|
|
 إنفصال الجنوب ..بكائية الفاروق
|
مالك يا الجنوب إنفصلت ما كنت كويس..
ما كويس؟ وكيف الكوسة في شان الارض تتباع ..
وبي كم متر البفرة يا ملوال ..
وكان لي العلم ملحوق ..تطير عيشة أبوك يا دنيا ..
لما الزول يكون حيران وما عارف ..
ويعرف كيف هو ما سهران ..
سهران في تلاطيش عتمة الوحدة ..
وما بصحى ..
يقوم من تاني يتوجع عشان في جسمو كم من حكة ..
وبتر الساق وقطع الإيد زي نملة السكر تنخر في جسم إنسان ..
حقنة أنسولين كافية عشان الجرح ينزف ..وتاني تعود جراحاتنا..
ويا فاطمة صحي وينو مشاطك ؟؟
سيبي الودع ..خليك في اضافة لون ..مساحيق الوشوش الزيف ..
كريم تفتيح ده ما بحلك ..وكيف الروحة من بلداً بتمشي هناااك ..
وترجع تاااني لي أبيي..
وأااااه من وجع أبيي..
في أبيي بيع العنب ممنوع..
في أبيي بيع العسل ممنوع ..
ونقعد في شرا الحاجات بنتلففت..
إمكن يا الكجر تظهر تسأل وينا فاتورتك ؟..
وأحلف ليك ده شيل الدين ..
وما بندفع ..
ندفع كيف وجيب البنطلون مرتوق ..
وندفع كيف وأصلاً بنطلون مافي..
وترزي الدنيا بت ال###### حلف ما يخيط الوجعة ..
ودمعة ميري في الخدين بتسأل وينا مصلايتي..
أسة الفجر أذن ..ولسة الديك ده ما كاااكا ؟
حليل ديكاً بكاكي مع الفجر يا ميري..
ديك نباهو نغمة نانسي وأسيبك لأ وأخاصمك أه..
وعاد لكن هي بتصحي؟
دي بتخليك تنوم من تاني تتبسم وحلمان بي حضن دافي..
وأوووعك من حضن نانسي ..وحضن البلد موجوع ..
وزفرات حارقة جوة الجوف وتنخر في عضام بلدي..
وحليييلك إنت يا بلدي ..
باعوك في طبلية شافع في إجازة صيف..
وهناك في القيف..
واقفة حمامة بتنادي ..
وينا زيتونتني ..وما تقولوا الغصن مقطوع ..
وما تسألني من لونو ..
أخضر ..أسود ما بيناتنا ..
المهم زيتون ..
فيهو طعم المر وحنضل عشرق الحلقوم ..
وصوت رصاص هناااك يضرب ..
إمكن عقدو يا ربي؟؟
ولا يكون ده من تاني صوت الحرب دوور..
ودارت لعبة الأيام ..
وجينا لقينا ناس هاني ..بيشحدو سفة من ناس جون ..
وفاطنة السمحة ما للغول ..فاطنة معاها بت ناس شول..
وتاااني تجوووط ..
تاااني تجوووط ..
تاااني تجوووط ..
|
|
  
|
|
|
|
|
|
|
|
Re: إنفصال الجنوب ..بكائية الفاروق (Re: عمر الفاروق)
|
وليد يا صاحب ..
كدي أووول شي نبدا بيك انت ..ضحكت ولا ما ضحكت .. :)
عارف يا عمك أووووعا من تكتب لي زول وعشان زول في سودانيز ده ..
انا بجي وبكتب وما بفكر في منو القرا ومنو الما قرا ..منو الضحك ومنو البكى ..منو الشكرني ومنو النبزني ..
انا بجي بكتب سااااااي يا عمك وما لي بي رد فعل الأخرين ... الشغلة حاجة نسبية وإن تباينت ا لمعايير.
فكرتك واقعة لي بس صدقني ما تشغل همك وبالك ..
أما بالنسبة للقصيدة دي فهي تعتبر أجمل ما كتبت انا في الفترة الأخيرة :)
خصوووصا الحتة بتاعت نانسي دي ..
لكن عارف انا كللل خوفي كان من شنو ؟ من إنو يجي ملاسي يشيل ليهو سطرين تلاتة يكووتهم ويخت لي يدين بتصفق بس كويس لسة ما شاف :)
| |
|
|
|
|
|
|
|
|
|
Re: إنفصال الجنوب ..بكائية الفاروق (Re: عمر الفاروق)
|
يا سلااام ياخ أبدعت يا أستاذ
أنا عجبتني الحتة بتاعة الزيتون رغم إني شايفك ركزت على حتة العنب و ده برجع لـتأثركـ بكيس العنب الجابو ليكم تمبس و داليا لما جوكم زيارة قبل كم يوم
ربنا يجعلكـ زخراً للوطن يا استاذ
| |
|
|
|
|
|
|
|
|
|
Re: إنفصال الجنوب ..بكائية الفاروق (Re: خالد عبد الله محمود)
|
شكراً لك أخي خالد على هذا الإطراء ..
أما بخصوص التأثر والعنب فهو تأثر بي الأستاذ الموسيقار سعد الصغير ورائعته ..العنب العنب العنب ..
وأرجو منك تعديل مداخلتك وحذف الأسماء المصاحبة فربما هم غير راغبون في ذلك ..
ودوماً لك محبتي ..
تخريمة :
يا زول داليا دي لو جابت ليك كيس سعوط تكون ما قصرت تقول لي كيس عنب ؟؟ ولو مكضبنا وما مصدقنا اسأل العنبة الرامية جمب بيتنا ..
لكن لقيتني كيف وانا مستنير؟؟ أجنن وانا مستنير؟
| |
|
|
|
|
|
|
|
|
|
Re: إنفصال الجنوب ..بكائية الفاروق (Re: Rawia)
|
أووووو رايــــــــــــــوة يا .. عمممك يااااا .. :)
تأكيداً لي كلامك أهديك رائعة الأستاذ أسامة الفتيحاب البتقول:
يا جداادتي كااااك ..كاااك
الأكل السدر كاك ..كاك ..
يموت بي العصر ..كاك.. كااك ..
الأكل الورك ..كاك ..كاك ..
يموت بي الخنق ..كاك ..كاك .
ويا جداااادتي كاااك ..كاااك ..كاااااك .
ياخ بالغتي والله إنتي من زمن الديك بيصيح ..
ود جبريل:
جييت ملاسي تكسب هذه البكائية نوعاً من الضحك الصاخب وإن كنت لسة مااا مطمن لي عدم التكوييت ده :)
| |
|
|
|
|
|
|
|
|
|
Re: إنفصال الجنوب ..بكائية الفاروق (Re: عمر الفاروق)
|
Quote: عارف يا عمك أووووعا من تكتب لي زول وعشان زول في سودانيز ده ..
انا بجي وبكتب وما بفكر في منو القرا ومنو الما قرا ..منو الضحك ومنو البكى ..منو الشكرني ومنو النبزني ..
انا بجي بكتب سااااااي يا عمك وما لي بي رد فعل الأخرين ... الشغلة حاجة نسبية وإن تباينت ا لمعايير.
فكرتك واقعة لي بس صدقني ما تشغل همك وبالك .. |
الأخ فاروق ..
سلامات ، و محبة ..
بغض النظر عن رأيي ، في القصيدة ، فقد أعجبني قولك أعلاه ، و أحببت أن أقول ذلك .. فقد قلت في سري ، و أنا أقرأ : (( أفلح إن صدق)) .. و إني لأحسبك صادقاً ..
تحياتي ..
| |
|
|
|
|
|
|
|
|
|
Re: إنفصال الجنوب ..بكائية الفاروق (Re: محمد يوسف الزين)
|
طبلية الشافع..ياخي حليل الإجازات و الطبالي..
اما صوت الرصاص.. لغاية اللحظة اغالط نفسي في اصرار عشان اقنعها انو الموضوع عقد ساكت..
المهم..
واحد احساس مظبوط..(على قول منير عامر في مجلة صباح الخير)..
عمر..حبابك يا صديق
كبر
| |
|
|
|
|
|
|
|
|
|
Re: إنفصال الجنوب ..بكائية الفاروق (Re: Kabar)
|
وبهذا تكون قد تربعت يا فاروق كاتبي المفضل لهذا الربع الصيفي الحارق
ـــــــــــــ
تعرف بالاضافة لي ردك لي وليد الشفت ممكن تضيف ليهو حنكي في الحتة دي انه انا بكتب لي رقبتي دي وبمتع نفسي بما اكتب , يعني يكفيني متعتي الذاتية مما اكتب ولا دخل لي بممتعة احد غيري , بصراحة انا بستغرب في الناس البكتبو عشان يمتعوا ناس تانين الزول كان ما متع نفسه بي كتابته ان شاء الله مافي زول يقرأ زاتو
| |
|
|
|
|
|
|
| |
عمر الفاروق
وليد محمد المبارك
خالد عبد الله محمود
Hussein Mallasi
طارق جبريل
Rawia
زول ساكت
أحمد الابوابي
محمد يوسف الزين
Kabar
اساسي
فيس بوك
تويتر
انستقرام
يوتيوب
بنتيريست