|
|
 طالبة علم نفس | الرجاء المساعدة بمعلومات ما استطعتم
|
طلب مني نقل موضوع لسودانيز، من باحثة في مجال علم النفس، تبحث عن معلومات، و الباحثة هي اختي و تحتاج المعلومات لبحث.
_________________
السلام عليكم
ابدآها من وين ولا من وين ...
اولا آسفة علي الكبرى انا ما عندي حساب في سودانيز اون لاين، امكن تحفيز الكادحين الزهجانين من القراية يخلي السيد بكري يدينا رصيد هنا أقصد حساب ...
باختصار: أنا طالبة دكتوراة لرسالة محورها حول الأثار النفسية و الاجتماعية لتأخر الانجاب و سلوكيات البحث عن علاج في المجتمع السوداني.
الحمدلله تجاوب الكثير من الازواج مع الدراسة و كانت هناك معلومات قيمة جدأ، للاسف تنقصني بعض المعلومات و التي لضحالة معلوماتي،
لم أجد بداً من الاستعانة بالعارفين في العوالم الاخري، و من بينها الاسفيري، ما احتاج معرفته و حسب معرفتكم الشخصية هو:
- هل مفاهيم الخصوبة - الانجاب - الاطفال من المفاهيم الموجودة في التراث السوداني وأعني في الاغاني و الامثال السودانية تحديداً؟ هل يمكنكم استحضار امثلة؟
- هل هناك فرق في وجود هذه المعاني بين الاغاني الحديثة و التراث مثلا اغاني الحقيبة؟
و الف شكر مقدما لكل من قدر يساعد و من لم يقدر.
|
|
 
|
|
|
|
|
|
|
|
Re: طالبة علم نفس | الرجاء المساعدة بمعلومات ما استطعتم (Re: Rihab Khalifa)
|
| Quote: و الف شكر مقدما لكل من قدر يساعد و من لم يقدر. |
شكرك عم من لم يقدر وأنا منهم
و الله أنا قلت موضوع يمكن أساهم فيه
لكن يا خيبة
أظن أن موضوعها هذا مبحث جديد بنغ في السودان وعليها الاعتماد على الدراسات المسحية (survey) ولو كلفها باقي عمرها لأهمية الموضوع ونوعيته.
تصوري! افتكرت ممكن أسرق ليها كتب عبر (إلكترونك بوكebook) و أرسلها لها
بس عندنا هنا مفاهيم الزواج –خليك من الانجاب كلها مشكوك فيها
و الله ما طالباني حليفة حضرت محاضرة هنا عنوانها (لماذا نتزوج)!!!
| |
|
|
|
|
|
|
|
|
|
Re: طالبة علم نفس | الرجاء المساعدة بمعلومات ما استطعتم (Re: Abdlaziz Eisa)
|
"إن شاء الله تغلبك بالعيال وتغلبها بالمال"!!
وفي الزمن دا من الولدة الأولى فأنت مغلوب مغلوب مغلوب!!!
اعتقد أن أهلنا في دارفور عندهم بعض الأمثال التي تمجد الخصوبة...
شوفي ليكي داية كاربة وأجلسي معاها برواقة عشان تحكي ليكي عن الآثار النفسية للإنجاب وعدم الإنجاب.
حاولي تعرفي المفاهيم والمصطلحات المرتبطة بالإنجاب السريع (الحمل بعد الأربعين مباشرة) وكذا الأثار النفسية للأم التي تظل سنوات شبابها في دوامة: حمل - ولادة - حمل-رضاعة-ولادة-حمل... خاصة من أنجبن أكثر من دستة غير الدفاق.
حاولي تعرفي علاقة كثرة الإنجاب بالسعي لتكبيل الرجل وعرقلة جهوده للزواج للمرة الثانية أو الثالثة.
شوفي رجالة الزمن دا المشلهتين ومدى استعدادهم النفسي لكثرة الإنجاب بعد أن أصبح تعليم الأبناء مرهقا وجدوى الاستثمار المادي في تعليمهم شبه منعدمة.
موضوع أختك يا رحاب بيعمل للواحد نفسيات كفاية كدا!
| |
|
|
|
|
|
|
|
|
|
Re: طالبة علم نفس | الرجاء المساعدة بمعلومات ما استطعتم (Re: محمد الأمين موسى)
|
هل مفاهيم الخصوبة - الانجاب - الاطفال من المفاهيم الموجودة في التراث السوداني وأعني في الاغاني و الامثال السودانية تحديداً؟ هل يمكنكم استحضار امثلة؟
- هل هناك فرق في وجود هذه المعاني بين الاغاني الحديثة و التراث مثلا اغاني الحقيبة؟
مساء الخير
الأمثلة عن الإنجاب والأطفال تحديداً موجودة وبكثرة، والحقيقة ما عرفت ممكن افيدك بأي امثال بالضبط عن نجاب الاولاو والبنات، أو عن الإنجاب ككل، وعموماً خدي مجموعة الأمثال التالية عسى تفيدك إن شاء الله :
الولادة صغرة والمشي صباح
الحساب ولد
الولد يسميه أبوه
اليك ليك حتي لو كان لبن عشر تمسح بيه عينيك
الخرقا ولادة
اللي ما عندها بنت ما عندها أم
اللي في بيته بنات ما عنده غريب يبات
بنت عشره لوزه مقشره وبنت عشرين نزهه الناظرين وبنت ثلاثين أم البنات والبنين
بنات البخوت مالهم تخوت
بنت الاكابر غالية لو كانت جاريه
بنت الاصول عشرتها تطول
جانا الصبي وصلينا على النبي
دلعوا الولد وربوه وان كبر يعرف امه وأبوه
زي خلفة الناموس البنت خايبه والولد متعوس
عقربتين في حيط ولا بنتين في بيت
قلوب الامهات ما تشيخ عن حب الفلذات
ولدك ولدك ليوم زواجه وبنتك بنتك طول حياتها
جناك شبعو وطبعو
البنت من غير إبرة زي القط بدون مخلب
البنت تتدلل ليوم ما تتكلل
الولد يعملها لو في حضن السلطان
الولد أوله خرى وأخرته للمرأة
(سزري يعني بس هو كده من التراث)
اللي ما يبغا يجوز بنته يغلي مهرها
اللي جاء له توم يحرم عليه النوم
بحجتك يا بتي آكل أنا وأنتي
قلوب الامهات ما تشيخ عن حب الفلذات
سلمتي
| |
|
|
|
|
|
|
|
|
|
Re: طالبة علم نفس | الرجاء المساعدة بمعلومات ما استطعتم (Re: بت قضيم)
|
| Quote: - هل مفاهيم الخصوبة - الانجاب - الاطفال من المفاهيم الموجودة في التراث السوداني وأعني في الاغاني و الامثال السودانية تحديداً؟ هل يمكنكم استحضار امثلة؟ |
سلام يا رحوبة وأختها وضيوفهما الكرام
القصيدة أدناه مشهورة و تعد من التراث السوداني
وتصف رجل كثير الإنجاب منذ بدايتها بي يجيك الحول
والحول بي زول والزول غول، مقصود به كل سنة
يُنجب له أطفال كبيري الحجم، وحتى ختام القصيدة بأنه
قد كمل جميع الأسماء العربية والأفرنجية بسبب كثرة
إنجابه
والقصيدة هي:
يجيك الحول وحول بي زول والزول غول
هيا فقاسه مامعقول هيا قشارة مامعقول
عليك عز دينك المعقول تضربي الجملة بالميت
قداحات فول وعيشو تموت لي دمسيسي عرض وطول
ونحن تعابة نحن غلابة لا نقداً ولا محصول
وجاز اللمبه في غلبة وحق الفطره للطلبه وركوب التكسي بالقلبه
ولولا الروح بقت سلبه نمص الصلصه من علبه وكان الجاتنا في الرقبه
وده كلو كوم وتاني ام العيله كوم الوليه الفنجرية حلاوة نبق
والوليه الغجرية ودايري دق البطن منفوخة ديمه طبق طبق
ويجيها الحول وحول بي زول والزول غول
ومره تديك الهواده وترمي زي زولين زيادة
الله أريتو الزول يزاول ياحكم صفر ده فاويل
مرقتم بت الذين ودايري تعمير القبايل
واب شنب تعبان يعدهد يلحس الكوع رغم أنفو الكان مقاول
في اليمين مقلوده سيسي واحد الله
وبالشمال مطبوقه سوسو مالو تاني
واب شنب شايل أماني تلاته حركه
وكل حركه معاها بركه وفي البطن بنجوسه فرفر
والقطر بي وراها صفر والله يستر
عيني باردي وماني حاسد وربنا يتم المقاصد
نحن عارفين الله أعظم والرزق ينزل مقسم للبجاهد والمعسم
الا اسمعو يارفاقة الربايه خشم بيوت والمعايش ماها توت والمعزب اخير يموت
الوليد إن كان مبرجل شن بسوي يصبح المصران معوي يمسي والمصران معوي
لا يبهرج لا يضوي الولد كان يربا قوي عملة استرليني سايرة ويبقي صاروخ أرضي جوي
النجاح مو من كتير والكتير البشبه العنزين يطير والبطير من أرض جاعت كان أخير
ودار أجيكم بي بشارة وقولو خير
ربنا يخلي الخواجه ماتمر قدامنا حاجه الا ينضم فيها حاجه
ياخلق ياعقلي صبه تلحسو الرز بالمربه تبلعو عروق المحبه
تلدو كبه وراها كبه عشان تقيف ماتاخدو حبه
انت ياجاموسه دُري وهو اليكتح وانت ضري
الليله يقطعو حبل سُري بكره يظهر حبل سُري
والعداد ماسكاهو سِري لاتحدثي لا تقِري
إلا تنشري وتدُري ويلا يادايتنه جُري
انه قول المعري خففي الوطأه خليلي هاهنا قبر سليلي
جِمي جِمي وبكره تمِي ويلا يانخلايه رميِ
أرمي أردب فول وسمسم وخلي ملك الموت يلملم
وتاني أزرعو ما تشاءوا وتاني أحصدو ما تشاءوا
لابطوناً كالخيامه لا ولادة ولا قيامة لا سمايه ولا كرامه
لا ديونا ولا طعاما قد تقولون حراما لست مفتي ولماذا لست أفتي لست أدري
شيخنا ود الشايقي خريج الخلاوي يعشق الماحي وطارتو والمدايح وأب كساوي
قافل أضانو من الخلايق لا مصايب لا بلاوي الا في عرس وطلق قد يجيب بعض الفتاوي
حالتو ساتره ونص كم اسطي في سوق السماسره بيعه رابحه وبيعه خاسرة
وهو شيخ متصوف في أهازيج الليل يمدح ياليلي ليلك جنه معشوقك أوه وأنه
وتجيب المدحه ليلي وتهرول غيرهن وتزيد الشيخ غلباً قاب قوسين وأدني
ونساوين الحواري لاتغيب عن عقلو أبدا أوصافها كالاتي حاجه سعده لجنه خردة
حاربة في المهديه وهي ألت لجلافيت وكراضم وعن قريباً ستزول الابديه
واحيلت للمعاش واراحت واستراحت ثم تأتي سعديه وهي رهن الخدمات
وعيون فاتنات تعرف الوقت المناسب وتُحاسب وتحٌاسِب لست في الدنيا حراما
اخر العنقود ليلي افخر العينات ليلي اجمل الزوجات ليلي
زات مرة والممرات كثيرة شيخنا صلي الصبح نافله وبآياتٍ قصيرة
وتعوذ ودعي الله بأن لايتجوز ثم نقنق وتمنطق وبراس السبحه طقطق
ومضي يتلو الكتاب مره بالمال والبنون فتبسم وتنسم ثم آيات الزواج فتجهم
فإذا مالاقي مثني وثلاث ورباع وقف الشيخ طويلاً مثلما فِعل الضباع
وبكي من أجل هون البقرية وشهيق كالدجاجه البيطريه
قال يبكي وهو يرخي من حبالو الوتريه انها دنيا الشماته فأنا لا أملك غير تلاته
انني قصرت في حق الكتاب ساعاني ما أعاني من عذاب
اين مني زوجةُ بكر فتيه اين مني الصندليه اين مني المحلبيه والعطور البلديه
والعطور الاجنبيه في نقاءٍ كبحيرة طبرية
ثم قال استغفر الله وحفحف وتقيف ومضي يطلب الله عروسه يمشي من غير فرامل وتروسه
جات ضحية سمينه هايله ومدهنه جزارو فالح في تجارة القرصنة
خلف الكراع فوق الكراع وكدوسو زي المدخنه بين كفتين من الخشب حرق شباب السوسنه
وتمر سنه وتفوت سنه وشيخنا خلي المئذنة وبقي في الحرد والطنطنه
وبقي يوم هناك ويوم هنا وهو زاتو عجز وانتنا
شيخنا يالشيخ البجم خلف زرازير السجم وحدين اساميهم عرب ووحدين اساميهم عجم
بدا بي محمد ثم زوجات الرسول العشره ثم كل الذين تجمهرو للبيع تحت الشجرة
طلحة الخير والزبير ثم سعد وسعيد ثم سته مبايعين وكمل اسماء الصحابه والكرام التابعين
وتابعين التابعين والنجوم البارزين واسامي الخالدين ثم عبد مايشاء من البنين
عبدالرحيم عبدالسعيد عبدالمعين عبدالغفور ثم سمي في الختمام
عبد مالك الملك ذو الجلال الاكرام
وتبحر في القوافي وتراتيل المضافي قمر الدين
وقمر صناعي الدين ونور الدين ونار الدين ولهب الدين
وسيف الدين وسكين دين وخنجر دين ومطوة دين وموس الدين وعاد لاوين
واخر الدور بقت الوحده تفقش في تمانية شهور وتلدي أناتي دور فوق دور
ومافي ضكور والراجل تقول مسحور ومابخليلو مرةً بور
وزرعتو مابتقع واطه وعصرو عليهو وزادو عليهو في المالطه
والزريعه عملت ليهو زرناطه يكتب الطلبات دست المقاسات بالدست
لحسو قدر العندو ست حتو درج الخزنه حت والوليه تنبح اكان اصبحت واكان مست
جيب حقايب وعجايب ومفسته ومنسته وسما وجواري واراضي طواني وأكما واهلما وهلما
انها نكبة روما والمتمه ان طعم العرس حلوٌ ولذيذ وهو باقات وأقداح نبيذ والخوازيق
ستأتي وإنتفاخات القرنتي وعيال كالنمتي ولا تقاوم بالدينتي
انت تصرخ بنتي بنتي وهي تصرخ حني حني وتتي تتي (ولا علينا) .
| |
|
|
|
|
|
|
|
|
Re: طالبة علم نفس | الرجاء المساعدة بمعلومات ما استطعتم (Re: النذير حجازي)
|
Quote:
رحاب انتي اخت ايمان زوجت صديقي محمد الشيخ ولا تشابه اسماء ؟
Osama |
الاخ الكريم اسامة
عذرا ما تمعنت في المداخلات لاستعجالي، و خاته في بالي انه اختي سترد بتفصيل احسن مني
انا عندي اخت اسمها ايمان، لكن زوجها ما محمد الشيخ، تشابه اسماء احتمال
شاكره ردك علي البوست
و اظن بكري سمكر الخاص و ما شغال
و اظنها تعرف البروفيسور مالك بدري شخصيا، و لكن سادعها ترد شخصيا علي مداخلتك
| |
|
|
|
|
|
|
|
|
|
Re: طالبة علم نفس | الرجاء المساعدة بمعلومات ما استطعتم (Re: Rihab Khalifa)
|
ادم صيام مشكور علي الحضور، و جيتك مقدرة و براها مساهمة... بس قصة لماذا تنزوج دي غريبة شوية
خطر في بالي اخلص قصة الانجاب و ما انجاب دي و نشوف التانيين ديل مالهم!
كوستاوي
سلم يمينك ... معلومات قيمة جداً، استمتعت بقراءتها جدا...و حتما ستفيد دراستي ...
+++++++++++++++++++++++++++++++++++
عاطف
مرحب بيك سيد بيت ...
+++++++++++++++++++++++++++++++++++
اسامة
شكرأ علي الاقتراح، أعرف بالتأكيد البروف، و لكن لم يخطر علي بالي الاستفاده من علمه ...
أقتراح حصيف و ساعمل به إن شاء الله ...
++++++++++++++++++++++++++++++++++++
خالد كودي
الكتاب مفيد و في لب الموضوع أكييييد،
بس شؤالين: تعرف لو الكتاب موجود و يباع بالسودان؟ و تعرف عنوان بريد د. امال اللكتروني؟
مشكووور كتير
+++++++++++++++++++++++++++++++++++++
عوض
من النقاط المهمة: معني الخصوبة و مرادفاتها و تقسيماتها بالنسبة للمجتمع السوداني، يا ريت لو اسهبت شوية ف المعاني، و النقطة مهمة يا ريت لو سمعت زيادة في الاتجاه ده ...
مشكور علي الايضاح و الاقتراح – قتلت بحوث الاحفاد بحثاً و قتلتني ، شكرا
+++++++++++++++++++++++++++++++++++++
عبد العزيز
اكيد مشكور علي الاتنين: المرور و الفوق
++++++++++++++++++++++++++++++++++++++
محمد الامين
والله ما بكذب، الموضوع من ناحية النفسيات عمل لي انا ستو نفسيات تقيلة ... والله قصة عرقلة جهود الرجل للزواج باخري دي ما كنت مفكرة فيها، بس طلعت من المعلومات الظهرت بصورة متكرره، يا ريت لو في طريقة لعرض بعض النتائج لما ربنا يأذن بنهاية الدراسة...
الافكار الاخري برضو مفيدة جداً، بعضها يضيق بحثي بوسعه، لكني اعترف باهميتها و ربما في اوراق لاحقة قد اتمكن من طرق بعض هذه النواحي ....
مشكور كتير
++++++++++++++++++++++++++++++++++++++
بت قضيم
الامثال جميعها مفيدة، البعض قد كون كافي لمناقشته في الرسالة ...
يكمل جميلك لو زودتيني بالمرجع ان امكن.
ولا تعتذري عن امثال جدودنا، و تسلمي انتي.
++++++++++++++++++++++++++++++++++++++
النذير
سلام ليك انت كمان ... القصيدة غاية في الطرافة ... جد مطالعتها تغير المزاج و كمان مفيييدة.
يا ريت لو عندك معلومات اكتر عن القصيده، زي التب و المرجع ان وجد.
مشكوووور
+++++++++++++++++++++++++++++++++++++++
سيف
العديل و الزين لا تزال متداولة و لو لقينا زول ادانا النص كامل يا سلااام.
مشكور
++++++++++++++++++++++++++++++++++++++++
الكووووووبري شكرا
++++++++++++++++++++++++++++++++++++++++
و اون لاين – شكرا شكرا
| |
|
|
|
|
|
|
| |
Rihab Khalifa
آدم صيام
Kostawi
عاطف عمر
اسامه خليفه
Khalid Kodi
Abdlaziz Eisa
محمد الأمين موسى
بت قضيم
النذير حجازي
saif massad ali
فيس بوك
تويتر
انستقرام
يوتيوب
بنتيريست