فور أن بلغ الشاعر يوسف الحداد نبأ رحيل الشاعر الكبير اسماعيل حسن عليه رحمة الله تعالى نفجرت المواقف والذكريات الى دموع من القوافي ، تعود الحداد أن يذرفها كل عام على صفحات الصحف اليومية وخاصة صخيفة الخرطوم ، فقد كانت تربطه بالشاعر اسماعيل حسن علاقة وطيدة وبينهما تشابه في الملامح الشعرية العامة. يقول الحداد أن اسماعيل حسن هو أول من قدمه للناس كشاعر، لقد كانت العلاقة بينهما كالعلاقة بين ابي تمام والبحتري، وسأعود في مداخلة لاحقة الى سرد بعض الذكريات التي يحملها الحداد عن ذلكم الهرم الشعري أو قل النيل الشعري الخالد اسماعيل حسن عليه رحمة الله تعالى .. وقد رأيت أن أفرد لهذه المرثية بوستا خاصا في الذكري التاسعة والعشرين لرحيل هذا الشاعر الذي أثرى وجدان السودان
=================================
مرثية الراحل اسماعيل حسن شعر / يوسف محمد أحمد الحداد
دمعة الم حسرة وندم يا دنيا ما كان العشم والشى الحصل ما كان مُحال لكنو اغرب من حلم *** كان يوم اربعاء الساعة ما معروفة كم إنتابنى إحساساً غريب لا ليهو ريحة ولا طعم الليل براقعو اشوفها سود لا قمرة لارقشة نجم بالحيل طِول متل السنة ما دار يروِّح وينهزم الحالة زادت وحشتى وليلى الطويل ابى ينقسم بعد السهاد والحالة دى لاح النهار منكوس علم لون الحزن فى وشيهو بان فوق الشفق مرسوم رسم نادانى هوى يا زول اقيف عندك خبر ؟؟ قُت ليهو لالا خبر شنو تمتم وقف غلبو النضم قُت ليهو قول انا اصلى شايف لي منام نكت علي عيشتى السجم قال ليى مامات اسماعيل إتريّس اوعك تتهجم مات اسماعيل دا كلام شنو! كيفن يموت يمشى ويفوت من غير علم اتارى مقبوض قلبى كان وطوالى كان دايما يطم
كيفن يموت شيخ إسماعيل هو انحنا عندنا منو كم متحف كبير ما ليهو حد صوراً كُتار قصة وفلم كيفن يموت يمشى ويفوت من غير علم رواسى فى بحر الخيال ناضم نجوم الليل نضِم فنان ومن يادوب صبيْ طنبورو حسو هلو ونعم وقوافلو طول الليل تسوق وتجر مع الحردلو نم كيفن يفوت من غير علم *** ما كُنا فى ارض المعز بين القناطر والهرم النيل يفيض يملانا شوق ونقول مواويلنا وننم ترهاقا والتاريخ غُنا والماس بيرفع فى العلم كان كُل شى مضرب مثل وكان ليهو عنوانو وإسم كيفن يموت يرحل يفوت من غير علم *** اه يا خطابات ما بتصل وما بيفيد علم الوصول الموت فرض فوق الرُقاب والدنيا بالفيها بتزول دمع الاسى الحراق يصابق فى النزول ما كنت قايل يومو قرّب ونجمو اوشك للافول والله يا طير الرهو زولكم بِعد وغيبتو بتطول خبراً اكيد شايلاهو انسام المسا الحزنانة تبكى مع الحقول يا ناس هنى ويا ناس هناك انا ماتلى زول نجماً سطع نوّر ظلام الامسيات كمين سنة ما غابلو حول بكت الشتول الكان تشابى على السحاب داير تطول نوار جرفنا الكان مخدر شرة فرهد فى السهول حُلم الصبايا الكان بشق التيه عشانُن وكان بيترنم يقول سيفاً مجرتق من زمن ترهاقا منقوش بى حلى التاريخ والوان الفصول يانا هنى ويا ناس هناك انا ماتلى زول *** ما عادت طنابير تانى رنة بعدو ما صهلت خيول الناي سكت خاطرو إنكسر النغمة ضاعت والطبول واللحن تايه والكمان والقوس صِبح متل التقول ماليهو خاطر فى السفر لغوافى تايه بلا عقول كل الحروف إتلملمت إتكومت فوق جدلة السمحة البتول يا ناس هنى ويا ناس هناك انا ماتلى زول وبرش البكا مفروش هناك فوق غيمة حردانا الهطول ياناس هنى وياناس هناك انا ماتلى زول ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة