|
|
|
 Re: دايرين نهاجر... أدونا رايكم (Re: عبد اللطيف بكري أحمد)
|
سلام عليكم
اليمن كيف معاك .....
عشان ما تقول لي ضياع زمن ....
الكتوف اتلاحقن والدول العربية من المحيط للخليج بقن ضياع زمن ...
والما ضايعة في طريقها للضياع تحت مظلة تقلبات الأحوال السياسية التي تحيط بالمنطقة أجمع ...
شوف ليك تحضير في ماليزيا ...
وإن كنت تسعى للاغتراب أخذ ليك هبرة لكندا ولا أمريكا بتقدر تحضر وتشتغل ....
أما دون ذلك فعليك بمكانك ...
الزم الجابرة أخير ليك
مع أمنياتي لكم بالتوفيق ...
| |
 
|
|
|
|
|
|
|
|
Re: دايرين نهاجر... أدونا رايكم (Re: othman mohmmadien)
|
سلام othman mohmmadien
ياخ دى ايام يمن
انا ماشى اشتغل يا حبيب ما ماشى لجهاد
| Quote: وإن كنت تسعى للاغتراب أخذ ليك هبرة لكندا ولا أمريكا بتقدر تحضر وتشتغل .... |
ياخ دة حلم انا شايفو بعيد خلاس
بعدين امريكا دى سكيناها لوترى لمن كرعينا حفن فى النهاية قنعنا منها
وقلنا نشوف العرب ديل
اهو جنا تعرفو ولا جنا ما بتعرفو
تحياتى
| |
|
|
|
|
|
|
|
|
Re: دايرين نهاجر... أدونا رايكم (Re: أمجد الزين)
|
الاخ امجد الزين سلامات
تقول شنو ياخى بس ..
السودانيين الواحد بيغترب وما ناوى يرجع ابدا
يعنى ممكن تقول إعادة توطين وكدا
يعنى الكوته حقتهم كملت دا غير مشاكل ليبينا
لكن انشاء الله بتحضر كاس العالم معانا
| |
|
|
|
|
|
|
|
|
|
Re: دايرين نهاجر... أدونا رايكم (Re: منتصر الامين)
|
قبل عشرة أعوام وبعد أن قضيت فترة الإمتياز والخدمة الوطنية قررت الإغتراب إلى السعودية.بدأت رحلة
توثيق الشهادات من الجامعة مرورا بالخدمة الوطنية ووزارة الخارجية إنتهاء بالسفارة السعودية. فى السفارة
السعودية صفوف طويلة ومعاملة لا إنسانية من قبل أفراد الشرطة. بالإضافة نفس الإسطوانة يقول ليك - ح تضيع زمنك
والسعودية إنتهت خلاص. صرفت النظر وتكاسلت. الان زملاء الدراسة من حط رحاله فى السعودية فى وضع مميز وتمكن من
إجتياز إمتحانات التخصص والمعادلة البريطانية.
الحساب المادى صراحة لا يوجد فارق كبير بين طبيب مثابر فى السودان واخر مغترب فى السعودية. لكن الوقت الذى يجده
من يعمل فى السعودية وجو العمل الصحى والحياة الكريمة تمكنه من تطوير نفسه والتقدم إلى الامام عكس من هو متواجد
فى السودان الذى يعيش فى دوامةعمل متواصلة وقرف لا ينتهى.
أخى توكل على الله وشد الرحال ولن تندم وخصوصا انك خريج هندسة ولديك خبرة.
| |
|
|
|
|
|
|
|
|
|
Re: دايرين نهاجر... أدونا رايكم (Re: ombadda)
|
سلام ombadda
| Quote: تمكنه من تطوير نفسه والتقدم إلى الامام |
دى من الاشياء المفقودة فى البلد دى عشان كدة قلنا نفتش ليها برة
يعنى الواحد بعد سنة بس شغل بتلقى نفسك بقيت اتجاه واحد
مافى اى تطوير حتى الشى العندك بتبدا تنساهو
والواحد حاسى انو امكانياتو اكبرمن كدة
وممكن الواحد يطور نفسو ويبدع بس لو اتلقت الفرصة المناسبة
وشكرا على الدعم
| |
|
|
|
|
|
|
|
|
|
Re: دايرين نهاجر... أدونا رايكم (Re: منتصر الامين)
|
منتصر سلامات
| Quote: السودانيين الواحد بيغترب وما ناوى يرجع ابدا |
والله يا منتصر دة شى طبيعى لانو الوضع هنا ما مغرى نهائى
يعنى انا بعرف ناس شغالين فى السعودية وفى اشغال عادية جدا يعنى ممكن الواحد يلقى وضع احسن منها فى السودان
لكن بعد دة تجيب ليهم سيرة السودان الواحد يقبل منك غادى
بعدين دايرك تدينى نبذة خفيفة عن سوق الاتصالات هناك
ودرب الوصول ذاتو بكون كيف
لكن حتة قفلت نهائى دى انا ما داير اقنع بيها نفسى اصلو
| |
|
|
|
|
|
|
|
|
|
Re: دايرين نهاجر... أدونا رايكم (Re: شرف الدين آدم إسماعيل)
|
يلا وتعال يلا
نهاجر في بلاد الله
ننسى الناس ينسونا
والله ننسى الناس ينسونا
وفوقنا الطيبة تتدلا
نعيش زي الطيور ماتعيش
وتفرد لجناها الريش
تضمنا عشة الريدة
ويفوت فوقنا الغمام تعريش
نفوت من سكة رواحة
ونتوه من واحة لواحة
شتيلة ريدنا يا حنين
يضون بهجة في الساحة
حلاوة الدنيا تلقاها
تجينا سحابة شايلاها
دروبنا تلم وريدنا يتم
وانت تقولي يا آهة
ونرتاح من كلام قالو
ومن عينو دمعتين سالو
آثار الهم نطويهو
نخلي الفرح بدالو
يلا وتعال يلا
نهاجر في بلاد الله
ننسى الناس ينسونا
والله ننسى الناس ينسونا
وفوقنا الطيبة تتدلا
قطر بتتلقي وانت حظك ، في رمضان اشتغل معاي
شاب سوداني ظريف وهو غير مقيم وفي زياره للدوحه
سايق والسياره مكتوب عليها اسم الشركه وقفو واحد قطري
وقال ليه عندنا بيت جديد عاوزين ننظفوا
مشى نظف ليه البيت القطري قاليه تعال اشتغل معاي وضح ليه
انو جاي زياره وفي خلال يومين طلع ليه اقامه
مش بقولو رزقا تكوسلو ورزقا يكوسلك
| |
|
|
|
|
|
|
|
|
|
Re: دايرين نهاجر... أدونا رايكم (Re: احمد الزبير)
|
احمد الزبير يا حنين
غايتو زولك دة حظو يهودى زى ما بقولو
اريتو حظى بعد الحال
| Quote: مش بقولو رزقا تكوسلو ورزقا يكوسلك |
انا بعرف لى زول قعد عاطل فى السودان لمن الله غفر ليهو
اتقفلت قدامو كل الاتجاهات
المهم سافر زيارة قطر وقدم فى كم شركة وخش كمية بتاعت معاينات
لغاية ما الزيارة بتاعتو انتهت وقطع تذكرتو داير يرجع السودان
وهو ماشى على المطار ضربو ليهو ناس شركة من الخش ليهم معاينة ديل
وهسع امورو ظابطة معاهم
غايتو الدنيا حظوظ
| |
|
|
|
|
|
|
|
|
 Re: دايرين نهاجر... أدونا رايكم (Re: أمجد الزين)
|
اول حاجة سلام ومحبة
الشى التانى عنوانك دا تتكلم فيهو عن نفسك
وبس أيه داين دى!!!
الحاجة التانية هسى تهاجر و تخلى الحوت
لى منو!!!؟ و الحر و الكتاحه دى لى منو؟
Quote: يا ناس قطر
مافى زول عندو كرت زيارة زايد |
بخصوص الاقتباس الفوق دا
انت واضح لا ماشى لى شغل لاحاجة
انت يا الاخو مستهدف كاس العالم
عشان كدا خليك وااااااضح و لا تغش
أخوة المنبر .
قال تأهيل قال
هسى يعني لو جاك سفر بكرة دي
ما حتنتظر احتفالات الهلال بكاسو!!!؟
| |
|
|
|
|
|
|
|
|
 Re: دايرين نهاجر... أدونا رايكم (Re: سفيان بشير نابرى)
|
سفيان يا حبيب
كل سنة وانت طيب
Quote: الشى التانى عنوانك دا تتكلم فيهو عن نفسك
وبس أيه دايرين دى!! |
ياخ كلامك دة قولو لزول مافى السودان
انا هسع لو طلعت شارعنا بس بجيب ليك 121 نفر دايرين
بعدين دى حسادة منك بس عشان انا متخارج
لكن ما عندك مشكلة بجيبك معاى 
Quote: الحاجة التانية هسى تهاجر و تخلى الحوت
لى منو!!!؟ و الحر و الكتاحه دى لى منو؟ |
بالنسبة للحوت ياخ الزول دة عالمى عدييل يعنى محل تقبل بتلقاهو
اما الحر والكتاحات دى انتو ما بتقصرو معاها ابقو عليها عشرة 
| |
|
|
|
|
|
|
|
|
|
Re: دايرين نهاجر... أدونا رايكم (Re: سفيان بشير نابرى)
|
Quote: اها كاس العالم!!!؟
ولا دى نومتك و ما عايز
تركز عليها عشان ما ينقشوك !؟ |
لكن لقيتك حكاك خلاس
ياخ كاس العالم دة شاكيرا بتبطل شغلتها عشان تجى تغنى فيهو
خليك انا الماعندى موضوع دة
انا غايتو لو الله سهلها وحضرت كاس العالم دة
بجى بترشح لرئاسة الجمهورية طوالى
يعنى باقى ليك تانى حيكون فى زول احسن منى
| |
|
|
|
|
|
|
|
|
|
Re: دايرين نهاجر... أدونا رايكم (Re: أمجد الزين)
|
Quote: بعدين دايرك تدينى نبذة خفيفة عن سوق الاتصالات هناك
ودرب الوصول ذاتو بكون كيف
لكن حتة قفلت نهائى دى انا ما داير اقنع بيها نفسى اصلو |
الاخ العزيز أمجد الزين
سوق الاتصالات فى قطر والى وقت قريب كان محتكر لشركة كيوتل
وقبل فتره دخلت شركة فودافون كمشغل ثانى ويشرف على سوق الاتصالات
المجلس الاعلى للاتصالات ICT وهناك عدد غير قليل من الشركات الخاصه
والتى تعمل فى مجال الشبكات والخدمات المتعلقه بالاتصالات
عموما يمكنك معرفة الوظائف المتوفره والتقديم لها من خلال الروابط التاليه:
http://www.qtel.qa/QODPPortal/portal/consumerhome كيوتل
http://www.ictqatar.qa/ar المجلس الاعلى للاتصالات
ما تسمع كلام سفيان دا وبالتوفبق انشاء الله وربنا يديك الفى مرادك
| |
|
|
|
|
|
|
|
|
|
Re: دايرين نهاجر... أدونا رايكم (Re: سفيان بشير نابرى)
|
Quote: منتصر أحمد دا منو!!!!؟
يازول ما تبطل رجفه !!! |
يا عمك والله خجلتنى عديل كدة
هو صحى منتصر احمد دة منو؟؟
والله محن
غايتو كان الله سترك الناس ما بتريحك
| Quote: اضرب لى أنا دا بسفرك |
يازول انا قلبى رهيف وبصدق الكلام دة
هسع والله اشبك فيك تقول يا الله فكنى
لكن كان جيت للجد انت كان بتسفر المقعدك مع الطير* ديل شنو؟؟
ـــــــــــــــــــــــــــ
* الطير دى يا جماعة على وزن النكتة
عشان ما يجى واحد طاير لينا فى حلقنا ساى
| |
|
|
|
|
|
|
|
|
|
Re: دايرين نهاجر... أدونا رايكم (Re: حسن حماد محمد)
|
حسن حماد محمد
كيفنك؟
| Quote: تعال ياللخو اتشحطط معانا فى بروكلن دى والله التكنك فى سعد قشرة |
بروكلين عديييل كدة
احلى شحططة والله
يا زول بلدكم دى بعيدة خلاس
ودة حلم ما عندنا ليهو رقبة
بعدين انا بلدكم دى سكيتها لوترى لمن الله غفر لى وابت تدينا
لكن لو عندك درب بتحت تحت كدة ورينا ليهو
| |
|
|
|
|
|
|
|
|
|
Re: دايرين نهاجر... أدونا رايكم (Re: محمد الخاتم)
|
محمد الخاتم سلامات
| Quote: كدي حدد انت مجالك شنو في الاتصالات عشان نديك النجيضة |
انا بالضبط شغال فى مجال تركيب وصيانة محطات الاتصالات
يعنى فى الابراج بتاعة الشبكة دى
ونحنا بنقول ليها ال(BTS)
Base Transceiver Station
بشتغل SIEMENS صيانة وتركيب
وبشتغل ERICSSON
وبشتغل HUAWEI
اها بعد كدة منتظرين منك النجيضة
| |
|
|
|
|
|
|
|
|
|
Re: دايرين نهاجر... أدونا رايكم (Re: أمجد الزين)
|
Quote: باقى النص التانى والاصعب وهو درب الوصول كيف؟
يعنى الا عن طريق كرت زيارة من هناك
ولا الواحد يسك وكالات السفر الهنا
ولا كيف؟
اصلو اخوك عمرو ما ركب طيارة |
أمجد الزين صباح الخير
درب الوصول ساهل ولا يحتاج لوكالات السفر
خاصة اذا كان لديك قريب من الدرجه الاولى هنا
يقوم باستخراج زياره عائليه لك (الاتنين ما بدوك اقامه دائمه)
وبالعدم زيارة رجال اعمال وهاتين نوعا ما بدوك فترة اقامه مناسبه
تمكنك من تقييم الوضع ومعرفة البلد وفرص العمل بها
واذا محظوظ زى قريب احمد الزبير داك تلقى وظيفه وإقامه
ولو حظك (غير) تكون اتفسحت وغيرت جو ....
| |
|
|
|
|
|
|
|
|
|
Re: دايرين نهاجر... أدونا رايكم (Re: منتصر الامين)
|
منتصر ما قصرت معانا تب
| Quote: خاصة اذا كان لديك قريب من الدرجه الاولى هنا |
دى مافى
| Quote: وبالعدم زيارة رجال اعمال |
رجال اعمال عديل كدة
دى شكلها بتكون مكلفة وكدة
مافى حنك عمرة وزوغة
Quote: واذا محظوظ زى قريب احمد الزبير داك تلقى وظيفه وإقامه
ولو حظك (غير) تكون اتفسحت وغيرت جو |
والله كان على الحظ الا الواحد اقنع لانو مافى عديل كدة
| |
|
|
|
|
|
|
|
|
|
Re: دايرين نهاجر... أدونا رايكم (Re: أمجد الزين)
|
Quote: درب الوصول ساهل ولا يحتاج لوكالات السفر
خاصة اذا كان لديك قريب من الدرجه الاولى هنا
يقوم باستخراج زياره عائليه لك (الاتنين ما بدوك اقامه دائمه)
وبالعدم زيارة رجال اعمال وهاتين نوعا ما بدوك فترة اقامه مناسبه
تمكنك من تقييم الوضع ومعرفة البلد وفرص العمل بها
واذا محظوظ زى قريب احمد الزبير داك تلقى وظيفه وإقامه
ولو حظك (غير) تكون اتفسحت وغيرت جو .... |
منتصر (أحمد) سلاااام
بالله الزول دا من عندنا
ساعدوا ما تعلب بمشاعروا.
| |
|
|
|
|
|
|
|
|
|
Re: دايرين نهاجر... أدونا رايكم (Re: سفيان بشير نابرى)
|
نصيحتي ليك يا أمجد ما تحاول تهاجر عشان ما تندم بعدين
واذا اضطريت تهاجر ما تحرق مراكبك مراك .. اخد اجازة من الشغل وجرب الاغتراب وبعد داك قرر!!!
وكمان اذا اضطريت تهاجر ما تهاجر لدولة عربية عشان كل المغتربين في الدول العربية بيشتكوا من سوء المعاملة
وكمان اذا اضطريت تهاجر لدولة اوروبية او لامريكا .. ما تهاجر إلا للدراسة فقط ... عشان الشغل هنا صعب
والله يديك العافية
| |
|
|
|
|
|
|
|
|
|
Re: دايرين نهاجر... أدونا رايكم (Re: اميرة السيد)
|
تسلمى اميرة السيد على النصيحة الغالية
والله ما جاب الندم ان شاء الله
انا طبعا قررت اغترب لاسباب بالنسبة لى منطقية
اول حاجة عشان الواحد يأهل نفسو اكاديميا وماديا طبعا
لانو الحاجة دى انا فاقدها فى شغلى الحالى بالذات الجانب الاكاديمى
| Quote: واذا اضطريت تهاجر ما تحرق مراكبك وراك |
دى طبعا عامل ليها حسابى جدا
وانا شغال بالمثل "ان مسكت ما تطلق وان طلقت ما تندم"
| Quote: وكمان اذا اضطريت تهاجر لدولة اوروبية او لامريكا |
طبعا اى شاب بحلم بالدول الاوروبية لكن الوصول ليها اصعب من الدول العربية عشان كدة هى البتكون الخيار الاسهل
| Quote: ما تهاجر إلا للدراسة فقط |
دى كمان صعبة شوية لانو ورانا كوم لحم
وليك الشكر من هنا لا عندك
| |
|
|
|
|
|
|
|
|
|
Re: دايرين نهاجر... أدونا رايكم (Re: ناصر المحسى)
|
سلام ناصر المحسى
Quote: وكمان فى ناس بيبيعو اللوترى بيشوفو ليك حق واحد قريب
لشكلك |
غايتو يا ناصر زى دة ما سمعت بيهو
وبعدين الموضوع ما ظنيت يكون بالبساطة دى
لانو الشئ البعرفو لو فى اختلاف فى التوقيع بتاعك بس ممكن يشوتوك برة
تحياتى
| |
|
|
|
|
|
|
|
|
|
Re: دايرين نهاجر... أدونا رايكم (Re: أمجد الزين)
|
Quote: غايتو يا ناصر زى دة ما سمعت بيهو
وبعدين الموضوع ما ظنيت يكون بالبساطة دى
لانو الشئ البعرفو لو فى اختلاف فى التوقيع بتاعك بس ممكن يشوتوك برة |
والله يا امجد السنة الفاتت قابلت فى مصر كم جايين بلوترى ماحقهم وعملو التاشيرات
وسافرو انت بس اسال عندك
اما تاشيرة الشنغل اسال ناس الوكالات وخاصة لليونان بعد داك ممكن تمشى اى
دولة اوربية
| |
|
|
|
|
|
|
|
|
|
Re: دايرين نهاجر... أدونا رايكم (Re: ناصر المحسى)
|
سلامات ناصر
Quote: والله يا امجد السنة الفاتت قابلت فى مصر كم جايين بلوترى ماحقهم وعملو التاشيرات
وسافرو انت بس اسال عندك |
الفهمتو
انو الواحد فى الحالة دى حيسافر باسم غير اسمو
ولا انا غلطان
Quote: اما تاشيرة الشنغل اسال ناس الوكالات وخاصة لليونان بعد داك ممكن تمشى اى
دولة اوربية |
تاشيرة الشنغل دى ما عرفت المقصود بيها شنو؟
ياريت توضح لى
| |
|
|
|
|
|
|
|
|
|
Re: دايرين نهاجر... أدونا رايكم (Re: أمجد الزين)
|
سلامات يا امجد
اخوك بتاع اتصالات قديم في السودان تركتها, واخدت لفة في كم مكان شغل وقراية
اذا امورك في الشغل ماشة كويس, فممكن تطور نفسك فيهو وممكن تغير قليل في المجال فالاتصالات اصبحت مجال واسع شديد, واذا ما شغال في شركة كبيرة حاول تلقي ليك فرقة فيها فالقصة ما صعبة
ركزعلي الشهادات المهنية وادراة المشاريع
وحتي لو مصر علي الاغتراب فما تمشي الا لي فرصة واضحة ولي شركة كبيرة لانو دي الممكن تستفيد منها
الحاجة الاخيرة الواحد فينا بيكون محظوظ في بعض الاشياء فلو كنت موفق في شغلك بصورة عامة فما تخليهو لانو ممكن حظك يعكس لو غيرت
لو عاوز فكرة عن التحضير في ماليزيا ممكن افيدك
عموما بالتوفيق ان شاء الله
| |
|
|
|
|
|
|
|
|
|
Re: دايرين نهاجر... أدونا رايكم (Re: Ammar Elyas Babiker Hassan)
|
سلامات عمار
وشكرا على افاداتك
ومنك نستفيد
انا فى شغلى الحالى الحمدلله ما بطال يعنى ماشى الحال
بس المشكلة عدم التطوير
يعنى انا زى ما قلت فى اول البوست انو لى اكتر من سنة شايف نفسى ما مستفيد حاجة
وماداير احصر نفسى فى حتة ضيقة كمان عشان كدة الواحد داير يفتش لفرص احسن
| Quote: لو عاوز فكرة عن التحضير في ماليزيا ممكن افيدك |
انا طبعا التحضير دة ما عندى ليهو طريقة على الاقل فى الوضع الحالى
لكن برضو يا ريت تدينا الفكرة حتى لو ما استفدت منها انا يستفيد غيرى
تحياتى
| |
|
|
|
|
|
|
|
|
|
Re: دايرين نهاجر... أدونا رايكم (Re: سفيان بشير نابرى)
|
بوست فير موفق ومحبط وما سمح كلو كلو..
يعني هسي انا خريج هندسة جديد يادوب ما تميت شهر
ومليان جدا بالطموح والامال العريضة ..
في مرتب محترم و ومنزل وعربية محترمات الاتنين برضو.. وكلو جوا الوطن..
اجي هنا القاك ليك 3 سنين وشغال وبعد دا كايس لمخرج
بوست ضار بالشباب والصحة العامة للخريج
واطلب من بكري مسح البوست
واكعب حاجة في البوست دا انو الواحد مافهم الهجرة احسن ولا الاغتراب
وامسخ حاجة انو كاتب البوست اي حاجة قالوها ليهو طلعت مجربة و فاشلة
و الحاجة المضحكة انو ناس قطر مصهينيين رسمي..
تحياتي يا امجد وللجميع
| |
|
|
|
|
|
|
|
|
|
Re: دايرين نهاجر... أدونا رايكم (Re: محمد هشام)
|
Quote:
انا بالضبط شغال فى مجال تركيب وصيانة محطات الاتصالات
يعنى فى الابراج بتاعة الشبكة دى
ونحنا بنقول ليها ال(BTS)
Base Transceiver Station
بشتغل SIEMENS صيانة وتركيب
وبشتغل ERICSSON
وبشتغل HUAWEI
اها بعد كدة منتظرين منك النجيضة |
امجد يا زين
اخوك طبعا في نفس المجال بس في شغل ال core + business solution وجيت هنا لي سنتين (بس ما شغال في المجال)
اولا الشغل هنا كلو عند الشركات ال outsource والبلد اصلا صغيرة شديييد والهنود والفلبينيين علي قفا من يشيل عشان كدا حتي لو لقيت شغل بكون المرتب ضعيف شدييد يعني مرتبك هناك بكون احسن بي 10 مرات من هنا .
أما اذا عملت دورات كتيرة (بس خارج السودان) انصحك اكرب بطنك وامشي اعمل ال pmp عشان تكابس في كيوتل ولا فودافون اللي هم المشغلين الرئيسيين .
علي العموم دا ايميلي واعمل لي اضافة في الماسنجر عشان نكب ليك الحنك كلو [email protected]
| |
|
|
|
|
|
|
|
|
|
Re: دايرين نهاجر... أدونا رايكم (Re: محمد هشام)
|
محمد هشام يا برلوم
اول سلامات
وتانى الف مبروك التخرج
والله يا عمك الدنيا اقسام وما تشتغل بكلامى دة كتير
احتمال حظك يكون احلى
وحلمك دة
| Quote: في مرتب محترم و ومنزل وعربية محترمات الاتنين برضو.. وكلو جوا الوطن. |
فى ناس دفعتنا عايشنو
دة عشان ما احبطك
وربنا يوفقك شديد والله
تحياتى
| |
|
|
|
|
|
|
|
|
|
Re: دايرين نهاجر... أدونا رايكم (Re: سفيان بشير نابرى)
|
Quote: والله يا عبداللطيف الشحططة مقابل الواحد يطور نفسو ما بناباها
ياخ انا نسيت انى قريت هندسة ذاتو
ودايرين نلحق الفضل دة |
وانا راى عكس راى عبد اللطيف لو لقيت فرصه اطلع طوالى بدون اى تردد
وصدقنى حا تطور نفسك ولغتك بالتاكيد ......... تحياتى
| |
|
|
|
|
|
|
|
|
|
Re: دايرين نهاجر... أدونا رايكم (Re: أمجد الزين)
|
شنقن .. اسمها شنقن فيزا .. ما شنغل
state of shengen
الزول دا شكلو داير يدقسك
..............
النسبة لمجال الاتصالات هنا في السودان
فمن أحسن المجالات والمرتبات فيهو عالية جدا
بس حاول أطلع من الصب كونتراكتور الشغال معاهو دا
| |
|
|
|
|
|
|
|
|
|
Re: دايرين نهاجر... أدونا رايكم (Re: محمد عمر جبريل)
|
محمد عمر يا حبيب
| Quote: شنقن .. اسمها شنقن فيزا .. ما شنغل |
هى الشنقن ذاتها شنو؟؟
| Quote: بس حاول أطلع من الصب كونتراكتور الشغال معاهو دا |
ياخ انت شغال معانا ولا شنو؟؟ 
اها نحنا فى طريقة الطلعة دى كيفنها؟؟
برضو حاولنا نخش جوة وما لقينا طريقة
تحياتى
| |
|
|
|
|
|
|
| |
أمجد الزين
الامين موسى البشاري
othman mohmmadien
منتصر الامين
ombadda
احمد الزبير
عابدون محمد عابدون
سفيان بشير نابرى
معاذ حسن
محمد هشام
حسن حماد محمد
محمد الخاتم
محمد عبد الماجد الصايم
Tragie Mustafa
ناصر المحسى
Ammar Elyas Babiker Hassan
خالد المحرب
محمد عمر جبريل
فيس بوك
تويتر
انستقرام
يوتيوب
بنتيريست