|
Re: عروس تبكي بحرقة على (( الكوشة)) والسبب سودانيـــــــر (Re: عابدون محمد عابدون)
|
عبدون محمد عبدون لك التحية يااخي .. لكن بعد الذى تمارسه سودانير الآن فى الناس ، دون وازع من ضمير أو أخلاق ، فقد آلينا على أنفسنا أنلا يهدأ لنا بال إلا وأن نكشف أفعالها فى كل ملتفى ومحفل حتى لو لم تكن ما يتطلب الموقف أو المناسبه ، شبر ، شبر موقع موقع زنقه زنقة ، والله أكبر عليهم وعلى أفعالهم وعلى نفسها جنت براقس ..
| |
|
|
|
|
|
|
Re: عروس تبكي بحرقة على (( الكوشة)) والسبب سودانيـــــــر (Re: عوض الله الفولانى)
|
استاذ محمد ..سلامات ..
نحن ناس الشرق دايماً بنفضل الباخرة وكلها من 9 الى 12 ساعة نكون عن اهلنا في بورسودان خاصة في الاجازات الطويلة التكون فيها الحمولات كبيرة ..لكن السنة الفاتت اختي كانت مسافرة وقلنا مادام مامعاها عفش اخير اقطع ليها على السودانية وكلها 25 دقيقة تكون في بورسودان وطبعاً رحلة سودانير لبورسودان بتكون كل يوم احد ...تم الحجز وتأكيده ورغم ذلك ناس سودانير يقولوا ليك اتصل قبل الرحلة بيوم عشان تأكد وهي في الحقيقة اتصال عشان تتأكد هل تم تأجيل الرحلة ام مازالت قايمة ..فتأجيل الرحلات اصل في الخطوط السودانية والسفر في موعدها يحدث عرضياً ..اتصلت قبل الرحلة بيوم وقالوا لينا الرحلة قايمة في موعدها مساءاً تخيل لمن مشينا المطار قبل 4 ساعات من الرحلة قالوا لينا الطائرة على الاقلاع ..قلت ليهم باقى اربع ساعات لسه قالوا لي تم تقديم الرحلة وبلغوا كل المسافرين عبر التلفونات مع العلم انا مااتصلوا على نهائي وغير كده انا أكدوا لي قبلها بيوم بأن الرحلة قايمة ..هي كانت المره الاولى والاخيرة ..
العايز يركب السودانية احتياطي كده يمشي قبل الرحلة بيوم ويفضل بيومين وياخد معاه مؤنة يوم او يومين برضو ده غير انو يكون محصن بالعمل الصالح ..
| |
|
|
|
|
|
|
Re: عروس تبكي بحرقة على (( الكوشة)) والسبب سودانيـــــــر (Re: محمد مختار جعفر)
|
في عام 1986 تأخرت رحلة تلك الشركة الغريبة القادمة من صنعاء إلى الخرطوم لمدة أربعة أيام (من السبت إلى الثلاثاء) وبقينا خلال تلك الفترة منتظرين لسيادتها
طبعاً ... كل من يسافر على تلك الشركة وهو يعرف حالها ... يتحمل كامل المسئولية عمّا يحصل عليه ....
هل من المفيد الدعوة إلى مقاطعة الشركة لفترة من الزمن حتى ينصلح حالها ؟ وتتعلم إحترام زبائنها ؟ وتتعلم ألا تكتفي باستغلال بقايا الحس الوطني لدى بعض المسافرين أو رغبة الآخرين في حمل 30 كيلو جرام إضافي عما تمنحه باقي الشركات ؟ أو في توفير ما يقارب 20% من تكلفة السفر المادية (التي يخسرها المسافر في شكل مصاريف لمواجهة ساعات وأيام التأخير قبل وبعد الوصول - دون احتساب الإرهاق البدني والعقلي والنفسي الذي يحصل للمسافر والمحيطين به والمهتمين بأمره - )
| |
|
|
|
|
|
|
Re: عروس تبكي بحرقة على (( الكوشة)) والسبب سودانيـــــــر (Re: محمد مختار جعفر)
|
Quote: عشان الفلايت وكده الفاتح جـــبرا | ساخر سبيل لمراسلة الاستاذ الفاتح جبرا [email protected] عزيزى القارئ : إنتبه .. فإن البلاد تسير إلى الخلف .. !! معظم المرافق شغالة سااااكت (على كيفا) دون رقيب .. ليست هنالك جهة تحاسب أو تعاقب .. حتى وصل الإستهتار بحقوق وأرواح وسلامة المواطنين ان يسافر قبل أسبوعين تقريباً على متن إحدى رحلات الخطوط الجوية السودانية أكثر من عشرين مواطناً (وفيهم نسوان) وقوفاً (يعنى شماعة) ولمدة ثلاثة ساعات هى فترة مغادرة الرحلة للقاهرة وحتى وصولها إلى الخرطوم كما أوردت ذلك (الزميلة التيار) !! فإذا كان وقوف الركاب (شماعة) فى (الواطه) يعد مخالفة ويعرض ارواح الركاب للخطر فما بالكم (فى السماء( !! والحال هكذا لا تندهش – عزيزى القارئ - وأنت تسافر على متن هذه الخطوط إن جاءك عبر المايكرفون صوت قائد الرحلة وهو يقول : - اعزئي الركاب نحن على وشك الهبوط الرجاء الإلتزام بالبقاء بمقاعدكم واعادة الكراسي الي وضعها الرأسي وربط احزمة المقاعد أما الركاب الذين لم يحالفهم الحظ ولم يجدوا مقاعد يعنى (الراكبين شماعة) فنرجو منهم الإنبطاح أرضاً حتى وصولنا إلى صالة القدوم ! أو أن شاهدت ملصقاً على جدار الطائرة وأمامه (جردل) مكتوب عليه (هنا يمكنك رمى السفة( ! أو رأيت (علوية الدلالية) وهى تعرض بضاعتها على المسافرين والمسافرات متحركة فى رشاقة بين الكراسى قائلة لإحدى الزبونات : - والله وما طالبانى حليفة التوب ده فى (سعد قشرة) سعرو ضعفين ! والمضيفات الشايفاهم ديل كل ملابسهن كووولها بشتروها منى ! لم يغط على صوت (علوية الدلالية) وهى تفاصل إحدى الراكبات إلا صوت جهوري لشخص يتظاهر بالعمى يشق صفوف الواقفين متسولاً : - ياااا راحلين إلى منى بقياااادى هيجتمو يوم الرحيل فؤاااادى وصوت أحد الراكبين يخاطبه : - يا حاج إنتا ركبتا السفرية الغلط .. دى ما ماشة العمرة دى ماشة القاهرة ! فجأتن تنطلق أصوات مجموعة من الشباب الواقفين فى ركن الطائرة وهم يصفقون بأيديهم وهم يفترشون بعض الملبوسات : - بص بص بص .. كل حاجة بي سبعة ونص - الإسكيرتات - )كورس) : بى سبعة ونص - التى شيرتات - )كورس) : بى سبعة ونص - البوديهات - )كورس) : بى سبعة ونص - )صوت) : ما مشكلة لو طلعت ما قدرك رجعيها لينا السفرية الجاية ! لا تندهش عزيزى القارى (الراكب) إذا أزكمت أنفك (فجأتن) رائحة الثوم فلو تتبعت مصدر الرائحة لوجدته ينبعث من كابينة إعداد الطعام بالطائرة حيث إحدى المضيفات تقوم بتجهيز وجبة غداء المسافرين (القطر قام) بينما زميلتها تمسك بالكمشة (وتضوقا) قائلة : - واااى عليا يا هالة الحلة دى ما كترتى ليها الملح ! وأنت عائد إلى مقعدك تصطدم ببائع (الكركدى) فيندلق الكوب على ملابس أحد الركاب الذى يثور فى غضب يجعل المضيفة التى تهرع للتأسف له قائلة : - معليش ما مشكلة جيب قميصك ده نديهو لى (آدم المكوجى) هسه يغسلو ويكويهو ليك قبل ما نعمل (لاندينق( ! وكمان فرصة ممكن تدى (جزمتك) لبتاع الأورنيش دااااك يلمعا ليك ! نحنا موفرين للركاب كل الخدمات ! نحن نسعى لإرضاء كافة المسافرين ! - )المايكرفون) : السادة الركاب أرجو الإنتباه .. سوف يتم تقديم وجبة الغداء .. الرجاء أن ينقسم الركاب إلى مجموعات عشان الغداء الليلة (حلة وكده( ! يبدأ هرج ومرج لعدم وجود مساحات كافية لجلوس الركاب الذين تكتظ بهم الطائرة مما يستدعى أن تقوم إحدى المضيفات بإمساك المايكرفون موجهه حديثها للركاب : - يا جماعة قولو بسم الله .. أدوا فرصة للناس الواقفه شماعة دى تاكل أول عشان تعبو من الوقفة دى ! هنا يختفى الهرج والمرج شيئا فشئا ويقوم الركاب (المشمعين) بالجلوس فى مجموعات على ممرات الطائرة بينما يتبع ذلك قدوم المضيفات وكل واحدة منهن تتجه نحو مجموعة حاملة صحن كبير (القطر قام) وكيس عيش داخله عدد من الأرغفة . - بالله لو سمحتى .. ممكن بس صحن شطة ؟ - والله شطتنا من السفرية الفاتت خلصانة .. أجيب ليكم (شطة خدرا( ! - )أحد المضيفين وهو يتجول بين الركاب) : يا جماعة فى أى زول عاوز زياده !! - يا زول أمسك الصحن ده ما يتدفق .. السواق ده بيتعلم .. مالو كلو دقيقة بيميل بالطيارة دى ! - لا بس بيكون (الكربريتور) ######ان عاوز نضافة .. عشان كده بترترت - طيب ما يودوها لى (عوض المكانيكى) بدل يوم يكتلو ليهم ناس ! بعد مضى ساعة .. يقف الركاب (الأكلو) صف طويل أمام حوض (الغسيل( : - )صوت) : بس معقول (القطر قام) وقلنا ما مشكلة .. كمان (صابون) بدرة ؟ كسرة : شماعة .. شماعة .. ما مشكلة .. بس ناس (سودانير) حقو يصرفو لى كل (راكب شماعة) عند الوصول (رطلين زيت سمسم) عشان (الفلايت) وكده |
الأخ الكريم صاحب البوست ربنا يفك مصيبكم و يأجرنا فى مصابنا الجلل فى الناقل اللاوطنى ويعجل لينا بالفرج
ش
| |
|
|
|
|
|
|
|