|
|
 المصطلحات السودانيه لوصف الاعراض المرضيه
|
 امس مشينا لدكتور عظام لفحص نتائج معينه
وكعادة دكاترتنا الظريفين انهم بيحبوا يتونسوا
وبصراحه الدكتور البشوش والوناس مهضوم اكتر من الجادى ومركب وش
اها كلمه من هنا لهنا ومعاى امى واخويه الكبير
طرح مدى معاناة الدكتور فى تفسير بعض المصطلحات البيتداولها المرضى السودانيين لأعراض مرضهم
مثل:-
خمة نفس - شحتافة روح
لصراحه اضطريت اكتبها عشان اتذكرها واجى اناقشها
لكن بالجد ضحكت لمن الله غفر لى وما عرفت زاتو يعنى شنو شحتافة روح
|
|
 
|
|
|
|
|
|
|
 Re: المصطلحات السودانيه لوصف الاعراض المرضيه (Re: شهاب الفاتح عثمان)
|
ههههههههههه
وجع شنو
هههههههههههههههه
والله يا دوك شهاب الله يعينكم
شعبنا شعب لذيذ جد حتى فى المرض
قالوا فى مريضه سودانيه مشيت مصر وبتقول لدكتور عندى رطوبه
الدكتور يشيل ويتذكر دا يكون مرض شنو
المعروف للمصريين الرطوبه بتجى للحيطه ما للبنأدمين وقاموا دقوا تليفون لدكتور سودانى وعرفوا انها قاصده الروماتيزم
:)))))))))))))
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: رانيه محمد الشيخ)
|
الأخت رانيه سلامات ..
و شكراً على الخيط اللطيف ..
و التحية للصديق شهاب ..
لعلك حيث استغربت وجع النوايط ، ستموتين من الضحك ، حين تسمعين مصطلحات مثل :
وجع الشراشيف ..
و الجضمارة ..
و لقد كانت من الطرائف حيث عملت بإحدى قرى الجزيرة ، أن جاءتني امرأة مسنة بصحبة ابنتها ، فرجبت بها ، و سألتها عن شكواها ، فأفادتني بالآتي :
( و الله يا دكتور .. جسمي دا ما فيهو حته سليمه .....كلوتي دي ، متْل الخاتفا ( ك لِ ب ).. و البطن دي تبقبق متْل البليله .. و الكرعين ديل التقول العقارب البتراضعن .. )) ..
أها رايك في الحاله دي التشخيص بكون شنو ؟؟
الحقيقه منذ ذلك اليوم شعرت بأنه يجب أن يكون في المقرر في الجامعات كورسس عن التعابير المحلية للمرض ، و المفاهيم الثقافية في بلدنا للمرض ، و مسبباته .. و هو ما يوجد بعض ملامحه في كورس بجامعة الجزيرة ، يعتبر مدخل للطالب لدراسة الطب ، اسمة introduction to medicine ..
شكراً لكِ ..
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: أحمد الابوابي)
|
هههههههههههههه
من أين أتى هؤلاء الاطباء؟(على وزن من أين أتى هؤلاء؟.. لطيب الذكر الطيب محمد صالح)
دي كلمات واااااضحة ما دايره درس عصر الا للحناكيش
خمة نفس: هي ضيق في الصدر يظهر في صورة تسارع الشهيق والزفير، قد يكون بسبب اتفاخ البطن او غيره.
شحتافة روح: ضيق وانزعاج غير واضح الملامح او غير معروف السبب احيانا.
وجع النوايط. هو وجع النوايض: وهي الكلى.. جمع كلية: ويستخدمه السودانيين لدى أي احساس بطعنة او وجع في جانب البطن.. وليس المقصود وجع الكلى في حد زاتها.. مقصود محل الكلى.. فقد يكون من التهاب في الكلية او اي منطقة مجاورة لها.
.كلوتي دي ، متْل الخاتفا ( ك لِ ب ): يا ابوابي الحاجة دي تقول: ان كليتها تؤلمها وتشبه الألم مثل انغراس أسنان ال###### في بطنها هي او في قطعة لحم.
البطن دي تبقبق متْل البليله: دي واضحة، هنالك اصوات وكركرة قد تكون غالبا غازات في البطن او هيجان في المصران.
الكرعين ديل التقول العقارب البتراضعن : ههههههه.: الحاجة رجلينها ما شايلاتنها تب، فترانة وتحس بوهن.. يعني في نتاحة في الكرعين.. ما تقولوا لي ما بتعرفوا النتاحة..
ياخي والله المفروض تدوني الزمالة الفخرية للجنة أطباء السودان ،، كمترجم لهذه المصطلحات
| |
|
|
|
|
|
|
|
|
Re: المصطلحات السودانيه لوصف الاعراض المرضيه (Re: اشرف السر)
|
الأخ أشرف السر
تحياتي ، و المحبة ..
و الله أنا بمجرد ما انتهيت من مداخلتك دي قررت أدخّل شرحك دا جوّه المقرر الحا نعملو للطلبه ... طبعاً دا في الكلية ( الخاصة ) الح أ عملا أنا !!!!!!!!!!!........ و ح نجيبك تدرّرس معانا ، و نديك بالدولار..
رايك شنو ..
لاكين قول لي رنا يخلي لينا أبونا الشير ، و حيكومته، لأنه مؤكّد الجماعه الشيوعيين ديل لو جو الحكومه ح يقفلو الكليات الخاصه ، و يقطعو رزقنا أنا و انتَ .. الله يكفينا شرّهم .. ( وجه مرتعب )..
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: أحمد الابوابي)
|
دَبَسْ(بفتح حرف الدال والباء وتسكين حرف النون)= تورم
دبس فى الرجلين، دبس فى الرقبة،...
الهايفات: ناس طب الاسنان ممكن يورونا الاسم الصحيح لتلك الاسنان التى تظهر عند الاطفال.
الحبوبات يقمن ب كَى لثة الطفل حتى يتمكن الطفل من استخراج الاسنان بسرعة بلا متاعب.
بالطبع ياتى بعدها الطفل بتسمم الدم ومن اعلاماته اسهال وحمى كنتيجة للكى.
بعض مناطق السودان- لا اود التخصيص- يطلق على تورم الصفن (كيس الخصية)اسم كُوكا.
مرض السفلس -من الامراض المنقولة جنسيا التى كانت منتشرة بكثرة فى السودان- يطلق عليه الساس.
لمرض السفلس مضاعفات تظهر بعد سنوات وسنوات. ومن المهم جدا عند اخذ التاريخ المرضى السؤال عنه. المشكلة
لو سألت المريض عن السفلس لا يعرفه ولكن عندما تسأله عن الساس يبادرك بالاجابة.
وشكرا للبوست
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: ombadda)
|
شكرا ombadda
بالنسبة لقولك
Quote: دَبَسْ(بفتح حرف الدال والباء وتسكين حرف النون)= تورم
دبس فى الرجلين، دبس فى الرقبة،... |
اوافقك القول فيه..
واضيف انه في بعض المناطق يخصص للورم الناتج عن حساسية فقد يكون الورم مثلا في فروة الرأس أو في أي منطقة أخرى
ويفضلون علاجه بثب زيت السمسم البارد (تبريده بوضعه ليلا في اناء مفتوح) عشان التفكير ما يتجه للتلاجات
| |
|
|
|
|
|
|
|
|
 Re: المصطلحات السودانيه لوصف الاعراض المرضيه (Re: اشرف السر)
|
الغدة: يقال فلان أو فلانة عندها"غدة" ويقصد به تورم الغدة الدرقية بسبب نقص اليود أوغيره.
الدوبال :مرض التليف الكبدي
بولهرس، بولهرسى: بلهارسيا
الطُمام: هو الغثيان
المصران: مرض القولون العصبي
الفشفاش: هو الرئتين.
العِرق: هو الوريد.
الحليق: التهاب اللوزتين
أبو الشِهِيِّق: هو الفواق أو الفاق ويقصد به اضطراب الحجاب الحاجز عندما يضغط على القفص الصدري والرئتين مسببا اندفاع الهواء بقوة من الرئتين..
التتوير: هو إنبات الأسنان اللبنية عند الأطفال فالطفل يتور أو تتور
المرارة: الحويصلة الصفراوية وكل الامراض المتعلقة بها
السهراجه و الوجواجه: الحمى الخفيفة.
الوِرده: هي الحمى ويقال للشخص " ميرود"
عيني بترف: رفرفة العين هي حركة الجفون حركة لا إرادية .. وتفسرها الحبوبات ببشارة أو رؤية شخص عزيز غائب.
الوتاب :ونقول فلان موتب تب، يعني مسمم سواء لدعته أفعى او عقرب.
مُكوفِر: الكُوفار هو اضطراب يصيب معدة الشخص المعتاد على أكل المخمر من
الطعام كالكسره مثلا... وعند تغيير نمط الطعام يصيبه الكوفار أو الكوفاره.
مَعَسَّم: العسم هو التشنج.. ويستعمل لوصف تشنج عضلات الظهر
الفليِتة: بنفس معنى التعسم.
مشموطه: التقلص العضلي المؤلم
الطايوق: النخاع الشوكي.
= شكلنا ماشين على قاموس يحوى كافة الأمراض والأعضاء ومسمياتها..
استعدوا بس...
ترباية حبوبات.. تقولوا شنو
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: عثمان محمد كرار)
|
ود كرار
سلامات
| Quote: قوقليا قالو شحتفة الروح حاله تصيب النساء |
لا نخالف شيخنا المبروك قوقل..
لكن نقول الشحتافة او الشختفة المخصصة لجنس النساء هنا.. تصيب النسوان السمينات، لما الواحدة تمشي مشوار طويل على رجلينا
وتكون الواطه حر شديد.. فتجي الواحدة داخلة البيت وهي مصابة بالعطش والارهاق
قتقول ليك: روحي مشحتفاني شدييييييييد..
وهي تقصد الفتر + احساسها بالضيق نتيجة للعرق والحر الشديد
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: اشرف السر)
|
كنت بتكلم مع واحد وفي معرض كلامو قال لي والله عندي اش قدي تاعبني تعب شديد خلاس !!!
طبعا حاولت اظهر ليهو اني ما فهمت المعني بسؤاله عن الاسباب فبادر بقوله انو عندو دبره وبيشعر بورم والم في حته تانيه... طبعا مجرد ما قال دبره ... وقع لي ما يعنيه وما يعني باش قدي هذه ...
تختلف المصلحات دي من منطقه لمنطقه فمثلا زي كلمة الجرايه تماثل الجضماره لكن بدون الم يعني اسهال يخلي الواحد يجري علي الخل
_________________________________
المدخل لدراسة الطب وتعضيده بمقرر مهارات الاتصال مهم جدا يا دكتور الابوابي خاصة لمجتمع السودان فيه اختلاف الثقافات يلعب دور مهم جدا في تميز الطبيب السوداني
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: ساميه حامد)
|
والله يا دكاتره قتلتونى بالضحك
بركه التخصصى محاسبه
واحد + واحد = اتنين
لا خفتشه لا نفتشه
لكن دا قامووس حيكون ابداااااااااااااع
انا فى كلام اصلوا ما فهمتوا بجيكم فيه برااااااااااحه لشرح
والله سعيده البوست عمران بالعباقره اللذيذين
تسلموووووووووا وما تبعدوااااااااااااااااا
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: محمد ميرغني خليفة)
|
عمنوّل عشة وكت جاتا الوردة مشت لي حكيم شفخانة الحلَّة... الحكيم قال ليها: لازم تمشي حكيم الاسبتاليا الفي البندر، اتخمخمت وفاتت. أها وكت سعلا موجوعه من شنو قت ليهو: قاعورد، عندي شحتفت روح، وخمة نفس، والقلب طاحونة ود الكريل التح التح ، والفقر شوال عيش خاتنو فوقن، والبوادرين الجريوات البنهشن فوقن، والخشم عرديب، واللضنين يسون صنننننننن
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: رانيه محمد الشيخ)
|
حاجه مشت الدكتور مع زوج بنتها,الدكتور قال ليها:
عندك تاريخ مرضي للحاله دي يا حاجه؟
الحاجه ما فهمت
اها يا حاجه الاعراض البتحصل ليك شنو؟
مافهمت
طيب يا حاجه بتشعري بي شنو؟
برضو ما فهمت
زوج بنتها إتضايق قام قاليها:
يا حاجه الدكتور قصدو البيوجعك شنو
طوالي الحاجه قبلت علي الدكتور و قالت:
و الله يا دكتور بيوجعني تحشر الرجال في الكلام الما بيخصهم.
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: صلاح مختار)
|
ســـلآم يا رآنية.
عندي إنضرابة، وبطني ممشياني، ومن الوآطة تفلل
النحار يقول يا ليل.
وآحد داقس مشى للدكتور بيشكي من بطنو. الدكتور بعد كشف
عليهو قال ليهو: يا حاج امش جيب لينا الفُسحة.
قال ليك عمّك ده تلآتة يوم يفتشو عليهو، آخر النهاية لقوهو
قاعد يتفسح في شارع النيل.
برضو:
عندي ابكباس، وفلآن شايلو حمار النوم...
تحياتي...
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: رانيه محمد الشيخ)
|
مرحبا رانيا وضيوفها الكرام ,
بوست جميل ودمو خفيف :-)
لفت انتباهي مسمى (التتوير) عند الأطفال من مداخلة د.أشرف السر , بمعنى التسنين عند الأطفال ,
ودي تسميه ذكيه جدا , بالانجليزي المرحله دي اسمها eruption وده يكاد يكون نفس المعنى رغم بساطة
الاسم بالطريقه السودانيه , وطبعا بيعني بزوغ الأسنان أو تتويرها , بالله شوفوا أهلنا البسيطين ديل أذكياء كيف ؟؟
عندي ملاحظه لدكتور ombadda , الهايفات ديل يطرشني فيهن , النبي فيك يادكتور وصفن لي ديل ياتن ؟؟ هههههه
محتمل مقصود بيهم الأسنان اللبنيه عموما , على أساس انهم حيتبدلوا ويقوم غيرهم ؟؟ عشان كده اعتبروهم هايفات ؟؟
برضو تسميه ذكيه !! :-)
أها انا اللفظ المحيرني وماقدرت لي هسا أعرف الحته دي وين في الجسم بالضبط , مقولة : بلابيطي وقعن !! ههههه
الله يكفيكم شر البلابيط الواقعه , وسلامتكم كلكم من كل شر :-)
احتراماتي ..
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: سناء عبد السيد)
|
ياسناء يا شقيقة
قلتلى كوفار ونوفار مع الخمشة = يا معدة يا شقيقة ؟؟
اها كان بقت معاهن عقيل فى الكريعات وعثيم فى الضهر وفاق
شنو امشى الاردن مثلاً ؟؟
يازولة هرشتينى بالحاجات الماعرفم انا ديل (كوفار ونوفار)
فشنو :-
اللهم لك الحمد والشكر على نعمة الصحة وتمام العافية
اللهم اشفى مرضانا وكل مرضى المسلمين
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: احمد الأمين على إدريس)
|
Quote: دَبَسْ(بفتح حرف الدال والباء وتسكين حرف النون)= تورم
دبس فى الرجلين، دبس فى الرقبة،.. |
رانيا وضيوفها وتحديدا امبده سلام..زمان ابوى الله يرحمه كان بقول حاجتين ما عندهن دواء الدبس والعواره وبوصفك للدبس يا امبده لو حسب كلام الحاج زيه وزى العواره الانا متاكد انها ما بتتعالج تبقى مصيبه ولا شنو..
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: د.محمد بابكر)
|
Quote: بركه التخصصى محاسبه
واحد + واحد = اتنين
لا خفتشه لا نفتشه |
طيب يا رانية خدي:
ديانة: عملاء دائنين
تلجين: بيع الأصل الثابت بقيمته الدفترية واحيانا أقل (حسب رأي اللجنة و.....التجار)
مقايطة: (تنطق بالطاء وليس الضاد) شراء قطعةارض مثلا مقابل خرفان + سيارة + اسمنت + فول مدته منتهية + تأشيرة بمهنة راعي.... غايتو الثقافة السودانية دي حاحة في منتهى الروعة
نعود إلى مسار البوست الطبي
ابو اللغود: تورم اللوزتين
ابو الضباح: جرح طولي يصيب الرقبة
قمت الصباح ولقيت عيني مقموطة: قفل كامل للعين أو العينين بافرازات لزجة (لن تستطيع فتحها ولو بزردية)
المخروقة: لوحة الكتف
الحبن: نوع من الأورام
الكتكوتة: السعال الديكي، من ضمن العلاج البلدي الموصوف لهذا المرض....شرب لبن الحمير
احد الأخوان ذكر أن المصريين استغربوا من كلمة (الرطوبة)، الأردنيين يسمون الأضراس (طواحين)، وانا مستغرب ايه نوع الأكل البياكلوه المحتاج ...طواحين؟؟
،
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: ناصر البطل)
|
| Quote: لما امشي الدكتور ما بعرف الفرق شنو بين الاسهال و الإمساك |
يا ناصر الامساك ياهو اليابوسه ... والاسهال ياهو الجرايه اذا كان بدون الم يعني تشيل ابريقك وتعني الخلا اما لو كان فيهو لوايه كمان ياهو الجضماره بذات رقبتها
لو كان الجرايه في شكل زراق وتكررت عدة مرات في اليوم فاحتمال كبير تتعرض للبو وهو فقدان السوائل وبعض العناصر الهامه
_________________________________________
البو هو في الاصل الشئ الفارغ يعني زي الماسوره
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: Ashraf el-Halabi)
|
| Quote: لكن بالجد ضحكت لمن الله غفر لى وما عرفت زاتو يعنى شنو شحتافة روح |
لو كنت المسؤول لسحبت منك الجنسية السودانية واخليك ( بدوووووووووووووون)
زمان يا رونو لما امي تمشي معاى الدكتور بتوصيني كتييييييير بتقول لي كتر ليه امراضك وكتر ليهو كلامك عشان يديك دواء كتييييييييييييييييييييير واهم حاجة تقول للدكتور ( عندي خمة نفس )
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: Ashraf el-Halabi)
|
| Quote: ابو الضباح: جرح طولي يصيب الرقبة |
أبو الضباح: جرح من تآكل أسفل اصابع الأرجل وما فيه دم وأظنه من فطريات وهو لا يبرأ بسهولة وبشوف الناس بغسلوه بالكلونيا
| Quote: المخروقة: لوحة الكتف |
بل هي الحوض
| Quote: الحبن: نوع من الأورام |
أظنه كيس دهني ودائما يقوم في الملاين.
أمراض بالدارجي
السكري : المرض البارد
الشلل: الفالج
السل: التيبي
الفاق: أبو الشهيق
الحساسية:الدبس
الصداع النصفي: الشقيقة
الاسهال: الزرقة
الزكام: النزلة
الاستسقاء: الطوحال - الروى
الدسنتاريا: العُصرة
شد عضلي: قطيعة - فليتة
خلع: فكك
القاوت: مرض الملوك
الجرب: البُرجُب
الاستفراغ: الطُراش
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: خالد المحرب)
|
الاخت الحنكوشة/ رانية
سلام
مرة كان عندنا طبيب حنكوش.. جاء ليهو عمنا عجوز..
الدكتور: مالك يابوي؟ ان شاء الله؟
العجوز: خير يا ولدي إلا امبارح بطني تلوّي وتلوّي..
وشوية كدي بديت أجري وأجري.. الليل ده كل أجري..
الدكتور: باستغراب!! يا حاج كيف تجري الليل كله بحالتك وحتى سنك ما بتساعد على كدا؟!!
العجوز: يا ولدي نسوي شنو إلا نقبل على دواكم ده!!
الدكتور الحنكوش يطقطق القلم في اسنانه بس نجدته الممرضة.. وقالتلو.. الحاج بيسهل طول الليل!!
تحياتي
| |
|
|
|
|
|
|
|
|
 Re: المصطلحات السودانيه لوصف الاعراض المرضيه (Re: خالد المحرب)
|
| Quote: البافى بجى عمك ود البوش يتمو ليك |
اخونا خالد المحرب
امس قلت لرانية مزنوق زنقة ترزي يوم الوقفة
وهي ما زالت نتظرة الهدوم اتخيتن واتسغلت وانكون ونمشي بيهن العيد
وان كان ولا بد خد دي من طرف الخرتاية
حبوبتنا بلعت لي حبوب سلفا استلهبت ( حبوب السلفا بتستلهب عندما تعرض في الهواء )
وسوت ليها وردة ودبس في السداغات
جات حبوتنا التانية تشوفا ولقت الناس قرروا اودوها الحكيم
قالت ليهن هوووووي يا جنيات ما تودوها الحكيم
جيبوا ليها ببيسي كولا بتعالجا عشان كونو الببسي كولا فيها الدواشات
ا
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: اشرف السر)
|
ام الصٍبيّان (تصغير صبي): مرض الصرع.. وخصوصا عندما يصيب الاطفال.
اللستة: اللثة،، يجيك يقول (عندي التهاب في اللستة).
المويه البيضاء (مرض عيون): اظلام عدسة العين.عندما تفقد عدسة العين شفافيتها تدريجيا وبالتالي يقل مستوى الرؤية.
الموية السوداء او الزرقاء (الجلوكوما): هي ارتفاع في ضغط العين
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: اشرف السر)
|
| Quote: ام الصٍبيّان (تصغير صبي): مرض الصرع.. وخصوصا عندما يصيب الاطفال. |
عزيزنا اشرف ...اها ام الصبيان دي عندنا هناك في الصحراء بتعني مرض الذهان ...
وهي حاله قريبه من الزول يكون (مشوطن)
وبعدين سمعت با ام قشيط ؟؟ والقندال*..
__________________________________________
القندال هو عملية ادخال الاصبع جوه الفم (الصقع) وجبد الراس لفوق مع وضع الارجل لتثبيت الشافع لحدي ما يقدف ويطرش وتمارسها الحبوبات
| |
|
|
|
|
|
|
|
|
|
Re: المصطلحات السودانيه لوصف الاعراض المرضيه (Re: Elsanosi Badr)
|
ام فريحانه: وهي حالة تاتي للطفل الرضيع او من هم دون الخامسه واحيانا الكبار وهي الضحك الذي يسبب بعض الاعراض المرضيه مثل ضيق النفس والام العضلات المحيطه بالتجويف الصدري والشعوربالتعب العام
________________________________________________
مرات بتسببها (كلكلة) الشفع بغرض الاضحاك
| |
|
|
|
|
|
|
| |
شهاب الفاتح عثمان
أحمد الابوابي
اشرف السر
ombadda
عثمان محمد كرار
Elsanosi Badr
ساميه حامد
نادر النور آدم
عبدالله ود البوش
معاوية المدير
Abdlaziz Eisa
احمد الأمين على إدريس
سناء عبد السيد
د.محمد بابكر
كمال عكود
ناصر البطل
الطيب شيقوق
محمد ميرغني عبد الحميد
فيس بوك
تويتر
انستقرام
يوتيوب
بنتيريست