يوميات بوردابي جديد ( ج 2 ) وحكايتي مع ود الصايم والبرادو

مرحبا Guest
اخر زيارك لك: 05-05-2024, 11:55 PM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف الربع الثالث للعام 2011م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
07-06-2011, 06:46 PM

محمد جلال عبدالله
<aمحمد جلال عبدالله
تاريخ التسجيل: 06-24-2011
مجموع المشاركات: 4552

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
يوميات بوردابي جديد ( ج 2 ) وحكايتي مع ود الصايم والبرادو

    السلام عليكم
    لمن فاته الجزء الأول

    يوميات بوردابي جديد رهبة الدخول في اليوم الأول والمخاطر التي واجهتها

    نظرت إلى المنبر بعين الخيال عندما دخلته لأول مرة فكان المشهد كالتالي:

    المنبر مظلم من الداخل وساكن وصمت القبور يخيم عليه، عكس الصخب والضجيج الذي يتراءى للناظر من الداخل، وجدت ود الصائم حايم بالبرادو بتاعتو في جنبات المنبر، أشرت ليهو وقلت ليهو يا عم معاك لي قدام، ما اشتغل بي الشغلة نزل القزاز وضربتني ليك الكندشة قلت ليهو قدام يا عم قايلو ما سمعني، قام قال لي: المعايير يا عمك المعايير وطوالي رفع القزاز وفووووووووووووورررر فحط بي عربيتو وخلاني ما بين الغبار والدهشة.

    تركت ود الصايم وعربيتو وقنعت من خيرا فيهو وقمت قلت أمر على البوستات يمكن ألقى زول يفهمني حاجة، أول بوست داير أتاوق فيهو اضطريت أجيب لي 2 قوالب طوب لأنو ما لقيت لي زول يديني شنكل، أول بوست عاينت فيهو كان بوست لأنور التكينة مما تاوقت فيهو لقيتو ليك راجيني بي كميرتو وجك كك أخد لي لقطة قال لي كده قبضناك بالثابتة، تراجعت للخلف من هول الدهشة وقمت تاوقت تاني وقلت ليهو: معقولة يا خال ياخ أنا ما سرقتا أنا جيت أعاين وأشوفو ليك شكك أخد لي لقطة تانية وقال لي التانية دي للتأكيد، يئست وأبيت أتاوق تاني وقمت رفعت ليهو يدي قلت ليهو مع السلام يا خال وبرضو شكك صور يدي وقال لي التالتة ثابتة ودي بالبصمات كمان :(

    مشيت لي قدام لقيت لي بوست كده هاااادي تفوح منه رائحة الجبنة السودانية وإذا بعزام فرح وآخر استمخاخة مع فنجان جبنة قال لي كمبو قلت ليهو كمبو 10 ؟ قال لي يا زول كمبو قلت ليهو نحمدو ونشكرو، قال جونياريت قلت ليهو ده شهرا ما عندنا فيهو نفقة وشعرا ما عندنا ليهو رقبة، قال لي اتفضل قلت ليهو ما بشرب القهوة بالليل عشان بتسهرني للصباح، معاك سلامة.
    طلعت من بوست عزام لقيت لي بوست كلو كواريك وجوطة وصخب وأصوات عالية، عاين بي طاقة في الحيطة لقيت راجلة المنبر بتخنق ليها في واحد وتقول ليهو قسما عظما بوريك، والراجل يبلع في ريقو ويقول غاااغ غيييغ خااااخ خيييخ، وهي تخنق فيهو وتخنق قمت طوالي اتخارجت خشية ان أكون من المخنوقين .. راجلة المنبر دي منو ما تسألوني :)

    قمت أتضهب في جنبات وأزقة المنبر الحاجة الأزعجتني وخوفتني المنبر كان كله ملغم مافي شبر فيهو إلا تلقى ليك لغم، في ألغام مكتوب عليها جلابة وألغام مكتوب عليها غرابة والغام مكتوب عليها (ح.ش) وألغام عليها ( م.و) ويال للعجب ألغام فيها نجمة داوود وفي ألغام ما فرزتها، في ألغام صديقة وألغام تقوم بيك طوالي وبيني وبينكم كلها في النهاية ألغام عشان كده فررت منها فرار الملغوم من المدفع :)

    خشيت لي في بوست كده لقيتو صاااااني لمن افتكرت مافيهو ناس، لكن لقيت فيهو مواطنين من جمهورية السودان الجنوبي بيحزموا في آخر امتعتهم استعدادا للرحيل، قلت ليهم ماشين وين؟ قالوا لي خلاس ماشين بلد بتاءنا ماشين نهتفل باستخلال بتاءنا، قلت ليهم: مع ألف سلامة يا بهوات عليكم يسهل وعلينا يمهل أبقوا زورونا بعدين، وقلت ليهم: منذ 6 سنوات وأنتم تهربون منا وتريدون الانفصال والآن ثبت جليا أن هذا الانفصال بريطانيا هي من صنعته وامريكا حاميته، وأنا أتمنى ليكم حياة سعيدة وانو أزوركم وأنتوا تجوا عندي لأني أنا ملك ملوك البورد وإمام الأمة الأحلامية وعميد البورداب الجدد ومكانتي العالمية ما تسمح لي أقول أكتر من هيك كلام، يلا مع السلام إلى الأمام إلى الأمام الأمام.

    طلعت بعد داك تاوقت في بوست كده مسخن وبوردابي بيهدد في بوردابي تاني بيقول ليهو: والله العظيم أعتقلك والله تصحى الصباح وعربية النجدة تنوني في راسك والله أجيب ليك البوليص والله أخلي الكــلــب البوليصي يشمك، والله أبيتك في الحراصة يوم الجمعة بالليل عشان ما تمرق إلا يوم الأتنين، ختيت يدي في قلبي واتخارجت قلت بالله ده بورد وللا قسم بتاع بوليس.

    مشيت تاني أتضهب تاوقت لي في بوست لقيت ليك بوردابي راكب ليهو تاتشر وشايل ليهو حمولة بتاعة موز، قام قال لي اتفضل معانا، قلت ليهو والله موز ده ما قاعد نستعمل بعمل لي وجع بطن خاصة بالليل، قال لي لا لا ده موز مستورد مخسوس من الصومال انت بس تعال أركب التاتشر وشيل زي ما عايز، قلت ليهو دي علي أنا؟؟ أركب التاتشر عشان بعدين تقول لي خدمة إلزامية وشنو ما عارف لا لا يا بابا بعيد بعيد معاكم سلامة.

    مشيت تاتي أتضهب في بوست سمعت صخب شديد خالس .. كشن كوكو شخخخخخخ تاوقت كده من بعيد لقيت لي ناس دمائهم سايلة وشي جنازير وشي سكاكين ومطاوي وسنج، قلت ليهم خير إن شاء الله يا جماعة الجنجال ده دور في شنو؟ قالوا لي مافي جنجال بس نحنا عندنا احتفال الليلة!!! قلت ليهم بالله لو انتو حفلتكم كدي أمال شكلتكم تكون كيف؟؟ قالوا لي اتفضل قلت ليهم معليش في مرة تانية ده لو كان في مرة تانية :)

    مشيت تاني اتضهب في بوست لقيت لي اتنين متشاكلين: واحد يقول: نحنا الطيرة وانتو الجناح والتاني يقول ليهو: نحنا الأصل وانتو التقليد وداك يقول ليهو نحنا جابان وانتو تايوان ونقاش وجدل بيزنطي قلت ليهم يا جماعة الحاصل شنو؟ بقى كل واحد يقول لي ده منشق من الحزب وكون ليهو شرذمة قليلة قلت ليهم اسمعوا مادام كده ما تعملوا قرعة طرة وكتابة قالوا لي العملة الجدية مافيها طرة وكتابة زي زمان قلت ليهم خلاص أعملوا القرعة بي طاقيتي دي أنا بجدعا كان وقعت مقلوبة انت الأصل وكان وقعت عديلة التاني يكون الأصل، بالله شلت طاقيتي ودعتها فووووق والجماعة يعاينوا ليها وهي نازلة لقيتها فرصة واتخارجت طوالي، أنا فاضي ليهم بعدين الطاقية لو وقعت بالجنبة أسوي شنو

    مشيت برضو شوية كده وفجأة النور طفى .. مين طفى النور يا جماعة؟؟؟ وفجأة أحس ليك بخطوات مريبة مع موسيقى تصويرية وكرررررررررب رب رب رب ، بس زي بتاعت مسلسل البرادعي زمان ديك وأحس ليك بي خطوات جاية علي، فتشت يمين شمال شمال يمين ما لقيت لي حتة أتدسى فيها، آخر شي ألمح ليك من هناك بوست مكرش لأنو صاحبو فتلو بي صورة كبيرة بسسس طوالي جريت أتدسيت ليك تحت البوست المكرش ده، وتجي ليك الخطوات جنبي واحد لابس ليهو بووووت كبيييير ولابس بالطو ونضارة سوداء ورافع اللياقة بتاعت البالطو بتاعتو بس أنا البرادعي يا مرسي عديييلل كده، الشي ده وقف جنبي ووقف وقف وأنا كتمت ليك أنفاسي وما قلت بغم، ما عرفتو الزول ده الهكر وللا ادهم صبري وللا ود الصايم متنكر!! بالله عليكم الزول ده يكون منو؟؟ أنا في ظني يكون بكري أبو بكر شمسيا لأنو من بعد الحدث ده مشاركاتي اتحددت بي 4 في اليوم الواحد :((

    (عدل بواسطة محمد جلال عبدالله on 07-06-2011, 08:42 PM)
    (عدل بواسطة محمد جلال عبدالله on 07-06-2011, 08:43 PM)
                  

07-06-2011, 07:49 PM

ناصر احمد الامين
<aناصر احمد الامين
تاريخ التسجيل: 03-29-2009
مجموع المشاركات: 2913

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يوميات بوردابي جديد ( ج 2 ) وحكايتي مع ود الصايم والبرادو (Re: محمد جلال عبدالله)

    يا محمد جلال يا ضهب
    ياخي نحن لمن خشيناالمنبر دا بقينا ماسكين في يد زول واحد و حايمين معاهو البوستات كلها
    لحدي ما عرفنا درب المواصلات.

    Quote: راجلة المنبر دي منو ما تسألوني
    لا بالله ... يا زول انت اتقنطرت تب.

    اطالب بكري بوضع لافتة تحذيرية للاعضاء الجدد مكتوب فيها: احذر الاوغـاد .. منبر ماسورة.


    أنت جيت مع منو يا زول؟؟؟






    ــــــــــ
    سلام و تحية
                  

07-06-2011, 08:47 PM

محمد جلال عبدالله
<aمحمد جلال عبدالله
تاريخ التسجيل: 06-24-2011
مجموع المشاركات: 4552

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يوميات بوردابي جديد ( ج 2 ) وحكايتي مع ود الصايم والبرادو (Re: ناصر احمد الامين)

    Quote: يا محمد جلال يا ضهب
    ياخي نحن لمن خشيناالمنبر دا بقينا
    ماسكين في يد زول واحد
    و حايمين معاهو البوستات كلها
    لحدي ما عرفنا درب المواصلات.

    يا ناصر أحوم مع منو أنا بس
    ياخ ود الصايم العامل فيها حبوب فتح لي كوبري
    وخلاني اتمرمغ في تراب البرادو بتاعتو
    شفت المحن دي


    Quote: أنت جيت مع منو يا زول؟؟؟


    والله تقول شنو يا حبيب
    جيت نازل بي برشوت
    جمممممبلغ كده بس
                  

07-06-2011, 09:11 PM

احمد الأمين على إدريس
<aاحمد الأمين على إدريس
تاريخ التسجيل: 04-25-2010
مجموع المشاركات: 678

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يوميات بوردابي جديد ( ج 2 ) وحكايتي مع ود الصايم والبرادو (Re: محمد جلال عبدالله)

    Quote: آخر شي ألمح ليك من هناك بوست مكرش لأنو صاحبو فتلو بي صورة كبيرة بسسس طوالي جريت أتدسيت ليك تحت البوست المكرش ده

    حولااااا
    محمد جلال البوست المكرش دا شكلو قاعد من 2010 لانى من يوم دخلت متلبد فيهو ولى هسا
    ماشايف المداخلات ديل كلهن مافايتات ال 300 الا بالاتنين المعاك
    بس الفرق انا البرادو ركبتها لكن نزلونى الربع الجايى
                  

07-07-2011, 02:29 AM

محمد عبد الماجد الصايم
<aمحمد عبد الماجد الصايم
تاريخ التسجيل: 10-16-2005
مجموع المشاركات: 35312

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يوميات بوردابي جديد ( ج 2 ) وحكايتي مع ود الصايم والبرادو (Re: احمد الأمين على إدريس)

    هلكتنا ياخ! هرمنا عديل لحدي ما نكمّل قصتكـ دي!
    عشان نقتكـ الكتيرة دي أبيت أسوقكـ معاي!!













    _
    مبالغة والله يا عمكـ!
                  

07-07-2011, 03:51 AM

احمد محمد بشير
<aاحمد محمد بشير
تاريخ التسجيل: 06-17-2008
مجموع المشاركات: 14987

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يوميات بوردابي جديد ( ج 2 ) وحكايتي مع ود الصايم والبرادو (Re: محمد عبد الماجد الصايم)

    Quote: بيهدد في بوردابي تاني بيقول ليهو: والله العظيم أعتقلك والله تصحى الصباح وعربية النجدة تنوني في راسك والله أجيب ليك البوليص والله أخلي الكــلــب البوليصي يشمك

    ههههههههاااهههههههـ
    ديـل منو؟؟ في الجماعة المتخصصين شتيمة.
                  

07-07-2011, 08:51 AM

عبدالله ود البوش
<aعبدالله ود البوش
تاريخ التسجيل: 08-12-2009
مجموع المشاركات: 6700

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يوميات بوردابي جديد ( ج 2 ) وحكايتي مع ود الصايم والبرادو (Re: احمد محمد بشير)

    اخونا اللذيذ محمد جلال
    اولا بالتبادي حبابك عشرة
    .
    .
    اسمع ات اصلك كلامك كتير كدي
    ولا كل كلامك طرشتو والباقي المر ( كسر الميم وضم واو الجماعة ) ؟
    .
    .
    صراحة يظهر اننا موعودون بكاتب بارع يحمل كاميرا بين حروفه
    بالله سجلني معجب
    وقول شكرا يا معجب
                  

07-10-2011, 09:06 PM

محمد جلال عبدالله
<aمحمد جلال عبدالله
تاريخ التسجيل: 06-24-2011
مجموع المشاركات: 4552

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: يوميات بوردابي جديد ( ج 2 ) وحكايتي مع ود الصايم والبرادو (Re: عبدالله ود البوش)

    ياخواننا أشكركم كتيير على مروركم الجميل
    ولاستحالة الرد عليكم بالقطاعي لأنو بكري مديني 4 مشاركات بس في اليوم
    حاقوم أرد عليكم بالجملة وبيني وبينكم الجملة أرخص الأيام دي

    أول شي اسمحوا لي أحيي أخونا عبد الله ود البوش وأقول ليهو كما طلب
    Quote:
    صراحة يظهر اننا موعودون بكاتب بارع يحمل كاميرا بين حروفه
    بالله سجلني معجب
    وقول شكرا يا معجب


    شكرا يا معجب
    تشرفت بمرورك
    وإن شاء الله أكون عند حسن الظن

    -----------------
    أحمد اللمين يا سنير
    بختك ضقت البرادو وكندشتها
    أنا يا معلم استكتروا علي تمليحة
    -------------

    ود الصايم إنت لاقيني أنق ليك
    هسي عليك الله لاقي الدعاية المجانية دي
    أصبر لي ساي أنا كان قعدت في المنبر ده
    يا أنا يا انتا
    ---------

    أحمد محمد بشير
    الجماعة ديل كان كستهم بتلقاهم
    مون بعيدين بس انت فتح عيونك سمح
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
 اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين 		News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de