|
|
 فــــــــطــــــيــــن
|
فطين
بنية
مولودة والعيد بشاير نور
على وش السما
لمن هلت
زغرودة النسوان
اتلونت بي صندل الليل والخمر
النيل طمح
رمل الضفاف عانق هما
ماشفتو يا ناس لون فطين
ما عرفتو يا ناس
كيفن فطين
لما العيون الفيها تتضاحك كما
يا ناس فطين
مغسلولة بي قطر الندى
كبرت فطين
كبرت معاها قلوب كتار
عشقت فطين
لكنها
عينيها كان حد السما
كانت بروق قبلي وبشارات الزمن
لما الزمن غليان حما
مرقت على تمر البلد
مرقت معاها الامنيات
والريد براعم في خديد ست البنات
فرهد نما
يا بنية من ضلع الرجال الما نقاص
كركر على نخل الفريق
سمبر موشم بالعديل
وركنت في درب الماسافات القبيل
مسداري للزمن العديل
نشاب مرق منو السهم في قلبى
لمان جوز عيونا لي صاد
نشن رمى
ياوجعي من ها البنية
الفيها من الطيبة غنية
وفيها من طمي المحنة
وفيها من ضي القمر
نور القمر
مديت على افق الكلام
اصبع ملون بي هواك
يا ليتني اقدر ارسما
او لو قدرت على الصعود
والريح قوافي
اسرج خيول شعري ليكي والجما
واهديك
قلب مليات عشق
واهديك كلام
ما زي كلام الناس جميل
لكن كلام
زي لون
عيونك
وآخ من عيونك يا فطين
نيلين ونيل
عينيك آه
ما اعظما
|
|
 
|
|
|
|
|
| |
د.محمد حسن
منتصرمحمد زكى
فيس بوك
تويتر
انستقرام
يوتيوب
بنتيريست