خانتني الذاكرة في التعريف بالشهيد عيسى بشارة فلو حد يعرفه يرفد به البوست
فاصل ونواصل .. فابكوا معنا ^_^
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
وصلت كغيري من مئات الطلاب في ذلك اليوم بعد قطع مسافة لا بأس بها من الزلط إلى المعسكر .. تشوف الطلاب ديل صلع ساااااي ,, كنا صغارا بحق وحقيقة في ذلك الوقت .. وكانت أعمار معظمنا تتراوح بين 18 - 22 سنة ما عدا طبعا الكوامر الناضجين وهم الطلاب الذين اشتغلوا في الخدمة المدنية عدة سنوات ولديهم شهادة ثانوية قديمة كان يسمح لهم بالتقديم للجامعات والدخول مع الطلاب الصغار .. كان من حظي ان وصلت المعسكر رفقة أحد الناضجين .. فكان من أحد العساكر أن قال لذلك الناضج: أها انت جايينا بي ولدك ^__^ فقد كنت قصير القامة حينها ولم تنبت بوجهي ولا شعرة واحدة :)).
عندما وصلنا تعامل معنا العساكر بغلظة شديدة وهذا غير الغلظة الطبيعية والسبب أننا تأخرنا والجريمة: أننا انتظرنا المباراة النهائية لكأس العالم والتي كانت يوم 17/7/1994 ولم نحضر في اليوم المحدد وهو 15/7/1994 .. فكانوا ينادوننا: أها يا ناس كاس العالم .. تعالوا يا ناس كاس العالم .. أيوااااا اتأخرتوا عشان كاس العالم!!! طلبوا منا جميعا أن نضع أحمالنا ومتاعنا على الأرض وأن يفتح كل واحد شنطته للتفتيش .. ولا أدر عم كانوا يبحثون!! هل كانوا يبحثون عن أسلحة أو مخدرات أو ممنوعات!!
المهم بعد التفتيش الدقيق قاموا بصفنا وإدخالنا إلى داخل المعسكر في شكل طابور ... مشينا في هذا الطابور إلى داخل المعسكر تلاحقنا سخرية العساكر القبيحة ولم نكن نعلم سببا منطقيا لذلك!! وكانوا يصيحون بنا ويصرخون فينا وكأننا طلاب في الروضة أو الابتدائي .. وعندما دخلنا إلى المعسكر أجلسونا جميعا في (هنكر) وهو عبارة عن جملون كبيييير وطويل مفتوح من كل الجهات ومسقوف من أعلى بالزنك ويقوم على قوائم من كمر الحديد .. وبدأوا في تسجيل أسمائنا وصرف النمرة .. والنمرة لمن لا يعلم هي عبارة عن قطعة مشمع ومخدة وبطانية .. قطعة المشمع طبعا يفرشها المجند ة ويتوسد المخدة ويتغطى بالبطانية بالتأكيد.
ثم قاموا بتوزيعنا حيث كان المعسكر يحتوي على أربع كتائب وكل كتيبة تضم أربع سرايا وكل سرية فيها أربع فصائل .. وكان من نصيبنا الكتيبة الثالثة السرية الثالثة الفصيلة الثالثة يعني مازدا عديل (333) ^_^ .. ثم قاموا بتوزيعنا على الخيام وكانت الخيمة الصغيرة تتسع لنحو عشرة أفراد والكبيرة تتسع لنحو 25 فردا .. نسيت أن أقول أننا بقينا في الهنكر أو (الهنغر) كما كان يسميه بعض العساكر .. بقينا فيه من فترة قبل الظهر إلى بعد العصر تقريبا وكان الجو حرا شديدا وكانت معاملة العساكر زي الزفت وأحضروا لنا الغداء في ذلك الهنكر، ثم بعد العصر وزعونا على الخيام.
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
وضعنا متاعنا بالخيام وتم صرف الزي العسكري والذي كان عبارة عن سروال وقميص من الدمورية وحذاء باتا .. وكان بعض العساكر يمرون علينا ويسلمون علينا وكان البعض ظريفا جدا ويرحب بنا ودائما يكون هذا النوع من العساكر كبار السن .. عكس الشباب الذين كنا دائما نشعر بالحقد منهم والرغبة في إذلالنا ... مما نسيت ذكره في أول يوم حضرنا فيه وكان قرب الهنكر هنالك ساحة من الأسفلت الأسود وكانت هذه الساحة يسميها العساكر ب ( مطار صدام ) حيث كانت يجازى ويعاقب المخالفون بالوقوف فيها (إدارة) والإدارة الداخلية شأنها شأن عجيب فتقف الساعات الطوال وتستمع لمحاضرات العساكر وغثاءهم .. وأحيانا يطلبون من الطلاب أن ينشدوا جلالات الدفاع الشعبي (في حماك ربنا - الطاغية الأمريكان ليكم تدربنا - الله معي الله معي - أنا عائد ) وغيرها.
قضينا ليلتنا تلك كأصعب ما يكون .. فقد كان معظمنا طلابا صغار السن فليلو الخبرة والتجربة وكان معظمنا هذه هي المرة الأولى التي يخرج فيها من بيت أهله أو يبيت في مكان غريب!! قضينا تلك الليلة واستيقظنا في الصباح وكان شعورنا غريبا وعجيبا ..فالواحد يستيقظ في مكان غريب ويستغرب فلا هو حوش منزلهم ولا النائمون بجاوره يعرفهم حتى يتعجب الواحد ويقول: أين أنا!! ثم يتذكر فجأة أنه في معسكر الدفاع الشعبي بالقطينة.
كانوا يوقظوننا لصلاة الفجر وكان الإيقاظ يتم أحيانا بغلظة شديدة .. وبعد الفجر على المجند الرجوع إلى خيمته والاستعداد لتمام ستة ( أي الساعة ستة ) .. وفي أول يوم عندما تجمعنا في التمام كل كتيبة في مكانها حيث كانت كل كتيبة لها قائد وفي العادة يكون ضابطا وكان قائدنا ضابط ملازم أول اسمه الملازم عبد الله عباس وكان من أبناء الخرطوم العشرة وكان ظريفا كثير المزاح .. وبعد ذلك لكل سرية قائد وفي العادة يكون ضابط صف وكان قائد سريتنا الرقيب/ قاسم .. رحمة الله عليه فقد علمت بعد سنوات من التخرج أنه قد توفي .. ثم لكل فصيلة حكمدار وهو بمثابة الألفا والذي عادة يكون من الطلاب أنفسهم وفي الغالب يكون كوزا .. وكان حكمدارنا اسمه أحمد صالح.
في ذلك التمام التقانا قائد المعسكر وكان مقدما اسمه ميرغني وكان رجلا فاضلا ومحترما .. الملاحظ دائما أن كبار السن سواء كانوا ضباطا أو ضباط صف يكون فيهم طيبة وحنان أبوي على الطلاب ولكن العساكر الصغار يكون فيهم الغلظة والشدة والحقد!!! رحب بنا وأخبرنا بأننا سنخضع للكشف الطبي .. وفعلا في ذلك اليوم خضعنا للكشف الطبي وكان هنالك تعسف شديد في الكشف الطبي وكان الطبيب الكوز يفترض أن أي طالب يدعي أي شيء هو مستهبل وكان بعض الطلاب الذين يدعون أن عندهم أزمة مثلا يطالبونهم يشهادة طبية ويسميها العساكر (قرار) فإن لم يحضرها ينخرط في التدريبات وإن أصر على أنه مريض يحول للسلاح الطبي للكشف عليه، وكان الطبيب الكوز متعسفا وكريها ويتحامل على الطلاب وكنت أكثر شخصيتين أكرههما في المعسكر الطبيب والصيدلي الكوز أيضا واسمه أسامة وكان كل واحد أسوأ من التاني وأضل سبيلا .. وسأعود لهما بإذن الله كل في مكانه.
وأذكر في دفعتنا تلك لم يعف من المعسكر إلا طالب واحد كان ضخم الجثة جدا وكان عنده ( فلات فوت ) فهذا أعفي من المعسكر بأكلمه وكنا ننظر إليه بغبطة ولسان حالنا يقول: يا حظك.
فاصل ونواصل .. فابكوا معنا ^_^
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
مرحب يا دفعة 
اول حاجة كتيبة كاس العالم كانت الكتيبة الرابعة ما التالتة
بعدين الملازم عبد الله عباس ما شاف الظرافة بعينه , في ملازم تاني بوليس كدا اسمه سمير ولا منو ما عارف كان زول محطرم
بعدين في واحد من الكتيبة الرابعة ناس كاس العالم حلقو ليهو صلعة من النص وخلو الجمبات سموهو محمد اللمين متذكره ^_^
احكي وانا حاكون بالجوار ارفد البوست بمجازفاتنا المسائية الي مدينة القطينة " قد السلك" والعشا كوارع وسمك
اخوك الزحف الزحفو في مطار صدام طائرة الفوكرز ما زحفتو في الرنوي بتاع مطار الخرطوم ^_^
من كتر اخوك ما كان مشاغب وبياخد جزاءات جوني شباب من الكتيبة الرابعة قالوا لي ياخ انحنا بنطالب بيك تكون معانا لانك زينا واحد ^_^
اخوك كان في الكتيبة التالتة
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: اساسي)
|
هلا بالدفع في القطينة 94
اخوكم من الكتيبة الرابعة (كاس العالم) وجاهزين موية ونور لسرد الحقائق والطرائف,,
بس يا صبري اؤكد على كلام اساسي الدفعة بان الملازم عبد الله لا شاف ظرافة ولا يحزنون اها بقية الملازمين اشهرهم طبعا الطريفي وعز الدين اما الملازم اول شرطة المحترم جدا نسيت اسمو ,,,والتلمجية اشهرهم على الاطلاق طبعا الصول بشرى بدون منازع...
اها يا دفعة بنجيكم صادين
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: mohmed khalail)
|
سلام يا طيور 
أخوكم برضو من طيور 1994*
لكن في معسكر الدخينات شهر مارس
يلا أنا عندي كنز ..
اللي هو إني كنت بسجل يومياتي بالمعسكر
يوم بيوم و ساعة بساعة في كراس !!
و لسه محتفظ بيه لحدي أسي
بتذكر كويس إن كل المعاي كانوا مفتكرني مجنون تماما
و أنا بقعد أسجل كل حاجة رغم التعب الرهيب اللي بيخليك تفكر في النوم بس
و بمعسكرنا نحن عملنا ثورة و طلعنا رجالة من المعسكر
لكن رجعنا ليه صاغرين من بعد !!
و كلو مسجل !!
فلو سمحتوا لي ممكن أنزل منه الأحداث طازة
إنصراف
______________________________
* طبعا حسيت إني كبرت شديد لما عرفت إن أساسي هو دفعة !!
أنا كنت قايله جلكون كبير و كده
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد قرشي عباس)
|
Quote: مرحب يا دفعة
اول حاجة كتيبة كاس العالم كانت الكتيبة الرابعة ما التالتة
بعدين الملازم عبد الله عباس ما شاف الظرافة بعينه , في ملازم تاني بوليس كدا اسمه سمير ولا منو ما عارف كان زول محطرم
بعدين في واحد من الكتيبة الرابعة ناس كاس العالم حلقو ليهو صلعة من النص وخلو الجمبات سموهو محمد اللمين متذكره ^_^
احكي وانا حاكون بالجوار ارفد البوست بمجازفاتنا المسائية الي مدينة القطينة " قد السلك" والعشا كوارع وسمك
اخوك الزحف الزحفو في مطار صدام طائرة الفوكرز ما زحفتو في الرنوي بتاع مطار الخرطوم ^_^
من كتر اخوك ما كان مشاغب وبياخد جزاءات جوني شباب من الكتيبة الرابعة قالوا لي ياخ انحنا بنطالب بيك تكون معانا لانك زينا واحد ^_^
اخوك كان في الكتيبة التالتة |
أساسي بالله انت دفعتي .. لا حول ولا قوة إلا بالله
يا زول هوي انا ما كبير للدرجة دي .. أكيد انت كنت من الناضجين ^__^
والله يا أساسي ما عارف لكن عبد الله عباس ده كان معانا ظريف شديد
كان مسمي نفسه عبد الله بن عباس ^_^ وكان بجي الخيم العصريات ويتونس مع الطلبة
ود اللمين كيف ما بتذكرو كان ألذ زول في الكتيبة كلها
كان بجي يلقى الزول قاعد غافل يقوم يرقد جنب ضهر الواحد
ويقول: فسسسسس زي باب البص السياحي ^__^
ود اللمين ده كنت داير أفرد ليهو مشاركة براهو .. الله يديهو العافية كان بضحكنا
لكن يا أساسي ياخ كتيبة كاس العالم دي كانت كتيبتنا نحنا التالتة ياخ
انت تعرف التسميات دي كانت تسميات محلية مسمنها الطلاب
يعني كانوا الطلاب مسمين:
الكتيبة الأولى: أخوات نسيبة لأنهم خوافين جوا في المواعيد ^_^
وبالمناسبة كان معظمهم حناكيش بتاعين التقنية والتطبيقة
الكتيبة التانية: كتيبة روماريو لأنهم جوا تاني يوم طوالي بعد كاس العالم شالتو البرازيل
الكتيبة التالتة: كتيبة كاس العالم وهي الانفردت بأنو الطلاب والعساكر كان مسمنها نفس الاسم
الكتيبة الرابعة: كتيبة رواندا .. لأنو لمن جوا متأخرين ما لقوا خيم يسكنوهم فيها
فقاموا فرشوا وقعدوا في العراء زي المشردين بتاعين رواندا أيام مجازر الهوتو والتوتسي ^__^
تعال بي جاي بالله فت لينا الذكريات
| |
|
|
|
|
|
|
|
|
 Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
Quote: هلا بالدفع في القطينة 94
اخوكم من الكتيبة الرابعة (كاس العالم) وجاهزين موية ونور لسرد الحقائق والطرائف,,
بس يا صبري اؤكد على كلام اساسي الدفعة بان الملازم عبد الله لا شاف ظرافة ولا يحزنون اها بقية الملازمين اشهرهم طبعا الطريفي وعز الدين اما الملازم اول شرطة المحترم جدا نسيت اسمو ,,,والتلمجية اشهرهم على الاطلاق طبعا الصول بشرى بدون منازع...
اها يا دفعة بنجيكم صادين |
محمد خليل مرحب يا دفعة
يا زول مالك داير تشككني انت وأساسي في ذاكرتي
الشي البتذكرو كاس العالم هي التالتة وهي كتيبتنا
وانتو كان اسمكم ناس رواندا ياخ ^_^
يبدو أن الانطباع حول الأشخاص تحكمه التجارب الشخصية
فأنت وأساسي تؤكدان ان الملازم عبد الله كان كعب وانا انطباعي انه جيد
في حين تؤكدان أن الملازم شرطة واسمه عاطف وكان ماسك الأذونات في المعسكر
فانطباعي عن عاطف انه مسيخ ولئيم وأنتما تقولان العكس
على العموم كانت تجربة مرت بخيرها وشرها
في امنتظارك لاجترار الذكريات ^_^
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد قرشي عباس)
|
Quote:
سلام يا طيور
أخوكم برضو من طيور 1994*
لكن في معسكر الدخينات شهر مارس
يلا أنا عندي كنز ..
اللي هو إني كنت بسجل يومياتي بالمعسكر
يوم بيوم و ساعة بساعة في كراس !!
و لسه محتفظ بيه لحدي أسي
|
ود القرشي .. مرحبتين يا كبير الضببة ^_^
بالله انت دخيناتي ما قطيناتي زينا :))
تعرف كان معانا ولد من أولاد الدندر بعمل نفس عمليتك دي
كان اسمو مهلب وكان عنده كراس بسجل فيهو اليوميات دي
لمن في بعض الطلاب افتكروهو أمنجي ^_^
يا سلام بالله شوف هسي الذكريات دي بعد 17 سنة طعمها كيف
أنا تنبهت للقصة دي في آخر أيام وما سجلت ذكريات
لكن جبت لي كراس سجلت كل أسماء الفصيلة بتاعتنا
يللا في انتظارك بما عندك من الخيرات ^_^
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: mohmed khalail)
|
الأخ الدفعة محمد جلال عبدالله
لك التحية والتقدير وانت تعيد لنا هذه الذكريات في معسكرات إعادة صياغة الطلاب حسب المنهج الكيزاني
انا كذلك من دفعة أسامة ابن زيد 4 / أ لأن هذه الدفعة قسمت الى إثنين (أ / ب) والدفعة ( أ ) كانت في مارس 1994
بينما كانت ( ب ) في يوليو 1994 .. وكنت مقبولأً وقتها في كلية الإعلام بجامعة القرآن الكريم في الدورة الأولي
وتم قبولي كذلك في كلية الإعلام بجامعة أمدرمان الإسلامية في الدورة الثانية .. وأذكر أن نتيجة القبول في الدورة
الثانية ظهرت وانا في المعسكر وعلمت بموعد المعاينات عبر إعلان في إحدى الصحف وانا داخل المعسكر وحاولت
أن أخذ إذناً لحضور المعاينات إلا أن طلبي قوبل بالرفض من قبل الملازم أول عبدالله عباس الذي أصبح الآن عقيداً في
القضاء العسكري .. لكن رغم الرفض إستطعت أن أخرج من المعسكر بمساعدة حكمدار الفصيلة الزميل حسام الدين
أحمد بابكر إبن المدرب القدير والخبير أحمد بابكر وبالفعل نجحت في الهروب لحضور المعاينات في مقر الجامعة الإسلامية
وعدت الى المعسكر في مساء نفس اليوم دون أن يعلم أي شخص بخروجي ما عدا الحكمدار حسام وبعض المقربين من الأصدقاء
والزملاء .. وأكملت فترة المعسكر .. بعد ذلك قدمت إستقالتي من جامعة القرآن الكريم و أكملت تسجيلي بجامعة أمدرمان الإسلامية
وعندما تم إستدعاء الدفعة ( ب ) في شهر يوليو إضطريت للعودة الى القطينة مرة أخرى بسبب الإعلان التحذيري للذين يتخلفون
من المعسكر بالفصل من الجامعة .. وبعد أن ذهبت الى معسكر عيسى بشارة ومكثت يومين جاء قرار بإعفاء الذين إلتحقوا من قبل
بأي دورة حتمية للدفاع الشعبي وبعد أن أبرزت البطاقة الخاصة بدورة أسامة بن زيد (4 / أ) غادرت المعسكر.
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: salah almaleeh)
|
من الطرائف في المعسكر
كان هنالك وكيل عريف يدعى إبراهيم وكنا نطلق عليه (إبراهيم T) نظراً لوجود شلوخ أشبه
بحرف الـ T على خده .. وفي يوم كنا في طابور بعد تديرب على الفك والتركيب رفع أحد
الطلاب وهو من جامعة أمدرمان الأهلية يده وقال لإبراهيم تي : (أنا عيان يا سياتك) فرد عليه
إبراهيم : (عيان بي شنو ؟) .. فأجابه الطالب : (عندي إستاتيكا في الركبة !!) وهنا أبدى إبراهيم تي
نوعاً من التعاطف الشديد تجاه الطالب وطلب منه الجلوس على الأرض وعدم الوقوف.
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: salah almaleeh)
|
الأخ محمد جلال عبدالله
إتفق معاك تماماً في الأهداف التي ذكرتها من إقامة مثل هذه المعسكرات
وأذكر أنه كانت هنالك خيمة وحيدة فيها كهرباء تابعة لمنسقية الدفاع الشعبي
وكان الطلاب يطلقون عليها الخيمة المضبئة وفيها كان يتم تجنيد الطلاب
لما تسمى بالحركة الإسلامية .. وأنا واحد من الذين تمت دعوتهم لهذه الخيمة
بهدف تجنيدي ولذلك بواسطة أحد الطلاب وهو الآن إداري في صحيفة الحرة
وكان يشغل مسؤول الإعلام في الصندوق القومي لدعم الطلاب
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: salah almaleeh)
|
يا محمد عباس يا أخ انت زول بخيت
هههههههههههههههه
Quote: يلا أنا عندي كنز ..
اللي هو إني كنت بسجل يومياتي بالمعسكر
يوم بيوم و ساعة بساعة في كراس !!
و لسه محتفظ بيه لحدي أسي
بتذكر كويس إن كل المعاي كانوا مفتكرني مجنون تماما |
شوف زولك ده صنفوهو كيف: (قعونجة نووية)
Quote: تعرف كان معانا ولد من أولاد الدندر بعمل نفس عمليتك دي
كان اسمو مهلب وكان عنده كراس بسجل فيهو اليوميات دي
لمن في بعض الطلاب افتكروهو أمنجي ^_^ |
طبعاً خيار تهمة (الجنينة) عند المقارنة مع (الغوص) تعتبر رتبة عالية
خخخخخخخخخخخخخخخخخخخخ
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: عماد حسين)
|
Quote:
طبعاً خيار تهمة (الجنينة) عند المقارنة مع (الغوص) تعتبر رتبة عالية
|
يا عمدة
أنا صعب أتصنف غواصة
لأني كنت من الشاركوا في تمرد كبير بالمعسكر !!
بسبب غياب موية للشرب بتاتا !!
شلنا شنطنا و عملنا مظاهرات و طلعنا من البوابة الرئيسية
دون ما يقدروا يتعرضوا لينا
لما وصل الإحتياطي المركزي كنا وصلنا بيوتنا !!
اللذيذة بعد ما رجعت المعسكر
لقيت روحي مطلوب من الأمن !!
لأنو ببساطة في ناس زملاني في الخيمة
جوني توتي زيارة أيام الطلعة دي
فطوالي بقيت راس هوس
و إتهموني بإني مدبر للتمرد ده !!
يعني زي لإتهام الحكومة أسي للشيوعيين
بقفل بلوفة الموية
و دفع الكاش لناس بري للمظاهرات !!
حكاية غريبة
علشان كده عندي قصص رهيبة في المعسكر ده !!
تسلم
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: omer osman)
|
Quote:
يا ابو حميد ياخ انت بالله من ناس المظاهره اياها اها اكشف ليك سر اخوك ظاتو كان ضمن الجماعة اياهم وطبعا اهم الاحداث جريت الطريفي ودقت الملازم اول عاطف..
|
تعرف ناس خيمتي ما كانوا مفتكريني حأشارك في الثورة دي
مع كل الجن بتاع المعادلات البتسلى بيها برسمها بالواطة
إضافة لتهمة كوني حنكوش قرأ بره لحدي أولى ثانوي !!
الملازم عاطف ده بتاع المطافي
هو الجاب الكفوة للمعسكر
يجي ماري علينا و نحن زيتنا طالع من الجوع و العطش و يقول
"يا مجاهدين ..
جوعناكم ، عطشناكم ؟؟"
و تضطر تقول ليه :
لأ !!!
غايتو إستعدل بعد الثورة شديد !!
Quote:
بالمناسبة عندي قصة طريفة مع الملازم عزالدين بحكيها ليكم بي رواقة..
|
و ماتنسى الملازم شوقي !!
غايتو أنا المكيفني هو الصول جوكس
كان الوحيد الواقعه ليه عبثية الشغلة دي
و إننا حنبقى دكاتره و مهندسين و ما عساكر قطعا
علشان كده كان بيتعامل بأريحية الشايف قدام
الباقين كانوا مفتكرين حنمشي معاهم العمليات من المعسكر طوالي
جادين جداد شديد
ياخ البوست ده تحفه
حأكتشف فيه ناس كتار شكلي !!
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: omer osman)
|
Quote: ملازم أول/ عمر عثمان - معسكر الشهيد عيسي بشارة
فبراير 1991م - ديسمبر 1991م |
سلام يا اخ عمر وصاحب البوست
كنت في معسكر القطينه في هذه الفتره - كأول دفعه من طلاب الجامعات الجدد وكان به فقط طلاب جامعة الخرطوم.....باقي الجامعات تقريبا في جبل اولياء.ز
بسالك يا اخ عمر..كان في ملازم اسمو ياسر وآخر اسمه محمد خالد ..اين هم الان؟
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
Quote: المكان: معسكر عيسى بشارة للدفاع الشعبي بالقطينة
الزمان:الفترة من 15/7/1994 إلى تقريبا 5/9/1994
المناسبة: دورة أسامة بن زيد الرابعة لطلاب الجامعات - وكانت إجبارية بالتأكيد |
أخونا محمد جلال عبد الله ..
مك طيب ..
وجمعه مباركه ..
كدي إظكر كويس ..
العبد لله كان ضمن معسكرات دورة أسامه بن زيد الخامسه(أ) بمعسكر المرخيات من 5 مارس 94 وحتي مطلع مايو.
.............................................................................................................................................................
كان المعسكر للطلاب المقبولين لجامعة الخرطوم ومعنا طلاب جامعة الفاتح من سبتمبر وقتها ..
المهم .. جينا داخلين المعسكر بمجروس بعد مشوار طويل في الخلا والصي من ميدان الخليفه حيث (الجمعون) كما يقول العسكر وبعد الثالثه ظهراً وجدنا أنفسنا داخل جامع لا تقيك فيه من حرارة الشمس إلا حزمة (فلكاب) مشتته في أعلاه هنا وهناك..
والتعلمجي الرقيب أول عيساوي محمد خماس يصرخ :
يا تالب أمشي هناك أحفر حفره أدفن شهادتك إنتا هنا مجند أخو الشيطان.
وبين الأراجيل والأزاوير كانت لنا هناك ذكريات ممتعه.
بعتذر يا محمد .. جيتك خاشي بالعرض واستلمتا الموضوع منك.
تحياتي.
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: mohmed khalail)
|
الملازم عز الدين جمعنا ليك الساعة1 نص النهار في مطار صدام والشمس تقول يا ليل..
اخوكم طبعا من حرارة الشمس اصابتني حساسية عيون (عيوني بقت حمرا زي ديك الملايكه) على قول التعلمجي. اها الملازم عز الدين طلعنا من الطابور واعتقد كان معاي عبد العزيز ابن الفنان عبد الكريم الكابلي وشبكنا ليك انت يا زول صلعتك مقشره ليه( لعبدالعزيز) وانت يا مستجد يا كهنه ليه عيونك حمر..
المهم ملانا هواء زي الترتيب وأجلس كل الجماعة الا نحن الاثنين..قال اي واحد لازم ادينا سبب منطقي لاحمرار العيون وتقشير الصلعة عشان نخليكم تقعدوا زي الباقين...
اها اخوكم الادارة عصرتو قلت ليهو يا جنابو الشمس سبب حمار عيوني..قال لي الشمس يا مستجد اها الليلة تقيف تعاين للشمس دي عدييييل اوع تنزل عينك منها..ولو ما قلت لينا شعر في الشمس دي حتقيف ادارة 24 ساعة..كل مره يلف ويدور واجينا اها مستعد للقصيدة في النهاية طبعا قلت ليهو مستعد (عاوز اتخارج) فنجرت بيوت كان شعر مطلعها..
يا ايتها الشمس الجميلة
مالـي اراكي مستطيـــلة
فانفجر الجميع بالضحك وكانت هذه الابيات سبب اعفاء كل الفصيلة من تمام مطار صدام اليوم داك..
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
ود المليح بالله إنت دفعة؟
ياخ أنا ما كبير للدرجة دي
انت أظنك كنت من الناضجين ^___^
Quote: من الطرائف في المعسكر
كان هنالك وكيل عريف يدعى إبراهيم وكنا نطلق عليه (إبراهيم T) نظراً لوجود شلوخ أشبه
بحرف الـ T على خده .. وفي يوم كنا في طابور بعد تديرب على الفك والتركيب رفع أحد
الطلاب وهو من جامعة أمدرمان الأهلية يده وقال لإبراهيم تي : (أنا عيان يا سياتك) فرد عليه
إبراهيم : (عيان بي شنو ؟) .. فأجابه الطالب : (عندي إستاتيكا في الركبة !!) وهنا أبدى إبراهيم تي
نوعاً من التعاطف الشديد تجاه الطالب وطلب منه الجلوس على الأرض وعدم الوقوف. |
أها إبراهيم ده كان من أطيب الناس في المعسكر
وحقيقي هو وواحد اسمه علي ورقيب أول اسمه محمد حامد
كانوا من أطيب ما يكون وكانوا يتعاملوا مع الطلاب بصورة أبوية
شكرا على مرورك ونورت البوست
وأرجو أن تواصل
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
Quote: سلام يا اخ عمر وصاحب البوست
كنت في معسكر القطينه في هذه الفتره - كأول دفعه من طلاب الجامعات الجدد
وكان به فقط طلاب جامعة الخرطوم.....باقي الجامعات تقريبا في جبل اولياء.ز
بسالك يا اخ عمر..كان في ملازم اسمو ياسر وآخر اسمه محمد خالد ..اين هم الان؟ |
والله يا اللمين مداخلتك دي جهجهتني بشكل
أشوف من برة آخر رد الامين محمد علي
وأخش البوست ما ألقى حاجة وأقفل المتصفح وافتح تاني وارفرش
لحدي ما فهمت القصة عملت كنترول مع اف وبحثت عن اسمك ولقيت المداخلة
تاني ما تعمل كده ^____^
والسؤال محول لجنابو عمر
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
Quote: شكلك ما ركزت في العنوان
نحنا كنا في القطينة في دورة أسامة بن زيد الرابعة
|
لا يا محمد أنا منتبه للعنوان كويس ..
لكن قاصد ليك أنو السنه ديك 94 هي سنة دورة أسامه بن زيد الخامسه إن لم تخني الذاكره ..
وكانت المعسكرات تتوزع لدفعة ذلك العام من طلاب الجامعات بين معسكرات:
المرخيات
الدخينات
جبل أولياء
القطينه
كل الطلاب توزعوا ذلك العام بين هذه المعسكرات فقط لدورة أسامه بن زيد الخامسه منذ مارس 1994 وحتي مايو 94
وتم التخريج في الساحه الخضراء ..
وأذكر أننا حضرنا للساحه الخضراء يوم بروفات التخريج من المرخيات والدموريه حمرااااااااااااا بسبب الرمال الحمراء والبيئه الجبليه ووجدنا طلاب الدخينات والدموريه بيضاااااااااااااااا والظهره تقول يا ليل وهتفنا ليهم أخوات نسيبه أخوات نسيبه .. حساده ساي.
علي أية حال هي أيام برغم ما فيها مما ذكرت أنت من العنت لكنها لا تخلو من الذكريات الجميله ..
التحيات للجميع.
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد قسم الله محمد)
|
Quote: لا يا محمد أنا منتبه للعنوان كويس ..
لكن قاصد ليك أنو السنه ديك 94 هي سنة دورة أسامه بن زيد الخامسه إن لم تخني الذاكره ..
وكانت المعسكرات تتوزع لدفعة ذلك العام من طلاب الجامعات بين معسكرات: |
والله يا ود قسم الله شككتني!!
لكن قلت ليك أنا عامل لي كراس عديل
وأظن البطاقة بتاعت الدفاع الشعبي لي هسي عندي
على فكرة نحنا خرجونا في المعسكر .. من دقنو وافتللو ^_^
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
كان هنالك ملازم وأظنه كوز اسمه الملازم حسين .. الملازم حسين ده كان في منتصف الأربعينات تقريبا .. ورتبة الملازم دي جابها من جندي (حاكيها) من الزمن داك حسب تعبير الطلاب .. الملازم حسين كان فارع الطول ممتلئ الجسم قوي البدن .. وكان فيه صرامة وغلظة شديدة .. وكان برضو زول هطلة وبتاع مزاجات .. ممكن يوم كده ساي مزاجو رايق يقوم يتونس مع الطلاب ويضحك معاهم .. وممكن برضو لو زهجان أو زعلان يقوم يديهم جزاءات بدون أي ذنب.
ما لا أنساه أبدا لهذا الملازم الهطلة ... في يوم من الأيام سريتنا السرية التالتة صدر منها أخطاء .. فكان هنالك بعض الناس يتحدثون ويتونسون أثناء الطابور بتاع تمام الساعة 6 .. وهنا ثارت ثائرة الملازم حسين وعلى طريقة العساكر الظالمة: الخير يخص والشر يعم .. تم عقاب السرية كاملة وكيف كان ذلك .. الراجل الما بخاف الله ده عمل جزاء للسرية كلها تعمل أرنب نط مسافة بتاعت كيلو متر وزيادة .. والله ناس وقعت وناس ما قدرت تواصل ولمن خلصنا عشان يرضي شهوته وساديته المريضة ..والله معظم الناس إن لم يكن كلهم جاهم تمزق عضلي وكانوا أيام ما بقدروا يمشوا كويس ولا يقدروا يقيفوا.
وأصبح الملازم حسين مكروها لدى الطلاب وكانوا بنشدوا في الجلالات لمن يمرقوا من المعسكر:
ملازم أب كضيمات ... يبلع اللقيمات
يللا يا جنابو ... نبلغ المظلات
الرااااايو رايو .. الرايو رايو ..
الرايو رايو رايو
الرجل كان من ساديته أنه لو مر طالب ساي أمام ناظريه ممكن يناديهو ويوقفو ويديهو جزاء أو يكلفه بمهام لا أساس لها إلا إرضاء رغبته المريضة.
أذكر أنني ما كرهت أحدا في المعسكر مثل الملازم حسين .. وراجل كبير رقيب أول قصير القامة اسمه الزبير .. ده كان القتاتة والثقالة بذاتها.
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: محمد جلال عبدالله)
|
Quote: أذكر أنني ما كرهت أحدا في المعسكر مثل الملازم حسين .. وراجل كبير رقيب أول قصير القامة اسمه الزبير .. ده كان القتاتة والثقالة بذاتها.
|
يا شباب ياخ والله جهجهتوة باكاتنا ..
اولا دفعتنا 94 دي ااسامة بن زيد الرابعة وفيها كاس العالم اياهو ونهائي امم افريقيا الماتو فيهو ناس الفريق الزامبي وبرضو وصلو النهائي واتقلبو من نيجريا ..قدينا سلك وحضرناها في القطينة ووفازت نيجريا بعد اداء بطولي للزامبيين...
اها عم الزبير القصير ابو كريشة ده كان احن زول علينا في السرية وكان بعاملنا بحنان ابوي..
حسين ده يطرشني ما سمعته بيهو ضباط المعسكر كانو عمك المقدم ونقيب مصطفى وملازم اول شرطة عاطف وملازم اول شرطة الطريفي وملازم ثاني عزالدين وملازم ثاني عبد الله...وكانو بلقبونا بالطيور..
وصحيح اتدربنا في القطينة لكن اتخرجنا في الساحة الخضراء مع بقية المعسكرات..
يا اخونا لو انتم عجزتو نحن لسه شباب
| |
|
|
|
|
|
|
|
|
|
Re: شهادتي على العصر من معسكر القطينة للدفاع الشعبي 1994م (Re: mohmed khalail)
|
يابوخليل .. نحنا عجزنا بالله وللا مخنا اتلحس ^_^
ياخ الملازم حسين ده كان موجود ومشهور
انت كنت في الكتيبة الكم؟؟
بعدين رايك في عمك الزبير ده بيؤكد كلامي القلتو أول
إنو أي زول بيحكي عن تجربته الشخصية العاشها
يعني الناس الكان بتعامل معاهم الملازم عبد الله تعامل كعب شافوهو أكعب زول
وأنا شايفو كويس خالص خالص
واهو انت بتقول لي الزبير ده زول تمام
مع إني شايفو أسوأ السيئين
غايتو ما عارف البتذكرو إنو اتخرجنا في المعسكر
شكرا على مرورك
| |
|
|
|
|
|
|
| |
محمد جلال عبدالله
نصار
بخاري عثمان الامين
قيقراوي
اساسي
mohmed khalail
محمد قرشي عباس
salah almaleeh
عماد حسين
omer osman
الامين محمد علي
محمد قسم الله محمد
فيس بوك
تويتر
انستقرام
يوتيوب
بنتيريست