|
|
 عكس الريح.. نبوءة عن وطن مجروح
|
مدخل:
كنا وكنا ياما عزاز
ولحظات التلاقي لذاذ
هلكنا وكت وكر تورنا
ودهتنا بصيرة الإنقاذ
حميد
نص:
لسة عكس الريح مشيك
لسع دموعك في وشيك
مسلوب إرادة
وراضي بالموت الوشيك
متمادي في الحالة العليك
بس لي متين
ما دايرة تشرق ليك شمس
دربك مكندك من أمس
كل المواني تنادي ليك
صابت عيون النيل طشاش
صارت محطاتك غباش
مسكين...
من الكان أصلو بيك
واللسة منتظرك عسير
نصبح ولا نلقاك وطن
ويرتدّ بصر الشوق حسير
ويمتدّ درب الشوك مسير
السيف قطع فجأة الجفير
والجدول المغلوب صمت
بكّاي ...
نكر صوتو الخرير
والكلاب نهشت خريفنا
وبوح عصافيرنا التطير
الفرح ودع مسارك
والصديق جافى السمير
بنخاف ولا نلقاكا في
نفقد حنانك والدفي
كل الصباحات تنطفي
والخوف فرش في كل
مساماتك سرير
لا قوقت القمرية مرة
ولا نشر وردك عبير
مليانة كل الناس كآبة
صابرة بالحال الأصابا
والمسادير قافلة بابا
والقلم ساب الكتابة
الله للناس الغلابة
المشاويرن دروب الخوف
وترياقن مدامع
الترانيمن أنين الجوع
ونجماتن طوالع
كل واحد زيتو طالع
سارقة غنواتو الضفادع
سارقة وجباتو الصوامع
هاتفة بي سكاتو الشوارع
الله لي كل الشوارع
الله للناس التولول
من كلاب الليل
ومسدار الزوابع
من كلاب الشر
وخدّام المطامع
وإنت ماشي...
ولسة عكس الريح مشيك
لسع جروحك في وشيك
متمادي في هذا السكات
يا حسرة فقدانك وشيك
الجمعة 7/2/2009
|
|
 
|
|
|
|
إيهاب الأمين
هند محمد
فيس بوك
تويتر
انستقرام
يوتيوب
بنتيريست