دردشة من داخل مكاتب جهاز الامن والمخابرات (يوجد مصدر)
حسن بلطية وشلته
ذات صباح ربيعي جميـل والشمس تُرسل اشعة دفيئة من خلف غلالة غيوم رقيقة ظللت سماء مدينة الخرطوم الآمنة الوديعة لتتخلل الاشعة مسام نسائم الصبح محملة بالدعاش ونفحات أريج الأزاهيـر المنتشرة بين مسارات طرق العاصمة وعلى حواف جدران منازلها المطلية باللون الأبيض .. وبين شقشقة عصافيرها وحرص رجال العسكر في انسحابهم من مراكز حراستهم الليلة للاحياء والاسواق حتي يكمل السكان نومهم في اطمئنان وامن اعتادو عليه والفوا ان لا يخشوا من تسلل اللصوص لمنازلهم الهادئة ومتاجرهم العامرة ( وما اقل اللصوص من فئة وما اندرهم بالعاصمة فهم قلة تُعد على اصابع اليد الواحدة بعد ان اصبح الجميـع سواسية في قسمة الثروة التي فاضت حتي اصبح منادي ديوان الزكاة يصيح بالطرقات عله يجد محتاجاً واحداً او شخصاً صغير الهمة غير عفيف الضمير والقلب فيقبل ان ياخذ شيئاً يسيراً من المال ولكن هيهات ان يجد المنادي ذلك الشخص ) .. قلنا ورغم ذلك يحرص رجال العسكر على مراعاة امن واطمئنان السكان فليس لهم ما يفعلونه ولا يوجد لديهم واجب آخر غير ان يكونوا عيناص ساهرة لراحة المواطن الذي يعيش في رفاهية بفضل حكومة الانقاذ الرشيدة امدها الله بالمزيد من غرور الدنيا التي عمرها القائمون على امرها لأنفسهم.. في هذا الج و الربيعي الحالم البديع دخل حسن بلطية العقيد بجهاز الامن والمخابرات الوطني لمباني الجهاز بعد ان اشار للحارس على البوابة الخارجية وسط تثاؤبه ان لا داعي للتكلف بالتحية العسكرية فكلنا ابناء تسعة او كما قال له ، فإستراح الحارس وعدل من كابه بيغطي عينيه..
قطع حسن بلطية بخطوات كسولة الممر الفاصل بين البوابة ومداخل مكاتب الضباط ومكتب الاستفسارات وإستراحات المُستضافين من المواطنيين الذين ياتون بين فترة وأخرى بملء إرادتهم وبطوعهم وإختيارهم لمراجعة بعض البيانات الخاصة بهم او تحديثها تلك البيانات التي يحرصون ان يُزودوا بها قاعدة بيانات الجهاز .. او ان يأتي بعضهم ايضاً للتشفع وكفالة احد الاجانب الذين إمتلأ بهم السودان مؤخراً وقد يُشكك بعض افراد الجهاز في عمل هؤلاء الاجانب فيستدعيهم للجهاز للتحقق منهم وانهم ليسو عملاء اجهزة مخابرات دول اخري حريصة على زعزعة وامن واستقرار بلاد السودان الآمنة المطمئنة حسداً وغيرةً من روؤسائها وملوكها الذين عجزوا عن توفير الرفاهيـة والاستقرار والامن وتلبية متطلباتهم وصون حرياتهم وكرامتهم بنفس القدر الذي وفرته حكومة السودان لشعبها الوديع فأنصب جهد هؤلاء الروؤساء والملوك والامراء على زعزعة استقرار دولة الامن والرفاهية والحرية والكرامة الدولة السودانية الفتية في جمهوريتها الخامسة عشر.. وبعض هؤلاء الأجانب مظلوم ولكن حرص الجهاز على صون الارض والعرض يجعله يُمعن في التدقيق على جميع الاجانب دون فرز حتي ولو كان احدهم مستثمراً او شريكاً لوزير او متنفذ في الحكومة الرشيدة .. فبدولة السودان الناجحة لا احد فوق القانون ، ومن هنا يحضر بعض المواطنون لكفالة من يثقون في براءته من تهم العمالة فالمواطن ايضاً له دور الىن وهو عيناص حريصة على امن الوطن .. اما لغير تلك الأسباب التي ذكرناها سابقاً فيستحيل ان يحضر مواطن لمباني اي من فروع الجهاز المنتشرة في رقاع الوطن لامنه واستقراره ، وكذلك يستحيل ان يستدعي الجهاز احدهم او يُرسل اليه ورقة بالرجاء بمكتب الجهاز موضحاً بها سبب الاستدعاء او مبرره ووقت الحضور الذي يُقترح ان يحضر فيه المواطن المعزز المكرم ومدته .. لا لا يمكن فهذه اساليب غيــر قانونية وغيـر انسانية عفا عنها الزمن واندثرت مع اندثار آخر حكومة ديمقراطية مستبدة منتخبة بواسطة الشعب والدولة الآن دولة قانون ومؤسسات دولة مواطنة وحقوق.. لهذه الاسباب كان حسن بلطية يُحرك رجليه بتكاسل على الممر المرصوف بقرميد احمر نظيف وقد حفت جوانبه الأشجار التي وضعت بينها بعناية أحواض بديعة غُرست بها ازاهيـر وورد زاهية يانعة وقد تحلقت فوقها الفراشات الملونة وهي تحرك اجنحتها في بلطف يشبه همسات العاشقين وسكنت فروع الاشجار العصافير المغردة من كل لون وجنس وهي تُرسل نغماتها المموسقة في مشهد يُكمل اللوحة البديعة التي رسِمت بمدخل مباني الجهاز وقد احاطت بحسن بلطية فزادت من استرخائه وتكاسله ..
بعد ان حيا حسن بلطية زملاءه بالمكتب الملازم أول عبد الله كتاكت والملازم ناجي شمطة والرقيب اول طه البروة .. سألهم بإسترخاء – هل من جديد ؟! فكان صمت الثلاثة وتثاؤبهم يدل على الإجابة وان لا جديد بالساحة والامن مستتب كالعادة والوضع مستقر والمواطن يرفل في حليـة زاهية من الرفاهية والسعادة وراحة البال . ثم تساءلوا عن المبرر لعملهم الىن في ظل هذه الاوضاع ولماذا تصرف عليهم الدولة وما المبرر بل احتجو انه يجب تحويل الميزانيــة لما هو افيد لخير الوطن والمواطن ... احتج ناجي شمطة : يا جماعة ميزانيــة شنو كمان التستفيد منها الدولة المترعة بالقروش دي وفائض ميزانيتها السنة الفاتت كان اكبر من الناتج القومي لاسبانيا والمانيا مع بعضهم.. خليكم واقعيين يا اخوانا الميزانية الموضوعة لينا حيلك يادوب ما محصلة (ربع من مية في المية ) من المقررة للخدمات الاساسية للمواطن من ماء وكهرباء نحن يا طه البروة يادوبك السنة الفاتت بس حصلنا على 0.023% والباقي كلو مكبوب في الصحة والتعليم .. هسع عليك الله يا عبد الله كتاكت راتبك مكفيك لحم وفواكه ؟؟!
يجيبه كتاكت : النصيحة لي الله يا ناجي شمطة وربنا بيسألنا ..الاكل ارخص حاجة بقت في البلد دي وهسع الناس بتضرب اربعة وجبات وبتحلي وتشرب عصائر مع رخصة السكر دي ومافي فرق بينها غني وفقير في شرب العصير والحاجة الباردة .. والحملات هسع مدورة قرش ونص لحث المواطن مراعاة السعرات الحرارية بوجباته وممارسة الرياضة والتقليل من ركوب السيارات او على الاقل مع توفر الميادين والساحات الرياضة والمنتزهات العامة يمشي اقلاها الفين متر باليوم بس عشان يحارب السمنة وتنخفض الامراض المرتبطة بيها هي وكترة الاكل .. وياناجي بالله بطل شمطة البلد مافيها زول مفلس او غالباهو العيشة وتعليم اولادو او معالجتهم.. الخير جنس ما مبسط بقى الواحد فينا محل يتبرع او يتصدق بي قروشوا حسنة واجر ما لاقي.. غايتو بعد دا الا نرسلها امريكا القالوا ميزانيتهم دقت الدلجة وميزانية نادي الهلال اكبر من دخلهم القومي بتلاتة اضعاف.. دافع يا ناجي عن الجهاز زي ما عاوز لكن ارجوك ارجوك ارجوك مافي داعي تشوه حكومتنا الرشيدة دي الارتضاها المواطن بقناعة وبكامل وعيه واهليته ويستحيل يبدلها بدميقراطية وانتخابات حرة نزيهة وكلام فارغ ..
هنا تدخل طه البروة قائلاً.. والله يا اخوانا بالجد كلامك ونقاشكم المتكرر دا نتيجة فراغ وعدم شغلة منكم وهسع لو في موضوع أكان لقيتو حاجة تانية تقولوها بدل لواكة الكلام دي .. هنا انبرى حسن بلطية قائلاً – صدقت يا طه يآخ انا عندي فكرة خطيرة ممكن ننشغل بيها ونشغل بيها المواطن المرتاح دا زاااتو بدل مقضي وقته كله بين المسارح وصالات الفنون وهمه كله السباحة وركوب الخيل وجمع الطوابع.. فصاحو كلهم بصوت واحد – الحقنا بيها يا بلطية سريع !! اجابهم حسن بلطية الفكرة هينة وبسيطة تب .. بس اهم شئ يكون عندكم زول او معرفة او طيارة بموقع سودانيز اونلاين وبعد كدة الشغلة بتمشي معانا باسطة ..
بسط حسن بلطية فكرته : رايكم شنو يا جماعة نطلع إشاعة انه الحكومة دي انتكست واصبحت ديكتاتورية تديرها عصابة من حزب واحد والرئيس متغول على السلطات وانه حكمه حكم هبيــل لا يُراعي فيه مصلحة وطن ولا مواطن وحايضيع البلد بالطريقة دي .. ونطلع اشاعة كمان انه العملة انهارت والاقتصاد اتدهور والمعيشة بقت بالجلالة في ظل حكم غير مبدئي ولا يراعي للكفاءات والتعيين فيهو بيتم بمقدار كبر الكرش وغراق الذمة ونوم الضمير!!
وبعدين مالو يآخ ما نطلع اشاعة كمان انه البلد مديونة لخمستاشر جيل من اجيالها لقدام وبقت فيها طبقتين بس فوق وتحت واندثرت حاجة اسمها طبقة وسطى .. والطبقة الفوق دي ياها بس بطانة الرئيس واهله واصحابه وحاشيتهم ..؟؟!
هنا قال عبد الله كتاكت : يا جنابو حسن يازول الناس ديل مرتاحين ومرطبين وضاربين السجائق والفطاير ومابيصدقوك مع النعمة الوارة في ايديهم دي .. يآخ ديل اقل زول زول فيهم شايل ليهو 200 مليون جنيه في بيته ومعاها 30 الف دولار غير كمين الاف ليرة ويورو وجنيه استرليني واللذي منه لزوم المصايف ورحلات الصيد برة البلد وعاوزهم يصدقوك انه الوضع سئ والبلد ماشية لوراء وحريتهم مكبوتة وصوتهم مخنوق وهم اخر هجيج وجبجبة في الحفلات الرابة للصباح مع الجكس الملونات ؟! عاوزهم يصدقوك وجرايدهم تكتب العاوزاهو في نقد الحكومة والمسئولين والتلفزيونات اخبارها وتحقيقاتها تطاقش .. تدخل طه البروة قائلاً : وماتنسي يا جنابو حسن تقارير المراجع العام دا غير شفافيتو كمان واقف للموؤسسات والوزارات الحكومية في حلقها ومنشف ريقهم واي تجاوز او عدم التزام بالقوانين المنظمة لاوجه الصرف تلقي الوزير لابس الدمورية ويقدل في سجن كوبر ودا بعد يبشعوا بيهو في وسائل الاعلام والتلفزيون القومي ومجلس النواب باعتبارو خائن للامانة وثقة الشعب.. صاح ناجي شمطة بصورة تحاكي ارشميدس عندما قال وجدتها وجدتها ياجماعة انتو نسيتو فكرة جنابو حسن بلطية بتقوم على شنو ؟؟! شكلكم نسيتو عطالة سودانيز اونلاين .. قال كتاكت وديل فائدتهم شنو كمان ديل الضاربين الضللة ؟! قال حسن بلطية بتروي .. فائدتهم كبيرة خلاص لو تدرون اقول ليكم شئ شفتو كم خبر كدة للعطالة ديل انه الجهاز قتل ليهو استاذ جامعي وقتل ليهو كمان طالب ورماهو في الشارع زي الفطيسة واغتصب ليهو بنت واعدم ليهو شاعر وعيييييك عاااك القصة تدور.. والناس حاتصدقهم ويجو يلومو الحكومة البريئة دي ونحن نلقي موضوع .. واتم ناجي شمطة بقية الكلام : وكمان لو نتم الحكاية شوية توم وشمارات انه الجهازرمي ليهو طيارة في كادوقلي وحرق ليهو مخزن ذخيرة وعوم العملة وضباطو كانو ماسكين الدلاليك ويغنو للرئيس وهو بيرقص ويجبجب وسط البنيات شغلتنا بتظبط تب وبكرة بنلقي العالم كلو بينضم عن سوء الوضع الحاصل بالسودان ويلوكو سيرتو بالافك والبهاتن المبين ويصدقوا الاشاعة دي .. واصل حسن بلطية : انتو كدي اعملوها اعملوها وزوروا كمان مذكرة بالكضب من محكمة الجنايات بطلب الريس المفدي انه مطلوب في شان كديسة سجيمان الاختفت ديك ان مالقيتو سمعتنا شاهت رغم انه السودان جنة الله في الارض ورغم الامن والامان حاتلقوا انه طلعت فيهو دعايات بانه بلد غلاء وحروب وحكام ومسئولين فاسدين ومرتشيين وحرامية ولاد ستين هِرمة .. والتعليم في اسفل السافلين والطالب الجامعي كلامو في تلتة ويسقط في الاملاء لو مليتو قصة حسن الشاطر والطير .. والصحة انهارت والبلد اتملت سرطانات وسكري وداء الكبد الوبائي على قفا من يشيل بسبب الاجانب الفاتحين مطاعم في اي ناصية من نواصي البلد دون فحص طبي ولا اشراف من وزارة الصحة .. والدواء بقي قدر ظروفك وخرفان الضحية تنباع بالاقساط زيها وزي عفش العرس.. انتو بس اتوكلو على الله وطلعوها وخلو ناسكم بسودانيز اونلاين يختفوها او مرروها للطرورات ان ما صدقها المواطن قبل الاجنبي تشوفو ..!!!
ــــــــــــــــــــــــ الآن يضحك حسن بلطية وعبد الله كتاكت وناجي شمطة وطه البروة في سوء سمعة البلد رغم انه الخير وافر والرزق باسط والبلد حرياتها تطاقش والشفافية على قفا من يشيل لدرجة انه المراجع العام السنة الفاتت وبعد تقريره حول ليك واحد وسبعين دستوري في يوم واحد – وطبعا عدد واحد وسبعين بسيط جداً مقارنة مع الالف وميتين وزير ومستشار الماسكين بالبلد ديل – ودي نسبة بتبين انه الفساد قليل جداً مقارنة بالسويد وسويسرا الي حاربناها وحاربنا نخت قروشنا في بنوكها بسبب رشاويهم
ناس حسن بلطية شوهو سمعة البلد وطلعو الاشاعات والدعايات عنها لذا نرجو صادقين منهم يبطلوا دعايات وتسريب اشاعات انه السودان تالت دولة عالمية من حيث الفساد وانعدام الشفافية فبلدنا بحمد الله منتهي الشفافية والخير ..
** قبال انسي المصدر للدردشة دي هاكم المصدر بتاعها عشان مافي زول يسألني : المــــــــــــــصدر !!!
....
11-29-2011, 07:45 AM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
داخل غـرفة انيقة فُرشت بعناية فائقة لتوفيـر المزيد من الناحية النفسية للمُستضافين داخل جهاز الامن والمخابرات السوداني تمطي سامي البرجوب على فراشه الوثيـر بعد ان اصابه الملل من مشاهدة القنوات الفضائة على تلفازه الـHD وشعر كذلك بعدم رغبته في اللعب بجهاز البلي استيشن فأمسك بكتاب من اخر اصدارت روايات عبير وقلب صفاحاته.. في هذه اللحظات طرق احد الحراس الباب بلطف وهو يسال سامي البرجوب ان كان يُريد ان افطاره بالغرفة ام يحبذ ان يتناوله بالمقصف !! تقلب البرجوب بملل ظاهر وقال للحارس انه لا يريد افطاراً وسيكتفي فقط بكوب من الحليب مع قطعتين من الدونات وثمرة مانجو .. وطلب منه عدم ازعاجه مرة اخري بعد ذاك لانه يفكر في مواصلة النوم احتجاجاً على عدم تزويده بقنوات الشوتايم...،، كانت استضافة البرجوب بغرفة بمباني جهاز الامن والمخابرات تُعد مخالفة سيدفع ثمنها بلا شك كل من حسن بلطية ورفاقه عبد الله كتاكت وناجي شمطة وطه البروة بعد ان رفض عرضاً منهم بالكتابة لصحيفته الناطقة باسم الجهاز وترويج اشاعته السالفة الذكر بان هناك سوء اوضاع بالسودان وتدهور في قيم الحرية والانسانية والقسمة العادلة للثروة بين المواطنين .. تلك الدعاية الرخيصة التي يحاول ان يروج لها حسن بلطية وشلته فقط من اجل ان يجدو موضوعاص يتسلو به لكن يقظة وحرص سامي البرجوب ووطنيته وغيرته على الوطن ومكتسابتهوقفت سداً منيعاً امام اغراءات الشلة الفاسدة لترويج اشاعات مثل تلك رغم انهم حاولوا اغراءه بجعله كاتباً صحفياً بصحيفتهم او ترويج انه شاعر همام بل وصل ترغيبهم له لدرجة انهم اغروه بان يكلمو المهندس صاحب موقع سودانيز اونلاين باعطائه باسوورد للكتابة بالموقع المقروء ويصبح من اعضائه، لكنه ورغم ذلك ورغم بريق ان يصبح من كتاب سودانيز اونلاين لكنه رفض بشدة ان يشاركهم في اشاعتهم المغرضة وفضل عليها الاستضافة بغرف الجهاز وقضاء الوقت في مشاهدة القنوات التلفزيونية ولعب البلي استيشن ومراقبة النجوم من على سطح غرفته بواسطة التلسكوب الذي تحرص ادارة الجهاز على تزويد اسطح غرف المُستضافين به حتي لا يشعروا بالملل..
جاء الحارس وهو يدفع عربة صغيرة رصت فيها بعناية كوباً من حليب دافئ وصحن به قطع من الدونات وصحن اخر به ثمار من المانجو وقطع من التفاح وموزتين وثلاثة برتقالات وسكين فواكه صغيرة للتقشير وكوباص من الماء مع باقة صغيرة من الزهور العطرة مقطوفة من حديقة مباني الجهاز لتنشر اريجاً عطرا داخل غرفة سامي البرجوب .. الذي كان قد قام بتغيير بيجامتهالوردية في تلك الحظات ببجامة اخري بيضاء نظيفة حيكت اطرافها بخيوط صفراء وزرقاء زاهية وقد طُبعت بقلوب كثيرة يخترقها سهم كيوبيد فيما كان صوت المسجل بالغرفة يبث اغنية لفنان كبر الحلاقيم والاوداج وهو يقول.. وعزة نفسي مابية على اسلم قلبي ليك تاني سنين الهجر بيناتنا وحاجات تانيـة حامياني ..
ـــــــــــــــ ومع ذلك ما زال سامي البرجوب ثابتا على موقفه الوطني ويرفض اي اغراء بتشويه نظام الحكم الوطني بالسودان .. نرجو من حسن بلطية وشلته اطلاق سراح النزيه سامي البرجوب وعدم استضافته اكثر من ذلك فالأخ نزيه وغيور ومتربي ونعم التربية يا البرجوب ..!!
المصدر عشان مافي زول يقول اين المصدر :
Quote: وكان الرئيس( أمد الله في أيامه) من نزلاء بيت الأشباح وكان فارساً بشهادة الجميع (راجع مذكرات الصادق شامي وأعداد الميدان السرية لكل عام 90) ويعرف بحكم تلك الفروسية – محل الإجماع- من بكي ومن (تجرس) وظل سيادته صامتاً طوال عقدين حفاظاً على (عورة المعارضة) وأسرارها. ويعرف (الرئيس الشفت) أيضاً ما يشعل شيب الشيوخ في شعر الأطفال الغض وظل ساكتاً وصامتاً رغم أنه بشوش وضحوك.
يعاني الوادحليــم الأمرد أو (ليمو) كما تحب مامتو ان تطلق عليه من التأتأة منذ ولادته ، ورغم محاولات والده ضل البيت ود حسيب الرسول انه يُلحق ليمو منذ الصغر بأفضل الحضانات والروضات المعروفة منذ الولادة لكن لم يساعد ذلك في تخلص ليمو من التاتاة .. فعمد والده ضل البيت إلحاقه منذ ان وعى بمختلف المدارس والمناهج ليفك عقدة لسانه حتى انه اضطر اضطراراً في الأخير لإلحاقه بمدارس الاخوة من شمال الوادي المشهورين بفصاحتهم ووقاحتهم وطول لسانهم عسى ولعل يسرق شئ من طول لسانهم يزيد به لسانه الناقص بفعل العقدة في منتصفه. فخاب سعيه ولم يستفيد ليم من سنوات العلام وفق المنهج الاجنبي فارسله مرة اخري لمدن الضباب عله هذه المرة ياتي بفائدة تعينه في ادارة شئون جنينته ومزارعه الشاسعة بمافيها من اجراء وعمال ومكتريين او على الأقل يكون له عوناً في المسائل الحسابية والطرح والجمع والقسمة للغلة المحصلة بفضل عمل الاجراء ( بجنينتهم) فلم يخيب الواد ليمو توصيات ابيه وتخصص في ( البيزنس وادارة الاعمال ) وتخرج تاجر موقف وغلة مثله ومثل بابا.. لكنه للأسف لم يستطيع التخلص من التاتاة فتخرج واعطته الجامعة رِفقة شهادة التخرج جهاز ( آيباد ) حديث عله يساعد في مدارة العلة ...
كان حسن بلطية وشلته يراقبون القادم عبر صالة كبار الزوار بالخرطوم بتلهف وهم يتوقعون ان يشاهدو على الاقل شخصية لها هيبة ابناء عائلة ود حسيب الرسول المشهورة وكل ما قدم احدهم تشع من حوله هالة من الهيبة حسبوها قبس من ضوء العترة الشريفة فتدافعو عليه ليجدوهو غير ما ظنو حتي وقف امامه راكب اخرق امرد حليق صويفات ما نبت على شفتيه الناعمتين من شعيرات يرتدي جبة وقفطان ويتأتي في الكلام مع موظف الصالة وهو يقول له - لو ثمحت يا باشا انننا بظن انه في زول منتظرني في مطار امدرمان الوطني دا اسمو حثن بلطية.. فترد عليه موظفة بنظرة كلها حنية واشفاق: لا يا بابا دا ما مطار امدرمان الوطني دا اسمو مطار الخرطوم الدولي ، حلااااتك يا بابا انتا جايي من وين يا عسل؟! آآآآآآآآآ أأ في الحقيقة آآآآآ أ انا قادمٌ من مدينةٍ بريطانية من دولة انجلترا تُدعي لندناً فترد عليه الموظفة وقد اخذها شعور غاامر بالحنان والشفقة عليه : استريح يا ولدي خش لا جوة ما يضربك هواء والا لفحة برد تقوم تجيك نزلة والا شئ وانتا ما قدر مص القرض وشراب العرديب.. قلت لي الزول الراجيك هو منو يا بابا ؟؟! آآآآآآآ أأ لقد قلتُ لكِ يُدعى بحسن بلطية وهو ظابطٌ ومسئول رفيع آآآآآآ أ بالجهاز الوطني للأمن والمخابرات آآآي بعرفو حسن بلطية يا ضناي ودا الشقي دا انتا عاوزو مالك وداير بيهو شنو يا ولدي؟؟
آآآآآآآآآ أأأ ه ه ه اصلاً في الحقيقة انا قد ارسلني ابي اليهم من هناك حتي اقوم بخدمتهم وخدمة ابناء مزرعتنا الافاضل من الاجراء والمكريين
كررر على يا يمة والله ابوك دا اصلو ما عاقل وانتا عاوز تساعد في شنو يا ولدي دحين؟؟ كدي تعال جاي يا ضناني ما يقوم الشنطة الشايلاها البت دي تجرحك والا تسبب ليك عاهة ... لا لا يا جنا ما تتنتكي على الكاونتر دا الليلة الفراشة ما نضفتو يكون فيهو غبار والا مصيبة تجيب ليك اشكدى والا عِرق نساء اااااي ظريف خليك واقف كدي .... أها يا ضناي قلت عاوز تُساعد في ماذا؟ يتلعثم وتصيب التأتاة الواد ليمو فيفتح الهاند باك المكتوب عليها رحلة سعيدة ويخرج شاشة الآباد وهو يقول: في الحقيقةُ قد اساعدهم ناس حسن بلطية وشلته على اطفاء الحريق الهائل الذي يُعتري وطننا الحبيب في مناطقٍ كثيرة اصابها الأذي .. زي شنو يا ود بابا ؟ مثلا لديكي اااا مناطق شمال كردفان وجنوب الحر الابيض وجوة مزرعتنا زاااتو ؟
في تلك اللحظات يضحك ناجي شمطة وهو يقول : حررررررم ود ماما دا ياهو زولنا تب ..والله دا كورة شراب بس يا بلطية وبنشغل بيهو الناس ديل زاتم العطالة المتسكعين ويقول عبد الله كتاكت : آآي صحي والله هو زاااتو ظاهر عليهو فاقد حنان رغم من انه خريج دار الحنان
هاو هاو هوووو شق النبيــح سكون الحي الهادئ فانكمش حسن بلطيـة الي الجدار وهو يرتجف وقد سابت ركبتاه واصطكت اسنانه من شدة الفزع ، فقد كان حسن بلطية رغم ضخامته وهيبته يعاني م فوبيـا الكــلاب خاصة الضالة العاطلة منها والتي تفاجئ رواد الشوارع في زقاق او ملف لا يحتسبونه فيتجمد الدم في عروقهم وهي تُكشر عن انيابها وتؤمي لقاطع الطريق ان تقدم اذا كنت راجل.. ولم يتقدم حسن بلطية خطوة واحدة او يتحرك من الجدار الذي اتكأ عليه واتخذه ملاذاً من ذلك الكـلـب الشرس وقد حمل بكل يدٍ من يداه حجراً كبيراً وملأ جيوبه كذلك بما توف له من حصحاص وقد انسته الخلعة والمفجأة الاستعانة بمسدسه الميري لدرء خطر الكـلب او ربما رقة قلبه وليونة مشاعره جعلته يتروى في استخدامه حتي لا يُزعج سكان الحي اللطفاء .. من يعلم فكل شئ وارد..
كان حسن بلطية في طريقه لحضور حوليـة مهيبة اقامه ود حسيب الرسول احتفالاً وابتهاجاً بمقدم ابنه حليم( ليمو) بعد اختياره وتشريف المنصب به وتشريف كل اهل السودان قاطبة بتعيينه حلالاً لمشاكله المستعصية وكان حسن بلطية احد ضيوف الشرف المدعويين على صحن فتة كارب بالحولية باعتباره احد اصحاب الفكرة القاضية بتشريف المنصب الدستوري بالواد (ليمو) لكن للأسف نبيــح هذا الكــلـب الاجرب العاطل الضال قد افسد عليه لذة الاحتفال والتشرف هو ايضاً بمطالعة ود حسيب الرسول ووجه ليمو الحليق ..
بإحتراس شديد اسقط حسن بلطية حجراً من يده وان لم يدعه يفارق نظره تحسباً لهجمة من الكــلـب ثم اخرج موبايله الآيفون اس 4 ثم اتصل على زميله ناجي شمطة واخبره هامساً بالموقف العصيب الذي يعانيه خاصة وان نباح هذا الكـلـب العاطل قد ايقظ حاسة بعض الهوامل العواطل من الكـلاب الأخري التي بدات في حصاره ، وهو مزنوق في ركن الآن ويطلب مساعدته ومساعدة من توفر من الشلة معه.. سرعان ما شق هدوء الحي بوكس دبل كبينة بقيادة طه البروة وقد جلس بصندوقه ناجي شمطةوعبد الله كتاكت ووضِع بينهم قفصاً حديدياً لم تمر دقائق معدودة إلا وكان الكــلـب العاطل الضال بداخله بما توفـر لناجي شمطة من خبرة مقدرة في القبض على الكـلاب الضالة اكتسبها من عمله السابق قوة حماية البيئة من خطر الكــلاب العاطلة بينما فرت مجموعة الــكــلاب الاخري التي كانت تثحاصر حسن بلطية وهي تموء بمواء جريح يُبشر بانها لن تسكت على ما حصل.. اما بلطية فقد جلس بجوار طه البروة وهو يمسح العرق من على جبهته ويفرغ جيوبه من الحجارة والحصاص عبر نافذة العربة وهو يقول.. يىخ والله لولا حنية قلبي ورقة مشاعري كنت لجنت ليكم الكـلـب دا زي ما حصلت اي حاجة لكن اعمل شنو يآخ في الطيبة دي..؟! اجابه طه البروة مجاملاً : احسن حاجة كدي خلينا نودي الـ######## الضال دا التحقيق ونستنطقه ونعرفو من عطالة وين اول حاجة لانه اكيد لبدتو ليك دي وقعدتو في الشارع المودي لبيت مولانا في طريقك ما ساكت لازم لاقط ليهو معلومة كدة والا كدة.. يجيبه بلطية: صدقت والله كلمتو بشير الترترة يجي سريع ؟! ايوة وهسع بيكون جوة المكاتب عشان نبدا استنضاق الكــلـب دا مالو قطع ليك الطريق وعرفك كيف ماشي تشارك في حوليـة مولانا موفد من عندنا..
إستغرب بشير الترترة في سرعة القبض على الـك,لب الضال وسأل ناجي شمطة دا فرنيب شنو القبضتو بيهو الشئ دا بالسرعة دي؟؟ ضحك ناجي الشمطة وهو يقول : عييييك انت من زمن الفرنيب يا زول الوضع اتطور هسع وبقت الحكاية حتة عضم وبخاخ بس وللللبب يجوك في الكيس .. اسرعت شلة حسن بلطية بوضع الــكـلب داخل غرفة التحقيق بينما استأذنهم حسن بلطية بضرورة اسراعه للحاق وليمة مولانا بعد ان ان اخذ دش باستراحات المستضافين النظيفة وغير ملابسه التي اتسخت بفعل العرق والغبار خلال زنقته بالزقاق.. فوعده طه البروة بانهم سيرسلون له محضر الاستنطاق اول باول بواسطة الايميل .. دخل بشير الترترة على الــكــلب وهو مربوط بطاولة بالغرفة وقد بقت باقي الشلة بالخارج تراقب مجريات الامور من خلال شاشات اللآيـباد التي وضع زودت ببرنامج حديث من قبل الترترة يُترجم لهم اللغة الكـلـبـية التي يُخاطب بها بشير موقوفهم على رهن التحقيق .. كان بشير الترترة يحمل بيده عصا غليظة وبيمنه قطعة لحم طازجة ويلوح بهم الاثنان بوجه السجين الذي كانت تتنازع مشاعره عندها غريزة الخوف الممزوجة بالامل ،، الخوف من عصا الترترة والامل بعضة من اللحمة السمينة الطازة.. اومي الترترة للـكــ,لب الضال وهمهم بشئ فأشاح الضال بوجهه بانفة كانه لم يسمعه او لايقبل مخاطبته فزمجر بشير الترترة ككــلـب يُطارد صبرة في زقاق ضيق وهو يُلوح بعصاه فأقعي المحبوس الضال على مؤخرته وقد انكمش ثم اصبح ينبح بصوت خفيض والترترة يواصل بزمجرته والتلويح بالعصا ثم فجاة وضعها خلف ظهره بينما امسك بيمنه قطعة اللحم التي قربها لمنتصف المسافة بينه وبين الـكــــ,ــلب الضال وهو يبتسم له مشجعاً بينما واصل السجين الذي انكسر الان واصبح ضعيفاً امام اغراء قطعة اللحم في نبيحه المنخفض وهو يهز ذيله بتشجيع من بشير الترترة... وعلى شاشات الايـباد كانت الشلة تقرأ ترجمة الحوار الذي يدور داخل غرفة الاستنضاق.. والـكــ,لب الضال يقول للمحقق الترترة : شنو العِصي وحركات الكورنجية بتاعتكم دي يآخ؟! ما الناس كلهم واقعين تبلعوا فيهم اللحم والاطايب والطيبات بس الدور وقت يجي على انا ترفع لي العصاية يعني ؟! يتبسم الترترة ويخاطبه : يازول هوي شوف ما تعمل لي فيها راسك كبير وحركات انت قائل اللحمة دي بنديك ليها بالساهل كدة .. نحن برانا مزنوقين في اللحمة ومحتاجين ليها فبطل لولوة لحمة ما بديك هسع الا تجاوبني
- شنو يا ترترة بالله خلى شغل المكاواة دا واجدع حتة عشان اعرفك صادق وجادي في كلامك واجاوبك لكن اجاوبك كدة بلا اضوق اللحمة دي ما بيجي وبعدين ما تنسي يىخ انا وراي كوم لحم وكــلـاب شوارع تانية راجياني يقولوا على شنو يعني هسع فرر بس رفعوا لي العصاية في وشي وشميت ريحة اللحمة طوالي انكسرت وفتيتو ؟؟!
يجيبه بشير الترترة : يا كـلبـو يازول ما تخاف عليك الايمان ودا كلام مضمون ومجرب واسألنا نحن ديل فِرد كـلـب من الشايفهم حايمين ديل مافيهو واحد بيهوهو تاني ديل كلهم راجيين ليهم عضام ساي بس انت عشان موقعك الاستراتيجي في الشوارع وعشان جلدك التخين المليان قُراد دا بينفعنا قلنا نديك حتيتة من اللحمة ..
تبسم السجيـن الضال بما يشبه الضحك وقال له: هو هو هو يازول العبها على غيري قال لغيرك العضام قال.. ما تراهو دااك في كـلـب حايم في ضل القبة ولا معاهو ولا واحد من ضللة الشوارع جاكم براهو بعد فضي لناس حسن بلطية الطريق للمسجد اديتوهو فخدة كاملة وحتة سمينة كمان بلا ينضم كتير اشمعنا انا انتا قايل نفسك حا تدقسني يا عمك ؟ لا العب بعيد يا زول انا تفتيحة وبقرا الملعب كويس واتخصصت علم نفس وسلوك واتخصصت بزنس وادارة صفقات وبفهمها طايرة
زمجر ناجي شمطة من الخارج وارسل رسالة لبشير الترترة يترجمها للــكــ,لـب مفادها: قصدك شنو يا ضال يا عاطل يا تربية الشوارع عاوز كمان تفاصل وتفاضل ؟.. اللحمة حقتنا وبندي منها اليعجبنا والعجبو عجبو والماعجبو يحلق شنو وماعندك لينا الا العصاية.. غنت قايل اللحمة دي جبناها بالساهل كدة .؟ نسرق في الغنم وفي البقر ونزرع في البرسيم ونكاوت الفيتريتة وانت تشخر والا تهوهو برة برة هسع عاوز ليك معانا عضة كمان ؟! كدي تعال اقلعها من يدي لو بتقدر.. فصاحة كـلـاب كمان..
انكمش السجيـن الضال واقعي على مؤخرته مرة اخري وهو يموء كالقطة : ما القصد كدة انا قصدي كلو انه يآ اخوانا البياكل براهو بيخنق والمزرعة دي في الاول حقنا وهسع حقتكم لكننا في الاول والاخير شركاء في اللحم دا والحكاية ممكن تقط عليكم بعد كدة وتقط علينا كمان خاصة لو المسألة جاطت بعد كدة والله كل زول بيعمل زريبة لبقرو وبيحوش غنيماتو والتكتح ما نلقي لا نحن لا انتو دحين فكو الشغلة شوية وادونا من الحتة البترضوها ان شاء الله من الكوارع ضلفين ومن الراس اللسان بس مافي طمع .. لكن ان قطت نحن ما معاكم فيها دقوني بعدين تشيلوا شيلتكم ..:)
قال الترترة : هييي يا ضال يا مقطوع انت قايل هسع لو جاطت تاني بتلقى ليك فيها كدة؟ يسمك ويسمك جدودك تاني ببح باح باح الناس دي وعت وقصة هوهوتك دي ونبيــحك وكشيرة انيابك تاني ما بتجيب حقها واي زول بيربط ليهو فرنيب في شارعو وحوامتك بيطبك الفرنيب وتترمكي فطيسة زيك وز التانيين
فهز الكـلب الضال ذيله وهو يتمتم والحل يا سعادتك ادينا الدُبارة وانا من يدك دي لي يدك دي .. نعمل شنو لمصلحتك ومصلحتي ومصلحة الوضع كلو ..
فأرسل حسن بلطية اللذي كان يتابع الحوار من داخل حولية مولانا ايميل يحمل شروطه فترجمه بشير الترترة للــكــ,ــلب الضال بنصه:
أول شئ يورينا المحرشو منو يلبد لي في الشارع داك ويقعد كل ما يشوفني يهوهو فيني تاااني هام يورينا باقي كــلـاب الحلة الجاهز فيهم يكد عضم منو والشبعان وتريان من العضام منو عشان نديهو بالعُكاز وتالت شئ أي كــلب من كــلاب شارعو ما يوافق يكد يعاهدنا انه ينبذوا من الشارع ويرميهو برة عشان نلم فيهو .. ورابع شئ يقبل بأي مهمة حراسة وتكليف بالهوهوة والنبيــح نقول ليهو يهوهو حتي ولو طلبنا منه يموء مواء القطط ويصوص صوصوة السوسيوة ما يتردد ولا يتعقد يصوصوها.. وخامس حاجة يفهم انه القصة ومافيها كلها من اجل مصلحتنا ومصلحتو في المزرعة ولازم نربي لحم كتير زي ما كنا بنربيهو اول ولازم نتعاهد انه لحمنا يزيد وكومنا يكبر وينسي قصة انه ممكن يقسم لــكلـاب تانية دي باقي لحم ويبطل حفلات حوليات كتيرة والفتة البي لحم دي خليها فتة بي توم بس او كشنة بي بصلة حرقانة ..
وليهو علينا بنخلي اي جريـو في الحلة يفهم انه فتك للمواضيع لينا حايكون من باب مصلحة الجروة زاتم وانك ضحيت من اجلهم بسعادتك وهناك عشان ما يتضايقو
بعد نقل بشير الترترة وترجمته لرسالة حسن بلطية للــكــ,ــلب الضال .. وقف بوبي العزيز على رجليــه الخلفيتين وهو يهز ذيله بمرح وانبساط وحبور وهو ينبح ويموء ويصوصو ويكوكو ويقول انا من يدكم دي لي يدكم دي.. دا خدام اللحمة واسير الشحمة..
Quote: يعنى ود السيد محمد عثمان دايرنو يقرأ فى الدخينات الأبتدائية ولايتخرج من معهد ود المقبول لعلوم الأرض ماسمعت قصة السيد على لمن مشى منطقة فى جهة الشايقية وداهمتو صلاة المغرب فوجد جماعة يصلون فلحق بهم وبعيدن الأمام سلم وأتلفت لقى وراهو السيد على..القصة عجبتو وأنبسط بقى كل مره يقول انا صليت بسيدى انا صليت بسيدى...أهلنا الشوايقة جاملوه أول مره ولمن كتر التباهى بالقصة أتضايقو منو فقامو قالوا ليهو ..هوى والله ده تواضعاً من سيدى وقلة أدباً منك سااااااكت...
فده تواضعاً من ود سيدى كونه زاتو يقبل بالمستشارية وقلة أدباً من الدايرنو فى سيرتو الذاتية يقول ليهم كنت سايق ركشة فى شارع النص
....
التعديل ( والله الا حرف الكاف واللام والباء ديل تلقيهم من البورد ) :):)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
HAIDER ALZAIN
سفيان بشير نابرى
خدر
فيس بوك
تويتر
انستقرام
يوتيوب
بنتيريست