|
|
 يا تلفزيون السودان .. القصة دي حدها وين ؟
|
- ضيف او ضيوف + فنان.
- تقليد لبرامج اميركان ايدول و نجم الخليج و ..الخ بلا خجلة.
- فنانيين بغنوا في اغاني حقيبة.
- سياسيين (مُعارضين) بجتروا في تاريخ ثر من حكمة و شجاعة السوداني بلا خجلة.
- سياسيين الانقاذ و المؤتمر الوطني بتكلموا عن سودان غني و مالك قرارو بلا خجلة.
القصة دي حدها وين يا ناس التلفزيون ؟
يا ناس إعداد البرامج , الحاصل شنو ؟
هل ده شُح وضعف افكار ام سياسة ممنهجة من إدارات التلفزيون؟
يا ادارة تلفزيون السودان ممكن تختونا في الصورة شوية؟
ليه غنا طوالي ؟
وليه غنا قديم مكرر ؟
وليه مافي غنا جديد ؟
وليه مافي جمهور في الاستوديو مع السياسيين البجوا ينظروا بلا خجلة ديل.
وليه الصورة بتاعت التلفزيون باهتة و المونتاج في عمومو سئ جدا رغم (الطفرة النوعية) البشرتونا بيها زمان؟
|
|
  
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: خدر)
|
كل سنة وانت طيب يا خدر يا فنان
إنت البوديك تفتح تلفزيون السودان شنو
| Quote: كل عيد , نفس طريقة البرامج نفس الاستوديو مع تغيير طفيف في الديكور و إختلاف الضيوف |
ومذيعين بيتكلموا اكتر من الضيف
وما بيدوا فرصة كله كله للضيف
والعجب لمن يكونوا مذيعين اثنين مقابل ضيف واحد
ياخي ديل بيتكلموا بي صفاقة
وبراييين بي كلام ما مفيد(اريتو بي فايدة)
بيضيوعوا للمشاهدة فرصة الاستفادة من كلام الضيف اللي هم جايبنه
وبالتالي بيضيع الهدف والغرض من استضافته
في رمضان وقبل كم يوم
بقلب في القنوات
بــ(الغلط) فتحت تلفزيون السودان
فلقيت في واحدة من فقرات البرنامج المفتوح (بعد شراب الموية)
مذيع ومذيعة مستضيفين دكتور اماراتي متخصص في (اعتقد عمليات القلب وووو)
طريقة كلامهم ما حلوة
بالاضافة لكلامهم اكتر من الضيف اللي المفروض جايبته يحكي ويتكلم
بل ومقاطعته بصورة س م جة
التلفزيون يحتاج لتغيير شااااامل ولاعادة تقييم من ناحية برامج وسياسات
وياريت يبدوها من فوووق
بانو يشيلوا حاتم محمد سليمان دا بره
وكمان المذيعيات ديل يقللوا من البدره والميك اب الضاربنه في وشيهن
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: سفيان بشير نابرى)
|
ما عندي النيل الازرق و الشروق و زول و باقي القنوات يا ميادة
جاري حيتطو قافلة لي الاتجاة بتاع عربسات 
يا نابري
إفطار 31 كان امس ياخي
ضبحنا الخروف كرامة وصول الوالد و الوالدة
و الضيوف ماشاء الله جونا و شرفونا
لكن يعميني ما شفت بوردابي و بالذات محمد حسن ابو فاخورة بتاع الاشاعات
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: خدر)
|
| Quote: لكن يعميني ما شفت بوردابي و بالذات محمد حسن ابو فاخورة بتاع الاشاعات |
ما قلت ليك جاني فجعةً كدا.... وجع ركبة في يدي الشمال.
ياخي
___
بالنسبة لموضوع البوست
مش دا مشروع تلفزيون (المشروع الحضاري)
وتيب !!
هل يلد القط الأسود غير قط أسود؟
علي رأي المثل يعني.
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: وليد محمد المبارك)
|
كل سنه وانت طيب يا خدر
الغنا حلو وفوق راسنا من فوق .. لكن في تلفزيون السودان الغنا مرض
غنيه والتانيه وبعدها برنامج غنا والفاصل اغاني وكذلك الدعايات ..
هو في السودان مافي زول بعرف يعمل حاجه تانيه غير الغناء .. دا جل اهتمام الشعب السوداني ؟
وكويس انو ما عندكم قناة زول لانها بتجلط مره واحده من بعض الاشكال البتغني هناك
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: باسط المكي)
|
الأخ خدر,
الأخت ميادة كمال ( والتى نادرا ما اتفق معها لكن فى دى بأتفق معاها) كتبت الآتى :
| Quote: بل ومقاطعته بصورة س م ج ه |
الغريب فى الأمر ياخدر لو متابع اذاعة البى بى سى العربية وبعد ان غادرها وهجرها فطاحلة المذيعين وتربع على ادارتها حسام السكرى وانتشار العنصر المصرى بين جدرانها , تلاحظ نفس الأداء الركيك لمذيعيها مع ضعف واضح فى الثقافة ولاحظ للطريقة السخيفة التى يقاطعون بها ضيوفهم ومراسليهم.... ومن هنا يبدو لى ان مذيعينا ومذيعاتنا فى الراديو والتلفزيون وهم يستمعون للبى بى سى يعتقدون ان ذلك الأمر هو من فنون الأداء الأذاعى والتلفزيونى, معتقدين خطأ ان البى بى سى مازالت هى المدرسة.... ولكن دوام الحال من المحال وانا لله وانا اليه راجعون .
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: قلقو)
|
باسط كل سنة وانت طيب يا فنان
و تشكر علي التهاني يا سيدي , الحمدلله السنة دي رمضانا و عيدنا باسطة
اريتك طيب يا فنان
سلامات يا قلقو و عيدك سعيد يا فنان
في حال إنعدام او شح مواكبة الدراسات و آخر وسائل و مناهج العمل الاعلامي ببقي الهادي و الضابط الإجتهاد الفرد و ده المزعج. غياب الكورسات و الدوريات في تقديري هي من اهم العوامل البتقود مقدمي برامجنا للإجتهاد و الإقتداء بمذيعي البي بي سي . موضوع اللغة ده مزعج بالمناسبة لانو معظم مذيعينا بديرو حواراتهم بلغة مُقعرة و غريبة جدا و ده في تقديري جايي من لغة رموز المؤتمر الوطني و قيادتو , اللغة الغريبة بتاعت الرجالة الشابكننا بيها ناس الانقاذ ديل من ما جو , ياخي نحن شعب فنان و عاطفي قبل ما نكون فرسان و الفارس ذاتو في تراثنا العربي و الافريقي لو ما بقي عاشق و رهيف فراستو ناقصة. قعدوا يقعروا لينا في اللغة لحدي ما قلدنا الفنان السعودي ناصر القصبي و كان نقد جيد منو لينا لكن للاسف نحن بعدائية قابلنا النقد ده بالامتعاض و الهجوم عليهو.
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: الوليد عمر)
|
يا خدر
باقى القنوات برضو احمد وحاج احمد
نفس اللقاءات
واغنى الحقيبة نفسها
ودخلوها وصقيرا حام
اسهل حاجة فى السودان تبقى مذيع
وتفسح ليك ساعات طوال ودون موهبة او ثقافة او قدرة على ادارة الحوار
وبالمناسبة دى داير ارسل تحية لفلان
انا ما عارف الجملة دى لو شالوها تانى يقولو شنو
الاستثناء الوحيد
كان برنامج شرحبيل الغنو فيهو اولادو كان ظريف
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: Dalal Ezzaldin)
|
دلال عيدك سعيد يا ستنا
يا اختي والله مغسة الغنا البملوا بيهو ساعات البث قاطعة قلبي
وده في رأئي ضعف خيال , مافي اعلامي عندو خيال ينتج برامج تجذب المشاهد بدون مشاركة المزيكة و حتي المزيكة ذاتها بعرضوها بشكل مزعج و ما بحترم الموسيقي ولا الموسيقيين , مثلا المقطوعات الموسيقية شكل ثابت بتكون في حديقة واحد من الفلل الجميلة و لحدي اسه انا ما قادر افهم ليه البراس سيكشن بختوهو في البلكونة ؟
التلفزيون محتاج لي اعلاميين عندهم خيال
_____
لا اقلل من شأن الاعلاميين (لا سامح الله) قدرما استفز قدراتهم التي اعرف ليخرجوا لنا ابداعاتهم
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: وليد محمد المبارك)
|
يا ولي عيدك سعيد يا صاحب
عارف المشكلة موش في قدرة الضيف , انا البوست علي الاطلاق ما مستهدف بيهو الضيف لانو الضيف مُختار المشكل في الادارة سواء كانت تقديم او اخراج او اعداد او مونتاج .. حسب دراستي لمجال الاعلام و الاوديوفيشوال, علاج الحلقات الضعيفه في البرامج ذات الطابع الحواري بكون في المونتاج يعني ما بالضرورة انك تورد الحوار كامل , مقص المونتاج بعالج كل اللقات الضعيفة. الفرمالات دي يا صاحب ضعف إعداد و كلفتة و سرقة ساعات من زمن المشاهد بحجة قصور الامكانيات مع انو الموضوع كلو إعداد و تجهيز و تحضير جيد.
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: خدر)
|
| Quote: كان برنامج شرحبيل الغنو فيهو اولادو كان ظريف |
اها دى بالذات انا ما حضرتها السنة دى لكن دا مشهد مكرر فى كل عيد
شرحبيل واسرتو .. من الحاجات الممكن الواحد شاهدها على مدار العشرين سنة الماضية فى كل عيد !!!
بالمناسبة شرحبيل عملاق لكن السؤال هو ليه يقدموه دائما فى العيد ؟؟ بصورة رتيبة جدا
أها السنة دى ما قدمو بتاع توتى داك ؟؟
انقرو اسمو منو ؟؟
هم اتنين واحد اولو حمد الريح ولمن ما يجيبوهو فى عيد بيجيبو بتاع توتى البشيل المندلين وصوتو رقييق داك
_______
ناس التلفزيون عندهم موهبة لازم نعترف بيها عشان ما نكون نكارين جميل .. موهبتهم الوحيدة هى تشويه الاشياء مهما كانت جميلة
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: زياد جعفر عبدالله)
|
قناة جديدة يا طارق
ممكن تتعمل قناة سودانية جديدة
قبيلة المبدعين السودانين ما قادرة تعمل قناة
دي المساهمة الاساسية ما شايف ود الباوقة مبرطع كيف في المنبر
فرحان بسيطرتهم هلي كل القنوات
اتشدعوا كده واعملوا قناة انتو و نحن ما ساهلين
وبعداك الحال بتصلح بس نحن هسي برغم السماجة ما عندنا طريقة غير نشاهد ما يعرض
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: abdelrahim abayazid)
|
عالم مغرضة ......
جنس نضميكم ده، طوالي بيذكرني حلقة برنامج شفتها قبل عدد من السنين (ما حأقول كم) .. مقدّم البرنامج حسين خوجلي، كان ضيوفه مذيعين قدااام من إذاعة أمدرمان.
مارس حسين خوجلي عادتو في الإستحواذ على زمن البرنامج في الكلام، يتحفنا بآرائه ويحكي تجاربه. سأل أحد المذيعية (أظنه ذو النون على ما أذكر)، وقبل أن يبدأ الإجابة قاطعه. سألو السؤال التاني، وبرضو قاطعه والراجل يسكت بكل أدب. لما سأل السؤال التالت، بمجرّد ما قاطعو قال ليهو الضيف: ياخ إنت مش سألتني؟ ما تخليني أجاوب.
قررت أخجل ليهو ........ لأنو وحاتكم ما خجل. :) :)
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: محمد أبوالعزائم أبوالريش)
|
Quote:
جنس نضميكم ده، طوالي بيذكرني حلقة برنامج شفتها قبل عدد من السنين (ما حأقول كم) .. مقدّم البرنامج حسين خوجلي، كان ضيوفه مذيعين قدااام من إذاعة أمدرمان.
مارس حسين خوجلي عادتو في الإستحواذ على زمن البرنامج في الكلام، يتحفنا بآرائه ويحكي تجاربه. سأل أحد المذيعية (أظنه ذو النون على ما أذكر)، وقبل أن يبدأ الإجابة قاطعه. سألو السؤال التاني، وبرضو قاطعه والراجل يسكت بكل أدب. لما سأل السؤال التالت، بمجرّد ما قاطعو قال ليهو الضيف: ياخ إنت مش سألتني؟ ما تخليني أجاوب.
قررت أخجل ليهو ........ لأنو وحاتكم ما خجل. :) :) |
إي بتذكر الكلام دا كان في نهاية :):)98
صاح يا محمد ؟
سنتك سعيده
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: خدر)
|
صاح يا ودالعجمى
شرحبيل من اللقاءات الثابتة فى الاعياد لكن كان ظريف
طبعا مشكلة التكرار دى حاجة واضحة جدا وتدل على غياب روح الابتكار والتجديد والجرأة
من الاسماء المحفوظة فى الاعياد
محمود
الجقر
التجانى حاج موسى
مختار دفع الله لكن السنة دى قالو حصل ليهو حادث
مجموعة فرق النكات البايخة والعنصرية والمكررة
الشباب ديل كلهم بقو نجوم
وتعال شوف القندفة والاهميات والحديث فى اى موضوع دون معرفة
الله يرحم ناس بلبل وخليل شطيطة
زمان كانو بيقولو نكت ويعملو منلوجات جميلة دون اى ادعاء ونجومية
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: mohmmed said ahmed)
|
لا حولتن
العجب ياخدر البرنامج مع الرجال البلهاء الإسمهم رؤساء التحرير ديل
في النيل الأزرق وأنا قاعد مسمر عشان أطلع لي بحاجة مفيدة
وحاتك ولا التكتح
ياخ
هطل المطر بطريقة عجيبة
خصوصاً الإسمو راشد عبد الرحيم ، معتز البلال ، والأصم
ياخي جنس هبالة ديل بقوا رؤساء تحرير كيف؟؟؟
_____ ياخي
خير لك أن تظل صامتا ويظن الآخرون أنك أبله، من أن تتكلم فتؤكد تلك الظنون.
أبراهام لنكولن
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: ALGARADABI)
|
يا قرضابي ..
باقيلك تلفزيون السودان لو كان شايف شغلو كويس كنت بتسأل سؤال زي سؤالك ده ؟ 
___
ده زبدة الكلام يا فنان , تلفزيونا القومي مفروض يهتم اصلا بالتراث ده و يوثقوا لينا في الجهات الاربع للسودان , مغنيين و مغنيات , شيوخ قبايل و ادارة اهلية , ثقافات شعوب , ظرفاء المدن و القري و حكاويهم , ..الخ ده بجانب الابديت لاخبار الاقاليم بشكل جديد و مختلف من رسائل الاقاليم البتكون كلها والي الولاية و معاونية او برامج رسائل ثقافية الكلها جبل التاكا و توتيل و الفزلكة التاريخية القاعدة في مكتبتة الاذاعة عن كسلا و حي الميرغنية من زمن علي عبداللطيف زي خطبة أمام الجامع المصر يختمها بنصرة السلطان عبدالحميد و في الالفية التالتة.
| |
|
|
|
|
|
|
|
|
|
Re: يا تلفزيون السودان .. القصة دي حدها وين ؟ (Re: خدر)
|
| Quote: ياربي المخرجين بهنضبوا الضيوف و بمنعوهم يهزوا رؤوسهم إستحسانا للاغنيات ؟ ولا الضيوف بفتكروا الطرب قلة حيا |
سلام يا خدر وعيدك مبارك,,
أذكر في التسعينات مشينا للتلفزيون في برنامج الاستاذ محمد سليمان اعتقد اسمو( من غير عنوان) كطلاب رابطة اللغة الانجليزية بكلية الاداب وكان في فنان من الدرجة الاولى معاناواول ما قعدنا في الاستديو الساخن داك,, وجات التعليمات بأنو ممنوع التصفيق والتمايل والاننفعال بحكم التوجه الرسالي..
ما ياها الهنضبه زاتها.
| |
|
|
|
|
|
|
| |
خدر
mayada kamal
ALGARADABI
سفيان بشير نابرى
محمد ادم الحسن
وليد محمد المبارك
Dalal Ezzaldin
abdelrahim abayazid
الوليد عمر
باسط المكي
قلقو
mohmmed said ahmed
omer osman
ود العجمى
زياد جعفر عبدالله
محمد أبوالعزائم أبوالريش
قيقراوي
mohmed khalail
فيس بوك
تويتر
انستقرام
يوتيوب
بنتيريست