ونـــــــسة ودردشه مع ابوى العذيذ الغالى أحمد محمد العبد
ابوى ذالك الرجل المثقف والفنان والمبدع وكم انا فخوره به رجل بسيط يكره الفخامه والحواشى له روح فضفاضه رغم سنه الذى تعدى الثمانين من عمره له الصحه وطول العمر رجل معطون فى كم هائل من المعلومات والاحداث التاريخيه المختلفه والمتنوعه فى الفن والتراث والفلكلور وفى مجال الرياضه وعن الحياة الاجتماعيه منذ الثلاثينات والتقاليد والعادات التى كانت سائده فى ذلك الزمن عامه ونحن كثيرا ما نجهلها رجل موسوعة له ذاكره مدهشة له الصحه والعافيه ولقد تعلمنا منه الكثير فهو يجمع ما بين جيل الاصاله والمعاصره رجل يعشق الادب والفن ومحب للقرأة والاطلاع والعلم ومحب لكل من هو مبدع
له القدره على التعامل مع الكل مهما كانت المفارقات ومهما كان فرق العمر ويكفى ان من خلاله وجدنا طريقنا الى الابداع كأبناء وكأحفاد له
ولكن من اهم الاشياء التى انطبعت فى ذاكرتنا منذ الصغر هى الموسيقى التى اصبحت فى دماءنا وكنا بنوم ونصحى على صوت الكمان والعود وحتى تلك اللحظه اجمل اللحظات نقضيها معه نحن واصدقاءنا ونستمتع بعزفه على العود وبالونسه والدرشه والحكاوى فهوالاب والصديق وكثيرا ما اشعر بأنه رجل موسوعه ويجب ان يعرفه الاخرين حتى تعم الفائده
. لذا اتت الفكره من فتح هذا البوست من اجل عدم احتكارية ابوى لانو الانسان لمن اكون مبدع لابد ان يتعرف عليه الاخرين و من خلال النقاش وتطرح الاسئله وبى مختلف رؤيتها المختلفه من الداخل او الخارج يمكن نطلع بى اكبر فائده وحاواصل الدردشه مع ابوى شويه شويه او بى رواقه وحاحكى لينا حكاوى وحكاوى عن تجربتو الفنيه وعن تاريخ الغناء وعن علاقتو بالرياضه... والخ [email protected]
current=4fe7be95.jpg" target="_blank">
الصوره بتاريخ - 08/30/2011/ واشنطون
09-19-2011, 01:49 PM
lana mahdi
lana mahdi
تاريخ التسجيل: 05-07-2003
مجموع المشاركات: 16049
Quote: متابعين يا حبيبة مع صورة الطيب الأصيل أبونا كلنا زي ما قلتي ما حتحتكريهو متابعة معاكي بكل شغف
امتع يوم لنا في بيتكم حفل تخرج اختنا اميمه بفرفور زمن بغني شعبي وانا جاي من المطار بعد ان استلمت زوجة اخي واطفالة وقلت للسائق دور بيهم البيت وانا دورت بيتكم وفي نص الحفلة ياسلام كلكم ناس روعة تحياتنا الى انتصار بالله
09-19-2011, 02:32 PM
محمد عبدالرحمن محمد
محمد عبدالرحمن محمد
تاريخ التسجيل: 10-13-2010
مجموع المشاركات: 1556
رجل موسوعة له ذاكره مدهشة له الصحه والعافيه ولقد تعلمنا منه الكثير فهو يجمع ما بين جيل الاصاله والمعاصره رجل يعشق الادب والفن ومحب للقرأة والاطلاع والعلم ومحب لكل من هو مبدع
ابوي انشالله لي تسلم وتسلمي إنت يا ست البنات ويا ست ابوها فكرة البوست جميلة وحقيقي في كل مناسبة ، جلسة ، لمه و وجبة غداء يحكي لنا أبي قصة وتكون مختلفة عن القبلها او امتداد لها دون تكرار ،،،، وماشأالله عليك ياابوي
09-20-2011, 03:44 AM
خالد العبيد
خالد العبيد
تاريخ التسجيل: 05-07-2003
مجموع المشاركات: 21983
وبما اني اخر العنقود في الأسرة وكنت الزول داك البرسلو في الاكل اجيب الذيادة ولا اجيب الموية ولا اجيني صوت من بعيد اجررررررري سريع افتحي الباب وعشان كده ونيابة عن محاسن اجري جري وافتح لكم الباب مرحبة بمشاركتكم لنا الونسة والدردشة والاستمتاع معنا بوالدي الحبيب
الصديق العزيز / وليد عبداللطيف ...ذاكرتك تدهشني ..والله ايام يا زمان.. ومشتاقين.
الأستاذ / محمد عبدالرحمن محمد .. اسماعيل عبدالمعين هو الذي علم والدي العزف علي العود و تبرق اعين أبي وتفرح اوردتة عندما يتحدث عن سماعين عبدالمعين ..... متواصلين والحكاوي جاااااااااااية قدام.
الأستاذ / كمال كرار .. لابي مع اسرتك ذكريات ومؤكد ستسمعها وتقراءها في هذا البوست وكثيراً فتحت الباب مرحبه بالعم عابدون كرار صديق والدي وخالي علاءالدين بدوي لهم الرحمه
الاخ خالد العبيد / حسي الجاب سيرة الجنوب منو !!! ....... وماااا مشكله ستنا ستنا برضو انتصار بت احمد العبيد واختنا وحبيبتنا
واتفضلوا لحدي ما اجوكم العجايز
09-20-2011, 08:10 AM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
الحبيبه لنا حبابك وابوى ده ياريتك لو لاقيته وناس وبحب الونسه وحتسمعى قصص وحكاوى وفعلا هو ابو الكل وشدة الكلام ما كتير ماعارفين نبداه من وين ولا من وين كلو جــــاى
وليد عبد اللطيف يا ود بحرى تسلم ياوليد وطبعا ابوى ده خطير عارفو والحلفلات الفاتتنى دى ما عافياه ليكم
محمد عبدالرحمن محمد يالمطرطش بركه ابوى الجابك وطبعا حاحكى ليك بى رواقه عن اسماعيل عبدالمعين
كمال كرار ياسلام ياسلام اخى كمال كرار نحن مما قمنا ابوك السر وعمك عابدون اعمام اوخيلان لينا الف رحمه عليهم والله نحنا اهل واذكر اول ماعمك عابدون اجى من السفر طوالى بجى لى خالتى فاطمه ولازم ادخل البيت وكان صديق لخيلانى الزين وعلاالدين ولى ابوى الف رحمه عليهم وبالمناسب البوست ده حيكون اضافه حقيقية لى بوست بحرى العريقه والله تسلم لو عندك اى سؤال لى ابوى جهزو
خالد العبيد الصديق العزيز تسلم بس ماكنته قايلاك عنصر وسلامك وصل
الاستاذ محمد أبوالعزائم أبوالريش منتظرين ............ أفتحوا السحّارة. قربت بس المفتاح عند ابوى وابوى عاوز عروس ......... جاين شيل الصبر ومشكور على المرور
09-22-2011, 01:59 AM
محاسن أحمد محمد
محاسن أحمد محمد
تاريخ التسجيل: 10-26-2008
مجموع المشاركات: 1151
كنت صديق قريب وحميم لعالة اسماعيل وهو اصلا من اب مصرى وامه حاجه مريم بت سيداحمد وكانت امها من غرب السودان وتزوج ابوه بعد امه بامرأة اخرى من الفاشر
تخرج اسماعيل من كلية قردون للحداده والنجاره
الاستاذ اسماعيل عبد المعين ذهب للدراسه فى مصر فى اول الاربعينيات ودرس فى معهد فؤاد للموسيقى والاصوات لمدة ثلاثه سنوات كان يعتمد على نفسه تماما فى المصاريف ومن مصادر دخله
كان فى ضابط مصرى اسمه عبدالمنعم عبدالحى كان بدى اسماعيل قصائد وكان اسماعيل بلحن القصائد وبغنيها
وسجل اسماعيل اسطوانات فى فى شركة بايض دى فون فى القاهره وصاحب الشركه كان خواجه وده السمى اسماعيل اسماعيل عبد المعين بدلا عن اسماعيل عبد النعيم ومن بعض الاغانى التى سجلت فى الاسطوانات
قابلت مع البياح يامبيو يابلاد الزامبيا وجبال التاكا
وبعد تخرجه من معهد فؤاد للموسيقى والاصوات سافر الى فرنسا مع تسعه طلاب كان هو السودانى الوحيد وفى فرنسا ايضا اعتمد على نفسه تماما وعمل العديد من الالحان والاغنيات والموسيقى الى كانت مسار اعجاب الفرنسين وكان يتغنى بها فى المسارح الفرنسيه ومن اشهرها بلوبلو وهو طير سوداني وكان الشباب فى الشوارع يرددونها بلوبلو ..... بلوبلو بلوبلو ..... بلوبلو واعجب بهذه الاغنيه صاحب مطعم فى فرنسا وطلب من اسماعيل ان يعطيه اسم بلبلو عشان اسمى بيه المطعم وكان مطعم مشهور ودفع ليه مبلغ كويس على الاسم وبعد اسبوعين عمل قصيدة اخرى سمها بجبجه وبرضو بجبجه طير سودانى قضى اسمعيل فى فرنسا ثلاثه ثنوات ورجع السودان
ونواصـــــــــل
09-22-2011, 02:11 AM
محاسن أحمد محمد
محاسن أحمد محمد
تاريخ التسجيل: 10-26-2008
مجموع المشاركات: 1151
تحياتي وسلامات الأخوات محاسن وأميمة بوست حنين يجسد معاني جميلة أنخت فيه راحلتي منذ لحظة إنطلاقته وأتابعه لا أزال لحظة بلحظة
والبوست ينحو منحى التوثيق توقفت عند هذه الجملة
Quote: كان فى ضابط مصرى اسمه عبدالمنعم عبدالحى كان بدى اسماعيل قصائد وكان اسماعيل بلحن القصائد وبغنيها
مبلغ علمي أن عبدالمنعم عبدالحى ضابط سوداني عمل بالجيش المصري لكنه تزوج واستقر بمصر وعبدالمنعم عبدالحى علامة فارقة في الشعر الغنائي السوداني ، فهو الشاعر الذي رغم إستقراره الدائم بمصر فقد رفد المكتبة الغنائية السودانية بأجمل الأغاني ، تغنى له كبار الفنانين السودانيين ، أحمد المصطفى ، عثمان حسين ، عبدالعزيز محمد داوود .........الخ
09-22-2011, 07:21 AM
محمد أبوالعزائم أبوالريش
محمد أبوالعزائم أبوالريش
تاريخ التسجيل: 08-30-2006
مجموع المشاركات: 14617
Quote: . لذا اتت الفكره من فتح هذا البوست من اجل عدم احتكارية ابوى لانو الانسان لمن اكون مبدع لابد ان يتعرف عليه الاخرين و من خلال النقاش وتطرح الاسئله وبى مختلف رؤيتها المختلفه من الداخل او الخارج يمكن نطلع بى اكبر فائده وحاواصل الدردشه مع ابوى شويه شويه او بى رواقه وحاحكى لينا حكاوى وحكاوى عن تجربتو الفنيه وعن تاريخ الغناء وعن علاقتو بالرياضه... والخ
بالله شوفو زي ديل هو الاحتكار كيفنهو يعني العم احمد محمد العبيد ثروة قومية متحركة ويجب الحفاظ عليها وهو شاهد عصر للحركة الرياضية والفنية والسياسية معقول ياناس بحري اتلومتو معانا وسوف يكون لنا في هذا الرابط حديث مطول معه وياريت تساعدونا لتوثيق الكثير الذي يمتلكه بعيدا عن واقعنا الكروي الأليم..... أفضل لاعبي كرة...كرة القدم السودانية
09-22-2011, 10:04 AM
طيفور
طيفور
تاريخ التسجيل: 08-17-2002
مجموع المشاركات: 1666
اكيد ياعمدة مافي لوم لكن بالله دي ماخيانه عظمى من اميمه ومحاسن احمد ياعماد طبعا انا نزلت موضوع احمد العبيد في البوست التوثيقي بعيدا عن واقعنا الكروي ياريت تقوم باللازم او ارسال مايتحدث عنه عن طريق الايميل
09-22-2011, 01:57 PM
محاسن أحمد محمد
محاسن أحمد محمد
تاريخ التسجيل: 10-26-2008
مجموع المشاركات: 1151
اسماعيل كان رجل عصامى وملتزم فى الاخلاق يعشق الفن ووهب له حياته حينماعرضت عليه والدته الزواج من بنت خالته بعد حضوره من فرنسا رفض اسماعيل الزواج رشحها لاخيه و قال لامه انه تزوج الفن وكان كل ما يملك فى غرفته غير سرير وطربيزه وعود وشنطتين واحده للملابس والثانيه للموسيقى حتى موته الف رحمه عليه
Quote: والبوست ينحو منحى التوثيق توقفت عند هذه الجملة Quote: كان فى ضابط مصرى اسمه عبدالمنعم عبدالحى كان بدى اسماعيل قصائد وكان اسماعيل بلحن القصائد وبغنيها
مبلغ علمي أن عبدالمنعم عبدالحى ضابط سوداني عمل بالجيش المصري لكنه تزوج واستقر بمصر وعبدالمنعم عبدالحى علامة فارقة في الشعر الغنائي السوداني ، فهو الشاعر الذي رغم إستقراره الدائم بمصر فقد رفد المكتبة الغنائية السودانية بأجمل الأغاني ، تغنى له كبار الفنانين السودانيين ، أحمد المصطفى ، عثمان حسين ، عبدالعزيز محمد داوود .........الخ
شفتي آسونا البدايه بالأسطوره عبدالمعين كيف فتحت نفاج لي معرفة واحد من أميز شعرانا ناس كتار ماهن عارفنو، اللهو عبدالمنعم عبدالحي؟
عاطف الرزين الرصين ملاحظتك في محلها، عبدالحي من شِدّة مو سوداني: دينكاوي عدييييل
سونا وآخر العننقود أميمه شكراً علي البوست المريح ده وربنا يحفظكن ووالديكم
Quote: طبعا" انا لاقيتو و إنفردت معاهو بي عشرة ونسة ما أحلاها الليلة لاقيتو وملأ السرور قلبي وبي إسمو ناديتو
متين ياخوى والله تمام عشان كده عارفو كويس
المبدع اسماعيل محمد الحسن
Quote: كل زول بحلم رسالة امينه صادقة بعيد مداها يعرف يعرف التاريخ بسطر .. وانتو لازم تسطروا وتسجلوا وتصوروا لانو
مشكور عزيزى وتعرف يا سمعه الكلام كتير وقصص وقصص ما عارفه ده كل اسويه متين غايتو حبه حبه وفعلا دى مسئوليه
وليد عبد اللطيف وليد اخى والله مافى احتكار وبالمناسبه عندو كلام كتير عن تاريخ الفن والرياضه البوست ده مفتوح وابوى قرب اجى السودان تعال اقعد معاه وبى رواقه صدقنى حتطلع بى بلاوى اه قصرتـــه وكمان علينا القهوه والشاى
طيفور
Quote: انا احتج انتو متحيزات وحقارات يا بنات العبيد فرغم محبتي لابوي العبد إلا انه لا حديث يحلو دون حضور امي سعادة وقهوة بُنها المحفّل
عبد الرحيم فؤاد صديق ورفيق الصبا والابداع ياتشكيكى ماتولع النيران حجوجه ما جايبه خبر والله جاياه بى رواقه او ما ناسياها بس قول نفسك فى قهوه
عبدالحفيظ حسن
Quote: الاخ الاستاذ عبدالحفيظ حسن الأخت الأستاذة محاسن..... لك الود....
من سياق هذا البوست..... يبدو أنك شقيقة زميلى ودفعتى... ضابط الشرطةالمرحوم..... حيدر أحمد محمد العبيد... له الرحمة والمغفرة..
نعم اخى انا اخت المرحوم حيدر أحمد محمد العبيد. الانسان المبدع والفنان ونحنا مازلنا حزنا عليه يتجد يوم بعد يوم هو واخى الدكتور عارف الف رحمه عليهم فقد فقد كبير
Emad Ahmed اخى عماد ود بحرى العزيز زى ما قلته لى كمال كرار ولى وليد ده ابوكم صدقنى حتستفيدو منو كتير تعالو وافعدو معاه وبالمناسبه بحب الونسه والكلام شيلو شيلتكم براى ده بوست الجميع
د.محمد حسن شكرا يا شاعرنا الجميل والسماحه جايه بالكوم ابوى وناس وحبيب
محمد عبدالرحمن محمد الشايقى الكى صدقته الحديث عن الزنجراب جاى
ihsan fagiri الدكتوره الحبيبه احسان تحلى ليكى العافيه والله حنين اوزول جميل ومرهف وبحب الجمال وبقول ليك مليون سلام ياغاليه
09-23-2011, 06:57 AM
Kamal Karrar
Kamal Karrar
تاريخ التسجيل: 11-16-2006
مجموع المشاركات: 3734
Quote: نعم اخى انا اخت المرحوم حيدر أحمد محمد العبيد. الانسان المبدع والفنان ونحنا مازلنا حزنا عليه يتجد يوم بعد يوم هو واخى الدكتور عارف الف رحمه عليهم فقد فقد كبير
المرحوم حيدر صديق وزميل دراسة. رحمة الله تتنزل على روحه الطاهرة. فقد جلل ولكن، لله ما أعطى ولله ما أخذ. تحياتي يا أخت محاسن، وبالمرة تحياتي للأخ الباشمهندس صلاح سري وأسرته الكريمة. من المتابعين لهذا البوست التوثيقي الهام. كنت أنتوي مقابلتك بالسودان لنستكمل ما بدأناه من حوار. وللأسف تمت سرقة وقتي عنوةَ.لذا لم أتمكن.
09-23-2011, 02:48 PM
باسط المكي
باسط المكي
تاريخ التسجيل: 01-14-2009
مجموع المشاركات: 5473
وبعد ثلاثه سنوات من الدراسه فى فرنسا رجع اسماعيل للسودان فى ذالك الوقت كانت حكومة ازهرى وكان وزير الثقافه عبد الماجد ابو حسبو الذى طلب من اسماعيل بأنه سوف يعينه مدير لمعهد الموسيقى الزى كان فى الخرطوم نمره اتنين وكان مديره فى ذلك الوقت خواجه بدأ اسماعيل العمل ولكن لم يستمر كثيرا مما دعاه بتقديم استقالته ورفض العمل فى معهد الموسيقى لعدم مساعدة الوزير لا اسماعيل حيث طلب من الوزير ان توفر له وسيلة مواصلات لأنو كان يسكن فى بحرى او ادوه عربيه ويخصم المبلغ من مرتبه
وبعد استقالته من من معهد الموسيقى اتصلت بيه السفاره الليبيه وعرضو عليه ان يذهب الى ليبيا لتعليم الموسيق مشى اسماعيل لى ليبيا وقضى سنه وحدة فى ليبا ورجع بعدها بأيمانه التام تجاه وطنه وله رسالة تجاه بلد فى تعليم الموسيقى ان شباب بلده احوج لخبراته ومن اجل تعليم السلم السباعى بدلا من السلم الخماسى
وفعلا رجع واسس فرقة البساتين واول دفعه اتخرجت واتعينو بشهادات وبى كفائات عالية فى الازاعه والتلفزيون
قال ابوى اسماعيل كان زاهد للدنيا وما كان مهموم بالبس ولا بلاكل بصرف كل قروش على بعض من اهله وعلى كل محتاج وكان فى بعض الناس انتظروه قدام البيت عشان اديهم قروش
قال ابوى فى مره من المرات حضرو شخصين من فرنسا بسألو عن اسماعيل فى الازاعة وودوهم للبيت وقابلهم اخو اسماعيل ووراهم غرفة اسماعيل وكيف انو عايش كانسان وكفنان بسيط
- 5 - اسماعيل عبد المعين وموسيقى الزنجراب
كانت اعمال اسماعيل عبد المعين عباره عن ايقاعات متنوعه من كل انحاء السودان من الشمال ومن الجنوب ومن الغرب والشرق وبالايقاع العربى والزنجى فكانت تتميز بالزنجيه العربيه لذا اطلق عليها استاذ اسماعيل اسم الزنج راب وتداولت بعد ذالك وعرفت بما يعرف بموسيقى(الزنجراب) من أشهرها:-
الف شكر ليك وياسلام لمن اطلوا علينا اخوان وزملا واصدقاء المرحوم العزيز حيدر فيكفى ان هنالك من افتقده مثلنا وواسانا فى فقدنا وانشاء الله نلتقى فى ساعة خير وتحياتى للاسرة
الاخ باسط المكى
Quote: محاسن سلامات بوست له طعم خاص حضور ومتابعة
تسلم اخى ومشكور والحكاوى والونسه جايه
09-26-2011, 07:19 AM
عائشة موسي السعيد
عائشة موسي السعيد
تاريخ التسجيل: 07-10-2010
مجموع المشاركات: 1638
لا أعجب ان يكون هناك توارد خواطر بيني وبينك يا محاسن رغم فارق السنين!!!
تسلمى والله ياحبية على الاطراء والكلام السمح وقمة سعادتى لمن تلاقى فى الدنيا العجيبه دى من من يحمل افكارك ده احساس جميل او بختى كمان صغرتينى وصدقنى اختى الناس الجميلين ديل حنحزن كتير لمن الايام تسرقنا وما نوسق ليهم جيل عاش فى زمن الخير والحب زمن فيه الوفاء وصفاء الروح عشان كده ذاكرتهم حاضره مهما طال الزمن بس تابعى الكلام والونسه جايه
كمال كرار ود بحرى اخى كمال ودالعزاز ابوى قال ليك جايك بى رواقه وعندو كلام كتير عن بحرى وروابط بحرى وبى صراحة انا بطيئة جدا مع الشغل والبيت والحجاج الابام دى معاى فى واشنطون
09-26-2011, 08:54 PM
Kostawi
Kostawi
تاريخ التسجيل: 02-04-2002
مجموع المشاركات: 39979
شكرا ياكستاوى على الصوره ما قصرتة مع صاحبك وطبعا ابوى ليه الصحة والعافية اول الحاضرين فى كل النشاطات الثقافية والسياسية الصوره كانت فى امسيىة الفنان عاصم قرشى فى واشنطون مشاركا بى كلمة صغيرة كستاوى من اليمن ومحاسن من الشمال
09-27-2011, 06:10 AM
محاسن أحمد محمد
محاسن أحمد محمد
تاريخ التسجيل: 10-26-2008
مجموع المشاركات: 1151
- 4 - واصل الحديث ابوى وكتب على كراسته وفاء وعرفان للذكرى والتاريخ
الأخ الصديق السر كرار رحمه الله أول رئيس لفريق الأمير وكان مغرم بالموسيقى وخاصة مقطوعة الأدهمية من ألحان الدكتور محمد أدهم ولذلك سميت الأدهمية وطبعا الأخ علاء الدين حمزه وهو من سكان المورده وأنتقل للخرطوم بحري تعلمنا آلة الكمان من الاستان علاء الدين حمزه و علاء الدين حمزه اول من ادخل آلة الكمان فى السودان واشترك معنا في الفرقة ولقد تعلمنا أنا والأخ جعفر والأخ الأمين النور وعثمان عبد الغفار عزف هذه المقطوعة . الأخ السر كرار أشترى آلة الكمان وتعلم العزف من العبد لله (أحمد العبيد) رحم الله السر كرار وعابدون كرار الأصدقاء الأوفياء وجعل البركه في ذريتهم وآل كرار جميعهم آمين . أما زواج السر كرار كان مفخرة بحري وأمدرمان .
09-27-2011, 04:27 PM
Kamal Karrar
Kamal Karrar
تاريخ التسجيل: 11-16-2006
مجموع المشاركات: 3734
سونا وميمى, وضيوفهم الأعزاء. فقط لأجل حجز مقعدى فى كرنفال الحب هذا. سأحكى عن الفارع الجميل, الوالد الودود والحلو أحمد العبيد. سأحكى عن الرجل الذى وهبه الله بسطة فى الروح وفى الجسد, الرجل الملئ بكل معانى وأسرار الجمال, الرجل الذى أهدى هذه الدنيا ذريةً لم تسقط ثمارها بعيداً عن شجرته الوارفة, الذى أهدى الدنيا, الراحلان حيدر وعارف, وأهداها زنابق عبقة, وفوق هذا وذاك, أهداها روحه الشفيف, المترع بكل اسباب الجمال. سآتى للرواية عن الوالد "الصديق" أحمد بإذن الله. أدام الله عليه الصحة والعافية, و... دمتم
09-28-2011, 08:30 AM
وليد عبد اللطيف
وليد عبد اللطيف
تاريخ التسجيل: 08-09-2009
مجموع المشاركات: 6733
فى مناسبة الاحتفال بزواج اخى عادل أحمد محمد (2010) قرر اخى الاصغر الباشمهندس عاصم مفاجئة الجميع وكانت المفاجئة الاحتفل بعيد ميلاد ابوى الـ 87 وكانت لفته بارعه من عاصم كل سنه وانت طيب يابوى وعقبال وعقبال الشمعة المئة يارب اخر العنقود بتطفى الشموع مع ابوى صغيرتنا أميمه احمد محمد اما الوالده الحبيبه سعاد بدوى صالح كانت فى قمة السعاده مشاركة ابوى الحلوة والمرة والحب ااكبير وحولها الكل مبتهجين وفرحانين اخليكم لى بعض يارب سالمين وتامين
كمال كرار اخى كمال كرار طلع ابوى حافظ تاريخ ابوك كل واكيد الجاى اكتر وزى ماقالت الحبيبه ميمى ده بوست الكل وما مشكله والله اخت البوست منو فينا ده ما مهم المهم تعميم الفائده
استاذ طارق اهلا او مرحب استاذ طارق ود بحرى العريقة مرحب بيك وحاجيب ليك الخبر كل وبالمناسبة عاصم اخوى بسجل لية دائما واكيد كل جاى
شمس شمس شمس حلتنا ودبيتنا ودالخاتمية اوجوه كرش الفيل كما عودتنا مقاسمنا الخير والشر تعال او جيب كل العندك
Quote: عم أحمد العبيد الرجل المضئ بالحب والمولول بالجمال في كل جلسة معه أتعلم منه الكثير والمثير والمدهش حتى الأغماء !!!!!! في كل مرة أسمع منه الجديد والقديم وكأنه قد حدث بنكهة اليوم !!!!!! ياله من رجل عظيم ... ولوف ... وحنيين ياشبه القمره ....
سأكتب هنا بعض النقاط لإشراك الأصدقاء وهي :-
1- لقطات من حياة العامل السوداني
2- الحقيبة والحب والعذري
3- تعامله مع الأبناء والبنات
1- لقطات من حياة العامل السوداني :
تحدث عم أحمد عن أنضباط وكفاءة وإبداع العامل السوداني والطبقة العاملة عموما قبل الأستقلال وبعده وأكد أن العامل السوداني بكل المقاييس هو المتقن لعمله والمبدع له فمن شئ بسيط وبأدوات قليلة يخلق كل الجمال فورش السكة حديد تشهد وورش البابورات بحري تشهد والري المصري بجبل أولياء ومشروع الجزيزة كما تشهد ورش الحدادين والنجارين في المناظق الصناعية في كل المدن وتبصم بالعشرة أن العامل السوداني هو الأميز لعمله خاصة لو توفرت له الظروف الملائمة إضافة لتقديسه للزمن وقيمة العمل . فيبدأ العمل الساعة السادسة صباحا ثم ساعة واحدة فقط للفطور ثم مواصلة العمل حتى الساعة السادسىة مساء في كل المدن على أمتداد الوطن الحدادي مدادي . وفي نهاية الشهر يقبض العامل ماهيته وكمان فيها حوافز الزمن الاضافي ويرجع لإسرته مبسوط مرفوع الهامه يحترمه الجميع ويعرفه جميع من حوله ... ومن هنا تحية لكل عمال السودان والناس الجباهم عالية .
2- الحقيبة والحب والعذري :
تحدث لنا عم أحمد وبإسهاب عن الحب العذري والأيام الرومانسية – أيام زمان – وكيف أنو كل زول بعرف زولو وكل زول بوصل كلامو بعيونو مباشرة عديل يصل القلب ... والعجب العجيب الشعراء والمرهفين خاصة شعراء الحقيبة فكانت قصائدهم تأتي عفوية وفي اللحظة والتو في مناسبات الأفراح والأعراس فيتنافس ود الرضي ، العبادي ، أبو صلاح ...... إلخ للفوز بقلوب فتيات الحي ... وهاك يابدور القلعة وجوهرها وهاك يا الترام الشاقي الطريق ولي في المسالمة غزال .
بصراحة الكلام عن الحقيبة ده كلام طويـــــــــــــــــــــــــــــل عاوز ليه صفحات وصفحات عشان كده أقترح تخصيص بوست مرفق بنماذج بصوت وعزف عم أحمد على ألة العود التي يتقنها بمهارة مذهله .
4- تعامله مع الأبناء والبنات
من ملاحظاتي وإتساقا بكلام وأفعال عم أحمد أجد أن الحب والرقة تمثل حياة عم أحمد وتأثرت بها كل لحظاته وتجلت بشكل أصيل في تعامله مع الخالة العزيز / سعاد بدوي ... صدقوني الثنائي ديل بتعاملو بحب مبالغة وإحترام يدهش قيس وليلى ذاتهم !!!!! فأنعكس هذا الجو الصحي على تربيتهم وتعاملهم مع أبناءهم وبناتهم ... وللحقيقة عم أحمد زول ديمقراطي من A to Z زول حقاني ونصير للمرأة بشكل يستحق الأعجاب وفوق ذلك يعشق الحرية ويحترم خيارات أولاده وبناته ولا يتدخل فيها لكنه دائما ناصح لهم لا جابر لهم ومشجع لهم لتحمل مسئولية قراراتهم أي قرار يتخذونه مهما كان . وعم أحمد بقول دائما الحرية مسئولة تبدأ بالفرد ويجب أن لا تتعدي حرية الأخرين ... صدقوني عم أحمد مفهومه للحرية مفهوم متقدم شديد شديد جدا وأنا ما بقول الكلام ده عشان صديقة للعائلة لكن شايفاها بتعامله الراقي مع أولاده وبناته وحتى أحفاده وشفافيته النادرة ... الكلام كثير عن العم أحمد وقد لا يسع المجال (بالطريقة دي يامحاسن بكري أبو بكر برفدك) لذا أختم وأقول المالقى زمن يدردش ويتونس مع عم أحمد مؤكد .. مؤكد .. مؤكد .. قد ضاع منه الكثير وجمال لحظة لن تعوض ... فهذا العم الأحمد الموزون بالجمال والموشح بالإبداع والمفرهد بالألحان جدير بالإستماع له ......
ولنا عودة الهام
الاخت و الصديقة الحبيبة الهام شكرا للجمال المشترك والونسة الدقاقــــة شكرا للوفاء و الحب المتبادل بينك وبين والحجاج حاج أحمد وحاجة سعاد يحبونك كثيرا فهم اهلك يا فرده او غايتو حتنافسى فى الجنه وعارفاه ابوى حكى ليك كتير يالا طلعى لينا الباقى المدسوس
د.محمد حسن لانو يا دكتورالزمن بقى اقبش ولانو بنشوف قدامنا الملامح و المواقيت بتتغير والفرح مدة قصيره ولمن نعاين بنلقى الحزن بقى ساكن جوانا مهما نفرح وعشان انا وانته وناس تانى لكن ما كتار لسع صادقين عشان كدة بنفتش لى الجمال فى كل الاماكن وحنواصل نحلم بالفرح ا لآتى عبر دهليز من العتمة وحتى لو فى المنافى عشان بنلقى الحب والوفاء والشفاية تسلم اخى محمد الاخ معتز مقبول سلامك يوصل للجميع والبركة فينا او فيكم جميعا فى فقدنا وربنا ادوم المحبة وانتم خير اخوة واصدقاء وتحياتى لجميع الاسره
10-01-2011, 04:40 PM
محاسن أحمد محمد
محاسن أحمد محمد
تاريخ التسجيل: 10-26-2008
مجموع المشاركات: 1151
واصل الحكاوى ابوى الفنان حسن خليفه العطبراوي عزفت فى الاربعينات مع الفنان حسن خليفه العطبراوي فى زواج الأخ أبراهيم محمد خليل وحضر إلينا الفنان حسن خليفه العطبراوي رحمه الله من عطبره بدعوة من الأخ حسن فرح وحتى الاخ الفنان حسن فرح لم يحضر الزواج بسبب سفره لبورتسودان وكانت الحفلات ليلا ونهارا لمدة 7 أيام .
10-01-2011, 04:46 PM
محاسن أحمد محمد
محاسن أحمد محمد
تاريخ التسجيل: 10-26-2008
مجموع المشاركات: 1151
السلام عليكم جميع أهلي وأحبابي من سكان الختمية جنوب وشمال ، الختمية جنوب جمعت رجالا أوفياء من عمال وموظفين وجنود الحملة الميكانيكية وجنود (التروب) الحامي التابع لعطبره الأشراف وهي الأن مدرسة بحري الثانوية الحكومية
نذكرهم بالخير والعرفان عمنا العزيز وأولاده الكابتن خلف الله عمر والعقيد مقبول الأمين والعقيد مجذوب البحاري والجنود والبلكمين (الكاتب العسكري) صالح فرح والذي تدرج حتى أصبح من كبار الضباط .
أن أبناء عمنا فرح جميعهم وأبناء عمنا محمد خليل جميعهم في حي الختمية جنوب كانت الشرارة الأولى للرياضة والفن الذي تأسس فيه فريق الأمير وفرقة موسيقى شرفت وأطربت وأحييت جميع ليالي الأفراح لجميع الأحياء في مدينة بحري العريقة
وأذكر الفنان عبد الله جاد الله ، الفنان هجو سعد الله ، الفنان الحاج العربي .
10-01-2011, 05:56 PM
رأفت ميلاد
رأفت ميلاد
تاريخ التسجيل: 04-03-2006
مجموع المشاركات: 7655
وكمان أميمة بى جاى .. طبعاً الحلبية اليابانية ما بتعرفنا ..
سعيد والله والصور بنزلا أول بأول .. يا أميمة كان أنتى فى السودان .. تبلغى سلامى للعم أحمد والخالة سعاد .. وياريت مذكرات العم أحمد العبيد دى تطبعوها .. للحفظ والتوثيق
سونا مالك قطعتى التلفونات
10-01-2011, 06:07 PM
عاطف عمر
عاطف عمر
تاريخ التسجيل: 11-26-2004
مجموع المشاركات: 11152
تحياتي وسلامات محاسن نحن هنا لا نزال وسنظل بحول الله نسرح تارة وتسيل الدموع في الخدود فصورة عمي أحمد العبيد ( له طول العمر في رضا الله ) تذكرني بصورة أبي ذلك الحبيب الذي غادرنا فجأة ... بلا وداع وأرى لمة عيد الميلاد الذي فاجأكم به الباشمهندس وأسرح معكم.. تأسرني ضحكاتكم الصافية أسعد لسعادتكم البادية تردد شفتاى دون الجهر بالكلمات أن هابي بيرث دى تو يو سنة حلوة عمي أحمد
وصلني إهدائك في بوست بحري طراوة فرددت أعماقي أن يا لهذه الكريمة تصر على إهدائنا وقد ( توهطنا ) من زمااان وأخذنا راحتنا بالكامل فالدار قد أصبحت دارنا نفتتح بالبوست يومنا ونختمه به
رأفت ميلاد هــــى يا اوفه ابوى الله اديه العافية الجابك مارق يارأفت وبالمناسبة ابوى الايام دى معاى هنا فى امريكا واول ما كلمتو بيك ضحك او قال لى رأفت ميلاد ( اوفه ) اوطوالى دور اتكلم عن ودالشافعى وعن مشرع الجزيرة وأكيد حنزل كلام كتير عن مشرع الجزيرة اوشفته الكتوف اتلاحقت كيف ميمى بقت تكتب معانا زمن واللة اما الحلبية ديل النسوان المستتات ياولدى ما بشتغلوا بينا شغله وبالمناسبة خالتك سعاد بتسأل عليكم وانا اتصلته كم مرة لكن مافى زول برد بالله تحياتى لى فاتن والشباب او ده تلفون البيت ادينا الو 7033416769 عاطف عمر اخى العزيز عاطف والله انته الخليتنى اسرح ودموعى تسيل وصدقنى حزنت على فقدك لى ابوك الف رحمة علية وانا كلما اقعد اتكلم مع ابوى بشعر بالحزن وبالذات لمن اكون مستعجلة واحس انو عاوز اواصل فى الكلام معاى دوامة الاشياء تحرمنا من اجمل اللحظات وانا اهديتكم البوست عشان تتوهطوا اكتر وعشان الدنيا الرايحه دى مافضل لينا فيها غير الحب والاحترام لى بعض وعمك أحمد العببد لا نستطيع ان نمتلكه لوحدنا لانو يستمد جماله من الاخرين مثلكم وعشان كده انا مسمياه ابو الكل وعليك الله خليك هنا صبحنا او مسينا وتحياتى لى اسرتك الكريمة
عبدالكريم أحمد الامين الاخ الحبيب عبدالكريم أحمد الامين الف سلام او صباحك خيرين انا زاتى الايام دى متفرجخة وما تتخيل او قدر ما اوصف ليك كيف الونسة ممتعة مع ابوى ماحتصدق وانا زاتى نفسى ما امشى الشغل حتى ما اضيع ولا دقيقة وانشاء الله تلاقوة وتجمعنا الايام وكلنا نكون بخير ونحلم بى زمن اجمل من الكان زمن ببيعوا فيه اللبن ومعاه الفرصة اوتسلم كتير (ابو محمد فؤاد)
يعني يا سونا حتكوني باليمين وكستاوي بالشمال :) :) :)
محاسن العزيزة ...يا اميمة .......سلام متع الله الوالد بالصحة والعافية وهو بلا شك جراب ذكريات كبير وسوف نظل فاغرى الافواه مندهشين للسرد الممتع والذى مابه من عيب سوى انه مثل مسلسل وانا اكره المسلسلات عشان شحتيف الروح ده ياخى!!!كبى الدرر طوالى مرة واحدة ده ما نوع السرد البقبل قطيع وشحتيف روح ياخى.. عليك الله خلى يدلف لينا على ناس نصر الدين السيد ودكام وحاج الصافى وعثمان الحاج فهولاء من رموز بحرى ففى سيرتهم عبق .. اخيرا عجبتنى سغالة اميمه البتشبه سغالتى دى.. واتذكرت نكتة الراجل قالو صور زوجته فى حديقة الحيوانات جنب الغوريلا وكتب تحت الصورة صورة لزوجتى فى قفص القرود: ملحوظة هامة: زوجتى التى تجلس الى اليسار ههههههههههههههه.... ست البنوت وحاتك بهظر وبضحك من مساخة اميمة وقاصد الغوريلا الجالسة على اليسار المسماة مجازا نصر الدين هجام كوستاوى لانو كان قدامنا فى المدرسة بى اربعة سنوات بس تحياتنا للوالد وسلمى لى علي كوستاوى ده لو بتريدى على راى اللبنانيين،،،
10-03-2011, 03:33 AM
محاسن أحمد محمد
محاسن أحمد محمد
تاريخ التسجيل: 10-26-2008
مجموع المشاركات: 1151
صديق الموج صديق الغالــى تعرف انا لي هسع بضحك من تعليق أميمة والبوست ده كل حتعملو لى كده حبابك حبابك اه عاد النكلمك من هسع عشان تشوف ليك صرفه اوطول روحك معانا حبة تعرف شفته البوست ده اتأخر المدة دى كلها كنته عاوزه اجهز المادة وبعد كده افتح البوست فبقى مستحيل وعشان كدة قررته ابدأ حتى لو بالقطاره اخير من عدمو وانتهزته طلت ابوى لى وزيارتو لى قلتة فرصة ادردش كل يوم معاه شوية اسكت ساكت يا ود الموج عاد الونسة البتجنك ديك جاية ونست الحقيبة والجاى كتير ابوى الله ادية العافية بس انته تابع الاخضر وسلامك يوصل للجميع
الازاعــــة ١٩٤٢ كان بتلموا كل الناس فى قهوة ودالفكى وجورج مشرق فى امدرمان وبالتحدين الفنانين والشعراء وكبار الاعبين حيث كانت تبث الازاعه لمدة ساعة كل يوم من الساعه الحادية عشر الى الساعة الثانية عشر وكانت الاذاعة على الــــهواء وكان الناس بقعدوا فى الواطه يبدأ البرنامج كلآتى - بالقرآن الكريم والمقرئين كانوا - عوض عمر - وشيخ عوض - ومحمود سامى ٢- الاخبار ٣- اغنيه واحده وكان المغنين سرور وكرومه وبعدهم عبدالحميد يوسف ثم حسن عطيه واحمد المسطفى والكاشف ومن الشعراء الكانوا موجدين ايضا دائما فى القهوة ويتبادلون الشعر والونسة الممتعة والهوى فى ذلك الوقت وكان على رأسهم - سيد عبدالعزيز - عتيق - عبيد عبدالرحمن - حميد ابوعشر كان صايغ كبير - عبدالرحمن ابو الروس - غنى عبدالحميد يوسف فى ذلك الوقت اغنية عتيق أذكرينى ياحمامه كلما هطلت غمامة
سرور ذهب السعودية ومنها الى الحبشه وقضى باقى عمرو فى الحبشه لمن مات
عبدالرحمن ابو الروس كان مسرحى واول اعماله المسرحيه خراب سوبا ومن الطرائف انو مثل بت فى المسرحية الى عرضت فى نادى الخريجين لعدم وجود البنات فى الوقت ( الاربعينات ) وكان حاضر المسرحية الشيخ بابكر بدرى وسأل من البت المثلت دى وكانت دهشته لمن كلموه بى انو ده خالد ابو الروس وكان قد اجاد الدور تماما ود السبب الخلى قهوة ود الفكى وقهوة جورج مشرق اكونو زى منتدى وملتقى للمبدعين واهمة الشخصات حتى بعد تحولت لى بيت ايجار الاذاعة
اى يا اميمة قالت لى يا حليلة ربنا يخليهاالبت محاسن دى.. انت شخصيا واصلك ربع كيلو لحمة وكوزين موية نقية وساقطة اها قصرت معاك؟ماتدى معاك ولا زول .. طبع تضحكى ما ضمنتى الزيك منو انت؟؟ غايتو جنس بياخة والله لو ما مقدر ظروف الحاج ولو ما الوزن بتقل عليه ولو ماسغالتك وشحدتك دى ولو ما لو دى زاتا بتفتح عمل الشيطان كان عندى غرد عند محاسن دى بس الله كريم،،،،،
أذكرينى ياحمامه كلما هطلت غمامة هو قال كدهـ.. بس عليك ما خاتيه عليك اميمة لووووووووووووووووووووووووووووول،،،
اذا حضر الماء بطل التيمم استاذنا ود الموج سلامات ياخي محاسن نفحة من نفحات بحري مشيها ليها ياخ
Quote: وليد
ما تشتغل بي كلام محاسن
والله اكتروا ننسلخ ونفتح انا وانت بوست
من التحرير لي البص النهري بي طريق الجيلي
وهاااااااك يا حكاوي
هههههههههه ياخي محاسن مفروض تشكرنا فاتحه بوست مافيهو اي شيء لاقهوة لاشاي لو البوست دا ماحتاجين ليهو كنا حرفناهو زمان عن مساره ووديناهو طريق الجيلي على قولك
Quote: والله يا صديق فوته ميمى فى السغالة كفاية على ميمى او وليد عبد الطيف
اها جبتي لينا الكلام وتستاهلي يا اميمه ياخي عم احمد العبيد حريف في عزف العود وتخلينا نقول في بيتكم لياسر عمرابي انت اعزف لفرفور
الاخ محمد أبوالعزائم أبوالريش انشاءالله تلاقية ابوى تعرف لو اتونسته معاه ادهشك عديل رجل جميل
Quote: ياخي محاسن نفحة من نفحات بحري مشيها ليها ياخ
عاد ياوليد لسانى انقطــع شكرا للدفاع عنى خلاص شلناك من (Black list) ود بيت والله او بحرى نفر اما ود الموج كان كايس لية فرصة فينى اولقاها برضو اخو عزيز ياخى شاى او قهوه شنو يا وليد انا جاى اوجايبة ابو صلعة ( الدولار) اه او قالو طلع فوق يعنى السماسرة حيبارونى من المطار
ود المقبول الاخ العزيز شكرا لتصليح الفيديو تسلم اخى اوتمام كده ده بوست الجميع
- 9-وواصل الحاج الحكاوى ١٩٤٢ــــ ١٩٤١ بحــرى كانت مشهوره بأ العيبه
كانوا بلعبوا كأحياء مثلا الخاتمية مع الدناقله وبعد كده فكروا فى تسمية الفرق و اول فريق تأسس كان فريق الامل وحصل اختلاف حول الاسم وسمى الامير الازم مرسال رحمةالله علية اسس نادى الامير وكانت الميادين والعب فى ميدان عبود اول لعبة اتلعبت بعد تسمية نادى الامير كانت مع فريق عقرب لمن كان الجيش المصرى حاكم فى السودان كانت تسمى الفرق بأسماء الحكام فريق استاك فريق سلاطين فريق كتشنر فريق ونجد فريق استاك اتغير لى فريق التحرير بعد الاستغلال وكانت كل المصالح لها فرق فريق الـــرى المصرى فريق الوابورات فريق المخازن والمهمات كان الرى المصرى من اقوى الفرق لانو كانو بعينو احسن اللعيبة وكان دائما فريق الرى المصرى بشيلو كاس الحاكم الصورة فى فى ميدان استاك وهو الان جامع السيد على حتى بعد تحولت الفرق للهلال والمريخ كانو بياخدو اللعيبه من من فريق الرى المصرى
فريق نادي الامير الرياضي 1948
الصورة فى فى ميدان استاك وهو الان جامع السيد على
10-08-2011, 07:36 PM
اسماء الجنيد
اسماء الجنيد
تاريخ التسجيل: 03-31-2010
مجموع المشاركات: 4731
يا سلااااااااااااااااااااام يا الحبيبة الغالية محاسن ويا سلااااااااااااااااااااااااام على صورة الوالد وونستة الحنينة البترد الروح سلام عليكم يا الحبان ابونا الوالد ود العبيد والحبيبات محاسن الحنينة واميمة صغيرة القوم وكل الضيوف الأكارم والله بوست شدة مو حنين ,, يخلي الزول يتحكر ويكتف الإيدين للإستماع والمتابعة ويا ابونا ود العبيد في حضرة وجودك يطيب الجلوس مهذبين امامك يحلو الكلام ربي يدك الصحة والعافية , يخليك لي وليداتك ويخليهم ليك وتحضر جديد احفادك وتفرح بيه الله يلمني فيكم يا محاسن , نوع ابوك الشيخ ده انا أمانة ما بتقريف لي ونسته ربي يحفزكم جميعا إن شاء الله سلامي الكتير كتير ليه ولي كل المعاك عليك الله ودعتكم الله
عشان تاني يتكلم في السياسة . . يامحاسن كمان كان ماشى بي ابوصلعة خلاص نتقابل في السودان وبقيني ضراعك اليمين عشان اشيل ليك الشنطة لو ماشى اي مكان اميمه ولالالالا نضمة Download: eType1.com/f.php?FJzOOn
Quote: وبعد كده فكروا فى تسمية الفرق و اول فريق تأسس كان فريق الامل وحصل اختلاف حول الاسم وسمى الامير الازم مرسال رحمةالله علية اسس نادى الامير وكانت الميادين والعب فى ميدان عبود اول لعبة اتلعبت بعد تسمية نادى الامير كانت مع فريق عقرب لمن كان الجيش المصرى حاكم فى السودان كانت تسمى الفرق بأسماء الحكام فريق استاك فريق سلاطين فريق كتشنر فريق ونجد فريق استاك اتغير لى فريق التحرير بعد الاستغلال وكانت كل المصالح لها فرق فريق الـــرى المصرى فريق الوابورات فريق المخازن والمهمات
وتغير فريق سلاطين الى الاتحاد البحراوي وولعب له اول كابتن فريق قومي (الجاك عجب ) سؤال الى عمنا العبيد هل يوجد اي فريق من الفرق التي ذكرتها حاليا بمسمى اخر طبعا يا اميميه ومحاسن عم اللازم خدم منطقة بحري كثيرا وقابلناهو كثيرا بنادي الاتحاد البحراوي وكان عندي ليهو صورة في الارشيف ببحث عنها عمنا العبيد ربنا يديهو الصحة والعافية وكل ماندخل بنلاقي اشياء ومعلومة كنا نجهلها ياسلام يامحاسن على هذا بوست
استضافت مدينة برنسس آن الوالد أحمد محمد العبيد والاسرة بدعوة من الاعزاء الاخوان والاهل سمية حسن ومحمد عمرابى وكان فى فى استقبالهم وكعادتهم اهل الكرم والضيافة الاصدقاء الاعزاء مدينة برنسس آن العامرة وهم جميعا رجالا ونساء وشبابا يتمتعون بالعلم والمعرفة وكان حضورا الاستاذ مكــى ابونورة فهو رجل علم بينهم فكتب بعد ان استمعوا الى الوالد فى عزف على الآلة العود وعلى بعض من حكاوية الشيقة فشكرا لهم جميعا على هذة الحفاوة و شكرا لك استاذ مكــى [email protected] وياريت لو فى صورة للجميع ترسلوها لى
Quote:
ضيف ناس محمد احمد فى النت القلوب ترتاح للكمال التام في الكمال نرتاح اصلو زول لكن صورو الفتاح من سلاف الروح محنة للملتاح الجمال شراح للصدورلكن للقلوب جراح قالو اهل الحب في الزمان الراح نشوة الاشواق احلي من الراح فقيـرفقير من لايتواصل مع الناس,وكم هو غنى الفنان الذى يحتفى بدنيتة ويعيش لحظات سعيدة يسترقها من هذا الزمان الرخو.بالطبع أعنيك ياأيها الجميل السهل عمنا أحمد العبيد الذى أخذنا فى معيتة و حلق بنا فى طيف زكرياتة . وجادت علينا لمساتة الساحرة على العود و أطلق صوتة و عودة على الفضاء فصار فضاء أرحب وصرنا نحن و العود و الذكريات عجينة طوع أناملة و أحاسيسة فصارالكل أرحب..كونا وأنسـانـآ
لقد سما بنا العم أحمد صاحب الذاكرة الحاضرة المتقدة حفضة اللة فى دنياوات أخر, وعرج بنا نحن اللاهثـون فى دروب الحياة المادية الفجـة وأخذنا بمعيتة صوب الخالدين. بداية ببحرى مرقد عبقرى الزنجران اسماعيل عبدالمعين ثم أخذنا جانبآ نحو العم حماد كمنديجو صاحب موسيقى القرب فى غياب ابنة كتمبا فى مشاوير الحياة سعى وراء سبل كسب العيش,لم ينس المناضل بطران ذو الأحاسيس المرهفة نحو الوطن ومن يحب,وصور لنا نضالة ضد المستعمر,وكيف كان يقاد للاعتقال مكبلا و مصلوبآ على ظهر الجمل وهو من أهدانا نفاءـس الشعر كدمعة الشوق كبى حكم محبوبى أرعى نجم الليل.ولم يرعاة الوطن ومات عليلا فى سن الـ35 ربيعآ أستمعنا لغناء الحسيس الشفيف بذكريات ود القرشى والشفيع ودرة ودالريح لى فى المسالمة غزال.. وغنى الودود العم أحمد للغزال وللحمام وللسـلام حيـاه الغمام لم ينس حتى صديقة ابرهيم خليل وماحدث لة فى حفلة زواجة عندما ضرب الدلجة بعد أن رأى خديجة محبوبتة.عندها استبدا الفرح بصديقنا المحترم وصاح بقولتة المشهورة. دا الكلام رقَََّدتُو واطة؟ أيـوة فمن الحب مابيـبطح الزول واطة.ماذا قال= الفنان العطبراوى = عندما رأى الحدث يــامحترم.. .. حقيقآ لقد سعدنا بجلسة وديعة لطيفة على الرغم من انها نكأت الجراح علينا تركتنا نفتش عن بقايانا وشظايانا التى تناثرت . وكم أنت عظيم أيها الفنان أحمد العبيد
10-21-2011, 02:30 PM
محاسن أحمد محمد
محاسن أحمد محمد
تاريخ التسجيل: 10-26-2008
مجموع المشاركات: 1151
الاخت سونا.. زمن طويل اخر مره فى بيتكم الفاتح على مدرسةالختميه؛البركه فيكم فى الاخوان...حيدر وعارف . رجعتينا مع عم احمد لزمن بعيد، ذكريات معه لاتنسى.واصلى .. اجمل ما فى الموضوع البنت الفنطوطه كبرت وبقت تكتب كمان..ميمى . التحيه للوالد و الوالده و كل الاخوان.
10-21-2011, 08:22 PM
عبدالله شمس الدين مصطفى
عبدالله شمس الدين مصطفى
تاريخ التسجيل: 09-14-2006
مجموع المشاركات: 3253
ده تنادى جميل, بيشبه السودان, ما قد كان فى سالف العصر والأوان. يعنى حاجة رائعة لما الواحد يلقى ليهو واحة, وإستراحة من الحرب الضروس الدائرة هنا, الحرب التى لا تبقى ولا تذر. ثم أن مثل هذه البوستات تكشف الكثير من الخبايا والعلاقات التى كانت غائبة, أو كانت مستترة بفعل عدم الربط المنطقى, لكن أكثر ما تفعله هو تأجيج العواطف التى خمد لهيبها بفعل التنآئى والبعاد. وكمان بتعمل حاجة تانية, بتكشف ليك المتسللين الجدد الذين بنسربون خلسة, ويجلسون وكأنهم كانوا هنا منذ البداية, أى منذ بداية المباراة,يعنى زى الزول الأول حرفو عوض حامد خليفة بتاع قطر ده مثلاً. ياعوض الحى بيلاقى, وكتر خير بوست محاسن النكت لينا ناس كتار من الضلمة. مبروك تواجدك هنا يا صديق, على ثقة بأن هذا الوجود سيكون إستزادة فعلية للقراء من مكنون إضافاتكم التى عرفنا ونعرف. مرحب بيك, سنتواصل عبر الخاص. ونسمع منك هنا فى تنادى الجمال والحب هذا. مودتى للجميع, ومتابعين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة