|
|
 حلاوة بلي وحلاوة شكلات مع البلح في جيب الجلابية المشختة
|
الجودة كانت ميزة وعامل اساسي في صناعة كل شئ
ياخي حلاوة بلي حقت العيد اياها حلاوة بلي مهما يمر عليها الزمن ويطول
نفس الطعم ونفس الجودة
اسع تاكل حلاوة بلي واكلا بكرة ما اياها ما واحد
.
.
حلاوة شكلات اياها حلاوة شكلات ونفس الشكل في السنون اياهو ذاتو
حلاوة لكوم زمان مش عجيبة وبدقيقا الزهري داك
حلاوة لكوم اسع كلام فاضي ساهي
.
.
الجلابية الخدرا المشختة اياها زاتا
اسع كلام فاضي ساهي
جلابية الدمورية المكرفسة اسع في ، يا حليلا
ويا حليل مصنع النسيج السوداني
قرار من واشنطوم الى الخرطوم برفد ميتين عامل في فت يوم
زيت العامل هو البطلع مش زيت المكنات الامريكية
ودرن العامل انضف من كرفتة البنك الدولي وكل دقون الراسمالية
.
.
كنت متمني اعيد بجلابية خدرا مشختا
لكن الامنية دي اصلا ما اتحققت
الليام دي بفكر جاد ابقى درويش في خلاوي الصايم ديمة مش كلام ممتاز بالله
|
|
 
|
|
|
|
|
|
|
 Re: حلاوة بلي وحلاوة شكلات مع البلح في جيب الجلابية المشختة (Re: عبدالله ود البوش)
|
ود اب علالة عمرو كلو في الخلا والصي مع الرزق بالضهاري
خفسة خفسة بجي داخل الحلة اكان بدور جاز ولا كان بدور كبريت
.
.
بعد طولة جا تابن الحلة صباحا بدري
لقى الخلق منلمة
ها ناس اللمة شنو
اللمة عيد آ زول
ياتو في اللعياد السايب
عيد الرمضان الباخيت بالله
ها جنا ادني كوز موية انلفى الفضيلة
.
.
.
البجغم كدا اجغم وما بعرف اجغم بهينو اللنتظر البيارة تدور
شرح مافي كلام لكة كدي بس
زي الطين فوق ضهر الدحش المارقنو من اللك
عيد مبارك علينا عليكن كل سنة طيبين طيبين
| |
|
|
|
|
|
|
|
|
|
Re: حلاوة بلي وحلاوة شكلات مع البلح في جيب الجلابية المشختة (Re: عبدالله ود البوش)
|
اها اسع قالو ليكن الحلاوة بقوا اسوها من البترول
اصلو دي حلاوة ولا زفت
.
.
ياخي جلابية السلك الزمان ديك البتظهر فيها الفنيلة
كانت عند استاذ محي الدين بس
بطنا طمت منها لمن قالو بسوها من البترول
كيف يعني الجلابية بسوهوها من البترول
.
.
اها اسع بقت حلاوة بترول
.
.
زمان جدي امحمد مشى اشترى جاز من جدي عبدالله للمبة
قال ليهو اديني جاز بقرش ونص
جدي عبدالله كب ليهو كوز واحد بس
جدي امحمد كشكش اللمبة كدي والجاز ولا جقلب تجقلبة واحدة ما جقلبا
شوييييييية جلبقا قدر ما جلبقا ما جلبقت كويس
قال ليهو يا عبدالله الكوز بقى بقرش ونص
قال ليهوآي وغلا بعد شهر ازيد تاني
فرد عليهو جدي امحمد والكلام في 1974 أكان كدي باطنا اخير من ظاهرا
ونحن لاسع قاعدين فوق ظاهرا لحدي ما حلاوة دربس بقت من البترول
| |
|
|
|
|
|
|
|
|
|
Re: حلاوة بلي وحلاوة شكلات مع البلح في جيب الجلابية المشختة (Re: طه إبراهيم عبد الله)
|
اووووووووو أخونا طه ابراهيم
ها ناس وين خترتو مشيتو
.
.
لكن حلاوة لكومك رهيبة
بالله الجنا جابا ذاتا بذاتا
كانت مصورة عندك آ جنا من الزمن داك
.
.
ياخي والله مشتاقين عديل كدا
ات يا طه مشيت وين
روحت سوت ليك دكان في الباجور ولا شنو
.
.
Quote: بوبلين بنفع معاك ؟
|
بوبلين شنو يا زول
خليناهو البوبلين والدبلان في شان جانا التترون الياباني هلا هلا
خلي دكانك فاتح بجيك لبعدين نشتري حاجات العيد جرورة ساهي
دقيق اللقيمات
الزيت للقيمات وللمسوح لووووووووول
سفنجة خدرا للمرة
نعلات بلبل للخزين
تلاتة لوحن صابون
فحم للمكوة
بعد امش البيت واجيك صاد
| |
|
|
|
|
|
|
|
|
|
Re: حلاوة بلي وحلاوة شكلات مع البلح في جيب الجلابية المشختة (Re: محمد البشرى الخضر)
|
Quote: يا عمنا رمضان لسة النص ما انقسم
|
لو بحسبو زي حسابك دا يا ود البشرى كان العطش كتلنا
نحن الليلة عندنا يوم عشرين
زي حساب الراتب
الليلة مو السبت يوم 13 انتهى الاسبوع معناتا يوم عشرين
.
.
تفاؤلوا تصحو
.
.
ود البشرى احسب سمح تعيد سريع
العيد مبارك عليك
امش كسي الحلوين ديل تلقى العيد جا
.
.
كل عام وانت بخير والاسرة والحلوين عيالك
شكرا جزيلا
وتاني ما تغالتنا في حسابنا الاسبوعي
| |
|
|
|
|
|
|
|
|
|
Re: حلاوة بلي وحلاوة شكلات مع البلح في جيب الجلابية المشختة (Re: عبدالله ود البوش)
|
ودالبوش
دخلنا نسلم عليك أولا ، والأهم نبارك عليك الشهر الكريم وكل عام وأنت بألف خير وصحة وتقبل الله صيامكم وصالح أعمالكم ...
بعدين جلابيتك المشختة دي وجيوبها التقول (مخالي) الراعي ماشاء الله قدر ما ترمي فيها تتحمل وتشيل ، أولا خام القماش (أصلي) ما مضروب صين وتايوان ومصر خام سوداني 100% إنتاج فتح الرحمن البشير والشيخ مصطفى الأمين وآخرين ، وثانيا الترزي ما ترزي سوق ، ترزي معروف ومأصل ومفصل يعني أي عيب أنت واقف قدام المكنة ...
الأهم شفت كيف كانت البساطة والإريحية والطيبة والرضى الزائد والكرم الفائض والنفوس التي لا تعرف الغبن والضر والحقد والحسد والزعل ؟؟؟؟ أكان واقف أو قاعد لازم تشيل الفيهو النصيب (تمرة ، بلية - خت ليك شدة كاربة على الياء ، دربس ، شكلات ، كعكة ألخ ) الخشم مشغول (ترمي) في الجيب ... يالها من أزمان يا عبد الله أخوي ،
عيدك مبارك ياعبد الله ...
الشفيع إبراهيم
| |
|
|
|
|
|
|
| |
عبدالله ود البوش
حواء سليمان ابراهيم
فيصل محمد خليل
عبدالرحيم أبراهيم العبيد
محمد البشرى الخضر
خالد المحرب
Abureesh
الامين موسى البشاري
فيس بوك
تويتر
انستقرام
يوتيوب
بنتيريست