|
|
 يوميات بوردابي جديد رهبة الدخول في اليوم الأول والمخاطر التي واجهتها
|
الزمان 26/6/2011
المكان: صالون بيتنا العامر
الوقت: بعد صلاة المغرب
الحدث: الانضمام للمنبر العام لسودانيز أونلاين
في ذلك اليوم التاريخي المرة جابت لي شاي المغرب، وفي نفس اللحظة فتحت الايميل وكنت لي كم يوم ما فتحته، وألقى ليك إيميل من الريس بكري شمسيا!!! والايميل كان رد على ايميل سابق أرسلته قبل عام تقريبا بتاريخ: 30/6/2010 ومن داك التاريخ كنت قد هرمت ويئست فإذا بها تأتي على غير ميعاد، والله بكري ده عينو قوية قوة أصلو ما خسر ليهم ايميل جديد طوالي ريبلاي وسيند طوالي.
أول ما شفت الايميل قلبي عمل ليك شحححححححح، وقلت أكيد في خبر سعيد، وأول ما فتحت الايميل وقريت الكلام كم كلمة كده بالانجليزي وأقول أنط ليك فوووووق وأقول: يهووووووووووووووو بقيت عضو في سودانيز أونلاين، المرة لسة ما ختت لي الشاي كويس قالت لي بالحرف الواحد: لو دخلت سودانيز أونلاين دي ياكا الخربتا!!! قلت ليها بالله شوف دي نحنا نكوس ليها دي لينا كم وتقولي لي بخرب!! بخرب بخرب.
نظرت إلى المنبر بعين الخيال وجزء من الحقيقة، والرهبة لازالت تعتريني لهذا الحدث التاريخي!! وقلت يا ترى كيف سيكون سودانيز أونلاين من الداخل!!! أول شي وقفت في الباب لقيت ليك الصفحة دي طويلة طول لو عايز أصل محل التسجيل فوق داير لي سلم!! قمت عملت زي علي بابا داك الفي مسلسل سندباد زمان جبت لي حبل وعملت لي أنشوطة وفو فو وفو وفو جدعتها ليك فد جدعة والحبل شبك ليك في كلمة ( Guest ) الفوق ديك وقلت ليك لا قيستات بعد اليوم إلى الأمام إلى الأمام عضو عضو عضو.
بعد ما اتأكدت سمح من إحكام اللفة فوق الكلمة قمت بديت الصعود لافوق، وهوب هوب هوب اتطوطح شوية واصطدم بي بوستات الناس شوية، معليش يا جماعة أي زول لقى بوستيهو جايط وللا الكتابة ملخبطة يعذرني :) وأواصل الصعود لا فوق ، في بوستات كانت ملتهبة مسخنة نار حرقت لي بنطلوني وشوشوت لي يدي، وفي بوستات كانت لطيفة وظريفة وباااااردة كنت برتاح فوقها، وفي بوستات كانت فاضية دي قربت ترميني لأنها مما أمسك فوقها بقرب أجي داقي الدلجة عشان خفيفة، وفي بوستات تقيلة بتاعت كم وعشرين صفحة دي أكتر واحدة سندتني.
المهم بحمد الله وصلت فووووق كلمة ( guest ) وأول ما وصلتها التقول كلموها وللا رسلولها تلغراف جممممبلغ جات واقعة وقربت أجي داقي الدلجة معاها، قمت طوالي اتشعلقت ليك في الاعلانات وبقيت زاحق زي الضب، الاعلانات دي ذاتها قربت تجيب أجلي الاعلان أكون ماسك فيهم سمممممح أول ما الاعلان الفلاشي يقلب أقوم أنا أرجف وأتجهجه زي الجلي كده، المهم يا زول واصلت الزحف أنا ومعي الملايين من خلايا الادرينالين في وضع صعب وسرعة استجابة لا يقدر عليها إلا ( ن - 1 ) شخصيا، وقمت هووووووووبا في قفزة تنافس أبطال الأولمبياد ركيت ليك في أيقونة الدخول، أيقونة الدخول دي كانت صعبة بشكل يابسة كلو كلو بقيت أرفس ليك فيها وارفس وارفس شي بي كرعي وشي بي يديي لحدي ما فتحت ليك معاي لمن فتحت وظهر لي الحقل بتاع الاسم جممممبلغ نطيت ليك فيهو وبي كده سجلت ليك اسمي في خانة التسجيل لأنو أنا شمسيا قاعد في الخانة يعني مافي داعي أكرر نفسي تاني، المهم بقت ليك مشكلة الباسوورد يا ربي الباسوورد دي يكتبوها كيف وبكري كاتبا لينا طوييييييلة كده زي قطر كريمة وشي كابيتال وشي اسمول وشي ما عارف شنو ، والله لو ما الهكر كنت كتبتها ليكم عشان تشوفوا المحن.
المهم يا زول قلت مافي حل الا نعمل ليها نسخ ولصق يعني بالعربي كده كوبي بيست، قمت طلعت اللابتوب من شنطة المهام من ضهري ورا وفتحت ليك الايميل وغتيت ليك الشاشة خوفا من الجواسيس والعملاء والهكرز ومن لف لفهم، وقمت يازول ( نوسوخوت ) عمليت ليها نسخ، بقيت مشكلة كيف ( لوصوقوت ) أعمل ليها لصق لأنو خانة الباسوورد بعيدة مني، يا زول قلت مافي طريقة إلا أبلها في موية وأرشها من بعيد، قمت كتبتها ليك في ورقة وحليتها ليك في موية في كباية شاي من النوع المشخت داك الزمااااان، وطبعا الحاجات دي كلها كنت شايلها ليك في شنطة المهام في ضهري، قمت يا زول شلت ليك الكباية دي وفد كشحة كشحتها ليك في خانة الباسوورد لكن للأسف اليوم داك كان في شوية هوا والبورد ذاتو كان جايط ويتهوزز عشان كده ما ما جات كويس.
المهم بديت ليك تاااااني فتحت الايميل بعد ما عملت ساين آوت وكتبت ليك الباسوورد في ورقة، وحليتها ليك في موية، وقمت يا زول كشحتها ليك في خشمي لكن ما شربتها وبقيت أتحين الفرص، المنبر ده قام ميل ميلة كده لي تحت ولقيت ليك الفرصة مواتية وطووووووووش كبيت ليك الموية في خانة الباسوورد والحمد لله لزقت الا حرف واحد مسك ليك في حلقي وهو حرف الكيو كابيتال بي حنيتو ديك، غايتو مع الاعتذار اي زول جاتو موية اليوم داك بعتذر ليهو، أها بقت مشكلة الكيو كابيتال الحرف ده أبى يلفق معاي كلو كلو، كتبو ليك في طوبة وجدعتو جلى .. الجاتو طوبة اليوم داك أنا ما مسئول، كتبتو ليك في ورقة وفيكتو بي نبلة برضو طار، وفي واحد ثقيل كده كان قاعد تحت بلملم في الحاجات البتقع مني ده غايتو أظنو ده يكون الهكر، الزول ده أوصفو ليكم يا بكري يمكن تقبضوهو يوم من الايام، وقد كان طويل القامة عريض المنكبين مفتول العضلات رياضي القوام ويجيد كل فنون القتال وست لغات حية كمان، الزول ده كان بهدد فيني ويقول ليك كان راجل أنزل لي تحت وأنا أقول ليهو: كان راجل أطلع لي فوق :)
المهم في النهاية ما لقيت حل إلا أعمل عملية انتحارية موت موت حياة حياة، لازم أخش بي أي طريق قمت قلت خلاص حرف الكيو ده بكتبو في في حذائي بي تحت وبقوم أقفز بالزانة الطويلة لي خانة الباسوورد يا خشيت المنبر العام يا نزلت تحت للهكر الراجيني يا دقيت الدلجة كسرت رقبتي، طبعا ما كان في طريقة أستعمل الحبل لأنو كنت فقدتو قبيل، قمت كتبت ليك الكيو في فردة حذائي اليمين وجبت ليك الزانة طبعاالزانة الطويلة برضو كانت في شنطة المهمام يازول اتحسبنتا واتوكلتا واتشهدتها وهووووووووببببا فد نطة جليت ليك من خانة الباسوورد وقربت أقع بس على الحظ كراعي المكتوب فيها الكيو شبكت واكتملت الباسوورد، وقمت بحركة بهلوانية لا يجيدها سوى ( ن-1 ) شخصياضربت ليك الزر بتاع الدخول وفجأة اسمع ليك زي صوت الغسالة كرررب كرررروب فرررررر تووووووررر كررررب ولقيت ليك نفسي جوة المنبر العام.
آه أه آه نفسي قام طبعا أول مرة لقيت أهوال ومخاطر في المنبر العام أول يوم، ودي بحكيها ليكم في الحلقة التانية بإذن الله هسي تعبت من الكتابة.
---------------------
ملاحظة: أعتذر عن الرد على أي مداخلات لأنو سستم بكري ده ما بديني إلا 3 مشاركات في اليوم :(
|
|
  
|
|
|
|
|
|
|
 Re: يوميات بوردابي جديد رهبة الدخول في اليوم الأول والمخاطر التي واجهت (Re: محمد جلال عبدالله)
|
محمد جلال
حبابك ألف في حوش بكري يا زول...
شكلك كده بوردابي نجييييييييييض ومقرم
| Quote: المرة لسة ما ختت لي الشاي كويس قالت لي بالحرف الواحد: لو دخلت سودانيز أونلاين دي ياكا الخربتا!! |
قول للمره الله يعوضها فيك من يوم العضوية
| Quote: والله بكري ده عينو قوية قوة أصلو ما خسر ليهم ايميل جديد طوالي ريبلاي وسيند طوالي. |
شـــنو يا مان بدل تقول ليهو شكرا تقوم تديهو على راسو بالغته ياااااخ
انا غايتو شايفو ما قصر معاك هنا تاني أكتر حاجة بقولها ليك done
بفكك في الحوش دا وتاني الله معاك الا كان تشوفه في الصور
| Quote: ملاحظة: أعتذر عن الرد على أي مداخلات لأنو سستم بكري ده ما بديني إلا 3 مشاركات في اليوم |
يا ريت المره برضو تعمل ليها سيستم ب 3 مشاركات في اليوم 
حبابك يا زول وكلامي الفوق ده كلو هترشه وهظار ساي
المهم شكلك بوردابي تفتيحه شديد... فمرحب بيك
تحاياي
| |
|
|
|
|
|
|
|
|
|
Re: يوميات بوردابي جديد رهبة الدخول في اليوم الأول والمخاطر التي واجهت (Re: Shaker Hamid)
|
معليش يعني حأرد عليكم كلكم في رد واحد دي آخر طلقة في المداخلات التلاتة
مهيرة: شكرا على الترحيب: والله صحي مواليد 94 ومتزوج وعندي طفلين،، أها رايك شنو؟؟؟
-------------
الامين موسى البشاري
اسمك اسم عجايز غايتو آخرا آبعرفو!!
مقرم وبس أنا من سنة 2002 متابع المنبر لمن عملت لي فيهو بنبر عديل كدي
وبعد ما هرمت والجنوب انفصل واللين ختف وكل زول شال قروشو ومشى بكري أداني العضوية .. تخيل!!!
بكري شكرتو في بوست طويل عريض لكن اتلحس مع الربع الفات
المرة شايفة سودانيز خراب لأنها لمن تفتح مشاركات مين ومين ديك صحي الزول بقول خراب ... والله صحي!!!
ودايرني اديها 3 مشاركات يعني أطلع منها كيت؟؟ لا يا بابا معليش نحنا دايرين يزيدوا لينا الحصة تقول لي شنو!!
-------------------------
ود الخليفة عفارم عليك انت أكتر زول فاهمني يا حبيب ^_*
وعليه لأنك زول تفتيحة بديك الأمان لمدة 6 شهور بعد داك تاني ما تلومني ^_*
--------------
أبو بكر قسومة حيرت قلبي ذاتو معاك تقول لي استفتيهو ^_*
على العموم مقبولة منك وبنعتبرها مدح وبنديك الأمان لمدة 6 أسابيع
بعد داك تاني ما تلومني
--------------------
حيدر حسن
مشكور يا حيبب انت الفيهم والله
وعليه منحناك الأمان لمدة 9 شهور :)
-----------
شاكر حامد معقولة بس
بارك الله فيك يا أخونا شاكر
هذا العيش والملح اللي بينا وبينكم
هذا الدم واللخوة اللي بيننا وبينكم
بدل ما تكون معاي تكون ضدي
نزعنا منك الأمان لمدة 6 أيام
| |
|
|
|
|
|
|
|
|
|
Re: يوميات بوردابي جديد رهبة الدخول في اليوم الأول والمخاطر التي واجهت (Re: ابوبكر قسومة)
|
حبابك عشرة يا محمد وان شاء الله الدار ترحب بك وشكلك كده زي ما قال واحد من الشباب تفتيحة شديد
المشكلة التفتيحة دي بتجي تتعب بعض الناس تعب ، والزول التفتيحة مرات يشربك في الزول والله اكان يحلو منو الحل بله
غياتو قصتك دي وسردك دا جميل وممتع وعسانانلقى منك أشياء جميلة وممتعة أخرى مستقبلا
وبعدين حكاية 94 دي بتكون بالهجري وهي تعادل 74 تقريبا وماك صغير فيها الدنيا دي إن بقى ياهو كلامي دا
| |
|
|
|
|
|
|
|
|
|
Re: يوميات بوردابي جديد رهبة الدخول في اليوم الأول والمخاطر التي واجهت (Re: haroon diyab)
|
يامحمد جلال والله نورته انا مصدقك انت مواليد 94 وجيل البورد القادم بقوة
لكن اتسرعت شوية فى موضوع الزواج ده لكن مامشكله ربما ساهم ذلك فى خلق اجواء
كويسه للكتابة والاسهام فى البورد .....
محمد سر الختم ماتهتم والله مافى زول بيقدر يعفص ليك طالما كنت برلوم مفتح ومتكتك امورك
انداح ياخ ..نحن اصبنا بالملل من المواضيع المكرره والتصدع الذى اصاب البورد فى السنوات الاخيرة
انتم من سيرسمون مستقبل جديد للبورد يعنى دخله زى بتاعت محمد جلال دى حلوة وملعوبة وبتخلى الناس
شمار ساكت تجيك ...ارح ورينا فى جرابك فى شنو من مواضيع ؟وانسى موضوع العفيص ده لانو اسهل شى ممكن تعملوا
فى البورد انك تعفص وتخرمج وهذا ديدن الناس الماعندها موضوع وما اكثرهم ...كل ما اشوف برلوم جديد دخل
البورد ينشرح قلبى وادرك ان فجر البورد الجديد سيشرق فى القريب ورغم اننى لم ارحب بالكثير منهم الا اننى
اتضامن معهم ببفرح عارم بعترينى وانا اتابع كلماتهم .
ارقد عافية ولك كامل الاندياح
| |
|
|
|
|
|
|
|
|
|
Re: يوميات بوردابي جديد رهبة الدخول في اليوم الأول والمخاطر التي واجهت (Re: haroon diyab)
|
Quote: ده انقليزي يامرسي
قرجاج....
مشتاقين وكده ] |
ياهارون والله بالاكتر ياخ
اسف انى بكتب ليك التحايا دى وانت بتمر بظروف صعبة بعد مباراة سمبا
والله الهزيمة ماغريبة عليكم وانا شخصيا فرحت من قلبى انكم اتخارجتو يعنى
فرحت فرح كفرحى بهؤلاء البرالمة عشان ماتشبكونا جبنا كاس بالجو وكاس بالبحر
وقصتكم الواحده الماسكين فيها خمسين سنه دى ..
ارجو ان تتابعنا حصريا على الجزيرة الرياضية فى رمضان على الجزيرة الرياضية
متعة المشاهدة
محبتى
| |
|
|
|
|
|
|
|
|
|
Re: يوميات بوردابي جديد رهبة الدخول في اليوم الأول والمخاطر التي واجهت (Re: مدثر قرجاج)
|
أبو بكر قسومة:
ياخي أنا أديتك اللمان وتقول لي باقي كم؟
ياخ ما تحسب براك ياخ
هسي اللمان ده ببقيهو ليك ليمان
----------------------
شيخ كمال
مرحبتين وعفارم عليك
انت الكشفت السر
كان تخلينا ندور العالم دي حبة
-----------------------
علاء الدين تصدق بس
أنا متابعو من الزمن داك
مش مفروض كان يسجلوني مع الناشئين :)
-------------------
محمد ابراهيم علي
مرحبتين وشكرا على مرورك
---------------
محمد سر الختم
من لا يعفص في هذا البورد (يُعفص )
عشان كده شوت طوالي
------------
هارون دياب
مرحبتين حبابك
-------------
يا ود قرجاج
Quote: يامحمد جلال والله نورته انا مصدقك انت مواليد 94 وجيل البورد القادم بقوة
لكن اتسرعت شوية فى موضوع الزواج ده لكن مامشكله ربما ساهم ذلك فى خلق اجواء
كويسه للكتابة والاسهام فى البورد ..... |
مرحبتين وشكرا على مرورك
وأشكرك على تصديقي
لكن كدي راجع كلام شيخ كمال فوق :)
| |
|
|
|
|
|
|
| |
محمد جلال عبدالله
ابوبكر قسومة
مهيرة
الامين موسى البشاري
ود الخليفه
حيدر حسن ميرغني
Shaker Hamid
كمال عكود
علاء الدين يوسف علي محمد
محمد إبراهيم علي
haroon diyab
مدثر قرجاج
فيس بوك
تويتر
انستقرام
يوتيوب
بنتيريست