|
|
 سناء جعفر. تقول
|
اسالوا صانعي حلة ( البريستو ) إن كنتم لا تعلمون ...
أظن أصعب شئ ممكن يعمله الإنسان انه يتمسك بالأمل والتفاؤل في عالم أي شئ فيه بيدفع لليأس والتشاؤم .. وفكرة انه ( بكرة حيكون أحلى ) بقت ما لافقة بالنسبة لينا كسودانيين مع الوضع الراهن جوة وبرة السودان ..
وكان بدينا بالجوة المغصة بتكتلنا .. وما بنملك إلا ( نتحسبن) و( نتحوقل ) ونسال الله السلامة واللطف والنظر بعين العطف والرحمة على شعب روحه طلعت ونزلت .. وطلعت ونزلت .. والخوف يوم تطلع طلوع جماعي وما ترجع .. ويقوم العالم يقيم سرداق عزاء كبير على الشعب المسكين الذي تعرض للإبادة بواسطة داء المغصة الجماعية ..
كل يوم بسال نفسي .. السودان دة مشكلته شنو ؟! .. والعولاق الحاصل فيه دة حينتهي متين ؟! .. والسجم الجاثمين على صدورنا ديل حدهم لمتين ؟! .. والحاصل لينا دة هل هو نتيجة غضب الهي ولا نتيجة سؤ تصرف إنساني ؟! .. لو غضب الهي .. يبقى ما بنملك غير الدعاء ( اللهم ارفع غضبك ######طك عنا ) .. ( اللهم لا تحاسبنا بما فعل السفهاء منا ) .. بس برجع أقول ربنا سبحانه وتعالى صفته العدل .. وما ممكن يظلم شعل كامل بعمايل بعض السفهاء .. يبقى المشكلة كلها بسبب سؤ تصرف الساسة السودانيين من بداية الاستقلال ولغاية الآن .. دخلونا في حتة ضيقة لدرجة بعض الناس بدت تتساءل شنو الأفضل لينا كشعب ؟! .. إننا نحكم روحنا بروحنا ولا بواسطة مستعمر أجنبي ؟! .. والمذهل في الموضوع انه نسبة كبيرة اختارت المستعمر الأجنبي !! .. انا زاتي كتير بتساءل لو كانوا الانجليز لسة حاكمين السودان يا ربي وضعنا كان حيكون كيف ؟! .. شوارعنا وبيوتنا .. مدننا وقرانا .. مواصلاتنا ومجارينا .. كهربتنا ومويتنا .. صحتنا وتعليمنا .. انسانا وطريقة تفكيره وتصرفاته .. لو الانجليز لسة في السودان أو على الأقل ما كانوا طلعوا منها بدري وحكمونا لفترة أطول موش كان حالنا حيكون مختلف ؟! ..
تفكير غريب جداً .. لكن سؤ المآل ومشقة الحال خلتنا نلجأ ليه .. الفقر والجوع والحرب والموت المدور فينا ليه سنين ودنين خلانا نتطرف في أفكارنا بشكل مغاير لطبيعة الإنسان البرفض الاحتلال وبتوق للحرية .. اها اتحررنا .. وحكمونا ناسنا المننا وفينا .. لون جلدهم ما ابيض ناصع .. ولون عيونهم ما ازرق ولا اخضر ولا رمادي .. ياهم زيهم زينا بياكلو الكسرة والملاح والقراصة والعصيدة والويكة .. بشربوا الحلومر والبقنية والمريسة والعرقي .. بلبسوا العراريق والجلاليب والسراويل .. قروا في الابتدائي مقرر زيدان الكسلان ومريم الشجاعة وبائع السمن .. طيب مالهم الناس ديل ؟! .. ليه بقوا كعبين كدة ؟! .. ليه كرهّونا في البلد ؟! .. ليه كرهّونا في الدين ؟! .. ليه عاوزين يقسموا البلد ؟! .. ليه في عهدهم زاد الفقير فقراً والغني غنىً ؟! .. ليه مرمطونا وشردونا ونشرونا في المنافي ودول المهجر القريبة والبعيدة ؟! .. ليه غيروا حال السودان وإنسان السودان ؟! ..
الغريبة وبعد دة كلو يجينا حسين خوجلي يقول :
" إن الإسلاميين الذين أعرفهم وعاصرتهم وعملت معهم لم يحكموا السودان بعد!"
يعني يا استأذنا الفات دة كلو كان المناظر ولسة الفلم ما ابتدأ ؟! .. كان كدي وحات الله الفلم دة ما لازمنا دخوله حتى لو بدلوا البشير بتوم كروز .. وبدلو وداد وفاطمة بانجلينا جولي وجوليا روبرتس ..دة فلم رعب عديل وعمل لينا خمة نفس وقرب يجننا .. ولو دخلناهو حنقول عليه العوض ومنه العوض في شعب السودان .. ونبدا من هسة نحجز ليهم كل الصواني الفي العالم عشان تكفيهم يمارسو جنونهم فيها ...
يا استأذنا المناظر طممت بطنا بالدموم الكتيرة الاريقت بلا وجه حق في الجنوب الطار من خريطتنا بكل سهولة .. وطممت بطنا بمشاهد العنف المتوحش في دارفور .. الموت بالجملة .. والنزوح بالجملة .. ودخول القوات الاممية بالجملة .. وهسة داخلانا خلعة العدو من الحاصل في كردفان الكانت مدينة غرا وخيرا جوة وبرة .. تخيل يا أستاذنا انا هسة قربت اصدق نظرية المؤامرة على السودان وانه مخطط تقسيمه دة مرسوم من زمان .. وانه الماسونية العالمية ليها دور كبير في البحصل جوة بلدنا دة .. وانه الاسلاميين الهسة حاكمين وانت بتنكر انهم ناسك وبتقول ما بتعرفهم .. هم الأداة المنفذة للمؤامرة دي !! .. والا اديني تفسير واحد مقنع للبحصل دة .. قول لي سبب منطقي .. ناقشني بالحجة .. ولا اقول ليك .. احلف لي ودة حيكون اضعف الايمان .. انه الناس ديل ما قاصدين يعملوا كدة فينا .. وانه الحاصل دة مجرد مصادفات غريبة اجتمعت في بلد واحد وقادته للنتيجة دي .. غايتو يا حسين خوجلي بالغت .. ياخي ديل بحاكموا الناس على الكلمة !! .. تفتكر في سؤ اكتر من كدة ؟! .. يعني انت صحفي وبتكتب من زمان بغض النظر عن اتجاه كتابتك وميولا .. لكن في ذمتك .. حصل في أي بلد في الدنيا شفت ليك جهاز امن وقف خصم قدام صحفي لأنه كتب كلام ضده ؟! .. ولا يمكن تكون من أنصار كلام الأخ محمد عثمان إبراهيم ( الكاتب الغير محترف ) بأنه ( التقاضي أمام الأجهزة العدلية سلوك متحضر وراقٍ ) ؟! .. ودي مغالطة غريبة لانه التحضر والرقي مقترنين بحرية التعبير .. وكان المفروض حسب الوصف دة انهم يخلوا الناس تكتب .. ياخي الكتابة دي غير إنها تنوير ومحاولة تصويب .. برضها تنفيس عن الغليان الحاصل جوة الناس اللسة نضيفة .. ولسة بتقدر تقول ( انظروا ملكنا العريان ) .. ما قلنا ليكم من البداية إحنا شعب ممغوص ومغبون ومضغوط .. يعني الكتابة دي بالنسبة للناس البكتبا .. والناس البتقراها .. .. عاملة زي الخرمة البتكون في غطا حلة البريستو .. ناسك ديل كانوا يتعلموا من الزول الصنع حلة البريستو كيفية اسلوب التنفيس عن الضغط كيلا يحصل الانفجار ..
غايتو حسب ظني الخالي من بعض الإثم انه مسرحية المحاكمة دي ماشة بنظرية اضرب المربوط يخاف السايب .. أو ( الجافلات خلهن .. اقرع الواقفات ) .. بمعنى انها تحذير واضح لأي زول/ة قاعد جوة السودان وتسول له نفسه الكتابة عن مثالب الحكومة الرشيدة أو نتائج حكمها على شعب السودان ..
الكل عارف انه مهمة الصحفي هي كشف الحقائق المستورة والمحجوبة عن الأخطاء .. والعيوب التي يراها في أي مجال بنية التصحيح والتصويب .. كمثال ..هسة لو ما كان الأستاذ علاء الدين دفع الله الدفينة والد الطفلة تاليا الماتت بسبب عطب جهاز الأوكسجين ( رحمها الله ومنح والديها الصبر والسلوان ) صحفي وعارف واجباته تجاه القضايا المهمة كنا نحنا كقراء عاديين من أفراد الشعب التعبان دة عرفنا انه في فساد مالي وإداري حاصل في مستشفى رفاعة ؟! كنا عرفنا انه في ستة أطفال زيها ماتوا عشان قطعة غيار مطلوبة للجهاز تمنا 250 جنيه سوداني .. يعني 75 دولار ؟! .. عليكم الله دي موش مبالغة ؟! أطفال بتموت عشان 75 دولار ؟! .. ومليارات بتصرف على قصور وعربات وبدلات ( ودي ممكن تتقري حسب الهوى .. يعني بدلات - فل سوت .. جكت وبنطلون وكرافتة وقميص وكدة يعني - وبدلات عن اللبس وغلاء المعيشة والمواصلات للوزراء وأتباعهم وأشياعهم ومريديهم ) .. بتصرف على الأسلحة ومؤن الحرب وعتاده .. واريتا كان حرب على عدو غاشم استهدف البلد .. المشكلة انها حرب بتستهدف جزء من ناس البلد زاتم .. حرب كان ممكن تفاديها بوسائل شتى .. لكن يبدو انه العصبة أولي القوة مصرين على استعراض العضلات وإبادة العباد وتقسيم الأرض وتكريس الشتات ..
لو جينا لموضوع الحروب الحاصلة في السودان بنحس انه في تضليل متعمد .. وتعمية عن سبق إصرار وترصد لما يدور حالياً في كردفان ودارفور وابيي .. مافي شفافية عن الوضع ولا تمليك حقايق .. يعني لمن تشوف تلفزيون السودان وتقرا ( بعض ) جرايده .. اصلا ما بتتخيل انه في رحى حرب دايرة في بعض اجزاء من البلاد .. تفتح القنوات يجنك بنات حلوات ملونات ولابسات البيور سلك والهامر والشيفون .. بتكلمن بايديهن اكتر مما بتكلمن بلسانن .. بتونسن مع الضيوف ببساط احمدي وبقاطعوهم كمان .. وهاك يا ضحك بسبب وبدون سبب .. وبرامج غنا وتنظير وكورة واعراس .. كانه المحارق القايمة دي برة السودان .. كانه مافي ناس بتموت .. وقرى بتتحرق وتنهب .. ونساء بتغتصب .. اعلامنا المرئي خلانا متخبطين بين حقيقة غايبة ومغيبة .. واشاعات مخيفة عن نية الحكومة استخدام اسلحة كيماوية وبيولوجية وارد ايران على سكان جبال النوبة .. هسة لو الحكومة بتسمح للصحفيين بالتواجد جوة المعمعة وتصوير الحاصل بحذافيره وعكسه لافراد الشعب المغيب دة موش يكون احسن ؟! ..
لو سالتوني انا الليلة مالي بنقنق قدر دة والدنيا خميس وآخر اسبوع .. حقول ليكم انا زيي وزي ناس السودان ممغوسة وكاتمة .. اها التّور وجعي هو خبر محاكمة الاستاذ سعد الدين ابراهيم كاتب اغنيتي المفضلة ( العزيزة ) قامت كل المغسه الجواي انفجرت مرة واحدة .. قبيل شنو قلنا ؟! .. التنفيس ضروري .. واسألوا صانعي غطا حلة البريستو ..
سن
|
|
  
|
|
|
|
|
|
|
|
Re: سناء جعفر. تقول (Re: أبوبكر أبوالقاسم)
|
Quote:
الغريبة وبعد دة كلو يجينا حسين خوجلي يقول :
" إن الإسلاميين الذين أعرفهم وعاصرتهم وعملت معهم لم يحكموا السودان بعد!"
|
او كما قال العقيد - و ليس على العقيد حرج - قال : ( نحن لم نستعمل القوة بعد ... اللخ اللخ )
اها ح ينقذونا تااااااااني!!
يا للهول عديل كدا ياخ!!
بل الارجح انو ح تتحقق رؤيا الاستاذ/ محمود ..
-------
سلامات يا باشمهندس
و التحية لسناء جعفر
| |
|
|
|
|
|
|
|
|
|
Re: سناء جعفر. تقول (Re: قيقراوي)
|
| Quote: بل الارجح انو ح تتحقق رؤيا الاستاذ/ محمود .. |
والله يا قيقا انت بقا منك خوف !!
ــــــــــــــــ
سلامات ابو بكر .. وتحية واعزاز لصديقة
سناء جعفر وقول ليها بعادك طال ..
| |
|
|
|
|
|
|
|
|
|
Re: سناء جعفر. تقول (Re: دينا خالد)
|
دندنة
و الله على بالي طول ما بكتب في المداخلة التانية ديك
لكن ما اتخيلتك ح تمسكيني من يدي البتوجعني دي:
دي قاعد توجعني شديديد ياخ! .. انت مؤلمة كدا مالك؟
كتبتها ( نبوءة ) راسا عديل تاني اتذكرت البروف أمين عدلتها لرؤيا .. ذتو ما عارفا كدا الاسبلينغ بالعربي صاح و لّ غلط!
دفن الليل اب نبوءتن برّة
دي الحتة الجابتك على بالي :
Quote:
اها ح ينقذونا تااااااااني!!
يا للهول عديل كدا ياخ!!
|
الحقينا بالصورة بتاعات الانقاذ الاحتاج ليو انقاذ ديك ياخ!
قدر ما فتشتها ما لقيتا
| |
|
|
|
|
|
|
|
|
|
Re: سناء جعفر. تقول (Re: قيقراوي)
|
Quote: لكن ما اتخيلتك ح تمسكيني من يدي البتوجعني دي:
دي قاعد توجعني شديديد ياخ! .. انت مؤلمة كدا مالك؟ |
ههههههههههههههههههههههها هههههههههههههههههههه حلوة والله حلوة
عجبتنى شديد ..
وانا ذى ما قال عادل امام ,, كرامتى بتوجعنى ...
ـــــــــــــــــ
ابو بكر وسناء بعد اذنكم .. اصلو قيقا دا عندو
حتان كدا بمشى يتدسا فيها ثم يفرغ ما عندو ... اول
ما يجى يفرغ ما عندو من نوع الكلام دا يفاجا بانو كيسو فاضى
وناس المرصاد قاعدين .. لووووب .
| |
|
|
|
|
|
|
|
|
|
Re: سناء جعفر. تقول (Re: دينا خالد)
|
( اللهم لا تحاسبنا بما فعل السـفـهاء منا )
دي الجزء الكمشو رقيب بكري الالكتروني في المقال اعلاه ...
لذا لزم التنويه ..
يا بكري شوف ليك حل بالمناسبة مفردة ( السـفـهاء ) دي و غيرها كتير من الكلمات الملقم بيها رقيبك دا مفردات واردة في القرآن ..
-------
يا دندنة قيقا دا لو لقى " كيسو " .. بتخارج ليكم من هنا طواااالي
فضلة خيرك جينا هنا ساكين لينا كيس ساااي .. فاضي ملان ما مهم ذاتو .. بس نلقاهو اول!
| |
|
|
|
|
|
|
|
|
|
Re: سناء جعفر. تقول (Re: قيقراوي)
|
شكرا سناء .. ملخص دقيق لكل شىء موجعنا
بابكر زيكو
ياقيقر : انقاذ تاني هسة لوقاللو لي تعال ننقذك ما بقع بردلب ميت .. هو انا فضل فيني شنو عشان ينقذوه
عليك الله ياقيقر اعمل تشريح داخلي لنفسك كدا .. واقرأ مقال سناء الفوق ده تاني وتالت ورابع
انا لي هسة ماعارف الموجعني شنو .. غربة ولا وطن مدمر ولا اولاد قدامك بتربي فيهم
علي ارضية من الجليد الممكن اتكسر في اي لحظة .
وجع .. وجع .. وجع .. غايتو شوفو لينا صينية دوار كبير بتاع شاحنات فجنوننا سيكون جماعي
زيكو
| |
|
|
|
|
|
|
|
|
|
Re: سناء جعفر. تقول (Re: بابكر عثمان مكي)
|
زيكو يا زيكو ..
Quote:
عليك الله ياقيقر اعمل تشريح داخلي لنفسك كدا .. واقرأ مقال سناء الفوق ده تاني وتالت ورابع
انا لي هسة ماعارف الموجعني شنو .. غربة ولا وطن مدمر ولا اولاد قدامك بتربي فيهم
علي ارضية من الجليد الممكن اتكسر في اي لحظة .
وجع .. وجع .. وجع .. غايتو شوفو لينا صينية دوار كبير بتاع شاحنات فجنوننا سيكون جماعي
|
انقاذ شنو ياخ!؟
بس يرجعونا محل ل ل ل ما انقذونا داك ذاتو ..
ياخ على الاقل السودان كان مليون ميل مربع .. و الناس فقرانة لكن ما بتحمل كل الكراهية دي لي بعض!
و الدةلار كان بي 12 جنية بالقديم .. و قالوا جايين عشان ما يصل 20 جنية!!
قال انقاذ قال
بالله تامل و تحسر .. و ادي ربك العجب!!
لووووووووول
مالكم علينا ياخ انت و سناء
ما تخلونا في ي ي نعيمنا دا ياخ
هو فضل في عقل يتدبر او روح تتامل تاني بعد دا؟
| |
|
|
|
|
|
|
| |
abubakr
أبوبكر أبوالقاسم
قيقراوي
دينا خالد
بابكر عثمان مكي
فيس بوك
تويتر
انستقرام
يوتيوب
بنتيريست