كتب الكاتب الفاتح جبرا المتوفرة بمعرض الدوحة
|
|
 عند الساعة ستة ستة الا ستة الدخان والدلكة أنا خلني عقلي لكة (هترشة )
|
تنبية :-اللغة المستخدمة في هذا السرد العامية السودانية أي زول/ة بعيد عن نبض الشارع السوداني وما من الطبقة الكادحة ما حيفهم سجم خشموا.
مدخل :-في بيت عزاء في زمان ما ومكان ما
في صباح يوم أثنين أسود من قرن الخرنوب رنا هاتفي المحمول وكان علي الطرف الآخر صاحب صوتة أشبة بصوت الحمار عندما يتبول ودائما ما أتشأم من سماع صوتة صباحا ونقل لي خبر وفاة والد صديق وأنا مابين النوم
واليقظة زكرت لة سوف أتصل بالصديق لتعزيتة بالتلفون وعند عطلة نهاية الاسبوع سوف أذهب الية ولكن صاحبي
أنسان لحوح . يأخي كدة عيب الزول دا أحتمال يسافر السودان وبكرة عندوا ختمة قرآن علي روح والده . أتفقنا أن نلتقي
يوم الثلاثاء بعد نهاية الدوام ببيت العزاء . جاء عصر الثلاثاء كلمح البصر وبعد نهاية يوم دوام مرهق حملت حالي وذهبت الي هناك ، دخلت ومع بداية كلمة الفاتحة شممت رائحة غريبة آآي والله ريحه خمرة ودلكة ودخان( يعني كبرتت عروس عديل كدة ) حتي ظننت نفسي أنني قد ضللت الطريق الي بيت العزاء الشيء المتذكروا كلمة الفاتحة لكن
قريت شيء علي روح الميت الله يعلم الكضب خيبة. سلمت ووجدت الصاحب قد سبقني الي هناك جلست بجوارة وانا متل هيك مواقف باكلا في حناني لكن صاحبي ما بيستحمل زول عندوا أسهال عاطفي مزمن وبكاي وبكاءهوا زاتوا
مابيدسوا ومايشوف ليهوا طرف توب طوالي بيجيهوا أبو الشهيق وعيونوا تحمر وأضنينوا تقيف ، بلاهي من كترة ما
بكاي في مرة من المرات كنا علي طاولة عشاء بأحد المطاعم العربية وكان مشغول بأنجاز عضم من صنف الطاجين المغربي ودخل أحد السواح
الخليجيين يرتدي شماغ وعقال ففي آخر لحظة صاحبنا رأي طرف الشماغ والجلباب فهوي العضم علي الطاولة حتي
أصدر صوت وفتح خشموا فسألني صاحب المطعم بلغة غير العربية أيش فيهوا صاحبك قلت ليهوا صاحبي شاف الخليجي أبو مؤخرة غليدة دا وأفتكروا أمراءة .
نواصل
|
|
 
|
|
|
|
|
|
|
 Re: عند الساعة ستة ستة الا ستة الدخان والدلكة أنا خلني عقلي لكة (هترشة (Re: عادل الباهي عبدالرازق)
|
كانت الصالة مزدحمة بالمعزين من جميع الاجناس مغاربة ، صوماليين ، سودانيين وأجناس آخري وكمية اطفال
الصالة أصبحت أشبة ببنطون شندي زمااان ، ريحة الكبرتا ماتدي الدرب ، سبحان الله نسوان زماان الواحدة بتجي
بيت البكاء شق كراعا يدخل الضب ونسوان الزمن دا الواحدة يقولوا ليها فلان مات تتصل بالحنانة وتولع دخانا ، هي
الواحدة لوماعاوزا تحترم ضكر البط المباريها دا يأخي ماتحن علي حالة العزابة الزينا ديل نحنا ذنبنا شنو الواحد يقعد
يشمشم في الريحة زي الكديس ، ماقلنا حاجة العاوزا تعمل الحاجات دي التعملا لزوجها في البيت وبالمساء ولمن الشمس
تشرق التشوف ليها صابونة لايف بوي ولا فنيك تتمشك بيها وتبقي مارقا ، في اللحظة دي أتذكرت نكتة واحد مشي مع أصحابوا بيت عزاء ولمن دخلوا قالوا ليهوا ديك زوجة المرحوم أمشي عزيها الزول كشف للزوجة المرحوم بطرف عينوا لقاها مابتتقابل هي أصلا قبل وفاة زوجها شكلا عاضي وبعد الوفاة وشيها بقي يقطع الخميرة من البيت عمل نفسوا رايح شاف ليهوا أجمل أمراءة ومجيهة تب وقلدا ليك وقعد يجوعر وأصحابوا بالخلف شابكنوا ياخونا دي مازوجة المرحوم وصاحبنا لاهنا ولاهناك كأنهم بيتكلموا مع الحيطة لمن زهجوا منوا شالوهوا شيل من المراءة وطلعوا بره قام قال ليهم بي زعل يأخي مالكم بتجروا فيني ، قالوا ليهوا يأخي ماقلنا ليك دي ما زوجة المرحوم قام قال ليهم يعني أسع الفكيتوني منها دي الماتوا ليها شوية ؟.المهم قمت قفلت الباب الفاصل بين النساء والرجال وجيت قعدت مكاني طوالي صاحبي البكاي شبكني يأخي السخانة قلت ليهوا أنت موهوم درجة الحرارة سبعة درجات . شوية كدة وقام علي حيلوا
هجرتوا في مكانوا ماشي وين ؟ قال ماشي يشرب موية ندهت علي طفل ذو عشرة أعوام ياولد جيب موية لعمك دا ، غايتوا لاعب معاهوا ثيردباك عشان مايفضحني معاهوا كل عشرة دقائق يقوم يقول عطشان الهاهوا بي لتر موية وهو نفسوا ومناهوا يمشي محل النسوان عشان يخفف دموا ولمن فتر الطفل من نقل الموية أتلفت عليهوا يأخوي أنت جاي
تعزي ولاجاي مركز غسيل الكلي ، غايتوا تعبني أكثر من تعب ليونيل ميسي لريو فرديناند كل
دقيقة يجيني بي موضوع يمشي بيهوا بي هناك آخر حاجة قال ماشي يعزي زوجة صاحب الدار قلت ليهوا الولية دي أنصارية سنه ومنقبة ولاتصافح الرجال .
نواصل
| |
|
|
|
|
|
|
|
|
|
Re: عند الساعة ستة ستة الا ستة الدخان والدلكة أنا خلني عقلي لكة (هترشة (Re: عادل الباهي عبدالرازق)
|
دقائق معدودة وأحضر المطلوب غرقت القطن زيت وحشيتوا في البرطمان وولعت فيهوا وكبستوا ليهوا في ضهروا
وهو يقنت يأخي بقيت كويس أتحسنتا فكا المصيبة دي من ضهري وأنا أقول ليهوا لالا دي بتريحك. ولو مانفع خليهم
يجيبوا لي موس أفصدك عشان الدم الفاسد يطلع، عشرة دقائق بلاهي صاحبي وشيهوا بقي زي نقاع الزير . أستأذنت
من الحضور وصحبتة في طريقي ، قبل ما نبعد مترين من بيت العزاء شبكني الله لا تاجرك، الله لاغزا فيك بركة ،الله
لاتريحك . سألتوا يازول مالك ؟ قال لي أنت ماعارف منطقة السلسله الفقرية دي منطقة حساسا عاوز تشلني ولاشنو؟
وحجامة شنو الكمان الهنا ؟ أنت قائل نفسك قاعد في قندهار بتاعتكم ديك؟ وكمان فاتح نفسك عاوز تجرحني بالموس
عشان الدم الفاسد يطلع بلاهي في فاسد غيرك .اتلفت عليهوا يازول شنو شابكني ضهري ضهري اصلوا ضهر ياسمين عبدالعزيز؟مش ياهوا ضهرك المسردب دا البيشبة ضهر أبوالقدح ولاغيروا . طيب ممكن أسالك سؤال قلت ليهوا أتفضل . أنت ريحة الكبرتا القبيل
دي المريحا بيها منو من النسوان  ؟؟.
| |
|
|
|
|
|
|
| |
عادل الباهي عبدالرازق
فيس بوك
تويتر
انستقرام
يوتيوب
بنتيريست