|
|
 يا ستــــــــــار ....
|
يا ستّار
ويا سايق رحيق الضي
وكاشف سر حريق النار
ويا لاهب طريق الصي
وعارف حرقة المحتار
بقيت احتار
وبين خوف الوجع والخوف
بقيت في اخر المشوار
اباصر في المروق ارجاك
والاقي السكة هي التختار
اجرجر ايدي واتلقاك
وتطلع يا قريب الدار
معاي بين الفرح والروح
وتطلع من شذى الاسحار
اضمك فيني اقدل بيك
ادسك في عيوني نهار
براك تمرق تعاين لي
وتضحك لي كما الازهار
اشيلك تاني وامرق بيك
ودرب السكة هو الودّار
احسك في النَفَس طالع
اشهقك برضو بي اصرار
وامد ايدي التعاين ليك
اسد خوفي وعيوني كتار
الاقي الروح بتجري عليك
براها وتسبق الاقدار
ويا قادر تعلمني
صراع الالفة
والتحنان
ويا الصادرت مني الخوف
مليت اوردتي بيك امان
منو الوراك سر ضعفي
وملاني معاكا كلي حنان؟
منو الاداك سحر الكون
وجمّل بيك لي الالوان
وكنت الذات لمعنى الحب
وكنت الرقة كنت جنان
ويا ستّار علي روحي
وعلي قلبي الصبح ودران
وطووووول الشوق ياعاين ليك
وتبسم ليهو انت كمان
ويا كاسي الشوارع ضي
منو الوراك انو زماااان
شوارعي تضج وتحلم بيك
وتفرح بيك يا انسان
ويا ساتر عليّ انا
بعد ما كنت بيكا ملان
لقيتك برضو مليان بي
وكنت معاك انا الولهان
ويا ستّار
ومن بين اللهيب والنار
بقيت احتار
ويا مترار خيوط النور
منو السواكا لي تذكار
وغرسك جوه في ذاتي
وساب جوايا بيك محتار
يا ستّار
عبدالله وداعه الامين
لندن 28.05.2011
|
|
  
|
|
|
|
عماد شمت
فيس بوك
تويتر
انستقرام
يوتيوب
بنتيريست