خاتي النقة ماهي المرة الصغيرة ولا الشافعة الجاهلة.. خاتي النقة كبييييييرة إلا متجوهلة ساكت ..!!
كانت حبوبتنا حفصة تحكي للافندية الاختصاصية الاجتماعية الزائرة الحلة لعمل حالة دراسية كما قالت لكل من سألها ..
واصلت حفصة :
خاتي النقة كبيرة والقدرها بنات بناتهم عرسوهن وولدن .. هديييك نديدتها رحمة الله بت البنا الاتولدت معاها في فرِد شهر هسع بت بتها البكريـة صفيـة تقيلة واظنها في الخامس .. عِلا وقت رحمة الله اتكلم فيها ود عمها النور وعرست ومسكت بيتها وراجلها خاتي النقة اتفلهمت وقالت كايسة العلام في البندر.. العيب ماهو فيها في امها النسأ ضيعتها وتابعت كلام المِشيّرط وقالت متنضرة فوقها الا كان تعلمها ما هي عارفة انه اخر علامها بتضيع في بلد النصاري.. هسع هي ووين ورحمة الله بت البنا وين ؟ رحمة الله زينة نسوان الحلة كلهن هيبة ورزانة وعقل وولادها علام وادب ومركز فيهم الدكترة وفيهم الظبوطية وبناتها عيني باردة من يتمن الخمستاشر يتزاحن الامات من قبلي ومن بحري داخلات مارقات يشكرن في ولادهن وعينن حارية.. ورحمة الله مافي واجب ماهي قايمة فيهو وفي راسو .. وصندوقها ختتو الفين جنيه بس .. الا الصرفة حقتو مية الف خمسين مرة من الحلة واقفات وراها وكلمتها مسموعة لي عند العمدة بعمل حسابها .. ايييه بختها الله اداها سعادة الكبر .. بعد لقييط الواقود وحش السعدة وأكل مُلاح الورق غداء وعشاء ..
الله ماهو كريم
08-17-2011, 11:33 AM
HAIDER ALZAIN HAIDER ALZAIN
تاريخ التسجيل: 12-27-2007
مجموع المشاركات: 22434
اييييه يا بتي .. هي وين وخاتي النقة المسخوتة وين !! اتشوبرت قالت كايسة العلام .. لا لمت في علام ولا لمت في راجل قدرها وستتها لا لقت بيت يحفظها وآخرتها بقت مجدوعة زي الرِمة في بلاد النصاري قال ليك المسلمين الهناك من يسمعو اسم لولا الحبشية يتعوذوا من الشيطان الرجيم .. والجنبها شافعة تنفخ في اضانها بعد تسمع اسم لولا..
ايوة يا بتي لولا هي خاتي النقة .. اصلن بعد مشت البندر للعلام وجات بعد سنة كدة في إجازة صلاح ود النمير برضو بيقرأ في البندر جاء زعلان في الاجازة قبال ما تجي هي وقال لي امه بت صاحبتك النسأ قصرت رقبتي في البندر لامن نكرتها.. وقال جدعت التوب هناك وبقت تلبس زي بنات البندر وتلون وشيها .. وقال دي نكرتكم لمن سمت نفسها لولا .. ونضم كتير عن سكيعها مع الوليدات.. عِلا زول صدقوا مافي لمن جات المسخوتة نافشة شعرها إلا كان الشيطان .. وظالطة وشيها بي شنو مابعرفها علا تكون حكتو بحجر الحفحاف ومالياهو بودرة ولبسها كيف كيف عروسة مولد بس .. البت لا توب لا طرحة ماشية في الشارع شطورها مدلدلات الا كان العنزة الدّارة ..وتتفلهم وتكعوج في كريعاتها وفي نضميها واللبانة تسوى في الطق .. طرق .. شوف عيني تنفخها كدة زي البلونة غايتو انا وقت شفتها اصلي ماقلت دي امها بتكون النسأ بت فريج تشوفيها بس تقولي ابوها موظف لابس ميري مش تريبيل شغال في بابور ود النصير عامل باليومية.. البت انسختت سختة المطوفشة السجمانة هسع هي وين .!! ماتراها مرمية في بلد النصاري زي الجربانة..
داك اليوم يومنا الشربنا الجبنة مع نورة بت السعيـد وانا مارقة من عندها الا كان اشوفلك ا مها النسأ بت فريج تتلبد زي الحرامي .. بت الهِرمة مندسية من يوم بتها جات من البندر مامرقت على الحلة عينها مكسورة لا عمني سالتها من جات بنتها وسمعت كلام ود النميـر ( انتي يا النسأ صحي بتك غيرت اسمها وبقي لولا ؟؟) جاوبتني برئ يا يمة يسمها كان تغيرو .. مالها بتغير الاسم السمتو ليها حبوبتها وابوها ضبح داك يا الخروف التقول عجل .. ما غيرتو ) أكان المضبوحة ماهي عبور مشحودة كان قالت شنو ؟ سكتت خليتها قلتلها بسري باكر بيعفن وتتشم ريحتو ..
اها يوم عرس لواحظ بت مريم البنات ووقت البنات دقن وغنن - اللول اللول لولية .. بيسحروك يا لولا الحبشية - قالن ليك البنات البنية شدة ما انتفت ورقصت لمن جاها ظار .. ظيرت وهي بتكورك ( آآآي لولا الحبشية .. آآآي بيسحروك يا لولا .. آآآي المابيدوروك يا لولا .. آآآي انتي المتعلمة يا لولا .. آآآآي انتي السمحة المشهورة يا لولا ... آآآي الزيك منو بس حلاتك يا لولا .. )
غايتو يا بتي الله يسترنا في كبرنا .. اصلي ما كضبت طب قبضت ليك النسأ وهي بتتلبد ماشية على دكان ود الحغور .. ( هييي يا النسأ ماقلت لي ضبحتو خروف لي خاتي النقة .. يا هجامة يا رزّاعة خروف شنو البيضبحو التريبيل... كان ماهي عبوراً عاقر اداها ليهو ود النصير وجلدها بتلقيهو في دلوكة الشام الظيرت فيها بت لولا الحبشية ) **
الشول بت حسب الله .. حبوبتها للمسخوتة خاتي النقة السمت نفسها لولا.. داك العيد مشت الصعيد تعيد مع راجل بتها الشافوها الاسمو الباقر .. الباقر العتالي غير الخمرة ماعندو شغلة .. يقوم مع النجمة يشد كاروهو يلقط رزق وليداتو .. يجي راجع مع الغيبة شايل كيس عيشو ولحيمتو والخديرات اللقطهن .. ومعاهن قزازة السجم .. الشافوها اول ايمها العروس نضمت مع الباقر ونقت في راسو عشان يخلي السجم دا.. وقت زهج منها مسكها هبّدهاليك ديك يا الهبدة ودقاها رقدها عيش.. من يومها تاني خشمها وعندها .. يجي تسوي العشاء للوليدات ينوموا وهو يكون قاعد في الحوش فاتح الرادي وخاتي السجم قدامو ويجغم .. اول من يستوى تخت لو عشاهو ياكل وينوم ويقوم الصباح شغال تور ساقيــة بس.. اها العيد دا بيبقي ليهو التغيير الوحيد علا برضو ما بيختا فيهو السجم.. بيقولك اللحم دا البيهضمو غير موية النار دي شنو.. يومها الشول الجات ولا عمنها اول مرة تعيد في الصعيد بلعت في اللحم زين .. الشية نص استواء نفخت ليك الشول دايرة تقتلها.. وغلبها تب واتدودرت وعيونها جحصت .. وقت مرق الباقر سمع الجوطة ومرق من ديوان الرجال لقي الوليدات بيشدو في كاروهو .. : دا شنو يا جنا!! مودي الكارو دا وين؟! - داير اسوق حبوبتي الشول الشفخانة ؟ - مالها بتوديها الشفخانة - عندها نفاخ بطنها قربة بس .. وامي الشافوها رسلتني جبت لها شوية بيبسي من ناس الماذون من البيبسي الجابو ليهم ولدهم احمد من البندر عشان العيد علا برضو ما نفعها .. والشافوها قالت مافي حل الا نوديها الشفخانة - كمال الحكيم مابيفتح الشفخانة هسع يوم العيد .. بعدين النفاخ ماعندو دواء.. دواهو معاي انا نزل الكارو دا من ضهر الحـمـار واديهو موية وربطة قصب .. النمشي اشوف الشول
مشي الباقر الديوان وجاء صاد شايل قزازة السجم بتاعتو ومشي على الشول حماتو .. ازيك يا خالتي الشول ! - الله يسلمك يا الباقر .. - يا خالتي والله نفاخ اللحم دا عندو علاج واااحد اكان عاوزاهو ولا حكيم لا شئ دا علاج بلدي ومضمون - ومالو يا ولدي اديني ليهو قالوا الارضة جربت الحجر - ِعلا مُر شديد يا خالتي .. الا تسددي نخريك وتقرطعيهو مرة واحدة - ياولدي المضطر يركب الصعب
عاين الباقر لي مرتو الشافوها واداها حدرة وهي بتمد ليهو كباية الشاي الفاضية .. عباها عرقي زت ومداها للشول .. الشافوها وقالوا الضايق عضت الدبيب يخاف من مجر الحبل.. بغم ما قالتها .. بعد ما قرطعت الشول الكباية.. اتمددت ونامت ديك يا النومة ما صحت الا العِصيير .. تضحك سن سن وتتكشم كيفن ماهي مبسوطة.. وتدعي للباقر : الله يديك العافية يا الباقر يا وليدي .. الله يبارك فيك كيفن ما فشيتني وروحت مني النفاخ .. والله دواك دا كيفن ماهو ناجع الا كان اشيل تيرابو معاي البلد .. وبقت خاشة تدعي للباقر مارقة تدعي ليهو وقت الشافوها زهجت كوركت فيها.. يمة انتي عارفة السقاكي ليهو الباقر دا شنو؟ - ماهو دواء للنفاخ شنو يعني ؟ - لا يا امي دي ماهو دواء دا عرقي .. خمرة يعني .. الباقر سقاكي الخمرة
سجممممممي سجمممممي يا الباقر .. الله ما تغز فيك البركة.. الله لا تباركك تشربني الخمرة بعد شيبتي دي يا المسخوت .. شكيتك على الله .. الله يوريني فيك يا البتشربني الخمرة بعد بقيت حبوبة..
وقت الشول تعبت واخدت ليها صنة كدة .. اتبسمت واتكشمت وهي تقول للباقر : دحين يا الباقر .. انتا دي الخمرة البيقولوها ويقولوا كعبة - آآي يا خالتي الشول - والله يا الباقر ولدي .. لا هي كعبة لاشئ .. فشت لي بطني بعد اتملن لحيمات ماهي كعبة يا الباقر اشربوها اشربوها يا ولدي .. ومرة مرة ادي خالتك معاك كبيبية وقت تتقل في اللحم ..!!
واصلت حفصة ..: شفتي يا بتي .. دي حبوبتها لي خاتي النقة من يومها الجات من الصعيد قالوا قزازة العرقي ما بتفارق كراع عنقريبها .. خاتها هي والابريق جنب بعضهن .. بس تصلي العشاء .. وتجي بتها النسأ تعبئ ليها القزازة في بزة الشفع .. وتقوم الشول ترقد على ضهرها وهاك يا مق مق مق مق مق مق تمص للصباح
Quote: اتلوم لكن ... دحين مو بقولو السجم ده زغاريد
الشئ اصلو بقي شنو.. وفيهو كم روح هو .. عتالة ومجابدة وسـخانـة وحمــار والسجم وكمان يبقي عليهو الشافوها وزغاريــد.. حييي الله عليهو لمن يتم نشرة اخبار مونتي كارلو ويديها ضهرو..
** صاحب لي الباقر دا منعاً للإحراج قدام الشفع الوليــة بتكورك ليهو .. مختااار يا مختاار اقطع لي بصل مع العشاء.. اها رد مختار لو كان ما تقطعي فبيحمل في طياته بُشارة يوم جاء من الشغل حيلو مهدود .. الوليــة كوركت .. مختااااااار يا مختاااااار اقطع لي بصيلات مع العشاء مختار تمتم ورد عليها: الليلة قطعي شوال بصل مع العشاء.. والا اقول ليكي .. اقلعي ليكي حوض بصل وتعالي حشيهو في راسي دا ..!!
عمنا الباقر شكلو كدة واصل مرحلة يحشوا ليهو حواشة :)
شكر ساكت يا حبيب... النيك نيم دا عليهو ورنتي لغايــة نهاية شهر رمضان أو حتي عودتي من سفرتي هذه القاصدة... والورانتي شامل الصيانة او تعديل المداخلة او حذف البوست ايهما أقرب مع تعهدنا بردك الشكر لأهله مرة أخري في حالة الإخلال بشروط العقد
تحياتي يا حبيب
08-17-2011, 08:05 PM
سفيان بشير نابرى سفيان بشير نابرى
تاريخ التسجيل: 09-01-2004
مجموع المشاركات: 9574
مرحب يا سفيان ... يآخ الناس بتعاني وانت شابكهم افطار افطار.. المرة الفاتت سترتكم عصيدة ذو اليد المرة دي حاتعملو شنو
Quote: الحبشي ود القاضي دا كضيضيب خلاص .
اتفق معك تماماً واثني على مسألة كضب ود القاضي دا دجال كبي ومستهبل تصدق انه ود القاضي اول ماجاء المملكة ككان مقيم في المدينة.. طُرد منها شر طردة وذلك مصداقاً لقول المصطفي انه المدينة تلفظ خبائثها خارج اسوارها وكان انه ود القاضي طفش من المدينة وجاء مكة .. قعد فيها شهر فقط وتم ترحيله للكرنتينة .. وحتي اليوم هو هناك
ود القاضي كضبه لا يتناطح حوله عنزان.. شكراً لك لتثبيت هذه المعلومة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
HAIDER ALZAIN
خالد المحرب
Ahmed Abdallah
سفيان بشير نابرى
حيدر حسن ميرغني
فيس بوك
تويتر
انستقرام
يوتيوب
بنتيريست