يا عمر البشير..بطل حركات.. مش ترسل لي عساكرك ديل..و الوعود بانك تقسم لي معاك من الكعكعة اياها..يازول مافي طريقة تب..و ارجى الراجيك.. ضرب بيد من حديد و خشب كمان..!!
غايتو ، يا الشعب السوداني المجيد.. اكتر خلق الله على كوكب الأرض تضرر من وهمة (ربيع العرب) هو شخصي الضعيف.. ياخي ديل بوظوا علي مشروع كبير خلاس.. لكن الله في..و العقل برضك في..و ممكن نشوف لينا مخارجة..الله يستر من صيف الأفارقة..!
ثمة احداث ، احيانا ، تطفو على واقع معين.. و قد يعجز اهل الخيال القاصر في استيعاب حقيقتها و جوهرها ، ثم يضفون عليها ، من باب العجز و قلة الحيلة ، تبريرات توافق كسلهم و ضعفهم.. و من تلك الأحداث ، تواتر وجود مراقبة دولية في السودان في الأونة الأخيرة.. حضور مركز كارتر..مبعوث الإدارة الأمريكية السيد اسكوت غرايشن ( الله يقرش حلقو ببركة جدي معلا ابو ام مخيان الراقد الغبيش)..و مناديب الإتحاد الأوربي..و غيرهم من خلوق اجنبية وجدت في فضاءات السودان و كتاحته الباهرة ..ملاذات خلفية دافئة يهربون فيها من برودة بلادهم..كل اولئك و هؤلاء.. يظنهم قاصر الخيال انهم جاوؤا من اجل مراقبة ما ( لا تعنينا كثيرا هنا)..و لكن حقيقة أمرهم.. أننا فتحنا اضانهم حول امر جلل..و هو نيتنا في القيام بانقلاب على السلطة في الخرطوم..و لم يصدقوا مزعمنا.. لذلك ذهبوا للتأكد من بعض الأمور..و التيقن من أن ما قلناه لهم و لحكوماتهم و انظمتهم المستهبلة ، هو امر واقع..و هنا ما يؤكد ذلك المزعم.. فالإنقلاب الذي نود القيام به هو ناجح ناجح.. شاؤوا أم أبوأ..ولا عذر لمن انذر..
كبر
(الصفة الرسمية في اول مداخلة)..
09-01-2011, 10:07 AM
Kabar Kabar
تاريخ التسجيل: 11-26-2002
مجموع المشاركات: 18537
كل من يقوم بانقلاب على السلطة السياسية في بلد ما ، لابد أن تكون له عقده النفسية الخاصة التي تشكل مدار الدفع الذاتي في وعيه الباطن..مافي زول يغشكم و يقول ليكم أنا عملت انقلاب عشان الشعب و البلد..!!
انطلاقا من هذه الفرضية ، فقد بحثت في حياتي الشخصية عن عقدة نفسية ما.. تبرر قيامي بهذا الأمر الجلل..و الواقع السوداني لم يخذلني.. فقد كانت في حياتي بعض العقد النفسية ، و التي لا تدانيها عقد أي مدعي أو مستهبل امتطى صهوة الحكم في السودان..!
بعد احداث يوليو 1976.. كان الخطاب الرسمي و الشعبي في السودان ، يتحدث بغل عن قائد الإنقلاب العميد محمد نور سعد..و كان اصدقائي الصغار، في مدرسة الدويم النموذجية المزدوجة ، يمارسون على نوع برئ من الضغط النفسي..و كانوا يقولون عني: العميل محمد نور سعد (بدل محمد نور كبر)..و كانت هناك مشتركات كتيرة اخرى غير الإسم.. فمحمد نور سعد من منطقة المسبعات في كردفان..و انا من كردفان.. محمد نور سعد لونو اخدر..و انا برضو لوني اخدر..و محمد نور سعد قالوا كان ضابط شاطر..و انا برضو كنت شاطر (طوالي قاعد اجي الأول في الزمن داك)..
في السنة الأولي بكلية القانون .. ذهبت الى عرس عمي محمود النور في مدينة كوستي..و كنت ملتحي بوسامة (فاللحية احيانا فيها بعض من الوسامة)..و كان احد اعمامي (من المشاركين في انقلاب حسن حسين عثمان5 ستبتمبر 1975) .. تفتقت عبقريته بخلق نيك نيم اطلقه علي و هو القاضي الهارب (الناس الما حضرت الزمن بتاع انقلاب حسن حسين: القاضي الهارب لقب اطلقته صحف نظام نميري الصفراء على مولانا عبد الرحمن ادريس..و كان مشارك في التخطيط لتلك الحركة..و هو ايضا من من كردفان من منطقة تالودي..)..و منذ تلك اللحظة لم اطلق لحية في وجهي..وقد تعددت الأسباب و الشتم واحد..!!
تلك الذكرى اثرت في نفسي لزمن طويل..و للحقيقة و التأريخ.. لم افكر مطلقا لعمل انقلاب في السودان..اللهم سوى مرتين.. و احدة في المتوسطة..و التانية في العالي.. ثم خمدت روحي الإنقلابية..!!
كبر
(ما قلنا ليكم الصفة الرسمية في اول مداخلة)..
09-01-2011, 10:10 AM
Kabar Kabar
تاريخ التسجيل: 11-26-2002
مجموع المشاركات: 18537
2. صحيح أن السودان بلد عاير و ما عندو وجيع..و صحيح أن من يصحو مبكرا قد يقوم بانقلاب ناجح و يعلن نفسه سيدا على العباد و البلاد..و لكن..!!
نعم دوما اصحو مبكرا , و اصلي الصبح حاضرا، في ذلك الزمان ، و لكني لم افكر في انقلاب و ذلك لبعض الأسباب..
اول مشكلة واجهتني ..و جعلتني انصرف عن روحي الإنقلابية.. هي مسألة الإسم..و قلت داير اسمي يكون جديد كرت الناس ما سمعوا بيهو..الحاجة التانية.. مسألة الشهور.. في ذلك الزمان البعيد.. الثورات (الإنقلابات) في العالم العربي و الأفريقي.. شالت الشهور كلها..و ما فضلت فيها التكتح..
كبر (الصفة الرسمية فوق يا عالم هوي)..
09-01-2011, 10:13 AM
Kabar Kabar
تاريخ التسجيل: 11-26-2002
مجموع المشاركات: 18537
من خلال مراقبتي للشخصية السودانية..و دراستها..و مراقبة احوال العالم في ظل العولمة..وجدت أن الظروف مواتيه لعمل انقلاب في الخرطوم..و من هنا ياشباب.. انا حاجز الإنقلاب الجاي..و مافي زول يجي يقول لي سيك ميك..و نرجو مراعاة الأصول و قواعد اللعبة في الحتة دي..
كبر ( غايتو عالم جد عجيبة.ز الصفة الرسمية فوق..)..
09-01-2011, 10:15 AM
Kabar Kabar
تاريخ التسجيل: 11-26-2002
مجموع المشاركات: 18537
اول حاجة .. الإنقلاب ده.. ح يقوم على محورين.. اول بالتبادي ، من ناحية الإمكانيات المحلية السودانية.. المحور الثاني.. هو الإستفادة من الإمكانيات و المقدرات الأجنبية (عشان كده يا ياشباب.. بعدين ما يجي زعيط ولا معيط يفلقنا بقصة المرتزقة دي..و انو فكرة المرتزقة دي قالوها لي اصحابي الصغار.. قبال 34 سنة..و اخدت مناعة ضدها.. فمن هسع شوفو ليكم مكنة تانية)..في هذه الناحية.. الفكرة ح تقوم على استخدام سوفت وير (قاعد عندي و في محل امين)..طيب ليه السوفت وير و التكنولوجيا..؟
زي ما قلت ليكم فوق.. انا درست الشخصية السودانية كويس..اها دايما كنت بركز على أكتر حاجة الشعب السوداني بيدمنها ..و موجودة في حياتو بصورة مستمرة..هنا توصلت الى انو الشعب السوداني (صنف الرجال) دايما بتعجبوا فكرة الجلابية البيضة و العمة الما خمج..و الأقمشة المستخدمة عادة ما تكون من النوع المسمي بترولية..و دي مهمة خالص..
اما النصف الآخر (صنف النساء).. فهناك حقيقة ظاهرة.. هي حب التياب و الطرح.. يعني السودانية من قولة تيت بتكون رابطة رأسها بالطرحة..و حتى لو لبست توب برضو بتكون رابطة طرحة .. و الفكرة مش في الحشمة (عشان ما يجي واحد يخرج لينا نصوص فقه لا قبل لنا بها..و بنقول السترة سمحة و ما فيها كلام)..لكن في نوع الهدوم المستخدم..
لاحظت ايضا.. من الإدمانات الجديدة (و المهمة في الإنقلاب) استخدام الموبايل..ووسائل الإتصال الأخرى من تلفونات و انترنت و آي فون..و أي بوط..و غيرو..و دي مهمة جدا..
كبر ( قائد الإنقلاب يا عالم هووووووووووي)..
09-01-2011, 10:17 AM
Kabar Kabar
تاريخ التسجيل: 11-26-2002
مجموع المشاركات: 18537
السوفت وير الح استخدموا.. ح يكون متصل برقائق دقيقة للغاية..و ممكن ينتشر بسهولة في كل جلابية..ولا عمة ..ولا طرحة..و استخدمت فيهو خامات رخيصة و مقبولة..و طبعا سوق الهدوم في السودان هو السوق الوحيد الرائج و كاشف في كل الأوقات..
الرقائق دي..ما تخافوا منها ياشباب..و ما ح تكتل ليها زول (لأنو في انقلابي..روح شجرة ما ح تطلع خليك من روح بشر..و الحكاية دي مضمونة و في ضمانات ليها)..و فكرتي هي فكرة اتصال..و تحكم في المزاج..و سيتم عملها بواسطة تفعيل معين قبل ساعة الصفر..و ده كلو ح نشرحوا لاحقا..
كبر (ياخي لو الشعب السوداني لغاية هسع ما عارف صفتي شنو ، ان شاء الله ما عيفرف..!!)
09-01-2011, 10:24 AM
Kabar Kabar
تاريخ التسجيل: 11-26-2002
مجموع المشاركات: 18537
اشارة مهمة للغاية: مافي انقلاب واحد قام في السودان عندو تمويل.. كلهم مقاطيع و مفلسين و عينهم طالعة..و عشان نكون واضحين من هدا الحين.. انقلابي فيهو تمويل و عالي جدا..و على بالحلال تعريفة ما اديكم ليها.. فاهمين ولا لأ؟.. كلامي ده مقصود بيهو الزلنطحية.. المنتظرين يركبوا موجة الإنقلاب بعدين.. يحلفوا لي بي شرف امهاتهم انو ثورتي دي شافوها في الحلم ولا فكي مطرطش حدثم بيها من باب النبوءات الكاذبة.. ناسي الح يشتغلوا معاي كلهم مسجلين.. عشان كده شوفوا ليكم مكان ضهب تاني .. غايتو..نواصل في المهم..
من خلال دراستي للشخصية السودانية وجدت انها بتحب اكل الفول المصري..و لقيت انو 92 في المية من نسبة الشعب السوداني.. الفول المصري موجود في حياتو بطريقة او بأخرى (ياخي ديل لو مشيت تعمل فحص دم للملاريا..بتجيك حبة فول مصري طايرة).. طيب و بعدين.. الفول ده نسمموا؟.. بالطبع لأ..و قلنا ليكم مافي زول ولا زولة ح يتكتل في الإنقلاب ده.. فكرة الفول المصري يا شباب.. لقيت انو السودانيين بيستخدموا قرابة ربع المليار قدرة فول في السودان..اها القصة دي انا استفدت منها..و مشيت كلمت بيها ناس الماكدونالد..و قلت ليهم مافيش ماكدونالد منتشر في السودان.. عشان كده انا اعمل معاكم صفقة..الربع مليار قدرة فول دي.. ممكن تعملوا بدلها ربع مليون محل ماكدونالد.. اها الجماعة..قالوا لي يا مستر محمد نور كبر.. المحلات دي نشغل فيها منو؟ و نجيب لحمة من وين قدر ده؟ قلت ليهم اللحمة هينة.. و بقر البقارة في السودان اكتر من الهم في القلب.زاما بخصوص العمالة.. قلت ليهم العمالة المحلية هبطرش (خريجين و خريجات سادين عين الشمس بالعطالة)..و ما عندكم مشكلة في الحتة دي..و ح نشغلهم ليكم بربع القيمة..و ح تغطي معاهم و معاكم و معاي..و من باب الوطنية حلفت ليهم بالطلاق .. لازم الفول يكون من ضمن الوجبات التي يقدمها ماكدونالد لشعبي العزيز..عشان نحافظ على القيمة الرمزية للفول محبوب الشعب..
القصة دي ناس ماكدونالد رحبوا بيها..و قبضت فيها التمن (نصيبي في الغنائم)..و الباقي صرفتوا في تمويل تكنلوجيا الإنقلاب بتاعة السوفت وير.. برضك مشيت لناس الإدارة الأمريكية..و قلت ليهم يا شباب فكرة البترول دي بقت ما جايبة حقها.. عشان كده عندي ليكم فكرة.. انتو عندكم فكرة بتاعة نفايات نووية.. و نحن عندنا صحراء كبيرة قدر الليلة و بكرة.. اها تعالوا شيلوا جزء من الصحراء دي.. تعالوا استغلوا جزء منها..و الباقي لازم تحفروا ترع من النيل..و تسقوهو..و تزرعوه..و بعدين تسوا لينا مدينة زي بتاعة لاس فيقاس (مدينة القمار الأولى)..لأنو الوطن العربي و الأفريقي.. ما فيهو مدينة زي دي..اها قام واحد من اباطرة الكازيينوهات (يازول الراجل واصل..و عندو كمكمية كازينو في العالم)..و قال لي: كده ح تضرب لي البزينس بتاعي يا مستر كبور؟..جريت بتاع السي اي ايه على جنبه..و قلت ليهو اخير عيال العرب يجوك في امريكا و يسوا ليك القاعدة هناك..و لا اخير يكونوا بعيد منك؟..الراجل رجف رجفة بسيطة..و رجع قال لزولهم.. يازول انت ذاتك ح تكون شريك في المدينة دي..و نحن ح نكلم ليك الإخوة العرب ينفعوك هناك..و المسالة دي بتمليها ضرورة امنيه خاصة بحماية مصالح الشعب الأمريكي (يازول الأمريكان ديل يمين بالله من ما يجيبوا ليهم سيرة الأمن الوطني دي.. خلاص ده حد الكلام عندهم).. الفكرة دي برضو قبضنا منها حقنا و حق الجماهير..و الباقي استغليناهو في تمويل المشروع..(مشروع الإنقلاب)..
كبر (قائد الإنقلاب في ذات نفسو، حد عندو مشكلة؟)..
09-01-2011, 10:40 AM
Kabar Kabar
تاريخ التسجيل: 11-26-2002
مجموع المشاركات: 18537
يا اخ محمد عطا ، رئيس جهاز الأمن الوطني ، اقرا ساكت.. على قول اهلنا تشرب ما تروي.. علي بالحلال دفعة الخمسة الاف الدخلوا معاينات قبل كم شهر ديل ، فيهم اربعة الف و تسعماية و تمانية وتسعين من ناسي.. يعني العينتهم كلهم من ناسي..ولا عذر لمن انذر..اتفقنا؟.. اقعد تاوق ساكت لمن يبقى ليك بمبي..!!
كبر (قائد الإنقلاب.. يا اخوانا هوي..)..
09-01-2011, 10:46 AM
Kabar Kabar
تاريخ التسجيل: 11-26-2002
مجموع المشاركات: 18537
الأوربيين قاموا حنبكوا..و قالوا لي كيف يا مستر كبر مشروع زي ده ما تدخلنا فيه؟..يازول قعدوا يزنوا لي في قصة الموزانات الدولية..و انت كده بتكون فتحت البلد للأمريكان..و حيص بيص..!
اها قمت قلت ليهم.. ما عندكم مشكلة.. اي جبل حايم في السودان فيهو معادن اشكال و انواع..و الداير يجي هناك.. يجي كل زول يشيل ليهو جبل و يهدو (ما تخافوا الجبال دي ح نصورها في دفي دي..و ح نحرص انها تكون خلفية قنوات التلفزيون القومي..و الح تكون سبعمئة قناة باذن الله..و ح نعمل منها شعارات صغيرة.. أي زول ممكن يشتريها و يختها في بيتو و في جيب قميصو الشمال.. عشان بعدين ما يجينا واحد يقول لينا البعيد عن العين بعيد عن القلب..)..
اها ناس اوربا الفكرة دي لفقت معاهم..و دقستهم ليك في حتة تانية..و قلت ليهم أي جبل تشيلوه بره.. تبنوا في محلو قرية نموذجية..و ما عندنا مانع.. كل قرية تحمل اسمين..واحد حقنا وواحد حقكم..و لو دايرين تعلقوا علم كل مدينة من حقاتكم ..برضو ممكن يكون جنب علم المدينة خاصتنا ( الخواجات عندهم تقليد .ز انو كل مدينة عندها علم خاص بيها مرفوع في مجلسها البلدي.. اسوة بعلم المقاطعة..و الدولة..و بيني بينكم.. انا قلت ليهم كل مدينة في السودان عندها علمها الخاص.. و بعدين ما يجي واحد يشبكني الرئيس الكضاب و كده)..!!
الأوربيين القصة دي لفقة معاهم..وواحدين ( الأسبان و البرتغال و الفرنجة) قالوا لي دايرين عيش الذرة.ز لأنو الذرة من اجود الأصناف لصناعة البيرة.. اها تحسبنا لمشاعر الكثيرين في السودان ..و قلت ليهم..و البيرة دي ح تسوها و تبيعوها وين؟.. قالوا لي.ز ما عندك مشكلة..نحن بس دايرين الذرة..و ح نجيبها نسويها عندنا في بلدنا.. القصة دي عجبتني .. لكن اتذكرت انو ح تضر بمصلحة ستات الأنادي عندنا في السودان ..و ح تقطع رزقهن (في غياب دولة الرفاهية القوية البتحمي الغلابة و توفر ليهم اسباب الرزق ، و هي بالطبع مرحلة ما قبل دولتي..!!)..و لأني ما داير اغلط على طبقة من طبقات المجتمع السوداني.. قلت ليهم عندي ليكم فكرة.. تعالوا سوا مصانع بيرة عندنا في السودان..و لازم العمالة تكون سودانية..و كل مصنع تفتحوهو ، افتحوا قصادوا شفخانة..و اعملوا احجام مخصوصة للسودان (زي قصة البنسون الذي صنع خصيصا للسودان..و ما شاوروا فيهو سوداني أو سودانية) لأنو عندنا ناس برضك بتشرب مريسة..و غلطة الحكام الزمان في السودان.. انهم طوالي مضطهدين الناس ديل..وما محترمين حقهم في الحرية الشخصية..عشان كده هم اكبر طابور خامس.ز كان بيشتغل ضد الحكومات.. و الغريبة الحكومات من شدة ما حاقرة بيهم.. ما جايبة ليهم خبر..و اتحدى أي جهاز امن قبال انقلابي (و على مر تأريخ السودان) انو كان عارف خطورة ناس المرايس في البلد..و عشان نكون واضحين يا شباب .. ناس المرايس ديل اصلوا ما ممكن تحاربهم بقانون التحريم.. لكن ممكن تاكل راسهم..و تسويهم ايجابيين و منتجين..و الحتة دي انا عندي ليها خطة جاهزة..
الأوربيين .زي اليهود.. قصة فكرة تجيب قروش دي هم طوالي فيها..و الكلام عجبهم..و قبضت نصيبي (نصيب القائد في الغنائم)..و ختيت نصيب الشعب في حتة مأمونة..و الباقي استغليناهو في تمويل المشروع..
كبر (الصفة الرسمية في مكان ما ، فوق)..
09-01-2011, 10:51 AM
Kabar Kabar
تاريخ التسجيل: 11-26-2002
مجموع المشاركات: 18537
اها الصينين.. برضك اتكلمت معاهم..و زي الأمريكان وريتهم انو مشكلة البترول و استعراض القوة و البلطجة الدولية بقت ما جايبة حقها..و انتو عندكم مشكلة كبيرة.. و انتو ما عارفين ليها حل..و هي مشكلة الإنفجار السكاني..و سويتو الكتير ما قدرتو عليها.. من تعقيم الرجال.. لغاية افتعال الزلازل و الرياح و الأعاصير..و برضو انتو قاعدين اكتر ناس على وجه الأرض..
اها قلت ليهم.. تعالوا جيبوا ربع مليار من ناسكم ديل و خلوهم يزرعوا جرجير و ياكلوهو زي الشعب السوداني..و تاني ما حي يلدوا تب.. (طبعا الصينين مرة سألوني :و قالوا لي الشعب السوداني في قلب افريقيا..و عندو وطاة حدادي مدادي..و الأفارقة مشهورين بالقوة الجنسية..لكن برضو الشعب شوية قياسا بحجم مساحة السودان.. السبب شنو؟.. قلت ليهم لأنو قاعدين ناكل جرجير عشان كده محافظين على التوازن السكاني..و المكنة دي شالت فيهم.. و برضو ما يجيني واحد بعدين يقول لي الرئيس الكضاب.. و اخير الواحد يوريكم كضبوا قبل الإنقلاب..ولا اخير يفضل يغش فيكم لغاية القيام العصر؟)..
اها الصينين قالوا لي.. يا مستر محمد نور كبر.. ما عندنا قروش ليك.. قلت ليهم داير هدوم.. جلاليب.. طرح.. تياب..و قلت ليهم الهدوم تدخلوا لي فيها رقائق معينة ح اديكم ليها في وكتها..و المسألة دي البشرية ح تحفظها ليكم ..و التأريخ ح يشهد انكم اكتر عبقرية من الأمريكان..و انا شايفكم هسع احتليتوا العالم بالكربي..و مافي زول جايب ليكم خبر.. اها القصة دي عجبتهم و خوفتهم.. عجبتهم لأنو في زول ممكن يشهد ليهم بأنهم اكثر عبقرية من الأمريكان و الأوروبيين..و خوفتهم.. لأنو اكتشفوا انو في زول كشف نومتهم ..و اتفقنا..
كبر (طبعا بيكون بقى معروف ، دي الوكتي..)
09-01-2011, 10:57 AM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
نقف كتف لكتف و خطوة حزو الخطوة مع القص كبر صاحب الصفة الموجودة فى اول مداخلة و يتم تاكيدها في كل مداخلة ... قف ... نحنا معكم قف .. تقدم و لا نامت اعين الجبناء .
مخلصكم سفيان
09-01-2011, 11:08 AM
Kabar Kabar
تاريخ التسجيل: 11-26-2002
مجموع المشاركات: 18537
اها مشيت برضك لناس الشرق الأوسط..و العالم الإسلامي..و لقيتهم كل الممكن يقدموهو لي و لمشروعي.. لا يتعدى الحكي..و الشعر..و الردحي..و السكلي..و عرفت انهم ناس عايشين في الماضي البعيد.. و دايما شغالين بمبدأ (انت لو فكرت تذكر غرامك .ز تبكي ماضيك البعيد)..اما العايش منهم في الحاضر.. فده طوالي ممكن يبيعك لسلطات الخرطوم زي الماحاصل شئ.. لأن تغيير زي ده نهائي ما بيسمحوا بيهو يتم في المنطقة.. عشان كده انا رميت طوبتهم..و مشيت اتفاهمت مع الشجر الكبار الفيهو الصمغ..
كبر (قائد الإنقلاب اياهو..بلا ربيع عرب بلا بتيخ معاكم..)
09-01-2011, 11:14 AM
Kabar Kabar
تاريخ التسجيل: 11-26-2002
مجموع المشاركات: 18537
أما الإخوة الأفارقة.. كل همهم انو ما اتكلم عن شرعية الحكومات القاعدة..و اكتر من كده دايريني اظبط ليهم امورهم مع الأمريكان و الأوربيين و الصينين.. اهل قلت ليهم انتو عندكم جاكة بتاعة انكم كلكم متفقين ما تعترفوا بانقلاب عسكري في افريقيا؟.. قالوا لي.. الواضح ما فاضح اتصلح معانا ح نتصلح معاك..!!..طبعا عرفت البير و غطاها..
الأثيوبيين قلت ليهم ح نفتح ليكم سعد قشرة في ايتها مدينة..و الحلة الجنبو حقتكم ( و انت قايلين الأربعة الف المشوا ابيي دي وقعوا من السما يعني؟..).. ناس جنوب افريقيا.. قلت ليهم كل مواطن في السودان ح نصرف ليهو موبايل.. النيجيرين قلت ليهم..كل راس شهر ح نرسل ليكم فنانات سودانيات بقدر عدد المقاطعات في نيجيريا ( لكن كما ما تقصروا في النقاطة ، اوع يا المدعو سجيمان تقعد تنبذ الشريف. لأنو كده ح تدخل في ضرب مصالح الدولة العليا..!!).. ناس الكنغو قالوا لي شوف لينا صرفة مع سوق الماس..و اتفقت ليهم مع بيوتات خبرة في الهند (طبعا صناعة الماس في افريقيا ما عندها فكرة عن الإكتشاف ده)..و قلت ليهم في كل حباية ماس تدوني دولار..ناس الجمهورية العربية الديموقراطية الصحراوية ( بتاعة البولساريو ديك) قلت ليهم ح اعترف بيكم كدولة..اما ناس موريتانيا ..فديل قلت ليهم ح نرسل ليكم ناس من قناة النيل الأزرق عشان يعلموكم كيف تعملوا برنامج (نجوم الغد)..باقي الإخوة الأفارقة.. الكلمة الطيبة..و الإبتسامات اياها..و اكلت ليكم روؤسهم زي الترتيب..!!. كل الأفارقة قالوا لي اول ما المزيكا تدق.. طوالي ح نعترف بيك و بي نظامك..ياخي واحدين حلفوا لي طلاق (مع انو كتير منهم ما عندو قيمة طلاق)..و قالوا..قبال ديك الصباح يعوعي..ح نعترف بنظامك و حكومتك..!!
كبر ( قائد الإنقلاب المرتقب ..رغم انف المؤتمرين الوطني و الشعبي و الحركة الشعبية ، أما الطائفيه فدعوها تنام.. مذنب من ايقظها)...
09-01-2011, 11:30 AM
باسط المكي باسط المكي
تاريخ التسجيل: 01-14-2009
مجموع المشاركات: 5473
نقف كتف لكتف و خطوة حزو الخطوة مع القص كبر صاحب الصفة الموجودة فى اول مداخلة و يتم تاكيدها في كل مداخلة ... قف ... نحنا معكم قف .. تقدم و لا نامت اعين الجبناء .
مخلصكم سفيان
عليكم الله يا اهلنا ، الشعب السوداني ده نصيح؟
ياخي اللحظة انقلاب..و احتمال يكون دموي عديل.. يجيك واحد متقاطع؟
المهم.. بعد خلع الروح الإنقلابية اياها.. يا سفيان .. تحياتي للـقـُصة هبة..و ربنا يبلاها بالعافية يا اخي..! الحكي دي قديم يا سفيان.. و بيني بينك فكرتو اتخمرت ايام غزو العدل و المساواة لأمدرمان.. لكني كنت متحفظ عليهو..و صباح الأمس قريت فتاوي احمد ضحية ( المطاليق) و اكتشفت انها اول عمل سوداني مكتوب بعد الإنفصال ( طبعا احمد ضحية ما ح يسمع بالشمار ده لغاية ما نمشي بي هناك)..و قام علينا الزار اياه و قعدنا نقلب في الدفاتر القديمة..ثم قررنا في لحظة انفعال هذه البرية الهلام (برية من براية).. ما عارف يا سفيان عمري ما لاقيت المدعو احمد ضحية..و قاعد اقرى أي نقة متاحة قام عملها.. لكن قاعد يذكرني بشخصيات و محلات عجيبة خلاس.. منهم اعمامك طيبي الذكر الزاكي طمل.. و حمدان ابو عنجة..!! اها سفيان.. لو قلت ليك عنجة بت السلطان اياها كانت حايمة في كراكير الصبي و الفرشاية.. قطع شك ح تقول لي لأ.. اخير ارجع لي شيخي المدعو ابكر ادم ( بالمناسبة هو طيب و كويس..لكنو مشدوه بطريقة ما).. و عشان نكون ناس طيبين ساكت يا سفيان.. ياخي كتر خيرك على المرور ..و اتضامن ساكت.. الحبة ما بتجيك..و الخوف بعد شوية التضامن يمرق في اخونا صلاح جادات..!!!
كل سنة و انت طيب يا سفيان
* حاشية خاصة بالأستاذة هبة الماحي: قـُص.. بلغة النوبة النمانج تعني يا فردة..أو يا اخ..و يقابلها مفهوم أونكيرا..و هي تعني يا بتنا أو يا صديقتنا..انتى الوداكي للناس ديل شنو..؟!!
و دمتم.. كبر
09-01-2011, 12:05 PM
Kabar Kabar
تاريخ التسجيل: 11-26-2002
مجموع المشاركات: 18537
الحيبيب كل عام وانت بخير كدي اصبر شوية وبعداك فكر في الفكرة دي لانو لو دققت السمع بتسمع طقطقن العرش الفي طريقه للزوال
صديقي باسط..حبابك كل سنة و انت طيب.. طبعا في شخصك احي اشخاص ياخي.. المقابل.. الفاتح ميرغني.. يحي عبد الكريم..و اخرين و اخريات كثر..! يا اخوي .. اهلنا بيقولوا ( الجيعان فورة البرمة ليهو قاسية).. باقي ليك نصبر لمتين يا باسط يا اخي؟ يازل الراكوبة السوس اكل مرقها تب.. براها بقت تتراقص.. يعني بقت على انقلابي؟.. على بالحلال يا باسط.. النيل يبقى بنزين..و اخر عود كبريت معاي..و عينك ما تشوف الإ النور و النار معا..!! المهم.. اخر الزمان يا باسط.. نستمتع بالجراري من خماس..(ما ادس عليك يا اخوي ماغصني انشراح الأنتلجنسيا باغنية اندريا التي ادتها الفنانة ناسي عجاج..و الجمال البري مكشوح على قفا من يشيل)..!! و بالجراري من دار سافل ( محل الحكامة القالت: ليبيا ان شاء الله تعقري و تعدمي الشيك الخدري)..و ناس الفاتح ميرغني لسع مشغولين بضبط المعادلة اياها؟.. كتر خيرك يا باسط.. و عيدك سعيد و بخيت يا اخي.. كبر
كبر
09-25-2011, 03:41 PM
احمد ضحية احمد ضحية
تاريخ التسجيل: 02-24-2004
مجموع المشاركات: 1877
كل عام وانتم بخير كبر والله بوست في منتهى الظرف، عيدية حقيقية طلب صغير: ما تنسى تورينا نتائج المشاروات بخصوص الإنقلاب مع الاحزاب والتجمعات بالداخل (طبعا لو شاورتهم)، عاوزين نشوف الصورة الكاركاتورية الساخرة عن طريقة تفكير الناس ديل، وهلمجرا، وحضرنا ولم نجدكم و ذات رسالة خالدة واصحاب النظرات، وتنظيم قح من مبدا القحة ولا صمة الخشم
09-01-2011, 12:43 PM
Kabar Kabar
تاريخ التسجيل: 11-26-2002
مجموع المشاركات: 18537
بعيدا عن روحي الإنقلابية اياها، فقد كنت دوما استغل تكنولوجيا التواصل اياها..و كنت ارى أن المزيكا هي المدخل المناسب للتفرج على شعوب افريقيا ..و اجراء المقاربات بينها من جيبوتي و الصومال شرقا.. لغاية جزر الراس الأخضر غربا.. و تفرجت على منجزات حليمة الصومالية.. و محمد نور في تشاد..لغاية سيزاريا ايفوري..و انا الذي اطرب لأشجان عثمان الشفيع..و بكائيات ابراهيم عوض..و الحميمات عند العاقب محمد حسن..و الجمال عند محمد عبد الله..و عبد الوهاب الصادق..و اشجان دار فلاح..و محمد احمد عوض.. و صديق الكحلاوي..و الجنون المبدع عند بادي محمد الطيب.. و خضر بشير..و النور جيلاني..و عبد الله البعيو ( الأربعة الأخيرين اعتبرهم اكثر فناني السودان تواصلا مع الجمهور.. و لهم كيماء خاصة)..و غيرهم من مبدعي الوهم المسمى جمهورية السودان.. هنا نموذج من الغناء في مورتاينا..و انطباعي عنهم انهم اكثر شعب افريقي غير جاد في مسالة المزيكا و الغناء..و حينما قلت في منفستو انقلابي أن المورتانيين يحتاجون ان ادعمهم في مجال برنامج نجوم الغد.. فغد كنت محقا..و هم اكثر شعوب افريقيا جوباكا و طربقة.. خلوا عنكم قصائد سفيرنا في بريطانيا عبد الله الأزرق..و قصائده المشهورة عن الناها اياها.. صحيح يا عبد الله الأزرق بناتهم سمحات و يكسرن الما بتكسر .. لكن ما عندهم التكتح في مجال الإبداع الموسيقي..و ان كان الشعب السوداني بعضه مكسر في العروبة.. فالمورتانيين.. اكثر ضياعا.. في الحالتين هم ضايعين.. و اليكم المغنية.. زهرة بت أبا سيمالي ( و يا حسين خوجلي انا ادعي اني افهم لهجة الشناقيط اكثر منك و من اي متنطع عروبة في الوهم المسى جمهورية السودان..!)
اتذكر غضبة جعفر عباس..و نوبيين و نوبيات كثر..منهم زميلة البورد بت ابا عزاز شامي.. على مجانفة الحديث التي ادلى بها صديقنا و استاذنا حسين خوجلي في ذات غفلة من الزمان..و لو كنت املك امرا على حسين خوجلي لألحقته بدار شنقيط.. عشان يعرف الكوجان القدر سم عشاهو..!!
اتمنى أن يتفرج حسين خوجلي على هذه المادة و التعليق المصاحب.. عسى و لعل أن يفهم أن (الماعارف يقول عدس)..!! و لو كنت قادر على التمنى,..لتمنيت ان يقرأ هذه الخاطرة شابات و شباب كثر.. منهم المدعو محسن خالد..و المدعو محمد حسبو..و المدعو حسن موسى..!
و حينما نتكسر في اصالة مزيكا جمهورية مالي. فلنا اسبابنا..و مبرراتنا..!!!
و الإنقلاب مستمر يا اهلنا..,
كبر
09-01-2011, 12:53 PM
Kabar Kabar
تاريخ التسجيل: 11-26-2002
مجموع المشاركات: 18537
أهـا غرضك دا خلينا نتونس معاك فيه لمن نلقى نفسنا في المجلس الإنقالي يا لدولة السودان يا دولة غرب السودان.
بحيراوي
صديقي العزيز.. البحيراوي.. حبابك..و عيدك سعيد و بخيت يا عبد الله يا اخي.. و بعد.. الحكومة يا قريبي دواسها هين تب.. لكن المحنة في المسمى طيب الذكر الشعب السوداني.. ياخي العالم ي راقدة رز تب..! ما عندي غرض تب يا ول ابا..و فراش الخلق اولى بيهو بنات ابا في ابوجبهة..و الدبكر..و خماس..و تبلدية ام عشوش قبل الحاجز يا البحيراوي.. يا اخوي دي بلد السكات عندها بقى فريضة غايبة. باقي ليك بتتريس يا البحيراوي؟.. وزي ما قلت لسفيان اعلاه.. هي نقة قديمة شوية.. لكن قلنا نطرحها هنا..عسى و لعل.. كتر خيرك يا البحيراوي... و نشوفك طوالي يا اخي..
كبر
09-01-2011, 01:29 PM
Kabar Kabar
تاريخ التسجيل: 11-26-2002
مجموع المشاركات: 18537
Quote: كل عام وانتم بخير كبر والله بوست في منتهى الظرف، عيدية حقيقية طلب صغير: ما تنسى تورينا نتائج المشاروات بخصوص الإنقلاب مع الاحزاب والتجمعات بالداخل (طبعا لو شاورتهم)، عاوزين نشوف الصورة الكاركاتورية الساخرة عن طريقة تفكير الناس ديل، وهلمجرا، وحضرنا ولم نجدكم و ذات رسالة خالدة واصحاب النظرات، وتنظيم قح من مبدا القحة ولا صمة الخشم
بركات.. حبابك يا صديق كل سنة و انت طيب يا اخي..و عيد الحول ما يغضب زول..
و بعد.. كده يا اخي ح تجيب لينا الهوا في صمة خشمنا..و لكن..!
احبابنا ناس (ذات رسالة خالدة).. يا اخوي ديل ، يبقوا معانا ولا يلحقوا قريبك بشار الأسد في سوريا ( شفت الوجعة كيف يا بركات؟.. البعث العربي الإشتراكي ، تمانية و اربعين سنة حكم في سوريا.. ده غير الفكة بتاعة طيب الذكر صدام حسين..و ناس معاوية ولد سيدي الطايع الجبناهم فوق ديل..عرفت ليه عبد الله الأزرق..و عبد الله التوم ..و خالد المبارك (ناس السفارة السودانية في بريطانيا) في ذات نفسو كبو الجرسة؟..ياخي انا شخصيا مع الناها.زشناقيط..بعث عربي اشتراكي..جن احمر..مش مهم..!!).!!
اما احبابنا ناس (حضرنا و لم نجدكم)..ياخي ديل الإ كن يتحاجو في طيبي الذكر شافييز بتاع فنزويلا ( باقي قريبك بتاع كوبا..المدعو كاسترو.. قالوا احتمال السنة دي يحج و يلحق ناس عمك السديس في الحرم الشريف..ياخي ناس تقول ليهم الناس بتعاني و يقولوا ليك الحج اولي؟..ان شاء الله شباك ابو فاطني ينفعهم في اخرتهم..!!)..
احبابنا ناس ( هلم جرا) ياخي ديل فيهم قوة عين واحدة..ياخي مرقوها ليك في جوبا البحير..و عشان شنو؟ ( عشان باقان وول ابا لوكا بيوينق.. يدخلوا في تشكيلة الحكومة هناك.. في جمهورية جنوب السودان..؟.. شفت حقارة مندكورو السودان دي كيف؟.. عليك الله يا بركات مش يا ها دي .. الغلبها نضافة بيتها مشت تنضف بيت الجيران؟..و مش ياهو ده المدعو التدخل في الشئون الداخلية لشئون دولة اجنبية؟!!)..
اخونا طيب الذكر العطر ابو هاشم البحر العاشم.. ياخي تورين اسودين من المدعو الطيب مصطفى..و عليهم رز فلبيني..و عينك ما تشوف الإ النور يا بركات,..!!
باقي الجماهير.. مالك عليها ياخي؟ خليهم في نومهم.. لمن انقلابنا يتم..!!..مالك يعني: حاسد ولا بغران؟
النجيضة: يا اخو ناسك ديل كلهم ، أنا رامي طوبتهم؟؟!!!
و دمتم.. كبر (قايد البتاع ذاتو يا اخي..!!)..
09-01-2011, 01:40 PM
Kabar Kabar
تاريخ التسجيل: 11-26-2002
مجموع المشاركات: 18537
4. نرجع للمقدرات السودانية المية المية..و الممكن تساهم في انجاح الإنقلاب ده..طبعا كلمتكم باني درست الشخصية السودانية كويس ..و معروف في فقه الإنقلابات انو أي انقلاب بعتمد على عنصرين اساسيين: العنصر البشري..و عنصر المباغتة.. و الحتة دي أنا ضربت فيها عصفورين بحجر واحد..و الله شاهد..
طبعا الإنقلاب ده يا شباب.. ح يعتمد على الجكسي في تنفيذه (بعدين ما في واحد يجي شايل دقنو و يفتي لي ما أفلح قوم ولوا امرهم الى امرأة..)..طيب ليه الجكسي؟ في دراستي للمجتمع السوداني و الشخصية السودانية.. اكتشفت انو الجكسي ده مهمش جنس تهميش.. يازول الإنقلاب الفاشل قايمين بيهو رجال..الإنقلاب الناجح قايمين بيهو رجال.. البيفطسوا في الإنقلابات رجال..و البنجحوا رجال..يازول الجكسي السوداني خطاني ليك في مطب ضيق..و قال لي: ياخي العلم لمن ازهري نزلوا مافي ولاحدة من حبوباتنا كانت قاعدة جنبو.. شفتو الغبن ده كيف يا سادة؟..
اها الجكسي السوداني واصل لقناعة.. انو كل الحروبات و الإنقلابات في السودان..و المآسي.زو المجاعات.. و تزوير الإنتخابات الفاشلة.. سببها الرجل السوداني..و قد اثبت الرجل السوداني فشله الذريع.. لدرجة في واحدة جكسية فكرت تكتب ليها كتاب و تسميه: الرجل السوداني و ادمان الفشل..
اها العامل ده انا استفدت منو كويس..و قلت ليهم تعالوا شاركوا معاي في انقلابي ده..و رحبوا بالفكرة ترحيب شديد..
كبر
(سعادة القايد المفدى اياهاه). باقي النقة ح نتمها في وقت لاحق.. غايتو ناس الحيكومة شوف عيني .. جنس كبكبة..و ما ادس عليكم الإتصاللات حصلت من رموز في الدولة الحالية.. لكن علي بالحلال ما اتفاهم معاهم.. انقلاب لأنقلاب فرقو شنو يعني؟..ولا حقارة يعني؟..
09-09-2011, 09:34 AM
Kabar Kabar
تاريخ التسجيل: 11-26-2002
مجموع المشاركات: 18537
رشا.. حبابك كتر خيرك على المجازفة و المرور من هنا (العالم كلها قاعدة تتلفت و زايغة).. طلباتك اوامر..نديك كنبات و سفارات..بس اوع تقربي من مجلس قيادة الإنقلاب..لأنو ده امرو اتحسم من بدري..
شكرا يا رشا..
كبر
09-17-2011, 06:16 AM
Kabar Kabar
تاريخ التسجيل: 11-26-2002
مجموع المشاركات: 18537
وصلتنا رسائل عديدة من بعض الديكتاتورين الأفارقة..بعضهم يترجانا تأجيل الموضوع لسنوات قادمة.. و بعضهم..حلف طلاق.. انو الإصلاح جاري على قدم و ساق..و انو القصة ما حتاجة تعب جديد..!
رفعنا الأمر لمجلس القيادة (كل جكس)..و قالوا..نساء افريقيا كلهن منتظرات هذه التجربة على احر من الجمر..و مافي طريقة للزوغان..!!
و القصة مستمرة..و الما عاجبو يطلع بره..!
كبر (قايد الإنقلاب)..
09-25-2011, 08:59 PM
ادم الهلباوى ادم الهلباوى
تاريخ التسجيل: 06-27-2004
مجموع المشاركات: 9291
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
سفيان بشير نابرى
باسط المكي
احمد ضحية
البحيراوي
رشا احمد
ادم الهلباوى
فيس بوك
تويتر
انستقرام
يوتيوب
بنتيريست