|
|
 مــــــــــــــــــــــــــــــــراح ريــــــــــدكـــ
|
ايا وطنا
عليك دليت قوافي الشوق
رسمتك حنه في ايدي
كتبت في جرايد الريد
وفرشتك بطن يدي
قوانين ريدي ما بتعرف
تنطك غير تقولك سي
مجرتق انتا من ظني
ومعتق فيني كالخمره
معبق فيني كالمحلب
بتشرب دمعي من عيني
وريدك ياوطن فاتح
على بحر العطش جواي
سحايب رينا العطشى
تفتق في الوهن جواي
ايا باعوك اولادك
ولافيهم بقول احّي
فيك اتغالطوك احساس
منو البهواك
ماذيّ
كتير اتجابدوك حراس
ولافيهم حواس تعرف
هواك لي وين
وكم من شئ..
منو السألك
منامك وين؟
وعزك وين؟
وفي ياتو جنب
تنجم؟
منو الخير مطاميرك
تبيع عيش السجم
بيكم ؟!
منو الحرر مزاميرك
عشان بي غنوتك تحلم
منو الببنيك؟؟
منو البهدم ؟؟
منو العاصي
منو الناسي
منو البرّ
البلد بالهم
اياوطنا
موعك يوت
متى
ترتاح
كأي جراح
اذا رتقوق
بخيط الدم
على نبعك نشرنا الحب
بنيات الغسيل
والريل
وحفلة سبوع
عريس مربوع
وفيك مزروع بلا حرّم
ايا وطنا
مراح ريدك
صهب
وضمي
وحات نمي
تراك شايفني
متلفح
هواك
وبالباقي
متعمي
محمد صديق الفكي
الخرطوم 2011
|
|
 
|
|
|
|
محمد صديق الفكي
فيس بوك
تويتر
انستقرام
يوتيوب
بنتيريست